KENIUJ TIKCHIUASKEJ MAJ MOTSAKUILI NETAUELITALIS

4 | Xikontemo inepaleuil Dios

Biblia kijtoua:

“Itakilo espíritu yejua nejin: tetasojtaj, yolpakij, yolseujtokej, amo yolijsiuij, kualtakamej, yolkualmej, takuaujtamatij, yolnejmachmej uan ueli motsakuiliaj” (GÁLATAS 5:22, 23, TNM).

¿Toni kijtosneki?

Dios uelis techpaleuis maj amo titetauelitakanok. Ika iespíritu uelis techpaleuis maj tiknextikan seki taman tein kuali tein toselti amo tiueliskiaj. Okachi kuali maj tiktemokan inepaleuil Dios, uan maj amo toselti tikixnamikikan. Komo titakuaujtamatij iuan Dios, timomachiliskej kemej tatitanil Pablo. Yejua kijkuiloj: “Nikpia chikaualis para nochi tein nikixnamiki porin toTajtsin nechmaka chikaualis” (Filipenses 4:13). Ijkon, uelis tikijtoskej: “Nonepaleuil ualeua itechkopa Jiova” (Salmo 121:2).

Uelis tikonchiuas nejin:

“Achto nitetauelitaya uan nitateuiaya […]. Sayoj ke Jiova nechpaleuij maj nimopata” (WALDO).

Ika nochi moyolo xikontajtani Jiova maj mitsonmaka iespíritu uan maj mitsonpaleui xikonnexti seki taman tein kuali (Lucas 11:13). Xionmomachti itech Biblia kampa ika tajtoua netasojtalis, se yolseujkanemis, amo se yolijsiuis uan se uelis se motsakuilis, tein mitsonpaleuiskej amo xiontetauelitaok, uan xikontemo ijkon tikonchiuas itech monemilis. No moneki xionmouika iniuan akin kinextiaj nejin tataman tein kuali, porin uelis mitsonyolchikauaskej xiontetasojta uan xikonchiua tein kuali (Hebreos 10:24).

Tein sekin kinpanouani: WALDO

Mochikauak amo tetauelitasok nion tateuisok

Waldo semi tajyouij keman moskaltij uan nejon kichiuak maj kintauelita oksekin. Yejua kijtoua: “Nochipa nimoteuiaya iniuan oksekin akin no kinamakayaj drogas. Se tonal, kitakeujkej se takat akin semi tamouilil katka para maj nechmikti. Nechtsoponij ika cuchillo, sayoj ke uelikok nicholoj”.

Waldo nion tepitsin kiuelitak maj inamik peuani momachtiani Biblia iniuan itaixpantijkauan Jiova. Yejua kijtoua: “Semi nikintauelitaya uan hasta nikinuijuikaltiaya. Sayoj ke nikmoujkaitak maj yejuan amo keman nechnankilianij ika kualanyot”.

Satepan, Waldo no peuak momachtia Biblia. Yejua kielnamiki: “Nechouijmakaya nikchiuas tein nimomachtijtoya. Niknemiliaya ke amo keman ueliskia maj amo nitetauelitaok nion maj nitateuiok”. Sayoj ke, se taman tein ixnesi itech Biblia kipaleuij.

Yejua kijtoua: “Se tonal, Alejandro, akin nechmachtiaya Biblia, nechiluij maj niklero Gálatas 5:22, 23 […]. Yejua nechmelauilij ke komo niknekia nikchiuas tein kuali amo niueliskia noselti, ta monekia maj Dios nechpaleui ika iespíritu. Tein nechiluij senkis kipatak kemej nitanemiliaya”.

Waldo peuak amo tetauelitaok porin mokauak maj Dios kipaleui. Yejua kijtoua: “Nochankauan uan akin iniuan nimouikaya amo ueli kineltokaj keniuj semi nimopatani”. No kijtoua: “Achto nitetauelitaya uan nitateuiaya [...]. Sayoj ke Jiova nechpaleuij maj nimopata”.