¿Akoni kinmakixtis akin nemij kampa moteuiaj? | ¿Toni kijtoua Biblia?

Tein Naciones Unidas kitematiltij:

• Desde 7 de octubre hasta 23 de octubre de 2023, ompa Israel uan Gaza kampa moteuijtokej, panoua 6,400 momikilijkej uan 15,200 kinkokojkej akin amo soldados. Uan no, semi miakej kisanij de ininchan.

• Kemej ompa Rusia uan Ucrania moteuijtokej, hasta tonal 24 de septiembre de 2023, ompa Ucrania momikilijkej 9,701 akin amo katkaj soldados uan 17,748 kinkokojkej.

Akin tajyouiaj ompa kampa moteuijtokej, ¿toni kiniluia Biblia? ¿Se tonal motayektalis?

Kemaj motayektalis

Biblia kijtoua ke Dios ‘kitamis neteuilismej noyampa taltikpak’ (Salmo 46:9). Itaixyekanalis Dios kinixpatas tekiuanij de nikan taltikpak (Daniel 2:44). Kichias maj nochin kualtsin nemikan nikan taltikpak.

Jesucristo yejua tekiuaj itech iTaixyekanalis Dios. Xikonita toni kichiuas:

• “Yejua kimakixtis pobre akin tsajtsi maj kipaleuikan, no akin tajyouijtok uan akin amo kipia akoni kipaleuis. Kiiknelis akin tajyouijtok uan amo teyi kipia, uan kinmakixtis pobres. Kinmakixtis de akin kintajyouiltia uan kinkojkokoua” (Salmo 72:12-14).

Dios kichiuas maj iTaixyekanalis kitami nochi taman tajyouilis tein kiualkui keman moteuiaj itech altepemej.

• “Kinuachilis nochi ininixayo, uan amo akin momikilisok, nion tayokoyas nion chokas nion tajyouis. Tamikya nochi tein achto techtajyouiltiaya” (Apocalipsis 21:4).

Amo uejkaua iTaixyekanalis Dios tayektalis nikan taltikpak. Biblia kijtojka ke tikitaskiaj ‘moteuijtokej uan tikmatiskiaj ke miakkan no moteuijtokej’, uan yejua nejon tikitstokej axkan (Mateo 24:6). Nejin uan okseki taman tein mochiujtok kinextia ke tinentokej ‘itech tonalmej keman tamitiya’ inintaixyekanalis tekiuanij de nikan taltikpak (2 Timoteo 3:1).