¿Kiixtopeuaj vacunas itaixpantijkauan Jiova?
Amo. Itaixpantijkauan Jiova amo kiixtopeuaj vacunas. Sejsemej kiixpejpenaj ox motaliliskej vacuna oso amo. Miakej itaixpantijkauan Jiova kiixpejpenaj motaliliskej.
Tiktemouaj tapajtilis tein okachi kuali uan tiktasojkamatij maj tamatinij kitemokan tein ika timopajtiskej keman tikpiaj uejueyi kokolismej. No semi tikintasojkamatiliaj taixmatinij ika tapajtilis maj motenkauakan ke tapaleuiskej uan motemakaskej ijkon kichiuaskej, okachiok keman momoyaua se kokolis.
Itaixpantijkauan Jiova kitakamatij tein chiuanimej ika tapajtilis tanauatiaj. Kemej neskayot, desde ke peuak ueyi kokolis COVID-19, nikan itech Internet itaixpantijkauan Jiova kitalianij tanauatilmej itech miak tataman tajtolmej, tein ika tayolchikauaj maj moyekpiakan kemej tekiuanij tanauatiaj kampa nemij. Kemej neskayot, tayolchikauanij maj amo monechikokan kampa miakej moajsiskej, maj amo kisakan ininchan, maj amo olochyetokan miakej, maj momapajpakakan, maj motenpikikan uan okseki taman tein kiixtalianij tekiuanij keniuj moyekpiaskej (Romanos 13:1, 2).
Itaixpantijkauan Jiova uejkaujya peujkej kichijchiuaj amaixmej tein kimelauani nejin taman:
Sejsemej moneki kiixpejpenaskej keniuj mopajtiskej (Gálatas 6:5).
“[Nejin amaix] amo kijtoua maj tikuikan se taman tapajtilis oso pajti nion kijtoua keniuj se mopajtis. Sayoj kimelaua tapajtilis tein onkak uan kikaua maj sejsemej kiixpejpenakan tein kiitaskej ke okachi kuali” (¡Despertad!, 8 de febrero de 1987).
“Amo akin mitsoniluis ox tejuatsin uan mokoneuan moneki namotaliliskej vacuna, nejon tejuatsin moneki tikonixejekos” (¡Despertad!, 8 de diciembre de 1965).
Tiktemouaj timopajtiskej porin tejuan semi tikpatiuitaj tonemilis (Hechos 17:28).
“Keman itaixpantijkauan Jiova kipiaj se kokolis, kinitatij tapajtianij akin kimatij ke uelis kinpajtiskej. Kipatiuitaj nemilis uan kitemouaj maj kisentokakan nemikan komo kiitaj ke taixejekol uan amo kitapanauiliaj tein kijtoua Biblia” (La Atalaya, 1 de mayo de 1976).
“Itaixpantijkauan Jiova amo kiixtopeuaj pajti oso tapajtilis porin kinekij paktoskej uan okachi miak xiujmej nemiskej. Tein melauj, ijkon kemej Lucas, se tapajtijkej itech yekinika siglo akin katka imomachtijkauj Jesús, seki itaixpantijkauan Jiova tekitij kemej tapajtianij [...]. Itaixpantijkauan Jiova semi kitasojkamatij nepaleuil tein kitemakaj tapajtianij uan kuali tekit tein kichiuaj” (La Atalaya, 1 de febrero de 2011).