6. ¿Keniuj Salmo 118 mochiuak itech Jesús?

⁶ Nejon neajokuilis ika motajtoua itech Salmo 118, tein xa kijkuiloj David. Ompa moijtoua nejin: “¡Jiova, xitechmakixti, ika kualtakayot, timitstataujtiaj! [...] Tatiochiual akin uitse itokaykopa Jiova”. Akin kiitakej Jesús keman ajsik Jerusalén itech tonal 9 metsti nisán, tepitsin achto ke kimiktiskiaj, kijtojkej nejin tein moijtojka ke kichiuaskia Mesías (Sal. 118:25, 26; Mat. 21:7-9). Sayoj ke ¿keyej tikijtouaj ke nejin salmo ika tajtoua se neajokuilis tein mochiuaskia miak xiujmej satepan? Maj tikitakan ke no kijtoua ke “tet tein tepanchiuanij kiixtopeujkej mochiuako tepanchikaualoni” (Sal. 118:22).

7. ¿Toni judíos kichiuilijkej Jesús?

⁷ “Tepanchiuanij” akin kiixtopeujkej Mesías yejuan taixyekananij judíos. Amo sayoj amo kikakkej oso amo kinekkej kineltokaskej ke yejua katka Cristo. Miakej judíos hasta tajtankej maj kimiktikan (Luc. 23:18-23). Yejua ika, yejuan inintajtakol maj kimiktianij.

8. ¿Keniuj Jesús ueliskia mochiuas “tepanchikaualoni”?

⁸ Komo Jesús kiixtopeujkej uan kimiktijkej, ¿keniuj ueliskia mochiuas “tepanchikaualoni”?a Sayoj komo moajokuia. Yejua kinextij nejon keman ika tajtoj se takat akin kintitanik seki takamej maj kinitatij seki milajtekitinij akin kitekitiliayaj. Sayoj ke milajtekitinij kinchiuilijkej tein amo kuali nejon takamej. Satepan, takat kintitanilij ikonetsin akin semi kitasojtaya, porin kichiaya maj yejua kemaj kikakinij. Sayoj ke milajtekitinij kimiktijkej. Satepan ke Jesús ika tajtoj nejin, kijtoj tajtolmej tein moajsij itech Salmo 118:22 (Luc. 20:9-17). Tatitanil Pedro no ika tajtoj nejin tajkuilol keman kinnojnotstoya tekiuanij, tayekananij uan tajkuilouanij judíos akin mosentilijkaj Jerusalén. Yejua kiniluij: “Jesucristo ten pouia de Nazaret [...] nankikuoupampilojke, pero Totajtsin Dios kipankixtij Jesús yoltok”. Satepan, kinyekiluij: “Tet ten namejuan in tepanchiuanime nankimajpeuke [...], yejua ne mochiuako in tepan chikaualoni” (Hech. 3:15; 4:5-11; 1 Ped. 2:5-7).