Maj tiktasojkamatilikan Dios inetetayokolil tein okachi ueyi
1. ¿Toni tikteltasojkamatiliaj Jiova?
1 Jiova techmakatok miak netetayokolilmej, uan tein okachi ueyi yejua keman kikauak maj kitemaka inemilis Jesús (Sant. 1:17). Ika nejon, Dios ueli techtapojpoluia totajtakoluan uan tikseliaj okseki tatiochiualismej (Efe. 1:7). ¿Melauj ke semi tiktasojkamatiliaj Dios? Yejika, achto uan satepan ke tikelnamikiskej imikilis Jesús, moneki titanemiliskej itech nejon ueyi netetayokolil.
2. ¿Toni uelis tikchiuaskej tejuan uan tochankauan tein techpaleuis maj okachi tiktasojkamatikan inemilis Jesús tein kitemakak?
2 Maj tikiskaltikan totasojkamatilis. Nejin xiuit, imikilis Jesús tikelnamikiskej itech tonal 30 metsti marzo. Achto ke ajsis nejon Talnamikilis, itech Youak keman tiTaueyichiuaj kemej Kalyetouanij, uelis tikitaskej nemachtil tein ika motajtoua inemilis Jesús tein kitemakak, ta nejon techpaleuis maj tikiskaltikan totasojkamatilis. No semi kuali maj tikixtajtoltikan Biblia tein ixyetok tikitaskej achto ke tikpiaskej nejon Talnamikilis. Moneki timonemiliskej keniuj inemilis Jesús techpaleuia tisejsemej, keniuj techpaleuia maj tikitakan Jiova, tejuan, oksekin, uan tonalmej tein uitsejok taixpan. Uan no, ¿keyej amo timomachtiaj ome yankuik nekuikatilmej tein mokuis itech nejon Talnamikilis? Tikuiskej 8I uan 109 (Sal. 77:12).
3. ¿Keniuj uelis tiknextiskej totasojkamatilis?
3 Maj tiknextikan totasojkamatilis. Kemej tikteltasojkamatij inemilis Jesús tein kitemakak, senkis tiknekij ika titajtoskej Jiova uan iueyi netasojtalis tein kinextij keman kiualtitanik iKonetsin (Sal. 145:2-7). Yejika itech marzo, abril uan mayo, sekin kalyetouanij kiitaj keniuj kichiuaskej maski sayoj se maj tekiti kemej precursor auxiliar. Uan komo nejon amo ueli tikchiuaj, ¿uelis tikouaskej tonalmej uan titekitiskej nochi tein uelis itech tanojnotsalis? (Efe. 5:16.) Nejon tasojkamatilis no techolinis maj tiktemokan keniuj tikinpaleuiskej oksekin maj touan mosentilikan itech nejon Talnamikilis (Apo. 22:17). Axkanya maj tikijkuilokan akonimej tikinyoleuaskej; kemej akin tikinkalpanojtokej, akin tikinmachtiaj ika Biblia, tochankauan, akin iuan titekitij uan akin nemij ompakauin kampa tinemij. Ompa, maj titekitikan nochi tein uelis itech tonalmej keman tikmoyauaskej tayoleualis.
4. ¿Keniuj uelis kuali tikuiskej tonalmej achto uan satepan ke tikelnamikiskej imikilis Jesús?
4 Itech tonalmej achto uan satepan ke tikelnamikiskej imikilis Jesús, uelis tiknextiliskej Jiova ke tikteltasojkamatij netetayokolil tein techmaka. Yejika itech nejon tonalmej, maj tikiskaltikan totasojkamatilis uan maj tiknextikan ke tikpatiuitaj inemilis Jesús tein kitemakak, uan nochi “tatiochiualismej de Cristo [tein] amo uelis se kinajsikapouas” (Efe. 3:8).