¿Toni kineltokaj?

Tiitaixpantijkauan Jiova tikneltokaj ke “nochi in Tajkuilolamatsitsin nochi yejuan Dios kichiuak ika ichikaualisuan. Ika ya nojon in Tajtoltsin de Dios uelis se kuitinemis” (2 Timoteo 3:16). Itech Biblia timomachtiaj akoni Tachijchiujkej uan no itech nejin amaix tiktemouaj keniuj tiyolpakiskej itech tonemilis.

ITajtol Dios kijtoua: “Maj taltikpakneminij kimatikan ke tejua, akin motokay Jiova, sayoj tejua okachi tiUeyichiujkej itech nochi taltikpak” (Salmo 83:18). Yejua ika sayoj tikueyichiuaj Jiova Dios. Uan no, timochikauaj tiktematiltiskej itokay porin tiitaixpantijkauan (Isaías 43:10-12).

Tikchiuaj kemej Cristo uan tikneltokaj ke Jesús yejua “Tekonetsin de Dios”,a akin ualaj nikan taltikpak uan mochiuak Mesías (Juan 1:34, 41; 4:25, 26). Satepan ke momikilij, Jesús oksepa kimakakej nemilis uan mokepak iluikak (1 Corintios 15:3, 4). Satepan Dios kiixtalij kemej taixyekankej itech iTekiuajyo (Apocalipsis [Revelación] 11:15). Nejon Tekiuajyot se taixyekanalis tein yetokya uan kichiuas maj taltikpak oksepa mokepa se xochital (Daniel 2:44). Biblia kijtoua: “Akin yolnejmachmej ininaxkatis taltikpak uan yekmelauj yolpakiskej porin kipiaskej ueyi yolseuilis” (Salmo 37:11, 29).

Tiitaixpantijkauan Jiova tikneltokaj ke tein kijtoua Biblia uelis kinpaleuis nochin itech nejin tonalmej (Isaías 48:17, 18). Yejua ika, timochikauaj tiktakamatiskej tanauatilmej tein ompa ijkuiliujtokej. Kemej neskayot, Biblia techiluia maj amo tikpitsotilikan tonakayo nion totanemilil, yejua ika amo titachichinaj nion tikuij drogas (2 Corintios 7:1). Nion tikchiuaj tein Biblia senkis kijtoua ke amo kuali yetok kemej, se tauanas, se auilnemis uan se tachtekis (1 Corintios 6:9-11).