Jehová nochipa techtasojta

1, 2. ¿Keniuj momachiliaj miakej tokniuan keman kipiaj se ouijkayot?

ITECH xitanemili se barco tein yetok itech mar keman semi kiouaejeka. At semi kiuiuika, chikauak kiuiteki uan kiixkepasneki. Yejua ika moneki kipantamotaskej itech at se taman tein kitsakuilia barco para maj amo moixkepa.

² Xa timomachilia kemej nejon barco keman tikpia se ouijkayot. Xa seki tonalmej kuali timomachilia uan seki tonalmej amo. Xa kemansa tikneltoka ke Jehová mitstasojta uan mitspaleuijtok, uan kemansa tiknemilia ke amo kichiua cuenta tein mitspanotok (Sal. 10:1; 13:1). Xa se motasojikniuj mitsyolchikaua uan kuali timomachilia se tiempo (Prov. 17:17; 25:11). Sayoj ke satepan oksepa amo semi tikneltoka ke Jehová mitspaleuijtok. Xa hasta timoluia ke Jehová kinemilia ke amo moneki mitstasojtaskej. Komo ijkon, ¿toni uelis tikchiuas para nochipa tikneltokas ke Jehová mitstasojta uan mitspaleuia?

3. 1) ¿Toni kijtosneki tajtolmej “nochipa tetasojta”? (Salmo 31:7; 136:1). 2) ¿Keyej sayoj Jehová nochipa tetasojta? (No xikita taixkopin).

³ Komo tikelnamikij ke Jehová techtasojta uan amo keman techkaua, techpaleuis maj amo timosenkauakan keman tikpiaskej ouijkayomej (xiklero Salmo 31:7; 136:1). Itech Biblia, tajtolmej “nochipa tetasojta”, kiteajsikamatiltia tein aksa kinextia keman semi tetasojta uan keman nochipa ijkon kichiua. Sayoj Jehová nochipa tetasojta uan amo tekaua. Biblia kijtoua ke yejua ‘semi tetasojta’ uan “nochipa” ijkon kichiua iniuan itekitikauan (Sal. 86:5; Éx. 34:​6, 7). Nejin kijtosneki ke Jehová amo keman kinsenkaua akin kitekitiliaj. Komo tikelnamiki nejin, amo timosenkauas keman tikpias se ouijkayot (Sal. 23:4).

XIKELNAMIKI KE BIBLIA TAMACHTIA KE JEHOVÁ TECHTASOJTA

4. ¿Toni tikmatkej keman peuak timomachtiaj Biblia? ¿Keyej amo ueliok techkajkayauaj?

⁴ No techpaleuis maj amo timosenkauakan keman tikpiaskej ouijkayomej, komo tikelnamikij ke keman peuak timomachtiaj Biblia tikmatkej ke Jehová semi techtasojta. ¿Toni no tikmatkej keman peuak timomachtiaj Biblia? Tikmatkej ke Dios monotsa Jehová, ke Jesús yejua iKonetsin, ke akin momikilijkejya amo teyi kimatijok, ke mochiuas se xochital uan ke tinemiskej nikan taltikpak nochipaya (Sal. 83:18; Ecl. 9:5; Juan 3:16; Apoc. 21:​3, 4). Tejua senkis tikneltokak nejon porin onkak miak taman tein kinextia ke melauj, yejua ika amo akin uelis mitskajkayauasok. Maj tikitakan keniuj komo tikneltoka ke Biblia tamachtia ke Jehová mitstasojta, mitspaleuis amo xiknemiliok ke amo kiita tein mitspanotok.

5. ¿Keniuj aksa peua kiixtopeua tein amo melauj tein kineltoka?

⁵ ¿Keniuj tikixtopeuak tein amo melauj tein tikneltokaya keman peuak timomachtia Biblia? Xa tikitak ox tein mitsmachtiayaj itech motaneltokalis yejua tein tamachtia Biblia. Xa tikneltokaya ke Jesús yejua Dios. Sayoj ke ijkon kemej timomachtijtiaya, xa timotajtanij: “¿Melauj tein nikneltoka?”. Okachi timomachtij Biblia uan tikmatik ke Jesús amo yejua Dios. Yejua ika amo tikneltokakok tein mitsmachtijkaj uan peuak tikneltoka ke Jesús “yejua tayekankakonet de nochi tein Dios kichijchiuak” uan “iKoneuj Dios akin yojtsin” (Col. 1:15; Juan 3:18). Tein amo melauj tein tikneltokaj kemej yeskia uejueyi tepamit tein xa amo ueli niman tikxitiniaj (2 Cor. 10:​4, 5). Sayoj ke satepan ke tikmatkej tein melauj, amo oksepa tikneltokakej tein amo melauj (Filip. 3:13).

6. ¿Keyej itech Salmo capítulo 136 miakpa moijtoua ‘yejua nochipa techtasojta’?

⁶ No ijkon xikchiua keman tikpias se ouijkayot uan tiknemilis ke Jehová xa amo mitstasojta. Ximotajtani: “¿Melauj tein niknemilia?”. Xikita ox tein tiknemilia yejua tein kijtoua itech Salmo 136:​1, texto kampa mokixtia nejin tamachtilis. ¿Keyej Jehová kijtoua ke ‘nochipa techtasojtas’? ¿Uan keyej itech nejin salmo kijtoua 26 viajes ‘yejua nochipa techtasojta’? Kemej tikitaj, uelis tikneltokaskej keman Biblia kijtoua ke Dios nochipa kintasojta itekitikauan porin nejin tamati kemej okseki taman tein Biblia tamachtia. Xikixtopeua keman tikmachilis ke Jehová kinemilia ke amo mitsnamiki maj mitstasojtakan porin nejon amo melauj. Amo xikneltoka nejon ijkon kemej amo tikneltokaskia se tamachtilis tein amo melauj.

7. ¿Katiyejua textos technextiliaj ke Jehová techtasojta?

⁷ Biblia kipia miak textos tein techmatiltiaj ke Jehová techtasojta. Maj tikitakan ome. Se yejua tein Jesús kiniluij imomachtijkauan: “Namejuan okachi nantayekantokej ke miakej tototsitsin” (Mat. 10:31). Jesús amo kijtoj: “Namejuan xa okachi nantayekantokej ke miakej tototsitsin”. Uan no, Jehová kiluia ixolal: “Nejua nimitschikauas, kemaj, nejua nimitspaleuis, nejua yekmelauj nimitsmakitskis ika noyekmay tein kipia melaujkayot” (Is. 41:10). Yejua amo kijtoj: “Nejua xa nimitspaleuis”. Yejua ika, komo tikmachilia ke Dios amo mitstasojta keman tikpia se ouijkayot, seki textos kemej nejin uelis mitspaleuis kuali ximomachili uan xikneltoka ke Jehová mitstasojta. Porin amo kijtojtok ke xa mitspatiuitas oso ke xa mitspaleuis, ta ke kemaj ijkon kichiua. Komo tikiluia Jehová ke amo semi tikneltoka ke mitstasojta uan itech titanemilia nejin textos, satepan uelis tikijtos tein kijtoua 1 Juan 4:16: “Tejuan tikmatij ke Dios techtasojta uan tikneltokaj nejon”.a

8. ¿Toni uelis tikchiuaskej komo tiksentokaj tikmachiliaj ke Jehová amo techtasojta?

⁸ Sayoj ke, ¿toni uelis tikchiuas komo tiksentoka tikmachilia ke Jehová amo mitstasojta? Xikelnamiki tein tikmati de Jehová. Maski tikmachilis ke amo mitstasojta, tikmati ke nejon amo melauj porin Biblia tamachtia ke Jehová kemaj techtasojta. Xikelnamiki ke Biblia nochipa tamachtia tein melauj, uan ke tein tikmachiliaj amo nochipa melauj. Komo amo tikneltokaj ke Jehová techtasojta, kemej yeskia tikijtoskiaj ke amo melauj keman Biblia kijtoua ke “Dios yejua tetasojtalis” (1 Juan 4:8).

MAJ TIKELNAMIKIKAN KE JEHOVÁ TECHTASOJTA

9, 10. ¿Toni ika tajtojtoya Jesús keman kijtoj “NoTajtsin namechtasojta”? (Juan 16:​26, 27; no xikita taixkopin).

⁹ No techpaleuis maj tikneltokakan ke Jehová techtasojta komo tikitaj tein Jesús kiniluij imomachtijkauan: “NoTajtsin namechtasojta” (xiklero Juan 16:​26, 27). ¿Kiniluij Jesús nejin sayoj para maj kuali momachilianij? Amo, porin keman tiklerouaj okseki versículos de nejon capítulo, tikitaj ke Jesús ika tajtojtoya netataujtil uan amo keniuj momachiliayaj imomachtijkauan.

¹⁰ Jesús kiniluijtoya imomachtijkauan ke monekia kitataujtiskej Dios yejua itokaykopa, sayoj ke amo yejua monekia kitataujtiskej (Juan 16:​23, 24). Uan monekia maj kuali kiajsikamatikan nejin. ¿Keyej? Porin satepan ke Jesús oksepa nemiskia xa kinekiskiaj yejua kitataujtiskej porin katka inintasojikniuj. Xa imomachtijkauan kinemiliskiaj ke kemej Jesús semi kintasojtaya, kinekiskia yejua kikakis ininnetataujtil uan yejua kiluiskia iTajtsin maj kinpaleui. Sayoj ke Jesús kijtoj ke amo monekia ijkon kichiuaskej, yejua kiniluij: “NoTajtsin namechtasojta”. Kemej Jehová semi techtasojta kiixtalij yejua kikakis tonetataujtiluan, uan yejua nejon tein Biblia tamachtia. Xiknemili keniuj mitspaleuia nejin. Keman timomachtij Biblia, no okachi tikixmatik Jesús uan tiktasojtak (Juan 14:21). Sayoj ke ijkon kemej kichiujkej imomachtijkauan, no uelis tiktataujtis Dios uan tikneltokas ke mitskaki uan mitstasojta. Nochipa keman tiktataujtia Jehová tiknextia ke tikneltoka ke ‘toTajtsin’ mitstasojta (1 Juan 5:14).

XIKELNAMIKI TONI KICHIUA XIKNEMILI KE JEHOVÁ AMO MITSTASOJTA

11. ¿Keyej Satanás yolpaki komo peua tiknemiliaj ke Jehová amo techtasojta?

¹¹ ¿Toni uelis kichiuas maj tikmachilikan ke Jehová amo techtasojta? Xa ueliskia tiknemiliskej ke Satanás kichiua maj ijkon titanemilikan, uan nejon melauj. Satanás ‘kitemojtinemi techkuas’ tisejsemej, uan kineki maj tiknemilikan ke Jehová amo techtasojta (1 Ped. 5:8). Sayoj ke Jehová kemaj techtasojta porin kitemakak Jesús maj taxtaua para techmakixtis, uan Satanás kineki maj tiknemilikan ke amo technamiki tein Jehová kichiuak por tejuan (Heb. 2:9). Sayoj ke, ¿akoni yolpakis komo tikmachiliaj ke Jehová amo techtasojta? Satanás. ¿Uan akoni yolpakis komo timosenkauaj keman tikpiaj ouijkayomej? No yejua Satanás. Yejua kineki maj tiknemilikan ke Jehová amo techtasojta, sayoj ke nejon amo melauj, ta akin Jehová amo kitasojtaok yejua Satanás. Uan kineki maj tiknemilikan ke Jehová amo no techtasojta uan ke amo tikyolpaktiaj (Efes. 6:11). Komo tikmatij keniuj takajkayaua, okachi tikixtaliskej ‘tikixnamikiskej in Amokuali’ (Sant. 4:7).

12, 13. ¿Keyej tajtakol uelis kichiuas maj tikmachilikan ke Dios amo techtasojta?

¹² Amo sayoj Satanás kichiua maj tikmachilikan ke Jehová amo techtasojta. Tajtakol tein techpanoltilijkej no kichiua maj ijkon timomachilikan (Sal. 51:5; Rom. 5:12). Tajtakol kichiuak maj amo ueli timouikakanok iuan toTajtsin. Uan no kichiua maj amo kuali titanemilikan, maj amo kuali timomachilikan uan maj tikokolispeuakan.

¹³ Tajtakol kichiua maj timopinaujmatikan, maj timotajtakoltikan, maj semi timotekipachokan uan maj timouikan. Uan xa ijkon timomachiliaj keman titajtakolchiuaj. Sayoj ke no uelis ijkon timomachiliskej porin tikmatij ke titajtakolejkej, ke senkis amo timoajsijok kemej Jehová techchijchiujka (Rom. 8:​20, 21). Kemej titajtakolejkej, titamatij kemej se carro tein illanta ijyokisak uan amo yeknejnemiok, tejuan no tikmachiliaj ke amo kuali tikchiuajok teisa ijkon kemej Jehová kinekia keman techchijchiuak. Yejua ika kemansa tikmachiliaj ke Jehová amo techtasojta. Keman techpanos nejon, maj tikelnamikikan ke Jehová yejua ‘Dios akin semi ueyi uan nochipa kintasojta akin kitasojtaj uan kitakamatij’ (Neh. 1:5).

14. ¿Keyej komo itech titanemiliaj tein Jehová kichiuak para techmakixtis techpaleuia maj tikneltokakan ke yejua techtasojta? (Romanos 5:8; no xikita recuadro “Amo ximokaua ‘maj tajtakol mitskajkayaua’”).

¹⁴ Xa kemansa tikmachiliaj ke amo technamiki maj Jehová techtasojta. Yejua ika semi kualtsin porin maski amo technamiki yejua ipa kichiua. Tejuan amo ueli tikchiuaj nion teyi para technamikis maj Jehová techtasojta. Maski ijkon, yejua ipa techtasojta yejua ika kitemakak iKonetsin para uelis techtapojpoluis totajtakoluan (1 Juan 4:10). Maj no tikelnamikikan ke Jesús amo ualaj para kinmakixtis akin chipaujkej, ta akin tajtakolejkej (xiklero Romanos 5:8). Jehová kielnamiki ke titajtakolejkej yejua ika kimattok ke ipa timopoloskej. Komo tikajsikamatij ke tajtakol kichiua maj amo semi tikneltokakanok ke Dios techtasojta, timochikauaskej amo ijkon titanemiliskejok (Rom. 7:​24, 25).

MAJ TIKIXTALIKAN AMO TIKAUASKEJ JEHOVÁ

15, 16. ¿Toni kichiuas Jehová komo amo keman tikauaj, uan keyej? (2 Samuel 22:26).

¹⁵ Jehová kineki maj tikixtalikan amo keman tikauaskej keman tikpiaskej ouijkayomej (Deut. 30:​19, 20). Komo amo tikauaj, Jehová amo no techkauas uan techpaleuis maj tikxikokan tein yeski ouijkayot (xiklero 2 Samuel 22:26).

¹⁶ Tikitakejya ke komo tikelnamikij ke Jehová techtasojta uan nochipa techpaleuia, kuali timomachiliskej keman tikpiaskej ouijkayomej. Komo kemansa tikmachiliaj ke amo techtasojta, maj amo semi itech titanemilikan keniuj timomachiliaj uan maj tikelnamikikan tein tikmatij de Jehová, ke yejua semi techtasojta. Maj nochipa tikneltokakan ke Jehová nochipa tetasojta ijkon kemej Biblia tamachtia.