1 Amo ma moxelokan

¿TLEN MONEKI KICHIUASKEJ?

Akinmej kilnamiktokej amo keman moxeloskej okachi kuali momachiliaj. Kimatokej maski san tlen kinpanos nochipa san sekan yetoskej.

Sekimej tlen yomonamiktijkej ualeua infamilia uan akinmej inmiuan mouikaj kinmiluiaj amo ma moxelokan, ik non, san sekan katej. Pero moneki san sekan yetoskej porque motlasojtlaj uan motlakaitaj.

PRINCIPIO BÍBLICO: “Teokich amo makikajkawa isiwa” (1 Corintios 7:11).

Se tlakatl tlen itoka Micah okijto: “Ijkuak tikilnamiktokej otimonamiktijkej para nochipa san sekan tiyetoskej, techpaleuia amo san niman ma tikualanikan. Noijki amo okachi oui tikitaj titetlapojpoluiskej uan tikiluiskej tonamik ma techtlapojpolui. Noijki ijkuak tikpiaj se ouijkayotl amo timokuayejyekouaj timoxeloskej, san niman tikyektlaliaj tlen techpanotok”.

¿TLEKA MIAK IPATI?

Tla akinmej yomonamiktijkej amo mokuayejyekouaj nochipa san sekan yetoskej, ijkuak kipiaskej se ouijkayotl san niman kinekiskej moxeloskej.

Se siuatl tlen itoka Jean okijto: “Miakej ijkuak monamiktiaj kijtouaj uelis moxeloskej ijkuak kinekiskej. Tla ijkuak otimonamikti ijkon otimokuayejyeko, kijtosneki amo tikneki tiyetos iuan monamik”.

¿TLEN UELIS TIKCHIUAS?

XIMOKUAYEJYEKO

¿Tlen tikchiua ijkuak nanmokualaniaj?

• ¿Tikijtoua okachi kuali amo timonamiktiskia?

• ¿Timokuayejyekoua okachi tiyolpakiskia tla timonamiktiskia iuan okse?

• ¿Tikiluia akin iuan otimonamikti tikkajteuas noso tiktemos okse tlen mitspatioitas?

Tla otikitak tikchiua tlen kijtouaj tlajtlanilmej, moneki tikchiuas itlaj para amo ijkon timokuayejyekos.

XIMOTLAPOUI IUAN MONAMIK

• ¿Timokuayejyekouaj ayakmo san sekan tiyetoskej? ¿Tleka ijkon timokuayejyekouaj?

• ¿Tlen techpaleuis ma tiknekikan san sekan tiyetoskej?

NIN UELIS TIKCHIUAS

• Xikijkuilili se amatsintli monamik para tikiluis tiktlasojtla.

• Xiktlali ifotos monamik kanin titekipanoua.

• Ijkuak tiyetos kanin titekipanoua noso oksekan tias, xiknotsa ika teléfono.

PRINCIPIO BÍBLICO: “Tlan Dios yokiseitili, amaka makinxexelo” (Mateo 19:6).