Ijkuak se tlakatl noso se siuatl kikajkayaua inamik
SAPANOA teyolkoko ijkuak se tlakatl noso se siuatl kikajkayaua inamik. Pero ualeua sekimej motlapojpoluiaj uan oksepa san sekan chantij.a Maski ualeua motlapojpoluiaj, akin okikajkayajkej sapanoa moyolkokoa. ¿Tlen mitspaleuis ijkuak ijkon mitspanoa?
NINMEJ TEXTOS MITSPALEUISKEJ
Maski ualeua tlakatl noso siuatl tlen okikajkayajkej sapanoa moyolkokoa, kiyolseuia ijkuak kitlajtoltia Biblia. Ijkon kajsikamatij toTajtsin Dios kajsikamati tlen kimachiliaj (Malaquías 2:13-16).
“Ijkuak opejki sapanoa nimotekipachoa, te otechyolchika uan otechyolseui” (Salmo 94:19).
Se tlakatl itoka Bill, okijto: “Ijkuak oniktlajtoltiaya nin versículo, onimokuayejyekoaya Jehová nechtlasojtla ken se teta teiknomati”.
“Tiyolmelajki iuan akin yolmelajki” (Salmo 18:25).
Carmen noijki okikajkayajkej uan okijto: “Nonamik miak metstli onechkajkaya. Pero nikmati Jehová amo keman nechkajkayauas uan noijki amo keman nechyolkokos”.
“Amitla manomechtekipacho, yej nochipa xikilikah n Toteko tlan nonkinekih keman nonmotiotsajtsiliah [...]. Iyolsewilis Dios, non amaka weleti kajsikamati, kimokuitlawis [kimaluis] nomoyolo iwa nomotlayejyekolis” (Filipenses 4:6, 7).
Sasha okijto: “Nochipa oniktlajtoltiaya nin texto. Noijki opejki okachi onimotlatlaujtiaya uan onikmachiliaya onikpiaya iyolseuilis toTajtsin Dios”.
Nochtin tlen intech yotimotlapouijkej, ayakmo itlaj okinekiayaj kichiuaskej. Pero otlaneltokakej itech Jehová uan okinyolchika tlen kijtoa Biblia. Bill okijto: “Onimochijchika nikpias chikauak notlaneltokilis uan non onechpaleui ma nimoyolchikaua. Maski ualeua onitlajyouiaya, toTajtsin Dios nochipa onechpaleui” (Salmo 23:4).
a Tla tikneki tikmatis okachi kox uelis motlapojpoluiskej ijkuak se tlakatl noso se siuatl kikajkayaua inamik, xikita revista ¡Ma titlachixtokan! 22 de abril 1999 tlen itoka “Cuando el cónyuge es infiel” págs. 3-4, 5-8 uan 9-11.