Axkan noijki uelis tiyolpakiskej
¡XIMOKUAYEJYEKO ayakmo timokokoskej, ayakmo tikokoxkatiskej noso tiueuejtiskej nion tiixpoliuiskej! Ijkon tiyetoskej. Pero ok tikixnamikij ouijkayotl. ¿Ken uelis tiyolpakis axkan? Tlen Biblia kijtoa techpaleuis ma tiyolpakikan uan ma tikpatioitakan toyolilis. Ma tikitakan ken techpaleuis tlen kijtoa Biblia ma tikixnamikikan ouijkayotl.
MA TIYOLPAKIKAN SAN IKA TLEN TIKPIAJ
Biblia kijtoa: “Amo xikapisnekikah tomi, xipakikah ika tlan ya nonkipiah” (Hebreos 13:5).
Miakej kijtoaj ma tikpiakan miak tlamantli. Pero Biblia kijtoa uelis tiyolpakiskej san ika tlen tikpiaj. ¿Ken tikchiuaskej?
Amo ma tiknekikan tikpiaskej miak tomin. Ijkuak sekimej ‘kiapisnekih tomi’, peua mokokoaj, ayakmo kinmaluiaj inkalchanejkauan, ayakmo kuali mouikaj iuan inyolikniuan, sapanoa moouijtiliaj uan ayakmo ikaj kintlakaita (1 Timoteo 6:10). ¡Sapanoa motlajyouiltiaj! Noijki akinmej okachi kinekij kipiaskej tomin, amo keman yolpakiskej san ika tlen kipiaj (Eclesiastés 5:10).
Okachi miak ipati toyolilis uan amo okseki tlamantli. Onka miak tlamantli tlen sapanoa techpaleuia pero amo keman uelis kiteititiskej techtlasojtlaj. San tejuan uan oksekimej uelis timotlasojtlaskej. Ik non, tiyolpakij ijkuak tikinpiaj toyolikniuan (Proverbios 17:17).
TIYOLPAKISKEJ TLA TIKCHIUASKEJ TLEN KIJTOA BIBLIA
MA TITLAXIKOKAN IJKUAK TIMOKOKOAJ
Biblia kijtoa: “Akin yolpaki chikajtok” (Proverbios 17:22).
Kuali tiyetoskej tla tiyolpakij ijkuak timokokoaj. Pero ¿ken tiyolpakiskej tla timokokoaj?
Ma timotlasojkamatikan. Nochipa san timoyolkokojtoskej tla timokuayejyekojtoskej tlen kokolistli tikpiaj (Proverbios 15:15). Biblia techiluia: ‘Nochipa matimotlasojkamatikah’ (Colosenses 3:15). Ma timotlasojkamatikan maski amo tikpiaj miak tlamantli. Ma tiyolpakikan uan ma timotlasojkamatikan ijkuak tikitaj ken kalakij tonaltsin, ijkuak mixkiaui uan ijkuak se tokalchanejka ixuetska. Noijki uelis tikinpaleuiskej ma yolpakikan oksekimej.
Ma tikinpaleuikan oksekimej. Maski timokokoaj, ma tikmatokan “okachi yolpaki akin itlaj kitemaka uan amo ijkuak itlaj kiselia” (Hechos 20:35, TNM). Tiyolpakij ijkuak oksekimej techtlasojkamatiliaj tla itlaj otikinmakakej uan tikilkauaj tlen ouijkayotl tikpiaj. Tiyolpakiskej tla tikinpaleuiaj oksekimej ma yolpakikan.
MA TIMOUIKAKAN IUAN TONAMIK
Biblia kijtoa: Ma tikmatikan “tlan okachi kuali” (Filipenses 1:10).
Moouijtiliskej tla amo kuali mouikaj akinmej yomonamiktijkej. Ik non, tlakatl uan isiua moneki kitaskej ken okachi mouikaskej uan ijkon kiteititiskej mopatioitaj.
San sekan itlaj ma tikchiuakan iuan tonamik. Biblia kijtoa okachi kuali ome san sekan ma yetokan (Eclesiastés 4:9). Ma tikchiuakan tlen techpaktia iuan tonamik uan amo san toselti. Ik non, ma titlakualchiuakan iuan tonamik, kanaj iuan ma tinemitij noso okseki tlamantli iuan ma tikchiuakan.
Ma tikteititikan tiktlasojtlaj tonamik. Biblia kijtoa tlakatl uan isiua moneki ma motlakaitakan uan ma motlasojtlakan (Efesios 5:28, 33). Tikteititiskej tiktlasojtlaj tonamik tla tikixuetskiliskej, tla tiknapaloskej (tiknauatekiskej) uan tla itlaj tiktliokoliskej. Noijki ma tikilnamiktokan san timotekaskej iuan tonamik (Hebreos 13:4).