Tlamachtilmej para Toteki akinmej tikchiuaj ken Cristo
6-12 DE MAYO
KEN TECHPALEUIA BIBLIA | 2 CORINTIOS 4-6
“Ayik timosotlawah”
(2 Corintios 4:16) Yika, ayik timosotlawah, porke maya tokuerpo wewejtiti iwa tlanti, toespíritu moyankuilijti iwa [mojmostla] mochikajti.
w04-S 15/8 pág. 25 párrs. 16, 17
Maski tisotlauaj nochipa tikueyichiuaj Jehová
16 Tinochtin moneki tikpiaskej chikauak totlaneltokilis. Ualeua tisotlauaj ijkuak tiktekichiuiliaj Jehová pero tla kuali iuan timouikaj, nochipa tikueyichiuaskej uan amo keman tikkauaskej. Jehová “kimaka chikaualistli akin sotlaua uan kichiua ma kipia miak chikaualistli akin amo chikauak” (Isaías 40:28, 29). Tlatitlanil Pablo okipanok miak tlamantli, ik non, okitak melauak tlen kijtoa non texto uan satepan okijkuilo: “Yika, ayik timosotlawah, porke maya tokuerpo wewejtiti iwa tlanti, toespíritu moyankuilijti iwa [mojmostla] mochikajti” (2 Corintios 4:16).
17 Tlajtoli mojmostla kijtosneki nochipa ma tikselikan tlen Jehová techmaka. Se tokni tlen okipiaya cuarenta y tres xiuitl ken misionera, miak uelta osotlauaya uan omoyolkokoaya pero nochipa okitekichiuili Jehová. Ye okijto: “Yonimomatki nochipa kualkan nimeua, ijkon nimotlapouia iuan Jehová uan niktlajtoltia Biblia uan satepan nikchiua okseki tlamantli. Nochipa ijkon nikchiua uan non nechpaleuia ma nitlaxiko”. Tejuan noijki tikmatij Jehová techpaleuis tla nochipa tiktlatlaujtiaj uan timokuayejyekoaj ken iyelis uan nochi tlen yokijto kichiuas. Moneki mojmostla ijkon tikchiuaskej.
(2 Corintios 4:17) Porke tlan tikijyowiah itech nin tlaltíkpaktli, amo wel chikawak iwa san panoa. Pero techalikilia se weyílistli non ayik tlami, iwa non weyijkachiwálistli saikpanoa mawistik.
it-1-S pág. 70
Ma titlaxikokan
Noijki miak ipati ma tikilnamiktokan Jehová yokijto nochipa tiyoltoskej uan ayakmo tikpiaskej tlajtlakoli. Maski techmiktiskej akinmej techkokoliaj, amo uelis techkixtiliskej tlen ye yokijto techmakas (Rom. 5:4, 5; 1 Tes. 1:3; Apoc. 2:10). Tlen axkan techtlajyouiltia, satepan amo yetos ipati porque tikpiaskej nochi tlen kijtoa toTajtsin Dios techmakas (Rom. 8:18-25). Nochi tlen axkan techtlajyouiltia “amo wel chikawak iwa san panoa” porque satepan nochipa tiyoltoskej uan kuali tiyetoskej (2 Cor. 4:16-18). Tla tikilnamiktokej san panos nochi tlen techtlajyouiltia uan tikilnamiktokej tlen Jehová okijto techmakas, techpaleuis amo ma timosotlauakan uan amo keman ma tikkauakan Jehová.
(2 Corintios 4:18) Porke amo tiktlaliah totlachialis itech tlan mota, yej itech tlan amo mota. Porke nochi tlan mota amo wejkawa, pero tlan amo mota, nochipa wejkawas.
Ma tiktemokan ken techpaleuia Biblia
(2 Corintios 4:7) Pero tikpixtokeh nin totlaneltokalis non tlawel miak ipati ijtik nin xoktsi [noso vasos tlen okinchijchijkej ika sokitl], para mamota n weletílistli amo toaxka, yej wits de Dios.
w12-S 1/2 pág. 28
“Xikyolpaktikan Jehová”
Tokni David Splane tlen poui itech Cuerpo Gobernante okitemakak nin tlamachtil (2 Corintios 4:7). ¿Tlen okijto? ¿Tlen moneki tikpatioitaskej? ¿Tlen yotimomachtijkej? Noso ¿ixtlamatilistli? Tokni Splane okijto: “Amo. Tlatitlanil Pablo okijto “non tlawel miak ipati” tlen kajki ‘ijtik vasos tlen okinchijchijkej ika sokitlʼ, kijtosneki tiktematiltiskej tlen melauak” (2 Corintios 4:1, 2, 5). Ye okijto tokniuan okinmachtijkej makuili metstli para okachi kuali kitekichiuiliskiaj Jehová kanin kintitlaniskiaj. Noijki okijto yejuan moneki kipatioitaskej tlen omomachtijkej.
Tokni okijto vasos tlen okinchijchijkej ika sokitl kineskayotiaj totlalnakayo. Noijki okijto se vaso tlen okichijchijkej ika sokitl amo ijkon ken se vaso tlen okichijchijkej ika oro. Vasos tlen okinchijchijkej ika sokitl nochipa kintekitiltiaj pero tlen okinchijchijkej ika oro amo nochipa kintekitiltiaj. Tla tiktlatiaj itlaj miak ipati itech se vaso de oro, noijki tikpatioitaskej ijkon ken vaso. Ik non, tokni Splane okinmilui tokniuan: “Amo xiknekikan ma namechueyichiuakan. Moneki nankinpaleuiskej oksekimej ma kiueyichiuakan Jehová. Xiyetokan nanyolyamankej ijkon ken vasos tlen okinchijchijkej ika sokitl”.
(2 Corintios 6:13) Nomechtlatlaujtia kemi ijkuak se teta kinyeknonotsa ipilwah: techontlasojtlakah kemi ne nomechtlasojtla.
Ma tikintlasojtlakan akinmej toTajtsin Dios kintlasojtla
15 Techyolseuia tikmatiskej itech tlanechikol uelis tikinmajsiskej toyolikniuan tlen kipiaj chikauak intlaneltokilis (Salmo 133:1). Axkan, ¿ken uelis tikinmajsiskej? Tla tikpiaj toyelis ken kipiaj iyolikniuan toTajtsin Dios uan tla tikchiuaj ken yejuan, tokniuan kinekiskej touan mouikaskej. Noijki, moneki ma timochijchikauakan pampa tikinpiaskej toyolikniuan (xikita recuadro kanin kijtoa “Ken otikinmajsikej kuali toyolikniuan”). Moneki ma tikintemokan toyolikniuan tlen kipiaj inyelis ken tejuan tiknekij tikpiaskej. Noijki, akinmej tikchiuaj ken Cristo moneki ma tikilnamikikan tlen techiluia Biblia: ‘Xitetlasojtlakah’. Kema, tiknekij tikinpiaskej miakej toyolikniuan maski sekimej ixchipajkej, tlatlamantli inmialtepe noso okse tlamantli kichiuaj (2 Corintios 6:13; xiktlajtolti 1 Pedro 2:17). Amo san ma timouikakan iuan akinmej kipiaj xiuitl ken tejuan. Xikilnamiki, Jonatán okipiaya okachi miak xiuitl ken David. Toyolikniuan tlen yikipiaj miak xiuitl uelis techpaleuiskej pampa yikimatij miak tlamantli uan ixtlamatkej.
13-19 DE MAYO
KEN TECHPALEUIA BIBLIA | 2 CORINTIOS 7-10
“Tikinpaleuiaj tokniuan ijkuak tlaxixini”
(2 Corintios 8:1-3) Nokniwah, axa tiknekih tomechmatiltiskeh kenomi itlasojtlalis Dios yomotenexti iwan tokniwah de Macedonia. 2 Maya ipan miak tlaijyowílistli yopanokeh, yejwah kipiah pakílistli, iwa maya semi próbesteh, yejwah miak yokitemakakeh kemi se non kitlawelpia. 3 Ne nonewia onikinmitak kenomi ika pakílistli okitemakakeh nochi tlan oweletkeh iwa okachi okitemakakeh.
w98-S 1/11 pág. 25 párr. 1
ToTajtsin “Dios kitlasojtla akin kitemaka ika pakílistli”
Achto, tlatitlanil Pablo okinmilui tokniuan tlen ochantiayaj Corinto, tokniuan tlen ochantiayaj Macedonia kuali otlapaleuijkej. Ye okijto: “Maya ipan miak tlaijyowílistli yopanokeh, yejwah kipiah pakílistli, iwa maya semi próbesteh, yejwah miak yokitemakakeh kemi se non kitlawelpia”. Tokniuan tlen ochantiayaj Macedonia amikaj okinmilui tlen omonekiaya kichiuaskej. Pablo okijto: “Otechtlatlautijkeh matikinkawilikah noiwa makimpalewikah n tokniwah”. Okinpaktiaya tlatemakaskej maski okatkaj “semi próbesteh” (2 Corintios 8:2-4).
kr-S pág. 209 párr. 1
Tikinpaleuiaj tokniuan ijkuak tlajyouiaj
Itech xiuitl 46 otlaapistik ompa Judea. Amo miak tlakuali okitemakayaj uan sapanoa patio okinemakayaj. Ik non, imachtijkauan Cristo amo ueli okikouayaj uan oapismikiayaj. Pero Jehová san niman okinpaleui ika okse tlamantli. ¿Ken okichi?
(2 Corintios 8:4) Yejwah otechtlatlautijkeh matikinkawilikah noiwa makimpalewikah n tokniwah.
kr-S págs. 209, 210 párrs. 4-6
Tikinpaleuiaj tokniuan ijkuak tlajyouiaj
4 Okse carta tlen tlatitlanil Pablo okijkuilo, kijtoa tlen moneki kichiuaskej akinmej kichiuaj ken Cristo. Maski non carta okinmijkuilili tlapejpenalmej, noijki kinpaleuia “oksikimeh ichkameh” (Juan 10:16). Pablo okijto moneki tlatlamantli tiktekichiuiliskej Jehová. Se tlamantli, “matikinmatiltikah kenijki nochteh weletis kuali yetoskeh Íwa”, kijtosneki moneki titetlapouiskej uan titlamachtiskej (2 Cor. 5:18-20; 1 Tim. 2:3-6). Okse tlamantli, ‘matikimpalewikah n tokniwahʼ (2 Cor. 8:4). Tlajtoli “makimpalewikah” ika griego motlajtolkopa diakonía. ¿Tleka miak ipati non tlajtoli?
5 Tlatitlanil Pablo okitekitilti non tlajtoli ika griego para ome tlamantli tlen okijto: tetlapouilistli uan tlapaleuilistli. Pablo okijto tokniuan tlatlamantli otlapaleuiayaj itech tlanechikol. Achto yokijtojka: “Onka tlatlámantli toteki tlan ika weletis tiktekichiwiliskeh, pero onka san se Toteko. Weletis tikchiwaskeh san miak, pero onka san se Dios akin kichiwa nochi tekitl intech n tlakah” (1 Cor. 12:4-6, 11). Pablo okijto tlatlamantli uelis tikinpaleuiskej tokniuan uan noijki kijtosneki tiktekichiuiliaj Jehová (Rom. 12:1, 6-8). Ik non, okitemoaya ken ‘kimpalewiti non ompa ochantitokah iwa iaxkawah Diosʼ (Rom. 15:25, 26).
6 Taltitlanil Pablo okijto akinmej kichiuaj ken Cristo kinpaleuiaj tokniuan ijkuak tlaxixini porque ‘milák kitlakitah tlan kijtoa n kualitlájtoli de Cristoʼ (2 Cor. 9:13). Ijkon okinpaleui akinmej ochantiayaj Corinto ma kajsikamatikan, ijkuak okinpaleuiayaj inmikniuan kijtosneki okitekichiuiliayaj Jehová uan okiueyichiuayaj. Akinmej kinekij kichiuaskej tlen otlamachti Cristo, kinpaleuiaj inmikniuan. Pablo okinekiaya kijtos ijkuak kinpaleuiaj oksekimej tokniuan kiteititiaj ‘Dios kinnextilia itlasojtlalisʼ (2 Cor. 9:14; 1 Ped. 4:10). Tla kanaj tlaxixini, miak ipati ma tikinpaleuikan tokniuan. Revista Akin Tetlapouijtok 1 de junio 1976 tlen okiski ika español, okijto: “Amo keman ma tikilkauakan toTajtsin Jehová uan Jesucristo kipatioitaj ijkuak tikinpaleuiaj tokniuan”. Moneki tikinpaleuiskej ijkuak tlaxixini porque ijkon tiktekichiuiliaj Jehová (Rom. 12:1, 7; 2 Cor. 8:7; Heb. 13:16).
(2 Corintios 9:7) Xiktemakakah ijkó kemi yononkitlalijkeh itech nomoyolo, amo manomechixkoko nion xiktemakakah ijkuak nomechchijchikawah, porke Dios kitlasojtla akin kitemaka ika pakílistli.
¿Ken uelis tiktlasojkamatiskej tlen Jehová techmaka?
Jehová noijki kineki ma tiktemakakan tlen tikpiaj ijkon ken ye. Ik non, tlatitlanil Pablo okinauati ma kijkuilo itech akinmej kipiaj sapanoa miak tomin amo ma kineltokakan ika yolpakiskej. Moneki tlaneltokaskej itech Jehová akin kitemaka tlen kuali. Tlatitlanil Pablo noijki okijto ma tikinmakakan tlen kuali oksekimej uan ma tiyolpakikan tikinmakaskej tlen tikpiaj. Tla ijkon tikchiuaj, itech xochitlali sapanoa tiyolpakiskej (1 Timoteo 6:17-19). Ik non, Jehová techiluia ma tiktemakakan tlen tikpiaj.
Ijkuak tlatitlanil Pablo okijkuilo amatlajkuilol segunda a los Corintios, okijto tleka moneki tiktemakaskej tlen tikpiaj. Okijto: “Xiktemakakah ijkó kemi yononkitlalijkeh itech nomoyolo, amo manomechixkoko nion xiktemakakah ijkuak nomechchijchikawah, porke Dios kitlasojtla akin kitemaka ika pakílistli” (2 Corintios 9:7). ¿Akinmej mopaleuiaj tla tiktemakaj tlen tikpiaj? Kinpaleuia akinmej kiseliaj tlen tikinmakaj uan noijki techpaleuia pampa tikseliaj miak tlamantli kuali tlen Jehová techmaka (2 Corintios 9:11-14).
Ma tiktemokan ken techpaleuia Biblia
(2 Corintios 9:15) ¡Timotlasojkamatih inawak Dios porke otechmák se tlatliokólili weyijkachitok, non amo tiweletih tikteajsikamatiltiah ika tlájtoli!
¿Tiktlasojkamatiliaj tlen toTajtsin Dios okichi?
2 Tlatitlanil Pablo okimatiaya ika imikilis Jesús uelis mochiuas nochi tlen toTajtsin Dios yokijto (xiktlajtolti 2 Corintios 1:20). “Se tlatliokólili weyijkachitok” kijtosneki imikilis Jesús. Ik non, amo ueli tikijtoaj nochi tlen kijtosneki nin tetliokolil. ¿Ken moneki timomachiliskej? ¿Tlen uelis tikchiuaskej axkan pampa yiajsis tonal ijkuak tikilnamikiskej iCena toTeko?
(2 Corintios 10:17) Tla aka kineki moweyilis, mamoweyili ika tlan Toteko [Jehová] kichiwa.
g99-S 8/7 págs. 20, 21
¿Kox kuali ikaj “moweyilis”?
Itech Escrituras Griegas Cristianas tlajtoli kau·kjá·o·mai, motlajtolkopa ken ikaj “moueyineki, yolpaki, moueyilia”. Pablo okijto: “Tla aka kineki moweyilis, mamoweyili ika tlan Toteko [Jehová] kichiwa” (2 Corintios 10:17). Non kijtosneki ma timoueyilikan noso ma tiyolpakikan porque toTajtsin Dios ye Jehová uan tikmatij tlen itoka uan ken iyelis.
20-26 DE MAYO
KEN TECHPALEUIA BIBLIA | 2 CORINTIOS 11-13
“Pablo okipiaya ken se ‘witstli’”
(2 Corintios 12:7) nochi tlan Dios onechnextili saikpanoa kuajkualtsi. Iwa para ne amo manimoweyili ika tlan Toteko onechnextili, onechkawili matsoponto kemi itla witstli kemi yaskia n satanás onechtlalili itech nokuerpo, para manechtlaijyowilti.
w08-S 15/6 pág. 3 párr. 3
Tiyolchikauakej maski san tlen ouijkayotl tikixnamikij
Okse itekipanojka Jehová omotokayotiaya Pablo. Ye okitlatlaujti Jehová eyi uelta uan okilui ma kipaleui porque okipiaya se ouijkayotl ken se “witstli”, kijtosneki nochipa okitlajyouiltijtoka. Amo tikmatij tlen okipanoaya pero okitlajyouiltiaya ken se uitstli. Non uelis kichiuaskia ayakmo ma yolpaki ijkuak okitekichiuiliaya Jehová. Ye okinankili Pablo ika ninmej tlajtolmej: “Tikpixtok notlasojtlalis, amitla ok se mitspoloa; noweletilis okachi motenextia itech non amo chikawakeh”. Omonekiaya tlaxikos maski Jehová amo okikixtili tlen okitlajyouiltiaya, ye okijto: “Porke keman amo nichikawak, Cristo nechchikawa” (2 Cor. 12:7-10). ¿Tlen kijtosneki?
(2 Corintios 12:8, 9) Eyi welta yoniktlajtlanili n Toteko manechkixtili nin tlaijyowílistli. 9 Pero n Toteko onechili: “Tikpixtok notlasojtlalis, amitla ok se mitspoloa; noweletilis okachi motenextia itech non amo chikawakeh.” Yika nipaki ken amo nichikawak, para notech mamotenexti iweletilis [noso imantajkal] Cristo.
w06-S 15/12 pág. 24 párrs. 17, 18
Jehová kinmaka espíritu santo akinmej kitlajtlaniliaj
17 ToTajtsin Dios okilui Pablo: “Tikpixtok notlasojtlalis, amitla ok se mitspoloa; noweletilis okachi motenextia itech non amo chikawakeh”. Tlatitlanil noijki okijkuilo: “Yika nipaki ken amo nichikawak, para notech mamotenexti iweletilis [noso imantajkal] Cristo” (2 Corintios 12:9; Salmo 147:5). ¿Tlen kijtosneki tlen okijto Pablo? Kijtosneki ToTajtsin Dios okitekitilti Cristo para kimakas chikaualistli Pablo. Yetoskia ken okatka ijtik se mantajkali. Axkan Jehová ijkon kinnankilia itekipanojkauan ijkuak kitlatlaujtiaj ma kinpaleui uan kinmaluia.
18 Se mantajkali amo uelis kichiuas ayakmo ma kiaui noso ayakmo ma ejeka pero techpaleuia ijkuak kiaui noso ejeka. Noijki ijkon “iweletilis Cristo” amo kichiua amo ma titlajyouikan pero techpaleuia ma titlaxikokan. Techmaluia para amo techijtlakos nochi tlen kitekitiltia Satanás (Apocalipsis 7:9, 15, 16). Ik non, tla ok titlajyouiaj ma tikilnamikikan Jehová kimatok titlajyouiaj uan ye techpaleuis ijkuak ‘kikakis tiktlatlaujtiajʼ (Isaías 30:19; 2 Corintios 1:3, 4). Pablo okijto: “ToTajtsin Dios yolmelajki uan amo kitekauilis ma namechyejyekokan hasta kanin amo uelis nantlaxikoskej, okachi kuali, ijkuak namechyejyekoskej ye namechmakixtis uan ijkon nantlaxikoskej” (1 Corintios 10:13, TNM; Filipenses 4:6, 7).
(2 Corintios 12:10) Iwa nipaki keman itla nechyoltilana, ijkuak nechwijwikaltiah, keman itla nechpoloa, keman [nechtlajyouiltiaj] iwa keman nitlaijyowia por Cristo; porke keman amo nichikawak, Cristo nechchikawa.
Jehová “kimaka chikaualistli akin sotlaua”
8 (Xiktlajtolti Isaías 40:30). Maski tikmatij tikchiuaskej miak tlamantli, amo uelis tikchiuaskej nochi toselti. Uan moneki ma tikilnamiktokan. Ma timokuayejyekokan itech tlatitlanil Pablo. Maski ye okimatiaya kichiuas miak tlamantli, amo okichiuaya nochi tlen okinekiaya. Ijkuak omotlatlaujti, Jehová okinankili: “Noweletilis okachi motenextia itech non amo chikawakeh”. Pablo okajsikamatki non uan okijto: “Porke keman amo nichikawak, [Jehová, TNM] nechchikawa” (2 Cor. 12:7-10). ¿Tlen okinekiaya kijtos?
9 Pablo okimatiaya amo san iselti uelis nochi kichiuas. Omonekiaya ma kipaleui toTajtsin Dios. Iespíritu santo toTajtsin Dios kipaleuiskia ijkuak mosotlauaskia. Uan noijki kipaleuiskia ma kichiua tlen iselti amo uelis kichiuaskia. Noijki ijkon techpanoa. Pero Jehová techmaka chikaualistli ika espíritu santo.
Ma tiktemokan ken techpaleuia Biblia
(2 Corintios 12:2-4) Nikixmati se tlakatl non kineltoka Cristo, non ya kipia májtlaktli iwa n nawi xiwitl okiwikakeh ipan eyi ilwikak. Amo nikmati kox okiwikakeh ika ikuerpo noso san iespíritu, sanwel Dios kimati. 3 Amo nikmati kox ika ikuerpo noso amo ika ikuerpo okiwikakeh, sanwel Dios kimati. 4 Okiwikakeh xochitlalpan, iwa ompa okinkak tlájtolteh non amaka tlakah kikawiliah makinmijto.
Sekimej techtlajtlaniaj
“Ipan eyi ilwikak” tlen ijkuilitok itech 2 Corintios 12:2 xamo kijtosneki Tekiuajkayotl tlen kiyekana Jesucristo uan 144,000 (ciento cuarenta y cuatro mil) tlapejpenalmej tlen iuan tlanauatiskej (2 Ped. 3:13).
Moijtoa “ipan eyi ilwikak” porque Tekiuajkayotl tlen kiyekana Jesucristo okachi kuali tlanauatis.
Ijkuak Pablo okijto “okiwikakeh xochitlalpan” xamo kijtosneki eyi tlamantli. Se tlamantli, xamo kijtosneki xochitlali tlen ayakmo miak poliui yetos nikan tlaltikpak. Ome tlamantli, xamo kijtosneki toTajtsin Dios techmakas yolseuilistli ijkuak tiyetoskej itech xochitlali. Eyi tlamantli, xamo kijtosneki itech iluikak “kan ixochitlalpan Dios” nochtin kuali katej. Nochi nin eyi tlamantli mochiuas itech xochitlali.
(2 Corintios 13:12) Ximosepantlaj[p]alokah iwa ika chipawak nomoyolo ximoixtenamikikah [noso ximoixpipitsokan].
it-1-S pág. 317
Moixpipitsoaj
“Ika chipawak nomoyolo ximoixtenamikikah [noso ximoixpipitsokan]”. Escrituras Griegas kijtoa “xikinixtenamikikah” (Rom. 16:16; 1 Cor. 16:20; 2 Cor. 13:12; 1 Tes. 5:26) noso “ximoixtennamikikah kemi nonmiknimeh ika tlasojtlálistli” (1 Ped. 5:14). Xamo omoixpipitsoayaj tlakamej iuan tlakamej noso siuamej iuan siuamej. Imachtijkauan Cristo ijkon okichiuayaj ijkuak omotlajpaloayaj, xamo porque yiuejkika hebreos ijkon okichiuayaj. Maski Biblia amo kijtoa tleka ijkon okichiuayaj, xamo tokniuan ‘omoixtennamikiayajʼ noso omoixpipitsoayaj porque ijkon okiteititiayaj omotlasojtlayaj uan san sekan okatkaj (Juan 13:34, 35).
27 DE MAYO-2 DE JUNIO
KEN TECHPALEUIA BIBLIA | GÁLATAS 1-3
“Onikili ixkotika amokuali tlan okichijtoka”
(Gálatas 2:11-13) Pero ijkuak Pedro owala Antioquía, onikili ixkotika amokuali tlan okichijtoka. 12 Porke achto otlakuaya inwah non amo judíojteh iwa omowikaya inwah, pero ijkuak okalakikoh sikimeh tlakah non Jacobo okwalintítlanki, Pedro opé moixkoyantia innawak non amo judíojteh. Ayakmó okinek otlakua inwah, porke okinmawiliaya n tlakah akimeh okijtoayah mamosirkunsidarokah. 13 Ijkuakó n oksikimeh judíojteh non kineltokah Cristo Jesús iwa ochantitokah Antioquía, noiwa okipixkeh ome inmixko, porke okichijkeh kemi Pedro okichi, iwa asta Bernabé noiwa ijkó okichi.
¿Tikitaj melajkayotl ken Jehová kita?
16 (Xiktlajtolti Gálatas 2:11-14). Pedro okinmauili tlen kijtoskiaj judíos (Proverbios 29:25). Pedro kuali okimatiaya tlen omokuayejyekoaya Jehová itech akinmej amo okatkaj judíos. Maski okimatiaya non, omomojtiaya tlen kijtoskej tokniuan judíos tlen okinchiuilijkej circuncisión tlen oualayaj Jerusalén. Tlatitlanil Pablo okilui Pedro okipiaya ome ixko. ¿Tleka ijkon okilui? Porque Pablo okikak ken okinpaleui itech nechikol tlen omochi itech Jerusalén itech xiuitl 49 (Hechos 15:12; Gálatas 2:13). ¿Ken momachiliskiaj tokniuan tlen Pedro okinyolkoko? ¿Kintsakuiliskia tlen okichi Pedro? ¿Ayakmo kipiaskia Pedro tekitl itech tlanechikol?
(Gálatas 2:14) Pero ijkuak onikinmitak amo okichijtokah kemi kitemachtia n kualitlájtoli de Dios non temakixtia, inyakapa nochteh tokniwah non ompa okatkah, onikili n Pedro: “Maya te ti judío, tikchijtinemi kemi kichiwah non amo judíojteh, iwa amo kemi n judíojteh; ¿kenijki kiné tikinchijchikawa akimeh amo judíojteh mamokopakah judíojteh?”
w13-S 15/3 pág. 5 párr. 12
Akinmej kitlasojtlaj Jehová amitlaj kintsakuilia
12 Maski Pedro amo keman okika Jehová uan Jesús, ualeua okichiuaya itlaj tlen amo kuali porque okinmauiliaya oksekimej. Eyi uelta okijto amo okixmatiaya Jesús (Luc. 22:54-62). Satepan amo kuali okichi porque okachi okinpatioitaya tokniuan judíos uan okinchikoitaya akinmej amo okatkaj judíos. Pero Pablo okimatiaya tokniuan amo kuali tla mochikoitaskiaj uan moxeloskiaj. Ik non, okinojnotski Pedro para amo kinmijtlakoskia tokniuan uan okilui “amokuali tlan okichijtoka” (Gál. 2:11-14). Pedro amo omoyolkoko uan ok okitekichiuili Jehová. Omokuayejyeko tlen okilui Pablo uan okipatlak iyelis.
Ma tiktemokan ken techpaleuia Biblia
(Gálatas 2:20) Ijkuak Cristo omikki ipan [tlaketsali] ne noiwa onimik. Yika, axa mach ok ne akin niyolitok, yej Cristo yolitok notech. Iwa tla axa niyolitok itech nin kuerpo, niyolitok porke onikneltokak Ikone n Totajtsi Dios, Akin satlawel onechtlasojtlak iwa omotemák makimiktikah nopatka.
w14-S 15/9 pág. 16 párrs. 20, 21
Maski titlajyouiskej amo keman ma tikkauakan Jehová
20 ¿Tlen techpaleuis para amo san timoyolkokojtoskej? Techpaleuis tla timokuayejyekoaj Jesús otechmakixtiko. Ijkon okichi tlatitlanil Pablo. Ualeua omoyolkokoaya porque okatka tlajtlakole pero okimatiaya Jesús omikiko inpatka tlajtlakolejkej. Noijki okijkuilo: “Niyolitok porke onikneltokak Ikone n Totajtsi Dios, Akin satlawel onechtlasojtlak iwa omotemák makimiktikah nopatka” (Gál. 2:20). Pablo okiseli nochi tlen Cristo okichi ipatka uan okimatiaya okimakixti.
21 Tla tejuan noijki timokuayejyekoaj ken Pablo uan tikitaj ken se tetliokolil tlen tisejse otechmakak Jehová ijkuak iKone omikik topatka, non techpaleuis. Pero amo kijtosneki san niman ayakmo timoyolkokoskej. Moneki nochipa timoyolchikauaskej hasta ijkuak tiyetoskej itech xochitlali. Pero ¡amo ma timosotlauakan! Ma tikilnamikikan Jehová kinteochiuas akinmej tlaxikoskej hasta itlamian nochi tlen amo kuali. Ayakmo uejkauas uan iTekiuajkayo toTajtsin Dios kichiuas ma yeto yolseuilistli uan kinpaleuis nochtin para ayakmo kipiaskej tlajtlakoli. Ik non, maski titlajyouiskej ma timochijchikauakan para tiyetoskej ijkuak ualtlanauatis non Tekiuajkayotl.
(Gálatas 3:1) ¡Miálmasteh Gálatas, nontlapolojtokeh! ¿Akin onomechtlajchiwih, para amo xikneltokakah n kualitlájtoli non milák? Itech totemachtilis otomechajsikamatiltijkeh kenomi nonkitaskiah ika nomoixtololowah n Cristo Jesús Akin omikki itech [tlaketsali].
it-1-S pág. 984
Carta tlen okintitlanilijkej Gálatas
Pablo okijto: “¡Miálmasteh Gálatas, nontlapolojtokeh!”. Non amo kijtosneki okinmilnamikiaya akinmej ochantiayaj ik norte de Galacia (Gál. 3:1); Pablo okinyektlali sekimej tokniuan porque opejkej kichiuaj ken sekimej judíos. Opejkej kichiuaj tlen yejuan okinekiayaj; omopaleuiayaj ika Tlanauatil tlen okijkuilo Moisés uan amo okipatioitakej melajkayotl tlen okitemakaya yankuik tlajtolsenkaualistli (2:15-3:14; 4:9, 10). Pablo okintlajkuilili ‘tlaneltokakeh akimeh ochantitokah kan tlali de Galaciaʼ (1:2). Sekimej okatkaj judíos uan oksekimej amo, ik non, akinmej amo judíos amo okinchiuilijkej circuncisión, xamo porque intatajuan okatkaj celtas (Hech. 13:14, 43; 16:1; Gál. 5:2). Nochtin okintokayotiayaj gálatas porque ochantiayaj Galacia. Ken Pablo okijkuilo carta, moajsikamati okintitlanili tokniuan tlen ochantiayaj ik sur, ompa Roma uan amo akinmej ochantiayaj ik norte porque Pablo amo okinmixmatiaya uan xamo amo keman ompa oyajki.
© 2019 Watch Tower Bible and Tract Society of Pennsylvania