Tlamachtilmej para Toteki akinmej tikchiuaj ken Cristo
© 2023 Watch Tower Bible and Tract Society of Pennsylvania
1-7 ENERO
KEN TECHPALEUIA BIBLIA | JOB 32, 33
Matikinyolchikauakan akinmej moyolkokouaj
it-1-S pág. 796
Elihú
Elihú amo otechikoitak uan amitlaj okichi tlen san kichiuaskia kuali makitakan oksekimej. Ye okijto noijki ochijchitoka ika tlali ijkon ken Job. Okimatiaya toTajtsin Dios okichijchi. Ye amo okimomojti Job ijkuak iuan omotlapoui uan okinotski ika itoka. Pero amo ijkon okichijkej Elifaz, Bildad uan Zofar (Job 32:21, 22; 33:1, 6).
w14-S 15/6 pág. 25 párrs. 8-10
¿Tikinmitaj ken Jehová kinmita akinmej sotlauaj?
8 Xamo okachi tikinmajsikamatiskej tokniuan tlen sotlauaj ijkuak tikitaj tlen kixnamikij. Sekimej mokokouaj, moyolkokouaj noso amo chantij inuan infamilia. Xamo se tonal noijki ijkon techpanos tlen yejuan kinpanotok. Jehová itlaj okinmilnamikti israelitas ijkuak yikalakiskiaj itech tlali tlen kiseliskiaj. Okinmilui makinmiknomatikan israelitas tlen amo okipiayaj miak tlamantli uan akinmej osotlauayaj (Deut. 15:7, 11; Lev. 25:35-38).
9 Amo matikinteneuakan akinmej tlajyouiaj uan amo matimokuayejyekokan itlaj kichijtinemij. Okachi moneki matikinyolchikauakan (Job 33:6, 7; Mat. 7:1). Matikitakan tleka ijkon tikijtouaj. Matikijtokan se akin kiuika moto uetsi uan mokojkoua. Ijkuak ajsiti kanin tepajtiaj, ¿achto kitlajtlaniskej akin itlajtlakol ouetski? Amo. Tepajtijkej san niman kipajtiaj. Tejuan noijki moneki ijkon tikchiuaskej ijkuak tikitaj se tokni sotlaua porque kixnamiki miak tlamantli. Moneki san niman matikyolchikauakan (xiktlajtolti 1 Tesalonicenses 5:14).
10 Xamo okachi tikinmajsikamatiskej tokniuan tla timokuayejyekouaj tlen kinpanoua. Sekimej tokniuan tlajyouiaj porque infamiliares amo kinpaktia makitekichiuilikan Jehová. Ikinon xamo tikinmitaj ken yetoskiaj sotlauaj. Pero tikitaj melauak tlaneltokaj ijkuak tikmatij tlen kinpanoua. Noijki techtlajtlachialtia ijkuak se siuatl yaui monechikoti san iuan ikoneuan porque non kiteititia melauak kineki kitekichiuilis toTajtsin Dios. Noijki telpochmej uan ichpochmej kiteititiaj tlaneltokaj maski kintlajyouiltiaj kanin momachtiaj. Tejuan tikinmitaj sotlauaj tokniuan pero yejuan mochijchikauaj kitekichiuiliskej Jehová (Sant. 2:5).
¿Keman moneki titlajtoskej?
17 Okse tlakatl tlen okitlajpaloto Job itoka Elihú uan okatka ixui Abrahán. Ye otlakaktoka ijkuak oksekimej tlakamej okitlapouijtokaj Job. Kuali okikak tlen okijtojtokaj. Non okipaleui ma kiknomati Job ijkuak iuan omotlapoui uan okipaleui ma kipatla ken omokuayejyekouaya (Job 33:1, 6, 17). Elihú okinekiaya kiueyichiuas Jehová uan amo okse tlakatl nion ye amo omoueyineki (Job 32:21, 22; 37:23, 24). Tlen okichi Elihú techmachtia keman titlajtoskej uan keman amo moneki titlajtoskej (Sant. 1:19). Noijki techmachtia moneki tikueyichiuaskej Jehová ijkuak ikaj iuan timotlapouiaj uan amo tejuan.
18 Ma tiktlasojkamatilikan Jehová techkauilia ma titlajtokan. Ik non, ma tiktlakamatikan Biblia ijkuak techiluia keman moneki titlajtoskej uan tlen tikijtoskej. Tekiua Salomón okijkuilo: “Melauak teyolchikaua se tlajtoli tlen moijtoua ijkuak moneki, yetoskia ken manzanas tlen chijchitokej ika oro uan tlen katej ipan itlaj tlen chijchitok ika plata” (Prov. 25:11). Tla kuali tikinkakij oksekimej uan achto timokuayejyekouaj tlen tikijtoskej, yetos ken “manzanas chijchitokej ika oro”. Ijkon tikteititiskej kuajkualtsin titlajtouaj uan miak ipati. Maski san tepitsin titlajtoskej noso miak, tikinyolchikauaskej oksekimej uan Jehová yolpakis porque kualtsin tikintlapouiaj (Prov. 23:15; Efes. 4:29). Ijkon tikteititiskej tiktlasojkamatiliaj Jehová techkauilia ma titlajtokan.
Matiktemokan ken techpaleuia Biblia
w13-S 15/1 pág. 19 párr. 10
Matimochijchikauakan timouikaskej iuan Jehová
10 Amo tlajtlakoli tla techtekipachoua ken timotaj. Pero amo san matimokuayejyekojtokan tlen tikchiuaskej para amo mamota yitikpiaj miak xiuitl. Non kiteititia titlaneltokaj, techtlakaitaskej uan tikteititiskej tikpiaj kualtsin toyolipan. Biblia kijtoua: “Akin yokuaistayak mota kualtsin ijkuak nemi ika melajkayotl” (Prov. 16:31). Jehová okachi kipatioita tlen tikpiaj toyolipan uan tejuan noijki moneki ijkon tikitaskej (xiktlajtolti 1 Pedro 3:3, 4). ¿Tikteititiskej tiixtlamatkej tla tikmochiuiliskej operaciones noso okseki tlamantli maski itlaj techpanos porque tiknekij kualtsin timotaskej? “Ipakilis Jehová” kichiua kualtsin matimotakan maski yitikpiaj miak xiuitl noso amo tikualtsitsintin (Neh. 8:10). Ayakmo timokokoskej ijkuak tiyetoskej itech xochitlali uan ayakmo tikokoxkatiskej (Job 33:25; Is. 33:24). Axkan moneki tiyetoskej tiixtlamatkej uan matitlaneltokakan porque non techpaleuis matimouikakan iuan Jehová. Noijki matimochijchikauakan okachi tiktekichiuiliskej Jehová (1 Tim. 4:8).
8-14 DE ENERO
KEN TECHPALEUIA BIBLIA | JOB 34, 35
¿Tleka titlajyouiaj tla tikchiuaj tlen kuali?
¿Ken iyelis toTajtsin Dios?
ToTajtsin Dios nochipa kichiua tlen kuali. Ye amo keman kichiua tlen amo kuali (Job 34:10). Nochipa tlaixkomaka ika melajkayotl, ijkon ken okijto se salmista: “Tikinmixkomakas altepemej ika melajkayotl” (Salmo 67:4). Ye kimati tlen timokuayejyekoaj, ik non, amo techixkomaka san ika tlen kita noso san tlen kikaki (1 Samuel 16:7). Noijki toTajtsin Dios kimati ijkuak techchiuiliaj tlen amo kuali uan ijkuak oksekimej san kinekij techtlachtekiskej. Ik non, kijtoa “kinmixpoloskej” akinmej amo yolkualmej (Proverbios 2:22).
¿Tlen tlamantli ayakmo yetos ijkuak ualtlanauatis iTekiuajkayo toTajtsin Dios?
5 ¿Tlen kichiuas Jehová? Itech ninmej tonalmej kinkauilijtok tlaltikpaktlakamej ma kipatlakan innemilis (Isaías 55:7). Maski yitlamis tlen amo kuali, Jehová ayamo kinmixkomaka akinmej amo yolkualmej. ¿Tlen kinpanos akinmej amo kinekij kipatlaskej innemilis uan kipaleuijtokej nochi tlen amo kuali hasta ijkuak uits ueyi tlajyouilistli? Jehová yokijto kinmixpolos (xiktlajtolti Salmo 37:10). Miakej san ichtaka kichiuaj tlen amo kuali uan ken san ichtaka kichiuaj, amo ikaj kinmita (Job 21:7, 9). Pero Biblia kijtoa: “Porque toTajtsin Dios tlachixtok itech inmiojui tlaltikpaktlakamej uan ye kita kanin tlaksatiuij. Amo onka tlayoali nion ekauitl kanin sapanoa tlayoatok kanin uelis motlatiskej akinmej kichiuaj tlen amo kuali” (Job 34:21, 22). Amo ikaj uelis kimotlatilis Jehová. Jehová kita nochi tlen kichiuaj akinmej amo yolkualmej. Ijkuak tlamis Armagedón ayakmo yetoskej akinmej amo yolkualmej. Ayakmo keman tikinmitaskej (Salmo 37:12-15).
Nochipa ma tikchiuakan tlen Jesús otlamachti
19 ¿Axkan noijki ijkon panoua? Kema. Miakej amo techseliaj porque amo timokajkalakiaj itech política. Kineltokaj tejuan noijki moneki tikinpejpenaskej tekiuajkej. Tla tikinpejpenaskiaj tekiuajkej, tikyolkokoskiaj Jehová uan tikteititiskiaj amo tiknekij ye ma yeto totekiua (1 Sam. 8:4-7). Xamo kineltokaj moneki tikinchijchiuaskej hospitales uan okseki tlamantli para ijkon tikinpaleuiskej. Amo tlaneltokaj porque okachi tikpatioitaj titetlapouiskej uan amo tikyektlaliskej seki tlamantli.
20 ¿Tlen techpaleuis nochipa ma tikchiuakan tlen Jesús otlamachti uan amitlaj ma techtsakuili? (Xiktlajtolti Mateo 7:21-23). Ma tikilnamiktokan moneki tikchiuaskej tlen Jesús otlanauati (Mat. 28:19, 20). Amo ma timokajkalakikan itech tlen kichiuaj akinmej amo kixmatij Jehová. TiiTlaixpantijkauan Jehová tikintlasojtlaj oksekimej uan tiknekij tikinpaleuiskej akinmej tlajyouiaj, ik non, tikintlapouiaj tlen kichiuas iTekiuajkayo toTajtsin Dios uan tikinpaleuiaj iuan ma mouikakan.
Matiktemokan ken techpaleuia Biblia
Ma tiktekichiuilikan Jehová ika nochi toyolo
3 Se telpochtli tlen itoka Elihú okikaktoka tlen omotlapouijtokaj iuan Job. Ijkuak otlanki iuan omotlapouijkej, Elihú okitlajtlani Job itech Jehová: “Tla melauak tiyolmelauak, ¿tlen tikmaka noso tlen kiselia tlen moaxka?” (Job 35:7). ¿Okijto Elihú amo itlaj ipati timochijchikauaskej tiktekichiuiliskej Jehová? Amo. Jehová amo itlaj okilui Elihú, ken oksekimej tlakamej. Elihú okinekiaya kijtos Jehová amo moneki tikueyichiuaskej. Okijto ye amo itlaj techtlajtlanilia ma tikmakakan. Maski tikchiuaskej miak tlamantli amo okachi kuali yetos, kipias miak tlamantli noso okachi kipias chikaualistli. Nochi tlen ueli tikchiuaj, tikchiuaj porque ye techpaleuia uan kita ken tiktekitiltiaj tlen techmaka.
15-21 DE ENERO
KEN TECHPALEUIA BIBLIA | JOB 36, 37
¿Tleka moneki matikneltokakan Jehová kichiuas nochipa matiyoltokan?
w15-S 1/10 pág. 13 párrs. 1, 2
¿Uelis tikixmatiskej toTajtsin Dios?
NOCHIPA KAJKI: Biblia kijtoua toTajtsin Dios yokatka uan nochipa yetos (Salmo 90:2). Ye nochipa kajki uan amo keman ixpoliuis. Tejuan tikitaj sapanoua ueyititok toTajtsin Dios uan amo uelis tikixmatiskej nion uelis tikmatiskej keski xiuitl kipia (Job 36:26).
¿Tleka miak ipati? ToTajtsin Dios kijtoua nochipa tiyoltoskej tla timochijchikauaj kuali tikixmatiskej (Juan 17:3). ¿Ijkon techiluiskia tla ye amo miak xiuitl yoltoskia? San “ye tekiua tlen nochipa yoltos” uelis ijkon kijtos (1 Timoteo 1:17).
¿Tiktlasojkamatiliaj toTajtsin Dios tlen techmaka?
6 Nikan tlaltikpak onka atl porque tonaltsin kajki kanin moneki. Tla amo uejka yetoskia, nochi atl uakiskia uan tlaltikpak san yetoskia se tetl totonik. Pero tla tonaltsin uejka yetoskia nochi atl mokopaskia setl uan noijki tlaltikpak. Pero amo ijkon panoua porque Jehová okitlali tlaltikpak kanin moneki. Noijki atl mochipajti uan ijkon tiyoltokej. ¿Ken panoua? Tonaltsin kitotonia nochi atl uan mokopa mixtli. Sejse xiuitl tonaltsin kichiua sapanoua miak atl ma mokopa mixtli. Non atl mokaua ipan atmósfera kanaj majtlaktli tonal uan satepan kiaui noso tlaseuetsi uan yaui itech mar uan kanin momana atl. Satepan oksepa peua mochipajti. Nin kiteititia Jehová sapanoua chikauak uan ixtlamatki (Job 36:27, 28; Ecl. 1:7).
Matikneltokakan tikseliskej tlen Jehová yokijto techmakas
16 ToTajtsin Dios kineki satepan nochipa matiyoltokan uan non se kualtsin tetliokolil. Tinochtin tiknekij maajsi non tonal uan tikneltokaj melauak ijkon mochiuas. Tlen tikneltokaj tikseliskej yetoskia ken se ancla tlen techpaleuia matitlaxikokan, ijkuak techtlajyouiltiaj uan ijkuak ixpoliui akin tiktlasojtla. Noijki tlen tikneltokaj tikseliskej yetoskia ken se casco porque techpaleuia matimokuayejyekokan tlen kuali. Tlen Biblia kijtoua tikseliskej techpaleuia okachi matimouikakan iuan Jehová noijki ijkon tikitaj ye sapanoua techtlasojtla. Kuali timomachiliaj porque tikneltokaj tikseliskej tlen Jehová yokijto.
Matiktemokan ken techpaleuia Biblia
it-1-S pág. 519
Omotlapouiayaj
Yiuejkika omotlapouiayaj tlen opanouaya. Miakej omotlapouiayaj tlen opanouaya kanin ochantiayaj uan ijkon okseki altepemej okimatiayaj nochi tlen opanouaya (2 Sam. 3:17, 19; Job 37:20). Akinmej uejka oyayaj okinmiluiayaj oksekimej tlen opanouaya itech altepemej ijkuak okikouayaj tlakuali, atl noso okseki tlamantli. Miakej opanouayaj ik Palestina para yaskiaj Asia, África uan Europa. Ijkon miakej okimatiayaj tlen opanouaya itech okseki altepemej. Miakej okimatiayaj tlen opanouaya itech okseki altepemej ijkuak oyaya tiankisko.
22-28 DE ENERO
KEN TECHPALEUIA BIBLIA | JOB 38, 39
¿Timajxiliaj tikitaskej tlen Jehová okichijchi?
¿Tikmatij timochiaskej hasta ijkuak Jehová kichiuas tlen yokijto?
7 Itech Biblia kijtoua ken Jehová okichijchi tlaltikpak, okijto ken yetoskia (Job 38:5, 6). Noijki omokuayejyeko tlen ye okichijchi (Gén. 1:10, 12). ¿Timokuayejyekouaj ken omomachilijkej ángeles ijkuak okitayaj Jehová okichijchiuaya sejse tlamantli? Sapanoua oyolpakej, Biblia kijtoua “opejkej chikauak tsajtsij” (Job 38:7). ¿Non tlen techmachtia? Omonek miak xiuitl para Jehová kinchijchijtias sitlalimej, tlaltikpak uan nochi tlen itech yoltok. Pero ijkuak okitak nochi tlen okichijchi okijto nochi kuali okatka (Gén. 1:31).
Jehová kinyolitis akinmej yoixpolikej uan ijkon kiteititia techtlasojtla, ixtlamatki uan kimati mochias
2 Jehová achto okichijchi Jesús. Satepan Jehová uan Jesús okichijchijkej “nochi tlan onka” uan noijki okinchijchijkej sapanoua miakej ángeles (Col. 1:16). Jesús oyolpakik okipaleui iTajtsin (Prov. 8:30). Ángeles noijki sapanoua oyolpakej ijkuak okitakej Jehová uan Jesús okichijchijkej iluikak uan tlaltikpak. ¿Tlen okichijkej ángeles? Biblia kijtoua “opejkej chikauak tsajtsij uan momatlaxkalouaj” uan okiueyichijkej Jehová hasta ijkuak otlanki okichijchi Adán uan Eva (Job 38:7; Prov. 8:31). Nochi tlen okichijchi Jehová kiteititia techtlasojtla uan ixtlamatki (Sal. 104:24; Rom. 1:20).
Matikitakan nochi tlen onka uan ijkon okachi tikixmatiskej Jehová
8 Jehová nochipa kichiua tlen kijtoua. Ijkuak Jehová omotlapoui iuan Job, okipaleui okachi matlaneltoka (Job 32:2; 40:6-8). Okijto miak tlamantli tlen ye okichijchi ken sitlalimej, mixtli uan tlauili tlen mota ijkuak tlatijtikuini. Noijki okinmijto sekimej yolkamej ken toro uan caballo (Job 38:32-35; 39:9, 19, 20). Nochi non okipaleui Job makajsikamati Jehová sapanoua chikauak, tetlasojtla uan ixtlamatki. Job opejki okachi tlaneltoka ijkuak omotlapoui iuan Jehová (Job 42:1-6). Tejuan noijki tikilnamikij Jehová sapanoua chikauak uan ixtlamatki ijkuak tikitaj nochi tlen onka. Ye noijki uelis kipojpolos nochi tlen techtlajyouiltia uan kineki kichiuas. Tla tikilnamikij nin tlamantli, okachi titlaneltokaskej.
Matiktemokan ken techpaleuia Biblia
it-2-S pág. 199
Jehová kintemaka tlanauatilmej
Jehová kintemaka tlanauatilmej. Jehová okintemakak tlanauatilmej para kuali mayeto tlen okichijchi. Ye okintlalili tlanauatilmej tlen okichijchi. Okintlalili tlanauatilmej tlen yoltok uan tlen amo yoltok (Job 38:4-38; Sal. 104:5-19). Noijki yolkamej okintlalili tlanauatilmej (Job 39:1-30). Tejuan noijki otechintlalili tlanauatilmej para kuali matiyetokan. Jehová otechchijchi kuali matimokuayejyekokan ikinon otechinmakak tlanauatilmej tlen ika timoyekanaskej (Rom. 12:1; 1 Cor. 2:14-16). Jehová noijki kinmaka tlanauatilmej ángeles (Sal. 103:20; 2 Ped. 2:4, 11).
Amikaj uelis kinpatlas tlanauatilmej tlen Jehová okintlali (Jer. 33:20, 21). Amo mopatlaj tlanauatilmej tlen okintlalili nochi tlen okichijchi. Ikinon ixtlamatkej kitaj ken moliniaj uan uelij kintamachiuaj metstli, planetas uan sitlalimej. Tlajyouiaj akinmej amo kintlakamatij nonmej tlanauatilmej. Amo mopatlaj itlanauatiluan toTajtsin Dios kanin techiluia tlen moneki tikchiuaskej uan titlajyouiskej tla amo tikintlakamatij maski amo san niman ijkon techpanos. Ikinon Biblia kijtoua: “Amikaj uelis kipinauis toTajtsin Dios. Tinochtin tikololoskej tlen tiktokaj” (Gál. 6:7; 1 Tim. 5:24).
29 DE ENERO-4 DE FEBRERO
KEN TECHPALEUIA BIBLIA | JOB 40-42
¿Tlen techmachtia tlen okipanok Job?
w10-S 15/10 págs. 3, 4 párrs. 4-6
¿Kox ikaj yikixmati nochi tlen mokuayejyekoua Jehová?
4 Amo matikijtokan tleka Jehová okichi seki tlamantli. ToTajtsin Dios okijto itech Salmo 50:21 ualeua ijkon tikchiuaj porque timokuayejyekouaj tiyetoskej ken ye. Yikipia 75 xiuitl se tlakatl tlen momachtia Biblia okijto: “Miakej kixkomakaj toTajtsin Dios ika tlanauatilmej tlen yejuan kintlaliaj. Kijtouaj nonmej tlanauatilmej moneki kintlakamatis toTajtsin Dios uan noijki yejuan”.
5 Amo matikintlalikan tlanauatilmej tlen uelis kichiuas ayakmo matiktlasojtlakan toTajtsin Dios. ¿Tleka amo ijkon matikchiuakan? Xamo ijkuak timomachtiskej Biblia tikajsiskej itlaj tlen uelis kichiuas matikijtokan Jehová amo kuali tlen kichiua. Ualeua ijkon tikchiuaj porque titlajtlakolejkej uan amo kuali timokuayejyekouaj. Israelitas ijkon okinpanok uan okijtojkej Jehová amo kuali okinyekanaya. Matikitakan tlen okinmilui Jehová: “Namejuan nankijtoskej: ‘Amo kuali kajki iojui Jehová’. Namechtlatlaujtia techkakikan namejuan tlen nanchantij Israel. ¿Amo kuali kajki noojui? ¿Amo ye namoojui tlen amo kuali kajki?” (Ezeq. 18:25).
6 Matikilnamiktokan tejuan amo tikitaj nochi ken Jehová kita uan ualeua timotlapololtiaj. Ijkon amo tikteneuaskej toTajtsin Dios. Job ijkon okipanok pero okipatlak ken omokuayejyekouaya. Ye sapanoua otlajyoui ikinon san okitekipachouaya tlen okipanotoka. Okilka tlen okachi ipati. Pero Jehová okipaleui makipatioita non tlamantli. Jehová okitlajtlani kanaj 70 tlamantli Job uan amo okimatki ken tlanankilis. Ijkon Jehová okititi Job amo nochi kita ken ye kita. Job okatka yolyamanki ikinon okipatlak ken omokuayejyekouaya (xiktlajtolti Job 42:1-6).
Amo ma tikilkauakan san Jehová kinamiki tlanauatis
12 ¿Okatka yoltlakuauak Jehová ijkuak ijkon okitlapoui Job maski otlajyouijtoka? Amo. Job amo ijkon okitak. Maski miak tlamantli yokipanoka, satepan nochi okajsikamatki. Uan okijto: “Amo oniknekiaya ijkon nikijtos, ik non, melauak nimoyolkuepa”. Ik non, Jehová omotlapoui iuan Job ijkuak omonekiaya uan noijki okiyolchika (Job 42:1-6). Achto, se telpochtli tlen itoka Elihú noijki yokitlapouijka (Job 32:5-10). Jehová okitak ken okipatlak iyelis Job uan okiseli porque okatka yolmelajki (Job 42:7, 8).
“Ximochia itech Jehová”
17 Amo san Job otlaxiko ijkuak otlajyoui. Apóstol Pablo okinmijkuilili se carta tokniuan hebreos, ompa okijto: “Miakeh tokniwah non kuali yokiteititijkeh intlaneltokalis” (Heb. 12:1). Maski sapanoua otlajyouijkej, nochtin nochipa okitlasojtlakej Jehová (Heb. 11:36-40). ¿Okinpaleui otlaxikojkej? Kema. Maski amo okitakej nochi tlen toTajtsin Dios okinmilui, nochipa omochixkej porque okineltokayaj Jehová okinseliaya, ik non, kuali okimatiayaj mochiuaskia tlen ye okinmilui (Heb. 11:4, 5). Tla timokuayejyekouaj tlen okichijkej, techpaleuis ‘ma timochiakan itech Jehová’.
18 Axkan miakej okachi kichiuaj tlen amo kuali (2 Tim. 3:13). Satanás kichiua miak tlamantli para amo ma tiktlakamatikan Jehová. Maski san tlen techpanos ma tiktekichiuilijtokan Jehová ika nochi toyolo porque “timochixtokeh itech Totajtsi Dios non yolitok” (1 Tim. 4:10). Ma tikilnamikikan tlen saiktlami okipanok Job, kiteititia Jehová “satlawel tetlasojtlak iwa teiknoma” (Sant. 5:11). Ijkon ken okichi Job, nochipa ma tiktlasojtlakan Jehová uan ijkon techteochiuas ‘akimeh tiktemoah’ (xiktlajtolti Hebreos 11:6).
Matiktemokan ken techpaleuia Biblia
it-1-S pág. 377 párr. 5
Tepinauiaj
Job amo okika toTajtsin Dios maski okipinauijkej. Pero omotlapololti uan okiyektlalijkej. Elihú okilui: “¿Onka okse tlakatl ijkon ken Job porque ijkuak kipinauiaj yetoskia ken koni atl?” (Job 34:7). Job omokuayejyekouaya okatka yolkuali uan okachi okitekipachouaya tlen okipanotoka ikinon amo okitekipacho Jehová kichiua tlen kuali (Job 35:2; 36:24). Okachi okitak ye okipinauijkej eyi tlakamej uan amo okitak okipinauijtokaj toTajtsin Dios. Akin kipaktia makitlajyouiltikan uan makipinauikan yetoskia ken ijkuak ikaj kipaktia konis atl. Satepan toTajtsin Dios okipaleui makajsikamati Job amo ye okipinauijkej. Okipinauijkej toTajtsin Dios ijkuak amo kuali okitlapouijkej Job (Job 42:7). Noijki ijkon opanok ijkuak israelitas okitlajtlankej se tekiua. Jehová okilui profeta Samuel: “Xikchiua nochi tlen altepetl mitsiluia porque amo te omitsixtopejkej. Yejuan amo kinekij ne maniyeto intekiua” (1 Sam. 8:7). Noijki Jesús okinmilui idiscípulos: “Ijkuakon namechtlajyouiltiskej uan namechmiktiskej. Itech nochi altepemej namechkokoliskej porque nankichiuaj ken ne nikchiua” (Mat. 24:9). Matikilnamiktokan techpanos nin tlamantli uan non techpaleuis matitlaxikokan ijkuak techpinauiskej. Ijkon toTajtsin Dios techteochiuas tla nochipa titlaxikouaj (Luc. 6:22, 23).
5-11 DE FEBRERO
KEN TECHPALEUIA BIBLIA | SALMO 1-4
Matikpaleuikan iTekiuajkayo toTajtsin Dios
“Nikintsetselos nochi altepemej”
8 ¿Tlen kichiuaj miakej ijkuak tikintlapouiaj? Miakej amo kinekij kikakiskej (xiktlajtolti Salmo 2:1-3). Miakej amo kinpaktia. Amo kinekij kineltokaskej Jehová yokitlali ikaj ma tlanauati. Noijki amo kineltokaj ijkuak tikintlapouiaj tlen kichiuas iTekiuajkayo toTajtsin Dios. Ik non, itech seki altepemej ayakmo kinekij ma titetlapouikan. Maski miakej tekiuajkej kijtouaj tlaneltokaj itech toTajtsin Dios amo kinekij ye ma kinnauati. Ijkon ken okichijkej tekiuajkej ijkuak okatka Jesús, axkan noijki miakej kixnamikej uan kintlajyouiltiaj itekipanojkauan Jehová (Hech. 4:25-28).
Amo ma timokajkalakikan itech tlen kichiuaj tlaltikpaktlakamej
11 Tomin uan tlen tikpiaj. Tla sapanoa tiktlasojtlaj tomin uan tlen tikpiaj, ijkuak uits se ouijkayotl uelis timokajkalakiskej itech tlen kichiuaj tlaltikpaktlakamej. Se tokni tlen itoka Rut okitak non itech ueyi altepetl Malaui. Kanaj itech xiuitl 1970 okitak tlen okichijkej sekimej tokniuan ijkuak okintojtokakej. Tokni kijtoa: “Tokniuan amo uelij okikajtejkej tlen okipiayaj. Ocholojkej ijkuak tejuan oticholojkej, pero satepan omonepanojkej iuan se partido político pampa uelis mokuepaskiaj inkalijtik. Amo okixikojkej chantiskej kanin otechtitlankej”. Pero amo nochtin itekipanojkauan toTajtsin Dios ijkon kichiuaj. Sapanoa miakej amo mokajkalakiaj itech tlen kichiuaj tlaltikpaktlakamej maski amo itlaj tomin kipiaskej noso maski kipoloskej nochi tlamantli tlen kipiaj (Hebreos 10:34).
Matiktemokan ken techpaleuia Biblia
it-2-S págs. 1085, 1086
Tlajsoli uan tlikonextli
Ijkuak kichipauaj trigo uan cebada mokaua itlajsolo uan tlikonextli. Biblia tlajtoua itech tlajsoli uan tlikonextli tlen okisaya ijkuak itlaj okichipauayaj. Non tlajsoli amikaj okikuaya, ayakmo otlapaleuiaya uan amitlaj ipati okatka ikinon okitlamotlayaj.
Achto okitsetselouayaj semilla uan okisaya itlajsolo. Satepan okejekaniayaj para machipaui semilla (xikita KEJEKANIAJ). Jehová ijkon kinkixtia akinmej kixnamikij ialtepe, kinmixpoloua akinmej amo yolkualmej uan nochtin oksekimej tlen kixnamikij (Job 21:18; Sal. 1:4; 35:5; Is. 17:13; 29:5; 41:15; Os. 13:3). ITekiuajkayo toTajtsin Dios kinpojpolos akinmej kikokoliaj uan mokauaskej ken tlikonextli tlen ejekatl san niman kiuika (Dan. 2:35).
Itlajsolo semilla okololouayaj uan okitlatiayaj para amo kiuikaskia ejekatl uan kisokiotiskia semilla. Noijki Juan Bautista okijto kinpojpoloskej religiones tlen tlakajkayauaj. Jesucristo “kololos trigo tlen yichipauak uan kitlatis, pero tlajsoli kitlamotlati ijtik tlitl tlen amo keman seuis” (Mat. 3:7-12; Luc. 3:17; xikita KICHIPAUAS).
12-18 DE FEBRERO
KEN TECHPALEUIA BIBLIA | SALMO 5-7
Amo matikkauakan Jehová maski oksekimej itlaj techtoktiskej
¿Tlen techpaleuis ma timoyolchikauakan ijkuak tiktlajtoltiaj Biblia?
7 ¿Itlaj otechchiuili se toyolikni noso se tofamiliar? Tla ijkon yotechpanok techpaleuis timomachtiskej tlen okipanok Absalón, ye okatka ikone tekiua David. Absalón okixnamik itajtsin uan okinekiaya ye tlanauatis (2 Sam. 15:5-14, 31; 18:6-14).
8 (1) Ma timotlatlaujtikan. Tla otechchiuilijkej itlaj tlen amo kuali, ijkuak yotiktlajtoltijkej tlen kijtoua Biblia ma tikiluikan Jehová ken timomachiliaj (Sal. 6:6-9). Satepan ma timotlatlaujtikan para ma tikinmajsikan principios bíblicos uan ijkon tikmatiskej tlen tikchiuaskej.
¿Tikneltokaj melauak tlen tlamachtia Biblia?
3 Tejuan amo titlaneltokaj porque tikitaj tokniuan motlasojtlaj. ¿Tleka? Ma tikijtokan se tokni tlayekanki noso se precursor tlajtlakolchiua, techyolkokoua noso kikaua Jehová uan kijtoua amo melauak tlen tikneltokaj. ¿Tlen tikchiuaskiaj tla ijkon panos? ¿Ayakmo tiktekichiuiliskiaj Jehová? Nin techmachtia tla tiknekij tikpiaskej chikauak totlaneltokilis moneki kuali ma timouikakan iuan Jehová. Amo san ma tikitakan tlen oksekimej kichiuaj. Tikpiaskej chikauak totlaneltokilis tla kuali timouikaj iuan Jehová uan tikchiuaj tlen kijtoua ialtepe. Pero noijki miak ipati kuali ma timomachtikan Biblia, ma tikajsikamatikan tlen kijtoua uan ma tikneltokakan tlen timomachtiaj. Ma tikneltokakan Biblia kijtoua akin Jehová (Rom. 12:2).
4 Jesús okijto sekimej kinekiskiaj momachtiskej Biblia pero ayakmo tlaneltokaskiaj ijkuak kipiaskiaj ouijkayotl (xiktlajtolti Mateo 13:3-6, 20, 21). Xamo amo kajsikamatij akinmej kichiuaj ken Cristo kixnamikij ouijkayotl (Mat. 16:24). Xamo mokuayejyekouaj amo tlajyouiaj akinmej kichiuaj ken Cristo. Pero tinochtin titlajtlakolejkej uan tikixnamikij ouijkayotl. Tonemilis mopatla uan ualeua non kichiua ayakmo ma tiyolpakikan (Sal. 6:6; Ecl. 9:11).
Matiktemokan ken techpaleuia Biblia
it-2-S pág. 1005
Mikatekochtli
Apóstol Pablo okijto itech Romanos 3:13 tlajtolmej tlen tikinmajsij itech Salmo 5:9. Ompa kijtoua akinmej amo yolkualmej uan tlakajkayauaj intoskak yetoskia ken se mikatekochtli tlen tlapotok. Ijtik mikatekochtli kintlaliaj mikamej uan ompa palanij. Ijkon kipiaj intoskak akinmej amo yolkualmej porque tlen kijtouaj temikti uan yopalanki (noijki xikita Mat. 15:18-20).
19-25 DE FEBRERO
KEN TECHPALEUIA BIBLIA | SALMO 8-10
“Jehová nimitsueyichiuas”
Ma tikpatioitakan tipouiskej iuan ifamilia Jehová
6 Jehová okichijchi kualtsin kanin tichantij. Ye achto okiyektlali tlaltikpak ijkuakayamo ikaj okichijchiuaya (Job 38:4-6; Jer. 10:12). Ye sapanoua yolkuali uan kipaktia kitemakas tlen kipia, ik non, okichijchi miak tlamantli para ma tiyolpakikan (Sal. 104:14, 15, 24). Ualeua omokuayejyekouaya tlen okichijchi uan okijtouaya kuali okatka (Gén. 1:10, 12, 31). Okintlakaitak tlaltikpaktlakamej, ik non, okinkauili ma kiyekanakan nochi tlen okichijchi itech tlaltikpak (Sal. 8:6). Jehová kineki tinochtin nochipa ma tikmaluikan tlen ye okichijchi uan ma tiyolpakikan. Ik non, ¿nochipa tiktlasojkamatiliaj porque non techiluia tikchiuaskej satepan?
¿Tiktlasojkamatiliaj toTajtsin Dios tlen techmaka?
10 Tiktlasojkamatiliaj Jehová techkauilia ma titlajtokan ijkuak tikinyekiluiaj akinmej kineltokaj evolución tleka tikneltokaj ye otlachijchi (Sal. 9:1; 1 Ped. 3:15). Yejuan kinekij ma tikneltokakan amikaj otechchijchi nion tlaltikpak. Ika Biblia uan ika nin tlamachtil ma tikinyekiluikan Jehová okichijchi iluikak uan tlaltikpak (Sal. 102:25; Is. 40:25, 26).
¿Tlen tikijtouaj kox kinpaleuia oksekimej?
13 Ma titlakuikakan ika nochi toyolo. Ma tikilnamikikan ijkuak timonechikouaj tikueyichiuaj Jehová ijkuak titlakuikaj. Ma tikitakan tlen okichi se tokni tlen itoka Sara. Ye kijtoua amo kualtsin tlakuika pero kineki kitlakuikilis Jehová. Ik non, ijkuak moyektlalia para monechikos, kojpauia tlen ijkuakon tlakuikaskej. Ijkon kita tlen ompa momachtiskej noijki kijtoua tlakuikali. Ye kijtoua: “Non nechpaleuia ma nikita tlen kijtoua uan amo ken nitlakuika”.
Matiktemokan ken techpaleuia Biblia
it-1-S pág. 649
Majpili, 1
ToTajtsin Dios yetoskia ken okichi ika imajpil noso ika imajpiluan ijkuak okintlali majtlaktli tlanauatilmej (Éx. 31:18; Deut. 9:10), ijkuak okinchi milagros (Éx. 8:18, 19) uan ijkuak otlachijchi (Sal. 8:3). Amochtli Génesis kanin kijtoua toTajtsin Dios opejki tlachijchiua noijki kipia tlajtoli kanin kijtoua “imajpiluan”. Nin kijtosneki iespíritu santo toTajtsin Dios noso ichikaualis (rú·aj, “espíritu”) omoliniaya ipan atl (Gén. 1:2). Escrituras Griegas Cristianas techpaleuia matikajsikamatikan tlen kijtosneki tlen ompa ijkuilitok. Amochtli Mateo kijtoua Jesús okinkixti ejekamej ika iespíritu santo toTajtsin Dios uan amochtli Lucas kijtoua okipaleui “imajpil” toTajtsin Dios (Mat. 12:28; Luc. 11:20).
26 DE FEBRERO-3 DE MARZO
KEN TECHPALEUIA BIBLIA | SALMO 11-15
Matimokuayejyekokan se tonal tinochtin kuali tiyetoskej
w06-S 15/5 pág. 18 párr. 3
Tlen okachi ipati omotlajtolti itech amochtli Salmos
11:3 ¿Tlen tlamantli okixixinijkej? Tlamantli tlen ika moyekanaj tlakamej uan siuamej. Non kijtosneki tlanauatilmej tlen kintemakaj tekiuajkej para amo mamokualanikan uan makichiuakan tlen kuali. Tla amo kintlakamatij tlanauatilmej peua mokualaniaj uan ayakmo kichiuaj tlen kuali. Ikinon akinmej yolkualmej moneki makineltokakan toTajtsin Dios (Sal. 11:4-7).
wp16.4-S pág. 11
¿Se tonal tlamis tlen amo kuali?
Biblia techiluia toTajtsin Dios ayakmo miak poliui kipojpolos tlen amo kuali. Nochi tlen amo kuali san kichixtok ‘maajsi tonal matlaixkomaka [Jehová] uan ijkuak kinmixpolos akinmej amo yolkualmej’ (2 Pedro 3:5-7). Ayakmo ikaj techtlajyouiltis. Pero ¿ken tikmatij toTajtsin Dios kineki kipojpolos tlen amo kuali?
Biblia kijtoua Jehová “kikokolia akin kipaktia moteuis” (Salmo 11:5). ToTajtsin Dios kineki kuali matiyetokan uan matikchiuakan tlen kuali (Salmo 33:5; 37:28). Non kiteititia toTajtsin Dios amo kitekauilis nochipa matitlajyouikan.
¿Tikmatij timochiaskej?
15 ¿Tleka omochixki David? Ye otlanankili itech Salmo 13, naui uelta okitlajtlani Jehová hasta keman ayakmo kipiaskia ouijkayotl. Okijto: “Ne, nitlaneltoka itech motlasojtlalis yolmelajki; noyolo sapanoa paki ijkuak tinechmakixtia. Niktlakuikilis Jehová porque sapanoa yonechteochi” (Sal. 13:5, 6). David okineltokaya Jehová okitlasojtlaya ika yolmelajkayotl. Okichiaya ika pakilistli ma ajsi tonal ijkuak ayakmo kipiaskia ouijkayotl. Noijki omokuayejyekoaya ken Jehová okipaleui. David kuali okimatiaya miak ipati tla mochiaskia.
kr-S pág. 236 párr. 16
ITekiuajkayo toTajtsin Dios kichiuas tlaltikpak mayeto se xochitlali
16 Kuali tiyetoskej. Kualtsin tlen kijtoua Isaías 11:6-9 uan melauak mochiuas. Tlakamej, siuamej uan konemej kuali yetoskej maski san kanin yaskej. Yolkamej ayakmo itlaj techtoktiskej nion amikaj techtlajyouiltis. Timomachilis ken tika mokalijtik maski san kanin tias. Uelis tiajkuis itech aueyatl, kanin mantok atl uan mar. Noijki uelis tinemiti itech tepeyo uan kanin tlamanik. Ijkuak yotlayouak amitlaj mitstekipachos porque amitlaj mitspanos. Melauak mochiuas tlen kijtoua Ezequiel 34:25. Ompa kijtoua akinmej kitekichiuiliaj toTajtsin Dios kuali yetoskej uan uelis kochiskej kanin kojyo uan amitlaj kinpanos.
Matiktemokan ken techpaleuia Biblia
w13-S 15/9 pág. 19 párr. 12
¿Yotikpatlakej ken timokuayejyekouaj?
12 Axkan katej miakej ijkon ken Pablo okijto. Yejuan mokuayejyekouaj amo moneki tikintlakamatiskej tlanauatilmej. Miakej akinmej tlamachtiaj uan sekimej tepapanuan kinkauiliaj konemej makichiuakan san tlen yejuan kinekij. Porque kijtouaj nochi mopatla uan amikaj uelis kimatis tlen kuali uan tlen amo kuali. Miakej tlen kijtouaj kineltokaj toTajtsin Dios mokuayejyekouaj uelis kichiuaskej san tlen yejuan kinekij uan amo moneki kintlakamatiskej itlanauatiluan Jehová (Sal. 14:1). Tla amo timomaluiskej uelis peuas ijkon timokuayejyekoskej. Noijki ayakmo tikchiuaskej tlen techiluia ialtepe Jehová uan hasta tikijtoskej amo techpaktia tlen kichiua. Xamo tikijtoskej ayakmo techpaleuia tlen kijtoua Biblia ijkuak timoyolpaktiaj, ijkuak tikitaj itlaj itech internet uan ijkuak tiknekij okachi timomachtiskej.