Tlamachtilmej para Toteki akinmej tikchiuaj ken Cristo
© 2023 Watch Tower Bible and Tract Society of Pennsylvania
4-10 DE MARZO
KEN TECHPALEUIA BIBLIA | SALMOS 16, 17
Jehová “te techmaka nochi tlen kuali”
Telpokamej uan ichpokamej uelis nanyolpakiskej
XIKINPEJPENAKAN AKINMEJ INMIUAN NANMOUIKASKEJ
11 (Xiktlajtolti Salmo 16:3). David okimatiaya omonekiaya mouikaskia iuan akinmej kitlasojtlaj Jehová. Noijki kinnotsa “santos” noso chipauakej porque kichiuaj tlen toTajtsin Dios kijtoa. Noijki okijto oyolpakiaya inmiuan yetos. Okse salmista noijki okijto san omouikaya inmiuan akinmej okitlakamatiayaj toTajtsin Dios (Sal. 119:63). Yotikitakej noijki uelis nanmouikaskej inmiuan akinmej kitlasojtlaj Jehová uan kitlakamatij. Maski tlatlamantli xiuitl kipiaskej akinmej inmiuan nanmouikaj.
w14-S 15/2 pág. 29 párr. 3
Matikitakan “Jehová yolkuali”
David otlakuikak: “Jehová nimitstekichiuilis non tetliokolil tlen nikmoaxkatis uan te ken tinocopa. Te tikmaluijtok tlen techmakas. Kanin tlakualtsin onechmakakej” (Sal. 16:5, 6). David omotlasojkamatiaya porque okitaya ken se “tetliokolil” okitekichiuiliaya Jehová uan ye okiseliaya tlen okichiuaya. Xamo tejuan uelis titlajyouiskej ijkon ken David otlajyoui. Pero Jehová noijki techteochiua ijkon ken David okiteochi. Ikinon matiktekichiuilikan Jehová ika nochi toyolo uan nochipa matikpatioitakan itemplo espiritual.
Nemilistli tlen kipaktia toTajtsin Dios
5 ¡Sapanoa kualtsin ken kijtoa Jehová mitsmaluis! Ye mitsnojnotsas ijkuak okachi tiknekis, uan tla tikchiuas tlen mitsiluia, ye mitsmaluis pampa kuali xiyeto. ToTajtsin Dios kineki mitspaleuis pampa xikxiko ouijkayotl tlen mitspanos (xiktlajtolti Salmo 55:22). Tla tiktekichiuilis toTajtsin Dios ika nochi moyolo, uelis tikijtos: “Nochipa onikitaya n Toteko [Jehová] noyakapa; amitla welitis nechmojtis, porke ye kajki nomayekma” (Hechos 2:25; Salmo 63:8). Kema, Jehová kineki mitspaleuis kuali xikpia monemilis ken ye kipaktia. Maski ijkon, ken yitikmati, onka ikaj akin kikokolia toTajtsin Dios uan amo kineki xinemi ken ye kineki.
Matiktemokan ken techpaleuia Biblia
w18.12 pág. 27 parr. 16
Telpokamej uan ichpokamej uelis nanyolpakiskej
16 (Xiktlajtolti Salmo 16:2, 4). Itech okse tlamachtil otimomachtijkej, tla timoyekanaskej ika principios uan tikintlakamatiskej itlanauatiluan Jehová techpaleuiskej ma tikpatioitakan tlen kuali uan amo ma tikchiuakan tlen amo kuali (Amós 5:15). David okijto nochi tlen kuali uits itech toTajtsin Dios, ik non, moneki ma tikpatioitakan tlen techmaka. David omochijchika kichiuas ken toTajtsin Dios uan amo okinueyichiuaya teotsitsintin. Ijkon okiteititi amo okichiuaya tlen amo kuali. Amo kuali tikueyichiuaskej okseki tlamantli. Tla ijkon tikchiuaskej ayakmo tikteititiskej tikueyichiuaj Jehová (Is. 2:8, 9; Apoc. 4:11).
11-17 DE MARZO
KEN TECHPALEUIA BIBLIA | SALMO 18
“Jehová […] nechmakixtia”
w09-S 1/5 pág. 14 párrs. 4, 5
¿Tikneki tikajsikamatis seki tlamantli tlen kipia Biblia?
Biblia noijki kijtoua tlen kichiua Jehová ika seki tlamantli tlen amo yoltok. Kijtoua ye ‘itepexi israel’, se ‘tepexitl’ uan se ‘tepamitl chikauak’ (2 Samuel 23:3; Salmo 18:2; Deuteronomio 32:4). ¿Tlen timokuayejyekouaj ijkuak tikkakij nochi nin tlamantli? ToTajtsin Dios techpaleuia porque ye yetoskia ken se ueyi tepexitl uan chikauak.
5 Amochtli Salmos kipia seki tlamantli para kineskayotis ken iyelis Jehová. Salmo 84:11 kijtoua toTajtsin Dios yetoskia ken “se tonaltsin uan tlen ika timopaleuiaj”. Ijkon kijtoua porque techmaka tlauili, techmaka toyolilis, techmaka chikaualistli uan techmaluia. Pero Salmo 121:5 kijtoua Jehová yetoskia ken ekauili tlen kajki toyekma. Jehová techekauilia ika ima noso techekauilia ika iajasuan ijkon ken ekauili techpaleuia ijkuak sapanoua tona (Isaías 51:16; Salmo 17:8; 36:7).
Jehová techpaleuia matitlaxikokan uan matiyolpakikan
5 Axkan noijki techpaleuia tlen kijtoua nin texto: “Ye melauak mitspaleuis ijkuak kikakis tiktlatlaujtia mamitspaleui” (Is. 30:19). Isaías okijto Jehová san niman techkakis uan technankilis ijkuak tiktlatlaujtiaj. Ye noijki okijto: “San niman mitsnankilis ijkuak mitskakis”. Tlen okijto techilnamiktiaj toTajtsin Dios kichiua ika nochi iyolo ijkuak technankilia uan techpaleuiaj. Ijkuak ijkon kichiua techpaleuiaj matitlaxikokan uan matiyolpakikan.
Xikpatioita tiktlatlaujtis Jehová
JEHOVÁ techkauilia itlaj matikchiuakan: iuan matimotlapouikan ijkuak timotlatlaujtiaj. Uelis nochipa tikiluiskej tlen onka itech toyolo ika totlajtol, uan amo moneki timochiaskej para matechkaki. Tikneltokaj ye techkakis maski tiyetoskej itech hospital noso tla otechtsakuatoj. Ik non, nochipa matiktlatlaujtikan Jehová.
¿Tlen techpaleuis para amo sapanoua ma timotekipachokan?
2. Ma timokuayejyekokan. ¿Tikilnamiki ijkuak itlaj omitspanok uan omitspaleui Jehová? Ijkuak timokuayejyekouaj ken okinpaleui itekipanojkauan yiuejkika uan ken axkan techpaleuia, okachi titlaneltokaj uan okachi kuali timomachiliaj (Sal. 18:17-19). Se tokni tlen itoka Joshua, okijto: “Nikijkuiloua ijkuak Jehová nechnankilia, ijkon nikilnamiki ijkuak itlaj oniktlajtlanili uan onechmakak tlen omonekiaya”. Tla timokuayejyekouaj ken yotechpaleui Jehová, non techpaleuis para amo san ma timotekipachojtokan.
Matiktemokan ken techpaleuia Biblia
it-2-S pág. 773
Querubín
Querubines amo okatkaj ijkon ken sekimej okijtouayaj. Porque okijtouayaj okatkaj ijkon ken imágenes tlen okinueyichiuayaj akinmej ochantiayaj itech okseki altepemej. Biblia amitlaj kijtoua pero yiuejkika judíos okijtouayaj ángeles ochijchitokaj ken tlakamej uan kuajkualtsitsintin omotayaj. Ochijchitokaj ijkon ken Jehová okinauati Moisés makinchiua ángeles (Éx 25:9). Apóstol Pablo okijto yejuan “okatkaj kuajkualtsitsintin querubines. Ika inmiajasuan otlatsakuilijtokaj kanin otetlapojpoluiayaj” (Heb. 9:5). Nonmej querubines okiteititiayaj Jehová ompa okatka. Biblia kijtoua: “Ompa moixpan niyetos uan mouan nimotlapouis ipan tlen ika motentsakua. Uan ompa intlajkotiaj ome querubines tlen katej ipan arca nimitsiluis nochtin tlanauatilmej” (Éx. 25:22; Núm. 7:89). Ikinon okijtouayaj Jehová okatka “intlajkotiaj querubines” (1 Sam. 4:4; 2 Sam. 6:2; 2 Rey. 19:15; 1 Crón. 13:6; Sal. 80:1; 99:1; Is. 37:16). Querubines okineskayotiayaj icarro Jehová tlen ipan oyaya (1 Crón. 28:18). Inmiajasuan querubines okineskayotiayaj ken otlamaluiayaj uan san niman kanaj oyayaj. Ikinon David otlakuikak se kualtsin tlakuikali. Ye okijto Jehová oyajki ipan se querubín ijkuak okipaleuito uan opatlantia ipan iajasuan se espíritu (2 Sam. 22:11; Sal. 18:10).
18-24 DE MARZO
KEN TECHPALEUIA BIBLIA | SALMOS 19-21
“Nochi iluikak kitematiltia iueyitilis toTajtsin Dios”
¿Kuali tikixmatij Jehová?
16 David okixmatki Jehová porque okitaya tlen okichijchi. Ijkuak okatka telpochtli, okitlajpialiaya itajtsin uan uejkika okatka iuan ichkamej. Xamo ijkuakon omokuayejyekouaya nochi tlen okichijchi Jehová. Ma tikitakan ken okichiuaya. Ijkuak ye okitaya iluikak, amo san okinmitaya sitlalimej. Noijki okitaya ken iyelis Jehová akin otlachijchi. Ik non, David okijkuilo: “Nochi iluikak kitematiltia iueyichiualis toTajtsin Dios; semanauak kitematiltia tlen ye okichijchi ika imauan” (Sal. 19:1, 2). Noijki okitaya Jehová ixtlamatki porque sapanoua kuajkualtsin otechchijchi (Sal. 139:14). Ijkuak David omokuayejyekouaya ken okichijchi toTajtsin Dios nochi tlen onka, omomachiliaya amitlaj ipati (Sal. 139:6).
¿Ken iyelis toTajtsin Dios?
Nochi tlen okichijchi toTajtsin Dios kiteititia kipia sapanoa miak chikaualistli. ¿Tlen tikmachiliaj ijkuak tikatej ixko tonaltsin? Titonaltlatlaj. Nin kiteititia Jehová kipia sapanoa miak chikaualistli. Pero ¿tleka titonaltlatlaj? Porque tonaltsin sapanoa totonik. Yetoskia ken ijkuak tikposoniaj atl pero moneki tikposoniskej kanaj 150,000 veces. Sejse segundo tonaltsin kikixtia totonik uan nin yetoskia ken miakej bombas atómicas.
g95-S 8/11 pág. 7 párr. 2
Amo miakej kixmatij akin kualtsin otlachijchi
Okachi tikixmatiskej toTajtsin Dios tlen otechchijchi ijkuak tikitaj nochi tlen okichijchi. Se tonal Jesús okinmilui idiscípulos makitakan xochitl tlen omoskaltiaya ompa Galilea. Ye okijto: “Xikitakan ken moskaltiaj xochimej itech tlala, amo chikauak tekipanouaj nion amo kichiuaj hilo. Pero ne namechiluia, nion Salomón ijkon omotlakenti maski oueyititoka” (Mateo 6:28, 29). Se xochitsintli tlen moskaltia tlala uan mota amitlaj ipati uelis techilnamiktis toTajtsin Dios kimati tlen techpoloua.
Matiktemokan ken techpaleuia Biblia
Tlen Jehová kineki melauak mochiuas
5 Jehová okitlalili tlanauatilmej nochi tlen okichijchi. Okintlali tlanauatilmej ma kinauatikan nochi tlen okichijchi uan noijki ma techyekanakan (Salmo 19:7-9). Nochi tlen Jehová okichijchi okitlali kanin moneki uan tekitij. Se neskayotl, okitlali gravedad tlen kichiua atmósfera amo ma moxelo itech Tlaltikpak uan ijkon ma kinauati ueyi atl. Tla amo yetoskia gravedad, amo yetoskia yolilistli itech Tlaltikpak. Ken Jehová okitlalili tlanauatilmej nochi tlen okichijchi, ik non, nochi tlen onka itech semanauak kuali tekiti. Nin kiteititia Jehová okichijchi Tlaltikpak uan tlaltikpaktlakamej para kichiuas itlanekilis. Ijkuak titetlapouiaj, tikinpaleuiaj ma kixmatikan toTajtsin Dios akin okichijchi nochi tlen onka (Apocalipsis 4:11).
25-31 DE MARZO
KEN TECHPALEUIA BIBLIA | SALMO 22
Omoijto tlen panoskia ijkuak kixpoloskiaj Jesús
Sekimej techtlajtlaniaj
Mateo 27:46 kijtoua ijkuak Jesús yiixpoliuiskia okijto: “Nodios, Nodios, ¿tleka otechkakajteh noselti?”. Ijkon Jesús okichi tlen okijto David itech Salmo 22:1 (Mar. 15:34). Jesús amo ijkon okijto porque omoyolkokouaya nion porque ayakmo otlaneltokaya. Ye okimatoka omonekiaya ixpoliuis uan okinekiaya motemakas (Mat. 16:21; 20:28). Noijki okimatiaya Jehová amo kimaluiskia ijkuak yikimiktiskiaj akinmej okikokoliayaj (Job 1:10). Ijkon Jehová okikauili Jesús ma kiteititi nochipa kitlakamatiskia maski sapanoua tlajyouiskia ijkuak kimiktiskiaj (Mar. 14:35, 36).
w11-S 15/8 pág. 15 párr. 13
Okajsikej Mesías
13 Kiuijuikaltiskiaj (xiktlajtolti Salmo 22:7, 8). Cristo okiuijuikaltijkej ijkuak okipilojkej itech kouitl ijkon ken David okijtojka. Tlen okijkuilo Mateo kijtoua: “Akinmej ik ompa opanouayaj okiuijuikaltiayaj, okoliniayaj intsonteko uan okiluiayaj: ‘¡Ximopaleui te otikijto tikxixinis templo uan ipan eyi tonal oksepa tikchiuas! ¡Xitemo tla melauak tiikone toTajtsin Dios!’. Noijki okipinauiayaj teopixkej tlen otlayekanayaj, akinmej otlamachtiayaj tlanauatil uan tlayekankej. Ijkin okijtouayaj: ‘¡Ye okinpaleui oksekimej pero ineuian amo ueli mopaleuia! Ye kinnauatia israelitas, matemo uan tikneltokaskej. Ye kineltoka toTajtsin Dios ikinon ye makimakixti tla kineki kipaleuis, porque okijto: ‘Ne niiKone toTajtsin Dios’’” (Mat. 27:39-43). Jesús okixiko ijkuak okiuijuikaltijkej. Techmachtia itlaj miak ipati tlen okichi.
w11-S 15/8 pág. 15 párr. 14
Okajsikej Mesías
14 Kimotlatlaniliskiaj itlaken. David okijto: “Yejuan kimoxexeliliaj notlaken uan ika notlaken motlatlanij” (Sal. 22:18). ¿Opanok tlen okijto David? “Ijkuak okipilojkej itech kouitl, soldados okimotlatlanilijkej itlaken” Cristo (Mat. 27:35; xiktlajtolti Juan 19:23, 24).
Matiktemokan ken techpaleuia Biblia
¿Tlen tikijtouaj kox kinpaleuia oksekimej?
12 Ijkuak timonechikouaj tinochtin uelis titlakuikaskej uan tla kuali timoyektlaliaj kuali titlanankiliskej (Sal. 22:22). Sekimej kitaj oui tlakuikaskej uan tlanankiliskej ¿Ijkon mitspanoua? Xamo tikneki tikmatis tlen yokinpaleui oksekimej para ayakmo ma momojtikan.
1-7 DE ABRIL
KEN TECHPALEUIA BIBLIA | SALMOS 23-25
“Jehová notlajpixki”
Jehová nochipa kinpaleuis akinmej kitemouaj
5 ¿Tlen okinekiaya kijtos David ijkuak okijto itekipanojkauan Jehová amitlaj kinpoloskia? Tikajsikamatiskej tla timomachtiaj tlen kijtoua Salmo 23 (xiktlajtolti Salmo 23:1-6). Itech nin salmo David okijto: “Jehová notlajpixki. Amo itlaj nechpolos”. Itech okseki versículos David okiteititi okachi okipatioitaya mouikas iuan Jehová porque ye okatka itlajpixki. Jehová okiyekanki ken moneki uan nochipa okipaleui ijkuak kuali okatka uan ijkuak amo. David okajsikamatki maski yetoskia “itech tlali kanin tlaxoxouia” amo kijtosneki amo tlajyouiskia. Xamo ualeua amo kuali omomachiliaya uan yetoskia ken onemiaya “kanin sapanoua tlayouatok”, noijki okijto sekimej kikokoliskiaj. Pero Jehová okatka iTlajpixki, ik non, ye okijto amitlaj kimomojtiskia.
6 ¿Tlen kijtosneki David amitlaj okipolo? David kuali omouikak iuan Jehová, ik non, oyolpakiaya san ika tlen okipiaya. Ye oyolpakiaya porque Jehová okipaleuiaya ma kipia tlen okipolouaya. David okachi okipatioitaya Jehová okiteochiuaya uan okimaluiaya.
w11-S 1/5 pág. 31 párr. 5
“Jehová notlajpixki”
Jehová kintlamaka ichkauan. Ichkamej kichiaj makintlamaka tlajpixki. Tejuan noijki toTajtsin Dios techmaka tlen moneki uan non yetoskia ken techtlamaka (Mateo 5:3). Tiyolpakij porque Jehová techmaka miak tlamantli uan non yetoskia ken kuali techtlamaka (versículo 5). Jehová kuali techtlamaka ijkuak techinmaka amatlajkuilolmej, Biblia uan revista tlen timomachtijtokej para matikajsikamatikan tleka nikan tikatej. Noijki techiluia tlen kichiuas satepan para kuali tiyetoskej.
Matiktemokan ken techpaleuia Biblia
w11-S 15/2 pág. 24 párrs. 1-3
Matikpatioitakan tlen kuali ika nochi toyolo
JEHOVÁ techyekana “itech ojtli kuali” uan kichiua ika Biblia uan ika iespíritu santo (Sal. 23:3). Pero tejuan titlajtlakolejkej uan ualeua tikisaj itech non ojtli. Ikinon moneki timochijchikauaskej para oksepa tiaskej “itech ojtli kuali”. ¿Tlen techpaleuis ijkon matikchiuakan? Matikchiuakan ijkon ken Jesús okichi porque ye okichiuaya tlen kuali (xiktlajtolti Salmo 45:7).
2 Matikitakan tlajtoli kanin kijtoua “itech ojtli kuali”. Ojmej pitsauakej uan tsikitsitsintin. ¿Tleka okijtouayaj non “ojtli kuali”? Porque okinchijkej ijkon ken okijto toTajtsin Dios. Ika hebreo uan griego tlajtoli “kuali” kijtosneki ijkuak ikaj kichiua tlen kuali porque moyekana ika principios bíblicos. Jehová nochipa kichiua tlen kuali ikinon tikiluiaj matechyekana uan matechilui tlen moneki tikchiuaskej (Jer. 50:7).
3 Moneki matimochijchikauakan matikintlakamatikan itlanauatiluan Jehová tla tiknekij tikyolpaktiskej (Deut. 32:4). Pero moneki matimomachtikan Biblia uan ijkon uelis okachi tikixmatiskej. Ijkon okachi inauak timotokiskej uan tiknekiskej tikchiuaskej tlen kuali (Sant. 4:8). Tla ijkon tikchiuaskej, timoyekanaskej ika iTlajtol ijkuak monekis itlaj tikpejpenaskej tikchiuaskej.
8-14 DE ABRIL
KEN TECHPALEUIA BIBLIA | SALMOS 26-28
¿Tlen okipaleui David mayeto yolmelauak?
w04-S 1/12 pág. 14 párrs. 8, 9
Matiyetokan tiyolmelauakej
8 David omotlatlaujti: “Oh Jehová kuali techita uan techyejyeko. Xikchipaua noyolo uan ken nimokuayejyekoua” (Salmo 26:2). Ijkuak okijkuilojkej nin texto okitlalijkej tlajtoli riñones. Toriñones tikinpiaj tlaijtik uan amo motaj ikinon nin tlajtoli kineskayotia tlen timokuayejyekouaj uan tlen tikmachiliaj porque noijki amo motaj. Ijkuak kijtoua toyolo kineskayotia tlen tiknekij tikchiuaskej, tlen tikmachiliaj uan tlen timokuayejyekouaj. Ikinon ijkuak David okilui Jehová kuali makita, okitlatlaujti makita tlen omokuayejyekouaya uan tlen okimachiliaya.
9 David okitlatlaujti Jehová makichipaua iyolo uan ken mokuayejyekoua. ¿Ken techchipaua toTajtsin Dios? David otlakuikak: “Nikueyichiuas Jehová porque ye nechyekana. Noijki youak nimokuayejyekoua kox kuali tlen nikchijtok” (Salmo 16:7). ¿Tlen kijtosneki tlen David otlakuikak? Kijtosneki oajsik itech iyolo tlen toTajtsin Dios okilui makichiua uan okipaleui makipatla tlen omokuayejyekouaya uan tlen okimachiliaya. Tejuan noijki ajsis itech toyolo tla tikpatioitaj tlen kijtoua Biblia, tlen techiluiaj tlayekankej uan tlen techiluia ialtepe Jehová. Tiyetoskej tiyolmelauakej tla nochipa tiktlatlaujtiaj Jehová matechchipaua.
Amo ma titlakajkayauakan
15 Tla titelpochtli noso tiichpochtli xamo tiknekij oksekimej ma mitsselikan. Pero amo keman xitlakajkayaua uan amo xikpia ome moixko. Sekimej ijkuak katej iuan inkalchanejkauan noso iuan tokniuan, kiteititiaj kichiuaj ken Cristo. Pero ijkuak katej iuan oksekimej noso ijkuak motlapouiaj itech redes sociales, kichiuaj ken akinmej amo kitekichiuiliaj Jehová. Noijki tlauijuikaltiaj, amo kualtsin motlakentiaj, kikakij tlatsotsonali tlen pitsotik, tlauanaj uan kintekitiltiaj drogas. Sekimej nemij iuan se ichpochtli noso se telpochtli noso kichiuaj tlen sapanoa pitsotik. Yejuan kinkajkayauaj intatajuan, tokniuan uan noijki toTajtsin Dios (Sal. 26:4, 5). Pero Jehová kimati kox san tikijtoaj tiktlasojtlaj noso tikchiuaj ika nochi toyolo (Mar. 7:6). Okachi mitspaleuis tlen kijtoa nin texto: “Amo xikinnexikolita akinmej tlajtlakolchiuaj uan nochipa xikmauili Jehová” (Prov. 23:17).
¿Ken uelis techijtlakos tla tikijtoua tlen amo kuali?
Kuali xikpejpena tlen ika timoyolpaktia. Biblia kijtoua: “Amo ximokajkayauakan, tla nannentinemiskej iuan akinmej amo yolkualmej, namechijtlakoskej” (1 Corintios 15:33, TNM). Itech nin versículo tlajtoli nannentinemiskej noijki kijtosneki películas tlen tikinmitaj, videojuegos uan tlakuikalmej tlen tikinkakij. Kenneth akin kipia 17 xiuitl, okijto: “Ualeua titlakuikaj se tlakuikali tlen techpaktia pero amo kuali tikkakij tlen ompa kijtoua amo kuali. San tikkakij ken mokaki tlatsotsonali”.
w16.04 págs. 16-20 párrs. 6, 13, 18
¿Tleka moneki timonechikoskej pampa tikueyichiuaskej toTajtsin Dios?
6 Nechikolmej techyolchikauaj. Tlamantli tlen onka itech Tlaltikpak uelis kichiuas amo ma tiyolchikajtokan uan ma tisotlauakan noso ualeua amo chikauak ma tikpiakan totlaneltokilis. Pero nechikolmej sapanoa techyolchikauaj ma tiktekichiuilikan Jehová (xiktlajtolti Hechos 15:30-32). Itech miakej nechikolmej timomachtiaj ken mochijtok miak tlamantli tlen ijkuilitok itech Biblia. Non techyolchikauaj pampa tikmatij noijki mochiuas tlen Jehová yokijto kichiuas satepan. Pero amo san techyolchikauaj tokniuan tlen kitemakaj se tlapoualistli, noijki akinmej tlanankiliaj uan kitlakuikiliaj Jehová ika nochi inyolo (1 Corintios 14:26). Uan noijki ijkuak peua uan tlami nechikol, timotlapouiaj iuan tokniuan uan non techyolchikauaj uan techilnamiktiaj tikatej itech se ueyi kalchanejke (1 Corintios 16:17, 18).
13 Ijkuak timonechikoaj tikteititiaj tiknekij timotokiskej itech Jehová uan iKone. Itech nechikolmej, Jehová “akin Kuali Tlamachtia”, ika Biblia techiluia tlen moneki tikchiuaskej uan ken moneki tikpiaskej tonemilis (Isaías 30:20, 21). Uan sekimej tlen amo iTlaixpantijkauan Jehová uan yoyajkej tonechikoluan kijtoaj: “Dios milák kajki nomowah” (1 Corintios 14:23-25). Jehová kiteochiua nechikolmej ika iespíritu uan kiyekana tlamachtil tlen motemaka ika Biblia. Ijkuak timonechikoaj, tikkakij ken techtlapouia uan tikmachiliaj ken techmaluia ika tlasojtlalistli, ik non, tiknekij itech timotokiskej.
18 ¿Noijki ijkon timomachilia tejuatsin? Tla ijkon, ximochijchikaua nochipa tias nechikolmej maski ualeua oui mitschiuilis. Ijkon tikteititia tlen okijto ueyi tekiua David: “Jehová, niktlasojtla kali kanin tichanti” (Salmo 26:8).
Matiktemokan ken techpaleuia Biblia
Amo timomojtiskej porque Jehová techtlasojtla
13 ¡Sapanoua techyolchikaua tlen kijtoua Salmo 27:10! (Xiktlajtolti). Tla tikilnamiktokej Jehová techtlasojtla, techpaleuis kuali ma tiyetokan maski tofamiliares amo techtlasojtlaskej uan tikmatij ye techteochiuas tla titlaxikouaj. San Jehová uelis techmakas tlen techpoloua, techyolchikajtos uan techpaleuijtos kuali iuan ma timouikakan. Non okajsikamatki tokni Biniam, tlen yotikijtojkej itech párrafo se.
15-21 DE ABRIL
KEN TECHPALEUIA BIBLIA | SALMOS 29-31
Jehová techyektlalia porque techtlasojtla
it-2-S pág. 872 párr. 8
Ixko
Amo san se tlamantli kijtosneki ijkuak ikaj mixtlatia. Ijkuak Biblia kijtoua Jehová mixtlatia kijtosneki ye ayakmo techselia uan ayakmo techpaleuia. Tisejse uelis ijkon techpanos tla amo tiktlakamatij Jehová. Noijki uelis ijkon techpanos timiakej ijkon ken okinpanok israelitas (Job 34:29; Sal. 30:5-8; Is. 54:8; 59:2). Noijki ualeua Jehová amitlaj kichiuas noso amo technankilis hasta ijkuak monekis (Sal. 13:1-3). David okilui Jehová ‘amo makita itlajtlakol’. Ijkon okilui para makitlapojpolui noso amo makita tlen amo kuali okichi (Sal. 51:9; noijki xikita Sal. 10:11).
Ma tikkauilikan Jehová ma techyolseui
18 Ma tikselikan ijkuak Jehová techyektlalia. David amo okitlati itlajtlakol ijkuak Jehová okititlanki profeta Natán iuan ma motlapouiti. San niman okijto otlajtlakolchi ixpan toTajtsin Dios. Okiseli ijkuak Jehová okiyektlali uan ye okitlapojpolui (2 Sam. 12:10-14). Ma tikinmiluikan tlayekankej tla otitlajtlakolchijkej (Sant. 5:14, 15). Amo ma tiktlatikan totlajtlakol. Tla san niman tikseliaj ijkuak techyektlaliaj uan timoyolkopaj, oksepa tikpiaskej yolseuilistli uan tiyolpakiskej.
¿Ken kiteititia ijkuak ikaj melauak moyolkopa?
18 ¿Ken kiteititia ikaj akin otlajtlakolchi melauak kineki moyolkopas? Nochipa monechikoua, kichiua tlen tlayekankej kiluiaj: motlatlaujtia uan momachtia Biblia. Momaluia para ayakmo tlajtlakolchiuas. Tla mochijchikaua para oksepa kuali mouikas iuan Jehová, ye kitlapojpoluis uan tlayekankej kipaleuiskej para oksepa ma poui iuan tokniuan. Tlayekankej kimatij tokniuan tlatlamantli mokuayejyekouaj, ik non, kuali kitaj tlen kichiuaskej ijkuak ikaj tlajtlakolchiua uan kixkomakaj ika tlasojtlalistli.
Matiktemokan ken techpaleuia Biblia
1 | Ximotlatlaujti ‘Nochi tlan mitstekipachoa, xiktlali imak Dios’
Okachi tikneltokaj Jehová techpaleuis ijkuak tikiluiaj tlen techpanoua. Noijki uelis tikijtoskej ken se tlakatl tlen okijkuilo Biblia. Ye okijto: “Otikitak ken nitlajyouia; otikmatki tlen nechtekipachoua” (Salmo 31:7). Timoyolchikauaj ijkuak tikmatij Jehová kita tlen techpanoua. Pero ye amo san techita ijkuak titlajyouiaj. Jehová kajsikamati tlen techpanoua, techpaleuia matimoyolseuikan uan techyolchikaua ika iTlajtol.
22-28 DE ABRIL
KEN TECHPALEUIA BIBLIA | SALMOS 32, 33
¿Tleka moneki matikijtokan ijkuak titlajtlakolchiuaj?
w93-S 15/3 pág. 9 párr. 7
Jehová techyolseuia porque techiknomati
7 Xamo tikitaskej oui tikiluiskej Jehová otitlajtlakolchijkej porque tikmatij amo otiktlakamatkej itlanauatil. ¿Tlen uelis techpanos? David okijto itech Salmo 32:3, 4 tlen uelis techpanos. Ye okijto: “Ijkuak amitlaj onikijtouaya otlajtlanki noomio porque nochi tonal onichokaya. Porque tonal uan youak onikmachiliaya moma etik ijkuak nopan okatka. Nochikaualis otlanki ken ijkuak sapanoua tona uan uaki atl”. David omotlapololti uan amo okijto otlajtlakolchi ikinon okikuejsouaya itlalnamikilis. David ayakmo okatka chikauak porque omoyolkokouaya uan yetoskia ken se kouitl youaktoka tlen amo kipia atl. Xamo otlajyoui porque amo kuali omokuayejyekouaya uan amo kuali omomachiliaya. Amo kuali tikmatij tlen okipanouaya pero ayakmo oyolpakiaya. ¿Tlen uelis tikchiuaskej tla noijki ijkon techpanotok?
Ma tikkauilikan Jehová ma techyolseui
17 Ma tikiluikan Jehová ma techtlapojpolui. David omoyolkopki uan okilui Jehová otlajtlakolchi (xiktlajtolti Salmo 51:1-4). Non okipaleui kuali ma momachili (Sal. 32:1, 2, 4, 5). Amo ma tiktlatikan tla titlajtlakolchiuaj. Ma tikiluikan Jehová tlen otikchijkej. Ijkon totlalnamikilis amo techkuejsos uan ayakmo tikmachiliskej itlaj tikmamajtokej. Pero moneki itlaj tikchiuaskej tla tiknekij oksepa kuali timouikaskej iuan Jehová.
Ijkuak tikmachilia motlajtlakol “Xinechchipaua itech notlajtlakol”
Noijki David okiseli tlapaleuilistli tlen okimakak Natán se itekipanojka toTajtsin Dios (2 Samuel 12:13). Axkan Jehová itech tlanechikolmej okintlali tlayekankej. Ninmej tokniuan okinmachtijkej pampa kinpaleuiskej akinmej otlajtlakolchijkej oksepa ma mouikakan iuan Jehová. Ijkuak timotlapouis iuan tokniuan tlayekankej yejuan ika Biblia mitspaleuiskej ma mochikaua motlaneltokilis. Noijki mouan motlatlaujtiskej pampa ayakmo ximoyolkoko nion ayakmo ximokuayejyeko itech tlen amo kuali otikchi (Santiago 5:14-16).
“Yolpaki akin okitlapojpoluijkej itlajtlakol”
Tikiluis Jehová motlajtlakoluan noso tikintlapouis tlayekankej tlen otikchi uelis yetos oui. Uan noijki David okitak oui. Biblia kijtoa seki kauitl amo ikaj okilui tlen amo kuali okichi (Salmo 32:3). Pero satepan okitak ken okipaleui kijtos nochi uan okiyektlali nochi tlen amo kuali okichi.
Matiktemokan ken techpaleuia Biblia
Jehová nochipa techtlasojtla ika nochi iyolo
14 ToTajtsin Dios tetlasojtla ika nochi iyolo, non techpaleuia nochipa iuan ma timouikakan. Se tonal, David okilui Jehová: “Monauak uelis nimotlatis; techmaluia para amo ma nimomojti. Uan ijkuak techmakixtis sapanoua niyolpakis”. Noijki okijto akin kineltoka Jehová kipaleuis, ye kitlasojtlas ika nochi iyolo (Sal. 32:7, 10). Yiuejkika tla se altepetl okipiaya tepamitl, amitlaj okinchiuiliayaj akinmej ompa ochantiayaj. Noijki ijkon, ken Jehová techtlasojtla yetoskia ken se tepamitl tlen techmaluia nochipa ma titlaneltokakan. Jehová tetlasojtla ika nochi iyolo, ik non, techyoltilana iuan ma timouikakan (Jer. 31:3).
29 DE ABRIL-5 DE MAYO
KEN TECHPALEUIA BIBLIA | SALMOS 34, 35
“Nochipa nikueyichiuas Jehová”
w07-S 1/3 pág. 22 párr. 11
San sekan matikueyichiuakan itoka Jehová
11 “Nochipa nikueyichiuas Jehová; nokamak nochipa kiueyichijtos” (Salmo 34:1). Xamo David omotekipachouaya amo kipiaskia tlen ika mopanoltis ijkuak okikixtijkej kanin ochantiaya. Pero tlen okijto okiteititi okachi okipatioitaya kiueyichiuas Jehová. Tlen okichi techmachtia tlen uelis tikchiuaskej ijkuak itlaj tikixnamikiskej. Tejuan noijki tiknekij tikueyichiuaskej Jehová maski tikatej escuela, kanin titekipanouaj, ijkuak tikatej inuan tokniuan noso ijkuak titetlapouiaj. Matimokuayejyekokan tleka miak ipati matikueyichiuakan Jehová. Uelis ijkon tikchiuaskej ijkuak timomachtiskej miak tlamantli uan ijkuak timoyolpaktiaj ika nochi tlen okichijchi. Noijki moneki matikueyichiuakan Jehová porque yokichi miak tlamantli ialtepe nikan tlaltikpak. Axkan Jehová techkauilia matikpaleuikan maski titlajtlakolejkej. Miakej kintlakaitaj porque itlaj kichijchiuaj pero amikaj ueli itlaj kichiua ijkon ken toTajtsin Dios otlachijchi. Xamo noijki timokuayejyekouaj ijkon ken David omokuayejyekouaya ijkuak okijto: “Amo katej dioses ijkon ken te, oh Jehová, nochi kuali tlen te otikchijchi” (Salmo 86:8).
w07-S 1/3 pág. 22 párr. 13
San sekan matikueyichiuakan itoka Jehová
13 “Niyolpakis itech Jehová; akinmej yolkualmej tlakakiskej uan yolpakiskej” (Salmo 34:2). David amo okijtojtoka omoueyinekiaya porque okikajkaya tekiua Gat. Ye okijto Jehová okimalui uan okipaleui macholo (Proverbios 21:1). Ikinon okiueyichi toTajtsin Dios uan amo san ye omoueyinekiaya. Tlen okichi David okinpaleui akinmej yolkualmej mamotokikan inauak Jehová. Jesús noijki okiueyichi itoka Jehová uan non okinpaleui akinmej yolkualmej mamotokikan inauak toTajtsin Dios. Noijki axkan akinmej yolkualmej kinpaktia monechikoskej inuan tokniuan tlapejpenalmej tlen kinyekana Jesús (Colosenses 1:18). Akinmej yolkualmej yolpakij ijkuak kinkakij itekipanojkauan toTajtsin Dios kiueyichiuaj itoka. Noijki yolpakij porque kinpaleuia iespíritu santo toTajtsin Dios makajsikamatikan tlen kijtoua Biblia (Juan 6:44; Hechos 16:14).
w07-S 1/3 pág. 23 párr. 15
San sekan matikueyichiuakan itoka Jehová
15 “Oniktlatlaujti Jehová uan ye onechnankili. Onechpaleui ijkuak onimomojtiaya” (Salmo 34:4). David sapanoua okipatioitaya tlen okipanok porque okijto: “Oniknotski Jehová ijkuak onitlajyouijtoka uan ye onechkaki. Onechpaleui ijkuak sapanoua onimotekipachouaya” (Salmo 34:6). Ijkuak timonechikouaj uelis tikijtoskej ken yotechpaleui Jehová ijkuak otikixnamikej itlaj oui. Tlen tikijtoskej uelis kinpaleuis tokniuan okachi matlaneltokakan ijkon ken David okinpaleui oksekimej matlaneltokakan. “Oyolpakej akinmej inauak omotokijkej uan itech inmixko amo keman omotaya pinauaj” (Salmo 34:5). Yejuan okineltokayaj toTajtsin Dios okipaleuiaya David uan okiteititiayaj itech inmixko oyolpakiayaj maski okicholilijtokaj tekiua Saúl. Axkan noijki miakej tokniuan kineltokaj Jehová kinpaleuis uan noijki ijkon kineltokaj akinmej yikin momachtijtokej. Itech inmixko mota amo kinekij kikauaskej Jehová ijkuak kitaj ken kinpaleuia.
Matiktemokan ken techpaleuia Biblia
Jehová nochipa kinpaleuis akinmej kitemouaj
12 David okimatiaya Jehová amo keman kinkaua uan nochipa kinpaleuia akinmej kitlasojtlaj. Maski uelis mikiskia, tlen okijkuilo itech Salmo 34 kiteititia sapanoua otlaneltokaya, ik non, okimachiliaya iángel Jehová okimaluijtoka (Sal. 34:7). David okijto iángel Jehová okatka ken se soldado tlen kuali otlachixtoka para kimaluijtos. Maski David okimatiaya tlateuis ika espada uan ika tetl, amo omokuayejyeko uelis iselti kintlaniliskia akinmej okikokoliayaj porque Jehová okilui yetoskia tekiua (1 Sam. 16:13; 24:12). Okineltokak iángel Jehová kinpaleuia akinmej kitlakaitaj. Tejuan amo tikchiaj Jehová san niman ma techpaleui para amitlaj ma techpano. Tikmatokej tla tikneltokaj Jehová techpaleuis, maski timikiskej satepan ye techyolitis uan nochipa tiyoltoskej.
13 Satepan moneki tikteititiskej tla melauak tikneltokaskej Jehová techmaluis. Ijkuak akinmej pouij itech Gog de Magog kinekiskej techtlajyouiltiskej xamo timokuayejyekoskej techmiktiskej. Ijkuakon moneki okachi tikneltokaskej Jehová uelis techmakixtis. Akinmej techkokoliaj mokuayejyekoskej amikaj uelis techpaleuis (Ezeq. 38:10-12). Yejuan mokuayejyekoskej uelis san niman techmiktiskej porque amitlaj tikpiaj para timoteuiskej uan amo tikmatij ken timopaleuiskej. Yejuan amo tlaneltokaj, ik non, amo kimatij iángeles Jehová techpaleuiskej pero tejuan tikmatij ijkon panos porque titlaneltokaj. ¡Kintlajtlachialtis ijkuak kitaskej ken iángeles Jehová techpaleuiskej! (Apoc. 19:11, 14, 15).