¿Tlen techpaleuis para amo sapanoua ma timotekipachokan?

IJKUAK sapanoua timotekipachouaj xamo tikmachiliaj amo titlaxikoskej (Prov. 12:25). ¿Ijkon yotimomachili? Tla ijkon mitspanoua, amo san te ijkon timomachilia. Xamo timiakej tikmaluiaj se tofamiliar, oixpoliuik akin otiktlasojtlayaj, otlaxixinki kanin tikatej noso itlaj kichiua ma tisotlauakan. ¿Tlen techpaleuis amo okachi ma timotekipachokan?a

Tlen okipanok tekiua David uelis techpaleuis amo okachi ma timotekipachokan. Ye sapanoua otlajyoui uan hasta okinekiayaj kimiktiskej (1 Sam. 17:34, 35; 18:10, 11). ¿Tlen okipaleui amo sapanoua ma motekipacho uan tejuan tlen techpaleuis?

¿TLEN OKIPALEUI DAVID?

David okipanok miak tlamantli amo kuali. Ma tikitakan tlen opanok ijkuak tekiua Saúl okinekiaya kimiktis. Ijkuak David uan isoldados omokopkej ialtepe, akinmej okinkokoliayaj okintlatilijkej inkal, okintlachtekilijkej uan okinuikakej infamilias. ¿Tlen okichi David? Biblia kijtoua ye uan isoldados sapanoua ochokakej uan amitlaj okinyolseuiaya uan sekimej isoldados okinekiayaj kimojmotlaskej (1 Sam. 30:1-6). David okipanotoka eyi tlamantli: Ifamilia otlajyouijtoka, Saúl okinekiaya kimiktis uan noijki isoldados okinekiayaj kimiktiskej. Ximokuayejyeko ken omomachiliaya David.

¿Tlen okichi? San niman okilui Jehová ma kiyolchikaua. ¿Ken okichi? Nochipa iuan omotlapouiaya para ma kiyolchikaua uan omokuayejyekouaya ken yokipaleuijka (1 Sam. 17:37; Sal. 18:2, 6). David okajsikamatki omonekiaya Jehová ma kiyekana, ik non, okilui tlen omonekiaya kichiuas. Ijkuak Jehová okinankili, David san niman okichi tlen ye okilui. Jehová okinteochi ye uan isoldados, okinmakixtitoj infamilias uan nochi tlen okipiayaj (1 Sam. 30:7-9, 18, 19). David okichi eyi tlamantli. Okitlatlaujti Jehová ma kipaleui, omokuayejyeko ken yokipaleuijka uan okichi tlen okilui. ¿Ken uelis tikchiuaskej ken David? Ma tikitakan eyi tlamantli.

MA TIKCHIUAKAN KEN DAVID IJKUAK SAPANOUA TIMOTEKIPACHOUAJ

1. Ma timotlatlaujtikan. Ijkuak timotekipachouaj ma tikiluikan Jehová tlen tikmachiliaj para tikmatiskej tlen tikchiuaskej. Tla tikiluiaj ken timomachiliaj, timoyolseuiskej. Noijki uelis tikiluiskej san seki tlajtoli tla amo uelis okachi iuan timotlapouiskej. Ijkuak tikiluiaj Jehová ma techpaleui, tikchiuaj ken David porque tikneltokaj ye techpaleuis. Ye okijto: “Jehová notepexi, nechchikaua, nechmakixtia. NoDios ken se tepexitl kanin nimopaleuia” (Sal. 18:2). ¿Melauak techpaleuia tla timotlatlaujtiaj? Se precursora tlen itoka Kahlia okijto: “Ijkuak nimotlatlaujtia kuali nimomachilia. Ijkuak nimotlapouia iuan Jehová nechpaleuia para kuali nimokuayejyekos uan okachi nikneltoka”. Jehová techkauilia iuan ma timotlapouikan uan ijkon techpaleuia amo okachi ma timotekipachokan.

2. Ma timokuayejyekokan. ¿Tikilnamiki ijkuak itlaj omitspanok uan omitspaleui Jehová? Ijkuak timokuayejyekouaj ken okinpaleui itekipanojkauan yiuejkika uan ken axkan techpaleuia, okachi titlaneltokaj uan okachi kuali timomachiliaj (Sal. 18:17-19). Se tokni tlen itoka Joshua, okijto: “Nikijkuiloua ijkuak Jehová nechnankilia, ijkon nikilnamiki ijkuak itlaj oniktlajtlanili uan onechmakak tlen omonekiaya”. Tla timokuayejyekouaj ken yotechpaleui Jehová, non techpaleuis para amo san ma timotekipachojtokan.

3. Ma tikchiuakan. Moneki tikchiuaskej tlen Jehová kijtoua. Moneki achto tikitaskej tlen kijtoua Biblia para tikmatiskej tlen tikchiuaskej (Sal. 19:7, 11). Miakej yokitakej ijkuak kitemouaj tlen kijtosneki se versículo, kajsikamatij ken uelis kichiuaskej. Se tlayekanki tlen itoka Jarrod, okijto: “Nikajsikamati tlen kijtosneki se versículo ijkuak nimomachtia, ijkon nikajsikamati tlen Jehová kineki nechiluis. Tlen nimomachtia ajsi itech noyolo uan ijkon nikchiua tlen ye kipaktia”. Ijkuak tiktemouaj itech Biblia tlen kineki Jehová ma tikchiuakan uan ijkon tikchiuaj, amo okachi timotekipachouaj.

JEHOVÁ MITSPALEUIS AMO OKACHI XIMOTEKIPACHO

David okimatiaya para amo san motekipachojtos omonekiaya ma kipaleui Jehová. Okitlasojkamatili porque ye okipaleuiaya, ik non, okijto: “Ika ichikaualis noDios nitlejko ipan se tepamitl”. Noijki okijto: “Akin melauak toTajtsin Dios nechyolchikaua” (Sal. 18:29, 32). Xamo sapanoua titlajyouiaj uan timokuayejyekouaj yetoskia ken se tepamitl tlen amo ueli tikpanouiaj pero Jehová techpaleuis ma titlaxikokan. Tla timotlatlaujtiaj, tla timokuayejyekouaj ken yotechpaleui uan tla tikchiuaj ken ye kijtoua, uelis tikneltokaskej ye techyolchikauas uan techpaleuis ma timokuayejyekokan ken moneki para amo sapanoua timotekipachoskej.