¿Tleka Jesús kipatioita iTekiuajkayo toTajtsin Dios?

Ken yotimomachtijkej, Jesús omochijchika pampa ‘kintlapowis de n kuali tlájtoli de Dios’ (Lucas 8:1). Sapanoa uejka onejnemiaya uan omochijchikauaya miak pampa itech nochi altepetl Israel tetlapouiskia itech nin tekiuajkayotl. Uan itech Evangelios, kanin ijkuilitok ken otetlapoui, kanaj cien veces ijkuilitok itech Tekiuajkayotl, uan miakej tlajtolmej okinmijto Jesús. Pero nochi nin san seki tlamantli itech nochi tlen otetlapoui itech nin Tekiuajkayotl (Juan 21:25).

¿Tleka Jesús okipatioitaya Tekiuajkayotl? Achto pampa toTajtsin Dios okipejpenki ken ueyi tekiua itech non Tekiuajkayotl (Isaías 9:6; Lucas 22:28-30). Pero amo okichi pampa okinekiaya tlanauatis noso ma kiueyichiuakan (Mateo 11:29; Marcos 10:17, 18). Ye otetlapouiaya itech Tekiuajkayotl pampa okimatiaya uan kimati san Tekiuajkayotl uelis kinpaleuis akinmej kintlasojtla: iTajtsin uan imachtijkauan.a

TEKIUAJKAYOTL KIUEYICHIUAS ITAJTSIN JESÚS

Jesús ika nochi iyolo kitlasojtla iTajtsin (Proverbios 8:30; Juan 14:31). Kipaktia iyelis ken: tlasojtlalistli, iknomatilistli uan melajkayotl (Deuteronomio 32:4; Isaías 49:15; 1 Juan 4:8). Ik non, amo kipaktia nochi tlen amo melauak omoijto itech iTajtsin. Se neskayotl, miakej kijtoaj toTajtsin Dios amo kitekipachoa tlajyouilistli tlen techpanoa, uan oksekimej kijtoaj ye techtlajyouiltia. Ik non, Jesús sapanoa omochijchika pampa tetlapouis “n kuali tlájtoli de Dios”, pampa nin Tekiuajkayotl kichipauas iToka toTajtsin Dios (Mateo 4:23; 6:9, 10). ¿Ken kichiuas?

Kinteochiuas nochtin tlaltikpaktlakamej. Ika Tekiuajkayotl, Jehová “kinmixayowajwatsas nochteh”. Kitlajtlamis nochi tlen kichiua ma tichokakan, “iwa ayakmó yetos mikílistli, nion chokílistli, nion neyolkókoli” (Apocalipsis 21:3, 4). ITekiuajkayo toTajtsin Dios kichiuas ayakmo ma titlajyouikan.b

Jesús otetlapoui itech Tekiuajkayotl, pampa Tekiuajkayotl techititia toTajtsin Dios teiknomati uan kipia miak chikaualistli (Santiago 5:11). Pero Tekiuajkayotl amo san kichiuas tlen kuali iuan toTajtsin Dios. Noijki kinpaleuis akinmej Jesús kintlasojtla: imachtijkauan.

TEKIUAJKAYOTL KINPALEUIS IMACHTIJKAUAN JESÚS

Achto ualaskia Jesús, miak xiuitl ochantik itech iluikak iuan iTajtsin. Okipaleui okichijchi nochi, ken sitlalimej iuan galaxias tlen katej itech semanauak, noijki okichijchi Tlaltikpak uan nochi tlen itech yoltok (Colosenses 1:15, 16). Pero itech nochi tlen Jesús okichijchi okachi okintlasojtlak tlaltikpaktlakamej (Proverbios 8:31).

Non tlasojtlalistli okiyolini ma tetlapoui. Ye nochipa okijto ouala pampa ‘kitematiltis kuali tlajtoli non amitla kipiaj’ (Lucas 4:18). Pero Jesús amo san okijtoaya, noijki okichiuaya. Se neskayotl, ijkuak sekimej omonechikojkej pampa kikakiskej, “Jesús [...] okimiknoma iwa okimpajti n kokoxkeh” (Mateo 14:14). Okse tonal, se tlakatl tlen okipiaya se kokolistli tlen temomojti okilui: “Tla Tejwatsi tikmonekiltia, weletis techchipawas de nokokolis”. Ika miak tlasojtlalistli uan iknomatilistli okilui: “Nikmonekiltia. ¡Ximochipawa!”, uan okipajti (Lucas 5:12, 13). Uan ijkuak okitak María —iyolikni— sapanoa omoyolkokoaya pampa omikik ikni akin omotokayotiaya Lázaro, “Jesús oyoltélinki asta oyolpatsiwik. [...] Iwa [...] ochokak” (Juan 11:32-36). Ijkuakon okichi itlaj tlen otetlajtlachialti: okiyoliti Lázaro akin yokipiaya naui tonal omikik (Juan 11:38-44).

Jesús okimatiaya milagros tlen okichi san panoskiaj. Ye okimatiaya se tonal oksepa mokokoskiaj uan mikiskiaj. Pero ye okimatiaya tlen kichiuas Tekiuajkayotl amo keman tlamis. Ik non, amo san okinpajti noijki itech nochi inemilis “okitematiltiaya n kualitlájtoli” (Mateo 9:35). Milagros tlen okichi san okiteititijkej tlen kichiuaskia satepan ijkuak Tekiuajkayotl tlayektlalis nochi ipan Tlaltikpak. ¿Tlen kichiuas? Ma tikitakan tlen kijtoa Biblia.

• 

  Ayakmo yetos kokolistli.

  “Ijkuakon inmixtololouan akinmej amo tlachiaj motlaposkej uan innakasuan akinmej amo tlakakij motlaposkej. Ijkuakon akin amo nejnemi tlejkos ken se masatl, uan inenepil akin amo tlajtoa tsajtsis ika yolpakilistli”. Noijki, “nion se tlaltikpaktlakatl kijtos: ‘Nimokokoa’” (Isaías 33:24; 35:5, 6).

• 

  Ayakmo yetos mikilistli.

  “Yolmelauakej yetoskej itech Tlaltikpak, uan itech yetoskej nochipa.” (Salmo 37:29.)

  “[ToTajtsin Dios] kipojpolos mikilistli pampa nochipa, uan toTeko Jehová akin Ueyititok melauak kinmixayouajuatsas tlaltikpaktlakamej.” (Isaías 25:8.)

• Kinyolitiskej akinmej yomikej.

  “Nochteh non yomikkeh iwa tooktokeh kikakiskeh itlajtol. Iwa kisaskeh.” (Juan 5:28, 29.)

  “Nochteh non yomikkeh moyolitiskeh.” (Hechos 24:15.)

• 

  Nochtin kipiaskej inkalijtik uan tekitl.

  “Uan kinchijchiuaskej kalmej, uan intech chantiskej; uan kitokaskej viñas uan kikuaskej itlakilo. Amo kinchijchiuaskej uan okse ompa chantis; amo tlatokaskej uan okse kikuas [...;] uan tlen kichiuaskej ika inmauan notekipanojkauan kinyolpaktis.” (Isaías 65:21, 22.)

• 

  Ayakmo yetos guerras.

  “[ToTajtsin Dios] kitlajtlamia guerras itech nochi Tlaltikpak.” (Salmo 46:9.)

  “Ayakmo moteuiskej ika espadas se ueyi altepetl iuan okse, nion momachtiskej guerra.” (Isaías 2:4.)

• 

  Nochtin kipiaskej tlakuali.

  “Tlali melauak kitemakas itlakilo; Dios, toTajtsin Dios, techteochiuas.” (Salmo 67:6.)

  “Yetos miak xinachtli ipan Tlaltikpak; ipan tepemej sapanoa tlamochiuas.” (Salmo 72:16.)

• Tikpiaskej tlen ika timopanoltiskej.

  “Amo [...] kilkauaskej akin amo itlaj kipia.” (Salmo 9:18.)

  “Ye kimakixtis akin amo itlaj kipia uan kitlajtlanilia ma kipaleui, noijki akin moyolkokoa uan akin amo kipia akin kipaleuis. Kiknomatis akin tlajyouia uan akin amo itlaj kipia, uan kinmakixtis inyolilis akinmej amo itlaj kipiaj.” (Salmo 72:12, 13.)

Ika nochi tlen yotimomachtijkej, ¿tikajsikamati tleka Jesús sapanoa okipatioitaya iTekiuajkayo toTajtsin Dios? Ye okintlapoui nochtin akinmej okinekiayaj kikakiskej, pampa san Tekiuajkayotl uelis kitlajtlamis nochi tlen techtlajyouiltia.

¿Mitspaktia tlen kichiuas Jehová? Tla ijkon, ¿ken uelis tikmatis okachi itech Tekiuajkayotl? ¿Tlen uelis tikchiuas pampa tikinselis ninmej tlateochiualismej? Itech okse tlamachtil techiluis.