Ken titetlapouiskej ika carritos noso mesas

Ijkuak titetlapouiaj ika carritos noso mesas kinyoltilana tlaltikpaktlakamej tlen yolkualmej pampa ma kimatikan tlen melauak (Juan 6:44). Ik non, nochtin tlayekankej kinyoleuaj ijkon ma kichiuakan kanin nemij miakej tlaltikpaktlakamej ik kanin tetlapouia intlanechikol. Pampa ueli kinuikatinemij carritos noso mesas, uelis amo moneki kintlajtlaniliskej tekiuajkej ma kinkauilikan kanin motlaliskej. Uan, ¿akinmej uelis tlapaleuiskej? Nochtin akinmej tetlapouiaj tlen kiteititiaj kuali mokuayejyekoaj, motlakentiaj ken moneki, uan kuali motlapouiaj iuan tlaltikpaktlakamej. Axkan tikitaskej tlen moneki tikchiuaskej uan tlen amo moneki tikchiuaskej pampa okachi kuali titetlapouiskej.

Tlen moneki tikchiuaskej:

Xiyolpaki, kuali xikinseli uan xikinpaleui akinmej panoaj. Se neskayotl, sekimej tokniuan ixuetskaj uan kintlajpaloaj ika miak pakilistli. Tla sekimej tlaltikpaktlakamej kitaj amatlajkuilolmej ijkuak panoaj, uelis tikinmiluis: “Uelis tikonanas se amatlajkuilol tla tikneki”.
Amo uejka nion sapanoa inauak xiyeto itech carrito noso mesa. Sekimej akinmej kuali tetlapouiaj kitaj kuali amo okachi inauak yetoskej. Oksekimej kitaj ijkuak ijkon kichiuaj, akin ik ompa panoa motokia inauak carrito noso mesa, ik non, amo okachi inauak katej uan mochiaj pampa ikaj ompa ma motoki. Ijkuak se tlaltikpaktlakatl motokia itech carrito noso mesa, ximochijchikaua pampa tipeuas iuan timotlapouis, uelis tiktlajtlanis: “¿Ualeua yotimotlajtlani nin tlamantli?”.
Ximochijchikaua pampa tiktekitiltis Biblia.
Tla ikaj kiuika se amatlajkuilol tlen ika titlamachtiaj, ken amochtli Tlamachtia Biblia, kuali xikyekilui ken titlamachtiaj. Xikititi video ¿Tleka moneki timomachtis Biblia? itech mocelular noso motableta.
Ijkuak ikaj kiteititia kineki okachi kimatis, xiktlajtlani ken uelis oksepa iuan timotlapouis.