Titlajyouiaj ijkuak onka guerras uan ijkuak mokualaniaj

Uelis peuas se guerra noso mokualaniskej itech altepemej kanin kuali katej. Noijki tlajyouiaj akinmej amo chantij kanin panotok guerra. Ijkuak tlami se guerra miakej tlajyouiaj porque amo onka tlen kikuaskej. Matikitakan tleka ijkon tikijtouaj:

• 

  Onka apistli. Akinmej tlapaleuiaj itech Programa Mundial de Alimentos okijtojkej: “Okachi tlaapisti ijkuak onka se guerra. Kanaj 70% amo kipiaj tlen kikuaskej porque opanok se guerra uan miakej omokualanijkej”.

• 

  Miakej moyolkokouaj ijkuak onka se guerra noso kinpanoua miak tlamantli. Miakej moyolkokouaj uan motekipachouaj ijkuak peuas se guerra ik kanin chantij. Miakej kinkojkouaj kanin onka se guerra uan noijki ayakmo kuali mokuayejyekouaj. Noijki itech seki altepemej amo kinpiaj akinmej tepajtiskej.

• 

  Miakej yauij oksekan chantitiuij ijkuak onka se guerra. Se tlakatl tlen tekipanoua itech Naciones Unidas uan tlayekana para kinpaleuiskej akinmej amo kipiaj kanin chantiskej, okijto desde septiembre 2023 kanaj 114 millones okikajkej inkalijtik uan oksekan oyajkej. Ijkon panoua ijkuak onka se guerra noso ijkuak miakej mokualaniaj.

• 

  Amo onka tomin. Ijkuak onka se guerra ayakmo onka tomin uan sapanoua tlapatioua. Tekiuajkej kinejnekij okachi miak tomin ijkuak onka se guerra. Ikinon miakej tlajyouiaj porque tekiuajkej ayakmo kipiaj tlen ika kintlaxtlauiskej tepajtijkej uan akinmej tlamachtiaj itech escuela. Noijki moneki okachi miak tomin para tlayektlaliskej ijkuak tlami se guerra.

• 

  Ijtlakaui tlaltikpak ijkuak onka guerra. Miakej tlajyouiaj ijkuak onka guerra porque miak tlamantli kijtlakouaj. Miakej peua mokokouaj porque ijtlakaui tlaltikpak, sokioua atl uan ayakmo chipauak ejekatl. Noijki ijkuak tlami guerra ompa mokaua miak tlamantli tlen uelis toponis uan uelis mokojkoskej akinmej ompa panouaj.