3 | Biblia kijtoua tlen okinpanok sekimej

BIBLIA KIJTOUA: Sekimej tlen okatkaj yolkualmej omomachiliayaj “kemi tejwah” (SANTIAGO 5:17).

¿Tlen kijtosneki?

Biblia kijtoua tlen okinpanok uan ken omomachilijkej sekimej tlakamej uan siuamej tlen yiuejkika okatkaj. Tla tiktlajtoltis tlen okinpanok, xamo tikajsiskej ikaj tlen omomachiliaya ijkon ken tejuan.

¿Ken techpaleuia?

Tinochtin tiknekij matechajsikamatikan. Okachi ijkuak amo kuali timomachiliaj porque timokokouaj. Xamo timomachiliskej ken sekimej itekipanojkauan Jehová ijkuak tiktlajtoltiskej ken omomachiliayaj uan ken omokuayejyekouayaj. Non uelis techpaleuis matikitakan amo san tejuan moneki timochijchikauaskej kuali timomachiliskej uan amo sapanoua timotekipachoskej.

Biblia kijtoua tlen okijtojkej sekimej tlakamej ijkuak omotekipachouayaj uan omoyolkokouayaj. ¿Se tonal yotikijto: “Ayakmo nitlaxikoua uan ayakmo nikneki ijkon manechpano”? Ijkon omomachilijkej Moisés, Elías uan David (Números 11:14; 1 Reyes 19:4; Salmo 55:4).
Biblia techiluia tlen okipanok se siuatl tlen omotokayotiaya Ana. Ye sapanoua omoyolkokouaya porque amo ueli okinpiaya ikoneuan. Noijki se siuatl okikokoliaya uan okipinauiaya (1 Samuel 1:6, 10).
Xamo timomachilia ijkon ken Job omomachiliaya. Itech Biblia ijkuilitok tlen okipanok. Maski ye otlaneltokaya, sapanoua omoyolkokouaya uan okijto: “Nechtlajyaltia nonemilis, ayakmo nikneki niyoltos” (Job 7:16).

Nochtin yejuan omoyolseuijkej uan ayakmo omokuayejyekojkej tlen amo kuali. Tejuan noijki uelis tikchiuaskej ijkon ken yejuan tla timomachtiaj tlen okinpanok.

Biblia okipaleui Kevin

San niman mopatla ken nimomachilia

“Ijkuak yinikajxitiskia 50 xiuitl, onechiluijkej nikpia se kokolistli tlen kichiua san niman mamopatla ken nimomachilia. Ualeua nikmachilia ueli nikchiua nochi tlen nikneki pero noijki ualeua nikneki nimikis”.

Nechpaleuia tlen kijtoua Biblia

“Tlen nechpanoua noijki ijkon okipanok apóstol Pedro. Ualeua okimachiliaya amitlaj ipati porque omotlapololtiaya. Pero amo san non tlamantli omokuayejyekojtoka. Ye okintemo iyolikniuan tlen okimatiaya kipaleuiskiaj. Sapanoua nimotekipachoua ijkuak san niman mopatla tlen nikmachilia ikinon peua nimokuayejyekoua amitlaj nopati. Pero ijkuak ijkon nimomachilia, nikintemoua noyolikniuan ijkon ken Pedro okichi. Yejuan nechpaleuiaj amo manimosotlaua”.

“Noijki nimokuayejyekoua ken omomachili tekiua David. Ye omoyolkokouaya porque okilnamikiaya tlen amo kuali okichi. Ualeua ijkon nimomachilia ijkuak nikilnamiki tlen onikchi uan tlen onikijto. Ikinon nechyolchikaua tlen okijkuilo David itech Salmo 51. Versículo 3 kijtoua: ‘Porque nikmati nochi tlen amo kuali nikchiua uan nochipa nikilnamiki onitlajtlakolchi’. Ijkon nimomachilia ijkuak sapanoua nimoyolkokoua uan nikita oui kuali nimokuayejyekos. Pero nikilnamiki tlen okijto David itech versículo 10: ‘NoTajtsin Dios xikchiua manikpia se noyolo chipauak uan techmaka se yankuik espíritu tlen amo keman mamitskaua’. Ne noijki nikiluia toTajtsin Dios manechpaleui maniyolpaki. Tlen kijtoua versículo 17 nechyolseuia, ompa kijtoua: ‘Se yolotl tlen moyolkokoua, toTajtsin Dios amo tikixtopeuas’. Ijkuak niktlajtoltia nikilnamiki Jehová nechtlasojtla”.

“Okachi nikneltoka tlen nikselis satepan ijkuak nimokuayejyekoua tlen okinpanok yiuejkika sekimej itekipanojkauan toTajtsin Dios. Noijki tlen nopatka yokichi toTajtsin Dios. Okachi nimochijchikaua nitlaxikos porque nikneltoka melauak mochiuas tlen kijtoua Biblia”.