April

Singenzani ukuze sifunde okunengi emadodeni la? Okunye esingakwenza yikulingisela ukholo lwabo kanye lesibonelo sabo esihle. Kanti njalo kumele sibalalele nxa besilaya besebenzisa iBhayibhili. (Heb. 13:7, 17) Abadala bayasithanda futhi bafuna sithuthuke ekukhonzeni. Nxa bengananzelela ukuthi kasisatshiseki njalo sesilova emihlanganweni bayasukumela phezulu ukuze basisize. Bazimisele ukusilalela ngesineke lokusikhuthaza ngamazwi alomusa kanye lokuseluleka besebenzisa iLizwi likaNkulunkulu. Wena uyakunanzelela yini ukuthi uJehova usebenzisa abadala ukuze atshengise ukuthi uyakuthanda? Kwezinye izikhathi kuyabe kumele abadala baqunge isibindi ukuze basinike iseluleko. Kuyini ongakwenza ukuze umsebenzi wabadala ube lula? Thobeka njalo ube lomusa ukuze kube lula ukuthi bakhulume lawe. Okunye ongakwenza yikwamukela abakutshela khona futhi ukubone njengamazwi avela kuJehova atshengisa ukuthi uyakuthanda. Lokhu akusoze kusize wena kuphela kodwa kuzakwenza lomsebenzi wabo ube lula. w18.03 31 ¶15-16

Indlela abantwana ababamba ngayo izinto iyatshiyana. Ngokwesibonelo abanye babhabhathizwa masinyane ngenxa yokuthi bayabe sebelizwisisa iqiniso futhi besenelisa ukwenza izinqumo ezinhle. Kodwa abanye babhabhathizwa sebekhulakhulile ngoba kubathatha isikhathi ukuzwisisa iqiniso. Abazali abawunanzelelayo umahluko lo bayazama ukusiza umntwana ngamunye ukuthi athuthuke kusiya ngokuthi uzwisisa njani, kabaphongumfuqa nje ukuthi abhabhathizwe. Kuyathokozisa ukubona umntwana ekhetha ukwenza lokho okutshiwo embhalweni walamuhla. Abazali kufanele bahlale bekhumbula ukuthi inhloso yabo ngeyokusiza abantwana babe ngabafundi. Ngakho bazali zibuzeni umbuzo lo, ‘Umntanami uselolwazi olweneleyo yini okokuthi usengazinikela kuNkulunkulu njalo abhabhathizwe?’ w18.03 9 ¶6

Nxa othile esinxusile savuma, akumelanga siphonguntshintsha ingqondo ngaphandle nxa kulesizatho esiqinileyo. Phela nxa singayekela ukuhamba siyabe simbambise ilitshe futhi kuyabe kufanana lokuthi usebenzele ize. (Mat. 5:37) Okwenza abanye bantshintshe ingqondo yikuthi bayabe sebenxuswe kwenye indawo ababona angani ingcono. Kodwa umuntu owenza lokhu utshengisa ukuthi kalathando lokuthi kabahloniphi abanye. Kumele samukele loba yini esiyenzelwe ngosinxusileyo. (Luk. 10:7) Nxa kuyikuthi asisenelisi ukuyafika kufanele simtshele kuseselesikhathi. Nxa singenza njalo siyabe sitshengisa ukuthi silendaba laye lokuthi siyamthanda. Okunye okumele sikwenze yikuhlonipha amasiko abanye ngoba indlela abantu abenza ngayo izinto iyatshiyana. Abanye abantu bayamamukela umuntu wemzini lanxa ubengatshongo ukuthi uzafika kodwa abanye bafuna liqale lihlele. Kwezinye indawo kukhangelelwe ukuthi nxa umuntu ekunxusa emzini wakhe uqale wale kanye loba kabili kodwa kwabanye ukwala kutshengisa ukuthi uyaziphakamisa. Kumele sizame ukwenza abasinxusileyo bathokoze kungelani lokuthi amasiko ethu anjani. w18.03 18 ¶20-21

Ukwazi iMibhalo ayisikho kodwa okuqinisa ubuhlobo bethu loNkulunkulu. (1 AmaKho. 4:29, 30; 11:4-6) Ngaphezu kokuba lolwazi kuyini okunye okungasisiza? Yikuqhubeka sithuthuka ekukhonzeni. (Kol. 2:6, 7) Eyinye indlela yokukwenza lokhu yikufunda ibhuku elithi “Zigcineni Lisethandweni LukaNkulunkulu.” Ibhuku leli lizakusiza ubone indlela ongasebenzisa ngayo izimiso eziseBhayibhilini. Nxa kuyikuthi sewaliqeda akhona amanye amabhuku ongawafunda ukuze uqinise ukholo lwakho. (Kol. 1:23) Kanti njalo kuqakathekile ukuthi ucabangisise ngalokho okubalayo njalo ucele uJehova akusize ukuze wenelise ukukusebenzisa empilweni yakho. Ukutaditsha lokucabangisisa kumele kukwenze ube lesifiso sokuthokozisa uJehova lokulalela imithetho yakhe. (Hubo. 40:8; 119:97) Okunye okufanele ukwenze yikubalekela izinto ezingakubuyisela emuva ekukhonzeni.​—Tit. 2:11, 12. w18.02 24-25 ¶7-9

Ukuze sibe lokholo okuqinileyo njengoNowa kumele sibale iLizwi likaNkulunkulu zikhathi zonke, sicabangisise ngesikufundayo futhi sikusebenzise empilweni zethu. (1 Phet. 1:13-15) Singenza njalo sizakuba lokuhlakanipha kukaNkulunkulu kanye lokholo oluzasinceda ukuthi sibalekele amacebo kaSathane lezenzo zabantu balumhlaba. (2 Khor. 2:11) Abantu laba bathanda udlakela, abaziphathanga futhi balandela izifiso zabo ezingalunganga. (1 Joh. 2:15, 16) Nxa lathi singelalo ukholo oluqinileyo singacina singasabi lendaba lokuthi ukuphela komhlaba lo sekusondele. Khumbula ukuthi lapho uJesu eqathanisa izinsuku zikaNowa lezethu kazange akhulume ngodlakela lokungaziphathi kodwa wakhuluma ngengozi yokuvumela ezinye izinto zisiphambanise ekukhonzeni uNkulunkulu. (Mat. 24:36-39) Ngakho zibuze: ‘Izinto engizenzayo nsuku zonke ziyatshengisa yini ukuthi ngiyamazi uJehova? Ukholo lwami luyangifuqa yini ukuthi ngenze intando yakhe njalo ngincede abanye ukuthi bamazi?’ Indlela ozaphendula ngayo imibuzo le yiyo ezatshengisa ukuthi uhamba loNkulunkulu yini loba hatshi.​—Gen. 6:9. w18.02 9-10 ¶8-10

Kasingeke sibabalekele ngokupheleleyo abantu abenza izinto ezimbi ngoba abanye sisebenza labo, sifunda labo esikolo ikanti abanye sihlala labo. Yikho kumele sisebenze nzima ukuze singacini sithatheka ngalokho abakwenzayo. Okungasinceda yikuqhubeka siqinisa ubuhlobo bethu loJehova ngokubala iBhayibhili langokukhetha abangane abamthandayo. Kuqakathekile ukuthi sincede abantu bamazi uJehova. Ngakho kasizameni ukusebenzisa loba yiliphi ithuba ukuthi sibatshumayeze njalo sicele uJehova ukuthi asincedise senelise ukuthinta izinhliziyo zabo. Okunye esingakwenza yikuhlala sikulungele ukutshela abantu ukuthi singoFakazi bakaJehova. Lokhu kuzakwenza badumise uNkulunkulu nxa bangabona indlela esikhuluma ngayo lesiziphatha ngayo. Kufanele sihlale sitshengisa ukuthi uJehova uyasifundisa ukuthi sibalekele ‘izinkanuko zasemhlabeni, njalo siphile ngokuzikhuza, ngokuqonda empilweni yokulalela uNkulunkulu ngesikhathi samanje.’ (Tit. 2:11-14) Singaphila ngendlela ethokozisa uNkulunkulu, abanye bazakubona besebesitsho amazwi la athi: ‘Wothi sihambe lani ngoba sesizwile ukuthi uNkulunkulu ulani.’—Zek. 8:23. w18.01 31 ¶17-18

Kubi yini ukuzithanda? Hatshi akukubi. Kuvele kusegazini ukuthi sizithande ngoba uJehova wasidala ngaleyondlela. UJesu wathi: “Thanda umakhelwana wakho njengoba uzithanda.” (Mak. 12:31) Akwenzakali ukuthi sithande omakhelwana bethu nxa singazithandi. IBhayibhili lithi: “Amadoda kumele abathande omkawo njengemizimba yawo. Lowo othanda umfazi wakhe uyazithanda. Belo, kakho owake wazonda umzimba wakhe, kodwa uwunika ukudla awulondoloze.” (Efe. 5:28, 29) Ngakho siyabona-ke ukuthi ukuzithanda kuhle. Abantu uPhawuli ayekhuluma ngabo yilabo abazithanda baze badlulise amalawulo. Ukuzithanda kwabo kwenza bazigqaje futhi bazibone bengcono kakhulu kulabanye. (Rom. 12:3) Nxa kungenzakala iphutha kabavumi ukuthi baphambanisile kodwa besulela icala kwabanye. Abantu abanjalo kabathokozi lakancane. w18.01 23 ¶4-5

Nxa sitaditsha siyabe silalela uJehova ekhuluma lathi kodwa nxa sithandaza siyabe sesikhuluma laye. Abanye babona angathi umthandazo ngumkhuba nje ongatsho lutho ikanti abanye bawubona njengomuthi wenhlanhla ongabenza baphumelele empilweni. Kodwa thina siyakwazi ukuthi nxa sithandaza siyabe sikhuluma loJehova uMdali wethu futhi uzimisele ukulalela nxa sikhuluma laye. (Flp. 4:6) IBhayibhili lisikhuthaza ukuthi ‘sethule iziswelo zethu kuJehova’ nxa sikhathazekile. (Hubo. 55:22) Abafowethu labodadewethu abanengi sebekubonile ukuthi ukuthandaza kuJehova kuyanceda. Kwenze lawe, kuzakusiza kakhulu. Ukuthandaza kusinika lethuba lokubonga uJehova ngokuhle asenzela khona. Kulula kakhulu ukuthi sicabange ngenhlupho esilazo size sicine sikhohlwa okuhle esikwenzelwe nguJehova. Ngakho zama ukuthi nsuku zonke ucabange izinto ezintathu akuphe zona, ubusumbonga ngazo. w17.12 25-26 ¶10-11

Abanengi esifunda labo iBhayibhili bayathuthuka baze bazinikele kuJehova njalo babhabhathizwe. Phakathi kwabo kulabantwana abakhuliswe ngabazali abangamaKhristu asebekhethe ukwenza intando kaNkulunkulu. (Hubo. 1:1-3) Nxa ungumzali, kungenzakala ukuthi lawe ukhangelele ukuthi ngelinye ilanga umntanakho uzabhabhathizwa. (Khangela u-3 Johane 4.) Akuthandabuzwa ukuthi ufuna umntanakho ayazi iMibhalo engcwele. Lamuhla iMibhalo engcwele igoqela iMibhalo YesiHebheru kanye leMibhalo YamaKhristu YesiGrikhi. Abantwana bayenelisa ukuzwisisa izindaba eziseBhayibhilini kanye labantu okukhulunywa ngabo lanxa besesebancane. Inhlanganiso kaJehova ikhiphe izinto ezinengi kakhulu abazali abangazisebenzisa ukuze basize abantwababo. Khumbula ukuthi ukwazi iMibhalo yikho okuvula ithuba lokuthi umntwana abe lobuhlobo obuhle loJehova. w17.12 18-19 ¶1, 4

Mhlawumbe ungudade otshadileyo futhi ubona angathi umkakho ongakholwayo kakuphathi kuhle. Uzakwenzani? Esimeni esinjalo kungaba lula ukuthi umzondele umkakho njalo uhlale ulawula. Lanxa kungakhanya angathi leli liqhinga elihle, iqiniso yikuthi akuyilungisi indaba futhi ngeke kwenze umkakho emukele iqiniso. Kodwa nxa ungazithoba njalo umhloniphe umkakho kuzakuba lokuthula emulini futhi kwenze uJehova adunyiswe. Okuhle yikuthi nxa ungenza njalo umkakho angacina elamukela iqiniso besekusiba lula ukuthi lobabili lithole umvuzo wokuphila phakade. (1 Phet. 3:1, 2) Mhlawumbe ungumzalwane otshadileyo futhi ubona angani umkakho ongakholwayo kakuhloniphi. Kambe angakuhlonipha yini nxa ungahlala umhwabhela ukuze umtshengise ukuthi nguwe inhloko yemuli? Nxa ungenza njalo, akulalutho olungalunga emulini yakho. Lanxa umkakho engasuyeFakazi, uNkulunkulu ukhangelele ukuthi ulingisele uKhristu ukuze ube yinhloko elothando. UJesu uliphatha ngothando ibandla futhi uyalibekezelela. (Luk. 9:46-48) Nxa ungazimisela ukulingisela isibonelo sikaJesu, uzakwenelisa ukusiza umkakho ukuthi akhonze uJehova. w17.11 28-29 ¶13-14

Abantu bomhlaba lo kabalandaba lemithetho kaJehova njalo ukulandela indlela abacabanga ngayo kuyingozi ngoba kungacina kuxegisa ukholo lwethu. Imicabango yabo engalunganga igcwele kuma-TV, ku-inthanethi, emisebenzini lasezikolo. Emazweni amanengi kujayelekile ukuzwa abantu besithi kabakholwa kuNkulunkulu. Abantu abanjalo abazihluphi ngokudinga ukuthi uNkulunkulu ukhona yini ngoba bacabanga ukuthi bangaziphilela nje kungelamuntu obatshela ukuthi benzeni. (Hubo. 10:4) Abanye njalo bacabanga ukuthi bangenelisa ukwazi okuhle lokubi lanxa bengakholwa kuNkulunkulu. Kulengqondo yini ukukholwa ukuthi uNkulunkulu kakho? Abantu abanengi bayalahleka endabeni le ngoba basuka badinge impendulo yombuzo lo kwabezesayensi. Kodwa iqiniso lizicacele nje. Ake ucabange ngomzekeliso lo: Kungenzakala yini ukuthi indlu ibekhona nje kungelamuntu oyakhileyo? Akwenzakali lokho! Manje nxa sikhangela indlela izinto ezidaliweyo ezimangalisa ngayo, singathi zaphonguzivelela yini? Hatshi. w17.11 20-21 ¶2-4

Ukucabangisisa ngokuthi kungani kuqakathekile ukuthi ube khona eSikhumbuzweni kuzakusiza kakhulu. Khumbula ukuthi ukungena imihlangano yebandla kutshengisa ukuthi siyakuqakathekisa ukukhonza uJehova. ISikhumbuzo laso ngumbuthano oqakathekileyo okungamelanga siwuphuthe futhi uJehova loJesu bayajabula nxa bebona sizimisela ukuba khona kuso. Ngakho kumele sizimisele ukuba khona embuthanweni lo ngaphandle nxa kulezimo eziphezu kwamandla ethu. Nxa singatshengisa ngezenzo ukuthi siyayiqakathekisa imihlangano yethu uJehova uzasibusisa njalo uzalondoloza amabizo ethu ‘encwadini yesikhumbuzo’ loba “encwadini yokuphila.” Encwadini le kulotshwe amabizo alabo abazathola isipho sokuphila okungapheliyo. (Isam. 20:15) Nxa iSikhumbuzo sesisondele, zinike isikhathi sokuthandaza futhi uhlolisise ukuthi ubuhlobo bakho loJehova bunjani.​—2 Khor. 13:5. w18.01 13 ¶4-5

Nxa umuntu obulele omunye ngengozi angafika edolobheni lokuphephela wayevikeleka. UJehova wakhuluma ngamadolobho la wathi ‘azakuba yisiphephelo kini.’ (Josh. 20:2, 3, The Holy Bible in Ndebele.) Yikho kwakungaqondanga ukuthi aphinde athonisiswe kumbe ukuthi umphindiseli wegazi angene edolobheni lokuphephela ambulale. Ukwazi lokhu kwakumenza ahlaliseke futhi akhululeke ngoba wayeyabe esedolobheni lokuphephela hatshi ejele. Wayelakho ukuthi afike azenzele imisebenzi yansuku zonke, ancede abanye njalo akhonze uJehova ekhululekile. Abanye sebaphenduka ezonweni ababezenzile kodwa balokhu bezizwa belecala futhi bahlala becabanga ukuthi uJehova kasoze akukhohlwe abakwenzayo. Nxa lawe uyake ufikelwe ngumcabango onjalo, khumbula ukuthi nxa uJehova angasithethela sekuphelile, kaphindi ayivuse leyondaba. w17.11 9, 11 ¶6, 13-14

Ongakwenza ukuze ulondoloze ukumanyana kwethu yikucabangisisa ngokuqakatheka kwesinkwa lewayini okusetshenziswa eSikhumbuzweni. Lokhu ungakwenza nxa iSikhumbuzo sesisondele langelanga esizananzwa ngalo. (1 Khor. 11:23-25) Isinkwa esingelamvubelo simela umzimba kaJesu ongelasono owanikelwa waba ngumhlatshelo ikanti iwayini elibomvu limela igazi lakhe elachithekayo. Khumbula ukuthi umhlatshelo wenhlawulo uveza izinto ezimbili eziqakathekileyo: Utshengisa ukuthi uJehova uyasithanda kakhulu ngoba wanikela ngeNdodana yakhe ukuze asikhulule. Utshengisa lokuthi uJesu uyasithanda ngoba laye wavuma ukunikela ngokuphila kwakhe ngenxa yethu. Ukwazi lokhu kumele kusifuqe lathi ukuthi simthande uJehova loJesu. Nxa sonke singakwenza lokhu kuzakuba lokumanyana okupheleleyo phakathi kwethu. w18.01 14 ¶11

UJehova uyasithanda kakhulu. Siligugu kuye yikho waze wanikela ngeNdodana yakhe ukuze sithole ukuphila okuphakade. (Joh. 3:16) Aluba uJehova ubengazigcwalisi izithembiso zakhe uSathane ubezahle aqine ngokuthi uNkulunkulu ulamanga, kabusi kuhle futhi ucindezela abantu. Labanye abantu abangelandaba loNkulunkulu bebezaqhubeka bemklolodela besithi: “Kungaphi ‘ukuza’ lokhu akuthembisayo? Selokhu obaba bafayo, konke kuqhubeka njengokwakuvele kusenzakala kusukela ekuqaleni kokudaliweyo.” (2 Phet. 3:3, 4) Ngesikhathi esizayo uJehova uzakwenza kukhanye ukuthi nguye olelungelo lokubusa futhi uzagcwalisa zonke izithembiso zakhe okugoqela lesithembiso sokusindisa bonke abamlalelayo. (Isaya. 55:10, 11) Kanti njalo uthando alalo yilo oluqondisa indlela abusa ngayo. Yikho sileqiniso lokuthi uzahlala esithanda futhi esiqakathekisa nxa sithembekile kuye.​—Eks. 34:6. w17.06 23 ¶7

Lanxa kwadlula iminyaka eminengi uJehova enze isithembiso esitholakala kuGenesisi 3:15, kuye kwakungani sesenzakele. Ngemva kweminyaka engaba ngu-4 000 wavumela ukuthi iNdodana yakhe eyiyo yodwa ibulawe kabuhlungu ukuze ibe lihlawulo labanengi. (Joh. 3:16) Siyambonga kakhulu uJehova ngokusitshengisa uthando ngendlela enkulu kangaka. Lathi siyenelisa ukuthanda abanye ngoba sidalwe ngomfanekiso kaNkulunkulu. Ngokwesibonelo u-Abela watshengisa ukuthi uyamthanda uNkulunkulu ngokunikela ngokuhle kakhulu ayelakho. (Gen. 4:3, 4) UNowa watshengisa ukuthi uyabathanda abantu ngokuqhubeka ebatshumayeza okweminyaka eminengi lanxa babelokhu beqinisa amakhanda. (2 Phet. 2:5) U-Abhrahama laye watshengisa ukuthi uyamthanda uJehova ngokuvuma ukunikela ngendodana yakhe u-Isaka. (Jak. 2:21) Yikho-ke, kungelani lokuthi sihlangana labuphi ubunzima kufanele sizimisele ukuba lothando njengalababantu basendulo. w17.10 7-8 ¶3-4

UMphristi Omkhulu uJesu uzasisiza ukuthi “samukele isihawu njalo sithole umusa wokusisiza ezikhathini zokuswela kwethu.” (Heb. 4:16) Ngakho kumele ube lokholo emhlatshelweni kaJesu. Ucabangisise ngokuthi inhlawulo ikusiza njani wena ngokwakho. (Gal. 2:20, 21) Kholwa ukuthi ngomhlatshelo wenhlawulo izono zakho zithethelelwe. Kanti njalo kholwa ukuthi inhlawulo ikunika ithemba lokuphila phakade ngoba iyisipho osiphiwe nguJehova. Nxa uJehova angasithethelela akusamelanga sesabe kumbe sicabange ukuthi uzaphinda ayivuse leyondaba asijezise. (Hubo. 103:8-12) Singaphenduka ngeqiniso, uJehova uyasithethelela. w17.11 11-12 ¶14-17

Ngobusuku uJesu aqalisa ngabo iSidlo SeNkosi Sakusihlwa wathandazela ukuthi bonke abalandeli bakhe bamanyane njengoba yena loYise bemanyene. UJehova wawuphendula sibili umthandazo kaJesu. Lamuhla oFakazi bakaJehova emhlabeni wonke bakhonza bemanyene. Lokhu sikubona ikakhulu ngesikhathi seSikhumbuzo. Kwezinye izindawo akujayelekanga ukubona abantu bemihlobo etshiyeneyo bebuthene ndawonye ikanti kwezinye indawo abantu bakubona kungaqondanga lokhu. Loba kunjalo thina siyakwazi ukuthi uJehova loJesu bayathokoza nxa besibona simanyene. Akusimangalisi ukubona ukumanyana okusenhlanganisweni kaJehova lamuhla. Ukumanyana lokhu kwaphrofethwa ngakho kudala.​—Hez. 37:15-17; Zek. 8:23. w18.01 14 ¶7-9

“Abakhi” okukhulunywa ngabo esiphrofethweni lesi ngabakhokheli bamaJuda ngoba abazange bamamukele uJesu futhi baphika ukuthi unguMesiya. Kanti njalo amaJuda amanengi ayelandela abakhokheli laba atshotshozela ukuthi uJesu abulawe. (Luk. 23:18-23) Ngakho lawo aba lesandla ekubulaweni kwakhe. Kwakuzakwenzakala njani ukuthi uJesu abe ‘lilitshe lesisekelo’ njengoba abantu bamphika futhi bambulala? Kwasekumele avuswe kwabafileyo ukuze kugcwaliseke lokhu. Umphostoli uPhetro wathi: “Kungenxa . . . kaJesu Khristu waseNazaretha elambethelayo kodwa uNkulunkulu wamvusa kwabafileyo.” (ImiSeb. 3:15; 4:5-11; 1 Phet. 2:5-7) Ukuvuswa kukaKhristu kuqakatheke kakhulu ngoba nguye yedwa ‘olebizo elaphiwa abantu ukuthi basindiswe ngalo.’​—ImiSeb. 4:12; Efe. 1:20. w17.12 9-10 ¶6-9

UJesu wakhuluma ngesikhathi sokuhlupheka okukhulu wathi: ‘Bazabona iNdodana yoMuntu isiza esibhakabhakeni, ilamandla lobukhosi obukhulu. Njalo izathumela izingilosi zayo zitshaya icilongo ngomsindo omkhulu, beseziqoqa abakhethiweyo bayo.’ (Mat. 24:29-31) Ukuqoqwa kwabakhethiweyo okukhulunywa ngakho evesini le kutsho isikhathi sokubuthwa kwabo bonke abagcotshiweyo abayabe besemhlabeni ukuze baphiwe umvuzo wabo wasezulwini. Ngalesosikhathi ukuhlupheka okukhulu kuyabe sekuqalisile kodwa impi ye-Amagedoni ingakatshayi. Ngemva kwalokho bonke abangu-144 000 bazancedisana loJesu ukulwa lamakhosi omhlaba. (Isam. 17:12-14) Ngakho iSikhumbuzo esizakwenziwa ngaphambi kokuba uJesu ‘abuye’ ukuzoqoqa abagcotshiweyo abayabe besemhlabeni sizabe singesokucina. w18.01 16 ¶15

Khathesi uJesu usezulwini njalo iMibhalo iveza ukuthi uzaphila ‘kuze kube nini lanini’ lokuthi kasoze akubone ukubola. (Isam. 1:5, 18; Rom. 6:9; Kol. 1:18; 1 Phet. 3:18) Ngesikhathi esemhlabeni watshela abaphostoli bakhe ukuthi bazabusa laye ezulwini. (Luk. 22:28-30) UPhawuli wabhala wathi: “UKhristu wavuswa impela kwabafileyo, izithelo zakuqala zalabo asebelele.” Ngemva kwalokho watshengisa ukuthi bakhona abanye abazavuswa bayephila ezulwini. Wathi: “Yilowo lalowo ngethuba lakhe: UKhristu, oyizithelo zakuqala; muva, ekubuyeni kwakhe, [“ngesikhathi sokuba khona kwakhe,” NW] labo abangabakhe.” (1 Khor. 15:20, 23) Kusukela ngo-1914 kuze kube lamuhla siphila esikhathini “sokuba khona” kukaKhristu futhi lokhu kutshengisa ukuthi ukuphela sekusondele. w17.12 10-11 ¶11, 14-16

UJehova uyakwazi ukuthi kubuhlungu kangakanani ukufelwa ngoba laye wafelwa ngabangane bakhe. Wafelwa ngu-Abhrahama lo-Isaka loJakhobe loMosi kanye loDavida. (Nani. 12:6-8; Mat. 22:31, 32; ImiSeb. 13:22) ILizwi lakhe lisitshela ukuthi usilindele ngabomvu isikhathi lapho azabavusa khona abangane bakhe. (Jobe. 14:14, 15) Bazathokoza sibili nxa sebevusiwe futhi bayabe sebeqinile emzimbeni. Khumbula lokuthi uNkulunkulu wabona iNdodana yakhe ayithandayo isifa ngendlela ebuhlungu kakhulu. (Zaga. 8:22, 30) Ngeke sibuchaze ngamazwi ubuhlungu uJehova abuzwayo ngalesosikhathi. (Joh. 5:20; 10:17) Asithandabuzi ukuthi uJehova uzimisele ukusincedisa nxa siphakathi kobunzima. Ngakho kufanele sikhuleke kuye simtshele indlela esizwa ngayo nxa sisebuhlungwini. Okuhle yikuthi uJehova uyabuzwisisa ubuhlungu esiyabe sibuzwa njalo uyasinika induduzo esiyidingayo.​—2 Khor. 1:3, 4. w17.07 13 ¶3-5

Lamuhla abantu babuya ngobunengi enhlanganisweni kaJehova futhi bazimisele ukusebenzisa isikhathi sabo, amandla abo kanye lempahla abalayo ukuze basekele ukukhonza kweqiniso. (Zaga. 3:9) UJehova kasoze awukhohlwe umsebenzi esiwenzayo kanye lothando esimtshengisa lona. Ingqubelaphambili ekhona lamuhla ekukhonzeni kweqiniso itshengisa ukuthi uJehova uyawubusisa umsebenzi owenziwayo lokuthi uJesu ngumkhokheli omuhle. Kuyasithokozisa kakhulu ukuba senhlanganisweni ehlelekileyo futhi ezahlala kuze kube nini lanini. Ngakho iqakathekise indawo yakho enhlanganisweni kaJehova njalo uqhubeke ‘umlalela ngokukhuthala uJehova uNkulunkulu wakho.’ (Zek. 6:15) Ungenza njalo uzavikelwa yiNkosi yethu enguMphristi Omkhulu. Zimisele ukusekela ukukhonza kweqiniso, ungakwenza lokhu uJehova uzakuvikela kulezinsuku zokucina futhi uzakuba lawe kuze kube phakade. w17.10 30 ¶18-19

UMbuso kaNkulunkulu uzatshabalalisa ezombusazwe, amasonto kanye lezokuthengiselana ezigcwele emhlabeni lo zingaphindi zibekhona. Umphrofethi uHezekheli loZefaniya baphrofetha ukuthi isiliva legolide, izinto eziqakathekiswa kakhulu kwezomnotho ngeke zibasize abantu ngalesosikhathi. (Hez. 7:19; Zef. 1:18) Ngokwesibonelo ubungezwa njani nxa ungathi ususebenze iminyaka eminengi ubuthelela imali ubususizwa ukuthi leyomali ngeyokuzibazela? Akuthandabuzwa ukuthi ubuzaswela lokuthi ubambe ngaphi ngoba uyabe usebenzele idonki efileyo. Kuzakuba njalo lakithi nxa singasebenza nzima sibuthelela inotho yomhlaba lo size sikhohlwe ngobuhlobo bethu loJehova. (Zaga. 18:11) Inotho yomhlaba lo izatshabalaliswa, ngakho kungaba kuhle ukuthi siyisebenzise “ukuzuza abangane” ezulwini. Kufanele sikhumbule ukuthi loba yini esiyenzayo khathesi ukuze sisekele uMbuso kaJehova izasenza sihlale sithokoza. w17.07 11 ¶16

Abanye benza izono ezinkulu kakhulu besebezama ukuzifihla ngoba besesaba ukuyangeka lokudanisa abanye. (Zaga. 28:13) Kodwa iqiniso elikhona yikuthi ukwenza njalo kuyamlimaza lowomuntu owonileyo kanye labanye. Ukufihla isono kungenza lokuthi umoya kaNkulunkulu ungasebenzi kuhle ebandleni futhi kudale lokungazwanani phakathi kwabazalwane. (Efe. 4:30) Ngakho nxa umKhristu owonileyo elothando lweqiniso kasoze esabe ukuyakhuluma labadala ngesono asenzileyo ukuze bamnike usizo aludingayo. (Jak. 5:14, 15) Uthando luphawu oluqakatheke kakhulu sibili. (1 Khor. 13:13) Yilo olutshengisa ukuthi singabalandeli bakaJesu lokuthi silingisela uBaba wethu uJehova ngoba uluthando. UPhawuli wabhala wathi: ‘Uma ngingelalo uthando kangisilutho.’ (1 Khor. 13:2) Ngakho kasiqhubekeni sitshengisa uthando “ngezenzo langeqiniso” hatshi “ngamazwi” kuphela.​—1 Joh. 3:18. w17.10 11 ¶17-18

UJosefa watshengisa isibindi ngesikhathi umkaPhothifa ezama ukumhuga ukuthi aye laye emacansini. Kungenzakala ukuthi wayekwazi ukuthi wayezathwala nzima nxa angala. Lanxa kunjalo uJosefa waba lesibindi wala ukulala laye futhi wabaleka lapho esefuna ukumbamba ngenkani. (Gen. 39:10, 12.) URahabi laye watshengisa isibindi ngesikhathi kufika amadoda amabili ako-Israyeli ezohlola ilizwe. Wawafihla amadoda la njalo wawancedisa ukuthi aphume kulelodolobho ephephile. (Josh. 2:4, 5, 9, 12-16) Abaphostoli bazibonela ngawabo ukuthi uJesu wayelesibindi, yikho ngesikhathi sebephikiswa ngabaSadusi, bazimisela ukuqhubekela phambili befundisa ngebizo likaJesu. (ImiSeb. 5:17, 18, 27-29) Ukuba lesibindi kwanceda uJosefa, uRahabi, uJesu kanye labaphostoli ukuthi benze imisebenzi emihle. Lokhu kwakungatsho ukuthi babezithemba, uJehova nguye owayebanceda ukuthi babe lesibindi. Lathi sihlangana lezimo ezidinga ukuthi sibe lesibindi, yikho kumele sithembele kuJehova kulokuthi sizithembe.​—2 Tim. 1:7. w17.09 29 ¶6-9

Kasingeke senelise ukulahla uqobo lwethu oludala loba ukuntshintsha ubuntu bethu ngawethu amandla. Izikhathi ezinengi labo abenelise ukukwenza lokhu basebenze nzima ukuze batshiye imikhuba engalunganga ababelayo. Baphumelela ukukwenza lokhu ngoba bavuma ukuqondiswa liLizwi likaNkulunkulu kanye lomoya wakhe ongcwele. (Luk. 11:13; Heb. 4:12) Ngakho lathi kumele sibale iBhayibhili nsuku zonke, sicabangisise ngalo njalo sithandaze kuJehova sicele ukuthi asinike ukuhlakanipha lamandla ukuze senelise ukusebenzisa esikufundayo. (Josh. 1:8; Hubo. 119:97; 1 Thes. 5:17) Okunye okungasinceda ukuthi siqondiswe liLizwi likaNkulunkulu lomoya wakhe ongcwele yikulungiselela imihlangano lokuphendula nxa sesikuyo. (Heb. 10:24, 25) Kanti njalo ukusebenzisa konke esikunikwa yinhlanganiso kaJehova lakho kungasiphathisa sibili. (Luk. 12:42) Kumele sizame ngamandla ethu wonke ukulahla ubuntu obudala. Kodwa lokhu akwenelanga, nxa sifuna ukuba ngabangane bakaNkulunkulu kuyabe sekumele sigqoke ubuntu obutsha.​—Kol. 3:10. w17.08 21 ¶16-17

UDavida wahlangana lobunzima obunengi. Lanxa uJehova wamgcoba ukuthi abe yinkosi yako-Israyeli eseselijaha kwadingeka ukuthi alinde iminyaka engu-15 ngaphambi kokuba aqalise ukubusa. (2 Sam. 2:3, 4) Ngalesosikhathi iNkosi uSawuli yayimfuna phansi phezulu. Ngakho uDavida wayesehlala engobalekayo njalo wake wayaphephela kwelinye ilizwe ikanti kwezinye izikhathi wayehlala ezimbalwini. USawuli wacina ebulewe empini kodwa uDavida kazange ahle abuse sonke isizwe sako-Israyeli, kwadingakala ukuthi alinde eminye iminyaka engu-7. (2 Sam. 5:4, 5) Kuyini okwamnceda ukuthi abekezele? UDavida wayemthemba ngenhliziyo yonke uJehova. Wayesazi ukuthi wayezamkhulula futhi wayehlala enakana ngendlela ayembusise ngayo. (Hubo. 13:6) Wayekwazi lokuthi nxa angabekezela izinto zizamhambela kuhle. w17.08 6 ¶14-15

Izindimi ziyantshintsha ngokuhamba kwesikhathi. Kunjalo langezindimi ezasetshenziswa ukuloba iBhayibhili. Ngokwesibonelo isiHebheru lesiGrikhi esikhulunywa lamuhla sitshiyene lesasisetshenziswa ngesikhathi kulotshwa iBhayibhili. Ngakho abantu abakhuluma izindimi lezi lamuhla kuyadingakala ukuthi bathole iBhayibhili elihunyutshwe ngendlela abakhuluma ngayo khathesi. Loba kunjalo abanye bacabanga ukuthi kungcono bafunde isiHebheru lesiGrikhi sakudala ukuze benelise ukuzwisisa iBhayibhili ngolimi elalotshwa ngalo. Kodwa iqiniso elikhona yikuthi ukwenza njalo akusoze kubancede kangako. Khathesi iBhayibhili selitholakala ngezindimi ezedlula 3 000. Kuyakhanya ukuthi uJehova ufuna abantu ‘bezizwe zonke lezizwana kanye lezindimi’ zonke balithole iLizwi lakhe. (Isam. 14:6) Kumele ukuthi ukuzwa lokhu kukwenza usondele kuNkulunkulu wethu ongelalo ubandlululo. w17.09 19 ¶4

Nxa kulomuntu osusiweyo emulini yangakini kuqakathekile ukuthi uzithibe ulandele lokho iMibhalo ekutshoyo mayelana lokuphatha abasusiweyo. Ukuzithiba esimeni lesi kuba lula nxa singazimisela ukulingisela uNkulunkulu njalo silandele lokho asitshela khona. Omunye esingamlingisela nguDavida. Lanxa wayesegcotshwe ukuba yinkosi, kazange azonde loba asebenzise kubi amandla akhe ngesikhathi uSawuli efuna ukumbulala langesikhathi uShimeyi emthuka. (1 Sam. 26:9-11; 2 Sam. 16:5-10) Lokhu akutsho ukuthi uDavida wayehlala ezithiba sonke isikhathi. Khumbula ukuthi ngelinye ilanga wehluleka ukuzibamba wafeba loBhathisheba ikanti ngesinye isikhathi wavuka ngolaka waphosa wabulala uNabhali. (1 Sam. 25:10-13; 2 Sam. 11:2-4) Lanxa kunjalo kunengi esingakufunda kuDavida. Okokuqala, sifunda ukuthi abakhokhelayo enhlanganisweni kumele bazithibe basebenzise kuhle amandla abo sonke isikhathi. Okwesibili, yikuthi akumelanga sizithembe kakhulu sicine sesicabanga ukuthi ngeke sinqotshwe yiloba yisiphi isilingo.​—1 Khor. 10:12. w17.09 5-6 ¶12-13