May

Ukuqinisa ikhanda nxa uphiwa iseluleko kuba lempumela ebuhlungu. (Heb. 12:11) Ubufakazi balokhu sibuthola kulokho okwenzakala kuKhayini. Ngesikhathi uKhayini ezondele u-Abela uJehova wathi kuye: “Uzondeleni na? Kungani ubuso bakho buhlobile? Kambe ungaze wenze okulungileyo, kawuyikwamukelwa yini? Kodwa nxa ungenzi okulungileyo isono sicwathile emnyango wakho; sitshisekela ukukuthumba, kodwa kumele usahlule.” (Gen. 4:6, 7) UKhayini kazange alalele futhi wacina ebulele umfowabo. Lakanye walutheza olulenkume ngenxa yokungalaleli. (Gen. 4:11, 12) Aluba wazithoba wavuma ukwelulekwa nguJehova wayengasoze angene ebunzimeni. Lathi lamuhla uJehova uyasilaya ngoba kafuni singene ebunzimeni. (Isaya. 48:17, 18) Ngakho sonke kasizimiseleni ‘ukulalela ukuze sihlakaniphe.’​—Zaga. 8:33. w18.03 32 ¶18-20

UDanyeli wamazi njani uJehova? Kumele ukuthi abazali bakhe yibo abamsiza ukuthi amazi uJehova njalo athande iLizwi lakhe. Lakanye wakwenza ayekufundiswe ngabazali bakhe. Langesikhathi esegugile waqhubeka elithanda iLizwi likaNkulunkulu futhi elobuhlobo obuhle laye. Umthandazo wakhe otholakala kuDanyeli 9:3-19 utshengisa ukuthi wayemazi kuhle uJehova njalo eyizwisisa indlela ayephatha ngayo ama-Israyeli. Zinike isikhathi sokuwufunda umthandazo lo ubusucabangisisa ngawo. AmaJuda ayethwele nzima eBhabhiloni ngoba ayephakathi kwabantu ababengamkhonzi uJehova. Ngokwesibonelo uJehova wawatshela wathi: “Funani ukuthula lokuphumelela kwedolobho engilise ekuthunjweni kulo.” (Jer. 29:7) Loba kunjalo wayekhangelele ukuthi amaJuda ahlale ethembekile kuye. (Eks. 34:14) UDanyeli wenelisa yini ukuhlala ethembekile kuJehova ngapha ehlonipha ababusi beBhabhiloni? Ye wenelisa ngoba wayezwisisa ukuthi ababusi bomhlaba kumele banikwe inhlonipho engakanani. Ngokuya kwesikhathi uJesu laye wakhuthaza abalandeli bakhe ukuthi benze okufananayo.​—Luk. 20:25. w18.02 10 ¶11-12

Uthwele nzima yini ngenxa yokugula, ukuswela imali loba ukuhlukuluzwa? Kuyake kwenzakale yini ukuthi uzwe ungaselayo intokozo ekukhonzeni uJehova? Ukuhlola isibonelo sikaNowa loDanyeli loJobe kungakusiza nxa uyake uhlangane lobunzima obunjalo. Amadoda la ayengabantu abalesono njengathi njalo ayehlangana lezimo ezinzima kakhulu empilweni. Lanxa kunjalo azimisela ukuhlala elalela uNkulunkulu, eqotho kuye futhi elokholo oluqinileyo. (Hez. 14:12-14) UHezekheli wabhala amazwi akumbhalo walamuhla ngesikhathi eseBhabhiloni ngo-612 B.C.E. (Hez. 1:1; 8:1) Ngalesosikhathi ukubhujiswa kweJerusalema kwasekusondele njalo babebalutshwana abantu ababethembekile njengoNowa loDanyeli loJobe. Labobantu basinda lapho iJerusalema ibhujiswa ngo-607 B.C.E. (Hez. 9:1-5) Lalamuhla, labo uJehova ababona bethembekile yibo kuphela abazasinda lapho ukuphela kufika.​—Isam. 7:9, 14. w18.02 3-4 ¶1-3

Nxa ungosakhulayo zibuze: ‘Ngikhonza uJehova ngenxa yokuthi ngifuna ukuthabisa abazali bami yini? Ngenza konke okusemandleni ami yini ukuthi ngiqinise ubuhlobo bami loNkulunkulu?’ Indaba le ayisebenzi kwabasakhulayo kuphela kodwa sonke kumele sihlele esifuna ukukwenza ekukhonzeni. Lokhu kuzasisiza ukuthi siqinise ubuhlobo bethu loNkulunkulu. (UmTshu. 12:13) Nxa singabona lapho okumele sithuthukise khona kumele silungise masinyane. Lokhu kuqakatheke kakhulu ngoba nxa singelabo ubuhlobo obuhle loNkulunkulu sizabhujiswa. (Rom. 8:6-8) UJehova uyakwazi ukuthi singabantu abalesono njalo kalindelanga ukuthi senze okuphezu kwamandla ethu yikho esinika umoya ongcwele ukuthi usisize sithuthuke ekukhonzeni. Lanxa kunjalo ukhangelele ukuthi sisebenze nzima ukuze siqinise ubuhlobo bethu laye. Kumnandi sibili ukubala iBhayibhili kodwa akumelanga silibalele ukukholisa njengenoveli. Kufanele sisebenze nzima sidinge amagugu aseLizwini likaNkulunkulu. w18.02 25 ¶10-11

Umzali akumelanga agqibe umntwana ngolwazi olunengi. Phela ngemva kokubhabhathizwa bonke abalandeli bakaKhristu kufanele baqhubeke befunda okunengi ngoJehova. (Kol. 1:9, 10) Pho lungakanani ulwazi okufanele umntwana aluthole engakabhabhathizwa? Ukucabangisisa ngalokho okwenzakala kwenye imuli okukhulunywa ngayo eBhayibhilini kungasisiza. (ImiSeb. 16:25-33) Indaba le yenzakala ngesikhathi umphostoli uPhawuli evakatshele edolobheni leFiliphi ngabo 50 C.E. UPhawuli loSila bathi besatshumayela edolobheni leli baqanjelwa amanga basebebotshwa bavalelwa ejele. Phakathi kobusuku kwaba lokuzamazama komhlaba, okwanyikinya ijele iminyango yasala ikhamisile. Umlindijele lwamtshaya lwameqa uvalo esecabanga ukuthi izibotshwa sezibalekile, wasekhokha inkemba yakhe efuna ukuzibulala. UPhawuli wasememeza wathi engazibulali ngoba bonke babekhona. Ngemva kwalokho uPhawuli loSila bafundisa indoda le kanye labendlu yayo izindaba ezinhle ngoJesu. Kwaphetha ngani? IBhayibhili lithi khonokho nje yena labendlu yakhe bahle babhabhathizwa. w18.03 10 ¶7-8

UJehova unguNkulunkulu othokozayo njalo labantu bakhe bayathokoza njengaye. Kabafanani labantu bomhlaba lo abazithandayo futhi abafuna ukuhlala besamukela, kodwa benza okusemandleni abo ukuze bancede abanye. (ImiSeb. 20:35; 2 Tim. 3:2) Ukuzithanda kakhulu kungaphambanisa indlela esithanda ngayo uNkulunkulu. Ngakho kuqakathekile ukuthi ngamunye wethu azihlole endabeni le. Kumele sikhumbule iseluleko esikuFiliphi 2:3, 4 esithi: “Lingenzi lutho ngokuzikhukhumeza loba ukuziphakamisa okuyize, kodwa ngokuthobeka. Khangelani abanye njengabangcono kulani. Lowo lalowo wenu kangakhathaleli inzuzo yakhe kuphela kodwa akhathalele lenzuzo yabanye.” Zibuze imibuzo le: ‘Ngiyasisebenzisa yini iseluleko lesi empilweni yami? Ngiyakuqakathekisa yini ukunceda abanye ebandleni loba ekutshumayeleni?’ Ukunceda abanye akulula, kudinga isikhathi lokuzinikela futhi kwesinye isikhathi kungatsho ukuthi sitshiye imisebenzi yethu. Kodwa nxa singakwenza sizathokoza ngoba siyabe sisenza lokho okufunwa nguBaba wethu. w18.01 23 ¶6-7

Ungakwenza njani lokhu okusembhalweni walamuhla? Zibuze imibuzo elandelayo: ‘Ngiyakholwa yini ukuthi inhlanganiso engikuyo yiyo yodwa eyenza intando kaNkulunkulu emhlabeni wonke? Ngikhuthele yini emsebenzini wokutshumayela lokufundisa abantu izindaba ezinhle zoMbuso? Engikwenzayo kutshengisa ukuthi ngiyakholwa yini ukuthi siphila ezinsukwini zokucina lokuthi ukuphela sekusondele? Indlela engithanda ngayo uJehova loJesu isitshiyene yini lendlela engangibathanda ngayo ngesikhathi ngiqala ukukhonza?’ (Mat. 24:14; 2 Tim. 3:1; Heb. 3:14) Ukucabangisisa ngemibuzo le kuzakunceda ubone ukuthi umi ngaphi ekukhonzeni uJehova uNkulunkulu. Okunye okungakunceda yikubala lokucabangisisa ngeMibhalo ekhuluma ngokuqakatheka kweSikhumbuzo. (Joh. 3:16; 17:3) ‘Ukwazi’ uJehova lokuba ‘lokholo’ kuJesu yikho kuphela okungasenza sithole ukuphila okungapheliyo. Ngakho ngesikhathi ulungiselela iSikhumbuzo zama ukubala izinto ezingakusiza ukuthi usondele kuJehova loJesu. w18.01 13 ¶5-6

Nxa sibala iBhayibhili lamabhuku adindwa yinhlanganiso loba nxa sisemihlanganweni yethu siyakubona ukuthi uJehova wabasiza njani abanye ukuthi bahlale bethembekile. Ungaqhubeka uqinisa ubuhlobo bakho loJehova uzazibonela ngawakho indlela azakusiza ngayo lawe. Zikhona yini izinto ezinhle owazenzelwa nguJehova? Sonke sanambitha sabona ukuthi uJehova ulungile ngesikhathi esisondeza kuye laseNdodaneni yakhe. Nxa ungosakhulayo, uyakuvuma yini ukuthi uJehova wakusondeza kuye? Kumbe ucabanga ukuthi wadonsa abazali bakho wena wasulandela nje. Khumbula ukuthi ngesikhathi uzinikela kuJehova njalo ubhabhathizwa waqala ukuba lobuhlobo obuhle laye. Kusukela lapho laselingabangane. IBhayibhili lithi: “Umuntu othanda uNkulunkulu, uNkulunkulu uyamazi lowomuntu.” (1 Khor. 8:3) Yikho-ke buqakathekise ubuhlobo bakho loJehova futhi uzimisele ukuhlala usenhlanganisweni yakhe. w17.12 26 ¶12-13

Ibala elithi “ukulaya” lingakwenza ucabange ngokutshaywa loba ukujeziswa ngendlela ebuhlungu. Kodwa iBhayibhili litshengisa ukuthi ukulaya yinto enhle ehambisana lokuba lolwazi, ukuhlakanipha, uthando kanye lokuphila. (Zaga. 1:2-7; 4:11-13) Okwenza uNkulunkulu asilaye yikuthi uyasithanda futhi ufuna sithole ukuphila okuphakade. (Heb. 12:6) Lanxa kwezinye izikhathi ebajezisa abantu bakhe kakwenzi ngolunya loba ngesihluku. Lona ngokwalo ibala elithi “ukulaya” lilomqondo wokufundisa njengalokho okwenziwa ngumzali nxa ekhulisa umntanakhe. Sonke esingamaKhristu eqiniso singamalunga emuli kaNkulunkulu. (1 Tim. 3:15) Siyakwazi ukuthi uJehova ulelungelo lokusitshayela imithetho okumele siyilandele njalo ulakho ukusijezisa nxa siyephula. Ukulaywa kanye lokujeziswa nguJehova kungasisiza sibone ukuthi ukumlalela kuqakathekile ikakhulu nxa sesiphakathi kobunzima obubangelwe ngamaphutha ethu.​—Gal. 6:7. w18.03 23-24 ¶1, 3

Ungosakhulayo yini obona angathi abazali bakho abakuzwisisi njalo bayakuvimbela ukwenza izinto ezithile? Lokhu kungabangela ukuthi ucine ungasakukhwabithi ukukhonza uJehova. Kodwa nxa ungakhalala ukukhonza uzazisola ekucineni futhi ngokuya kwesikhathi uzananzelela ukuthi akulamuntu okuthandayo emhlabeni lo ngaphandle kwabazali bakho kanye labazalwane ebandleni. Ubungeke umangale yini nxa abazali bakho bekuyekela nje uzenzela okufunayo bengakukhuzi? Ubungathi bayakuthanda yini? (Heb. 12:8) Khumbula ukuthi abazali bakho balesono, ngakho bangaphambanisa nxa bekukhuza. Nxa kungaba njalo, kuhle ukuthi uvume ukukhuzwa kulokuthi ukhangele indlela umzali akwenze ngayo. Zama ukungavuki ngolaka nxa ukhuzwa. Kungelani lokuthi iseluleko sibuye njani, tshengisa ukuthi usukhulile ngokubona ukuthi ungasisebenzisa njani empilweni yakho.​—Zaga. 1:8. w17.11 29 ¶16-17

Kungenzeka sewake wabona abanye abantwana ababhabhathiziweyo bephambuka loba betshiya ukukhonza uJehova lanxa ekuqaliseni babemthanda. Lokhu kungabangela ukuthi ufikelwe ngumcabango wokuthi kuzakwenzakala into efananayo lakowakho umntwana. Pho ungamnceda njani umntanakho ukuthi ahlale emthanda uJehova njalo asebenzele ‘ukusindiswa’? (1 Phet. 2:2) Impendulo yombuzo lo singayithola emazwini uPhawuli awabhalela uThimothi. Wathi: “Qhubeka ngalokho okufundileyo njalo wakukholwa, ngoba uyabazi labo okufunde kubo, kanye lokuthi kusukela ebuntwaneni wayazi njani imibhalo eNgcwele [iMibhalo YesiHebheru] engakwenza uhlakaniphele ukusindiswa ngokukholwa kuKhristu uJesu.” (2 Tim. 3:14, 15) UPhawuli waqamba izinto ezintathu emavesini la. Wakhuluma (1) ngokwazi imibhalo engcwele, (2) lokukholwa izinto ozifundileyo (3) kanye lokuhlakaniphela ukusindiswa ngokholo kuKhristu uJesu. w17.12 18-19 ¶2-3

Abafundisi benza abantu bakuzonde ukukhonza uNkulunkulu ngoba bayangenela kwezombusazwe, bababamba ngamandla ukuthi banikele njalo babafundisa amanga besithi bazatshiswa esihogweni. Yikho abantu abanengi becabanga ukuthi bangathokoza lanxa bengakhonzi uNkulunkulu. Kodwa ngeke bathokoze ngoba ukuba lobuhlobo obuhle loJehova ‘uNkulunkulu othokozayo’ yikho kuphela okungenza umuntu athokoze empilweni. Kodwa nxa usenkolweni yamanga ngeke uyithole intokozo enjalo. (1 Tim. 1:11, NW.) Konke uNkulunkulu akwenzayo ukwenzela ukunceda abantu njalo zinengi izibusiso esingazithola nxa singamkhonza ngendlela ayamukelayo. Ngokwesibonelo kuzasinceda ukuthi sihloniphe esitshade labo, sihlale sithembekile kubo, senelise ukukhulisa kuhle abantwabethu njalo sibe lothando lweqiniso. Kuyasisiza lokuthi siqakathekise ukunceda abanye. (ImiSeb. 20:35) Kanti njalo kwenza simanyane labazalwane bethu emhlabeni wonke futhi sibathande. w17.11 21 ¶6-7

Sonke sithwele nzima ngenxa yesono esilaso futhi ngezinye izikhathi kuyasidanisa kakhulu ukwehluleka ukwenza izinto ezithokozisa uJehova. Lokhu kwake kwenzakala kumphostoli uPhawuli waze watsho amazwi asembhalweni walamuhla. Abanye bethu bacabanga ukuthi izono abake bazenza zinkulu okokuthi uNkulunkulu ngeke abathethelele. IMibhalo itshengisa ukuthi ukuphephela kuJehova kungasinceda ukuthi singakhulelwa yikukhathazeka nxa senze isono. (Hubo. 34:22) Umphostoli uPhawuli wazibona ‘eyisinothongwana’ ngenxa yokwehluleka ukulalela umthetho kaJehova ngokugcweleyo. Kodwa ngemva kwalokho wakhuluma ngentokozo wathi: “Kabongwe uNkulunkulu—ngoJesu Khristu iNkosi yethu!” (Rom. 7:25) Lanxa wayelwisana lesono njalo ezithonisisa ngenxa yezono ayezenzile, uPhawuli wayeleqiniso lokuthi uNkulunkulu wayemthethelele esebenzisa uJesu. Ngeqiniso uJesu uMhlawuleli wethu usenza sibe lokuhlaliseka kanye lomzwangedwa ohlanzekileyo. (Heb. 9:13, 14) Njengoba enguMpristi Omkhulu, “ulamandla okubasindisa ngokupheleleyo labo abeza kuNkulunkulu ngaye, ngoba uhlezi ephilela ukubancengela.”​—Heb. 7:24, 25. w17.11 8, 12 ¶1-2, 15

Singasigcwalisa njani “insuku ngensuku” isifungo esasenza ngesikhathi sizinikela kuJehova? Lokhu singakwenza ngokuqhubeka sithembekile kuye lanxa siphakathi kobunzima. (Hubo. 61:8) Ngokwesibonelo esikolo loba emsebenzini othile angazidlisa satshanyana kuwe edlala ngothando, uzatshengisa yini ukuthi uyayilalela imithetho kaJehova? (Zaga. 23:26) Nxa ngakini kunguwe wedwa uFakazi uyamcela yini uNkulunkulu ukuthi akuncedise ukuthi uqhubeke uphila ngendlela emthokozisayo? Kungelani lokuthi siphakathi kwasiphi isimo, kumele simbonge nsuku zonke uNkulunkulu ngokusithanda kwakhe lokusivumela ukuthi sibe senhlanganisweni yakhe. Okunye okumele sikwenze nsuku zonke yikubala iBhayibhili. Ngesikhathi sizinikela kuJehova kufanana lokuthi sasimthembisa ukuthi sizazenza zonke lezizinto. Ngakho nxa sikwenza konke lokhu siyabe sitshengisa ukuthi siyamthanda lokuthi siphilela yena. Kanti njalo ukukhonza kasikwenzeli umthetho nje kodwa kuyingxenye yokuphila kwethu eqakatheke kakhulu. w17.10 23 ¶11-12

Omunye umlobi wezingoma wake wathi: “Amazwi enza umuntu acabange. Umculo uqubula imizwa ikanti ukuhlabela khona kwenza amazwi athophele enhliziyweni.” Ukuhlabela ingoma zethu kusinika ithuba lokudumisa uBaba wethu uJehova lelokutshengisa ukuthi siyamthanda. Ngakho singatsho siphinde ukuthi ukuhlabela kuyingxenye eqakathekileyo yokukhonza kwethu kungelani lokuthi sikwenza sisodwa kumbe sisemihlanganweni. Wena uthini ngokuhlabela ngelizwi elizwakalayo ebandleni? Kuyakuyangisa yini? Kwezinye izindawo amadoda awakuthandi ukuhlabela nxa esebantwini. Ezindaweni ezinjalo kubanzima ukuthi abanye ebandleni bahlabele ikakhulu nxa bebona abadala bebandla bengahlabeli kumbe bebabona besenza ezinye izinto ngesikhathi abanye ebandleni behlabela. (Hubo. 30:12) Nxa sikunanzelela ukuthi ukuhlabela kuyingxenye yokukhonza kwethu, kasisoze siphume phandle nxa kuhlatshelwa kumbe senze imisebenzi ethile. w17.11 3 ¶1-3

Sonke siyakufisa ukuhlala silokuthula kungelazinto ezisikhathazayo. Ngakho siyambonga uJehova ngokusinika “ukuthula” kwakhe okusisiza ukuthi sibe lokuhlaliseka ezingqondweni lasezinhliziyweni. (Flp. 4:6, 7) Okunye okusithokozisayo yikuthi ‘silokuthula loNkulunkulu’ wethu loba ubuhlobo obuhle laye ngoba sazinikela kuye. (Rom. 5:1) Loba kunjalo isikhathi sokuthi uNkulunkulu alethe ukuthula okupheleleyo emhlabeni kasikafiki. Zinengi izinto ezisikhathazayo ngoba siphila ezinsukwini zokucina ezigcwele abantu abathanda izingxabano. (2 Tim. 3:1-4) Kanti njalo sisempini enzima yokulwa loSathane lezimfundiso zamanga azigcwalise yonke indawo. (2 Khor. 10:4, 5) Kodwa uhlupho olukhulu abanye bethu abalwisana lalo yikuphikiswa yizihlobo ezingamkhonziyo uJehova. Bayachothozwa ngenxa yalokho abakukholwayo, abanye batshelwa ukuthi badala izingxabano emulini ikanti abanye bathenjiswa ukukhalalwa yizihlobo ngenxa yokuthi bangoFakazi. w17.10 12 ¶1-2

Ukuntshintsha kwezindimi kwenze kwaba lontshintsho lasemsebenzini wokuhumutsha iBhayibhili. Ngokwesibonelo iBhayibhili elalingabe lizwisiseka kudala lingacina lingasazwisiseki ngenxa yokuntshintsha kolimi. Ake ucabange ngeBhayibhili lesiNgisi okuthiwa yi-King James Version elahunyutshwa ngomnyaka ka-1611. Ngalesosikhathi lalizwisiseka njalo abantu babelithanda kakhulu okokuthi lamabala ayekulo babewasebenzisa ekukhulumeni kwansuku zonke. Ngokuhamba kwesikhathi amabala amanengi ayesetshenziswe ku-King James Version ayesemadala futhi engasazwisiseki ebantwini abakhuluma isiNgisi. Lokhu kwenzakala lakwamanye amaBhayibhili ayehunyutshwe ngezinye izindimi. Ngakho siyayibonga kakhulu inhlanganiso yethu ngokusilungisela i-New World Translation of the Holy Scriptures ka-2013. IBhayibhili leli selitholakala ngezindimi ezedlula 150 njalo lokhu sekuncede abantu abanengi ukuthi bakholise ukulibala ngolimi lwabo. w17.09 19 ¶5-6

Abasakhulayo kumele bazenzele izinqumo ezizabanceda empilweni. Ngokwesibonelo kumele bakhethe kuhle abangane, ezokuzilibazisa, ukuthi bazabhabhathizwa yini lokuthi bazaziphatha njani. Konke lokhu kudinga ukuthi babe lesibindi ngoba uSathane ubathwalele ubhulo. Okunye okuqakathekileyo okumele abasakhulayo bakwenze yikukhetha ukuthi bazakwenzani empilweni. Kwamanye amazwe abasakhulayo bakhuthazwa ukuthi bafunde kakhulu njalo badinge imisebenzi elemali enengi. Ikanti kwamanye izimo zomnotho zinzima futhi lokhu kwenza abasakhulayo bacabange ukuthi kumele basebenze gadalala ukuze banakekele izimuli zabo. Kasithandabuzi ukuthi uJehova uzababusisa bonke abasakhulayo abakhetha ukumsebenzela kanye lokufaka uMbuso wakhe kuqala. Uzabanika konke abakudingayo ukuze banakekele izimuli zabo. Lokhu yikho kanye okwenziwa nguThimothi, waqakathekisa ukukhonza ukwedlula loba yini eyayikhona ngalesosikhathi.​—Flp. 2:19-22. w17.09 29-30 ¶10-12

Ukubala lokutaditsha iBhayibhili nsuku zonke kungasinceda ukuthi sizithibe. Kungani sisitsho njalo? Ngoba iBhayibhili lilezibonelo ezinhle kanye lezimbi ezitshengisa ukuthi ukuzithiba kuqakatheke kakhulu. Ngakho ukucabangisisa ngazo kungasinceda ngoba zabhalelwa thina. (Rom. 15:4) Kumele sizame ukubona ukuthi singazilingisela njani izibonelo lezo. Kufanele sicele uJehova ngomthandazo asincedise ukuthi senelise ukusebenzisa lokho esikufunda eLizwini lakhe iBhayibhili. Nxa ungathi uzihlola ubusunanzelela ukuthi kulalapho okumele ulungisise khona endabeni yokuzithiba, thandaza kuNkulunkulu njalo uzame ukulungisisa. (Jak. 1:5) Ukuchwayisisa emabhukwini adindwa yinhlanganiso akhuluma ngendaba le lakho kungakunceda kakhulu. w17.09 6 ¶15-16

Ubuntu obutsha yibuntu obuhambelana lentando kaNkulunkulu. (Efe. 4:24) Kodwa singenelisa yini ukuntshintsha ubuntu bethu ukuze buhambelane lentando yakhe? Ye singenelisa ngoba uJehova wasidala ngomfanekiso wakhe okutsho ukuthi siyenelisa ukulingisela izimpawu ezinhle alazo. (Gen. 1:26, 27; Efe. 5:1) Umphostoli uPhawuli waveza ukuthi ukungakhethi luphawu oluqakathekileyo olutshengisa ukuthi sesigqoke ubuntu obutsha. Wabhala wathi: “Akukho mGriki loba umJuda, osokileyo loba ongasokanga, iqaba, umSikhethiya, isigqili loba okhululekileyo.” Amazwi la atshengisa ukuthi akumelanga sicabange ukuthi singcono kulabanye ebandleni ngenxa yolimi esilukhulumayo, ilizwe esidabuka kulo kumbe imali esilayo. Okufanele sikukhumbule yikuthi sonke ‘simunye.’ (Kol. 3:11; Gal. 3:28) Abantu abalobuntu obutsha bahlonipha wonke umuntu, abakhangeli ukuthi ungumhlobo bani, ukhuluma ulimi bani loba ukuthi ulani empilweni.​—Rom. 2:11. w17.08 22-23 ¶1, 3-4

UJehova uNkulunkulu kalindelanga ukuthi senze into yena angeke ayenze. Laye uyabekezela futhi uyisibonelo esihle kakhulu endabeni le. Ngokwesibonelo esivandeni sase-Edeni, uSathane wasola indlela uJehova abusa ngayo. Kusukela ngalesosikhathi uJehova ubelokhu ebekezela elindele ukuthi indaba le ilungiswe ngokugcweleyo ukuze ibizo lakhe lingcweliswe. Ngalesosikhathi bonke abantu abazimisele ukubekezela bazathola izibusiso ezinhle kakhulu. (Isaya. 30:18) UJesu laye uyabekezela njengoYise. Ngokwesibonelo wahlala ethembekile waze wafa njalo wathi esebuyele ezulwini ngo-33 C.E. wafika wethula umhlatshelo wakhe kuJehova. Lanxa kunjalo kwadingeka ukuthi alinde okweminyaka eminengi kwaze kwaba ngu-1914 lapho aqalisa khona ukubusa. (ImiSeb. 2:33-35; Heb. 10:12, 13) Lakhathesi uJesu ulokhu ebekezela futhi kuzamele aqhubeke ekwenza lokhu kuze kube sekupheleni kweminyaka eyinkulungwane yokubusa kwakhe. Ngalesosikhathi zonke izitha zakhe ziyabe sezibhujisiwe! (1 Khor. 15:25) UJesu ngeke azisole ngokulinda kwakhe. w17.08 7 ¶16-17

Udadewethu okuthiwa nguSusi wathi: “Lanxa kwasekudlule umnyaka indodana yethu itshonile, sasilokhu sisebuhlungwini obukhulu.” Omunye umzalwane owafelwa ngumkakhe wathi: “Ngangisizwa ubuhlungu engangingakaze ngibuzwe selokhu ngaba yimi.” Banengi abafowethu labodadewethu lamuhla abasebuhlungwini obunjalo. Okwenza abanye badane kakhulu yikuthi bayabe bengakulindelanga lokhu. Kungenzakala ukuthi lawe sewake wafelwa. Manje ungayithola ngaphi induduzo? Mhlawumbe uyake uzwe abantu besithi ubuhlungu bokufelwa buyaphela bodwa ngokuhamba kwesikhathi. Kodwa kuliqiniso yini lokhu? Omunye umfelokazi uveza ukuthi ukuhlala nje ulindele ukuthi isikhathi sidlule ngeke kwenze ubuhlungu obuzwayo bube nganeno kodwa kuya ngalokho okwenzayo ngalesosikhathi. Kuyafanana lesilonda, sidinga ukunakekelwa okwesikhathi esithile ukuze siphole. w17.07 12-13 ¶1-3

UJehova ufuna ukhethe ngendlela ezakwenza uthokoze empilweni. Wadala abantu besenelisa ukuba lobuhlobo obuhle laye kanye lokumkhonza. (Hubo. 128:1; Mat. 5:3) Izinyamazana zona kazange azidale ngaleyondlela. Owazo umsebenzi ngowokudla, ukunatha lokuzala kuphela. Kodwa abantu kabanjalo, bayenelisa ukuhlela ukuthi bafuna ukwenzani empilweni ukuze bathokoze futhi basuthiseke. Khumbula ukuthi uMdali wethu ‘unguNkulunkulu wothando,’ ohlala ethokoza njalo wadala abantu “ngesimo sakhe.” (2 Khor. 13:11; 1 Tim. 1:11, NW; Gen. 1:27) Lawe uzathokoza nxa ungamlingisela kukho konke okwenzayo. IBhayibhili lithi: “Ukupha kubusisekile okudlula ukwamukela.” (ImiSeb. 20:35) Kumele ukuthi sewake wakubona ukuthi amazwi la aliqiniso sibili. Ngakho uJehova ufuna ukuthi nxa uhlela ukuthi uzakwenzani empilweni ukhethe into ezatshengisa ukuthi uyamthanda kakhulu kanye lokuthi uyabathanda abanye.​—Mat. 22:36-39. w17.07 23 ¶3

UNkulunkulu usiphatha ngenhlonipho langendlela elesithunzi njalo usinika izipho ezinhle kakhulu. UJehova uyabathanda bonke abantu bakhe. Kodwa okunye okwenza abe nguMbusi omuhle yikuthi ulendaba lomuntu munye ngamunye. Ubufakazi balokhu sibuthola kulokho okwenzakala endulo. Okweminyaka engu-300 uJehova wayekhokhela futhi evikela abako-Israyeli esebenzisa abahluleli. Langalesosikhathi uJehova watshengisa ukuthi ulendaba lomuntu ngamunye. Ngokwesibonelo waba lomusa kowesifazana wezizweni okwakuthiwa nguRuthe owayetshiye okunengi kibo wakhetha ukuzakhonza uNkulunkulu weqiniso. UJehova wambusisa owesifazana lo, wathola indoda eyayimthanda njalo waba lendodana eyacina isiba ngomunye wabokhokho bakaMesiya. UJehova wavumela lokuthi indaba yowesifazana lo ibhalwe eBhayibhilini futhi ibizwe ngebizo lakhe. Ucabanga ukuthi uRuthe uzakuzwa njani mhla esizwa izinto zonke lezi emhlabeni omutsha?​—Ruthe. 4:13; Mat. 1:5, 16. w17.06 28-29 ¶8-9

Omunye umzalwane okuthiwa nguPeter waqalisa ukusebenza eBhetheli yeBritain ngo-1970 eleminyaka engu-19. Ngelinye ilanga etshumayela endlini ngendlu wahlangana lenye indoda eyayilendevu ezinkulu. UPeter wayibuza ukuthi ingathanda yini ukuzwisisa iBhayibhili. Indoda le yamangala, yasimtshela ukuthi ingumkhokheli wesonto yamaJuda. Ngemva kwalokho yabuza uPeter yathi: “Akungitshele mfana, ibhuku likaDanyeli labhalwa ngaluphi ulimi? UPeter wayiphendula wathi: “Enye ingxenye yebhuku leli yabhalwa ngesi-Aramu.” UPeter uthi: “Yamangala indoda le isizwa ngiyitshela impendulo eyiyo futhi lami ngazibuza ukuthi ngiyithethe ngaphi. Ngabuyela endlini ngayadingisisa ku-Nqabayokulinda le-Vukani! ezazisanda kuphuma ngasengithola esinye isihloko esasikhuluma ngokuthi ezinye izingxenye zebhuku likaDanyeli zabhalwa ngesi-Aramu.” (Dan. 2:4) Siyabona ukuthi umoya ongcwele ungasikhumbuza izinto esiyabe sizifundile.​—Luk. 12:11, 12; 21:13-15. w17.06 13 ¶17

Zikhona inhlupho ezingavela nxa inkosikazi isikhulelwe. Lanxa abatshadileyo bengabe bethokoza ngokuthi sebezakuba lomntwana kulezinye izinto ezingenza bakhathazeke. Ngokwesibonelo bangakhathazeka ngokuthi umama kasoze abe lohlupho yini ngesikhathi ezithwele loba ngempilakahle yomntwana. Okunye okungabenza bangahlaliseki yikucabanga ngezimali ezidingakalayo ukuze bamnakekele. Kanti njalo izinto ziyantshintsha nxa umntwana esezelwe. Izikhathi ezinengi uthando lukamama luba semntwaneni kakhulu futhi amanye amadoda acina esecabanga ukuthi awasathandwa. Okunye njalo yikuthi umsebenzi uyabe usumandela ubaba ngoba kuyabe sekumele anakekele umama lomntwana. Obunye ubunzima abatshadileyo abahlangana labo yikuthi bayabe befisa ukuba labantwana kodwa kusala. Lokhu kungabangela ukuthi inkosikazi ihlale ikhathazekile. w17.06 4-5 ¶1, 5-6

Siyalithanda kakhulu iqiniso eliseLizwini likaNkulunkulu futhi siyaziqhenya ngalo. Kwelinye ilanga uJesu wathi ethandaza kuYise wathi: “Ilizwi lakho liliqiniso.” (Joh. 17:17) Ukuze umuntu alithande iqiniso kumele abale iBhayibhili nsuku zonke. (Kol. 1:10) Kodwa lokhu akutsho ukubamba amavesi owabalileyo ngekhanda. Umlobi weHubo 119 usitshela lokho okumele sikwenze ukuze kukhanye ukuthi siyakuthanda esikufunda eBhayibhilini. (Hubo. 119:97-100) Amavesi la atshengisa ukuthi esiyabe sikufundile eBhayibhilini kumele sicabangisise ngakho ilanga lonke. Lokhu kuzasinceda sibone ukuthi esikubalayo singakusebenzisa njani ezimpilweni zethu. Inhlanganiso kaJehova isinika amabhuku asekelwe eBhayibhilini esingawafanisa lokudla okuphekwe kuhle. Phela nxa umuntu esidla ukudla okumnandi kajahi kodwa uthatha isikhathi sakhe ukuze akukholise. Yikho kanye okumele sikwenze nxa sibala amabhuku ethu ukuze esikufundayo kungene kujule ezinhliziyweni zethu. Singenza njalo sizawakholisa “amazwi ayiwonawona” futhi kuzakuba lula ukuthi siwakhumbule njalo siwatshele abanye.​—UmTshu. 12:10. w17.05 19-20 ¶11-12

Sifuna ukunceda abantu abahluphekayo okugoqela lalabo abangakamazi uJehova. (Luk. 10:33-37) Kodwa indlela eqakathekileyo esingakwenza ngayo lokhu yikubatshela izindaba ezinhle eziseBhayibhilini. Omunye umdala webandla uthi: “Nxa utshumayeza abantu abayiziphepheli tshono ukuthi unguFakazi kaJehova lokuthi uzoxoxa labo ngethemba elihle eliseBhayibhilini hatshi ukuzobanika izinto ezithile. Ungayekela ukwenza njalo abanye bangacabanga ukuthi uhamba unceda abahluphekayo.” Ukuthanda abafowethu labodadewethu abayiziphepheli kuba lempumela emihle kakhulu. (Hubo. 146:9) Ngokwesibonelo omunye udadewethu walandisa ngemuli yakhe eyasuka e-Eritrea ibalekela ukuhlukuluzwa. Abantwabakhe abane bahamba amalanga angu-8 bequma enkangala baze bayafika eSudan. Udade lo uthi: “Abazalwane beSudan babaphatha kuhle kakhulu abantwabami. Kwakungani bayizihlobo zabo. Babebanika ukudla, izigqoko, indawo yokuhlala lemali yokugada. Kambe ngubani ongamukela umuntu angamaziyo amenzele konke lokhu ngenxa yokuthi bakhonza bonke? Kakho ongakwenza lokhu ngaphandle kwaboFakazi bakaJehova!”​—Joh. 13:35. w17.05 7 ¶17, 19-20

U-Elifazi umThemani wabuza uJobe wathi: “Umuntu angasiza uNkulunkulu na? Lesihlakaniphi uqobo kambe singamsiza na? Bekungamupha ntokozo bani uSomandla ukulunga kwakho na? Ubengazuzani ngabe kuthiwa kawulasiyinga na?” (Jobe. 22:1-3) U-Elifazi wayecabanga ukuthi uNkulunkulu kalandaba labantu. Umngane wakhe uBhilidadi umShuhi laye wala wemba phansi ukuthi umuntu angaba ngolungileyo phambi kukaNkulunkulu. (Jobe. 25:4) Amadoda la ayeqina ngokuthi konke esikwenzayo ukuze sihlale siqotho kuJehova akuncedi ngalutho ngoba kuye sizimpethu nje. (Jobe. 4:19; 25:6) UJehova wamzondela u-Elifazi loBhilidadi loZofari ngokukhuluma kwabo amanga njalo watshengisa lokuthi uyamqakathekisa uJobe ngokumbiza ngokuthi ‘inceku yami.’ (Jobe. 42:7) Siyabona-ke ukuthi uNkulunkulu uyabaqakathekisa abantu. w17.04 28 ¶1-2

Sekulesikhathi eside ububi bubhahile emhlabeni. Singakufanisa labantu abahlala eduze lesititshi sesitimela, bacina bengasawuzwa umsindo okhona ngenxa yokujayela. Kunjalo langabantu abahlala phansi kwendawo okulahlelwa kuyo izibi, labo bacina bengasawuzwa umnuko okhona. Lathi ngenxa yokujayela singacina singasaluboni uhlupho ngezimo lezi ezikhona. Kodwa nxa uJehova angasusa bonke ububi abantu abalungileyo bazaphumula! Kuzahamba njani nxa ukukhathazeka konke kungasekho? Impendulo isembhalweni walamuhla. Lokhu kuyasithokozisa ngoba yikho kanye uJehova afuna ukusenzela khona. Ngamunye wethu kumele azimisele ukuhlala eseduze loJehova uNkulunkulu lenhlanganiso yakhe njengoba siphila kulezinsuku zokucina. Ngakho ligagadlele ithemba olalo, ucabangisise ngalo sonke isikhathi njalo utshele abanye ngalo. (1 Tim. 4:15, 16; 1 Phet. 3:15) Nxa ungenza njalo uzasinda lapho uNkulunkulu esebhubhisa bonke abenza okubi futhi uzaphila kuze kube nini lanini. w17.04 13 ¶16-17

Singabe sikwazi sibili ukuthi abadala bebandla labo bayaphambanisa kodwa kuba nzima ukukukhumbula lokhu ikakhulu nxa umdala othile angasiphatha kubi. Nxa kungaba njalo kuqakathekile ukuthi silingisele uJehova. Ngokwesibonelo umdala webandla angakhuluma ngendlela etshengisa ukuthi ulobandlululo kumbe atsho okuthile okukuzwisa ubuhlungu. Uzakhalala ukukhonza uJehova yini? Uzalindela ukuthi uJesu umkhokheli webandla alungise izinto yini kumbe uzazitshela ukuthi lowomzalwane kasafanelanga ukuba ngumdala? Uzakhangela iphutha alenzileyo yini kumbe uzakhumbula okuhle akwenzileyo okweminyaka eminengi ekhonza uJehova? Ake sithi umzalwane okuphathe kubi uqhubeka engumdala webandla mhlawumbe aze anikwe leminye imisebenzi ebandleni. Uzajabula laye yini? Nxa ungabathethelela abakonelayo uyabe ulingisela ukulunga kukaJehova.​—Mat. 6:14, 15. w17.04 27 ¶18