October

UJehova ulenhlakanipho emangalisayo futhi uyasinika ukuhlakanipha. Enye indlela esingathola ngayo ukuhlakanipha yikuvuma ukulaywa nguNkulunkulu. Ukwenza njalo kuzasisiza ukuthi sixwaye izinto ezimbi ezingaphambanisa ubuhlobo bethu loJehova. (Zaga. 2:10-12) Nxa sisenza njalo siyabe ‘sizigcina sisethandweni lukaNkulunkulu’ futhi sizathola ukuphila okuphakade. (Jud. 21) Isono esilaso lendlela esikhuliswe ngayo kungenza singakuthandi ukulaywa. Pho kuyini okungasisiza ukuthi sikuthande ukulaywa? Yikukhumbula ukuthi ukulaywa kuyasinceda futhi kutshengisa ukuthi uJehova uyasithanda. UZaga 3:11, 12 uthi: “Ndodana yami, ungeyisi ukulaya kukaJehova . . . ngokuba uJehova ulaya labo abathandayo.” Amazwi la atshengisa ukuthi uJehova uyasithanda njalo ufuna sibe lempilo engcono. (Heb. 12:5-11) UJehova uyasazi kuhle futhi kadlulisi amalawulo nxa esilaya. w18.03 28 ¶1-2

Amazwi la abhalwa ngumphostoli uPhetro encwadini ayilobela amabandla ase-Asia Minor ayelabantu bemihlobo etshiyeneyo. Babephila ngesikhathi esinzima. Kuyini okwakuzasiza wonke amaKhristu ukuthi ame eqinile ngesikhathi leso esasinzima? (1 Phet. 1:1; 4:4, 7, 12) Evesini le uPhetro wayekhuthaza abazalwane ukuthi babe lomusa komunye lomunye lanxa babesazana futhi bejayelene. Kwakuzabanceda ngani lokhu? Kwakuzabenza bahlale bemanyene. Mhlawumbe lawe sewakubona ukuthi ukuba lomusa kwenza abantu babe lobudlelwane obuhle. Wake wanxuswa ngothile yini? Kungenzakala ukuthi ulokhu usayikhumbula indlela elakholisa ngayo mhlalokho. Mhlawumbe lawe ukhona umzalwane loba udade osumjayele ngenxa yokuthi wake wamnxusa emzini wakho. Ukunxusa abafowethu labodadewethu emizini yethu kungenza sibazi ngcono futhi sibazwisise. Ngesikhathi uPhetro ebhala incwadi le, amaKhristu kwakumele athandane sibili ngoba izinto zaziqhubeka zisiba nzima. Lathi kumele senze okufananayo ngoba siphila “ezinsukwini zokucina.”​—2 Tim. 3:1. w18.03 14-15 ¶1-3

UJesu wathi bayajabula abantu abalobuhlobo obuhle loNkulunkulu. Umphostoli uPhawuli laye watshengisa ukuthi ukuba lobuhlobo obuhle loNkulunkulu kungasenza sithole ukuphila. Wathi: “Ukugxilisa ingqondo ezintweni zemvelo yesono kutsho ukufa kodwa ukugxilisa ingqondo ezintweni zomoya kutsho ukuphila lokuthula.” (Rom. 8:6, NW.) Siyabona-ke ukuthi ukukhuthala ekukhonzeni kungasenza sihlale siseduze loNkulunkulu, sihlaliseke njalo siqinise ithemba lethu. Umhlaba lo uyingozi kakhulu ngoba ugcwele abantu abaxhwalileyo. Ngakho kumele sizame ngamandla wonke ukuba lobuhlobo obuhle loNkulunkulu futhi sibugcine buqinile. Phela nxa umuntu angaphelelwa yibuhlobo bakhe loNkulunkulu kufanana lokuthi uyabe esevule umnyango ozangenisa “umoya” womhlaba lo. UJuda wabhala ukuthi abantu laba balandela izifiso zabo ngoba kabalawo umoya kaNkulunkulu.​—Jud. 18, 19. w18.02 19-20 ¶5, 7-8

Abezempilakahle abanengi basebenza phakathi kwabantu abagula imikhuhlane ethelelwanayo. Okwenza babanakekele yikuthi bayafisa ukuthi basile. Lanxa kunjalo kuqakathekile ukuthi bazivikele ukuze bangacini behlaselwa yimikhuhlane yezigulane abazelaphayo. Kuyafanana lathi lamuhla, siphila labantu abalemikhuba emibi ephikisana lalokho okufunwa nguNkulunkulu. Kungaba yingozi kithi ukuphila labantu abanjalo. Izinsuku zokucina esikuzo zigcwele abantu abaxhwalileyo futhi abangelandaba loNkulunkulu. Umphostoli uPhawuli wakhuluma ngabo ngesikhathi ebhalela uThimothi. (2 Tim. 3:1-5) Lanxa ububi obenziwa ngabantu laba busimangalisa kumele sinanzelele ngoba lathi singacina sesisenza njengabo. (Zaga. 13:20) Yikho kumele sizivikele ukuze singahlaselwa yimikhuba yabo emibi njengoba sizama ukubasiza ukuthi bafunde iqiniso. w18.01 27 ¶1-2

UJesu wathi esevusiwe ngo-33 C.E., wabonakala exukwini labantu abedlula 500. Phakathi kwexuku lelo kwakulamadoda labesifazane, kungenzakala ukuthi labantwana babekhona. Kumele ukuthi leso yiso isikhathi uJesu akhuluma ngaso amazwi ombhalo walamuhla. (1 Khor. 15:6) Kungenzakala ukuthi ngesikhathi uJesu ekhipha umlayo lo kwakulabalandeli bakhe abanengi. Ngokutsho amazwi la, wayetshengisa ukuthi wonke umuntu ofuna ukuba ngumKhristu kumele abhabhathizwe. (Mat. 11:29, 30) Ngakho loba ngubani owayefuna ukubhabhathizwa kwakumele avume ukuthi uJehova usebenzisa uJesu ukuze afeze injongo yakhe. Nxa umuntu esekwenzile lokho wayesengabhabhathizwa futhi uJehova wayemamukela. IBhayibhili liveza ukuthi ngalesosikhathi abalandeli bakaJesu babekuzwisisa ukuqakatheka kokubhabhathizwa. Babengatshoni bezilazila nxa sekumele babhabhathizwe.​—ImiSeb. 2:41; 9:18; 16:14, 15, 32, 33. w18.03 5 ¶8

Siphila emhlabeni ogcwele imikhuba enyanyekayo lezimfundiso ezimemethekiswa ngamasonto amanga abizwa ngokuthi yiBhabhiloni Enkulu. IBhayibhili liphinda libize amasonto la ngokuthi “likhaya lamadimoni.” (Isam. 18:2) Ukuziphatha kwethu kwenza abantu basichothoze loba basihleke. (Mak. 13:13) Lanxa kunjalo kasiqhubekeni silingisela isibonelo sikaDanyeli ngokusondela kuJehova uNkulunkulu wethu. Nxa singahlala sithobekile, silalela njalo simthemba uBaba wethu sizakuba ligugu kuye. (Hag. 2:7) Abazali lamuhla bangathola isifundo esihle kulokho okwenziwa ngabazali bakaDanyeli. Ngesikhathi uDanyeli esesengumfana abantu abanengi koJuda babesenza izinto ezimbi kodwa yena waqhubeka emthanda uJehova. Lokhu kutshengisa ukuthi abazali bakhe bamfundisa ngoJehova esesemncane. (Zaga. 22:6) Ibizo lakhe lalo litshengisa ukuthi abazali bakhe babemthanda uJehova ngoba litsho ukuthi, “UNkulunkulu Ungumahluleli Wami.” Ngakho lani bazali lamuhla lingabakhalali abantwabenu kodwa qhubekani libafundisa futhi libabekezelela. (Efe. 6:4) Okunye elingakwenza yikuthandaza ndawonye labo lokubaqamba emithandazweni yenu. UJehova uzalibusisa nxa lingazimisela ukunceda abantwabenu ukuthi balithande iqiniso.—Hubo. 37:5. w18.02 5-6 ¶12, 14-15

Nxa sinikela siyabe sitshengisa ukuthi siyakuqakathekisa ukukhonza uJehova. Umphostoli uJohane wabona embonweni izinceku zikaJehova ezulwini zisithi: “Ufanele, Nkosi yethu loNkulunkulu wethu, ukwamukela udumo lenhlonipho kanye lamandla, ngoba wena wadala izinto zonke, njalo zadalwa ngentando yakho njalo zilabo ubukhona bazo.” (Isam. 4:11) Singatshengisa ukuthi simnika udumo lenhlonipho uJehova ngokumnika okuhle kakhulu kulokho esilakho. UJehova watshela abako-Israyeli ukuthi kwakumele bavele phambi kwakhe kathathu ngomnyaka. Kodwa wathi kwakungamelanga ‘bavele phambi kwakhe bengaphethe lutho.’ (Dute. 16:16) Ngakho nxa lathi sinikela ukuze sisekele umsebenzi owenziwa enhlanganisweni siyabe sitshengisa ukuthi siyakuqakathekisa ukukhonza uJehova. w18.01 18 ¶4-5

UJesu esekhulume amazwi la, waqhubeka wathi: “Zithwaliseni ijogwe lami . . . Ngokuba ijogwe lami lilula lomthwalo wami kawusindi.” (Mat. 11:29, 30) Aliqiniso sibili amazwi la! Kwesinye isikhathi siyake siye emhlanganweni yebandla loba ekutshumayeleni lanxa sidinwe sifile. Kodwa nxa sesivela khona siyabe sesivuselelwe futhi sesilamandla okubekezelela inhlupho esiphakathi kwazo. Kuyakhanya sibili ukuthi ijogwe likaJesu lilula. Omunye udadewethu okuthiwa nguKayla uthwele nzima ngenxa yomkhuhlane wokudinwa masinyane, owokuhlulukelwa kanye lokuhlala etshaywa likhanda. Ngakho kwezinye izikhathi kuba nzima ukuthi aye emihlanganweni yebandla. Ngelinye ilanga waqinisela waya emhlanganweni. Uthi: “Mhlalokho inkulumo yayikhuluma ngokudana. Umzalwane owayesenza leyonkulumo wayekhuluma ngomusa njalo ayekutsho kwangithinta ngaze ngakhala. Yikho lapho engabona khona ukuthi akumelanga ngikhuthe ukungena imihlangano ngoba iyanginceda.” Udadewethu lo wajabula kakhulu ukuthi wayenze okusemandleni akhe ukuze angene umhlangano. w18.01 8-9 ¶6-7

Kungenzakala ukuthi umntanakho esebhabhathiziwe aqalise ukuthandabuza ukuthi akukholwayo kuliqiniso. Ngokwesibonelo angathatheka ngezinto zomhlaba lo kumbe aqalise ukucabanga ukuthi akuncedi ukulandela izimiso zikaNkulunkulu. (Hubo. 73:1-3, 12, 13) Kumele wenzeni nxa sekunjalo? Ungaqali ukuvuka ngolaka. Indlela ozakwenza ngayo yiyo ezakutsho ukuthi umntanakho uzaqhubeka elokholo kuJehova yini kumbe uzatshiya ukumkhonza. Zimisele ukuxoxisana laye kuhle kungelani lokuthi usesemncane kumbe usekhulakhulile. Kumele abone ukuthi uyamthanda lokuthi ufuna ukumnceda. Nxa umntwana ebhabhathiziwe uyabe enze isifungo sokuzinikela kuJehova. Khumbula ukuthi nxa uzinikela uyabe uthembisa uNkulunkulu ukuthi uzamthanda njalo wenze intando yakhe kumnyama kubomvu. (Mak. 12:30) UJehova uyasiqakathekisa kakhulu isifungo lesi futhi ukhangelele ukuthi wonke umuntu osenzayo asigcwalise.​—UmTshu. 5:4, 5. w17.12 22 ¶16-17

UMatha kanye lezinye izinceku zikaJehova endulo babekholwa ukuthi kuzakuba lokuvuswa kwabafileyo esikhathini esizayo. Cabanga ngalokho uJehova akutshela u-Abhrahama mayelana lendodana yakhe u-Isaka. Wamtshela wathi: “Thatha indodana yakho, indodana yakho eyiyo yodwa, u-Isaka, omthandayo, . . . menze umhlatshelo abe ngumnikelo wokutshiswa.” (Gen. 22:2) Kumele ukuthi lokhu kwamphica u-Abhrahama ngoba uJehova wayemtshele ukuthi zonke izizwe zazizabusiswa ngenzalo yakhe. (Gen. 13:14-16; 18:18; Rom. 4:17, 18) Wayemtshele lokuthi isibusiso leso sasizakuza “ngo-Isaka.” (Gen. 21:12) Manje kwakuzagcwaliseka njani lokhu yena esethethe u-Isaka wanikela ngaye? UPhawuli waphefumulelwa ukuba abhale ukuthi u-Abhrahama wayekholwa ukuthi uNkulunkulu uzamvusa u-Isaka kwabafileyo yikho wavuma ukunikela ngaye. (Heb. 11:17-19) U-Abhrahama wayengakwazi ukuthi u-Isaka uzavuswa nini kodwa wayekholwa ukuthi uJehova ulamandla okumvusa. w17.12 5-6 ¶12-14

Kumele sizame ukulingisela uPhawuli, sikhuthale ekutshumayeleni ukuze sitshengise ukuthi siyakuqakathekisa ukuphila. UJehova ufuna “ukuba umuntu wonke aphenduke.” (2 Phet. 3:9) Wena uyafuna yini ukuncedisa abanye ukuthi baphenduke? Okungakusiza ukuthi ukhuthale emsebenzini lo futhi ukholise ukuwenza yikuba lesihawu lokuthanda abantu ngenhliziyo yonke. Enye indlela esingatshengisa ngayo ukuthi siyakuqakathekisa ukuphila yikuhlala sizivikela ezingozini kukho konke esikwenzayo. Ngokwesibonelo kumele sibe leqiniso lokuthi sivikelekile nxa sisakha izindawo zokukhonzela loba nxa sizilungisisa. Kanti njalo nxa silezimota kumele sitshayele ngendlela etshengisa ukuthi siyakuqakathekisa ukuphila. Akufanelanga sifake impilo zethu engozini ngenxa yokufuna imali kumbe ukuqeda umsebenzi othile esiwenzayo. Kumele silingisele uNkulunkulu wethu ohlala esenza okuhle. Abadala kumele babe yisibonelo esihle endabeni le njalo babe leqiniso lokuthi abanye basebenza bevikelekile. (Zaga. 22:3) Ngakho nxa umdala othile engakukhumbuza okumele ukwenze ukuze uvikeleke kufanele wamukele iseluleko sakhe. (Gal. 6:1) Nxa singaqakathekisa ukuphila njengoJehova kasisoze sibe “lecala lokuchitha igazi.”​—Dute. 19:10. w17.11 16 ¶11-12

Abagcotshiweyo abakhona lamuhla balindele ukuthola ‘umvuzo uNkulunkulu ababizele wona ezulwini.’ (Flp. 3:14) Bakhangelele ukuyabusa loJesu Khristu ezulwini kanye lokuncedisana laye ukususa isono ebantwini ukuze babe ngabapheleleyo. (Isam. 20:6) Leli lithemba elihle okumangalisayo! Ezinye izimvu zona zizatholani? Zizathola umvuzo wokuphila phakade emhlabeni olipharadayisi futhi zikulindele ngabomvu ukuthola umvuzo lo. (2 Phet. 3:13) UPhawuli wayefuna ukunceda abagcotshiweyo ukuthi bahlale bethembekile baze bathole umvuzo wabo. Yikho wabatshela wathi: “Bekani izingqondo zenu ezintweni eziphezulu.” (Kol. 3:2) Kwakumele bahlale bekhumbula ithemba abalalo lokuyabusa loJesu ezulwini. (Kol. 1:4, 5) Ukucabangisisa ngethemba lethu kuzasinceda ukuthi sihlale sikhangelise amehlo ethu ekutholeni umvuzo esiwulindeleyo.​—1 Khor. 9:24. w17.11 25 ¶1-2

Ingoma ezinengi ezisesihlabelelweni esitsha zinjengemithandazo. Lokhu kusinceda ukuthi nxa sizihlabela kube angani sikhuluma loJehova. Ezinye zisisiza ukuthi ‘sikhuthazane ethandweni lasezenzweni ezinhle.’ (Heb. 10:24) Ngakho kuhle ukuthi sizijayele ingoma lezi njalo sizame ukuzibamba ngekhanda. Okungakunceda ukuthi uzijayele masinya, yikudawuniloda ku-jw.org ingoma ezihlatshelwa yikhwaya yethu ubusuzilalela. Lokhu kuzakusiza ukuthi wenelise ukuhlabela ngokuzwakalayo langenhliziyo yonke. Khumbula ukuthi ukuhlabela kuqakathekile ekukhonzeni kwethu futhi yindlela esingatshengisa ngayo ukuthi siyamthanda uJehova. (Isaya. 12:5) Nxa ungazimisela ukuhlabela ngokuzwakalayo, abanye bazabona isibonelo sakho esihle bakulingisele. Ngakho sonke ebandleni kasizameni ukuhlabela ngenhliziyo yonke sidumise uJehova njalo sizimisele ukuhlabela ngokuzwakalayo langentokozo!​—w17.11 7 ¶18-19

Abantu abanengi abayiziphepheli lamuhla abakaze bazwe izindaba ezinhle ngenxa yokuthi emazweni abavela kuwo oFakazi abavunyelwa ukutshumayela. Kodwa okuhle yikuthi sebelizwa ‘ilizwi loMbuso’ ezinkambeni abakuzo ngenxa yokutshunyayezwa ngoFakazi kulezondawo. (Mat. 13:19, 23) Abanye babo bayangena imihlangano yethu futhi ibenza bathole impumuzo njalo bayavuma ukuthi “uNkulunkulu impela uphakathi kwethu!” (Mat. 11:28-30; 1 Khor. 14:25) Nxa utshumayeza abantu abayiziphepheli kumele ‘uqaphe’ njalo uhlakaniphe. (Zaga. 22:3) Zama ukubalalelisisa nxa bekutshela inhlupho zabo kodwa unanzelele ukuthi ingxoxo zenu kazichapheli kwezombusazwe. Sebenzisa iziqondiso ezivela ewofisini yegatsha kanye lakubaphathi bendawo ukuze ungazingenisi engozini. Zinike isikhathi sokudingisisa ukuthi bakholwani lokuthi amasiko abo ami njani. Ngokwesibonelo abantu abavela kwamanye amazwe bayakhubeka nxa omama bangagqoka ngendlela ethile. Ngakho nxa utshumayeza abantu abayiziphepheli, gqoka ngendlela ezakwenza ukuthi bakwamukele. w17.05 7 ¶17-18

Kumele sithandaze kuJehova sicele ukuthi asiphe umoya wakhe ongcwele ukuze senelise ukukhuluma ngomusa lezihlobo zethu ezingayisibo oFakazi. Akufanelanga sibambe inkani siphikisana lazo ngazo zonke izimfundiso zamanga ezibambelele kuzo. Nxa zingenza okuthile loba zikhulume amazwi asizwisa ubuhlungu kumele silingisele lokho okwakusenziwa ngabaphostoli. UPhawuli wathi: “Nxa sithukwa, thina siyabusisa; lapho sihlukuluzwa, thina siyaqinisela; lapho sinyeywa, siphendula kuhle.” (1 Khor. 4:12, 13) Ukukhuluma ngomusa lezihlobo zethu kunganceda ukuthi sihlalisane lazo ngokuthula kodwa okungaba lempumela emihle kakhulu yindlela esiphila ngayo. (1 Phet. 3:1, 2, 16) Ngakho nxa singazimisela ukwenza okuhle, izihlobo zethu zizabona ukuthi oFakazi bakaJehova ngabantu abathokozayo ezimulini zabo, abaqeqetsha kuhle abantwababo njalo abaqakathekisa imithetho kaNkulunkulu. Lanxa izihlobo zethu zingasoze zicine zingoFakazi, kumele sikhumbule ukuthi ukuziphatha kuhle esikwenzayo kuyamthokozisa kakhulu uJehova. w17.10 15 ¶13-14

Kasimangali nxa sibona abantu abanengi bentshintsha indlela abaphila ngayo bangafunda iBhayibhili. Lokhu yikho kanye okwenzakala lasendulo kumaKhristu ayelethemba lokuyaphila ezulwini. (1 Khor. 6:9-11) UPhawuli wakhuluma ngabantu abangasoze badle ilifa loMbuso kaNkulunkulu wasesithi: “Lokho yikho abanye benu ababe yikho.” Abazalwane labo basebeyilahlile imikhuba emibi bencediswa liLizwi likaNkulunkulu kanye lomoya wakhe ongcwele. Lanxa abanye basebelazi iqiniso, kwezinye izikhathi benza amaphutha amakhulu. Ngokwesibonelo iBhayibhili lisitshela ngomunye umzalwane ogcotshiweyo owasuswayo ebandleni kodwa ngokuya kwesikhathi walungisa iphutha lakhe wasebuyiselwa. (1 Khor. 5:1-5; 2 Khor. 2:5-8) Lokhu kwenza sibone ukuthi iBhayibhili labanceda sibili abafowethu labodadewethu ukuthi bantshintshe indlela ababephila ngayo. Lathi kumele sizimisele ukulisebenzisa kuhle ukuze lisincede. w17.09 23-24 ¶2-3

IBhayibhili likhuluma ngothando olusekelwe ezimisweni olubizwa ngokuthi yi-a·gaʹpe ngesiGrikhi. Uthando lolu luqakathekile futhi luyisipho esivela kuJehova. (1 Joh. 4:7) Umuntu olothando lolu ukhanya ngokuba lozwelo lesihe njalo kathikazi ukwenzela abanye okuhle. Elinye ibhuku liyakuvuma ukuthi uthando lolu lukhanya ngezenzo. Ukuba lothando olunjalo kwenza umuntu athokoze futhi aphile impilo elenjongo. UJehova watshengisa ukuthi uyabathanda abantu engakabadali lokubadala. Ngokwesibonelo wadala umhlaba njalo wafaka zonke izinto ezidingakalayo ukuze abantu baphile futhi bakholise ukuhlala kuwo. Konke lokhu wayekwenzela thina hatshi yena. UJehova waphinda watshengisa ukuthi uyabathanda abantu ngokubanika ithuba lokuphila phakade ePharadayisi ayebalungisele lona. w17.10 7 ¶1-2

UJakhobe wathi esebhale amazwi la waqhubeka wathi: “Uma libandlulula lenza isono.” (Jak. 2:9) Ngakho-ke ukuba lothando kuzasinceda ukuthi sithande bonke abantu kungelani lokuthi abafundanga, abalamali loba ukuthi bangumhlobo bani. Lokhu akumelanga sikwenzele ukulahlisa nje kodwa kumele kube yinto esuka enhliziyweni. IBhayibhili lithi uthando ‘luyabekezela, lulomusa njalo kaluzigqaji.’ (1 Khor. 13:4) Ukubekezela, ukuba lomusa kanye lokuthobeka kuyasinceda ukuthi siqhubeke sitshumayela izindaba ezinhle kubomakhelwana bethu. (Mat. 28:19) Izimpawu lezi zenza kube lula lokuthi sizwanane labo bonke abafowethu labodadewethu ebandleni. Kuzasinceda ngani ukuqhubeka sithanda abanye? Kuzakwenza simanyane, sidumise uJehova futhi kuzadonsa labanye ukuthi babuye enhlanganisweni yakhe. IBhayibhili liphetha indaba yokwembatha uqobo olutsha ngokuthi: “Phezu kwakho konke lokhu ukulunga yembathani uthando, olukubophela ndawonye kube yikumanyana okupheleleyo.”​—Kol. 3:14. w17.08 26 ¶18-19

Lathi kumele silingisele isibonelo sikaJehova, sibazwele isihawu abantu ekutshumayeleni ngoba labo ngelinye ilanga bangaphenduka babe ngabangane bakhe. Kufanele sikhumbule ukuthi uJehova kafisi ukuthi loba ngubani abhubhe. (2 Phet. 3:9) Ngakho kasizimiseleni ukuqhubeka sitshumayela izindaba ezinhle kuze kufike isikhathi lapho uNkulunkulu azabhubhisa khona abantu ababi. UJesu laye ulesihawu njengoYise. Ngesikhathi elapha emhlabeni wayebazwela isihawu abantu ngoba “babehlukuluzekile bephelelwe, benjengezimvu ezingelamalusi.” Lokhu kwamfuqa ukuthi ‘abafundise izinto ezinengi.’ (Mat. 9:36; Mak. 6:34) UJesu wayetshiyene kakhulu labaFarisi ngoba babengelandaba labantu. (Mat. 12:9-14; 23:4; Joh. 7:49) Kumele senze njengoJesu, sibe lesihawu ebantwini abafuna ukwazi iqiniso. w17.09 9-10 ¶6, 9

Ngesikhathi uJosefa esejele wayengacabangeli ukuthi kwelinye ilanga angaphiwa isikhundla esilandela esenkosi yeGibhithe kumbe ukuthi uJehova angamsebenzisa ukuthi asize abangakibo ngesikhathi indlala ibambile. (Gen. 40:15; 41:39-43; 50:20) Siyabona-ke ukuthi okwenziwa nguJehova kwakusedlula khatshana konke ukuqedisisa uJosefa ayengabe elakho. Omunye owakubonayo lokhu nguSara. Wayeyinyumba njalo wayengacabangi ukuthi ngelinye ilanga angaba lomntwana. Ngakho kumele ukuthi ukuzalwa kuka-Isaka kwamtshiya emangele ngoba wayengacabangeli ukuthi kungenzakala. (Gen. 21:1-3, 6, 7) Kasikhangelelanga ukuthi uJehova enze izimangaliso ukuze aqede zonke izinhlupho ezisithwalise nzima. Esikwaziyo yikuthi zonke inhlupho zizaphela emhlabeni omutsha. Kodwa okwenziwa nguJehova endulo kusenza sibe lethemba lokuthi angenza loba yini lamuhla ukuze asikhulule ebunzimeni esikubo. (Isaya. 43:10-13) UJehova angenza loba yini ukuze asisize ukuthi senelise ukwenza intando yakhe. (2 Khor. 4:7-9) Nxa singahlala sithembekile kuJehova, angasincedisa ukuthi sinqobe loba yiluphi uhlupho lanxa lungakhanya lungangentaba. w17.08 11-12 ¶13-14

Ukuba senkonzweni yesikhathi sonke kukunika ithuba lokusebenza labafowethu labodadewethu abenza umsebenzi ofananayo futhi kuyakunceda ukuthi uthuthuke ekukhonzeni. Abanye bathi ukuba senkonzweni yesikhathi sonke besakhula kubafundise izinto ezinengi ezibancede kakhulu sebetshadile. Abanye bakhona balokhu besenkonzweni le ndawonye labomkabo. (Rom. 16:3, 4) IHubo 20:4 lithi: “Sengathi [uJehova] angakupha isifiso senhliziyo yakho enze izimiso zakho zonke ziphumelele.” Kunengi uJehova akwenzayo kulezinsuku zokucina. Ngakho nxa uhlela ofuna ukukwenza empilweni hlolisisa ukuthi ungancedisa ngaphi. UJehova uzathokoza nxa ungakhetha kuhle. Ukuba senkonzweni yesikhathi sonke kuzakwenza usuthiseke futhi udumise uJehova. Ngakho “zithokozise kuJehova yena uzakupha izifiso zenhliziyo yakho.”​—Hubo. 37:4. w17.07 26 ¶15-18

Sijayele ukubonga othile nxa enze kuhle umsebenzi wakhe kumbe nxa ekhulume okuthile esikuthandileyo. Kodwa kuqakatheke kakhulu ukuthi sikwenze lokhu lakuJehova uNkulunkulu. Kufanele simdumise ngenxa yamandla akhe amangalisayo esiwabona kulokho akudalileyo. Okunye okwenza simdumise yikubona indlela athanda ngayo abantu. Wathumela iNdodana yakhe eyiyo yodwa ukuze ibe yinhlawulo yabo bonke. Umlobi weHubo 147 wamdumisa uJehova ngenxa yobuhle bakhe. Wakhuthaza labanye ukuthi benze njalo. (Hubo. 147:7, 12) Asikwazi ukuthi ngubani owaloba ihubo leli kodwa kungenzakala ukuthi waphila ngesikhathi ama-Israyeli ebuyela eJerusalema ngemva kokukhululwa ebugqilini eBhabhiloni. (Hubo. 147:2) Kumele ukuthi ukukhululwa kwama-Israyeli ukuze ayevuselela ukukhonza kweqiniso kwenza umhubi lo wadumisa uJehova. Thina silazo yini izizatho ‘zokudumisa uJehova?’​—Hubo. 147:1. w17.07 17 ¶1-3

UJesu wayekwazi ukuthi abalandeli bakhe kwakuzamele bathole izindlela zokuziphilisa kwezentengiselwano ezisemhlabeni lo obuswa nguSathane. IBhayibhili liyakucacisa ukuthi kusukela ekuqaleni uJehova wayengahlosanga ukuthi kube lezokuthengiselana. Ngokwesibonelo wanika u-Adamu lo-Eva konke ababekudinga ensimini yase-Edeni. (Gen. 2:15, 16) IBhayibhili liveza lokuthi ngesikhathi sabaphostoli kakho phakathi kwabagcotshiweyo “owathi okwakhe ngokwakhe yedwa kodwa babelana konke ababelakho.” (ImiSeb. 4:32) Umphrofethi u-Isaya waphrofetha ukuthi ngesikhathi esizayo abantu bonke bazakholisa zonke izinto ezisemhlabeni mahala. (Isaya. 25:6-9; 65:21, 22) Kodwa okwakhathesi kuzamele ‘senze ngokuhlakanipha,’ sizame ukusebenzisa inotho yomhlaba lo ukuze sithole okokuziphilisa futhi sizuze abangane ezulwini. Nxa singenza njalo sizathokozisa uNkulunkulu.​—Luk. 16:8. w17.07 8 ¶4-6

Endabeni kaJobe eseBhayibhilini, sitshelwa ukuthi uSathane wathi uJobe uzamphika uNkulunkulu nxa angaba phakathi kwenhlupho. Waze wathi uNkulunkulu kelule isandla sakhe achithe konke uJobe ayelakho. UJehova kazange akwenze lokhu kodwa wavuma ukuthi uSathane alinge uJobe. Ngesikhatshana nje uJobe walahlekelwa yizisebenzi ayelazo, imfuyo yakhe kanye labantwabakhe abalitshumi. USathane wenza kwakhanya angathi obangele ukuhlupheka kukaJobe nguNkulunkulu ngokwakhe. (Jobe. 1:13-19) USathane waphinda wehlisela uJobe umkhuhlane obuhlungu futhi owenyanyekayo. (Jobe. 2:7) Okubuhlungu kakhulu yikuthi umkakhe lamadoda amathathu ayezenza abangane bakhe babekhuluma amazwi ahlabayo njalo bemgcona engonanga lutho. (Jobe. 2:9; 3:11; 16:2) USathane wayeqinisile yini? Hatshi ngoba uJobe kazange amphike uJehova uNkulunkulu lanxa wayephakathi kobunzima.​—Jobe. 27:5. w17.06 24 ¶9-10

UJehova ukhangelele ukuthi inhloko zezimuli zondle imuli zazo. Ngakho kumele zisebenze nzima ukuze zenze umsebenzi lo. Loba kunjalo ukusebenza kuyabacindezela abantu abanengi futhi kwenza bangahlaliseki. Kulezinsuku imisebenzi kayitholakali ikanti abasebenzayo labo bazama ngamandla wonke ukulondoloza imisebenzi yabo. Abanye baze basebenze amahola amanengi lanxa bephiwa iholo elincane. Kanti njalo imisebenzi iyabakhulela abanye ngoba abaqhatshi babo bayabe bekhangelele ukuthi benze okunengi ngapha bebalutshwana. Lokhu kubangela ukuthi izisebenzi zihlale zidiniwe, zikhathazekile futhi ezinye zicina zigula. Ngenxa yokwesaba ukuphelelwa yimisebenzi, abanengi bayabubhensela ubunzima bonke lobu. Siyakwazi ukuthi kumele sibe qotho kuJehova uNkulunkulu hatshi kubaqhatshi bethu. (Luk. 10:27) Ukusebenza kuyasinceda ukuthi sithole izinto eziqakathekileyo empilweni lokuthi sisekele umsebenzi wethu wokutshumayela. Kodwa kumele siqaphele ngoba umsebenzi ungaphambanisa indlela esimkhonza ngayo uJehova. w17.05 23 ¶5-7

Kwezinye izikhathi abanye abazali abasanda kuba ngoFakazi bangasicela ukuthi sifunde labantwababo iBhayibhili. Nxa umzali angakucela ukuthi ufunde iBhayibhili labantwabakhe akumelanga umthathele umsebenzi wakhe. (Efe. 6:1-4) Kwezinye izikhathi ungacelwa ukuthi ufunde labantwana abalabazali abangayisibo oFakazi. Okumele ukunanzelele yikuthi nxa ufunda labo awucini ususenza angani ungumzali wabo. Kungaba kuhle lokuthi ufunde labo ungakibo umzali wabo ekhona loba kulomunye uFakazi oyisibonelo esihle kumbe kwenye indawo efaneleyo. Lokhu kuzakwenza abanye bangabi lensolo kumbe bazibuze ukuthi kwenzakalani. Mhlawumbe ngokuhamba kwesikhathi abazali babo bazabona kungcono ukuthi bazifundisele abantwababo ngoJehova. w17.06 8 ¶15-16

Nxa abantwana bengawafundiswanga amasiko abazali babo, kababi lesifiso sokufunda ulimi lwabazali kanye lalokho abakukholwayo. Abazali akumelanga baqakathekise lokho okufunwa yibo kuphela kodwa kumele bacabange ngalokho okunganceda abantwababo ekukhonzeni. (1 Khor. 10:24) Umfowethu okuthiwa nguSamuel uthi: ‘Mina lomkami sazinika isikhathi sokukhangela ukuthi yiluphi ulimi oluzwisiswa ngabantwabethu futhi olungabanceda ukuthi bathuthuke ekukhonzeni. Sathandaza kuJehova sicela ukuthi asincede senze isinqumo esihle. Ngemva kwalokho sananzelela ukuthi babengancedakali kangako emihlanganweni yebandla esasiyingena ngolimi lwethu yikho sacina sintshintshela ebandleni elalisebenzisa ulimi lwakuleyondawo. Sasingena imihlangano njalo sitshumayela ndawonye. Sasinxusa labanye esingena labo ukuthi bazokudla lathi futhi sasihamba labo nxa sisiyavakatsha. Konke lokhu kwanceda abantwabethu ukuthi bajayelane labazalwane njalo bamthande kakhulu uJehova. Sabona ukuthi lokhu yikho okuqakatheke kakhulu ukudlula ukubafundisa ulimi lwethu.’ w17.05 10 ¶11-13

Sekuseduze ukuthi emhlabeni lo kusale abantu abasekela ubukhosi bukaJehova kuphela. Sisilindele ngabomvu lesosikhathi! Lathi sizahlabela njengoDibhora loBharakhi sithi: “Sengathi zingabhubha zonke izitha zakho, O Jehova! Kodwa sengathi labo abakuthandayo bangaba njengelanga lapho liphuma ngamandla alo.” (Abahlu. 5:31) Lokhu sizakwenza ngesikhathi uJehova esusa uSathane labo bonke abantu abenza izinto ezimbi. Thina akusoze kudingakale ukuthi silwe empini ye-Amagedoni kodwa kuzamele ‘sime ngesibindi sibone ukukhulula kukaJehova.’ (2 ImiLan. 20:17) Loba kunjalo kunengi esingakwenza khathesi ukuze sisekele umsebenzi kaJehova. UDibhora loBharakhi bahlabela bedumisa uJehova lapho “abantu bezinikela ngokuzithandela.” (Abahlu. 5:1, 2) Sengathi ukuzinikela kwakho ngokuzithandela kungenza abanye abafowethu labodadewethu ‘badumise uJehova.’ w17.04 32 ¶17-18

Lanxa kwadlula iminyaka engu-13 uJosefa ethwele nzima, kazange avumele ukuthi ukuphathwa kubi ngabanye kumenze abe lenzondo. (Gen. 45:5-8) Kanti njalo kazange avumele ukuthi ukuphambanisa kwabanye kumehlukanise loJehova. UJosefa wamlindela uJehova ukuthi alungise izinto ngesikhathi sakhe futhi ekucineni wambusisa yena lemuli yakhe. Lathi kumele sibuqakathekise kakhulu ubuhlobo bethu loJehova njalo sibulondoloze. Akumelanga sivumele ukuphathwa kubi ngabanye ebandleni kusehlukanise loNkulunkulu wethu esimthandayo futhi esimkhonzayo. (Rom. 8:38, 39) Kodwa nxa singaphathwa kubi ngabanye kasizameni ukulingisela uJosefa, sibambelele kuJehova futhi sicabange ngokuthi yena uyibona njani leyondaba. Nxa singenza konke iMibhalo esitshela khona kuyabe sekumele silindele uJehova njalo sithembe ukuthi uzayilungisa leyondaba ngesikhathi sakhe esifaneleyo langendlela yakhe eqondileyo. w17.04 20, 22 ¶12, 15-16

UHana wenza khona kanye ayekuthembise uNkulunkulu. Wathatha uSamuyeli wamhambisa ethabanikeli eShilo kuMphristi oMkhulu u-Eli. Wafika ku-Eli wathi: “Ngakhulekela umntwana lo, njalo uJehova usengiphile engakucelayo. Ngakho khathesi sengimnika uJehova. Uzanikwa uJehova impilo yakhe yonke.” (1 Sam. 1:24-28) IBhayibhili lithi, “umfana uSamuyeli wakhula phambi kukaJehova.” (1 Sam. 2:21) Kodwa kwakulula yini kuHana ukwehlukana lomntanakhe? Kumele ukuthi lokhu kwakungalula kuHana ngoba wayemthanda kakhulu umntanakhe. Kasithandabuzi ukuthi wayefisa ukuba laye nsuku zonke, ukudlala laye kanye lokumondla. Phela le yinto engafiswa yiloba nguphi umama omthandayo umntanakhe. Loba kunjalo uHana kazange azisole ngesifungo ayesenzile ngoba inhliziyo yakhe yayithokoza ngoJehova.​—1 Sam. 2:1, 2; Hubo. 61:1, 5, 8. w17.04 5 ¶7-8

Umphostoli uPhawuli wathi ezinsukwini zokucina “kuzakuba lezikhathi ezinzima.” Ngemva kwalokho waqhubeka wathi: “Abantu ababi labakhohlisi bazakonakala ngokudlulisayo.” (2 Tim. 3:2-5, 13) Uyakubona yini lokhu kusenzakala? Phose sonke siyake sithwaliswe nzima ngabantu abalodlakela, abalenzondo kanye lezigebenga. Abanye benza ububi lobu egcekeni ikanti abanye ngabakhohlisi abenza angani bafuna ukunceda abantu bona bengamaqili. Lanxa ungakaze uhlangane lakho lokhu, ukuzwa loba ukubona isihluku abasenzayo kukuzwisa ubuhlungu. Kuyadanisa lokubabona behlukuluza abantwana, abantu asebekhulile lalabo abangelamandla okuzivikela. Abantu laba benza angani zinyamazana njalo balomoya wobudimoni. (Jak. 3:15) Lanxa kulobubi obungaka okusithokozisayo yikuthi iLizwi likaNkulunkulu iBhayibhili lisinika ithemba futhi lokhu yizindaba ezinhle. w17.04 10 ¶4