February

UJesu wayebazwela kakhulu abanye. Labo babezibonela ukuthi uyabathanda futhi lokho kwakusenza ukuthi bamlalele nxa ebatshumayeza ngoMbuso. Nxa lathi singabazwela abantu sizawenza kuhle umsebenzi wokutshumayela. Kuyini okungasinceda sitshengise ukuthi silendaba labantu esibatshumayezayo? Kumele sicabange ngokuthi abantu esihlangana labo bazizwa njani lokuthi bacabangani besesibaphatha ngendlela ebesingafuna ukuthi siphathwe ngayo nxa besisesimeni abakuso. (Mat. 7:12) Ngokwesibonelo, kumele sicabange ngalokho umuntu ngamunye akudingayo. Akumelanga sisebenzise indlela eyodwa yokuqalisa ingxoxo labantu esibatshumayezayo kodwa kumele sizame ukuzwisisa indlela abazizwa ngayo labangabe bekucabanga ngendaba ethile. Kufanele simbuze imibuzo ukuze sikwazi okuthile ngaye kanye lalokho akukholwayo. (Zaga. 20:5) Ukubuza abanye imibuzo kuzasinceda sikwazi ukuthi yikuphi esingabaxoxela khona okumayelana lezindaba ezinhle. Nxa sesikwazi lokhu singalingisela uJesu ngokuba lendaba labo lokubanceda ngalokho abakudingayo.​—Khangela u-1 Khor. 9:19-23. w19.03 20 ¶2; 22 ¶8-9

U-Adamu lo-Eva batshengisa ukuthi kababongi okuhle ababekwenzelwe nguJehova ngesikhathi besidla isithelo. Sonke silethuba lokutshengisa ukuthi kasifanani lo-Adamu lo-Eva. Nxa sibhabhathizwa siyabe sisenza kucace kuJehova ukuthi siyakholwa ukuthi nguye okufanele asitshele okumele sikwenze lokungamelanga sikwenze. Siyabe sitshengisa ukuthi siyamthanda uBaba wethu lokuthi siyamthemba. Akumelanga sizenzele esikufunayo nxa sesibhabhathiziwe kodwa kumele siqhubeke sisenza lokho uJehova akufunayo. Izigidi zabantu bakaNkulunkulu zitshengisa ukuthi zifuna ukwenza lokho akufunayo. Uzakuba njengazo nxa ungaqhubeka utaditsha iLizwi likaNkulunkulu, usiya kuyo yonke imihlangano futhi ukhuthele ekutsheleni abanye ngalokho osukufundile ngoYihlo okuthandayo. (Heb. 10:24, 25) Nxa usenza izinqumo, landela lokho okutshiwo nguJehova esebenzisa iLizwi lakhe kanye lenhlanganiso yakhe. (Isaya. 30:21) Ungenza njalo uzaphumelela kukho konke okwenzayo.​—Zaga. 16:20. w19.03 7 ¶17-18

UJehova usinika ukudla okuyithaphutshiye okusinceda ukuthi siqinise ukholo lwethu. Ngokwesibonelo, kunengi esikufundayo emihlanganweni yebandla, kubomagazini kanye lakuwebhusayithi yethu. Engxenye sewake wezwa inkulumo, wabala isihloko esithile loba wabukela uhlelo lweBroadcast futhi wananzelela ukuthi okukhulunywa ngakho yikho kanye obukudinga. Singatshengisa njani ukuthi siyambonga uJehova? (Kol. 3:15) Enye indlela yikuhlala simbonga emithandazweni yethu ngezipho lezi ezinhle. Kanti njalo singatshengisa ukuthi siyambonga uJehova ngokugcina indawo zethu zokukhonzela zihlanzekile futhi zibukeka. Kumele sincedise nxa kuklinwa loba kunakekelwa amaWolu oMbuso njalo abazalwane abasebenzisa imitshina yokukhulisa ilizwi leyokubukelisa amavidiyo leyokudlala izingoma kumele bayiphathe kuhle. Nxa singawanakekela kuhle amaWolu oMbuso, azahlala isikhathi eside futhi kuzakuba kulutshwane okulungiswayo. Kanti njalo siyabe sisonga imali ezasetshenziswa nxa kusakhiwa kumbe kulungiswa amanye amaWolu oMbuso emhlabeni wonke. w19.02 18 ¶17-18

UJobe wayesiba lesikhathi sokucabangisisa ngobuhle bendalo kaJehova. (Jobe. 26:7, 8) Wayesala ebambe owangaphansi nxa ecabangisisa ngomhlaba, isibhakabhaka, amayezi kanye lomdumo wezulu futhi wananzelela ukuthi kulutshwana kakhulu akwaziyo ngezinto ezidaliweyo. Kanti njalo wayewaqakathekisa amazwi kaNkulunkulu. Wathi: “Ngiwenze igugu amazwi omlomo wakhe.” (Jobe. 23:12) UJobe wamangaliswa yimisebenzi kaJehova njalo wamhlonipha kakhulu. Wayemthanda uYise futhi efuna ukwenza izinto ezimthokozisayo. Lokhu kwamsiza ukuthi azimisele ukuhlala eqotho. Lathi kufanele simlingisele uJobe. Khathesi kunengi kakhulu esikwaziyo ngendalo kaJehova ukwedlula abantu abaphila ngesikhathi sikaJobe. Kanti njalo sileBhayibhili elisinceda simazi kuhle uJehova. Esikufunda endalweni kaJehova laseLizwini lakhe kwenza sibone ukuthi unguNkulunkulu omangalisayo. Ukubuka imisebenzi yakhe emangalisayo lokumhlonipha kuyasinceda ukuthi simthande, simlalele njalo kwenza sibe lesifiso esikhulu sokuhlala siqotho kuye.​—Jobe. 28:28. w19.02 5 ¶12

Ababusi bebelokhu behlukuluza abantu bakaJehova kusukela kudala. Bangasimangalela ngamacala atshiyeneyo, kodwa okuyikho okubacaphulayo yikuthi sikhetha ‘ukulalela uNkulunkulu umbusi kulokuthi silalele abantu.’ (ImiSeb. 5:29) Lanxa singaze sihlekwe, sibotshwe loba sitshaywe, uJehova uzasinceda ukuthi singaphindiseli futhi singavuki ngolaka. UHananiya, uMishayeli lo-Azariya basitshiyela isibonelo esihle. Bayichasisela kuhle inkosi beyitshela ukuthi kungani babengasoze basikhothamele isithombe eyayisenzile. Babezimisele ukwamukela loba yini uJehova ayezavumela ukuthi kwenzakale. (Dan. 3:1, 8-28) Sizakwenzani nxa silingwa ukuthi singalaleli uNkulunkulu? Kumele silingisele amaHebheru amathathu ngokuba ngabantu abathobekileyo futhi sithembe ukuthi uJehova uzasincedisa. (Hubo. 118:7) Nxa abantu besimangalela kufanele sibaphendule ngendlela emnene langenhlonipho. (1 Phet. 3:15) Kanti njalo kasisoze senze loba yini engaphambanisa ubungane esilabo loBaba wethu osithandayo. w19.02 10-11 ¶11-13

Esingakwenza ukuze sibe lesibindi yikucabangisisa ngethemba esalithola ngenxa yomhlatshelo wenhlawulo kaKhristu. (Joh. 3:16; Efe. 1:7) Nxa sekusele amaviki ukuthi iSikhumbuzo sifike, sithola ithuba elihle kakhulu lokunakana ngenhlawulo. Siyaphiwa amavesi okufanele siwabale ngesikhathi seSikhumbuzo. Ngakho woba leqiniso lokuthi uyawabala amavesi la asitshela okwenzakala kuJesu esezabulawa, ucabangisise ngawo. Kuzakuthi-ke nxa sesibuthana eSidlweni SeNkosi Sakusihlwa kube lula ukuzwisisa ukuthi iwayini lesinkwa esingelamvubelo kumelani kanye lokuthi umhlatshelo kaJesu uqakatheke kangakanani. Nxa singazwisisa lokho uJehova loJesu abasenzele khona lokuthi kusinceda njani thina lezihlobo zethu, ithemba lethu lizaqina. Kanti njalo sizakuba lesibindi sokubekezelela loba yibuphi ubunzima kuze kube sekucineni. (Heb. 12:3) Kuyasithokozisa ukuba loMphristi Omkhulu othobekileyo futhi olesibindi ngoba nguye osincengelayo phambi kukaNkulunkulu. (Heb. 7:24, 25) Yikho-ke kasitshengiseni ukuthi siyamlalela uJesu njalo siyambonga ngenhliziyo yonke ngokuba khona eSikhumbuzweni sokufa kwakhe.​—Luk. 22:19, 20. w19.01 22 ¶8; 23-24 ¶10-11

UJehova ufuna sonke simdumise. Nxa siphendula emihlanganweni yebandla siyabe sinikela “umhlatshelo wokudumisa” njalo akulamuntu ongasenzela lokho. (Heb. 13:15.) Kodwa uJehova kalindelanga ukuthi sonke sinikele ngomhlatshelo ofananayo. Imihlangano yebandla injengedili elimnandi esilikholisa labangane bethu. Ake sithi abanye abangane bakho ebandleni bahlela ukwenza idili, besebekucela ukuthi lawe ulungise okuthile ozabuya ukuphethe. Lanxa ubungakhathazeka kancane, kumele ukuthi ubuzakwenza konke okusemandleni akho ukuthi ubuye lokudla abazakukholisa bonke. Injalo lemihlangano yebandla. UJehova usilungisele itafula elezibiliboco esingazikholisa silabafowethu labodadewethu. (Hubo. 23:5; Mat. 24:45) Uyathokoza kakhulu nxa uphathela abazalwane bakho isipho esihle osilungiselele ngenhliziyo yonke. Ngakho lungiselela kuhle futhi ukhululeke ukuphendula nxa usemihlanganweni yebandla. Nxa ungenza njalo, uzakholisa ukudla etafuleni kaJehova njalo abafowenu labodadewenu bazathokoza besizwa izimpendulo zakho ozilungiselele kuhle. w19.01 8 ¶3; 13 ¶20

Ngezikhathi zeBhayibhili abantu babejayele ukuziphatha kubi kwezemacansini nxa bekhonza onkulunkulu bamanga. (Hos. 4:13, 14) Yikho abanengi babekuthanda ukukhonza okunjalo ngenxa yokuthi babefuna ukusuthisa izinkanuko zabo. Lanxa kunjalo, kabazange bayithole intokozo yeqiniso. UDavida wayeqinisile sibili lapho esithi ‘izinhlupho zalabo abagijimela abanye onkulunkulu zizakwanda.’ Phela babeze batshise abantwababo besenza imihlatshelo kubonkulunkulu babo. (Isaya. 57:5) UJehova wayesizonda isihluku esinjalo! (Jer. 7:31) Lalamuhla amasonto amanengi ayakwamukela ukuziphatha kubi kwezemacansini, aze avumele lobutabane. Abantu abenza izinto lezi bayabe bebona angathi bakhululekile kanti bayaziqila. (1 Khor. 6:18, 19) Mhlawumbe lawe uyakunanzelela ukuthi ‘inhlupho zabo ziyanda.’ Ngakho lina abasakhulayo mlaleleni ngenhliziyo yonke uYihlo osezulwini ngoba lokho yikho kuphela okuzakwenza liphumelele. Hlalani likhumbula ukuthi ukukholisa okwesikhatshana akuncedi ngalutho kodwa kudala inhlupho ezibuhlungu kakhulu.​—Gal. 6:8. w18.12 27-28 ¶16-18

Nxa umuntu otshadileyo angafeba, kuyabe sekumele omunye wakhe azikhethele ukuthi uzawuchitha yini umtshado kumbe uzamxolela. UJesu wathi owonelweyo uyabe esekhululekile ukuchitha umtshado abesetshada kutsha nxa efuna. (Mat. 19:9) Kodwa nxa engakhetha ukumxolela uyabe engaphambanisi ngoba lokho yikho kanye okwenziwa nguHoseya. Wayixolela inkosikazi yakhe futhi kwasekumele ihlale ithembekile. UHoseya kazange ‘embathe’ loGomeri okwesikhathi esithile. (Hos. 3:1-3) Kodwa kumele ukuthi ngemva kwalokho waqala futhi ukuya emacansini lomkakhe. Lokhu kwakutshengisa ukuthi uNkulunkulu wayezimisele ukuxolela abako-Israyeli aphinde abamukele ukuthi babe ngabantu bakhe. (Hos. 1:11; 3:4, 5) Indaba le yenza sizwisise ukuthi nxa umuntu otshadileyo angaya emacansini lomkakhe ofebileyo, uyabe etshengisa ukuthi usemxolele. (1 Khor. 7:3, 5) Nxa esekwenzile lokho, siyabe sesingasekho isizatho sokuthi achithe umtshado. Kuyabe sekumele bancedisane ukuqinisa umtshado wabo ukuze kukhanye ukuthi bayawuqakathekisa njengoJehova. w18.12 13 ¶13

Nxa utaditsha, cabangisisa ngokuthi okubalayo kungakusiza njani ukuthi wenze izinqumo ezinhle esikhathini esizayo. Ungenza njalo kuzaba lula ukuthi ukhethe ngendlela uJehova ayifunayo nxa usufikelwe yisimo obungasilindelanga. UJosefa wabaleka ngesikhathi umkaPhothifa emhuga ukuthi alale laye. Kuyini okwenza wenelisa ukubalekela isilingo leso? Kumele ukuthi wayehlala ecabangisisa ngokuthi uJehova ufuna umuntu otshadileyo athembeke kumkakhe. (Gen. 39:8, 9) Waphinda watshela umkaPhothifa wathi: “Pho ngingayenza kanjani into embi kanje ngenze isono kuNkulunkulu na?” Lokhu kutshengisa ukuthi wayevumela imicabango kaJehova imqondise kukho konke ayekwenza. Wena ungamlingisela njani? Kumele wenzeni nxa ungathunyelwa umlayezo loba umfanekiso wezemacansini kumbe nxa ungabona umuntu osebenza laye eseqala ukuzidlisa satshanyana kuwe edlala ngothando? Okungakunceda uhlale uqotho yikucabanga ngokuthi uJehova uthini ngezinto lezi lokuhlala ulungiselele ukuthi uzakwenzani nxa isilingo esinjalo singakwehlela. w18.11 25 ¶13-14

Ezinye izazi zithi ivesi le ingabe isitsho ukuthi, “Ngizakweqa ngithokoze ngenxa yeNkosi yami; ngizayeqayeqa ngikholise ngenxa kaNkulunkulu wami.” Lathi kuyasithokozisa ukwazi ukuthi uJehova usigcinele izithembiso ezinhle okwamagama lokuthi useqalisile ukuvula indlela yokuzigcwalisa. Kuyacaca-ke ukuthi isifundo esiqakatheke kakhulu esisithola ebhukwini likaHabakhukhi ngesokuthi simthembe uJehova. (Hab. 2:4) Ngakho kufanele siqinise ubuhlobo bethu laye ukuze senelise ukuhlala simthemba. Manje singakwenza njani lokho? Okokuqala, kufanele sihlale sithandaza kuJehova, simtshele konke okusikhathazayo. Okwesibili, kumele silalelisise konke asitshela khona esebenzisa iLizwi lakhe lenhlanganiso yakhe. Okwesithathu, kumele sihlale sithembekile kuJehova njalo simlindele ngesineke. Lokho yikho kanye uHabakhukhi akwenzayo. Lanxa waqalisa ibhuku lakhe ngamazwi aveza ukudabuka enhliziyweni, waliphetha ngamazwi atshengisa ukuthi wayesethokoza futhi eselethemba. Nxa singamlingisela uHabakhukhi, uJehova uBaba wethu osezulwini uzasigona asiduduze! Kambe singayithola ngaphi induduzo edlula leyo? w18.11 17 ¶18-19

UNkulunkulu “walithanda ilizwe waze wanikela iNdodana yakhe iyiyo yodwa ukuze kuthi loba ngubani okholwa kuyo angabhubhi kodwa abe lokuphila okungapheliyo.” (Joh. 3:16) Lokhu ngokunye okwenza amaKhristu eqiniso angathandabuzi ukuthi uJehova uyawathanda. LoJesu watshengisa ukuthi uyasithanda kakhulu ngokusifela futhi lokho kuyasiqinisa. ILizwi likaNkulunkulu lisitshela ukuthi akukho ‘okungasehlukanisa lothando lukaKhristu,’ kungelani lokuthi “yikuhlupheka kumbe ukudubeka.” (Rom. 8:35, 38, 39) Kwezinye izikhathi singacwila phakathi kosizi size sizizwe siphela amandla futhi singasakukholisi ukukhonza uJehova. Kodwa nxa singakhumbula ukuthi uKhristu usithanda kangakanani, sizakuba lamandla okubhensela ubunzima esikubo. (2 Khor. 5:14) Uthando lukaJesu lwenza sibekezele njalo singakhalali ukuphila lanxa sihlupheka ngenxa yokuhlukuluzwa, ukudana, ukukhathazeka enhliziyweni kumbe ukwehlelwa ngumonakalo wemvelo. w18.09 14 ¶8-9

Ukuvuma ukufundiswa nguJehova lokulalela konke asifundisa khona kuzasisiza ukuthi siqhubeke sihamba eqinisweni. Kumele siqakathekise iqiniso ukwedlula loba yini njalo silandele izimiso zeBhayibhili empilweni zethu. Kufanele sizimisele ukuqhubeka sihamba eqinisweni njengoDavida. Nxa singayekela ukwenza njalo sizaqala ukucabanga izinto esazitshiya emuva ngesikhathi sithola iqiniso size sicine sibuyela kuzo. Ngakho kasizameni ngamandla wonke ukusebenzisa konke esikufundiswayo futhi sikhumbule ukuthi kasizikhetheli ukuthi sifuna ukulalela kuphi sitshiye kuphi. Kumele sihambe “kulo lonke iqiniso.” (Joh. 16:13) Kuqakathekile ukuthi sisebenzise kuhle isikhathi sethu ukuze singaphambuki eqinisweni. Nxa singananzeleli singacina sesichitha isikhathi esinengi kakhulu sibukele i-TV, siku-inthanethi loba sizilibazisa ngokunye nje esikuthandayo. Akukubi sibili ukwenza izinto lezi kodwa kumele sinanzelele ngoba zingacina zisithathela isikhathi sethu sokutaditsha loba esokwenza okunye okuphathelane lokukhonza. w18.11 10 ¶7-8

Kuvele kunjalo empilweni, siyakhathazeka kakhulu futhi sihlulukelwe nxa izinto zingantshintsha singalindelanga. (Zaga. 12:25) Kwezinye izikhathi kuba nzima ukwamukela lolontshintsho. Pho singenzani ukuze ‘sipholise futhi sithulise’ umphefumulo wethu? (Hubo. 131:1-3) Lanxa inhlupho esiphakathi kwazo zingakhanya zingangentaba, “ukuthula kukaNkulunkulu” kungalinda izingqondo zethu ukuze sihlaliseke. (Flp. 4:6, 7) Ngakho nxa sesikhulelwa yikukhathazeka kufanele simcele uJehova ukuthi asincedise ngoba ukuthula kwakhe kungenza sizimisele ukuqhubeka simkhonza njalo singalahli ithemba. Kanti njalo umoya kaNkulunkulu uyasinceda ngokusikhumbuza imibhalo eqakathekileyo esisiza ukuthi siqhubeke sifaka uMbuso kuqala.​—Joh. 14:26, 27. w18.10 27 ¶2; 28 ¶5, 8

Yisiphi isikhali esilimaze wonke umuntu ngendlela ebuhlungu kakhulu? Ngamanga! Amanga yinkulumo engaqondanga ekhulunywa ngumuntu ngabomu ehlose ukukhohlisa omunye. Kanti ngubani owenza isikhali esiyingozi kangaka? NguSathane, yikho uJesu Khristu wambiza ngokuthi ‘unguyise wamanga.’ (Joh. 8:44) USathane wawakhuluma nini amanga akhe okuqala? Wawakhuluma kudaladala ensimini yase-Edeni. UNkulunkulu wayedale u-Adamu lo-Eva wabafaka endaweni enhle elipharadayisi. Bathi besazikholisela impilo wabe esethutshile uDeveli. Wayekwazi ukuthi uNkulunkulu wayebatshele ukuthi bangadli “isihlahla sokwazi okuhle lokubi” ukuze bangafi. Kodwa uSathane wafika waqambela u-Eva amanga esebenzisa inyoka, wathi: “Kalisoze life ngempela.” La yiwo amanga okuqala. Ngemva kwalokho waqhubeka ewahutshuza esithi: “Ngoba uNkulunkulu uyazi ukuthi lingasidla amehlo enu azavuleka, beselisiba njengoNkulunkulu, lazi okuhle lokubi.”​—Gen. 2:15-17; 3:1-5. w18.10 6 ¶1-2

Nxa sifuna ukuba lenhliziyo ehlanzekileyo kumele imicabango yethu lezifiso zethu kuhlanzeke njalo kube msulwa. Lokhu kuqakathekile ngoba yikho okwenza ukuthi uJehova ayamukele inkonzo esimenzela yona. (2 Khor. 4:2; 1 Tim. 1:5) Kodwa kutshoni ukuthi abahlanzekileyo enhliziyweni “bazabona uNkulunkulu” njengoba ‘engekho ongambona aphile?’ (Eks. 33:20) Ibala lesiGrikhi elihunyutshwe ngokuthi “bazabona” litsho “lokubona ngelihlo lengqondo, ukuzwisisa lokwazi.” Yikho labo ababona uNkulunkulu ‘ngamehlo ezinhliziyo’ yilabo abamazi mhlophe futhi abathanda ubuntu bakhe. (Efe. 1:18) Enye indlela esingambona ngayo uNkulunkulu yikukhangela lokho asenzela khona empilweni zethu. (Jobe. 42:5) Kanti njalo ‘amehlo ezinhliziyo zethu’ siwakhangelisa ezithembisweni ezinhle uNkulunkulu azazinika labo abazimisele ukuhlala behlanzekile futhi bemkhonza bethembekile. w18.09 20 ¶13, 15-16

UJehova uzasibusisa kakhulu nxa singaqhubeka sisenza okuhle. Lanxa kumele umuntu abe lolwazi ukuze ahlakaniphe, okutshengisa ukuthi uhlakaniphile yindlela asebenzisa ngayo lolo lwazi nxa esenza izinqumo. Phela lobunyonyo buhlakaniphile ngoba buyenelisa ukubuthelela ukudla kwabo ehlobo. (Zaga. 30:24, 25) UKhristu ‘uyikuhlakanipha kukaNkulunkulu’ futhi uhlala esenza izinto ezithokozisa uYise. (1 Khor. 1:24; Joh. 8:29) Lathi uNkulunkulu uzasibusisa nxa singahlala sithobekile njalo sitshengisa ukuthi sihlakaniphile ngokukhetha ukwenza lokho esikwaziyo ukuthi kuqondile. (Mat. 7:21-23) Ngakho yenza konke okusemandleni akho ukuze uncede abanye ebandleni ukuthi bakhonze uJehova bethobekile. Ukusebenzisa esikufundayo kuthatha isikhathi yikho kumele sibekezele. Lokhu kuzatshengisa ukuthi sithobekile futhi sizathokoza khathesi lasesikhathini esizayo. w18.09 7 ¶18

UJehova wathi edala abantu wayefuna baphile bengelasono futhi babambisane laye ukuze injongo yakhe igcwaliseke. Kodwa khathesi wonke umuntu ulesono. Loba kunjalo nxa sithembekile singenelisa ukusebenza loJehova nsuku zonke. Ngokwesibonelo, umsebenzi wokutshumayela lokwenza abafundi usivulela ithuba lokuba “yizisebenzi kanye loNkulunkulu.” (1 Khor. 3:5-9) Kuyisibusiso esikhulu ukusebenza loMdali wethu olamandla sisenza umsebenzi lo oqakatheke kakhulu kuye. Kodwa ukutshumayela lokwenza abafundi kayisiwo wodwa umsebenzi osinika ithuba lokusebenza loJehova. Ezinye izindlela esingasebenza ngazo loJehova, zigoqela ukuncedisa izimuli zethu labazalwane esikhonza labo, ukwamukela izihambi, ukuphathisa emisebenzini eyenziwa yinhlanganiso kanye lokuthuthukisa inkonzo yethu. (Kol. 3:23) Iminwe kayilingani. Yikho ungaqathanisi lokho okwenzela uJehova lalokho abanye abakwenzayo. Phela abanye bethu sebebadala, abanye basesebatsha, abanye baqinile emzimbeni kodwa abanye kabaphilanga futhi sonke sileziphiwo ezitshiyeneyo. w18.08 23 ¶1-2

UJehova wamqinisekisa uHabakhukhi ukuthi wayezazithola izimpendulo zemibuzo eyayimkhathaza. Kwasekuseduze ukuthi ububi buphele. Kwakungani uJehova uthi kumphrofethi wakhe: “Bekezela futhi ungithembe. Ngizakuphendula lanxa kungakhanya angathi ngiyaphuza!” Wamkhumbuza ukuthi wayezagcwalisa izithembiso zakhe ngesikhathi sakhe asikhethileyo, wamkhuthaza lokuthi akulindele ukugcwaliseka kwenjongo yakhe. Ekucineni umphrofethi lo wayezathokoza ebona ayekufisa sekusenzakala. Ukulindela uJehova ngesineke lokulalela konke asitshela khona kuzakwenza sibe lesibindi njalo kuzasisiza singakhathazeki kakhulu lanxa sisehlelwa zinhlupho. UJesu laye wathi simthembe uJehova ngoba unguMgcini Wesikhathi Omkhulu njalo singakhathazeki ‘ngezikhathi lezinsuku’ angakazivezi ebantwini. (ImiSeb. 1:7) Yikho-ke kasingalahli ithemba kodwa kasizithobeni, sibe lokholo njalo sibekezele. Kasisisebenziseni kuhle isikhathi esiseleyo ukuze sikhonze uJehova ngamandla ethu wonke.​—Mak. 13:35-37; Gal. 6:9. w18.11 16 ¶13-14

UPhetro wayengumJuda njalo wayekhule etshelwa ukuthi abantu beZizweni bangcolile. Kodwa ngalesosikhathi kwasekwenzakale izinto ezithile ezasezintshintshe indlela ayecabanga ngayo. Ngokwesibonelo, wayesebone umbono omangalisayo. (ImiSeb. 10:9-16) NjengoPhetro, kufanele sizihlolisise ngelihlo elibukhali njalo sivume ukuthi abanye basincedise ukuze sibone ukuthi kasilalo yini ubandlululo enzikini yezinhliziyo zethu. Kodwa kukhona okunye esingakwenza. Nxa singazivula ngokupheleleyo izinhliziyo zethu, sizabathanda abanye kulokuthi sibabandlulule. (2 Khor. 6:11-13) Kungenzakala ukuthi abanye bethu sikhetha ukuba lobudlelwano labantu bomhlobo wethu kuphela kumbe abavela elizweni lethu loba abakhuluma ulimi esilukhulumayo. Nxa lawe unjalo, vula inhliziyo yakho. Zama ukunxusa abazalwane beminye imihlobo ukuthi bahambe lawe ekutshumayeleni kumbe ukuthi bakuvakatshele emzini wakho lizokudla ndawonye kumbe lizokwejisa nje. (ImiSeb. 16:14, 15) Nxa ungenza njalo, ubandlululo luzaphela nya enhliziyweni yakho ngoba iyabe isiphuphuma uthando. w18.08 9 ¶3, 6; 10 ¶7

Abanye oFakazi benza izinto ezitshengisa ukuthi abakatshiyani lezindlela zomhlaba lo. Ukugida kwabo lezenzo zabo nxa besemibuthanweni ethize kakutshengisi ukuthi bangamaKhristu. Kanti njalo imifanekiso abayifaka kwezokuxhumana lamazwi abawabhalayo awatshengisi ukuthi bayizikhonzi zikaJehova. Izinto abazenzayo ziphambanisa ontanga yabo abazama ngamandla ukuthokozisa uJehova. (1 Phet. 2:11, 12) Umhlaba lo ukhuthaza abantu ukuthi baqakathekise “izinkanuko zabantu abalezono​—ukulangazela kwamehlo kanye lokuzigqaja ngezimpahla.” (1 Joh. 2:16) Kodwa thina singabakaJehova njalo sikhuthazwa ukuthi sithi “hayi ekweyiseni uNkulunkulu lasezinkanukweni zasemhlabeni, njalo siphile ngokuzikhuza, ngokuqonda empilweni yokulalela uNkulunkulu ngesikhathi samanje.” (Tit. 2:12) Kumele izenzo zethu zikwenze kucace ukuthi sizinikele kuJehova kuphela. Lokhu kugoqela izinto esizikhulumayo, indlela esidla ngayo lesinatha ngayo, ukugqoka kwethu lokuzilungisa kanye lendlela esisebenza ngayo. w18.07 25 ¶13-14

Nxa singakhathazeka kakhulu ngamaphutha abanye siyacina sisusa amehlo ethu kuJehova njalo siphambanise ubuhlobo bethu laye. Lokhu kumele sikunanzelele ikakhulu nxa siphathiswe imisebenzi ethile enhlanganisweni njengoMosi. Ngakho kumele sisebenze nzima njalo silalele uJehova ukuze sisindiswe. (Flp. 2:12) Nxa uphathiswe imisebenzi eminengi enhlanganisweni kumele wazi ukuthi uJehova ukhangelele okunengi kuwe. (Luk. 12:48) Nxa simthanda sibili uJehova kasisoze sivumele loba yini ukuthi isiphambanise loba isehlukanise lothando lwakhe. (Hubo. 119:165; Rom. 8:37-39) Siphila ezikhathini ezinzima kakhulu. Ngakho kasiqhubekeni sikhangelise amehlo ethu kulowo “osesihlalweni sobukhosi emazulwini” ukuze senelise ukunanzelela intando yakhe njalo siyenze. (Hubo. 123:1) Singavumeli amaphutha abanye aphambanise ubuhlobo bethu loJehova. w18.07 16 ¶19-20

Kuyasithokozisa kakhulu ukuzwa imibiko emihle ephathelane lomsebenzi owenziwayo enhlanganisweni. Ngo-2017 sifunde iBhayibhili labantu abedlula 10 miliyoni. Lokhu kutshengisa ukuthi abantu bakaJehova bazimisele ukwenza ukukhanya kwabo kukhanye. Kanti njalo izigidi zabantu zahlanganyela kanye lathi embuthanweni wokunanza iSikhumbuzo sokufa kukaJesu. Ukuba khona kwabo eSikhumbuzweni kwabanika ithuba lokufunda ngothando uNkulunkulu asitshengisa lona lapho enikela ngeNdodana yakhe. (1 Joh. 4:9) Emhlabeni jikelele oFakazi bakaJehova bakhuluma indimi ezitshiyeneyo. Kodwa lokhu akusivimbi ukuthi sinikele umhlatshelo wokubonga kuBaba wethu uJehova simanyene. (Isam. 7:9) Kungelani lokuthi sikhuluma limi bani kumbe ukuthi sihlala ngaphi siyenelisa ukuqhubeka sicwebezela “njengezinkanyezi emkhathini.” (Flp. 2:15) Ukukhuthala enkonzweni lokumanyana kwethu kanye lokuhlala silindile kuletha udumo kuJehova. w18.06 21 ¶1-3

UJesu wakukholisa ukuxoxa lowesifazana ongumSamariya okokuthi abafundi bakhe bathi bemphathela ukudla yena wathi ukudla kwakhe yikwenza intando kaYise. (Joh. 4:32-34) UJakhobe loJohane abazange bathole isifundo kulokho okwenziwa nguJesu. Ngelinye ilanga babehamba loJesu bedabula eSamariya njalo bafika emzini othile bacela indawo yokulala. Kodwa amaSamariya kawazange avume ukubanika indawo yokulala. Lokhu kwabacaphula uJakhobe loJohane baze batshela uJesu ukuthi abize umlilo uvele ezulwini uqothule bonke abantu kuleyondawo. UJesu wabakhuza ngamazwi alamandla. (Luk. 9:51-56) UJakhobe loJohane babezazonda kangaka yini aluba lokhu kwakwenziwe ngabantu bakibo eGalile? Kukhanya ubandlululo yilo olwaqubula inzondo yabo baze bafuna ukubulala abantu laba. Ngemva kwesikhathi umphostoli uJohane wafika eSamariya etshumayela futhi wemukelwa ngazo zombili. Kumele ukuthi wayangeka lapho ecabanga ukuthi wake wazonda waze wafisa ukuthi umlilo uqothule amaSamariya.​—ImiSeb. 8:14, 25. w18.06 10-11 ¶12-13

Nxa singagxilisa iqiniso eliseBhayibhilini ezinhliziyweni zethu kuzakuba lula ukuthi senze okuhle njalo sikhulume iqiniso ngazo zonke izikhathi. Kungani kumele sikubalekele ukukhuluma amanga? Kungenxa yokuthi amanga yisikhali sikaSathane esiphumelela kakhulu. Amanga alimaza owakhulumayo lalowo owatshelwayo. (Joh. 8:44) Ngakho kumele sizame ngamandla wonke ukubalekela umkhuba wokukhuluma amanga. (Efe. 4:25) Kodwa lokhu akulula. U-Abigail oleminyaka engu-18 uthi: “Kwezinye izikhathi ukukhuluma iqiniso kungakhanya kungancedi ikakhulu nxa ubona ukuthi ukuqamba amanga kungakwenza uphunyuke ebunzimeni.” Pho kuyini okwenza ukuthi sikhulume iqiniso? UVictoria oleminyaka engu-23 yena uthi: “Ukukhuluma iqiniso kanye lokumela lokho okukholwayo kungenza abanye bakuphathe kubi kodwa kulempumela emihle. Kwenza ube lesibindi, usondele kuJehova njalo kwenza abantu abakuthandayo bakuhloniphe.” Siyabona-ke ukuthi kuyanceda kakhulu ukuthi sigcine “ibhanti leqiniso libotshelwe ngensimbi ekhalweni” zikhathi zonke. w18.05 28 ¶3, 5

Kuqakathekile ukuthi sihlale siphapheme njengoba sibona izinto ziqhubeka zisiba zimbi kakhulu emhlabeni. UJehova uzathatha inyathelo ngesikhathi esifaneleyo. (Mat. 24:42-44) Okwakhathesi kumele sibekezele njalo siqhubeke silindile. Kufanele sibale iBhayibhili nsuku zonke njalo singayekeli ukuthandaza zikhathi zonke. (1 Phet. 4:7) Okunye esingakwenza yikulingisela izibonelo zabafowethu labodadewethu asebeleminyaka eminengi belindile futhi besenza ukukhanya kwabo kukhanye. Hlala ukhuthele ekukhonzeni, wenzele abanye okuhle njalo uzinike isikhathi sokuba ndawonye labafowethu labodadewethu. Lokhu kuzakwenza uhlale uthokoza njalo ube ledlabuzane lokuqhubeka ulindile. (Efe. 5:16) Kusiqinisa ukholo ukwazi ukuthi uJehova uyasivumela ukuthi simkhonze lanxa silesono. Ngakho uyasisiza ukuthi senze njalo esebenzisa abadala bebandla. IBhayibhili libachaza ngokuthi ‘yizipho ebantwini.’ (Efe 4:8, 11, 12) Nxa abadala bangakuvakatshela zimisele ukufunda kubo ukuze uthole inhlakanipho njalo usebenzise amacebo abakunika wona. w18.06 24-25 ¶15-18

UJesu kazange atshele abafundi bakhe ukuthi babe sethandweni lwakhe kuphela. Kodwa wagcizelela ukuthi ‘bahlale othandweni lwakhe.’ Kungani watsho njalo? Wayekwazi ukuthi abalandeli bakhe kwakuzamele babekezele nsuku zonke ukuze bahlale bethembekile. KuJohane 15:4-10 uJesu walisebenzisa kanengi ibala elithi “hlalani” ukuze asize abalandeli bakhe babone ukuthi ukubekezela kuqakathekile. Singatshengisa njani ukuthi sifuna ukuhlala sisethandweni lukaKhristu njalo siqhubeke singabangane bakhe? Lokhu singakwenza ngokulalela imilayo yakhe. Ngamanye amazwi uJesu usicela ukuthi silingisele lokho ayekwenza. Wathi: “Njengoba lami ngilalele imilayo kaBaba ngihlala ngisothandweni lwakhe.” UJesu wasitshiyela isibonelo. (Joh. 13:15) Ngakho nxa silalela umlayo wokutshumayela esawunikwa nguJesu siyabe sitshengisa ukuthi siyamthanda uJehova ngoba imilayo kaJesu ivela kuYise. (Mat. 17:5; Joh. 8:28) Ukuthanda uJehova loJesu kuzakwenza basithande njalo sizahlala sisethandweni lwabo. w18.05 18 ¶5-7

Abasakhulayo kumele benze izinqumo eziphathelane lemfundo, imisebenzi kanye lezinye izinto eziqakathekileyo empilweni. Ukwenza izinqumo kuba lula nxa uvele uhlelile ofuna ukukwenza. Yikho kuqakathekile ukuthi umuntu ahlale phansi ahlele afuna ukukwenza ukuze aphumelele. Siyababonga bonke abasakhulayo abathanda uJehova. Kuyajabulisa ukubabona beqhubeka benamathele kuye futhi besenza imisebenzi ephathelane lokukhonza. Bayayikholisa sibili impilo njalo bazimisele ukulandela iziqondiso ezivela kuJehova nxa besenza izinqumo eziphathelane lemuli. USolomoni wathi: “Themba kuJehova ngenhliziyo yakho yonke. . . . Mvume kuzo zonke izindlela zakho, yena uzaqondisa zonke izindlela zakho.” (Zaga. 3:5, 6) UJehova uyalithanda lonke elisakhulayo elisebandleni lobuKhristu njalo uzimisele ukulivikela, ukuliqondisa kanye lokulibusisa. w18.04 26 ¶7; 27 ¶9

Umphostoli uJohane waba lusizo kakhulu ebandleni lobuKhristu. Sekwedlule iminyaka eminengi iVangeli likaJohane likhuthaza amaKhristu futhi lathi lamuhla liyasikhuthaza. Ngokwesibonelo yilo kuphela elilamazwi kaJesu aphathelane lokuthi abalandeli bakhe beqiniso bazakhanya ngokuba lothando. (Joh. 13:35) UJohane waphinda wabhala izincwadi ezintathu futhi kunengi esikufunda kuzo. Kwezinye izikhathi siyadana ngenxa yamaphutha esiwenzayo kodwa siyaduduzeka nxa sibala ukuthi ‘igazi likaJesu liyasihlambulula ezonweni zonke.’ (1 Joh. 1:7) Ikanti nxa siqhubeka sizisola ngenxa yalokho esakuphambanisayo amazwi athi “uNkulunkulu mkhulu kakhulu kulezinhliziyo zethu” ayasiduduza futhi asenze sihlaliseke. (1 Joh. 3:20) UJohane nguye kuphela owabhala ukuthi “uNkulunkulu uluthando.” (1 Joh. 4:8, 16) Kanti njalo encwadini yakhe yesibili leyesithathu uyabancoma bonke abaqhubeka ‘bephila ngokumayelana leqiniso.’​—2 Joh. 4; 3 Joh. 3, 4. w18.04 18 ¶14-15