September

Ukusebenza nzima kukaJehova loJesu kutsho ukuthi akusamelanga siphumule yini? Hatshi. UJehova kadinwa yikho akudingeki ukuthi aphumule. Kodwa iBhayibhili liyatsho ukuthi wathi esedale amazulu lomhlaba “waphumula.” (Eks. 31:17) Lokhu kutsho ukuthi wama ukudala ukuze abuke ubuhle balokho ayekwenzile. Ngesikhathi uJesu esemhlabeni wayesiba leqiniso lokuthi uyaphumula futhi akholise ukudla labangane bakhe lanxa wayesebenza nzima. (Mat. 14:13; Luk. 7:34) IBhayibhili likhuthaza abantu bakaNkulunkulu ukuthi bakuthande ukusebenza. Akumelanga bavilaphe kodwa kumele bakhuthale emsebenzini. (Zaga. 15:19) Engxenye uyasebenza ukuze wondle imuli yakho. Kanti njalo abafundi bakaKhristu bonke balomsebenzi wokutshumayela izindaba ezinhle. Lanxa kunjalo kumele uphumule okwaneleyo. w19.12 2 ¶2; 3 ¶4-5

Ungaxoxeli abanye indaba zamadimoni. Kumele silingisele uJesu endabeni le. UJesu esasezulwini wayesazi okunengi ngoSathane lamadimoni. Kodwa esesemhlabeni kazange akhulume ngalokho okwakwenziwe yizidalwa zomoya ezimbi. Wayefundisa abantu ngoJehova hatshi ngoSathane. Lathi kumele simlingisele ngokungahambi sifafaza izindaba ezimayelana lamadimoni. Sitshengisa ngesikutshoyo ukuthi “izinhliziyo zethu ziyagubhazela ngendaba [“enhle,” NWT]” eliqiniso. (Hubo. 45:1) Ungazesabi izidalwa zomoya ezimbi. Emhlabeni lo singehlelwa yizinto ezimbi. Izingozi lokugula loba ukufa kungafika silibele. Pho sekumele sicabange ukuthi yizidalwa zomoya ezibangela izinto ezinje yini? Phela iBhayibhili lithi “abantu bafikelwa yizikhathi ezimbi ezibafikela belibele.” (UmTshu. 9:12) UJehova wenze kwakhanya ukuthi amandla akhe adlula khatshana awamadimoni. w19.04 23-24 ¶13-14

Abadala bayayilandela yini imithetho yelizwe ethi abantu kumele babikele iziphathamandla ngokuhlukuluzwa kwabantwana? Ye. Kwamanye amazwe kulemithetho enjalo futhi abadala bayayilandela. Imithetho le kayiphikisani lomthetho kaNkulunkulu. (ImiSeb. 5:28, 29) Yikho abadala bahle bathintane lewofisi yegatsha bengezwa udletshana lokuthi umntwana engabe ehlukuluziwe ukuze bazi ukuthi bangayilandela njani imithetho yelizwe ephathelane lokubika indaba enjalo. Abadala batshela abantwana abahlukuluziweyo labazali babo kanye labanye abayaziyo indaba yokuhlukuluzwa ukuthi balelungelo lokuyayibika kuziphathamandla. Kodwa ake sithi omangalelwayo ngomunye umuntu osebandleni futhi indaba le icina isisaziwa emphakathini. UmKhristu oyibikileyo kumele acabange ukuthi ungcolise ibizo likaNkulunkulu yini? Hatshi. Lowo ohlukuluze umntwana nguye ongcolise ibizo likaNkulunkulu. w19.05 10 ¶13-14

IBhayibhili lithi abatshadileyo kumele bahloniphane njalo bagcine izifungo zomtshado. Libakhuthaza ukuthi bazimisele ukuhlala bonke okwempilo yabo yonke, lithi: “Indoda izadela uyise lonina imanyane lomkayo, bona babe nyamanye.” (Gen. 2:24) Kodwa abalandela inhlakanipho yomhlaba lo balombono ophikisana lalokho okutshiwo liBhayibhili. Bathi umuntu otshadileyo kumele abe lendaba lalokho okufunwa nguye kuphela hatshi okufunwa ngomunye wakhe. Elinye ibhuku elikhuluma ngokuchitha umtshado lithi: “Abatshadayo bajayele ukufunga besithi ‘uma nje sonke sisaphila’ kodwa kweminye imitshado amazwi la bayawantshintsha bathi ‘uma nje sonke sisathandana.’” Umbono lo wokungaqakathekisi umtshado usubangele ukuthi abatshadileyo behlukane njalo bezwe ubuhlungu obukhulu. Kuyazikhanyela sibili ukuthi umbono womhlaba ngomtshado uyibuthutha. w19.05 23 ¶12

UPhawuli wayekhathazekile ngoba kukhanya amanye amaKhristu ayesephanjaniswa yimicabango eyingozi kanye lokuhlakanipha komhlaba kaSathane. (Efe. 4:17-19) Okwenzakala kumaKhristu lawo kungenzakala lakithi. USathane ngumbusi womhlaba lo futhi angasebenzisa izinto ezitshiyeneyo ukuze aphambanise indlela esicabanga ngayo. Ngokwesibonelo, angasebenzisa isifiso esingabe silaso sokuba ngabantu abadumileyo ukuze asiphambule kuJehova. Kanti njalo angasebenzisa izinto esazifunda ngekhaya, esikolo kumbe ebantwini esiphila labo ukuze asenze sicabange ngendlela afuna sicabange ngayo. Manje singenelisa yini ukususa izinto “eziqine njengezinqaba” ezisengqondweni zethu? (2 Khor. 10:4) IBhayibhili liphendula lisithi: “Sidiliza imicabango layo yonke into ephakemeyo ephikisana lolwazi oluphathelane loNkulunkulu njalo sithumba yonke imicabango ukuze siyenze ilalele uKhristu.” (2 Khor. 10:5) Amazwi la atshengisa ukuthi singenelisa sibili ukususa imicabango emibi sincediswa nguJehova. w19.06 8 ¶1-3

Lanxa uHana, uDavida lomhubi babekhathazekile bathemba uJehova ukuthi abancedise. Bakhuleka kuye bemtshela okubahluphayo. Bamtshela konke okwakubenza bakhathazeke futhi kabazange bayekele ukuyakhonza endlini kaJehova. (1 Sam. 1:9, 10; Hubo. 55:22; 73:17; 122:1) UJehova wazitshengisa uzwelo izinceku zakhe. Wanceda uHana ukuthi ahlaliseke. (1 Sam. 1:18) UDavida wabhala wathi: “Umuntu olungileyo angaba lezinhlupheko ezinengi, kodwa uJehova uyamkhulula kuzo zonke.” (Hubo. 34:19) Umhubi yena wathi uJehova ‘wayembambe isandla sakhe sokunene’ emkhokhela ngokweluleka okulothando. (Hubo. 73:23, 24) Kuyini esikufundayo ezibonelweni lezi? Ngezinye izikhathi sizakwehlelwa zinhlupho ezinkulu ezizasenza sikhathazeke. Kodwa singenelisa ukubekezela nxa singacabangisisa ngendlela uJehova ancedise ngayo abanye futhi simthembe ngokuthandaza langokulalela lokho athi sikwenze.—Hubo. 143:1, 4-8. w19.06 17 ¶14-15

Ungavumeli loba yini etshiwo kumbe yenziwe ngabanye ikwenze ube lenhloni zokuthi unguFakazi kaJehova. (Mik. 4:5) Singenelisa ukunqoba ukwesaba abantu ngokuhlola lokho okwenziwa ngabaphostoli eJerusalema uJesu esanda kubulawa. Babekwazi ukuthi abakhokheli benkolo babebazonda kakhulu. (ImiSeb. 5:17, 18, 27, 28) Lanxa kunjalo baqhubeka besiya ethempelini nsuku zonke futhi kabazifihlanga ukuthi bangabafundi bakaJesu. (ImiSeb. 5:42) Kabazange babengamagwala. Lathi sizakunqoba ukwesaba abantu nxa singahlala siziveza ukuthi singoFakazi bakaJehova ebantwini esisebenza labo, esikolo lasemphakathini. (ImiSeb. 4:29; Rom. 1:16) Kuyini okwenza abaphostoli bathokoza? Babekwazi ukuthi kungani babezondwa futhi babekubona kuyisibusiso ukuphathwa kubi ngenxa yokwenza intando kaJehova. (Luk. 6:23; ImiSeb. 5:41; 1 Phet. 2:19-21) Nxa sikwazi ukuthi abantu basizondela ukwenza okulungileyo kasisoze siyekele ukukhonza uJehova. w19.07 7 ¶19-20

UJesu labalandeli bakhe abangamaJuda babeligcina iSabatha ngenxa yokuthi babengaphansi koMthetho kaMosi. Kodwa uJesu watshengisa ngayekutsho layekwenza ukuthi kwakuqondile ukutshengisa abanye umusa lokubenzela izinto ezinhle ngelanga leSabatha. (Mat. 12:9-11) Wayengakuboni kuyinto embi ukutshengisa abanye umusa lokubanceda ngeSabatha. Okwenziwa nguJesu kwatshengisa ukuthi wayesizwisisa isizatho esiqakatheke kakhulu esenza uNkulunkulu wathi abantu bakhe baphumule ngeSabatha. Abantu bakaNkulunkulu babesenelisa ukwenza izinto eziphathelane lokukhonza ngenxa yokuthi ngelanga leSabatha babephumula emisebenzini ababeyenza nsuku zonke. UJesu wakhulela emulini eyayisenza izinto eziphathelane lokukhonza ngelanga leSabatha. Ubufakazi balokhu sibubona kulokho esikutshelwa ngaye ngesikhathi esedolobheni langakibo eNazaretha. “Njengenjayelo [uJesu] wangena esinagogeni ngelanga leSabatha, wasukuma ukuze abale.” (Luk. 4:15-19) Kanti njalo abafundi bakhe babelihlonipha kakhulu iSabatha. Yikho bama ukulungisa amakha lamafutha anukelelayo okugcoba isidumbu sikaJesu iSabatha laze ledlula.—Luk. 23:55, 56. w19.12 4 ¶10

UmKhristu ngamunye uyancedisa emsebenzini wokudinga labo abalesifiso sokufunda iBhayibhili. Umsebenzi lo singawufanisa labantu abadinga umntwana olahlekileyo. Kungani sisitsho njalo? Cabanga ngalokho okwake kwenzakala ngesikhathi umfanyana oleminyaka emithathu aze alahleke. Abantu angaba ngu-500 baphuma ijumo besiyamdinga. Kwathi sekudlule amahora angaba ngu-20 elahlekile enye indoda yamthola ensimini yomumbu. Indoda le yala ukwamukela udumo lanxa kwakuyiyo ethole umfanyana. Yathi: “Umfana utholakele ngenxa yokuthi sonke siphume sisiyamdinga.” Abantu abanengi bafanana lomfanyana lo, balahlekile. Abalathemba yikho kumele sibasize. Sonke oFakazi abedlula 8 miliyoni sisebenza ndawonye sizama ukudinga labo abafaneleyo. Lanxa wena ungeke umthole umuntu ofuna ukufunda iqiniso eliseLizwini likaNkulunkulu, abanye abamemezeli abasensimini okuyo bangamthola. Nxa umfowethu kumbe udadewethu angancedisa umuntu ukuthi abe ngumfundi kaKhristu, bonke abancedise emsebenzini wokudinga bayathokoza kakhulu. w19.07 16-17 ¶9-10

Umphostoli uPhawuli wakhumbuza amaKhristu aseFiliphi ukuthi kwakumele aqinisele emncintiswaneni. Ibandla lelo lathi lisanda kubunjwa lahle laqalisa ukuhlukuluzwa. Ngomnyaka ka-50 C.E., uPhawuli loSila balalela umlayo ovela kuNkulunkulu wokuthi ‘bachaphele eMakhedoniya.’ Yikho bahamba eFiliphi besiyatshumayela izindaba ezinhle. (ImiSeb. 16:9) Bathola owesifazana okuthiwa nguLidiya ‘owalalelayo futhi uJehova wayivula kakhulu inhliziyo yakhe.’ (ImiSeb. 16:14) ULidiya wahle wabhabhathizwa yena labo bonke ababehlala endlini yakhe. Kodwa uDeveli kazange agoqe izandla. Abantu bahudulela uPhawuli loSila kubomantshi njalo babethesa icala lokuthi baphambanisa idolobho. UPhawuli loSila batshaywa, babotshwa futhi ngemva kwesikhathi bacelwa ukuthi basuke edolobheni lelo. (ImiSeb. 16:16-40) Bakhalala yini? Ngitsho lakancane. Abafowethu labodadewethu ababesebandleni leli elalisanda kubunjwa bona benzani? Benza kuhle sibili ngoba labo baqinisela, abazange bakhalale. Akuthandabuzwa ukuthi bakhuthazwa kakhulu yisibonelo esihle sikaPhawuli loSila. w19.08 2 ¶1-2

Akuthandabuzwa ukuthi ‘izithelo zokulunga’ zigoqela ukuthanda uJehova kanye labantu bakhe lokutshela abanye ngokholo lwethu kuJesu lethemba elihle esilalo. ‘Sigcwaliswa ngezithelo zokulunga’ nxa sikhuthele emsebenzini lo oqakathekileyo. (Mat. 28:18-20) Kungelani lesimo esikuso singenelisa ukukhazimula njengezibane. Ngezinye izikhathi okungakhanya kusivimbela ukuthi sitshele abanye izindaba ezinhle kungasivulela ithuba lokutshumayela. Ngokwesibonelo, umphostoli uPhawuli wayebotshiwe eRoma ngesikhathi ebhalela abaseFiliphi incwadi. Lanxa kunjalo kazange ayekele ukutshumayeza ababemlinda lababemvakatshela. Watshumayela ngentshiseko kungelani lezimo ayekuzo njalo lokhu kwaqinisa abazalwane kwabapha lesibindi “sokukhuluma ilizwi likaNkulunkulu bengesabi.”—Flp. 1:12-14; 4:22. w19.08 12 ¶15-16

Isizatho esiqakatheke kulazo zonke esenza sithobeke yikuthi sifuna ukuthokozisa uJehova. Umphostoli uPhetro wakucacisa lokhu lapho ebhala amazwi asembhalweni walamuhla. Ibhuku elithi ‘Woza Ube Ngumlandeli Wami’ kusahluko 3 indima 23 lichasisa amazwi kaPhetro lisithi: “Ukuzidla kufana noshevu. Kungadala umonakalo. Kuyimfanelo engenza umuntu oneziphiwo kunabo bonke angabi yilutho kuNkulunkulu. Kanti ukuthobeka kungenza ngisho nomncane kunabo bonke abe usizo olukhulu kuJehova. . . . UNkulunkulu . . . uyokujabulela ukukuvuza nawe ngokuthobeka kwakho.” Kambe kukhona yini okungcono kulokuthokozisa inhliziyo kaJehova? (Zaga. 23:15) Ukuthobeka kuyasinceda langezinye izindlela. Ngokwesibonelo, abanye bayasondela kithi nxa sithobekile. Kungani sisitsho njalo? Sitsho njalo ngoba lathi siyakukholisa ukuba labantu abanjalo.—Mat. 7:12. w19.09 4 ¶8-9

Abadala basebenza nzima ukuze bancede abafowabo labodadewabo futhi abaziboni bengcono kulabo ngenxa yamandla abawaphiweyo. Babaphatha kuhle abanye ebandleni. (1 Thes. 2:7, 8) Bakhuluma kuhle labo ngoba bathobekile futhi bayabathanda sibili. U-Andrew oselesikhathi eside engumdala uthi: “Sengananzelela ukuthi abafowethu labodadewethu bayamthanda umdala olomusa njalo okulula ukukhuluma laye. Kubalula ukuthi ibandla libambisane labadala abanje.” UTony, laye oselesikhathi eside engumdala uthi: “Ngiyazama ukusebenzisa iseluleko esikuFiliphi 2:3 futhi ngiyazama ngaso sonke isikhathi ukubona abanye bengcono kulami. Lokhu kuyanginceda ukuthi ngingababambi ngamandla ukuthi bangilalele.” Abadala kumele bathobeke njengoJehova. Lanxa uJehova enguMbusi wendawo yonke ‘uyakhothama’ avuse “abampofu othulini.” (Hubo. 18:35; 113:6, 7) IBhayibhili liphinda lithi uyabazonda abazigqajayo labazikhukhumezayo. w19.09 16-17 ¶11-12

Nxa sifuna ukuvuselelwa lijogwe likaJesu kumele senze izinto ngendlela eqondileyo. Senza umsebenzi kaJehova yikho kumele siwenze ngendlela yakhe. Thina siyizisebenzi, uJehova nguye iNkosi. (Luk. 17:10) Nxa singazama ukwenza umsebenzi wakhe ngendlela yethu siyabe sizithwalisa nzima kakhulu. Kodwa nxa singenza umsebenzi kaJehova ngendlela yakhe sizenelisa ukwenza izinto ebesicabanga ukuthi ngeke senelise ukuzenza njalo sinqobe lobunzima ebesibona angani ngeke sibunqobe. Khumbula ukuthi akulamuntu ongavimba ukuthi intando kaNkulunkulu igcwaliseke. (Rom. 8:31; 1 Joh. 4:4) Sifuna ukudumisa uBaba wethu osithandayo uJehova. Ngesikhathi uJesu elapha emhlabeni abantu ababeyizihwaba kumbe ababezifunela okwabo bacina bengathokozi futhi batshiya ijogwe likaJesu. (Joh. 6:25-27, 51, 60, 66; Flp. 3:18, 19) Kodwa labo ababethanda uNkulunkulu labomakhelwane bazimisela ukulithwala okwempilo yabo yonke besemhlabeni, belethemba lokuyabusa loKhristu ezulwini. Nxa singabalingisela sizahlala sithokoza ngoba siyabe sithwala ijogwe likaJesu silenhloso enhle. w19.09 20 ¶1; 24-25 ¶19-20

Cabanga ngezibusiso ozikholisayo ngenxa yokukhululwa ezimfundisweni zamanga. Inkululeko le iyasithokozisa kakhulu. Esikhathini esizayo sizathola inkululeko enkulu. Sekuseduze ukuthi uJesu atshabalalise inkolo yamanga kanye labohulumende babantu. UNkulunkulu uzavikela “ixuku elikhulu” elimkhonzayo futhi lizakholisa izibusiso emhlabeni olipharadayisi. (Isam. 7:9, 14) Kuzavuswa abantu abanengi njalo bazakhululwa esonweni sika-Adamu kanye lalokho esikubangeleyo. (ImiSeb. 24:15) Phakathi kokubusa kukaJesu kweminyaka eyinkulungwane, yena lalabo azabusa labo bazanceda abantu babe lempilakahle futhi babe ngabangane abaseduze kakhulu loJehova. Ngesikhathi leso izinto zizabuyiselwa kulokho uNkulunkulu ayekuhlosile lapho edala abantu futhi uzabanika inkululeko ehambelana leyeJubhili lama-Israyeli. Lokhu kutsho ukuthi bonke abantu abakhonza uJehova beqotho bazabe sebephelele, sebengasenzi isono. w19.12 12-13 ¶14-16

Ngesikhathi sabaphostoli kwakulendoda eyayiphana okuthiwa nguJosefa (eyayisaziwa langokuthi nguBhanabha) eyayizimisele ukusetshenziswa nguJehova. (ImiSeb. 4:36, 37) Ngesikhathi uSawuli esiba ngumKhristu abazalwane abanengi babemesaba ngenxa yokuthi wayeke wahlukuluza abalandeli bakaJesu. Kodwa uBhanabha indoda eyayilothando yamduduza njalo yamnceda uSawuli. (ImiSeb. 9:21, 26-28) Ngokuhamba kwesikhathi abadala ababeseJerusalema bananzelela ukuthi kwakumele bakhuthaze abazalwane ababehlala khatshana e-Antiyokhi yaseSiriya. Bathuma bani? UBhanabha! Babengakhuthanga ugatsha ngoba iBhayibhili lithi uBhanabha “waqalisa ukubakhuthaza bonke ukuthi baqhubeke beseNkosini bezimisele ngenhliziyo yonke.” (ImiSeb. 11:22-24) Lathi uJehova angasincedisa ukuthi siduduze abafowethu labodadewethu. Ngokwesibonelo, angasisebenzisa ukuthi siduduze abafelweyo, sivakatshele kumbe sifonele umuntu ogulayo loba okhathazekileyo ukuze simduduze. Uzamvumela yini uJehova ukuthi akusebenzise ngendlela asebenzisa ngayo uBhanabha?—1 Thes. 5:14. w19.10 22 ¶8

Kwesinye isikhathi nxa sisebenza labangane bethu ekutshumayeleni kasinanzeleli ubuntu babo obuhle kuphela kodwa sinanzelela labakuphambanisayo. Pho kuyini okungasinceda ukuthi siqhubeke singamathe lolimi lanxa bephambanisa? Akumelanga sikhangelele ukuthi abafowethu labodadewethu bangaphambanisi. Yikho nxa sesithole umngane kumele sisebenze nzima ukuthi sihlale singabangane. Nxa umngane engaphambanisa kumele sibe lomusa kodwa singambhodi ngesikhathi simnika iseluleko esisekelwe eLizwini likaNkulunkulu. (Hubo. 141:5) Kumele simxolele lanxa esizwise ubuhlungu. Nxa sesimxolele akumelanga siphinde siyivuse indaba leyo kumbe sitshele abanye ngayo. Kuqakatheke kakhulu kulezizikhathi ezinzima ukuthi sikhangele okuhle okwenziwa ngabafowethu labodadewethu kulokutshona sizihlupha ngalokho abakuphambanisayo. Singenza njalo sizaqinisa ubungane bethu futhi lokhu kuzasinceda ngoba sizabadinga abangane abaseduze ngesikhathi sokuhlupheka okukhulu. w19.11 6 ¶13, 16

Nxa siqhuba izifundo zeBhayibhili kumele sizame ngamandla wonke ‘ukwenza abafundi, sibafundise ukulandela izinto zonke [uJesu] asilaye zona.’ Kumele sincede abantu bazwisise ukuthi kuqakathekile ukuthi bakhonze uJehova lokuthi basekele uMbuso wakhe. Lokhu sikwenza ngokuzama ukubakhuthaza ukuthi basebenzise lokho abakufundayo, bazinikele kuJehova futhi babhabhathizwe. Bangenza njalo bazasinda ngosuku lukaJehova. (1 Phet. 3:21) Ukuphela komumo lo wezinto sekuseduze kakhulu. Yikho kasilaso isikhathi sokutshona sifunda labantu okungacaciyo ukuthi bayafuna yini ukuba ngabalandeli bakaKhristu loba hatshi. (1 Khor. 9:26) Phela isikhathi esiseleyo sesisincane. Banengi abantu okumele bezwe ngoMbuso ukuphela kungakafiki. w19.10 11-12 ¶14-15

Minyaka yonke ngeLanga Lokubuyisana ama-Israyeli ayebuthana, umphristi omkhulu abesenikela imihlatshelo ngezinyamazana. Imihlatshelo le yayikhumbuza ama-Israyeli ukuthi kwakumele ahlanjululwe esonweni. Kodwa okwakumele umphristi omkhulu aqale akwenze yikuthela impepha ngonanzelelo emalahleni avuthayo, iNgcwele Ngcwele yonke inukelele. Lokhu kusifundisani? IBhayibhili lithi imithandazo eyenziwa ngabantu bakaJehova abathembekileyo injengempepha. (Hubo. 141:2; Isam. 5:8) Umphristi omkhulu wayeletha impepha phambi kukaJehova ngendlela etshengisa inhlonipho enkulu. Lathi sitshengisa inhlonipho enkulu nxa sikhuleka kuJehova. Sikubona kuyisibusiso sibili ukuthi uMdali wethu usivumele ukuthi sikhuleke njalo sisondele kuye njengomntwana kuyise. (Jak. 4:8) Uyasamukela okokuthi uze avume ukuthi sibe ngabangane bakhe. (Zaga. 3:32) Siyasiqakathekisa isibusiso lesi yikho asifuni ngitsho ukumdanisa. w19.11 20-21 ¶3-5

Abantu abanengi endaweni ohlala kuyo bakubona njani ukusebenza? Emazweni amanengi abantu sebesebenza kakhulu futhi okwesikhathi eside kulakuqala. Abantu abasebenza njalo bajayele ukuswela isikhathi sokuphumula, esokuba lezimuli zabo kumbe esokuqhubeka befunda ngoNkulunkulu. (UmTshu. 2:23) Abanye bona abakuthandi ngitsho ukusebenza njalo bakhuluma izizatho ezingazwakaliyo zokungasebenzi. (Zaga. 26:13, 14) UJehova loJesu bona kabafanani labantu laba. Akuthandabuzwa ukuthi uJehova uyakuthanda ukusebenza. UJesu wakucacisa lokhu aze athi: “UBaba ulokhu esebenza kuze kube khathesi, lami ngiqhubeka ngisebenza.” (Joh. 5:17) UNkulunkulu wenza umsebenzi omkhulu lapho edala izingilosi ezinengi, inkanyezi lamaplanethi. Lasemhlabeni omuhle esihlala kuwo siyazibona izinto ezinengi azidalileyo. w19.12 2 ¶1-2

Kuyini okwenza uDavida waba seduze loJehova kangaka? Wafunda ngoJehova ezintweni ezidaliweyo. Esesemncane wayeqeda isikhathi esinengi eselusa izimvu zikayise. Kungenzakala yiso isikhathi aqalisa ngaso ukucabangisisa ngezinto ezidalwe nguJehova. Ngokwesibonelo, wayesithi nxa ekhangela phezulu ebusuku abone izinkulungwane zezinkanyezi. Kodwa kazange aphonguzikhangela nje, wazwisisa lobuntu balowo owazidalayo. (Hubo. 19:1, 2) Ngesikhathi uDavida ecabangisisa ngendlela emangalisayo abantu abadalwe ngayo wabona ukuthi uJehova uhlakaniphile. (Hubo. 139:14) Lapho ecabangisisa ngezinto ezidalwe nguJehova, wananzelela ukuthi mncane kakhulu nxa eqathaniswa laye. (Hubo. 139:6) Sifundani? Nsuku zonke cabangisisa ngokuthi izinto ezidaliweyo ezigoqela izimila, izinyamazana labantu zikufundisani ngoJehova. Nxa ungenza njalo uzafunda izinto ezinengi ngoYihlo olothando. (Rom. 1:20) Ukubuka izinto ezidaliweyo kuzenza ukuthi uthando lwakho ngoJehova lukhule nsuku zonke. w19.12 19-20 ¶15-17

UMosi wakhetha ukukhonza uNkulunkulu. Ngesikhathi eleminyaka engaba ngu-40, wakhetha ukuzihlanganisa lama-Israyeli kulokuthi aziwe ngokuthi “uyindodana yendodakazi kaFaro.” Watshiya isikhundla esiphezulu. Wayekwazi ukuthi uFaro uzazonda abile lapho ekhetha ukuzihlanganisa lama-Israyeli ayeyizigqili eGibhithe. Phela uFaro wayengumbusi olamandla kakhulu futhi amaGibhithe ayecabanga ukuthi ungunkulunkulu. Okwenziwa nguMosi kutshengisa ukuthi wayelokholo oluqinileyo njalo emthemba uJehova. Indlela ayemthemba ngayo uJehova yiyo eyenza waba ngumngane wakhe okwempilo yakhe yonke. (Zaga. 3:5) Sifundani? Lathi njengoMosi kumele sikhethe ukuthi sizakhonza uJehova futhi sizihlanganise labantu bakhe yini. Kungadingeka ukuthi sitshiye ezinye izinto ukuze sikhonze uNkulunkulu futhi singaphikiswa ngabantu abangamaziyo. Kodwa nxa simthemba uBaba wethu osezulwini kasisoze sithandabuze ukuthi uzasisekela. w19.12 17 ¶5-6

Lanxa senziwe ngothuli lomhlabathi siqakatheke kakhulu kulalo. Nanzi ezinye izizatho ezenza siqiniseke ukuthi siqakathekile kuJehova. Wadala abantu besenelisa ukulingisela ubuntu bakhe. (Gen. 1:27) Ngokwenza njalo wasenza saba ngcono kulakho konke okudaliweyo okusemhlabeni futhi wasinika umsebenzi wokunakekela umhlaba lezinyamazana. (Hubo. 8:4-8) UJehova waqhubeka ebaqakathekisa abantu langemva kokona kuka-Adamu. Usiqakathekisa kakhulu okokuthi waze wanikela ngeNdodana yakhe ayithandayo uJesu ukuthi ibe yinhlawulo yezono zethu. (1 Joh. 4:9, 10) Uzasebenzisa inhlawulo ukuthi avuse “abalungileyo labangalunganga” abafa ngenxa yesono sika-Adamu. (ImiSeb. 24:15) ILizwi lakhe litshengisa ukuthi siligugu kuye kungelani lokuthi siyagula, asilamali kumbe sigugile.—ImiSeb. 10:34, 35. w20.01 15 ¶5-6

Ukugcotshwa ayisilolifa umuntu angalitshiyelwa ngabangakibo. UNkulunkulu nguye omgcobayo. (1 Thes. 2:12) Ngakho akumelanga sibuze imibuzo engazwisa abanye ubuhlungu. Ngokwesibonelo, akumelanga sibuze udade olomkakhe ogcotshiweyo ukuthi uzizwa njani ngokuthi kasoze aphile lomkakhe emhlabeni olipharadayisi. Phela siyaqiniseka ukuthi emhlabeni omutsha uJehova ‘uzasuthisa izidingo zakho konke okuphilayo.’ (Hubo. 145:16) Nxa singaphathi abagcotshiweyo njengabaqakatheke kakhulu kulabanye siyabe sizivikela. Kungani sisitsho njalo? IBhayibhili lisitshela ukuthi kungenzakala abanye abagcotshiweyo behluleke ukuhlala bethembekile. (Mat. 25:10-12; 2 Phet. 2:20, 21) Nxa singaxwaya ukuncoma kakhulu abanye kasisoze silandele muntu, kungaba ngogcotshiweyo, owaziwa kakhulu loba oselesikhathi eside ekhonza uJehova. (Jud. 16) Kasisoze siyekele ukukhonza uJehova kumbe siphelelwe lukholo lwethu nxa lowomuntu engamtshiya loba engayekela ukuthembeka kuye. w20.01 29 ¶9-10

Senza konke okusemandleni ethu ukuthi silingisele uJehova ngoba ‘singabantwana abathandwayo.’ Siyabe simlingisela nxa sithanda abanye, silomusa futhi sibathethelela. Nxa abantu abangamaziyo uNkulunkulu bebona indlela esiziphatha ngayo bangafuna ukwazi okunengi ngaye. (1 Phet. 2:12) Abazali abangamaKhristu kumele bazame ukuphatha abantwababo ngendlela uJehova asiphatha ngayo. Nxa bengenza njalo, abantwababo labo bangafuna ukuba ngabangane bakaBaba wethu osithandayo. Siyazigqaja ngoBaba wethu osezulwini uJehova futhi sifuna abanye babemazi. Sizizwa njengeNkosi uDavida eyabhala yathi: “Umphefumulo wami uzancoma uJehova.” (Hubo. 34:2) Kodwa kuthiwani nxa silenhloni zokukhuluma ngoJehova? Kuyini okumele sikwenze ukuze sibe lesibindi? Kumele sicabange ngokuthi uJehova uzathokoza nxa singakhuluma ngaye lokuthi ukukhuluma ngaye kuzabanceda abanye. UJehova uzasinika isibindi. Wanceda amaKhristu aphila ngesikhathi sabaphostoli ukuthi abe lesibindi futhi lathi uzasinceda sibe laso.—1 Thes. 2:2. w20.02 11 ¶12-13

Abanengi abafunda iBhayibhili bayathuthuka baze babhabhathizwe. Lanxa kunjalo bakhona abanye abakhanya besesaba ukuba ngabafundi bakaKhristu. Bayakukholisa ukufunda kodwa abathuthuki ukuze babhabhathizwe. Nxa kulomuntu omfundisa iBhayibhili, sileqiniso lokuthi ufuna ukumncedisa ukuthi asebenzise akufundayo futhi abe ngumfundi kaKhristu. UJehova ufuna abantu bamkhonze ngoba bemthanda. Yikho inhloso yethu yikuncedisa esifunda labo iBhayibhili bazwisise ukuthi uJehova ulendaba labo njalo uyabathanda kakhulu. Sifuna ukubanceda babone uJehova ‘enguyise wezintandane lomlamuleli wabafelokazi.’ (Hubo. 68:5) Nxa bangananzelela ukuthi uJehova ubathanda kangakanani labo bangaqalisa ukumthanda. Yikho nceda ofunda labo bazwisise ukuthi uNkulunkulu wethu olothando ufuna bathole ukuphila okungapheliyo futhi uzimisele ukubancedisa ukuthi bakuthole. w20.01 3 ¶7-8

Umphostoli uPhawuli wayethobekile yikho wayekwazi ukuthi uyakudinga ukukhuthazwa ngabangane bakhe. Wayengakhathazeki ngokuthi abanye abantu bazacabanga ukuthi ubuthakathaka nxa wayekhuthazwa ngabangane bakhe ngesikhathi ekhathazekile. (Kol. 4:7-11) Nxa sithobekile sizavuma ukuthi siyakudinga ukukhuthazwa futhi abafowethu labodadewethu bazathokoza ukusisekela. UPhawuli wayekwazi ukuthi iMibhalo izamduduza lokuthi izamnika ukuhlakanipha akudingayo ukuze alwisane lobunzima. (Rom. 15:4; 2 Tim. 3:15, 16) Ngesikhathi ebotshwe okwesibili eRoma, wayekwazi ukuthi usezabulawa. Wacela uThimothi ukuthi afike kuye masinyane lokuthi amphathele ‘izincwadimgoqwa.’ (2 Tim. 4:6, 7, 9, 13) Wathi uThimothi abuye lezincwadimgoqwa lezo ngoba kungenzakala zaziyiMibhalo YesiHebheru ayengayisebenzisa ukutaditsha. Nxa singalingisela uPhawuli ngokuhlala sitaditsha iLizwi likaNkulunkulu, uJehova uzalisebenzisa ukuthi asenze sihlaliseke kungelani lokuthi yiziphi inhlupho ezisehlelayo. w20.02 23-24 ¶14-15

U-Elifazi, uBhilidadi loZofari kabazange basebenzise isikhathi sabo becabanga ngokuthi bazamnceda njani uJobe. Amadoda la ayecabanga ngokuthi azathini ukuze atshengise ukuthi wenze into ezimbi. Zikhona sibili izinto eziliqiniso azikhulumayo kodwa okunengi kwalokho akutshoyo ngoJobe langoJehova kwakungamanga futhi kubuhlungu. Amahlulela ngokhahlo uJobe. (Jobe. 32:1-3) Manje uJehova wezwa njani ngalokho? Wawazondela kakhulu amadoda lawo amathathu. Wathi ayizithutha njalo wawatshela ukuthi acele uJobe awathandazele. (Jobe. 42:7-9) Kulezifundo esizitholayo kulokho okwenziwa ngu-Elifazi, uBhilidadi loZofari. Esokuqala, akumelanga sahlulele abafowethu labodadewethu. (Mat. 7:2-5) Kumele sibalalelisise singakakhulumi. Nxa singenza njalo, sizabuzwisisa ubunzima abaphakathi kwabo. (1 Phet. 3:8) Esesibili, nxa sesikhuluma kufanele sinanzelele ukuthi sikwenza ngendlela elomusa lokuthi esikutshoyo kuliqiniso. (Efe. 4:25) Esesithathu, uJehova ulendaba lendlela esikhuluma ngayo labanye. w20.03 22-23 ¶15-16

Izikhathi ezinengi nxa sifundisa abantu ngoJehova lathi sibamazi kuhle. Ngokwesibonelo, siyabona ukuthi uJehova uyabazwela abantu nxa esikhokhela kulabo abafisa ukuba ngabangane bakhe. (Joh. 6:44; ImiSeb. 13:48) Siyakubona ukuthi iLizwi lakhe lilamandla ngoba linceda esibafundisa iBhayibhili ukuthi batshiye imikhuba emibi njalo bagqoke ubuntu obutsha. (Kol. 3:9, 10) Kanti njalo siyabona ukuthi uyababekezelela abantu abasensimini yethu ngoba usithuma kubo kanenginengi ukuthi siyebafundisa ukuze basindiswe. (Rom. 10:13-15) Kodwa kumele sihlale sibuqakathekisa ubungane bethu loJehova kungelani lokuthi sesileminyaka emingaki simkhonza. Enye indlela esingatshengisa ngayo ukuthi siyabuqakathekisa ubungane bethu loNkulunkulu yikuthandaza. Ukukhulumisana kuhle kungumgogodla waloba yibuphi ubungane. Yikho lathi singasondela kuNkulunkulu ngokuhlala sithandaza kuye singesabi ukumtshela lokho okusenzikini yezinhliziyo zethu. w19.12 19 ¶11, 13-14

Lokhu kuyasiduduza sibili. UJesu uyiNkosi yoMbuso kaNkulunkulu futhi uzaqeda konke okusihluphayo okubangelwa nguSathane lomhlaba wakhe. (Isaya. 65:17; 1 Joh. 3:8; Isam. 21:3, 4) Lokhu kwenza sibe lethemba lokuthi sizakuba lekusasa elihle. Lanxa uJesu esinike umsebenzi onzima, ulathi futhi uzasisekela kuze kube yisiphetho somumo lo wezinto. (Mat. 28:19, 20) Lokhu kwenza sibe lesibindi. Ngakho induduzo lethemba kanye lesibindi kuzasinceda sibili ukuthi sibe lokuthula. Manje ungenzani ukuze uhlale ulokuthula nxa ukhathazwa zinhlupho? Lingisela lokho okwenziwa nguJesu. Okokuqala, thandaza futhi uphikelele ekuthandazeni. Okwesibili, lalela uJehova futhi ukhuthale ekutshumayeleni lanxa kunzima ukwenza njalo. Okwesithathu, vuma ukuncediswa ngabangane nxa usebunzimeni. Ungenza njalo ukuthula kukaNkulunkulu kuzalinda ingqondo lenhliziyo yakho. (Flp. 4:6, 7) Kanti njalo uzanqoba loba yibuphi ubunzima njengoJesu.—Joh. 16:33. w19.04 13 ¶16-17