July

Kumele sibe ngabangane bakaJesu ukuze imithandazo yethu iphendulwe. Lokhu kutsho ukuthi akwanelanga ukuphonguthi “ngebizo likaJesu” ekupheleni kwemithandazo yethu. Kufanele sizwisise lendlela uJehova asebenzisa ngayo uJesu ukuthi aphendule imithandazo yethu. UJesu wathi kubaphostoli: “Loba yini eliyicela ngebizo lami ngizayenza.” (Joh. 14:13) Lanxa uJehova kunguye ozwa imithandazo yethu futhi ayiphendule, uJesu nguye ophiwe amandla okwenza lokho uNkulunkulu akukhethileyo. Ngakho nxa uNkulunkulu engakayiphenduli imithandazo yethu, uqala akhangele ukuthi siyasisebenzisa yini iseluleko esasinikwa nguJesu. Ngokwesibonelo, uJesu wathi: “Nxa lithethelela abantu iziphambeko zabo, uYihlo osezulwini laye uzalithethelela; kodwa nxa lingabathetheleli abanye iziphambeko zabo, loYihlo kasoze alithethelele iziphambeko zenu.” (Mat. 6:14, 15) Yikho kuqakathekile sibili ukuthi siphathe abanye ngendlela uJehova loJesu abasiphatha ngayo. w20.04 22 ¶6

Umphostoli uPhawuli wananzelela okwakuthandwa ngabantu ayebatshumayeza wasekhetha intshumayelo esekelwe kulokho. Ngokwesibonelo, ixuku akhuluma lalo eListra lalisazi okulutshwana loba lingazi lutho ngeMibhalo. Yikho wabonisana lalo ngendlela elalizayizwisisa. Wakhuluma ngenala lokuba lempilo emnandi. Wasebenzisa amabala lezibonelo ezazizwisiswa ngababemlalele. Woba lokuqedisisa ukuze ubone okuthandwa ngabantu ensimini yenu ubusukhetha intshumayelo esekelwe kulokho. Kuyini okungakunceda ukuthi ukwazi lokho umuntu akuthandayo nxa umlanda kumbe ungena emzini wakhe? Kumele ube lelihlo elibukhali. Angabe esebenza engadini, ebala ibhuku, elungisa imota kumbe esenza okunye nje. Mhlawumbe ungaqala ingxoxo ngokukhuluma ngalokho akwenzayo. (Joh. 4:7) Akugqokileyo lakho kungakutshela okuthile ngaye, ngokwesibonelo ukuthi ngowaliphi ilizwe, wenza msebenzi bani kumbe usekela liphi iqembu lemidlalo. w20.04 11 ¶11-12

Abanye abafowethu labodadewethu abahlutshwa yikukhathazeka kakhulu abakhululeki nxa bephakathi kwabantu. Kungabe kubathwalisa nzima ukuba lapho okulabantu abanengi khona kodwa abayekeli ukuya emihlanganweni yebandla, eyeziqinti leyezabelo. Bayatshumayela lanxa kubathwalisa nzima ukukhuluma labantu abangabaziyo. Nxa lawe unjalo, awuwedwa. Banengi abantu abalohlupho olunjengolwakho. Ungakhohlwa ukuthi uJehova uyathokoza ngalokho omenzela khona ngenhliziyo yonke. Ukungakhalali kwakho kuyibufakazi bokuthi uyakubusisa futhi ukunika amandla owadingayo. (Flp. 4:6, 7) Nxa ukhonza uJehova ngapha ugula kumbe ukhathazeka kakhulu loba uhlulukelwa, qiniseka ukuthi lokho okwenzayo kuyamthokozisa. Emncintiswaneni wokuphila abanengi bethu siyaqinisela lanxa singaphilanga kuhle emzimbeni. (2 Khor. 4:16) UJehova uzasincedisa sonke ukuthi sigijime size sifike ekucineni. w20.04 31 ¶20-21

Ukuhlakanipha kukaNkulunkulu kuyazikhanyela endleleni adala ngayo umhlaba olikhaya lethu. (Heb. 3:4) Umhlaba awufanani lamanye amaplanethi ngoba wona ulakho konke okudingakalayo ukuze abantu baphile kuwo. Singafanisa umhlaba lesikepe esiselwandle. Kodwa kulomehluko omkhulu phakathi kwesikepe esigcwele abantu lomhlaba wethu. Ngokwesibonelo, ubona angani abantu abasesikepeni bebengaphila isikhathi esinganani aluba bebezenzela eyabo i-oxygen, ukudla kanye lamanzi futhi bengenelisi ukulahlela ingcekeza phandle kwesikepe? Bebengeke baphile isikhathi eside. Kodwa umhlaba wona uyenelisa ukugcina amabhiliyoni abantu lezinyamazana ziphila. Uyazenzela i-oxygen lokudla kanye lamanzi esiwadingayo futhi izinto lezi eziqakathekileyo kazipheli. Ingcekeza kayilahlelwa phandle kwawo kodwa uqhubeka umuhle njalo uhlaleka. Lokhu kwenzakala njani? UJehova wawudala ngendlela yokuthi wenelise ukuguqula izinto esingazisebenzisiyo zibe yizinto esizisebenzisayo. w20.05 20 ¶3-4

Amazwi kaSathane ayesitsho ukuthi uJehova uqamba amanga. Lokhu kwenza waba nguDeveli loba umnyundeli. U-Eva waqilwa ngokupheleleyo wamkholwa uSathane. (1 Tim. 2:14) Wamthemba kakhulu ukwedlula uJehova. Lokhu kwabangela ukuthi u-Eva enze iphutha elibi kulawo wonke. Wakhetha ukungalaleli uJehova ngokudla isithelo ayethe angasidli. Ngemva kwalokho wanika u-Adamu laye wadla. (Gen. 3:6) Ake ucabange ngalokho u-Eva okwakumele akutshele uSathane. Ubona angani kwakuzakwenzakalani aluba wathi: “Angikwazi wena, kodwa ngiyamazi uBaba wami uJehova futhi ngiyamthanda njalo ngiyamthemba. Konke esilakho sikunikwe nguye. Ukuthatha ngaphi ukuthi ukhulume kubi ngaye? Suka lapha!” UJehova wayezathokoza kakhulu esizwa amazwi anjalo ekhulunywa yindodakazi yakhe ayithandayo. (Zaga. 27:11) Kodwa u-Eva wayengamthandi ngenhliziyo yonke uJehova futhi lo-Adamu wayenjalo. U-Adamu lo-Eva behluleka ukungcwelisa ibizo likaYise ngesikhathi lingcoliswa ngoba babengelathando oluqotho. w20.06 4 ¶10-11

Kumele sibancome odadewethu ngakho konke abakwenzayo enhlanganisweni kaJehova. Bayakha futhi banakekele izakhiwo zethu, bayancedisa emabandleni asebenzisa olunye ulimi njalo basebenza eBhetheli. Bayancedisa nxa kube lomonakalo wemvelo, bahumutsha amabhuku ethu futhi bangamaphayona labanali. Kanti njalo amakhosikazi ancedisa omkawo ukuthi benze yonke imisebenzi abayiphathisiweyo ebandleni lasenhlanganisweni. Abafowethu laba ‘bayizipho ezingabantu’ futhi kunengi abakwenzayo ukuze bancede abanye. (Efe. 4:8) Abadala abahlakaniphileyo bayakwazi ukuthi odade “balibutho elikhulu” lezisebenzi ezizimiseleyo lokuthi izikhathi ezinengi yibo abawenza kuhle umsebenzi wokutshumayela. Abadala bayakwazi lokuthi odade abathembekileyo asebekhulile bayenelisa ukuncedisa odade abasesebatsha nxa belenhlupho. (Tit. 2:3-5) Kuyacaca ukuthi kumele sibathande futhi sibaqakathekise odadewethu. w20.09 23-24 ¶13-14

UJehova kabakhohlwa labo abake bamkhonza kodwa bayekela okwesikhatshana. Kawukhohlwa lomsebenzi abake bamenzela wona. (Heb. 6:10) Umphrofethi u-Isaya wasebenzisa umzekeliso ochasisa kuhle indlela uJehova anakekela ngayo abantu bakhe. Wathi: “Welusa umhlambi wakhe njengomalusi: ubuthelela amawundlu ezingalweni zakhe awathwale eseduzane lenhliziyo yakhe.” (Isaya. 40:11) UMelusi Omkhulu uzwa njani nxa imvu yakhe eyodwa ingaphambuka emhlambini? UJesu waveza indlela uJehova azizwa ngayo lapho ebuza abafundi bakhe esithi: “Licabangani? Nxa umuntu elezimvu ezingu-100, enye yazo ibisilahleka, ngeke yini atshiye ezingu-99 ezintabeni abesesiyadinga leyo elahlekileyo? Ngiqinisile ngithi nxa angayithola, uyathokoza kakhulu ngayo ukwedlula ezingu-99 ezingalahlekanga.”—Mat. 18:12, 13. w20.06 19-20 ¶8-9

Kuyisibusiso ukwenza loba yiwuphi umsebenzi esenelisa ukuwenza enhlanganisweni kaJehova. (Hubo. 27:4; 84:10) Umzalwane ozimisele ukwenza okunengi ekukhonzeni wenza kuhle kakhulu. Kodwa nxa umzalwane engaphiwa umsebenzi wenkonzo akumelanga azibone esengcono kulalokho ayikho khona. (Luk. 17:7-10) Kumele athobeke. (2 Khor. 12:15) IBhayibhili lilezibonelo zabantu ababezibona bengcono kakhulu kulalokho ababeyikho khona. UDiyotrefe wayengathobekanga. Wazama ukuba “mkhulu” ebandleni. (3 Joh. 9) U-Uziya wazigqaja wazama ukwenza umsebenzi uJehova ayengamphanga wona. (2 ImiLan. 26:16-21) U-Abhsalomi wayefuna ukuba yinkosi yikho wenza angani uyabathanda abantu ukuze bamsekele. (2 Sam. 15:2-6) Okwenzakala ebantwini labo okukhulunywa ngabo eBhayibhilini kwenza kucace ukuthi uJehova kabathandi abantu abazifunela okwabo. (Zaga. 25:27) Abazigqajayo labafuna ukubukwa ngabanye bacina bewela enkathazweni.—Zaga. 16:18. w20.07 4 ¶7-8

Ezinye izimuli ezingamaKhristu zithuthele kwelinye ilizwe zibalekela izimo ezinzima kumbe zidinga umsebenzi. Yikho abantwana bangabe befundiswa ulimi lwakulelolizwe esikolo. Abazali labo kungadingeka ukuthi balufunde lolo limi ukuze bathole imisebenzi. Kodwa kuthiwani nxa kulebandla kumbe iqembu elisebenzisa ulimi lwabo? Kumele bangene laliphi ibandla? Kumele bangene lebandla elisebenzisa ulimi lwakulelolizwe yini kumbe elisebenzisa ulimi lwabo? Inhloko yemuli kumele ikhethe ukuthi imuli yayo izangena laliphi ibandla. Njengoba kuyiyo elomlandu lo kumele ikhethe okuzanceda imuli yayo. Kumele sihloniphe loba yisiphi isinqumo esenziwe yinhloko yemuli. Lokhu singakwenza ngokuyamukela ngazo zombili imuli yayo njalo sitshengise ukuthi siyayithanda.—Rom. 15:7. w20.08 30 ¶17-18

Nxa ufuna ukuthi uJehova akunike amandla akumelanga ucabange ukuthi ukuba lempilakahle, lemfundo, lemali enengi kumbe imvelaphi yakho yikho okwenza uqakatheke kuye. Izinto lezi ayisizo ezenza uJehova asisebenzise. Phela ebantwini bakaNkulunkulu kababanengi “abahlakaniphileyo ngokubona kwabantu, kababanengi abalamandla futhi kababanengi abazalelwe esikhosini.” (1 Khor. 1:26) Ngakho lanxa ungelazo izinto eziqanjwe ekuqaliseni kwendima le ungacabangi ukuthi awusoze wenelise ukukhonza uJehova. Ukungabi lazo kuzakunceda ubone ukuthi uJehova ukunika njani amandla. Ngokwesibonelo, nxa usesaba abantu abaphikisa esikukholwayo, thandaza kuJehova ucele akunike isibindi sokulwela ukholo lwakho. (Efe. 6:19, 20) Nxa uthwaliswe nzima yikuhlala ugula, mcele akunike amandla owadingayo ukuze wenze konke okusemandleni akho ekumkhonzeni. Sonke isikhathi nxa ubona indlela uJehova akuncedisa ngayo ukholo lwakho luyaqina futhi uba lamandla. w20.07 16 ¶9

Nxa sifuna ukuqakathekisa uMbuso kumele sibe njengo-Abrahama owayezimisele ukutshiya ezinye izinto ukuze athokozise uNkulunkulu. (Mak. 10:28-30; Heb. 11:8-10) Ungacabangi ukuthi awusoze wehlelwe zinhlupho. Ngitsho lalabo abazinikele ukuba senkonzweni yesikhathi sonke okwempilo yabo yonke bazakuba lenhlupho. (Jak. 1:2; 1 Phet. 5:9) Ezinsukwini lezi kuqakatheke kakhulu ukuhlala sicabanga ngezibusiso esizithenjisiweyo. Okwenzakala emhlabeni khathesi kutshengisa ukuthi sesisekucineni kwezinsuku zokucina. Okunye okuzasithokozisa nxa uMbuso usubusa yikubona izihlobo labangane bethu bevuswa. Ngesikhathi leso uJehova uzanika u-Abrahama kanye lemuli yakhe umvuzo ngokubavusa ukuthi baphile emhlabeni ngenxa yokholo lokubekezela kuka-Abrahama. Uzabe ukhona yini ukuze ubamukele? Nanku ongakwenza ukuze ube khona: Zimisele ukutshiya ezinye izinto ngenxa yoMbuso kaNkulunkulu, uqhubeke ulokholo lanxa usehlelwa zinhlupho njalo ufunde ukubekezela ulindele uJehova njengo-Abrahama.—Mik. 7:7. w20.08 5-6 ¶13-14; 7 ¶17

Siyakwazi ukuthi lanxa izitha zethu zingasibulala, uJehova uzasivusa. Siyaqiniseka ukuthi akulalutho ezingalwenza olungabangela ukuthi siyekele ukukhonza uJehova. (Rom. 8:35-39) UJehova utshengise ukuthi uhlakaniphile sibili ngokusinika ithemba lokuthi abafileyo bazavuswa. Ithemba leli lenza singesabi abalandeli bakaSathane nxa besethusela ngokusibulala befuna senze abakutshoyo. Kanti njalo lisinika isibindi sokuhlala siqotho kuJehova. Uzamthemba yini uJehova ukuthi uzakuvusa nxa izitha zakhe zingakwethusela zisithi zifuna ukukubulala? Ungabakwazi njani ukuthi uzamthemba uJehova ngalesosikhathi? Nanku okunye ongazibuza khona: ‘Izinqumo engizenza nsuku zonke ziyatshengisa yini ukuthi ngiyamthemba uJehova?’ (Luk. 16:10) ‘Indlela engiphila ngayo iyatshengisa yini ukuthi ngiyamthemba uJehova ukuthi uzasigcwalisa isithembiso sakhe sokuthi uzanginakekela nxa ngingafuna kuqala uMbuso wakhe?’ (Mat. 6:31-33) Nxa uphendule imibuzo le ngokuthi ye uzenelisa ukumelana laloba yibuphi ubunzima obuzakwehlela esikhathini esizayo.—Zaga. 3:5, 6. w20.08 17-18 ¶15-16

Kumele sibe zingcitshi ekusebenziseni iLizwi likaNkulunkulu. Imihlangano yethu yebandla iyasifundisa ezinye izindlela esingalisebenzisa ngalo. Kodwa nxa sifuna ukunceda abanye bakholwe ukuthi iqiniso eliseBhayibhilini liligugu sibili, kumele silibale nsuku zonke. Kufanele sibale iLizwi likaNkulunkulu ukuze siqinise ukholo lwethu. Kanti njalo kumele sicabangisise ngalokho esikubalayo njalo sichwayisise emabhukwini ethu ukuze siyizwisise ngendlela eqondileyo iMibhalo futhi siyichasise. (1 Tim. 4:13-15) Nxa singenza njalo sizakwenelisa ukusebenzisa iLizwi likaNkulunkulu nxa sifundisa abanye. Kodwa lokhu asingeke senelise ukukwenza nxa singaphongubabalela amavesi kuphela, kumele sibancedise bawazwisise futhi babone ukuthi bangawasebenzisa njani. Ngakho nxa singabala iBhayibhili nsuku zonke sizakuba zingcitshi ekufundiseni abanye.—2 Tim. 3:16, 17. w20.09 28 ¶12

Okuzasinceda ukuthi siqakathekise umsebenzi wokutshumayela ukwedlula loba yini yikucabanga ngakho konke uJehova asenzele khona ukuze asincedise. Ngokwesibonelo, usinike izinto ezinengi ezisiqinisa ukholo kungaba ngamabhuku aphrintiweyo kumbe atholakala kwezempucuko, okulalelwayo, amavidiyo lenhlelo ze-JW Broadcasting. IWebhusayithi yethu i-jw.org ilezinto ezitholakala ngezindimi ezedlula 1 000. (Mat. 24:45-47) Okunye okuzasinceda ukuthi sihlale siqakathekisa umsebenzi wokutshumayela ukwedlula loba yini yikulingisela isibonelo sikaJesu. Kazange avumele lutho ukuthi lumphambanise ekutshumayeleni. (Joh. 18:37) Kazange athatheke ngesikhathi uSathane efuna ukumnika “yonke imibuso yomhlaba kanye lenkazimulo yayo” langesikhathi abanye befuna ukumenza inkosi. (Mat. 4:8, 9; Joh. 6:15) Kazange axotshane lenotho futhi kazange esabe ngesikhathi ephikiswa. (Luk. 9:58; Joh. 8:59) Sizakwenelisa ukuhlala siqakathekisa umsebenzi wokutshumayela ukwedlula loba yini kungelani lokuthi kuyini okusehlelayo nxa singakhumbula amazwi womphostoli uPhawuli asembhalweni walamuhla. w20.09 9-10 ¶6-7

Siyathokoza kakhulu ngokuthi silabodadewethu abanengi abasebenza nzima ebandleni. Bayaphendula emihlanganweni yebandla futhi batshumayele. Abanye bancedisa ekunakekeleni amaWolu oMbuso njalo balendaba labazalwane abasebandleni. Lanxa kunjalo, bahlangana lobunzima. Abanye banakekela abazali asebekhulile, abanye baphikiswa ngabangakibo ikanti abanye kabalabomkabo yikho basebenza nzima ukuze bakhulise abantwababo. Kungani kumele sisekele odadewethu? Esinye isizatho yikuthi abantu bomhlaba lo kababahloniphi abesifazana ngendlela okumele bahlonitshwe ngayo. Kanti njalo iBhayibhili lisikhuthaza ukuthi sibasekele. Ngokwesibonelo, umphostoli uPhawuli wakhuthaza ibandla laseRoma ukuthi lamukele uFebhi njalo “limncedise ngaloba yini ayiswelayo.” (Rom. 16:1, 2) UPhawuli esasengumFarisi wayebeyisa abesifazana. Kodwa njengoba wayesengumKhristu wayesebahlonipha futhi ebaphatha ngomusa elingisela uJesu. w20.09 20 ¶1-2

Nxa sincedisa esifunda labo iBhayibhili ukuthi babe lesifiso sokutshumayela izindaba ezinhle, singababuza imibuzo le: “Ukusebenzisa okufunda eBhayibhilini kukuncede njani empilweni yakho? Ubona angani bakhona abanye okumele bazwe izindaba ezinhle eziseBhayibhilini? Ungenzani ukuze ubancedise?” (Zaga. 3:27; Mat. 9:37, 38) Khumbula ukuthi uJesu wathi sifundise abantu “ukulandela izinto zonke” asilaya zona. Izinto lezi zigoqela ukuthanda uNkulunkulu lomakhelwane, okuyimilayo emibili eqakatheke kulayo yonke. (Mat. 22:37-39) Uthando yilo isizatho esiqakathekileyo esenza sitshumayele. Kodwa abanye esifunda labo iBhayibhili bayesaba ukutshumayela. Yikho kumele sibaqinisekise ukuthi uJehova uzabancedisa ukuthi bangakhulelwa yikwesaba abantu.—Hubo. 18:1-3; Zaga. 29:25. w20.11 3 ¶6-8

Okumele ukwenze nxa ulungiselela ukuqhuba isifundo seBhayibhili yikuthandaza kuJehova umtshela ngomfundi wakho kanye lalokho akudingayo. Mcele akuncedise ufundise lokho okuseBhayibhilini ngendlela ezathinta inhliziyo yomfundi. Hlala ukhumbula ukuthi inhloso yakho yikumncedisa ukuthi athuthuke aze abhabhathizwe. Umfundi kumele alalele uJehova njalo akhulume laye. Angamlalela ngokubala iBhayibhili nsuku zonke. (Josh. 1:8; Hubo. 1:1-3) Khuthaza umfundi wakho ukuthi akhulume loJehova ngokuthandaza nsuku zonke. Ngakho thandaza ngenhliziyo yonke lingakaqalisi ukufunda lalapho seliqedile futhi umqambe umfundi wakho emithandazweni le. Ngesikhathi elalele imithandazo yakho, uzafunda ukuthandaza ngenhliziyo yonke lokuthi kumele athandaze kuJehova uNkulunkulu ngebizo likaJesu Khristu. (Mat. 6:9; Joh. 15:16) Akuthandabuzwa ukuthi ukubala iBhayibhili nsuku zonke (ukulalela uJehova) lokuthandaza (ukukhuluma loJehova) kuzanceda umfundi wakho asondele kakhulu kuNkulunkulu!—Jak. 4:8. w20.10 8 ¶8; 9 ¶10-11

Lalamuhla inhlanganiso kaJehova isebenza nzima ukuze kuhlale kulokuthula lokuhleleka emabandleni. (ImiSeb. 16:4, 5) Ngokwesibonelo, ungaya kwelinye ibandla, kungaba selizweni lakho kumbe kwelinye ilizwe uyabe ukwazi ukuthi yisiphi isihloko se-Nqabayokulinda esifundwayo lokuthi sizafundwa njani. Uyahle uzizwe ususekhaya! Ngumoya ongcwele kuphela owenza kube lokumanyana okunje. (Zef. 3:9) Ungenzani? Zibuze: ‘Ngenza kuhlale kulokuthula lokumanyana yini ebandleni? Ngiyabalalela yini abakhokhelayo? Abanye bangangithemba yini, ikakhulu nxa ngilemisebenzi engiyenzayo ebandleni? Ngiyaphangisa yini ukufika emihlanganweni? Ngizimisele yini ukuncedisa abanye?’ (Jak. 3:17) Nxa ubona angani kukhona lapho okumele uthuthukise khona, thandaza ucele umoya ongcwele ukuthi ukuncedise. Nxa ungawuvumela ukuthi utshintshe ubuntu bakho lezenzo zakho, abafowenu labodadewenu bazakuthanda kakhulu futhi bakuqakathekise. w20.10 23 ¶12-13

ILizwi likaNkulunkulu lingasebenza njengesibuko. (Jak. 1:23-25) Abanengi bethu sijayele ukuzibuka esibukweni nsuku zonke ekuseni singakaphumi endlini ukuze sibone lapho esidinga ukulungisisa khona abanye bengakasiboni. Lokubala iBhayibhili nsuku zonke kuzasisiza sibone ukuthi singalungisisa njani indlela esicabanga ngayo. Abanengi kuyabanceda ukubala umbhalo wosuku ekuseni bengakaphumi endlini. Bavumela abakubalileyo ukuthi kutshintshe indlela abacabanga ngayo futhi bayadinga izindlela abangakusebenzisa ngazo ngelanga lelo. Kanti njalo kumele sitaditshe futhi sicabangisise nsuku zonke ngesikubala eLizwini likaNkulunkulu. Lokhu ngokunye okuqakathekileyo okungasinceda ukuthi siqhubeke sisendleleni encinyane eya ekuphileni. ILizwi likaNkulunkulu linjenge-X-ray ngoba liyasitshengisa lokho esiyikho ngaphakathi. Kodwa kumele sithobeke ukuze silalele iseluleko esisithola eBhayibhilini kumbe esisiphiwa yilabo abakhokhelayo enhlanganisweni. w20.11 18 ¶3; 20 ¶8

Lanxa izikhathi ezinengi amaKhristu aphila ngesikhathi sabaphostoli ayehlukuluzwa, ayeke abe lezikhathi zokuthula. Ayezisebenzisa njani izikhathi lezo? Amadoda labesifazana laba abathembekileyo baqhubeka betshumayela izindaba ezinhle. Ibhuku lemiSebenzi lithi ‘babephila impilo yokumesaba uJehova.’ Abazange bayekele ukutshumayela izindaba ezinhle futhi lokhu kwenza ukuthi ‘baqhubeke besanda.’ Akuthandabuzwa ukuthi uJehova wakubusisa ukutshumayela kwabo ngentshiseko ngezikhathi zokuthula. (ImiSeb. 9:26-31) AmaKhristu akuqala ayetshumayela izindaba ezinhle loba nini lapho ayethola khona ithuba. Ngokwesibonelo, ngesikhathi umphostoli uPhawuli ese-Efesu, wananzelela ukuthi wayevulelwe umnyango omkhulu yikho wahlala edolobheni lelo ukuze atshumayele njalo enze abafundi. (1 Khor. 16:8, 9) Abafundi basebenza nzima betshumayela “izindaba ezinhle zelizwi likaJehova.” (ImiSeb. 15:30-35) Kwaba layiphi impumela? Umbhalo walamuhla uyasitshela. w20.09 16 ¶6-8

Ukona kuka-Adamu kwabangela ukuthi afe. Lathi sithwele nzima ngenxa yokungalaleli kwakhe. Kodwa silethemba lokuba lekusasa elihle ngenxa yokuthi uNkulunkulu wavusa iNdodana yakhe. “Lokuvuswa kwabafileyo kuza ngendoda,” okutsho uJesu. Umphostoli uPhawuli waphinda wathi: “Njengoba nje ku-Adamu bonke besifa, kuKhristu bonke bazakwenziwa baphile.” (1 Khor. 15:22) UPhawuli wayekhuluma ngobani lapho esithi ‘ku-Adamu bonke bayafa’? Wayekhuluma ngabantu bonke abathola isono ku-Adamu futhi abazakufa ngenxa yesono leso. (Rom. 5:12) U-Adamu kakho phakathi kwalabo ‘abazakwenziwa baphile.’ Umhlatshelo kaJesu awusebenzi kuye ngoba wakhetha ukungalaleli yena wayengumuntu ongelasono. Okwehlela u-Adamu kufanana lalokho okuzakwehlela labo “iNdodana yomuntu” ezabahlulela ‘njengezimbuzi, abazabhujiswa phakade.’—Mat. 25:31-33, 46; Heb. 5:9. w20.12 5 ¶13-14

Nxa singatholi umsebenzi wenkonzo othile, kumele sicabange ngesibonelo sezingilosi ezithembekileyo. UJehova wake wazicela ukuthi zitsho indlela ezazicabanga ukuthi zingakhohlisa ngayo inkosi embi u-Ahabi. Lakanye zatsho ezazikucabanga. Kodwa uNkulunkulu wakhetha icebo lengilosi eyodwa waseyitshela ukuthi lizaphumelela. (1 AmaKho. 22:19-22) Kambe ukuthi ezinye izingilosi ezithembekileyo zadana okokuthi ngayinye yazo yazibuza yathi: ‘Kanti vele bengizihluphelani ngikhuluma engikucabangayo?’ Akukhanyi njalo. Izingilosi zithobekile sibili futhi zifuna udumo lonke luye kuJehova. (Abahlu. 13:16-18; Isam. 19:10) Akulasibusiso esedlula ukuba nguFakazi kaJehova lesokutshumayela ngoMbuso wakhe. Imisebenzi yenkonzo kayisiyo esenza sibe ligugu kuNkulunkulu. Ukuthobeka yikho okwenza sibe ligugu kuye lakubafowethu labodadewethu. Yikho khuleka kuJehova umcele ukuthi akuncedise uhlale uthobekile. Cabanga ngezinceku zikaNkulunkulu ezazithobekile esibala ngazo eBhayibhilini. Zimisele ukwenzela abazalwane loba yiphi imisebenzi ongayenza.—1 Phet. 5:5. w20.12 26 ¶16-17

Ingwane yensindiso lithemba uJehova asinika lona. Lithemba lokuthi uJehova uzabanika umvuzo bonke abenza intando yakhe, lelokuthi lanxa singafa, uzasivusa. (1 Thes. 5:8; 1 Tim. 4:10; Tit. 1:1, 2) Ithemba lensindiso livikela indlela esicabanga ngayo. Lisinceda ukuthi sihlale sicabanga ngezithembiso zikaNkulunkulu kulokuthi sikhathazeke kakhulu ngenhlupho esilazo. Sigqoka ingwane yensindiso ngokuba leqiniso lokuthi indlela esicabanga ngayo ihambelana lekaNkulunkulu. Ngokwesibonelo, kasithembi inotho etshabalalayo, kodwa sithemba uNkulunkulu. (Hubo. 26:2; 104:34; 1 Tim. 6:17) Inkemba yomoya yiLizwi likaNkulunkulu iBhayibhili. Inkemba le ilamandla okuveza egcekeni amanga lokukhulula abantu emfundisweni zamanga lasemikhubeni elimazayo. (2 Khor. 10:4, 5; 2 Tim. 3:16, 17; Heb. 4:12) Ukutaditsha lokuqeqetshwa yinhlanganiso kaJehova kuyasinceda ukuthi siyisebenzise kuhle inkemba le.—2 Tim. 2:15. w21.03 27 ¶4; 29 ¶10-11

Lalapho esejele ebotshelwe ukutshumayela ngoJesu, umphostoli uJohane watshengisa ukuthi uyabathanda abanye. Ngokwesibonelo, wabhala ibhuku leSambulo futhi walithumela emabandleni ukuze abazalwane babezazi izinto “okufanele zenzakale masinyane.” (Isam. 1:1) Kanti njalo kumele ukuthi ngesikhathi esekhululiwe wabhala iVangeli lakhe elimayelana lempilo kanye lenkonzo kaJesu. Waphinda wabhala incwadi ezintathu ukuze akhuthaze njalo aqinise abafowabo labodadewabo. Ungamlingisela uJohane ngokutshengisa ukuthi uyabathanda abantu ngalokho okhetha ukukwenza empilweni. Umhlaba lo obuswa nguSathane ufuna uqakathekise okufunwa nguwe kuphela lokuthi ukhande imali kumbe ube ngumuntu odumileyo. Kodwa amaKhristu angaqakathekisi kakhulu akufunayo asebenzisa isikhathi sawo esinengi etshumayela izindaba ezinhle futhi encedisa abantu ukuthi basondele kuJehova. w21.01 10 ¶9-10

UJonathani wayengaba lomhawu ngoDavida. Phela wayeyindodana yeNkosi uSawuli yikho wayengalwela ubukhosi njengoba kunguye owayelelungelo lokulandela uyise esihlalweni. (1 Sam. 20:31) Kodwa wayethobekile futhi eqotho kuJehova. Yikho wasekela uDavida onguye owayekhethwe nguJehova ukuthi abe yinkosi. Wayeqotho lakuDavida lanxa lokhu kwakusenza uSawuli athukuthele. (1 Sam. 20:32-34) UJonathani wayemthanda uDavida yikho kazange abe lomhawu ngaye. Wayeyingcitshi ekusebenziseni idandili futhi wayelisotsha elilesibindi. Yena loyise uSawuli babesaziwa ngokuba ‘lesiqubu kulezingqungqulu lokuba lamandla kulezilwane.’ (2 Sam. 1:22, 23) Ngakho wayengazikhukhumeza ngobuqhawe bakhe. Kodwa kazange azame ukuzenza ongcono kuloDavida futhi kazange abe lomhawu ngezinto ezinhle uDavida ayezenzile. Wayemncoma ngesibindi sakhe lokuthi wayethembela kuJehova. Phela kwakungemva kokuba uDavida ebulele uGoliyathi lapho uJonathani aqalisa khona ukumthanda ngendlela ayezithanda ngayo. w21.01 21 ¶6; 22 ¶8-9

Wonke amaKhristu angaphansi kwenhloko engelasono, uJesu Khristu. Kodwa nxa udadewethu angatshada, uyabe esengaphansi kwenhloko elesono. Lokhu akulula ngezinye izikhathi. Yikho nxa kulomzalwane athandana laye, kumele azibuze imibuzo le: ‘Kukhona yini okutshengisa ukuthi umzalwane lo uzakuba yinhloko yemuli enhle? Uyakuqakathekisa yini ukukhonza uJehova? Nxa engakuqakathekisi, kuyini okwenza ngicabange ukuthi uzangincedisa ekukhonzeni nxa sesitshadile?’ Eminye imibuzo udade ongakatshadi okumele azibuze yona yile: ‘Yibuphi ubuntu obuhle engilabo obuzasinceda nxa sesitshadile? Ngiyabekezela futhi ngiyaphana yini? Ubungane bami loJehova buqinile yini?’ (UmTshu. 4:9, 12) Nxa udade engenza izinqumo ezinhle engakatshadi, yena lomkakhe bazaphumelela futhi bathokoze emtshadweni wabo. Odadewethu abanengi bayazehlisa kubomkabo futhi siyazigqaja ngabo. w21.02 8 ¶1-2

Eminyakeni esanda kwedlula abamemezeli abanengi bakhethe ukufunda olunye ulimi ukuze benze okunengi enkonzweni. Bayancedisa ebandleni elilabamemezeli boMbuso abalutshwana. AmaKhristu la ayazikhethela ukwenza lokhu ukuze enze okunengi ekukhonzeni uJehova. Lanxa kungawathatha iminyaka eminengi ukulukhuluma kuhle ulimi olutsha, ayalinceda kakhulu ibandla. Ubuntu bawo obuhle kanye lolwazi alalo kuyanceda ibandla ukuthi liqine. Asibathontisi sibili abafowethu labodadewethu laba abazimisele ukunceda abanye! Iqula labadala akumelanga liyekele ukukhetha umfowethu ukuthi abe ngumdala kumbe inceku ekhonzayo ngenxa nje yokuthi kakalukhulumi kuhle ulimi olusetshenziswa libandla. Abadala kumele bahlole umfowethu besebenzisa lokho okutshiwo liBhayibhili mayelana lokubekwa kwabadala lezinceku ezikhonzayo hatshi ngokuthi ulukhuluma kuhle kangakanani ulimi olusetshenziswa ebandleni.—1 Tim. 3:1-10, 12, 13; Tit. 1:5-9. w20.08 30 ¶15-16

Abantu abanengi bacabanga ukuthi okungenza bathokoze yikuba lempilakahle, ukukhomba ngophakathi kumbe ukuba lemuli ethokozayo. Kodwa intokozo uJakhobe abhala ngayo iyisithelo somoya kaNkulunkulu futhi kayiyi ngokuthi umuntu uphakathi kwezimo ezinjani. (Gal. 5:22) Okwenza umKhristu athole intokozo yeqiniso yikwazi ukuthi uthokozisa uJehova lokuthi ulingisela uJesu. (Luk. 6:22, 23; Kol. 1:10, 11) Intokozo yethu singayifanisa lelangabi eliphakathi kwesibane. Ilangabi leli livikelwa liglasi ukuze izulu kumbe umoya kungalicitshi. Lathi singenelisa ukuqhubeka sithokoza kungelani lokuthi kuyini okwenzakala empilweni zethu. Intokozo yethu izaqhubeka ibhebha kungelani lokuthi siyagula kumbe kasilamali. Kayisoze icitshe kungelani lokuthi abantu basenza inhlekisa kumbe abangakithi loba abanye abantu bayasiphikisa. Lanxa abantu bangaze bakwenze lokhu, kayisoze icitshe kodwa izaqhubeka ikhanya bha. Inhlupho ezisehlelayo ngenxa yalokho esikukholwayo zitshengisa ukuthi singabafundi bakaKhristu beqiniso. (Mat. 10:22; 24:9; Joh. 15:20) Yikho uJakhobe wabhala amazwi asembhalweni walamuhla. w21.02 28 ¶6

Zama ukubamba ngekhanda amavesi atshengisa ukuqakatheka kokuhlaliseka lokuthemba uJehova. Okungakunceda ukuthi wenze njalo yikuwabalela phezulu kumbe ukuwabhala phansi futhi uhlale uwabuyelela. UJehova watshela uJoshuwa ukuthi ahlale ebala ibhuku loMthetho ngelizwi eliphansi ukuze aphumelele kulokho akwenzayo. Ayezakubala ebhukwini lelo kwakuzamnceda lokuthi angesabi, kodwa abe lesibindi sokukhokhela abantu bakaNkulunkulu. (Josh. 1:8, 9) Manengi amavesi angakunceda ukuthi uhlaliseke ezimeni ebezingabangela ukuthi ukhathazeke kumbe wesabe. (Hubo. 27:1-3; Zaga. 3:25, 26) Nxa sisemihlanganweni yebandla, kuyasikhuthaza ukuzwa izinkulumo lezimpendulo zabafowethu labodadewethu kanye lokuxoxa labo. (Heb. 10:24, 25) Okunye okusikhuthazayo yikutshela umngane ebandleni lokho okusikhathazayo. w21.01 6 ¶15-16

Ngesikhathi ubhabhathizwa watshengisa ukuthi ulokholo oluqinileyo lokuthi uyamthemba njalo wathokoza ukukwamukela ngazo zombili emulini yakhe. Khathesi sekumele uqhubeke uthembela kuye. Kulula ukuthi uthembele kuJehova nxa kumele wenze izinqumo eziqakatheke kakhulu kodwa uzakwenzani nxa sekumele wenze lezo ezingaqakathekanga kangako? Kuqakathekile ukuthi uthembele kuJehova kuzo zonke izinqumo ozenzayo kungelani lokuthi ngeziphathelane lalokho ozilibazisa ngakho, imisebenzi ofuna ukuyenza loba okunye nje empilweni. Ungathembi okwakho ukuhlakanipha kodwa dinga ukuthi iBhayibhili lithini ubususenza lokho elikutshoyo. (Zaga. 3:5, 6) Nxa ungenza njalo uJehova uzathokoza futhi labanye ebandleni bazakuhlonipha. Ulesono njengathi sonke yikho ngezinye izikhathi uzaphambanisa. Kodwa lokho akumelanga kukuvimbe ukuthi wenze konke okusemandleni akho enkonzweni kaJehova. w21.03 6 ¶14-15

Abangakini bayakuphikisa yini ngenxa yokuthi ukhonza uJehova? Uhlala elizweni lapho umsebenzi wethu ongavunyelwa khona ngokupheleleyo yini kumbe lapho eminye imisebenzi yethu engavunyelwa khona? Nxa kunjalo kungakunceda ukubala u-2 Thimothi 1:12-16 lo-4:6-11, 17-22. Umphostoli uPhawuli wabhala amavesi la ngesikhathi esejele. Ungakabali amavesi la, tshela uJehova ngohlupho lwakho lokuthi lukwenza uzizwe njani. Mtshele khona kanye okuzwayo ubusumcela ukuthi akuncedise uthole izifundo kulokho okwenzakala kuPhawuli ezizakusiza ukwazi okumele ukwenze. UJehova wayevele emtshelile uPhawuli ukuthi uzahlukuluzwa ngenxa yokuba ngumKhristu. (ImiSeb. 21:11-13) Manje wamncedisa njani? Waphendula imithandazo yakhe futhi wayemnika amandla. UJehova wamtshela ukuthi uzawuthola umvuzo ayewusebenzele nzima kangaka. Waphinda wasebenzisa abangane bakhe abaqotho ukuthi bamncedise. w21.03 17-18 ¶14-15, 19