September

UPhetro wasebenzisa amazwi atshiyene kancane lalawo asesiphrofethweni sikaJoweli. (ImiSeb. 2:16, 17) Kulokuthi aqalise ngokuthi ‘ngemva kwalokho,’ uPhetro wathi: “Ezinsukwini zokucina,” esitsho isikhathi iJerusalema lethempeli lingakabhujiswa. Ngalesosikhathi umoya kaNkulunkulu wawuzathululwa “kuyo yonke imihlobo yabantu.” Lokhu kutshengisa ukuthi kwadlula isikhathi eside isiphrofetho sikaJoweli singakagcwaliseki. Ngemva kokuthululwa komoya kaNkulunkulu ngesikhathi sabaphostoli, amaKhristu aqalisa umsebenzi wokutshumayela owawuzakwenziwa emhlabeni wonke. Ngesikhathi umphostoli uPhawuli ebhala incwadi yabaseKholose ngabo-61 C.E., wayeqinisile sibili lapho esithi izindaba ezinhle zasezitshunyayelwe “kukho konke okudaliweyo okungaphansi kwezulu.” (Kol. 1:23) Ngesikhathi esithi “konke okudaliweyo” wayesitsho izindawo lapho yena labanye ababengatshumayela khona. Khathesi umsebenzi wokutshumayela usuqhele waze wafika “emaphethelweni omhlaba” ngenxa yokuthi umoya ongcwele kaJehova olamandla ubusincedisa.—ImiSeb. 13:47. w20.04 6-7 ¶15-16

UJehova uthanda ngamunye wethu kuhlanganise laloba yiphi imvu esiphambuke emhlambini wakhe. (Mat. 18:12-14) Wathembisa ukuthi wayezadinga izimvu zakhe ezilahlekileyo futhi azincedise ukuthi ziphinde zibe ngabangane bakhe. Waphinda watsho ukuthi uzazihlenga njani. Lokhu ayezakwenza kuhambelana lokwakusenziwa ngumelusi wako-Israyeli nxa imvu ilahlekile. (Hez. 34:12-16) Okokuqala, umelusi kwakumele ayidinge imvu leyo futhi lokhu kwakungadinga isikhathi lamandla. Kwakusithi angayithola ayilethe emhlambini. Kanti njalo nxa yayilimele kumbe ilambile, umelusi wayetshengisa ukuthi uyayithanda imvu le ebuthakathaka ngokuyibopha lapho elimele khona, ayithwale futhi ayinike ukudla. Abadala bebandla bangabelusi ‘bomhlambi kaNkulunkulu’ yikho kumele benze okufananayo ukuze bancedise loba ngubani osephambukile. (1 Phet. 5:2, 3) Bayamdinga, bamncedise abuyele ebandleni njalo batshengise ukuthi bayamthanda ngokumsiza ukuthi abe ngumngane kaJehova. w20.06 20 ¶10

Kambe okwenza uJesu wabona amasimu eselindele ukuvunwa yikuthi wayekhangelele ukulandelwa ngabantu abanengi yini? Ngitsho lakancane. IMibhalo yayitshilo ukuthi balutshwana abantu ababezakuba lokholo kuye. (Joh. 12:37, 38) Kanti njalo uJesu wayesenelisa ukubona okusenhliyizweni yomuntu. (Mat. 9:4) Lanxa wagxila ebantwini abalutshwana ababezakuba lokholo kuye, watshumayeza bonke abantu ngentshiseko. Thina asenelisi ukubona okusenhliziyweni zabantu yikho akumelanga sahlulele muntu kumbe insimu esiyitshumayelayo. Kodwa kumele sibe lethemba lokuthi bangaba ngabafundi bakaJesu. Asikhumbuleni lokho uJesu akutshela abafundi bakhe. Amasimu asemhlophe okutsho ukuthi aselindele ukuvunwa. Abantu bangatshintsha babe ngabafundi bakaKhristu. UJehova ulethemba lokuthi abantu abasensimini yethu bangaba ngabafundi futhi ubabona ‘bengabathandwayo’ kumbe beligugu. (Hag. 2:7) Nxa singabona abantu ngendlela uJehova loJesu abababona ngayo sizazama ukwazi ukuthi kuyini abakuthandayo lokuthi bangabantu abanjani sibili. Kasisoze sicabange ukuthi ngeke batshintshe kodwa sizakuba lethemba lokuthi bangaba ngabafowethu labodadewethu. w20.04 13 ¶18-19

ILizwi likaNkulunkulu lisitshela ukuthi kumele sibe ngabangane bakaJesu futhi siqhubeke siyibo ukuze sithokozise uJehova. Okunye okumele sikwenze ukuze sibe ngabangane bakaJesu yikuthi simazi. Lokhu singakwenza ngokubala uMathewu, uMakho, uLukha loJohane. Ukucabangisisa ngendaba eziseBhayibhilini ezisitshela ngempilo kaJesu kuzasenza simthande futhi simhloniphe ngenxa yendlela enhle ayephatha ngayo abantu. Ngokwesibonelo, lanxa wayeyiNkosi yabafundi bakhe, kazange abaphathe njengezigqili. Kodwa wayebatshela lokho ayekucabanga lendlela ayezizwa ngayo. Wayebuzwa ubuhlungu ababebuzwa njalo wayekhala labo. (Joh. 11:32-36) Lababemphikisa babevuma ukuthi wayengumngane walabo ababemlalela. (Mat. 11:19) Nxa singalingisela uJesu endleleni ayephatha ngayo abafundi bakhe, ubungane bethu labanye buzaqina, sizasuthiseka, sithokoze njalo sizamthanda kakhulu uJesu futhi simhloniphe. w20.04 22 ¶9-10

Kusiyafika u-1870 iBritain yayisibusa ezindaweni ezinengi ukwedlula wonke amazwe futhi yayilebutho elilamandla kulawo wonke emhlabeni. Umbuso lo umelwa luphondo oluncane olwanqoba impondo ezintathu. Impondo lezo yiFrance, leSpain leNetherlands. (Dan. 7:7, 8) IBritain yiyo eyaba yinkosi yaseningizimu kwaze kwaba phakathi kweMpi Yomhlaba Yokuqala. Ngesikhathi leso iMelika yayisinothe ukwedlula wonke amazwe futhi yaqalisa ukusebenza ndawonye leBritain. Ngesikhathi seMpi Yomhlaba Yokuqala, iMelika leBritain (i-Anglo-America) zancedisana empini futhi zaba lamandla amakhulu. Ngalesosikhathi zabambana njalo zaba ngamazwe alamandla kulawo wonke. Inkosi le yaba lebutho ‘elikhulu futhi elilamandla’ njengoba nje uDanyeli wayephrofethile. Kusukela izinsuku zokucina zaqala, inkosi yaseningizimu ilokhu iyiBritain leMelika. w20.05 4 ¶7-8

Umhlaba ulamanzi ngenxa yokuthi uqhelelane lelanga ngebanga elifaneleyo. Ngabe wasondela kancane elangeni, amanzi wonke akuwo abezakutsha futhi ubuzatshisa njalo wome okokuthi bekungeke kuphileke kuwo. Aluba umhlaba ubungathi tshedu kancane uqhelelane lelanga, bekuzaqanda kakhulu njalo kugcwale ungqwaqwane. UJehova wafaka umhlaba endaweni efaneleyo yikho kulomjikelezo wamanzi owenza kuphileke kuwo. Ilanga lidonsa amanzi aselwandle lakwezinye indawo ezisemhlabeni abesephakama abumbe amayezi. Umnyaka ngamunye ilanga lidonsa amamiliyoni lamamiliyoni amalitha amanzi. Amanzi la aba semkhathini okwensuku ezingaba litshumi engakathululeki elizulu loba ungqwaqwane. Ngemva kwalokho ayabuyela elwandle lakwezinye izindawo ezilamanzi ubusuqala kutsha umjikelezo. UJehova wenza umjikelezo lo ukuze kuhlale kulamanzi emhlabeni. Lokhu kutshengisa ukuthi uhlakaniphile futhi ulamandla.—Jobe. 36:27, 28. w20.05 22 ¶6

UJesu wasikhuthaza ukuthi sihlale sithandaza sicela umoya ongcwele. (Luk. 11:9, 13) UJehova usebenzisa umoya ongcwele ukusinika “amandla amakhulu futhi angajayelekanga.” (2 Khor. 4:7) Umoya ongcwele uyasinceda ukuthi siqinisele kuloba yibuphi ubunzima esingaba phakathi kwabo. Kanti njalo umoya ongcwele uyathuthukisa iziphiwo esingabe silazo ukuze senelise ukwenza imisebenzi esiyiphiwe nguNkulunkulu. Yikho siyakwazi ukuthi umoya ongcwele yiwo kuphela osinceda ukuthi siphumelele enkonzweni kaNkulunkulu. Singatshengisa ukuthi siyawuqakathekisa umoya ongcwele ngokuthandaza sicela ukuthi usincedise sizihlole ukuze sibone langabe silemicabango loba izifiso ezimbi. (Hubo. 139:23, 24) Nxa singenza njalo, uJehova uzawusebenzisa ukuthi sinanzelele imicabango emibi kumbe izifiso ezimbi esingabe silazo. Singavele sikunanzelele lokhu, kuyabe sekumele sithandaze sicela umoya ongcwele ukuthi usinike amandla okulwisana lakho. Nxa sisenza njalo, uJehova uzabona ukuthi kasifuni ukwenza loba yini ezabangela ukuthi angasincedisi ngomoya wakhe.—Efe. 4:30. w20.05 28-29 ¶10-12

Nxa silwela ibizo likaJehova siyabe silingisela uJesu Khristu. UJesu kazange enze ibizo likaYise laziwe ngokulisebenzisa kuphela kodwa waphinda wafundisa abantu ukuthi uJehova unjani sibili. Ngokwesibonelo, wayengavumelani labaFarisi ababesenza uJehova akhanye elesihluku, enguNkulunkulu ofuna abantu benze okwedlula lokho abangenelisa ukukwenza, okhatshana labo futhi ongelasihawu. Wancedisa abantu bazwisisa ukuthi uYise kakhangelelanga ukuthi benze lokho abangenelisi ukukwenza, uyabekezela, ulothando njalo uyathethelela. Waphinda wabancedisa bamazi uJehova ngokulingisela ubuntu bakhe ngokupheleleyo kukho konke ayekwenza. (Joh. 14:9) Lathi singalingisela uJesu ngokutshela abantu ngoJehova. Nxa singenza njalo bazalazi futhi balihloniphe ibizo likaNkulunkulu elingcwele. Singabafundisa lokuthi unguNkulunkulu olothando lomusa. Nxa sisenza njalo siyabe sitshengisa ukuthi izinto ezimbi ezikhulunywe ngabaphikisi ngoJehova zingamanga. Singcwelisa ibizo likaJehova ngokuncedisa abantu ukuthi balibone lingcwele. Amazwi ethu lezenzo zethu kutshengisa abantu ukuthi uJehova unjani sibili. Silwela ibizo lakhe ngokubancedisa ukuthi balazi iqiniso ngaye. w20.06 6 ¶17-18

Singazisebenzisa ngendlela enhle ezokuxhumana, ngokwesibonelo nxa sithintana lezihlobo labangane. Kodwa uyake ukunanzelele yini ukuthi okunye okufakwa ngabantu kwezokuxhumana ngokokufuna ukubukwa? Kukhanya bafuna ukuhlala bebukwa. Abanye baze babhale amazwi atshengisa ukudelela kanye lezinto ezilihlazo emapikitsheni abo kumbe kwayabe efakwe ngabanye. Kodwa amaKhristu akhuthazwa ukuthi athobeke njalo athandane yikho kawasoze asebenzise ezokuxhumana ngendlela enjalo. (1 Phet. 3:8) Nanku ongazibuza khona nxa usebenzisa ezokuxhumana: ‘Engikubhalayo kanye lamapikitsha kumbe amavidiyo engiwafakayo akwenzi abanye bacabange ukuthi ngiyaziphakamisa yini? Kungenza abanye babe lomhawu yini?’ AmaKhristu kawaziboni engcono kulabanye kumbe afune ukubukwa kodwa alalela iseluleko seBhayibhili esisembhalweni walamuhla. Nxa sithobekile kasisoze senze njengabantu bomhlaba lo abazigqajayo njalo abafuna ukuthi abanye bababone bengcono kulalokho abayikho khona.—1 Joh. 2:16. w20.07 6 ¶14-15

Umphostoli uPhawuli wayeziphakamisa futhi ehlukuluza abalandeli bakaJesu engakabi ngumKhristu. (ImiSeb. 7:58) Ngalesosikhathi esabizwa ngokuthi nguSawuli, uJesu ngokwakhe wamvimba ukuthi angahlaseli amaKhristu. Wakhuluma laye esezulwini njalo wamenza waba yisiphofu. UPhawuli kwasekumele ayedinga uncedo ebantwini ayebahlukuluza ukuze aphinde abone. Wathobeka wavuma ukuncediswa ngumfundi okwakuthiwa ngu-Ananiya owamvula amehlo. (ImiSeb. 9:3-9, 17, 18) Ngokuhamba kwesikhathi uPhawuli waba ngumKhristu owaziwa kakhulu kodwa kazange akukhohlwe akufundiswa nguJesu ngesikhathi esiya eDamaseko. Waqhubeka ethobekile njalo wavuma ukuncediswa ngabafowabo labodadewabo. Wathi ‘babemqinisa.’—Kol. 4:10, 11, amabala angaphansi. w20.07 18-19 ¶16-17

UJehova unguSomandla kodwa uyanika abanye imisebenzi yokwenza. Ngokwesibonelo, wakhetha uJesu ukuthi abe yiNkosi yoMbuso wakhe futhi uzanika abangu-144 000 abazabusa loJesu eminye imisebenzi. Asithandabuzi ukuthi uJehova waqeqetsha uJesu ukuthi abe yiNkosi loMphristi Omkhulu. (Heb. 5:8, 9) Uphinda aqeqetshe lalabo abazabusa loJesu ukuthi bawenze kuhle umsebenzi wabo kodwa kasoze abalandelele ngoba uyathemba ukuthi bazakwenza intando yakhe. (Isam. 5:10) Nxa kuyikuthi uBaba wethu osezulwini ongadingi ukuncediswa ngumuntu enika abanye imisebenzi kutsho ukuthi thina kumele sikwenze kakhulu lokhu. Ngokwesibonelo, nxa uyinhloko yemuli kumbe ungumdala webandla lingisela uJehova ngokunika abanye imisebenzi futhi ungabalandeleli. Nxa ungenza njalo, umsebenzi uzakwenziwa futhi uyabe uqeqetsha abanye njalo ubancedisa ukuthi bangesabi ukwenza imisebenzi.—Isaya. 41:10. w20.08 9 ¶5-6

UJehova ufuna sizibone njani izimvu zakhe ezilahlekileyo? Singafunda kulokho okwenziwa nguJesu. Wayekwazi ukuthi zonke izimvu zikaJehova ziligugu kuye yikho wenza konke ayengakwenza ukuthi ancedise ‘izimvu ezilahlekileyo zendlu yako-Israyeli.’ (Mat. 15:24) UJesu ngumelusi omuhle ngakho waphinda wenza konke okusemandleni akhe ukuthi angalahlekelwa langeyodwa yezimvu zikaJehova. (Joh. 6:39) Umphostoli uPhawuli wakhuthaza abadala bebandla le-Efesu ukuthi balingisele uJesu. Wathi: “Kumele lincedise ababuthakathaka njalo lihlale likhumbula amazwi akhulunywa yiNkosi uJesu ngokwayo, athi: ‘Ukupha kuyathokozisa kakhulu ukwedlula ukwamukela.’” (ImiSeb. 20:17, 35) Ivesi le itshengisa ukuthi abadala balomsebenzi oqakathekileyo wokunakekela abantu bakaJehova. Umdala webandla waseSpain okuthiwa nguSalvador uthi: “Ukucabanga ngendlela uJehova athanda ngayo izimvu zakhe ezilahlekileyo kwenza ngizimisele ukwenza konke okusemandleni ami ukuthi ngizincedise. Ngiyakwazi ukuthi uJehova ufuna ngizinakekele izimvu zakhe.” w20.06 23 ¶15-16

UJehova uzabekezela kuze kuphele iminyaka eyinkulungwane engakakhangeleli ukuthi sibe ngabantu abapheleleyo. Uzaqhubeka esithethelela kuze kube yilesosikhathi. Kumele simlingisele, sibone okuhle okwenziwa ngabanye futhi sibabekezelele. UJesu lezingilosi bathokoza ngesikhathi umhlaba udalwa. Kodwa kumele ukuthi bazathokoza kakhulu bewu-bona usugcwele abantu abangelasono, abathanda uJehova futhi abamkhonzayo. Akucabange ukuthi labo abazabusa loKhristu bazathokoza kangakanani bebona ukuthi umsebenzi wabo ubanceda njani abantu. (Isam. 4:4, 9-11; 5:9, 10) Cabanga lokuthi kuzabe kumnandi njani ukuphila nxa sekusehla ezentokozo hatshi ezobuhlungu, sekungasela kugula, usizi lokufa. Ngakho qhubeka uzimisele ukulingisela uYihlo olothando, ohlakaniphileyo futhi obekezelayo. Nxa ungenza njalo uzahlala uthokoza kungelani lobunzima obukwehlelayo. (Jak. 1:2-4) Simbonga singaqedi uJehova ngesithembiso sakhe sokuthi “abafileyo bazavuswa.”—ImiSeb. 24:15. w20.08 19 ¶18-19

IBhayibhili yisipho esivela kuNkulunkulu esitshengisa ukuthi uyasithanda. UBaba wethu osezulwini waphefumulela abantu ukuthi balibhale ngoba ulendaba lathi. Usebenzisa iBhayibhili ukuthi aphendule imibuzo eqakatheke kakhulu esingaba layo. Eminye yakhona ngethi: Savela ngaphi? Siphilelani? Kuzakwenzakalani esikhathini esizayo? UJehova ufuna bonke abantwabakhe bathole izimpendulo zemibuzo le yikho okweminyaka eminengi wenza amadoda athile ahumutsha iBhayibhili ngendimi ezinengi. Lamuhla iBhayibhili elipheleleyo kumbe izingxenye zalo litholakala ngendimi ezedlula 3 000. Lihunyutshwe ngendimi ezinengi njalo litholakala endaweni ezinengi ukwedlula loba yiliphi ibhuku. Singatshengisa ukuthi siyaliqakathekisa ngokulibala nsuku zonke, ngokucabangisisa ngelikufundisayo langokwenza konke okusemandleni ethu ukuthi sisebenzise esikufundayo. Sitshengisa lokuthi siyambonga uNkulunkulu ngokwenza konke esingakwenza ukuthi sitshele abantu abanengi ngomlayezo oseBhayibhilini.—Hubo. 1:1-3; Mat. 28:19, 20. w20.05 24-25 ¶15-16

Umphrofethi uJeremiya kwakumele atshumayele endaweni eyayilabantu abanengi abangalaleliyo. Wake wadana kakhulu waze wafisa ukuyekela ukutshumayela. Kodwa kazange ayekele. Ngenxa yani? ‘Ilizwi likaJehova’ lalinjengomlilo ovalelwe phakathi kwakhe futhi wayengasenelisi ukuthula. (Jer. 20:9) Lathi sizaba njengoJeremiya nxa singabala iLizwi likaNkulunkulu nsuku zonke njalo sicabangisise ngalo. Singenza njalo sizathokoza kakhulu ekutshumayeleni futhi abantu abanengi bazasilalela. (Jer. 15:16) Yikho nxa udanile khuleka uncenga uJehova ukuthi akusekele. Uzakunceda ukuthi ulwisane lamaphutha akho, ungazikhangeleli phansi njalo uzakusekela nxa ugula. Uzakunceda ukuthi uyibone ngendlela eqondileyo imisebenzi yenkonzo. Kanti njalo uzakuncedisa ukuthi ukukholise ukutshumayela. Khuleka kuYihlo okuthandayo umtshele indlela ozizwa ngayo. Uzakuncedisa ukuthi ukunqobe ukudana kakhulu. w20.12 27 ¶20-21

Kwabanye odadewethu imihlangano yebandla ngeminye yemibuthano emilutshwana abalayo ebanika ithuba lokuba labanye. Yikho kumele sibamukele, sixoxe labo njalo sibe lendaba labo. Kumele silingisele uJesu sizinike isikhathi sokuba labo. (Luk. 10:38-42) Mhlawumbe singabanxusa bazokudla lathi kumbe ukuthi siyezilibazisa labo. Kodwa kumele sibe leqiniso lokuthi esikutshoyo kuyakhuthaza. (Rom. 1:11, 12) Abadala kumele balingisele indlela uJesu ayecabanga ngayo. Wayekwazi ukuthi abanye kungabathwalisa nzima ukungatshadi kodwa wakwenza kwacaca ukuthi ukutshada kumbe ukuba labantwana ayisikho okungenza umuntu ahlale ethokoza. (Luk. 11:27, 28) Okungenza ahlale ethokoza yikuqakathekisa ukukhonza uJehova ukwedlula loba yini. (Mat. 19:12) Abadala kumele baphathe abesifazana abangamaKhristu njengabodadewabo labonina. Kufanele bazinike isikhathi sokuxoxa labo imihlangano yebandla ingakaqalisi kumbe isiphelile. w20.09 21-22 ¶7-9

Ko-Israyeli umlimi wayehlanyela sekune izulu lokuqala phakathi kuka-October aze ayevuna ngemva kokuna kwelokucina phakathi kuka-April. (Mak. 4:28) Siyabe sihlakaniphile nxa silingisela indlela umlimi abekezela ngayo. Kodwa lokho akulula. Izikhathi ezinengi abantu abalesono bafuna ukubona impumela yemisebenzi yabo masinyane. Kodwa nxa sifuna izilimo zethu zikhule futhi zithele kumele sihlale sizinakekela. Lokhu sikwenza ngokugebha silungise indawo, sihlanyele, sikhiphe ukhula besesithelela. Ukwenza abafundi lakho kudinga ukuthi sisebenze nzima. Kuthatha isikhathi ukuthi sincedise esifunda labo bafunde ukungabandlululi lokuthi babe lothando. Ukubekezela kuzasinceda ukuthi singadani nxa abantu bengasilaleli. Lanxa abanye belalela futhi bezimisele ukwenza lokho okutshiwo liBhayibhili kumele sibekezele ngoba ngeke sibabambe ngamandla ukuthi babe lokholo. Phela labafundi bakaJesu kwezinye izikhathi babephuza ukuzwisisa izinto ayezifundisa. (Joh. 14:9) Kasihlaleni sikhumbula ukuthi lanxa singahlanyela futhi sithelele nguNkulunkulu okhulisayo.—1 Khor. 3:6. w20.09 11 ¶10-11

Sonke siyafuna ukuthi abantu esibafundisayo bathuthuke baze babhabhathizwe. Enye indlela eqakathekileyo esingabancedisa ngayo yikubakhuthaza ukuthi bangene imihlangano yebandla. Izikhathi ezinengi abafundi abahle bayingene bathuthuka masinyane. Abanye bachasisela abafundi babo ukuthi kunengi abazakufunda emihlanganweni abangeke bakufunde esifundweni sabo. Bala uHebheru 10:24, 25 lomfundi wakho ubusumtshela ukuthi kuzamnceda ngani ukungena imihlangano. Mxoxele ngokunye elisanda kukufunda kuyo. Lokhu kuzamenza afise ukubuya ukwedlula ukuphongumnxusa. Azakuzwa lazakubona mhla eqalisa ukungena imihlangano kuzadlula loba yini ake wayizwa kumbe wayibona esontweni ethile. (1 Khor. 14:24, 25) Uzahlangana labanye abenza kuhle angabalingisela futhi abazamncedisa ukuthi athuthuke aze abhabhathizwe. w20.10 10-11 ¶14-15

Umoya kaNkulunkulu uzakuncedisa ukuthi ukusebenzise lokho okufunda eLizwini lakhe. Thandaza njengomhubi owathi: “Ngifundisa indlela yakho, O Jehova, ukuze ngihambe eqinisweni lakho; ngipha inhliziyo engaxamalazanga, ukuze ngilesabe ibizo lakho.” (Hubo. 86:11) Ngakho qhubeka utaditsha iBhayibhili lamabhuku esiwaphiwa yinhlanganiso kaJehova. Inhloso yakho akumelanga ibe ngeyokuba lolwazi kuphela kodwa lokho okufundayo kumele kuthophele enhliziyweni yakho futhi ukusebenzise. Umoya kaJehova uzakuncedisa ukuthi wenze njalo. Kanti njalo kumele ukhuthaze abafowenu labodadewenu ngoba bangamalunga emuli yakho. (Heb. 10:24, 25) Thandaza ucele ukuthi umoya kaNkulunkulu ukuncedise unike impendulo ezizakhuthaza abanye emihlanganweni yebandla futhi ulungiselele okuzwayo nxa ulenkulumo. Nxa ungenza njalo uyabe utshengisa uJehova leNdodana yakhe ukuthi uyazithanda ‘izimvu’ zabo eziligugu. (Joh. 21:15-17) Ngakho lalela uMfundisi Omkhulu ngokudla konke ukudla asilungiselele khona edilini lakhe. w20.10 24-25 ¶15-17

UJesu wabanceda njani abaphostoli bakhe ababedanile? Esanda kuvuswa watshela abanye abalandeli bakhe wathi: “Lingesabi! Hambani liyebikela abafowethu [ukuthi sengivusiwe].” (Mat. 28:10a) Kazange abakhalale abaphostoli bakhe. Wababiza ngokuthi ‘ngabafowabo’ lanxa babeke bamtshiya. Wayelozwelo futhi ethethelela njengoJehova. (2 AmaKho. 13:23) Lathi njengoJehova loJesu, silendaba lalabo abangasayifezi inkonzo. Phela balokhu bengabafowethu labodadewethu futhi siyabathanda. Silokhu siyikhumbula imisebenzi abayenzayo lothando abalutshengisayo. Abanye babo basebenza nzima okweminyaka eminengi. (Heb. 6:10) Siyabakhumbula sibili! (Luk. 15:4-7) Ngakho kumele sibakhuthaze abangasayifezi inkonzo ukuthi bangene imihlangano yebandla. Nxa sibona umfowethu kumbe udadewethu ongasayifezi inkonzo ebuya eWolu yoMbuso, kumele simlande futhi simenze akhululeke. w20.11 6 ¶14-17

UJakhobe loJohane kanye lonina uSalome bamlanda uJesu bacela ukuthi abenzele into ayengelamvumo yokuyenza. UJesu wahle wabatshela ukuthi uYise osezulwini nguye kuphela owayengatsho ukuthi ngubani ozahlala esandleni sakhe sokudla lakwesenxele eMbusweni. (Mat. 20:20-23) Watshengisa ukuthi uyakwazi ukuthi kulezinto ayengelamvumo yokuzenza. Wayethobekile ngoba kazange enze izinto uJehova ayengamthumanga ukuthi azenze. (Joh. 12:49) Singamlingisela njani? Silingisela isibonelo sikaJesu sokuthobeka ngokulalela iseluleko esisembhalweni walamuhla. Yikho nxa abanye becela ukuthi sibacebise akumelanga sibatshele esikucabangayo kumbe sikhulume singazange sicabangisise ngendaba yakhona. Kodwa kumele sisebenzise iBhayibhili lamabhuku ethu. Nxa singenza njalo siyabe sivuma ukuthi kulezinye izinto esingazaziyo. Kanti njalo siyabe sithobekile ngoba siyabe sitshengisa ukuthi ‘izahlulelo zikaSomandla zilungile.’—Isam. 15:3, 4. w20.08 11-12 ¶14-15

Kuyini okumele ucabange ngakho nxa ufuna ukweluleka umngane? Ungakamlandi zibuze, ‘Sengilunge ngedlulisa yini?’ Umuntu olunge wedlulisa wahlulela abanye ngendlela yakhe hatshi ekaJehova futhi kalazwelo. Nxa ungathi usuzihlolile ubusubona ukuthi kumele uyekhuluma lomngane wakho, mtshele akuphambanisileyo njalo umbuze imibuzo ezamnceda abone iphutha lakhe. Woba leqiniso lokuthi okutshoyo kusekelwe eBhayibhilini njalo ukhumbule ukuthi ayisuwe okumele wahlulele umngane wakho kodwa nguJehova. (Rom. 14:10) Sebenzisa iLizwi likaNkulunkulu nxa unika omunye iseluleko njalo ube lozwelo njengoJesu. (Zaga. 3:5; Mat. 12:20) Phela uJehova uzasiphatha ngendlela esiphatha ngayo abanye.—Jak. 2:13. w20.11 21 ¶13

Uyafuna yini ukuthi abantu bakwahlulele ngombala wesikhumba sakho, ngendlela okhangeleka ngayo ebusweni kumbe ngokuthi ulomzimba onganani? Kumele ukuthi kawufuni. Kuyaduduza ukwazi ukuthi uJehova kasahluleli ngalokho abantu abakubona kithi. Ngokwesibonelo, ngesikhathi uSamuyeli ekhangela amadodana kaJese, kazange abone lokho uJehova ayekubona. UJehova wayemtshele ukuthi enye yamadodana kaJese yayizakuba yinkosi yako-Israyeli. Kodwa yiphi yakhona? Ngesikhathi uSamuyeli ebona u-Eliyabi izibulo likaJese wathi: “Impela ogcotshiweyo kaJehova umi lapha phambi kukaJehova.” U-Eliyabi wayekhangeleka njengenkosi. “Kodwa uJehova wathi kuSamuyeli, ‘Ungakhangeli isimo sakhe loba ubude bakhe, ngoba ngimalile.’” Sifundani? UJehova waqhubeka esithi: “Abantu bakhangela isimo somuntu, kodwa uJehova ukhangela inhliziyo.” (1 Sam. 16:1, 6, 7) Kumele silingisele uJehova endleleni esiphatha ngayo abafowethu labodadewethu. w20.04 14 ¶1; 15 ¶3

UJesu wayekade edabula phakathi kwamasimu okungenzeka ayengawebhali eyayisanda kumila. (Joh. 4:3-6) Kwakusasele inyanga ezingaba zine ukuthi ibhali le ivunwe. Wakhuluma amazwi ayengazwakala emangalisa, wathi: “Phakamisani amehlo enu likhangele amasimu, asemhlophe njalo aselindele ukuvunwa.” (Joh. 4:35, 36) Wayesitshoni? Kukhanya wayekhuluma ngokuvunwa kwabantu hatshi okwezilimo. Cabanga ngalokho okwakusanda kwenzakala. Lanxa amaJuda lamaSamariya ayengadlelani, uJesu wayetshumayeze owesifazana ongumSamariya futhi wayemlalele. Ngesikhathi uJesu ekhuluma ngokuthi amasimu “asemhlophe njalo aselindele ukuvunwa” kwakuthutsha ixuku lamaSamariya elalizofunda okunengi ngaye selizwe lokho owesifazana ayekutshilo. (Joh. 4:9, 39-42) Elinye ibhuku elichasisa iBhayibhili lithi: “Khona nje ukuthi abantu beza masinyane kuJesu bezomlalela . . . kwatshengisa ukuthi babenjengezilimo ezilindele ukuvunwa.” w20.04 8 ¶1-2

Imihlangano yebandla isinceda lokuthi sithuthukise indlela esitshumayela lesifundisa ngayo. Ngokwesibonelo, sifundiswa ukusebenzisa kuhle amathuluzi aseBhokisini Elilamathuluzi Okufundisa. Yikho yilungiselele kuhle imihlangano yebandla. Lalelisisa nxa ukuyo futhi ukusebenzise okufundileyo. Ungenza njalo, uzakuba ‘lisotsha elihle likaKhristu uJesu.’ (2 Tim. 2:3) Siphinda sincediswe ngamamiliyoni ezingilosi ezilamandla. Ingilosi eyodwa ingenza izimanga ezesabekayo! (Isaya. 37:36) Khathesi cabanga ngokungenziwa libutho lezingilosi ezilamandla. Kakulabantu kumbe amadimoni angalinqoba ibutho leli. UJehova unguSomandla, yikho nxa elathi, kakula baphikisi abangasinqoba kungelani lokuthi bangaki. (Abahlu. 6:16) Kukhumbule lokhu nxa udaniswe ngokukhulunywe kumbe ngokwenziwe ngomunye osebenza laye loba isihlobo esingasiFakazi. Kawuwedwa empini oyilwayo. UJehova uyakusekela ngoba wenza lokho akutshela khona. w21.03 29 ¶13-14

Kungenzakala umphostoli uPhawuli wayekhuluma ngamazwi aku-Isaya 22:13 aveza umcabango ofananayo ama-Israyeli ayelawo. Ayeqakathekisa ukuzijabulisa kulokuthi asondele kuNkulunkulu. Ayecabanga ukuthi kumele azikholisele impilo nje ngoba umuntu angafa loba nini. Lalamuhla bakhona abantu abacabanga njalo. Lokhu kutshengisa ukuthi kumele sikhethe kuhle abangane ngoba thina siyakwazi ukuthi uJehova uzabavusa abantu abafileyo. Abazalwane beKhorinte kwakungamelanga bajayelane labantu ababengakholwa ukuthi abafileyo bazavuswa. Nanku esikufundayo: Nxa singaqeda isikhathi esinengi labantu abaqakathekisa ukuzijabulisa, abangelandaba lalokho okuzakwenzakala kusasa singacina sesilemicabango engaqondanga futhi sesiziphatha njengabo. Lokhu kungabangela ukuthi sicine sesisenza izinto uNkulunkulu azizondayo. Yikho uPhawuli wabhala amazwi alamandla athi: “Vukani lenze okulungileyo, lingaqhubeki lisenza isono.”—1 Khor. 15:33, 34. w20.12 9 ¶3, 5-6

Ivesi le ichasisa indlela uJehova ahlele ngayo imuli yakhe esezulwini lasemhlabeni. Njengoba eyinhloko yabo bonke, ulamandla ukwedlula loba ngubani. Yikho ukhethe abanye ukuthi babezinhloko kodwa bazalandisa kuye ngendlela abasebenzisa ngayo amandla abo. (Rom. 14:10; Efe. 3:14, 15) UJehova ubeke uJesu ukuthi abe yinhloko yebandla kodwa uzalandisa kuye ngendlela aliphatha ngayo. (1 Khor. 15:27) Uphinde wabeka indoda ukuthi ibe yinhloko yemuli. Manje indoda ingenzani ukuze iyiphathe kuhle imuli yayo? Kumele iqale izwisise ukuthi uJehova ufuna yenzeni ukuze iyiphathe kuhle imuli yayo. Kanti njalo kumele ikwazi ukuthi kungani uJehova wakhetha ukuthi kube lenhloko emulini lokuthi ingamlingisela njani yena loJesu. Kungani kuqakathekile ukuthi ikwazi lokhu? Ngenxa yokuthi uJehova uyinike amandla emulini njalo ukhangelele ukuthi iwasebenzise kuhle.—Luk. 12:48b. w21.02 2 ¶1-3

Kumele silingisele uJehova ngokukhetha ukukhohlwa ezinye izinto. Ngokwesibonelo, uJehova uyenelisa ukukhumbula zonke izinto kodwa nxa singaphambanisa besesiphenduka ukhetha ukusithethelela futhi akhohlwe amaphutha esiyabe siwenzile. (Hubo. 25:7; 130:3, 4) Ufuna lathi simlingisele nxa abanye bangaxolisa ngalokho abakwenzileyo okusizwise ubuhlungu. (Mat. 6:14; Luk. 17:3, 4) Singatshengisa ukuthi siyayiqakathekisa ingqondo emangalisayo esayiphiwa nguJehova ngokuyisebenzisa ukuthi simdumise. Abanye bakhetha ukusebenzisa ingqondo zabo ukuthi bazikhethele ukuthi yikuphi okuhle lokubi. Kodwa njengoba uJehova wasidala, kulengqondo ukuthi sibone imithetho yakhe ingcono kulaleyo esingazifakela yona. (Rom. 12:1, 2) Nxa singamlalela siba lokuthula. (Isaya. 48:18) Kanti njalo sizakwazi ukuthi uMdali wethu loBaba wethu ukhangelele ukuthi simdumise futhi simenze athokoze.—Zaga. 27:11. w20.05 23-24 ¶13-14

Singenzani ukuze sibathande ngenhliziyo yonke abafowethu labodadewethu? Nxa singazama ukubazi kuhle, kuzaba lula ukuthi sibazwisise futhi sibathande. Akudingeki ukuthi size silingane kumbe sibe ngabomhlobo ofananayo ukuze sibe ngabangane. Ungakhohlwa ukuthi uJonathani wayengumngane oseduze kaDavida lanxa wayemdala kulaye ngeminyaka engaba ngu-30. Ukhona yini umfowethu kumbe udadewethu ongalingani laye ongaba ngumngane wakho? Nxa singaba labangane esingalingani labo siyabe sitshengisa ukuthi ‘siyabathanda bonke abazalwane.’ (1 Phet. 2:17) Kambe ukuthanda abazalwane ngenhliziyo yonke sekusitsho yini ukuthi kumele sizwanane labo ngendlela efananayo? Hatshi, lokho ngeke kwenzakale. Phela akulanto embi ngokujayelana labanye abantu ukwedlula abanye ngenxa yezinto ezihambelanayo esiyabe sizithanda. UJesu wathi abaphostoli bonke ‘ngabangane bakhe’ kodwa ayemthanda kulabo bonke nguJohane. (Joh. 13:23; 15:15; 20:2) Lanxa kunjalo kazange amqakathekise ukwedlula abanye.—Mak. 10:35-40. w21.01 23 ¶12-13

Umphostoli uPhawuli kazange atshumayeze abeZizweni e-Athene ngendlela ayetshumayeza ngayo amaJuda esinagogeni. Wakhangelisisa indawo leyo futhi wananzelela imikhuba yabo yokukhonza, wasebatshela iqiniso eliseMibhalweni, eqalisa ngezinto ababengavumelana kuzo. (ImiSeb. 17:23) Yikho wayezimisele ukutshintsha intshumayelo yakhe. Watshela abase-Athene ukuthi umlayezo wakhe wawuvela ‘kuNkulunkulu Ongaziwayo’ ababezama ukumkhonza. Lanxa abeZizweni babengayijayelanga iMibhalo, uPhawuli kazange abone angani babengasoze babe ngamaKhristu. Kodwa wababona benjengezilimo esezilindele ukuvunwa futhi watshintsha intshumayelo yakhe. Woba lelihlo elibukhali njengoPhawuli. Dinga izinto ezizakunceda wazi okukholwa ngabantu ensimini yenu. Umninimuzi uyicecise ngani indlu kumbe imota yakhe? Ibizo lakhe, indlela agqoke njalo wazilungisa ngayo kumbe amabala awasebenzisayo kuyatshengisa yini ukuthi ungena yiphi isonto? w20.04 9-10 ¶7-8