July

Ukususwa komuntu ebandleni yindlela elothando uJehova ayisebenzisayo, enceda yena labanye bonke ebandleni. Abanye ebandleni bangathi abadala baphambanisile ngokususa othile. Kodwa khumbula ukuthi izikhathi ezinengi abantu labo bayabe bengafuni ukukhuluma izinto ezimbi ezenziwe ngulowo osesusiwe. Iqiniso yikuthi asiyazi yonke indaba. Yikho themba ukuthi abadala abaphatha indaba yomuntu owasuswayo benza konke okusemandleni abo ukuthi balandele lokho okutshiwo liBhayibhili njalo bahlulela ngendlela kaJehova. (2 ImiLan. 19:6) Nxa singasekela isinqumo esenziwe ngabadala sokususa umuntu esimthandayo, singamnceda ukuthi abuyele kuJehova. U-Elizabeth uthi: “Kwakunzima kakhulu ukuthi singasabi lobudlelwano lendodana yethu esikhulile. Kodwa yathi isibuyele kuJehova yathi kwakuqondile sibili ukuthi isuswe. Ngokuhamba kwesikhathi yathi yayifunde izifundo ezinengi ezinhle.” w21.09 28-29 ¶11-12

Cabanga ngomfelokazi lo. Akuthandabuzwa ukuthi wayefisa ukunika uJehova okunengi. Lanxa izimo zazingamvumeli ukuthi enze njalo, wamnika konke ayelakho, futhi uJesu wayekwazi ukuthi umnikelo wakhe uligugu kuYise. Nansi isifundo esiqakathekileyo: UJehova uyathokoza nxa simnika konke esilakho, okutsho ukumkhonza ngenhliziyo langomphefumulo wonke. (Mat. 22:37; Kol. 3:23) Uyajabula sibili nxa esibona sisebenzisa isikhathi sethu lamandla ethu ekumkhonzeni, ngokwesibonelo nxa sisekutshumayeleni kumbe emihlanganweni yebandla. Ungakusebenzisa njani okufunda endabeni emayelana lomfelokazi ukuze uncede abanye? Cabanga ngabantu ongabakhuthaza nxa ungabatshela ukuthi uJehova uyathokoza ngalokho abenelisa ukumenzela khona. Kungaba ngudade osekhulile, ozibona engasimuntu walutho ngenxa yokuthi kasaphilanga kuhle emzimbeni njalo kasenelisi ukwenza okunengi enkonzweni. w21.04 6 ¶17, 19-20

UJehova uyasazi isikhathi esifaneleyo sokubhubhisa abantu ababi. Ukubekezela kwakhe kwenze abantu abanengi bamazi futhi khathesi ixuku elikhulu lamamiliyoni abantu liyamkhonza njalo liyamdumisa. Bonke abexuku leli bayathokoza ngokuthi uJehova wabekezela baze bazalwa, bafunda ngaye, bamthanda futhi bazinikela kuye. Kuzakhanya ukuthi isinqumo sikaJehova sokubekezela sasiqondile lapho amamiliyoni abantu eqinisela kuze kube sekucineni. Kungelani lokudana lokuhlupheka uSathane akubangeleyo, uJehova uqhubeka ‘enguNkulunkulu othokozayo.’ (1 Tim. 1:11) Lathi singenelisa ukuqhubeka sithokoza sisalindele uJehova ukuthi angcwelise ibizo lakhe, alwele ubukhosi bakhe, njalo aqede bonke ububi kanye lenhlupho ezisehlelayo. Ngakho kasizimiseleni ukuqhubeka sibekezela sisazi ukuthi uBaba wethu osezulwini laye uyabekezela. w21.07 13 ¶18-19

Abanengi abaphila ngensuku zikaJesu abazange bamamukele. Nxa babemkhangele babezibonela indodana yombazi nje ozidubekelayo. Wakhulela eNazaretha, idolobho okungenzakala abanye babelibona lingamangalisi. LoNathaniyeli owaba ngumfundi kaJesu wake wathi: “Kambe kukhona okuhle okungaphuma eNazaretha?” Wayengabe ecabanga isiphrofetho esikuMikha 5:2 esithi uMesiya wayezazalelwa eBhethilehema hatshi eNazaretha. Umphrofethi u-Isaya wathi izitha zikaJesu zazingasoze zizihluphe ngezinto eziphathelane ‘lesizukulwane [sikaMesiya].’ (Isaya. 53:8) Aluba abantu labo bazinika isikhathi sokuzihlola izinto lezo, babezabona ukuthi uJesu wazalelwa eBhethilehema lokuthi wayeyisizukulwane seNkosi uDavida. (Luk. 2:4-7) Yikho uJesu wazalelwa endaweni okwakuthiwe uzazalelwa kuyo esiphrofethweni esikuMikha 5:2. Manje uhlupho lwalungaphi? Abantu baphanga bafika esiphethweni bengayazi yonke indaba. Lokhu yikho okwenza bakhubeka ngoJesu. w21.05 2-3 ¶4-6

IBhayibhili likhuluma ngalabo ababusiswayo ngenxa yokuthi bamukela iseluleko. Asixoxeni ngoJobe. Lanxa wayemthanda uJehova futhi efuna ukumthokozisa, wayelesono. Wathi esephakathi kwelitshe lembokodo wakhuluma ezinye izinto ezingaqondanga. Yikho u-Elihu loJehova bamnika iseluleko esingabhodiyo. Wenzani uJobe? Wathobeka wasamukela iseluleko wathi: ‘Ngikhulumile ngezinto ebengingazizwisisi. Ngakho sengizeyisa, sengiphenduka ngizilahla othulini lasemlotheni.’ (Jobe. 42:3-6, 12-17) Watshengisa ukuthi uthobekile ngokwamukela iseluleko asinikwa ngu-Elihu, lanxa u-Elihu wayemncane kakhulu kulaye. (Jobe. 32:6, 7) Lathi nxa sithobekile sizalalela iseluleko lanxa sibona angani asisidingi kumbe nxa sisiphiwe ngumuntu omncane kulathi. Sonke kumele sithuthuke ekutshengiseni izithelo zomoya lasemsebenzini wokutshumayela lokufundisa. w22.02 11 ¶8; 12 ¶12

Sonke silomlandu wokwenza ibandla libe yindawo elokuthula lowokuthanda abanye ukuze kungabi lomuntu ozizwa elahliwe. Esikutshoyo lesikwenzayo kungabakhuthaza kakhulu abanye. Ungenzani ukuze uncedise labo abayibo bodwa oFakazi emulini yangakibo ukuze babone ukuthi abafowethu labodadewethu bayabathanda? Zama ukuba labangane abasanda kufika ebandleni. Singamukela ngazo zombili izifundo zeBhayibhili eseziqalisa ukungena imihlangano yebandla, abazalwane abathuthele ebandleni lethu kumbe labo abasanda kuba ngoFakazi. (Rom. 15:7) Kodwa akumelanga siphelele ekubabingeleleni ngendlela elomusa nje kuphela. Sifuna ukuthi ngokuhamba kwesikhathi sibe ngabangane babo abaseduze. Yikho kumele ube lomusa njalo utshengise ukuthi ulendaba labo sibili. Zama ukuzwisisa inhlupho abahlangana lazo kodwa ungababuzi imibuzo ezabenza babe lenhloni. Abanye bangathwala nzima ukutsho indlela abazizwa ngayo, yikho ungababambi ngamandla ukuthi bakhulume. Kodwa kumele ube lomusa, ubabuze imibuzo ezenza baveze indlela abazizwa ngayo futhi nxa usubuzile lalela ngesineke impendulo zabo. Ngokwesibonelo, ungababuza ukuthi balifunda njani iqiniso. w21.06 11 ¶13-14

Siyasiqakathekisa isibusiso esilaso sokukhonza uJehova simanyene, ‘singumhlambi owodwa’ phansi “komelusi oyedwa.” Ibhuku elithi Sihlelelwe Ukwenza Intando KaJehova ekhasini 165 lithi: ‘Ulomlandu wokulondoloza ukumanyana kwethu.’ Yikho kumele ‘sizifundise ukubona abafowethu labodadewethu ngendlela uJehova ababona ngayo.’ KuJehova sonke ‘singabancinyane’ abaligugu. Wena ubabona njalo yini abafowenu labodadewenu? UJehova uyakubona konke okwenzayo ukuze ubancede njalo utshengise lokuthi ulendaba labo. (Mat. 10:42) Siyabathanda abafowethu labodadewethu. Yikho ‘sizimisele ukungabeki phambi komfowethu into engamkhuba kumbe engamgwenxa.’ (Rom. 14:13) Sibona abafowethu labodadewethu bengcono kulathi njalo sifuna ukubathethelela ngenhliziyo yonke. Kasingavumi ukukhutshwa ngabanye. Kodwa “kasizameni ngamandla ethu wonke ukwenza izinto eziletha ukuthula lalezo ezenza sakhane.”—Rom. 14:19. w21.06 24 ¶16-17

Nxa singakhuthalela ukutaditsha lokulandela lokho okutshiwo liLizwi likaNkulunkulu kanye lenhlanganiso yakhe, kancane kancane sizakuba lobuntu obunjengobukaKhristu. Kanti njalo sizamazi kuhle uNkulunkulu. UJesu wasebenzisa umzekeliso ukuze achasise ukuthi izindaba ezinhle zoMbuso esizitshumayelayo zifanana njani lenhlanyelo ekhula kancane kancane enhliziyweni zalabo abafuna ukufunda ngoNkulunkulu. Wathi: “Inhlanyelo iyamila ikhule ibende; ukuthi lokhu kwenzakala njani yena [umuntu ohlanyelayo] kakwazi. Iyakhula yodwa emhlabathini kancane kancane, kuqala ikhaba, kulandele isikhwebu kucine ngengqoloyi evuthiweyo.” (Mak. 4:27, 28) UJesu wayesitsho ukuthi umuntu owamukela izindaba ezinhle zoMbuso uthuthuka kancane kancane njengoba nje isilimo sikhula kancane kancane. Ngokwesibonelo, nxa abantu esifunda labo iBhayibhili beqhubeka besondela kuJehova siyaqalisa ukunanzelela utshintsho asebelwenzile empilweni. (Efe. 4:22-24) Kodwa kumele sikhumbule ukuthi nguJehova oyikhulisayo inhlanyelo le. w21.08 8-9 ¶4-5

Singenelisa ukuthokoza. Phela umuntu osuthiswa ‘ngakubonayo’ uyakuqakathekisa lokho alakho, ngokwesibonelo lokho ayenelisa ukukwenza khathesi. Kodwa lowo oxotshana lezinkanuko zakhe uhlala efisa izinto angasoze afa aba lazo. Sifundani? Nxa sifuna ukuthokoza kumele sicabange ngalokho esilakho khathesi, singazihluphi ngalokho esingeke saba lakho. Kungenzakala yini ukuthi usuthiseke ngalokho olakho? Abantu abanengi bacabanga ukuthi ngeke kwenzakale ngoba sihlala sifuna ukufunda ukwenza izinto ezintsha. Kodwa iqiniso yikuthi kungenzakala. Singathokoza sibili ngezinto esilazo khathesi. Njani? Umzekeliso kaJesu wamathalenta otholakala kuMathewu 25:14-30 usinceda sibone ukuthi singakwenza njani lokhu. Usifundisa ukuthi singayithola njani intokozo lokuthi singenzani ukuze sithokoze kakhulu kulokhu esikwenzayo khathesi. w21.08 21 ¶5-6

UJehova ulendaba lalabo “abadabukileyo emoyeni.” Abadala kayisibo bodwa abangakhuthaza abafowethu labodadewethu. Lathi singenza njalo. Enye indlela esingakwenza ngayo lokhu yikutshengisa ukuthi silendaba labo. UJehova ufuna sibatshengise ukuthi uyabathanda kakhulu. (Kol. 3:12) Enye indlela esingabanceda ngayo yikuthi sithobeke futhi singazigqaji ngalokho esenelisa ukukwenza. Phela singazigqaja, abafowethu labodadewethu bangaba lomona, into esingafuni ukuthi yenzakale. Kodwa sifuna ukuthi konke esikutshoyo lesikwenzayo kubakhuthaze. (1 Phet. 4:10, 11) Ukufunda indlela uJesu ayephatha ngayo abalandeli bakhe kungasifundisa okunengi ngendlela okumele sibaphathe ngayo abanye. Wayengumuntu omkhulu kulabo bonke abake baphila. Lanxa kunjalo, ‘wayemnene futhi ethobekile enhliziyweni.’ (Mat. 11:28-30) Wayefundisa ngendlela elula futhi esebenzisa imizekeliso okwakulula ukuyizwisisa, eyayithinta izinhliziyo zabantu ababekhangelelwa phansi.—Luk. 10:21. w21.07 23 ¶11-12

Zinike isikhathi sokuxoxa lasebekhulile. Bangabe sebebona lufifi, sebetotoba njalo sebekhulumela phansi kodwa balokhu befisa ukwenza okunengi futhi sebezenzele “ibizo elihle” kuJehova. (UmTshu. 7:1) Ungakhohlwa ukuthi kuyini okwenza uJehova ababone beligugu. Qhubeka ubahlonipha. Yenza njengo-Elisha owala ukwehlukana lo-Elija ngelanga lokucina bendawonye. Kathathu u-Elisha wathi: “Angiyikutshiyana lawe.” (2 AmaKho. 2:2, 4, 6) Tshengisa ukuthi uyabathanda asebekhulile ngokubabuza imibuzo ngenhlonipho. (Zaga. 1:5; 20:5; 1 Tim. 5:1, 2) Babuze imibuzo enjengale: “Kuyini okwenza waqiniseka ukuthi usulitholile iqiniso?” “Okwenzakale empilweni yakho kukuncede njani ukuthi usondele kuJehova?” “Kuyini okukuncede ukuthi uhlale uthokoza ekukhonzeni uJehova?” (1 Tim. 6:6-8) Lalela-ke nxa sebekuxoxela ngempilo zabo. w21.09 5 ¶14; 7 ¶15

Nxa usenza konke okusemandleni akho ukuthi ulalele umlayo wokutshumayela lowokwenza abafundi, uyabe utshengisa ukuthi uyamthanda uNkulunkulu. (1 Joh. 5:3) Cabanga ngalokhu: Ukuthanda uJehova yikho okwakufuqa ukuthi uqalise ukutshumayela endlini ngendlu. Kodwa kwakulula yini ukukwenza lokho? Mhlawumbe kwakungalula. Ngesikhathi usekutshumayeleni okokuqala ngqa wawusesaba yini? Akuthandabuzwa ukuthi wawusesaba! Kodwa wawukwazi ukuthi lo ngumsebenzi uJesu afuna uwenze futhi wamlalela. Kanti njalo kumele ukuthi wathi usutshumayele okwesikhathi esithile wawukubona sokulula. Kodwa kuthiwani ngokuqhuba isifundo seBhayibhili? Kuyakwesabisa yini? Engxenye. Kodwa nxa ungathandaza kuJehova umcele ukuthi akunike isibindi sokuthi ucele ukufunda lomuntu iBhayibhili, angakuncedisa ukuthi uzimisele ukwenza abafundi. w21.07 3 ¶7

Kudala izigqili zazifakwa uphawu ukuze kukhanye ukuthi ngezikabani. Ngendlela efananayo abantu bazakhangelela ukuthi umuntu wonke abe lophawu esandleni sakhe kumbe ebunzini okutsho ukuthi kuzamele batshengise ukuthi basekela bani. Bazafuna bonke abantu batshengise ukuthi bayabasekela ohulumende lokuthi bangababo. Sizavuma yini ukufakwa uphawu lolo njalo sisekele ohulumende? Labo abazakwala ukufakwa uphawu bazathwala nzima futhi babe sengozini. Ibhuku leSambulo lithi: ‘Akusoze kube lomuntu ozathenga kumbe ozathengisa ngaphandle kwalowo olophawu.’ (Isam. 13:17) Kodwa abantu bakaNkulunkulu bayakwazi lokho azakwenza kulabo abalophawu okukhulunywa ngalo kuSambulo 14:9, 10. Kulokuthi bafakwe uphawu lolu kuzabe kungathi babhalwe ukuthi “okaJehova” esandleni. (Isaya. 44:5) Khathesi yisikhathi sokuba leqiniso lokuthi siqotho sibili kuJehova. Nxa siqotho, uzathokoza ngokusibiza ngokuthi singabakhe! w21.09 18 ¶15-16

Ukufunda kwabanye kuyasinceda ukuze sifeze inkonzo yethu. Umphostoli uPhawuli wafundisa uThimothi ukutshumayela lokufundisa futhi wamkhuthaza ukuthi laye enze njalo kwabanye. (1 Khor. 4:17) Lathi njengoThimothi singafunda kwabanye ebandleni asebelesikhathi betshumayela. Kanti njalo kumele sithandaze sicela uJehova ukuthi asincedise. Cela uJehova akuncedise loba nini nxa usiya ekutshumayeleni. Phela akulalutho esingalwenza ekutshumayeleni nxa singancediswa ngumoya ongcwele. (Hubo. 127:1; Luk. 11:13) Nxa uthandaza kuJehova umcela ukuthi akuncedise, mtshele khona kanye okufunayo. Ngokwesibonelo, mcele ukuthi akuncedise uthole umuntu ofuna ukufunda ngaye futhi ozimisele ukulalela. Kumele sizinike isikhathi sokutaditsha. ILizwi likaNkulunkulu lithi: ‘Hlolisisani intando kaNkulunkulu enhle, eyamukelekayo futhi epheleleyo.’ (Rom. 12:2) Nxa singataditsha, sizabamazi ngcono uNkulunkulu njalo lokhu kuzenza ukuthi nxa sesikhuluma labanye ngaye, babone ukuthi siyakukholwa sibili lokho esikutshoyo. w21.05 18 ¶14-16

Kwesinye isikhathi ungazama ngazo zonke izindlela ukuthi umfundise kuhle lowo ofunda laye iBhayibhili njalo umthandazele kanengi kodwa angathuthuki, kuze kudingeke ukuthi ume ukufunda laye. Engxenye awukaze ufunde lomuntu aze abhabhathizwe. Kambe sekumele uzithonisise kumbe ucabange ukuthi uJehova kayibusisi inkonzo yakho? UJehova ukhangela indlela esisebenza nzima ngayo lokuqinisela kwethu. Ubona umsebenzi wethu uphumelela nxa siwenza sikhuthele njalo siwenza ngoba simthanda, kungelani lokuthi abantu bayalalela loba hatshi. UPhawuli wathi: “UNkulunkulu kayisuye ongalunganga ukuthi usengaze awukhohlwe umsebenzi wenu lothando elalutshengisa ebizweni lakhe lapho lisiza abangcwele njalo liqhubeka libasiza.” (Heb. 6:10) UJehova uyakukhumbula esikwenzileyo lothando esilalo lanxa kungelamuntu esimfundise waze wabhabhathizwa. Yikho amazwi kaPhawuli asembhalweni walamuhla ayasebenza lakithi. w21.10 25 ¶4-6

Indlela uJesu ayephatha ngayo abafundi bakhe itshengisa ukuthi wayelomusa lothando. Wayekwazi ukuthi babetshiyene lokuthi babeleziphiwo ezingafananiyo. Yikho babengeke benze izinto ezifananayo kumbe benze umsebenzi olinganayo ekutshumayeleni. Kodwa okwakumthokozisa yikuthi ngamunye wabo wayesenza konke okusemandleni akhe. Umzekeliso wamathalenta uyasinceda ukuthi sikuzwisise lokho. Emzekelisweni lo inkosi yanika inceku ngayinye umsebenzi “kusiya ngokuthi ngayinye yayisenelisa ukwenzani.” Ezimbili zakhona zazikhuthele kodwa enye yathola okunengi kulenye. Lanxa kunjalo, inkosi yazincoma ngamazwi afananayo athi: “Wenze kuhle nceku enhle lethembekileyo!” (Mat. 25:14-23) UJesu uhlala esiphatha ngomusa langothando. Uyakwazi ukuthi asifanani lokuthi sileziphiwo ezitshiyeneyo njalo uyathokoza nxa sisenza konke okusemandleni ethu. Lathi kumele simlingisele endleleni esiphatha ngayo abanye. w21.07 23 ¶12-14

INkosi uDavida kayizange ihlale itshengisa ukuthi ilesihawu. Ngokwesibonelo, uNabhali wayeyindoda elenhliziyo elukhuni eyathethisa uDavida futhi yala ukumnika ukudla yena lamadoda ayelawo. Lokhu kwenza uDavida wathukuthela kakhulu wafuna ukubulala uNabhali lawo wonke amadoda endlu yakhe. Kodwa umkaNabhali u-Abhigeli wayelomusa futhi ebekezela. Yikho waphangisa wahambisela uDavida ukudla. Lokhu kwanceda uDavida ukuthi angabi lecala lokubulala. (1 Sam. 25:9-22, 32-35) Okwenza uDavida wafuna ukubulala uNabhali lamadoda endlu yakhe yikuthi wayezonde kakhulu. Ngokuhamba kwesikhathi uDavida wahlulela indoda esemzekelisweni kaNathani ngokuthi kwakumele ibulawe. Indlela ayahlulela ngayo indoda esemzekelisweni ingenza sizibuze ukuthi kwasekutheni esesiba lesihluku kangaka lanxa yena wayeyindoda elomusa. Cabanga ngalokho okwakusanda kwenzakala kuDavida. Ngalesosikhathi wayedliwa yisazela. Nxa umuntu esahlulela abanye ngendlela elukhuni kuyabe kutshengisa ukuthi ubungane bakhe loJehova abusaqinanga. w21.10 12 ¶17-18; 13 ¶20

Amazwi asembhalweni walamuhla asifundisa ukuthi lanxa uJehova engcwele ukwedlula loba ngubani, singenelisa ukumlingisela. Kumele sibe ngcwele kukho konke ukuziphatha kwethu, lanxa kungakhanya angathi ngeke kwenzeke ngenxa yesono esilaso. Umphostoli uPhetro laye wayewenza amaphutha kodwa isibonelo sakhe sitshengisa ukuthi singaba ngcwele. Kwezinye indawo abantu bacabanga ukuthi ukuba ngcwele kutsho ukuba ngumuntu ongathokoziyo, ohlala egqoke izigqoko zetshetshi futhi ongahlekiyo. Lokhu akusilo qiniso. Phela uJehova ungcwele kodwa iBhayibhili lithi ‘unguNkulunkulu othokozayo.’ (1 Tim. 1:11) Liphinda lithi labo abamkhonzayo “bayathokoza.” (Hubo. 144:15, NWT) Kanti njalo uJesu wasola labo ababegqoka izigqoko ezitshiyene lezabanye futhi besenza okulungileyo phambi kwabantu befuna ukubukwa. (Mat. 6:1; Mak. 12:38) Thina amaKhristu eqiniso siyakwazi ukuthi kutshoni ukuba ngcwele ngenxa yalokho esikufundileyo eBhayibhilini. Siyakwazi ukuthi uNkulunkulu wethu osithandayo ngeke asinike umlayo akwaziyo ukuthi ngeke senelise ukuwulalela. w21.12 2 ¶1, 3

UNkulunkulu usinike izipho ezinengi. Esinye isipho esikhulu asinike sona yikusivumela ukuthi simkhonze. Sitshengisa ukuthi siyamthanda ‘ngokulalela imilayo yakhe.’ (1 Joh. 5:3) Omunye umlayo afuna siwulalele yilowo uJesu asinika wona owokuthi senze abafundi futhi sibabhabhathize. (Mat. 28:19) Waphinda wasinika lomlayo wokuthi sithandane. (Joh. 13:35) UJehova wamukela labo abalalela imilayo yakhe emulini yezinceku zakhe ezisemhlabeni wonke. (Hubo. 15:1, 2) Bathande abanye. Uthando yibuntu bukaJehova obukhanya kulabo bonke. (1 Joh. 4:8) UJehova watshengisa ukuthi uyasithanda singakamazi lokumazi. (1 Joh. 4:9, 10) Siyabe simlingisela nxa sibathanda abanye. (Efe. 5:1) Indlela engcono kulazo zonke esingatshengisa ngayo ukuthi siyabathanda abantu yikubancedisa ukuthi bafunde ngoJehova isikhathi sisasekhona. (Mat. 9:36-38) Nxa singenza njalo bazafunda ngalokho okumele bakwenze ukuze babe ngamalunga emuli kaNkulunkulu. w21.08 5-6 ¶13-14

UJesu uyamthanda kakhulu uJehova yikho wazinikela ukuthi enze intando kaYise kanye lalokho okwakuzanceda thina. (Joh. 14:31) Lokho akwenza ngesikhathi esemhlabeni kwatshengisa ukuthi uyabathanda sibili abantu. Nsuku zonke wayetshengisa ukuthi uyabathanda lokuthi uyabazwela ngitsho lalapho abanye bemphikisa. Indlela eqakathekileyo atshengisa ngayo ukuthi uyabathanda yikubafundisa ngoMbuso kaNkulunkulu. (Luk. 4:43, 44) Waphinda watshengisa ukuthi umthanda kakhulu uNkulunkulu labantu ngokuvuma ukubulawa kabuhlungu yizoni. Lokhu kwenza sonke saba lethemba lokuthola ukuphila okungapheliyo. Sazinikela kuJehova njalo sabhabhathizwa ngenxa yokuthi siyamthanda uBaba wethu osezulwini. Yikho lathi njengoJesu kumele sitshengise ukuthi siyamthanda uJehova ngendlela esiphatha ngayo abanye. Umphostoli uJohane wabhala wathi: “Lowo ongamthandiyo umfowabo ambonileyo ngeke amthande uNkulunkulu angakaze ambone.”—1 Joh. 4:20. w22.03 10 ¶8-9

Siyakuthanda ukukhuleka lokutaditsha iBhayibhili. Kodwa ngezinye izikhathi kunzima ukuthi sikwenze lokho. Sihlala silezinto ezinengi zokwenza futhi lokhu kungenza kube nzima ukuthi sithole isikhathi sokwenza izinto eziphathelane lokukhonza. Umsebenzi, imuli lezinye izinto eziqakathekileyo okumele sizenze kungathatha isikhathi sethu esinengi size sicabange ukuthi asilaso esokuthandaza, esokutaditsha kumbe esokucabangisisa. Kulokunye okungasithathela isikhathi sethu. Nxa singananzelelanga singacina sisenza izinto ezingazimbi kodwa ezisithathela isikhathi esinengi ebesingasisebenzisa ukuthi sisondele kuJehova. Ngokwesibonelo, kuqakathekile ukuthi sike sibethwe ngumoya. Lanxa sizilibazisa ngezinto ezinhle, zingasithathela isikhathi esinengi sicine siswela esokwenza izinto eziphathelane lokukhonza. Kumele sikhumbule ukuthi ukuzilibazisa ayisikho okuqakatheke kakhulu.—Zaga. 25:27; 1 Tim. 4:8. w22.01 26 ¶2-3

Ngesikhathi uJehova enika ama-Israyeli umlayo wokuthi athande omakhelwane, wayengatsho ukuthi kumele athande amanye ama-Israyeli kuphela. Wawatshela lokuthi athande abantu bezizweni ayehlala labo. Lokhu yikho esikuthola kuLevi 19:33, 34. Umuntu wezizweni kwakumele aphathwe “njengowozalo elizweni” futhi ama-Israyeli kwakumele ‘amthande’ ngendlela wona azithanda ngayo. Ngokwesibonelo, kwakumele avumele abayanga labezizweni ababehlala phakathi kwabo ukuthi badobhe okuseleyo emasimini ngesikhathi kuvunwa. (Levi. 19:9, 10) Lalamuhla amaKhristu kumele abathande abantu abavela kwamanye amazwe. (Luk. 10:30-37) Kulamamiliyoni abantu athuthele kwamanye amazwe futhi kungenzeka abanye babo bangomakhelwane bakho. Kuqakathekile ukuthi sibahloniphe kungelani lokuthi ngabesilisa, ngabesifazana kumbe ngabantwana. w21.12 12 ¶16

Nxa singahlala sithembela kuJehova khathesi, sizaqiniseka sibili ukuthi uzasivikela esikhathini esizayo. Kumele sibe lokholo njalo sizimisele ukuthembela kuJehova ukuze senelise ukucela kumqhatshi wethu isikhathi sokungena umhlangano wesiqinti kumbe owesabelo, esokungena yonke imihlangano yebandla lesokutshumayela. Ake sithi umqhatshi wethu ayale besesiphelelwa ngumsebenzi. Silalo yini ukholo lokuthi uJehova kasoze asitshiye kumbe asilahle loba olokuthi uzahlala esinika izinto esizidingayo? (Heb. 13:5) Abanengi abasenkonzweni yesikhathi sonke bangasilandisela okwenzakala kibo okutshengisa ukuthi uJehova wabancedisa njani ngesikhathi beludinga kakhulu uncedo lwakhe. UJehova uthembekile. Asikwesabi okuzayo ngoba uJehova ulathi. UNkulunkulu wethu kasoze asitshiye loba sekutheni nxa singaqakathekisa ukwenza intando yakhe ukwedlula loba yini. w22.01 7 ¶16-17

Kuyini okungenza kube nzima ukuthi sithembe abadala nxa sebenze isinqumo sokuthi owonileyo asuswe ebandleni? Ake sithi lowo osusiweyo ngumngane wethu. Singazibuza ukuthi abadala bayihlolisisile yini yonke indaba kumbe ukuthi bahlulele ngendlela uJehova abengahlulela ngayo yini. Kuyini okungasinceda ukuthi sisisekele isinqumo sabo? Kumele sikhumbule ukuthi ukususwa komuntu luhlelo lukaJehova futhi kunceda ibandla njalo kunganceda lalowo owonileyo. Nxa umuntu ongaphendukiyo evunyelwa ukuthi aqhubeke esebandleni, kungaba lula ukuthi labanye benze isono. (Gal. 5:9) Kanti njalo angehluleka ukunanzelela ukuthi isono asenzileyo sikhulu kangakanani futhi angasiboni isizatho sokutshintsha indlela acabanga ngayo layenza ngayo ukuze uJehova amamukele. (UmTshu. 8:11) Singaqiniseka ukuthi abadala abawuthathi lula umsebenzi wabo wokuhlola ukuthi umfowethu loba udadewethu kumele asuswe yini kumbe aqhubeke esebandleni. w22.02 5-6 ¶13-14

Ukubekezela lomusa kuyadingeka kakhulu nxa ophiwa iseluleko engasamukeli ekuqaliseni. Umdala akumelanga acaphuke nxa lowo amnika iseluleko engasamukeli kumbe engasisebenzisi masinyane. Yikho umdala angakhuleka eyedwa ecela ukuthi uJehova ancedise lowo ophiwa iseluleko azwisise ukuthi kungani esiphiwa lokuthi asisebenzise. Umzalwane ophiwe iseluleko angadinga isikhathi sokucabangisisa ngaso. Nxa umdala ebekezela njalo elomusa kuba lula ukuthi lowo ophiwa iseluleko asamukele. Iseluleko kumele sihlale sisekelwe eLizwini likaNkulunkulu. Inhloso yethu ngeyokuthi iseluleko sethu simncede lowo esimnikayo njalo ‘silethe intokozo enhliziyweni’ yakhe.—Zaga. 27:9. w22.02 18 ¶17; 19 ¶19

Kwesinye isikhathi nxa singakhuleka sicela ukuthi uJehova asinike amandla okuqinisela ebunzimeni esiyabe siphakathi kwabo kumbe asincedise sitshiye umkhuba awuzondayo, singabona angani uyaphuza ukuphendula imithandazo yethu. Kungani engahle ayiphendule eminye imithandazo yethu? Ubona imithandazo yethu esuka enhliziyweni iyibufakazi bokuthi silokholo. (Heb. 11:6) Nxa singathandaza sicela ukuthi asincedise senze lokho okumthokozisayo uyabe efuna ukubona ukuthi sizimisele yini ukwenza konke esingakwenza ukuthi senze intando yakhe. (1 Joh. 3:22) Yikho nxa singacela ukuthi asincedise sitshiye umkhuba awuzondayo, kungadingeka ukuthi sibekezele futhi senze konke esingakwenza ukuthi siwutshiye. UJesu wakhuluma amazwi aveza ukuthi eminye imithandazo yethu kayisoze ihle iphendulwe. Wathi: “Qhubekani licela, lizaphiwa; qhubekani lidinga, lizathola; qhubekani liqoqoda, lizavulelwa, ngoba wonke umuntu ocelayo uyaphiwa, lomuntu wonke odingayo uyathola, futhi wonke umuntu oqoqodayo uzavulelwa.”—Mat. 7:7, 8. w21.08 8 ¶1; 10 ¶9-10

Kumele uqhubeke ulitaditsha iLizwi likaNkulunkulu ukuze ukholwe sibili ukuthi kuloMdali. (Josh. 1:8) Cabanga ngeziphrofetho ezikulo ezagcwalisekayo lokuthi elikutshoyo kuyavumelana. Nxa ungenza njalo awusoze uthandabuze ukuthi uMdali olothando lohlakaniphileyo nguye owasidalayo njalo waphefumulela iBhayibhili. (2 Tim. 3:14; 2 Phet. 1:21) Ngesikhathi utaditsha iLizwi likaNkulunkulu, nanzelela ukuthi elikutshoyo kunceda njani. Ngokwesibonelo, laxwayisa kudala ukuthi ukuthanda imali kuyingozi njalo kubangela ‘izinhlungu ezinengi.’ (1 Tim. 6:9, 10; Zaga. 28:20; Mat. 6:24) Lokhu kutshengisa ukuthi isixwayiso esiseBhayibhilini sokuthi singathandi imali siyanceda sibili. Kukhona yini okunye okutshiwo liBhayibhili okukuncedileyo? Nxa singacabanga ngazo zonke izeluleko ezinhle eziseBhayibhilini, sizabona lokuthi uMdali wethu olothando uyakwazi okusincedayo futhi sizahlala sithembele kuye ukuthi aseluleke. (Jak. 1:5) Lokhu kuzakwenza sithokoze kakhulu empilweni.—Isaya. 48:17, 18. w21.08 17-18 ¶12-13

Nxa iminyaka isihambile qiniseka ukuthi uJehova uyawukhumbula umsebenzi owenzileyo esikhathini esidlulileyo. Ubukhuthele emsebenzini wokutshumayela. Ubuqinisela nxa usebunzimeni ngitsho lakulobo obukuzwise ubuhlungu obukhulu. Ubulalela njalo ulwela lokho okutshiwo liBhayibhili futhi ubuyenza ngokuthembeka imisebenzi eqakathekileyo obulayo enhlanganisweni kaJehova njalo uqeqetsha abanye. Wenze konke ongakwenza ukuze uhambisane lotshintsho ngalunye obelusiba khona enhlanganisweni kaJehova. Ubusekela njalo ukhuthaza abanye abasenkonzweni yesikhathi sonke. UJehova uNkulunkulu uyakuthanda okwamagama ngenxa yokuthi uqotho. Uthembisa ukuthi “kayikubadela abathembekileyo bakhe.” (Hubo. 37:28) Ukuqinisekisa esithi: ‘Lasebudaleni bakho izinwele zakho sezimhlophe ngizakuqinisa.’ (Isaya. 46:4) Yikho ungacabangi ukuthi njengoba iminyaka isihambile awusaqakathekanga enhlanganisweni kaJehova. Uqakathekile sibili! w21.09 3 ¶4

UJehova utshengisa ukuthi ulesihawu ngenxa yokuthi ulenhlakanipho emangalisayo. IBhayibhili lithi ‘ukuhlakanipha okuvela phezulu kugcwele isihawu lezithelo ezinhle.’ (Jak. 3:17) Njengomzali olothando uJehova uyakwazi ukuthi ukuba lesihawu kuyabanceda abantwabakhe. (Isaya. 49:15) Isihawu sikaJehova senza abantu bakhe babe lethemba lokuthola ikusasa elihle lanxa belesono. Inhlakanipho yakhe emangalisayo yiyo eyenza ukuthi ahlale etshengisa ukuthi ulesihawu nxa ebona kulesizatho sokwenza njalo. Kodwa ngezinye izikhathi uJehova angakhetha ukungabi lesihawu. Ukuhlakanipha kwakhe kumenza angabi lesihawu nxa kuyikuthi ukwenza njalo kuyabe kungani useyekelela ububi obuyabe benziwe ngabomo. Ake sithi inceku kaNkulunkulu isikhethe ukuqhubeka isenza isono ngabomo. Manje kumele senzeni? UJehova waphefumulela uPhawuli ukuthi abhale ukuthi ‘siyekele ukuba lobudlelwano’ lalowomuntu. (1 Khor. 5:11) Umuntu oqhubeka esenza isono engaphenduki uyasuswa ebandleni. Ukwenza njalo kuvikela abafowethu labodadewethu abathembekileyo njalo kutshengisa ukuthi sifuna ukugcina ibandla lihlanzekile njengoba uJehova engcwele. w21.10 9-10 ¶7-8

Siyabe sikhonza uJehova nxa sinikela ukuze sisekele umsebenzi woMbuso. Ama-Israyeli kwakungamelanga aziveze phambi kukaJehova engaphathanga lutho. (Dute. 16:16) Kwakumele abuye lesipho kusiya ngalokho akwenelisayo. Nxa ayesenza njalo ayetshengisa ukuthi ayambonga uJehova ngakho konke ayewenzele khona. Singatshengisa njani ukuthi siyamthanda uJehova lokuthi siyambonga ngakho konke asenzele khona ukuze sihlale silokholo oluqinileyo? Enye indlela yikunikela ngalokho esikwenelisayo ukuze kubhadalwe izindleko zebandla futhi sisekele umsebenzi womhlaba wonke. Umphostoli uPhawuli wathi: “Nxa umuntu elesifiso sokupha, siyamukeleka kakhulu kusiya ngalokho alakho hatshi ngalokho angelakho.” (2 Khor. 8:4, 12) UJehova uyayiqakathekisa yonke iminikelo esiyenzayo kungelani lokuthi ingakanani.—Mak. 12:42-44. w22.03 24 ¶13

Abadala abenelisi ukuqeda zonke inhlupho ezehlela abantu bakaJehova. Lanxa kunjalo uJehova ufuna benze konke abangakwenza ukuthi bakhuthaze njalo bavikele izimvu zakhe. Pho abadala bangasithola njani isikhathi sokuncedisa abafowabo labodadewabo njengoba belemisebenzi eminengi kangaka? Lingisela okwenziwa nguPhawuli. UPhawuli wayehlala ebancoma njalo ebakhuthaza abafowabo labodadewabo. Abadala kumele bamlingisele ngokuthanda abafowabo labodadewabo langokuba lomusa kubo. (1 Thes. 2:7) UPhawuli watshela abafowabo labodadewabo ukuthi uyabathanda lokuthi uJehova laye uyabathanda. (2 Khor. 2:4; Efe. 2:4, 5) Labo abasebandleni wayebabona bengabangane bakhe njalo wayezinika isikhathi sokuba labo. Watshengisa ukuthi uyabathemba ngokubatshela ngalokho okwakumkhathaza langobuthakathaka bakhe. (2 Khor. 7:5; 1 Tim. 1:15) Kodwa wayengafuni ukuthi bacabange kakhulu ngenhlupho zakhe. Ayekufuna yikubancedisa. w22.03 28 ¶9-10