August

UJesu wayengabe esitsho amasotsha angamaRoma ayebethele izipikili ezandleni lasenyaweni zakhe. Kazange avumele ukuphathwa kubi kumenze azonde kumbe abambe isikhwili. (1 Phet. 2:23) Kumele simlingisele ngokuzimisela ukuthethelela abanye. (Kol. 3:13) Abanye abantu, okuhlanganisa lezihlobo zethu bangabe besiphikisa ngoba bengazizwisisi izinto esizikholwayo lendlela esiphila ngayo. Bangaqamba amanga ngathi, basiyangise phambi kwabantu, batshise loba badabule amabhuku ethu kumbe basethusele ngokuthi bazasilimaza. Akumelanga sibabambele isikhwili, kodwa kufanele sicele uJehova abancedise bamukele iqiniso. (Mat. 5:44, 45) Kwesinye isikhathi kungaba nzima ukuthi sibathethelele, ikakhulu nxa besiphathe kubi kakhulu. Kodwa singababambela isikhwili, siyabe sizilimaza. (Hubo. 37:8) Nxa sithethelela abanye siyabe sikhetha ukungavumeli izinto ezimbi ezenzakale kithi zibangele ukuthi sihlale sizondile.—Efe. 4:31, 32. w21.04 8-9 ¶3-4

Ukhona yini umuntu omthandayo owasuswayo ebandleni? Lokhu kuzwisa ubuhlungu sibili! Cabanga ngobuhlungu uJehova abuzwayo ngesikhathi ezinye izingilosi ezazingamalunga emuli yakhe zimhlamukela. (Jud. 6) Kumele ukuthi wezwa ubuhlungu langesikhathi abantu bakhe ayebathanda, ama-Israyeli bemhlamukela kanengi. (Hubo. 78:41) Qiniseka ukuthi uBaba wethu osezulwini osithandayo uyezwa ubuhlungu lalapho umuntu omthandayo emtshiya. Uyaluzwisisa usizi ophakathi kwalo. Ulozwelo yikho uzakukhuthaza njalo akusekele. Nxa umntwana etshiya uJehova, kujayelekile ukuthi abazali bazibuze ukuthi kukhona yini okunye akade bengakwenza ukuze bancedise umntanabo aqhubeke ekhonza uJehova. Omunye umfowethu wathi: “Ngangizisola njalo ngangilala ngisethuka ngenxa yamaphupho engangisiba lawo.” Omunye udadewethu laye wathi: “Ngazibuza ukuthi kukhona yini engangikuphambanisile ngesikhathi ngikhulisa umntanami. Ngangibona angani angenzanga konke okusemandleni ami ukuthi ngifundise indodana yami ukuthi ithande uJehova.” w21.09 26 ¶1-2, 4

Abanye babona angani abantu bakaJehova kakumelanga bafundise iBhayibhili ngenxa yokuthi kabayanga ezikolo zamasonto ezaziwayo. Kodwa kumele badinge iqiniso ngendaba. Lokhu yikho kanye umlobi weVangeli uLukha akwenzayo. Wahlolisisa zonke izinto ‘kusukela ekuqaliseni ukuze athole okuqondileyo.’ Wayefuna abazabala iVangeli lakhe ‘bakwazi mhlophe ukuthi ziliqiniso sibili izinto’ ababezizwe mayelana loJesu. (Luk. 1:1-4) AmaJuda ayehlala eBheriya enza njengoLukha. Athi eqalisa ukuzwa izindaba ezinhle mayelana loJesu ahlola iMibhalo YesiHebheru ukuze abone ukuthi izinto ayezifundiswa zaziliqiniso yini. (ImiSeb. 17:11) Labantu lamuhla kumele bawalingisele. Kufanele baqathanise lokho okufundiswa ngabantu bakaJehova lalokho okutshiwo yiMibhalo. Kanti njalo kumele bahlole okwenziwa ngabantu bakaJehova ezinsukwini zalamuhla. Nxa bangahlolisisa ukuze bakwazi iqiniso ngabantu bakaJehova, kabasoze bathatheke ngalokho abantu abakutshoyo ngabo. w21.05 3 ¶7-8

Ukhona yini ebandleni ongazinika isikhathi sokuba laye? Kulezikhathi lapho abafowethu labodadewethu abangathokoza khona kakhulu nxa singaba labo. Abanye bangathwala nzima ukuba lezihlobo zabo ezingayisibo oFakazi nxa zinanza imikhosi yenkolo yamanga kumbe eyesizwe. Abanye bona bangadana kakhulu ngamalanga athile, ngokwesibonelo, ngelanga abafelwa ngalo yisihlobo kumbe ngumngane oseduze. Nxa sizinika isikhathi sokuba labafowethu labodadewethu abaphakathi kobunzima obunje siyabe sitshengisa ukuthi ‘silendaba labo ngenhliziyo yonke.’ (Flp. 2:20) Zinengi izinto ezingabangela ukuthi umKhristu abe lesizungu. Kodwa akumelanga sikhohlwe ukuthi uJehova uyazi mhlophe indlela esizizwa ngayo futhi izikhathi ezinengi usincedisa esebenzisa abafowethu labodadewethu. (Mat. 12:48-50) Kumele sitshengise ukuthi siyambonga uJehova ngabafowethu labodadewethu laba ngokwenza konke okusemandleni ethu ukuthi sibasekele. Kungelani lokuthi sizizwa njani kumele sikhumbule ukuthi kasisodwa, uJehova uhlala elathi. w21.06 13 ¶18-20

UJesu waqhubeka etshumayela lanxa abanye abantu babengamlaleli. Kungani? Wayekwazi ukuthi abantu kumele bazwe iqiniso futhi wayefuna ukubanceda. Wayekwazi lokuthi abanye bangaqalisa bengafuni ukulalela kodwa bacine sebefuna. Lokhu yikho okwenzakala emulini yangakibo. Ngesikhathi esenza inkonzo yakhe eyathatha iminyaka emithathu lengxenye, akula phakathi kwabafowabo owaba ngumfundi wakhe. (Joh. 7:5) Kodwa wathi esevusiwe baba ngamaKhristu. (ImiSeb. 1:14) Kasikwazi ukuthi ngobani abazacina bengoFakazi bakaJehova. Abanye kubathatha isikhathi eside ukuthi iqiniso lithophele ezinhliziyweni zabo. Lalabo abangafuni ukusilalela bangabona indlela esibaphatha ngayo njalo lokhu kungenza bacine ‘bekhazimulisa uNkulunkulu.’ w21.05 18 ¶17-18

Ngesikhathi uJesu esemhlabeni, walaya abalandeli bakhe ukuthi benze umsebenzi olengxenye ezimbili. Wabatshela ukuthi batshumayele izindaba ezinhle zoMbuso futhi wabatshengisa ukuthi bakwenze njani lokho. (Luk. 8:1) Ngokwesibonelo, wabatshela lokho okwakumele bakwenze nxa abantu belalela izindaba zoMbuso lalokho okwakumele bakwenze nxa bengalaleli. (Luk. 9:2-5) Waphinda wachasisa lokuthi bazatshumayeza abantu abanengi ezindaweni ezinengi lapho esithi bazanika ‘ubufakazi ezizweni zonke.’ (Mat. 24:14; ImiSeb. 1:8) Waphinda wabatshela ukuthi bafundise abantu ukuthi balandele zonke izinto ayebalaye zona. UJesu wathi umsebenzi lo oqakathekileyo uzakwenziwa “kuze kube yisiphetho somumo lo wezinto.” (Mat. 28:18-20) Kanti njalo embonweni awunika uJohane wakwenza kwacaca ukuthi ufuna bonke abafundi bakhe bancedise abantu ukuthi bafunde ngoJehova.—Isam. 22:17. w21.07 2-3 ¶3-4

Abantu abanengi emhlabeni lamuhla bathanda ukuncintisana futhi abalandaba lokuthi lokho abakwenzayo kuyabalimaza abanye. Ngokwesibonelo, usomabhizimusi angafuna ukuphumelela ukwedlula amanye amakhampani, yikho angenza izinto ezilimaza abanye. Umdlali angalimaza ngabomo omunye umdlali okwelinye iqembu ukuze elabo linqobe. Umfundi angaqila emhlolisweni ukuze athole indawo eyunivesithi edumileyo. Thina amaKhristu siyakwazi ukuthi ukwenza izinto lezi akuqondanga ngoba ‘ziyimisebenzi yenyama.’ (Gal. 5:19-21) Kodwa kungenzakala yini ukuthi ezinye izinceku zikaJehova ziqalise ukuncintisana labanye ebandleni zingananzeleli? Lo ngumbuzo oqakathekileyo okumele sizibuze wona ngoba ukuncintisana kungaphambanisa ukumanyana kwabantu bakaNkulunkulu. Kuhle ukucabangisisa ngezinceku zikaJehova okukhulunywa ngazo eBhayibhilini ezingazange zincintisane labanye. w21.07 14 ¶1-2

Ukuba lothando oluqotho kwenza sincedise labo abadanileyo. Abafowethu labodadewethu abalomusa baqhubeka bencedisa abadanileyo labahlulukelweyo. Bayabathanda abafowabo labodadewabo labo, futhi bazimisele ukwenza konke abangakwenza ukuthi babancedise. (Zaga. 12:25; 24:10) Lokhu yikho kanye umphostoli uPhawuli asikhuthaza ukuthi sikwenze. Wathi: ‘Duduzani abahlulukelweyo njalo lisekele ababuthakathaka, libekezelele wonke umuntu.’ (1 Thes. 5:14) Izikhathi ezinengi indlela engcono kakhulu yokuncedisa umfowethu loba udadewethu odanileyo yikumlalela nxa ekhuluma lokumqinisekisa ukuthi siyamthanda. UJehova uyabona nxa sincedisa imvu yakhe eligugu. IZaga 19:17 zithi: “Olomusa [“kophansi uboleka,” NWT] uJehova, uzakumvuza ngalokho akwenzayo.” w21.11 10 ¶11-12

Kuyini esingakwenza khathesi ukuze silungiselele okuzayo? Kumele sisuthiseke ngesilakho futhi siqakathekise kakhulu ubungane bethu loJehova. Nxa singaqhubeka sisibamazi kuhle uNkulunkulu wethu sizaqiniseka sibili ukuthi uzasivikela nxa sesihlaselwa nguGogi waseMagogi. Amazwi asembhalweni walamuhla enza sibone okwakusenza uDavida aqiniseke ukuthi uJehova uzamsekela. UDavida wayehlala ethembele kuJehova njalo uNkulunkulu wakhe kazange amdanise. Esesemncane wajamelana lenkalakatha yendoda engumFilisti okwakuthiwa nguGoliyathi. Watshela isotsha lelo elalisesabeka wathi: “Lamhla uJehova uzakunikela kimi.” (1 Sam. 17:46) Ngokuhamba kwesikhathi uDavida wayesesebenzela iNkosi uSawuli eyazama kanengi ukumbulala. Kodwa “uJehova wayeloDavida.” (1 Sam. 18:12) UDavida wayeyibonile indlela uJehova ayemncedise ngayo. Yikho wayengathandabuzi ukuthi uzamncedisa nxa esebunzimeni. w22.01 6 ¶14-15

UJehova ulesineke kukho konke akwenzayo, kaqumeli nxa esenza umsebenzi wakhe. Wenza njalo ukuze ibizo lakhe lidunyiswe labanye bancedakale. Ngokwesibonelo, kasixoxeni ngendlela atshengisa ngayo ukuthi ulesineke ngesikhathi edala umhlaba. IBhayibhili lithi wamisa ‘izilinganiso zawo lezinsika zawo kanye lelitshe lawo legumbi.’ (Jobe. 38:5, 6) Waphinda wazinika lesikhathi sokuhlola umsebenzi ayesewenzile. (Gen. 1:10, 12) Kumele ukuthi izingilosi zathokoza kakhulu ngesikhathi zibona indlela umsebenzi kaJehova owawuphuma ngayo. Lokhu kwenza zaqalisa ‘ukumemeza ngentokozo.’ Sifundani? Kwathatha izinkulungwane zeminyaka ukuthi uJehova adale umhlaba, izinkanyezi lazo zonke izinto eziphilayo njalo wathi esehlola konke ayekwenze ngesineke wathi “kwakukuhle kakhulu.”—Gen. 1:31. w21.08 9 ¶6-7

Emzekelisweni kaJesu, indoda ethile yayisizathatha uhambo. Yathi ingakasuki yabiza izinceku zayo, yanika ngayinye amathalenta okwenza ibhizimusi. Yayisazi ukuthi ngayinye yenelisa ukwenzani, yikho yanika inceku yokuqala amathalenta amahlanu, eyinye yayinika amabili leyinye yayinika elilodwa. Inceku zokuqala ezimbili zayisebenzela ngamandla inkosi yazo. Kodwa inceku yesithathu kayenzanga lutho ngethalenta eyayiliphiwe yikho yaxotshwa. Inceku yokuqala leyesibili zaqakathekisa umsebenzi ezaziwuphiwe njalo zasebenzela inkosi yazo ngamandla. Lokhu kwenza ukuthi zithole amathalenta amabili phezu kwalawo ezaziwaphiwe. Inkosi yazinika umvuzo inceku lezi ngenxa yokusebenza kwazo nzima. Yathokoza ngazo futhi yayibona ifanele ukuthi ziphiwe eminye imisebenzi. w21.08 21 ¶7; 22 ¶9-10

UJehova utshengise ukuthi uyabekezela sibili ezinsukwini lezi zokucina. Kafuni loba ngubani abhujiswe. (2 Phet. 3:9) Unika wonke umuntu ithuba lokuthi aphenduke. Kodwa ukubekezela kwakhe kulalapho okuphelela khona. Labo abangafuni ukusekela uMbuso wakhe bazayifunda ivaliwe njengoFaro. UJehova wathi kuye: “Kunje nje ngabe sengiselulile isandla sami ngakutshaya kanye labantu bakho ngesifo ebesizakucitsha emhlabeni. Kodwa ngikuphephisile ngayonale injongo yokuthi ngikubonise amandla ami, lokuthi ibizo lami lifakazwe kuwo wonke umhlaba.” (Eks. 9:15, 16) Zonke izizwe zizakwazi ukuthi uJehova nguye yedwa uNkulunkulu weqiniso. (Hez. 38:23) Ukunyikinywa okukhulunywa ngakho embhalweni walamuhla kuzatsho ukuthi labo abangafuni ukuvuma ukuthi uJehova nguye olelungelo lokubusa bazabhujiswa njengoFaro. w21.09 18-19 ¶17-18

Uzwa ubuhlungu yini ngenxa yokuthi umuntu omthandayo ususiwe ebandleni? Kuthiwani nxa abanye ebandleni bekhuluma izinto ezengezelela ubuhlungu obuzwayo? Asingeke silindele ukuthi wonke umuntu akhulume izinto ezisikhuthazayo. (Jak. 3:2) Sonke silesono yikho ungamangali nxa abanye beswela ukuthi bathini kumbe bekhuluma izinto ezikuzwisa ubuhlungu bengahlosanga. Khumbula amazwi omphostoli uPhawuli athi: “Qhubekani libekezelelana futhi lithethelelana ngenhliziyo yonke lanxa umuntu engabe elesizatho.” (Kol. 3:13) Qhubekani lincedisa amalunga emuli athembekileyo. Khathesi badinga ukuthi libatshengise ukuthi liyabathanda njalo libakhuthaze ukwedlula ngezinye izikhathi. (Heb. 10:24, 25) Kwesinye isikhathi, amalunga emuli alabo abasusiweyo ananzelela ukuthi abanye ebandleni sebebaphatha angani labo basusiwe. Asifuni ukuthi lokhu kwenzakale. Kumele sibancome futhi sibakhuthaze abantwana abalabazali abatshiya ukukhonza uJehova. w21.09 29 ¶13-14; 30 ¶16

Nxa osekhulile losesemutsha bexoxa, bobabili bayancedakala. (Rom. 1:12) Osesemutsha uzabona sibili ukuthi uJehova ulendaba lezinceku zakhe ezithembekileyo njalo osekhulile uzabona ukuthi uyathandwa. Osekhulile uzakholisa ukulandisela osesemutsha ngendlela uJehova ambusise ngayo. Ubuhle buyaphela nxa umuntu eguga kodwa labo abaqotho kuJehova baqhubeka besiba bahle kuye umnyaka ngamunye. (1 Thes. 1:2, 3) Lokhu kuliqiniso ngoba okweminyaka eminengi bavumele umoya ongcwele kaNkulunkulu ukuthi ubabumbe njalo ubancedise ukuthi babe lobuntu obuhle. Nxa singaqhubeka sisibabazi abafowethu labodadewethu laba abaligugu futhi sifunda kubo, sizabaqakathekisa njalo sibabone beligugu kakhulu! Ibandla liyaqina nxa abasesebatsha beqakathekisa asebekhulile kodwa liyaqina kakhulu nxa asebekhulile labo bebaqakathekisa abasesebatsha. w21.09 7 ¶15-18

Kumele siqhubeke silwisa ukuthi singabi lukhuni kwabanye kodwa sibe ‘lesihawu esikhulu’ kubo njengoNkulunkulu wethu. (Efe. 2:4) Nxa silesihawu kasisoze siphonguzwela abanye usizi kodwa sizakwenza okuthile ukuze sibancede. Sonke singadinga izindlela zokusiza labo abadinga uncedo kungaba semulini, ebandleni kumbe emphakathini esihlala kuwo. Akuthandabuzwa ukuthi manengi amathuba okutshengisa ukuthi silesihawu kwabanye. Ngokwesibonelo, ukhona yini omaziyo odinga ukududuzwa? Ukhona yini odinga ukuncediswa mhlawumbe odinga ukudla kumbe ukuthi simenzele okuthile okungamnceda? Ukhona yini umfowethu kumbe udadewethu obuyiselwe ebandleni odinga umngane ongamduduza kumbe amkhuthaze? Bakhona yini esingabaxoxela izindaba ezinhle zoMbuso? (Jobe. 29:12, 13; Rom. 10:14, 15; Jak. 1:27) Nxa singaba lelihlo elibukhali sizabona ukuthi abanye bayaludinga uncedo besekusinika ithuba lokubaphatha ngendlela etshengisa ukuthi silesihawu. Nxa singaba lesihawu kwabanye sizathokozisa uBaba wethu osezulwini, ‘olesihawu esikhulu.’ w21.10 13 ¶20-22

KuHubo 23 uDavida uqamba izibusiso ezinengi azithola ngenxa yokwamukela uJehova njengoMalusi wakhe. Uthi uJehova uyamkhokhela “ezindleleni zokulunga” futhi uhlala emsekela ngezikhathi ezinhle langezikhathi ezinzima. UDavida uyavuma ukuthi lanxa ‘esemadlelweni aluhlaza’ kaJehova uzakwehlelwa zinhlupho. Kwezinye izikhathi angadana kube sengathi udabula phakathi ‘kwesigodi sethunzi lokufa,’ njalo uzakuba lezitha. Kodwa ‘kayikwesaba okubi’ ngoba uJehova unguMalusi wakhe. Kungani uDavida wathi ‘kasweli lutho’? Ngenxa yokuthi wayelakho konke ayekudinga ukuze ahlale eseduze loJehova. Wayengadingi izinto ezinengi empilweni ukuze athokoze. Wayesuthiseka ngalokho ayekunikwa nguJehova. Okwakuqakatheke kakhulu kuye yikuthi uJehova wayembusisa futhi emvikela. Amazwi kaDavida atshengisa ukuthi akumelanga siqakathekise kakhulu impahla esilayo. w22.01 3-4 ¶5-7

Zinengi izinceku zikaJehova ezatshumayeza abantu ababengafuni ukulalela. Ngokwesibonelo, kukhanya uNowa waba ‘ngumtshumayeli wokulunga’ okweminyaka engaba ngu-40 loba engu-50. (2 Phet. 2:5) Akuthandabuzwa ukuthi wayelethemba lokuthi abanye bazamlalela kodwa uJehova kazange atsho lutho ngalokho. Ngesikhathi emtshela ukuthi akhe umkhumbi, wathi: “Wena uzangena emkhunjini—wena lamadodana akho lomkakho kanye labomalokazana bakho babe lawe.” (Gen. 6:18) Kanti njalo ngesikhathi uJehova emtshela ukuthi awakhe ube nganani umkhumbi, kumele ukuthi uNowa wazibonela ukuthi abantu abanengi babengasoze bamlalele nxa ebatshumayeza. Phela wawungeneli abantu abanengi. (Gen. 6:15) Njengoba sisazi, akula ngitsho loyedwa ebantwini labo ababelodlakela owamlalelayo uNowa. (Gen. 7:7) Kambe uJehova wabona angani kawenzanga kuhle umsebenzi wokutshumayela? Ngitsho! Kuye wayephumelele ngoba wayekwenze konke ayemlaye ukuthi akwenze.—Gen. 6:22. w21.10 26 ¶10-11

Akucabange ukuthi uRuthe wezwa njani esizwa uNawomi ekhuluma amazwi lawo! Wayengamtshiyanga ngesikhathi esebunzimeni. Wayekhale laye, wamduduza futhi wahamba laye okwamalanga amanengi. Kodwa uNawomi wathi: “UJehova usengibuyise ngingelalutho.” Lanxa uRuthe wayeseceleni kwakhe, amazwi akhe enza kwakhanya angani wayengakuqakathekisi ayemenzele khona. Kumele ukuthi lokhu kwamzwisa ubuhlungu obukhulu uRuthe. Lanxa kunjalo, kazange amtshiye uNawomi. (Ruthe. 1:3-18) Udadewethu angakhuluma amazwi asizwisa ubuhlungu lanxa senze konke esingakwenza ukuthi simncedise. Kodwa akumelanga siphangise ukucaphuka. Asimtshiyi udadewethu ophakathi kohlupho futhi sicela uJehova ukuthi asincedise sithole indlela yokumduduza. (Zaga. 17:17) Udade ophakathi kohlupho angaqala esala ukuncediswa. Kodwa nxa silothando oluqotho sizakwenza konke esingakwenza ukuze siqhubeke simncedisa, singakhalali.—Gal. 6:2. w21.11 11 ¶17-19

EBhayibhilini ibala elithi “ngcwele” loba elithi “ubungcwele” litsho ukuhlanzeka kumbe ukuba msulwa ekuziphatheni lasekukhonzeni. Amabala la aphinde atsho ukwehlukaniselwa ukukhonza uNkulunkulu. Yikho kungathiwa singcwele nxa simsulwa endleleni esiziphatha ngayo, sikhonza uJehova ngendlela ayamukelayo futhi singabangane bakhe abaseduze. Kuyasimangalisa ukuthi lanxa silesono, uJehova ufuna sibe ngabangane bakhe abaseduze yena engcwele ngokupheleleyo. UJehova uhlanzekile futhi umsulwa kukho konke. Lokhu kukhanya emazwini atshiwo ngamanye amaserafi loba izingilosi eziseduze kwesihlalo sobukhosi sikaJehova. Athi: “Ungcwele, ungcwele, ungcwele uJehova uSomandla.” (Isaya. 6:3) Izingilosi lezi ziseduze loNkulunkulu wazo ongcwele ngenxa yokuthi lazo zingcwele. w21.12 3 ¶4-5

Abasakhulayo bafuna ukukhetha lokho okuzabenza bathokoze sibili empilweni. Ababalisi lezihlobo ezingayisibo boFakazi zingabakhuthaza ukuthi baye eyunivesithi ukwenzela ukuthi bathole umsebenzi omuhle olemali. Imfundo enje ingathathela abasakhulayo isikhathi esinengi. Abazali babo kanye labangane babo ebandleni bona bangabakhuthaza ukuthi benze imisebenzi yenkonzo ethile. Pho kuyini okunganceda osakhulayo othanda uJehova ukuthi akhethe kuhle? Kungaba kuhle ukuthi abale u-Efesu 5:15-17 abesecabangisisa ngalokho akutshoyo. Nansi imibuzo angazibuza yona nxa esewabalile amavesi la: ‘Iyini “intando kaJehova”? Yisiphi isinqumo esizamthokozisa? Yisiphi isinqumo esizanginceda ukuthi ngisisebenzise kuhle isikhathi sami?’ Khumbula ukuthi “insuku zimbi” lokuthi sekuseduze ukuthi umhlaba lo obuswa nguSathane utshabalaliswe. w22.01 27 ¶5

UJakhobe waqalisa nini ukuba ngumlandeli kaJesu? UJesu wathi esevusiwe “wasebonakala kuJakhobe, ngemva kwalokho wabonakala kubo bonke abaphostoli.” (1 Khor. 15:7) Ngemva kwalokho uJakhobe waba ngumfundi kaJesu. Laye wayekhona endlini ephezulu eJerusalema ngesikhathi abaphostoli belindele umoya ongcwele ababewuthenjisiwe. (ImiSeb. 1:13, 14) Ngemva kwesikhathi uJakhobe waba lilunga lequla elikhokhelayo langalesosikhathi. (ImiSeb. 15:6, 13-22; Gal. 2:9) Kungakafiki u-62 C.E., waphefumulelwa ukuthi abhalele amaKhristu agcotshiweyo incwadi. Incwadi leyo ilokhu isinceda lamuhla kungelani lokuthi silethemba lokuphila ezulwini kumbe emhlabeni. (Jak. 1:1) Indoda okuthiwa nguJosephus eyayingumlobi wembali yamaJuda yabhala ukuthi uMphristi Omkhulu wamaJuda okuthiwa ngu-Ananiyasi Omncane wathi uJakhobe abulawe. UJakhobe wahlala ethembekile kuJehova waze waqeda inkonzo yakhe yasemhlabeni. w22.01 8 ¶3; 9 ¶5

Okunye esikufundayo embhalweni walamuhla yikuthi akumelanga sikhangelele ukuthi uJehova asivikele kubo bonke ubunzima obunganyikinya ukholo lwethu. Lathi njengoJesu kumele sizimisele ukuhlala sithembekile kuze kube sekufeni. (Mat. 16:24, 25) Lanxa kunjalo, siyaqiniseka ukuthi uJehova ngeke avume ukuthi silingwe ngalokho esingeke senelise ukukubekezelela. (1 Khor. 10:13) Okunye esikufundayo yikuthi lathi njengoJesu singaphathwa kubi lanxa kungelanto embi esiyenzileyo. (1 Phet. 2:19, 20) Okwenza siphathwe njalo yikuthi kasisibo bomhlaba futhi sifakaza iqiniso. (Joh. 17:14; 1 Phet. 4:15, 16) UJesu wayekwazi ukuthi kungani uNkulunkulu evumela ukuthi ahlupheke. Kodwa ezinye izinceku zikaJehova ezake zaba phakathi kobunzima zazizibuza ukuthi kungani uJehova evumela ukuthi ezinye izinto zenzakale. (Hab. 1:3) UNkulunkulu wethu olesihawu futhi obekezelayo uyakwazi ukuthi okwenza izinceku zakhe zizibuze lokhu kayisikho ukuthi kazilakholo kodwa zidinga ukududuzwa nguye.—2 Khor. 1:3, 4. w21.04 11 ¶9-10

UJehova uzakwamukela ukukhonza kwethu nxa simlalela njalo sikwenza ngoba simthanda futhi simhlonipha. Siyakwazi ukuthi ufanele ukukhonzwa futhi sifuna ukwenza konke okusemandleni ethu ukuthi simkhonze. Enye indlela esikhonza ngayo uJehova yikukhuleka kuye. IMibhalo ifanisa imithandazo yethu lempepha elungiswe kuhle eyayitshiswa ethabanikeli futhi ngokuhamba kwesikhathi eyayisitshiswa ethempelini. Impepha le yayimthokozisa uNkulunkulu. Lemithandazo yethu esuka enhliziyweni ‘iyamthokozisa’ uNkulunkulu lanxa siyabe sisebenzisa amazwi alula. (Zaga. 15:8; Dute. 33:10) UJehova uyakuthanda ukuzwa siveza indlela esimthanda ngayo futhi simbonga emithandazweni yethu. Ufuna simtshele okusikhathazayo kanye lezifiso zethu. Ungakakhuleki, kuhle ukuthi uqale ucabangisise ngalokho ozakutsho. Nxa ungenza njalo uzanikela impepha emthokozisayo uYihlo osezulwini. w22.03 20 ¶2; 21 ¶7

E-Amagedoni ayisithi esizakhetha ukuthi ngobani uJehova azabatshengisa isihawu. (Mat. 25:34, 41, 46) Sizayithemba yini indlela uJehova azakwahlulela ngayo kumbe sizakhubeka? Kusegcekeni ukuthi kumele simthembe sibili khathesi ukuze simthembe ngokupheleleyo esikhathini esizayo. Akucabange ukuthi sizezwa njani emhlabeni omutsha. Inkolo yamanga iyabe ingasekho. Ezamabhizimusi ezigcwele ubuhwaba kanye labezombusazwe abacindezela abantu lababangele ukuthi bahlupheke kusukela kudala labo bayabe bengasekho. Siyabe singasaguli, singasagugi njalo singasafelwa ngabantu esibathandayo. USathane lamadimoni bazabotshwa okweminyaka eyinkulungwane. Zonke izinto ezimbi ezibangelwe yikuhlamuka kwabo ziyabe seziphele du. (Isam. 20:2, 3) Sizathokoza sibili ngokuthi sayithemba indlela uJehova enza ngayo izinto. w22.02 6-7 ¶16-17

UJesu wenza ukuthi kube lokuthula njalo wakhuthaza abanye ukuthi balungise ingxabano zabo. Wabafundisa ukuthi nxa befuna uJehova amukele imihlatshelo yabo kumele benze ukuthi kube lokuthula phakathi kwabo labafowabo. (Mat. 5:23, 24) Kanti njalo wayehlala enceda abaphostoli ukuthi bekele ukuphikisana ngokuthi ngubani owayemkhulu phakathi kwabo. (Luk. 9:46-48; 22:24-27) Nxa sifuna ukwenza ukuthi kube lokuthula, akumelanga sixwaye ukubangela ingxabano kuphela kodwa kumele kube yithi esiqalayo ukwenza ukuthi kube lokuthula njalo sikhuthaze abafowethu labodadewethu ukuthi balungise ingxabano zabo. (Flp. 4:2, 3; Jak. 3:17, 18) Singazibuza: ‘Ngizimisele yini ukulahlekelwa ngokuthile ukuze ngenze ukuthi kube lokuthula? Ngiyambambela isikhwili yini umzalwane ongizwise ubuhlungu? Ngiyaqala yini ukwenza ukuthi kube lokuthula lanxa kuyimi engonelweyo?’ w22.03 10 ¶10-11

Kudala iBhayibhili lathi abantu bakaNkulunkulu ‘babezazinikela’ ngokuthanda kwabo ekumkhonzeni bekhokhelwa yiNdodana yakhe. (Hubo. 110:3) Isiphrofetho leso siyagcwaliseka sibili lamuhla. Umnyaka ngamunye, izinceku zikaJehova ezikhutheleyo ziqeda amahora angamamiliyoni zitshumayela. Azibhadalwa ukwenza umsebenzi lo, ziwenza ngoba zifuna. Zincedisa abafowabo labodadewabo ngezinto abazidingayo, ziyabakhuthaza futhi ziyabancedisa ukuthi baqinise ukholo lwabo. Abadala lezinceku ezikhonzayo baqeda amahora amanengi belungiselela izinkulumo zabo futhi beselusa abazalwane. Kuyini okwenza abantu bakaNkulunkulu benze konke lokhu? Yikuthanda uJehova lomakhelwane. (Mat. 22:37-39) UJesu wayeqakathekisa kakhulu okufunwa ngabanye ukwedlula lokho yena ayekufuna. Lathi siyazama ukumlingisela. (Rom. 15:1-3) Labo abamlingiselayo bazabusiswa. w22.02 20 ¶1-2

Ko-Israyeli, abantu abanengi ababesebenza emasimini babeholiswa ekupheleni kwelanga ngalinye. Nxa isisebenzi sasingaholiswanga ekupheleni kwelanga, sasingeke sibe lemali yokuthengela imuli yaso ukudla kwamhlalokho. UJehova wathi: ‘Singumyanga, sithembe leloholo.’ (Dute. 24:14, 15; Mat. 20:8) Lamuhla izisebenzi ezinengi ziholiswa kabili ngenyanga kumbe ekupheleni kwayo, hatshi nsuku zonke. Kodwa isimiso esikuLevi 19:13 silokhu sisebenza lalamuhla. Abanye abaqhatshi baqilibezela izisebenzi zabo ngokuziholisa imali encane kakhulu kulaleyo okumele ziyihole. Bayakwazi ukuthi izisebenzi lezo zingabe zingela ezingayakhona yikho zizaqhubeka zisebenza lanxa zihola imali engatsho lutho. Okwenziwa ngabaqhatshi abanje kufanana ‘lokubambela umuntu oqhatshiweyo iholo lakhe.’ UmKhristu olezisebenzi kumele abe leqiniso lokuthi uziholisa kuhle. w21.12 10 ¶9-10

UJesu wayesewomile njengoba wayehlukuluziwe. Wayedinga umuntu ongamncedisa ukuthi aqede ukoma kwakhe. UJesu kwakungamyangisi ukutsho lokho ayekudinga, lathi akumelanga kusiyangise. Mhlawumbe kasisibobantu abajayele ukucela uncedo kwabanye. Kodwa nxa sidinga uncedo, akumelanga siyekele ukulucela. Ngokwesibonelo, nxa sesigugile kumbe singaphilanga kuhle emzimbeni, singacela umngane ukuthi asiphelekezele ezitolo kumbe ukuyabona udokotela. Nxa udanile ungacela umdala webandla kumbe omunye umKhristu oqinileyo ekukhonzeni ukuthi akulalele loba akutshele “ilizwi elilomusa” ukuze akukhuthaze. (Zaga. 12:25) Asikhumbuleni ukuthi abafowethu labodadewethu bayasithanda lokuthi bafuna ukusinceda ‘ngezikhathi zenhlupheko.’ (Zaga. 17:17) Kodwa kabenelisi ukwazi esikucabangayo, yikho bangabe bengakwazi ukuthi sidinga uncedo nxa singazange sibatshele. w21.04 11-12 ¶11-12

Abanengi bethu balujayela nzima utshintsho. Abanye ababesenkonzweni eqakathekileyo okwesikhathi eside baphiwa omunye umsebenzi wenkonzo. Abanye bacine besima ukwenza umsebenzi wenkonzo abawuthandayo ngenxa yokukhula. Khona kuyadanisa vele lokhu. Kuba lula ukuthi sijayele isimo esesikuso nxa sibona izinto ngendlela uJehova azibona ngayo. Wenza izinto ezinkulu lamuhla njalo silesibusiso esimangalisayo sokusebenza laye. (1 Khor. 3:9) UJehova uzaqhubeka esithanda ngendlela efananayo. Yikho nxa kungaba lotshintsho enhlanganisweni, ubusumiswa umsebenzi okade uwenza, ungazikhathazi kakhulu ngokulokhu udinga izizatho zokuthi kwenziwe utshintsho lolu. Kulokufisa ukuthi ngabe izinto ziyabuyela emuva, thandaza ucele ukuthi uJehova akuncedise ubone okuhle esimeni osukuso. (UmTshu. 7:10) Hlala ubona okuhle esimeni osukuso. Nxa ungenza njalo uzahlala uthokoza njalo uthembekile kuJehova lanxa izimo zakho zitshintsha. w22.03 17 ¶11-12

Ngobani uJehova abatshengisa uthando oluqotho? Kalutshengisi loba ngubani. Ulutshengisa abangane bakhe abaseduze. UNkulunkulu wethu uqotho kubangane bakhe. Ubagcinele okuhle njalo kasoze abalahle loba sekutheni. UJehova utshengise uthando ebantwini bonke. UJesu wathi kuNikhodemu: “UNkulunkulu wawuthanda kakhulu umhlaba [abantu bonke] waze wanikela ngeNdodana yakhe ezelwe yodwa, ukuze wonke umuntu otshengisa ukuthi ulokholo kuyo angabhujiswa, kodwa abe lokuphila okungapheliyo.”—Joh. 3:1, 16; Mat. 5:44, 45. w21.11 2 ¶3; 3 ¶6-7

Impilo emhlabeni lo ilukhuni njalo kungenzeka sithwale nzima kakhulu esikhathini esizayo. (Mat. 24:21) Sililindele ngabomvu ilanga lapho inhlupho lezi ezizaphela khona, zingaphindi zibe khona njalo sikhohlwe ngazo! (Isaya. 65:16, 17) Yikho kumele siqhubeke sifunda ukuqinisela. Ngenxa yani? UJesu wathi: “Nxa lingaqinisela lizalondoloza impilo zenu.” (Luk. 21:19) Sizenelisa ukuqhubeka siqinisela nxa singacabanga ngendlela abanye abalenhlupho ezinjengezethu abaqinisela ngayo. Ngubani obekezela ukwedlula bonke abantu? NguJehova uNkulunkulu. Iyakumangalisa yini impendulo le? Ingakumangalisa, kodwa nxa ungacabangisisa ngayo uzazwisisa ukuthi kungani kunjalo. Umhlaba lo ubuswa nguDeveli yikho ugcwele inhlupho ezinengi kangaka. UJehova ulamandla okuqeda inhlupho lezo ngokucwayiza kwelihlo, kodwa umelele ilanga alibekileyo ukuthi akwenze lokho. (Rom. 9:22) Uzaqhubeka ebekezela kuze kufike ilanga lelo. w21.07 8 ¶2-4