March

Umphostoli uPhetro wakhuthaza abafowabo ukuthi basebenzise iziphiwo zabo ukuze bakhuthaze abanye ebandleni. Wathi: “Kusiya ngesipho ngamunye asamukeleyo, sisebenziseni ukuncedisana njengoba lingabaphathi abahle bomusa omkhulu kaNkulunkulu.” (1 Phet. 4:10) Akumelanga sesabe ukusebenzisa iziphiwo zethu sicabanga ukuthi abanye bazaba lomhawu kumbe bazikhangelele phansi. Kodwa akumelanga sizigqaje ngazo. (1 Khor. 4:6) Kumele sihlale sikhumbula ukuthi loba yiziphi iziphiwo esilazo sizinikwe nguNkulunkulu. Yikho kumele sizisebenzise ukuncedisa abanye ebandleni hatshi ukuthi sibukwe ngabantu. (Flp. 2:3) Nxa singasebenzisa amandla ethu kanye leziphiwo esilazo ukwenza intando kaNkulunkulu, sizaba lesizatho sokuthokoza. Okuzasithokozisa yikuthi siyabe sisebenzisa iziphiwo zethu ukudumisa uJehova hatshi ukuthi senza okunengi kulabanye kumbe ukuthi sizibona singcono kulabo. w22.04 11-12 ¶7-9

UJesu wayeyithanda iMibhalo eNgcwele njalo isiphrofetho esikuHubo 40:8 sitshengisa indlela ayezizwa ngayo, sithi: “Ngiyakuthanda ukwenza intando yakho Nkulunkulu wami, umthetho wakho ungaphakathi enhliziyweni yami.” Lokhu kwenza uJesu wathokoza futhi waqhubeka ekhonza uJehova. Nxa lathi singabala iLizwi likaNkulunkulu futhi silithande sizathokoza futhi siphumelele. (Hubo. 1:​1-3) Asilandeleni isibonelo sikaJesu lamazwi akhe ngokuthuthukisa indlela esibala ngayo iBhayibhili. Singazwisisa ngcono esikubala eBhayibhilini ngokuthandaza, ngokubala singagijimi, ngokuzibuza imibuzo langokubhala phansi eminye imicijo esiyifundileyo. Singaba lokuqedisisa ngokuhlolisisa lokho esikubalayo sisebenzisa amabhuku esiwaphiwa yinhlanganiso. Singavumela lokuthi iLizwi likaNkulunkulu lisibumbe ngokuba ngabathobekileyo langokuzimisela ukufunda kulokho esikubalayo. Nxa singazama ukwenza zonke izinto lezi sizathola okunengi nxa sibala iBhayibhili futhi kuzasinceda ukuthi sisondele kuJehova.—Hubo. 119:17; Jak. 4:8. w23.02 13 ¶15-16

Khetha lokho ofuna ukukwenza njalo sebenza nzima ukuze uphumelele. Kuyini okungakunceda? Ake sithi ufuna ukuthuthuka endleleni ofundisa ngayo. Ukuhlola ibhukwana elithi Khuthalela Ukubala Lokufundisa kuzakunceda. Nxa ungaphiwa inkulumo emhlanganweni waphakathi kweviki, ungacela umfowethu ofundisa kuhle ukuthi aqale ayilalele abesekutshela lapho ongayithuthukisa khona. Lungiselela kuseselesikhathi ukuze abafowethu labodadewethu babone ukuthi usebenza nzima lokuthi bangakuthemba. (2 Khor. 8:22) Ungakhalali nxa ufuna ukuthuthuka ekwenzeni into ekuthwalisa nzima. IBhayibhili alisitsheli ukuthi uThimothi waba yingcitshi yini ekufundiseni ebandleni. Kodwa akuthandabuzwa ukuthi ukulalela iseluleko sikaPhawuli kwamnceda ukuthi athuthuke.—2 Tim. 3:10. w22.04 24-25 ¶8-11

Simelani isilo esilamakhanda ayisikhombisa? Isilo lesi sinjengengwe kodwa inyawo zaso zinjengezebhere, umlomo waso unjengowesilwane njalo silempondo ezilitshumi. Isilo lesi sihambelana lezilo ezine okukhulunywa ngazo kuDanyeli isahluko 7. Umehluko nje yikuthi ebhukwini leSambulo kukhulunywa ngesilo esisodwa esilezitho ezifanana lezezilo ezine okukhulunywa ngazo kuDanyeli. Isilo lesi asimeli uhulumende oyedwa kumbe umbuso obusa umhlaba wonke. UJohane wathi sibusa “phezu kwazo zonke izizwana, labantu, lezindimi, lezizwe.” Yikho kumele ukuthi silamandla kulohulumende welizwe elilodwa nje. (Isam. 13:7) Kuyacaca-ke ukuthi isilo lesi simela yonke imibuso ebibusa abantu kusukela kudala kuze kube khathesi. (Umtshu. 8:9) Kanti njalo eBhayibhilini u-10 ujayele ukusetshenziswa nxa kukhulunywa ngolutho olupheleleyo. w22.05 9 ¶6

Ngobani abazathola izibusiso lezi? Abokuqala ngabexuku elikhulu abasinde e-Amagedoni kanye labantwana abazazalwa emhlabeni omutsha. Abesibili ngabazavuswa okukhulunywa ngabo kuSambulo isahluko 20. (Isam. 20:​11-13) “Abalungileyo” abafayo kanye “labangalunganga” abangazange bathole ithuba lokufunda ngoJehova bazavuswa ukuthi baphile lapha emhlabeni. (ImiSeb. 24:15; Joh. 5:​28, 29) Lokhu akutsho ukuthi bonke abafileyo bazavuswa ngesikhathi sokubusa kweminyaka eyinkulungwane. Labo abangazange bavume ukukhonza uJehova besaphila abasoze bavuswe. Balithola ithuba lokufunda ngaye kodwa batshengisa ukuthi abafanelanga ukuphila emhlabeni olipharadayisi.—Mat. 25:46; 2 Thes. 1:9; Isam. 17:8; 20:15. w22.05 18 ¶16-17

UJesu usebenzise ‘inceku ethembekileyo lehlakaniphileyo’ ukuze ahlele abalandeli bakhe babe yinhlanganiso emangalisayo emhlabeni esekela ukukhonza kweqiniso. (Mat. 24:45) Wena uyibona njani inhlanganiso le? Engxenye lawe uzizwa njengoPhetro owaphendula uJesu ngamazwi asembhalweni walamuhla. Ngabe singaphi lamuhla aluba asizange siyazi inhlanganiso kaJehova? UKhristu usebenzise yona ukuze asinike konke okusinceda sihlale siqinile ekukhonzeni. Uyasifundisa lokuthi siwenze njani umsebenzi wokutshumayela. Uphinda asincedise ukuthi sigqoke “ubuntu obutsha” ukuze sithokozise uNkulunkulu. (Efe. 4:24) UJesu utshengise ukuthi uhlakaniphile ngokusinika iziqondiso ezisincedayo ngezikhathi ezinzima. Sazibonela ukuthi iziqondiso asinika zona ziyasinceda ngesikhathi kuqala umkhuhlane we-COVID-19. Abantu abanengi babengakwazi ukuthi benzeni kodwa uJesu waba leqiniso lokuthi sithola iziqondiso ezisinceda ukuthi sihlale sivikelekile. w22.07 12 ¶13-14

UJehova walaya ama-Israyeli ukuthi ahlale efundisa abantwabawo ngaye. (Dute. 6:​6, 7) Abazali labo babetshona labantwababo yikho babelamathuba amanengi okuxoxa labo lokubafundisa ukuthi bathande uJehova. Ngokwesibonelo, umfana ongum-Israyeli wayengaqeda isikhathi esinengi encedisa uyise ukuhlanyela loba ukuvuna emasimini. Udadewabo yena wayengaqeda isikhathi esinengi encedisa unina ukuthunga lokweluka lokwenza eminye imisebenzi yangekhaya. Abazali labantwana babengaxoxa ngezinto ezinengi eziqakathekileyo ngesikhathi besebenza bonke. Ngokwesibonelo babengaxoxa ngobuhle bukaJehova langendlela ayebancedisa ngayo. Emazweni amanengi abazali labantwana abasatshoni bonke. Abazali bengabe besemsebenzini, abantwana bona besesikolo. Yikho abazali kumele bazame ukudinga isikhathi sokuxoxa labantwababo.—Efe. 5:​15, 16. w22.05 28 ¶10-11

Umuntu owenza isono esikhulu uyabe ewephule okuzwayo umthetho kaNkulunkulu. Kuyabe kumele akhuleke kuJehova ecela ukuthi amthethelele njalo aye ebadaleni bebandla. (Hubo. 32:5; Jak. 5:14) Yiwuphi umsebenzi abadala abalawo? Phela uJehova nguye yedwa olamandla okuthethelela izono ngokupheleleyo futhi lokhu ukwenza esebenzisa inhlawulo. Kodwa unike abadala umsebenzi wokuhlola besebenzisa iMibhalo ukuthi umuntu owonileyo angaqhubeka yini esebandleni. (1 Khor. 5:12) Nansi eminye imibuzo okumele bazame ukuthola impendulo zayo: Umuntu lo wone ngabomo yini? Uqale wahlela yini ukwenza isono? Ubeselomkhuba wokwenza isono leso yini? Kulobufakazi yini obutshengisa ukuthi uyaphenduka kumbe obokuthi uJehova usemthethelele?—ImiSeb. 3:19. w22.06 9 ¶4

UJesu wakhuthaza abalandeli bakhe ukuthi bathande ukulunga. (Mat. 5:6) Lokhu kutsho ukuthi umuntu kumele azimisele ukwenza izinto uJehova athi ziqondile, zilungile njalo zimsulwa. Asithandabuzi ukuthi lawe uyalithanda iqiniso kanye lokwenza okulungileyo. Uyawazonda amanga lazo zonke izinto ezimbi lezingaqondanga. (Hubo. 119:​128, 163) Umuntu othanda ukuqamba amanga ulingisela uSathane umbusi womhlaba lo. (Joh. 8:44; 12:31) Eyinye into uSathane azimisele ukuyenza yikungcolisa ibizo likaNkulunkulu elingcwele. Ubelokhu ehutshuza amanga ngoNkulunkulu wethu kusukela u-Adamu lo-Eva behlamuka ensimini ye-Edeni. USathane ufuna sicabange ukuthi uNkulunkulu kalandaba labantu lokuthi nguMbusi ongathembekanga ongafuni sithokoze empilweni. (Gen. 3:​1, 4, 5) Amanga kaSathane asephambanise izingqondo lezinhliziyo zabantu. Nxa abantu bengasalithandi iqiniso kuba lula ukuthi uSathane abayenge ukuthi benze konke okungalunganga lokubi.—Rom. 1:​25-31. w23.03 2 ¶3

Nxa ulomkhuba olwisa ukuthi uwutshiye, kwezinye izikhathi ungazithola usubuyele kuwo. Ungacina usukhalala loba ucaphuka nxa ubona ukuthi kuseselomango ukuthi ubhabhathizwe. Manje kuyini okuzakunceda ukuthi ubekezele? Yikuthanda uJehova. Into enhle ukwedlula zonke engakunceda yikuthanda uJehova. (Zaga. 3:​3-6) Ukuthanda uJehova ngenhliziyo yakho yonke yikho okuzakunceda ukuthi uqhubeke umkhonza lanxa sekunzima. Kulamavesi amanengi asitshela ukuthi uJehova ulothando oluqotho ezincekwini zakhe. Uthando olunjalo alupheli loba sekutheni njalo alukhalali lanxa sekunzima. Wena wenziwa ngomfanekiso kaNkulunkulu. (Gen. 1:26) Pho ungenzani ukuze lawe ube lothando oluqotho? Into yokuqala ongayenza yikubonga. (1 Thes. 5:18) Nsuku zonke zibuze ukuthi uJehova ukutshengise njani ukuthi uyakuthanda. Ungenza njalo ubusuthandaza umbonga, uqamba zona kanye izinto akwenzele zona. Nanzelela ukuthi zonke izinto akwenzela zona zitshengisa ukuthi uyakuthanda. w23.03 12 ¶17-19

UJesu kazange ake ayekele ukuqhubeka esiba lomusa kubaphostoli bakhe abangu-12 njalo waqhubeka ebathanda. Kusifundisani lokho? Okuqakathekileyo ayisikho nje ukuthi umuntu wenzeni kodwa yikuthi thina senzani nxa umuntu esiphambanisile. Nxa umuntu engasizondisa nansi imibuzo esingazibuza yona: ‘Kanti yindaba okwenziwe ngumuntu lo kungicaphula kangaka? Kambe ukuthi kuveza obunye ubuntu bami okumele ngibulungisise? Umuntu lo ongicaphulileyo engabe elento emhluphayo yini? Lanxa ngikubona ukuthi umuntu lo ungiphambanisele sibili ngingatshengisa ukuthi ngiyamthanda yini ngokuyekela into yakhona idlule?’ Nxa siqhubeka sithanda abanye siyabe silokhu sitshengisa ukuthi singabalandeli bakaJesu beqiniso. Okwenziwa nguJesu kuphinde kusifundise ukuthi kumele sizame ukuzwisisa abafowethu labodadewethu. (Zaga. 20:5) UJesu wayesenelisa ukubona okusenhliziyweni kodwa thina kasenelisi. Lanxa kunjalo, singenelisa ukubekezelela abafowethu labodadewethu nxa bengasiphambanisa. (Efe. 4:​1, 2; 1 Phet. 3:8) Kulula ukuthi senze njalo nxa sibazi kuhle. w23.03 30 ¶14-16

Nxa sigula, uSathane angazama ukusenza sikhethe ukwelatshwa ngendlela engamthokozisiyo uJehova. Odokotela lezinye izihlobo ezingakhonziyo bangazama ukusibamba ngamandla ukuthi sifakwe igazi. Abanye bangazama ukusincenga ukuthi selatshwe ngezinye indlela eziphikisana lalokho okutshiwo liBhayibhili. Asikufuni ukufa kodwa nxa kungenzakala lokhu, siyakwazi ukuthi uJehova kasoze ayekele ukusithanda. (Rom. 8:​37-39) Nxa abangane bakaJehova bengafa, uhlala ebakhumbula sengathi bayaphila. (Luk. 20:37) Uyafisa sibili ukubavusa. (Jobe. 14:15) UJehova ubhadale inhlawulo edula kakhulu ukuze ‘sibe lokuphila okungapheliyo.’ (Joh. 3:16) Siyakwazi ukuthi uyasithanda sibili lokuthi ulendaba lathi. Yikho asimtshiyi nxa sigula kumbe sisethuselwa ngokufa kodwa sithembela kuye ukuthi asiduduze, asiphe inhlakanipho njalo asiqinise.—Hubo. 41:3. w22.06 18 ¶16-17

IBhayibhili lithi: “Ukwesaba uJehova yikuqala kokuhlakanipha, lokwazi oNgcwele Kakhulu yikho ukuzwisisa.” (Zaga. 9:10) Yikho nxa kulesinqumo esiqakathekileyo okumele sisenze kumele sidinge ukuthi uJehova uthini besesilandela lokho asitshela khona. Singakwenza lokho ngokubala iBhayibhili lamabhuku asekelwe kulo. Lokhu kuzatshengisa ukuthi silokuhlakanipha okuvela kuNkulunkulu. (Zaga. 2:​5-7) UJehova nguye yedwa ongasipha ukuhlakanipha kweqiniso. (Rom. 16:27) Kungani sisitsho njalo? Okokuqala, nguye uMdali wethu futhi ulwazi lwakhe lokuzwisisa kwakhe izinto azidalileyo akulamkhawulo. (Hubo. 104:24) Okwesibili, konke uJehova akwenzayo kutshengisa ukuthi ulokuhlakanipha. (Rom. 11:33) Okwesithathu, lokho uJehova asitshela khona kuhlala kunceda labo abakulalelayo. (Zaga. 2:​10-12) Nxa sifuna ukuba lokuhlakanipha kweqiniso, kumele silalele lokho esikutshelwa nguJehova njalo sikuvumele kusiqondise nxa sisenza izinqumo loba nxa sifuna ukwenza okuthile. w22.10 19 ¶3-4

ISambulo isahluko 12 sisitshela ukuthi uSathane wanqotshwa wasephoselwa phansi emhlabeni yena kanye lamadimoni akhe. Lokhu kwamthukuthelisa kakhulu njalo waqalisa ukuhlasela abantu kwaba losizi emhlabeni. (Isam. 12:​9-12) Iziphrofetho lezi zisinceda njani? Izinto ezenzakala emhlabeni kanye lokutshintsha kwendlela abantu abenza ngayo kwenza sibone ukuthi uJesu useyiNkosi. Kasizwa ubuhlungu kakhulu nxa sibona abantu bengelandaba labanye njalo belenzondo ngoba siyakwazi ukuthi bagcwalisa iziphrofetho eziseBhayibhilini. UMbuso usubusa sibili! (Hubo. 37:1) Kanti njalo silindele ukuthi izinto ziqhubeke zisiba zimbi kakhulu emhlabeni njengoba i-Amagedoni ilokhu isondela. (Mak. 13:8; 2 Tim. 3:13) Siyambonga sibili uBaba wethu osithandayo ngokusinceda sizwisise ukuthi kungani kulenhlupho zonke lezi emhlabeni. w22.07 3-4 ¶7-8

Singacela uJehova ancedise esikhonza labo ukuze baqinisele nxa begula, behlelwe ngumonakalo wemvelo, kulezimpi, behlukuluzwa kumbe belezinye inhlupho. Singathandazela labafowethu labodadewethu abazinikelayo ukuze bancedise abehlelwe ngumonakalo. Mhlawumbe kulabanye obaziyo abaphakathi kobunzima. Baqambe ngamabizo nxa uthandaza uwedwa. Siyabe sitshengisa ukuthi siyabathanda sibili nxa sicela uJehova ukuthi abancedise baqinisele. Abafowethu abakhokhelayo bayabonga kakhulu nxa abanye bebathandazela futhi imithandazo enjalo iyabanceda. Umphostoli uPhawuli wacela abanye ukuthi bamthandazele, wathi: “Lingithandazele lami ukuthi ngiphiwe amazwi lapho sengivula umlomo wami ukuze ngenelise ukukhuluma ngesibindi nxa sengiveza imfihlo engcwele yezindaba ezinhle.” (Efe. 6:19) Lalamuhla kulabazalwane abanengi abasikhokhelayo abasebenza nzima. Sitshengisa ukuthi siyabathanda ngokucela uJehova ukuthi abusise umsebenzi abawenzayo. w22.07 23-24 ¶14-16

Isotsha ligqoka ingwane evikela ikhanda lalo. Empini esiyilwa loSathane kumele sivikele ingqondo zethu. Usihlasela ngezilingo kanye lemicabango engaphambanisa ingqondo zethu. Ithemba lethu livikela ingqondo zethu ukuze siqhubeke sithembekile kuJehova njengoba nje ingwane ivikela ikhanda lesotsha. Nxa singavumela ukuthi ithemba lethu lixege, sivume ukukhulelwa yizifiso zethu singakhohlwa ngethemba lethu lokuphila okungapheliyo. Lokhu yikho okwenzakala kumaKhristu ayehlala edolobheni leKhorinte. Babengasasikholwa isithembiso sikaNkulunkulu esiqakathekileyo sokuvuswa kwabafileyo. (1 Khor. 15:12) UPhawuli wabhala ukuthi labo abangakholwayo ukuthi abafileyo bazavuswa baphilela ukugcwalisa izifiso zabo kuphela. (1 Khor. 15:32) Lamuhla abantu abanengi abangazithembiyo izithembiso zikaNkulunkulu benza konke abangakwenza ukuze bakholise impilo khathesi. Kodwa thina sithemba lokho esikuthenjiswe nguNkulunkulu. w22.10 25-26 ¶8-9

UJehova ufuna ukuthi ukhuleke kuye. Uyazibona inhlupho olazo futhi uyakuqinisekisa ukuthi uzayilalela imithandazo yakho loba ngasiphi isikhathi. Kuyamthokozisa ukulalela imithandazo yezinceku zakhe. (Zaga. 15:8) Kuyini ongakutsho emithandazweni yakho nxa ubona angani akulamuntu olendaba lawe? Tshela uJehova konke okusenhliziyweni yakho. (Hubo. 62:8) Mtshele lokho okukukhathazayo. Mcele ukuthi akuncedise nxa udanile futhi akunike isibindi sokukhuluma. Ungamcela lokuthi akuncedise ukuthi uchasise lokho okukholwayo ngendlela engasoze icaphule abanye. (Luk. 21:​14, 15) Nxa udanile cela uJehova akuncedise ukuthi ukhulume lomKhristu oqinileyo ekukhonzeni umtshele indlela ozizwa ngayo. Ungacela lokuthi uJehova ancedise umuntu ozaxoxa laye ukuthi azwisise okukukhathazayo. Ngakho okungakunceda nxa ucabanga ukuthi uwedwa yikunanzelela indlela aphendula ngayo imithandazo yakho kanye lokuvuma ukuncediswa ngabanye. w22.08 10 ¶6

Ibandla laseThesalonika elalisanda kubunjwa lahlukuluzwa okuzwayo. Iqembu labaphikisi abalodlakela lahudula ‘abanye abazalwane labasa kubabusi bedolobho.’ (ImiSeb. 17:6) Akucabange ukuthi abantu laba ababesanda ukuba ngamaKhristu bethuka njani. Kwakungenzakala ukuthi bacine bengasatshiseki ekukhonzeni kodwa umphostoli uPhawuli wayengafuni ukuthi lokhu kwenzakale. Waba leqiniso lokuthi ibandla leli elalisaselitsha lalizanakekelwa. UPhawuli watshela abaseThesalonika wathi: “Sathuma uThimothi umfowethu . . . , ukuthi azoliqinisa futhi aliduduze ukuze ukholo lwenu luqine, kungabi lomuntu onganyikinywa zinhlupho lezi.” (1 Thes. 3:​2, 3) UThimothi wayezibonele ngawakhe uPhawuli eqinisa abazalwane ebandleni leListra. UThimothi wayesenelisa ukuqinisekisa abafowabo labodadewabo ukuthi izinto zazizalunga ngoba wayezibonele lokho uJehova ayekwenzile.—ImiSeb. 14:​8, 19-22; Heb. 12:2. w22.08 21 ¶4

Ngo-1870 iqembu labafundi beBhayibhili elalikhokhelwa nguCharles Taze Russell laqalisa ukuchwayisisa iMibhalo. Babefuna ukwazi ukuthi umhlatshelo kaJesu uqakatheke kangakanani lokuthi ukufa kwakhe kumele kunanzwe njani. Lamuhla siyancedakala ngalokho okwachwayisiswayo. Sesizwisisa ukuthi umhlatshelo kaJesu utshoni lokuthi usinceda ngani. (1 Joh. 2:​1, 2) Kanti njalo iBhayibhili lisifundise ukuthi kulamaKhristu alethemba lokuphila ezulwini engasafi, kuphinde kube lamanye alethemba lokuphila phakade emhlabeni. Siyasondela kuJehova nxa sicabangisisa ngokuthi usithanda kangakanani lokuthi umhlatshelo kaJesu usinceda ngani. (1 Phet. 3:18) Yikho silingisela abafowethu bakudala ababethembekile ngokunxusa abanye ukuthi bazonanza lathi iSikhumbuzo silandela indlela uJesu asinanza ngayo. w23.01 21 ¶6-7

UJesu wafundisa abantu ngezibusiso ezizalethwa nguMbuso kaNkulunkulu. Siyayibonga inhlawulo ngoba isenza sibe ngabangane bakaJehova loJesu. Abantu abalokholo kuJesu baphinda babe lethemba lokuphila phakade lelokubona abantu ababathandayo bevuswa. (Joh. 5:​28, 29; Rom. 6:23) Izibusiso lezi sizithola nje ngenxa yomusa kaNkulunkulu njalo akulalutho esingabhadala ngalo uJehova loJesu ngalokho abasenzele khona. (Rom. 5:​8, 20, 21) Kodwa kukhona esingakwenza ukuze sibatshengise ukuthi siyababonga sibili. Singakwenza njani lokho? Ngokusebenzisa impahla yethu ukuze umsebenzi woMbuso uqhubekele phambili. Ngokwesibonelo singancedisa emsebenzini wokwakha lokulungisa izakhiwo zenhlanganiso. w23.01 26 ¶3; 28 ¶5

Labo abazabusa eMbusweni kaNkulunkulu bazabusa izigidi lezigidi zabantu emhlabeni wonke. Abangu-144 000 bazakuba ngamakhosi labaphristi njengoJesu. (Isam. 5:10) Ngaphansi koMthetho kaMosi umsebenzi omkhulu owawusenziwa ngabaphristi kwakuyikubona ngempilakahle yabantu lokuba leqiniso lokuthi bahlala beseduze loJehova. UMthetho ‘wawuyisithunzi sezinto ezinhle ezizayo.’ Yikho kuqondile sibili ukuthi sikhangelele ukuthi labo abazabusa loJesu bazaba leqiniso lokuthi abantu bakaNkulunkulu balempilakahle njalo bahlala bengabangane bakhe. (Heb. 10:1) Asikwazi ukuthi amakhosi la labaphristi laba bazabe bekhuluma njani labantu abalapha emhlabeni abazabuswa nguMbuso. Kodwa asithandabuzi ukuthi abantu lapha emhlabeni bazakhokhelwa ngendlela enhle kakhulu.—Isam. 21:​3, 4. w22.12 11 ¶11-13

Esinye isizatho esenza sinxuse abantu eSikhumbuzweni yikuthi sifuna labo abasingena okokuqala bafunde ngalokho uJehova loJesu abasenzele khona. (Joh. 3:16) Sithemba ukuthi lokho abazakubona futhi bakuzwe eSikhumbuzweni kuzakwenza bafune ukufunda okunengi njalo baqalise ukukhonza uJehova. Sinxusa lalabo abangasafezi inkonzo. Siyabanxusa ukuze sibakhumbuze ukuthi uNkulunkulu ulokhu ebathanda. Abanengi bayabuya eSikhumbuzweni futhi siyathaba ukubabona. Nxa bangabuya eSikhumbuzweni kuyabakhumbuza ukuthi babekholisa njani besakhonza uJehova. (Hubo. 103:​1-4) Senza konke esingakwenza ukuthi sinxuse abantu eSikhumbuzweni kungelani lokuthi bayavuma kumbe abavumi ngenxa yokuthi siyakwazi ukuthi uJehova ulendaba lomuntu ngamunye.—Luk. 15:7; 1 Thim. 2:​3, 4. w23.01 20 ¶1; 22-23 ¶9-11

Ngobusuku bokucina uJesu engakabulawa wacela into eqakathekileyo kuYise osezulwini. Wacela ukuthi uJehova avikele abalandeli bakhe. (Joh. 17:​15, 20) UJehova uhlala ebanakekela futhi ebavikela abantu bakhe. Kodwa uJesu wayekwazi ukuthi uSathane uzabathwalisa nzima. Wayekwazi lokuthi abalandeli bakhe babengasoze benelise ukumnqoba bebodwa uSathane. Kwakuzamele bancediswe nguJehova. Umhlaba lo obuswa nguSathane wenza ukuthi amaKhristu eqiniso ehlelwe zinhlupho ezinengi. Inhlupho zingasiqeda amandla, zenze kube nzima ukuthi siqhubeke sithembekile kuJehova. Akumelanga sesabe nxa sisehlelwa zinhlupho ngoba uJehova uyabubona ubunzima esihlangana labo futhi uzimisele ukusincedisa ukuthi silwisane labo. ‘Amehlo kaJehova abakhangele labo abamesabayo ukuze abakhulule.’—Hubo. 33:​18-20. w22.08 8 ¶1-2

Minyaka yonke ngesikhathi seSikhumbuzo sitshengisa ukuthi siyambonga uJesu ngalokho asenzela khona ngokuthandaza langokucabangisisa ngokuthi ukufa kwakhe kuqakatheke kanganani. Kanti njalo sinxusa abantu abanengi ukuthi bazonanza lathi umkhosi lo oqakathekileyo. Sizimisele ukungavumeli loba yini isenze sehluleke ukungena iSikhumbuzo. ESikhumbuzweni sifunda ukuthi kungani abantu bedinga ukuhlawulelwa lokuthi ukufa komuntu oyedwa kungazibhadalela njani izono zabanengi. Siyakhunjuzwa ukuthi isinkwa lewayini kumelani lokuthi ngobani okumele badle izinto lezi. (Luk. 22:​19, 20) Kanti njalo sicabangisisa ngezibusiso ezizatholwa yilabo abalethemba lokuphila emhlabeni. (Isaya. 35:​5, 6; 65:​17, 21-23) Kumele siziqakathekise izinto lezi. w23.01 20 ¶2; 21 ¶4

UNkulunkulu wasinika ithuba lokuthi sithole ukuphila okungapheliyo ngokunikela ngeNdodana yakhe ukuthi ibe yinhlawulo yezono zethu. (Mat. 20:28) Umphostoli uPhawuli wathi: “Njengoba ukufa kweza ngomuntu lokuvuswa kwabafileyo kuza ngomuntu. Njengoba nje bonke abantu besifa ngenxa ka-Adamu, bonke bazakwenziwa baphile ngenxa kaKhristu.” (1 Khor. 15:​21, 22) UJesu wafundisa abafundi bakhe ukuthi bathandazele ukuthi uMbuso kaNkulunkulu uze lokuthi intando kaNkulunkulu yenziwe lapha emhlabeni. (Mat. 6:​9, 10) Okunye uNkulunkulu akuhlosileyo yikuthi abantu baphile emhlabeni kuze kube nini lanini. Ukuze uJehova akwenze lokho ubeke iNdodana yakhe ukuthi ibe yiNkosi yoMbuso wakhe. Kanti njalo ubeqoqa abantu abavela emhlabeni abangu-144 000 ukuze basebenze loJesu ekugcwaliseni inhloso yakhe.—Isam. 5:​9, 10. w22.12 5 ¶11-12

Nxa singafelwa ngumuntu esimthandayo siyamkhanuka kakhulu. Ekuqaliseni singezwa ubuhlungu, ikakhulu nxa kuyikuthi wagula. Kodwa ngokuhamba kwesikhathi, singathokoza nxa singacabanga ngento asifundisa yona kumbe okunye akwenzayo, loba sicabange indlela asikhuthaza ngayo kumbe amazwi amnandi asitshela wona. Ngendlela efananayo kuyasidanisa nxa sicabanga ngokuhlupheka kukaJesu lokufa kwakhe. Ngesikhathi seSikhumbuzo kulapho esicabangisisa khona ngokuthi umhlatshelo kaJesu uqakatheke kangakanani. (1 Khor. 11:​24, 25) Lanxa kunjalo, okunye okusithokozisa kakhulu yikucabangisisa ngakho konke uJesu akutshoyo lakwenzayo esasemhlabeni njalo kuyasikhuthaza ukucabangisisa ngalokho akwenzayo khathesi, lalokho azakwenza esikhathini esizayo. w23.01 26 ¶1-2

Kumele ukuthi abafundi badana kakhulu lapho uJesu esifa. Phela babetshiywe ngumngane wabo abamthandayo njalo babebona angathi ithemba labo selitshabalele. (Luk. 24:​17-21) Kodwa uJesu esebonakele kubo wazinika isikhathi sokuthi abachasisele bazwisise ukuthi wayesigcwalisa njani isiphrofetho esiseBhayibhilini. Wabanika lomsebenzi oqakathekileyo okwakumele bawenze. (Luk. 24:​26, 27, 45-48) UJesu wathi esebuyela ezulwini abafundi bakhe babengasadananga kodwa basebethokoza kakhulu. Basebethokoza ngoba babekwazi ukuthi iNkosi yabo iyaphila lokuthi yayizabancedisa ukwenza umsebenzi eyayibanike wona. Ukuthokoza kwabo kwabafuqa ukuthi bengayekeli ukudumisa uJehova. (Luk. 24:​52, 53; Imiseb. 5:42) Ukuze silingisele abafundi bakaJesu kumele siqakathekise uMbuso kaNkulunkulu ukwedlula zonke izinto empilweni zethu. Lanxa kumele siqinisele ukuze siqhubeke sikhonza uJehova, usithembisa ukuthi uzasibusisa nxa singenza njalo.—Zaga. 10:22. w23.01 30-31 ¶15-16

Asifuni ukwenza lokho okwenziwa ngu-Adamu lo-Eva. Okungasinceda ukuthi singenzi njengabo yikuqhubeka sifunda ngoJehova langobuntu bakhe obuhle njalo sizama ukuzwisisa indlela acabanga ngayo. Ukwenza lokhu kuzasinceda ukuthi simthande kakhulu uJehova. Ake sixoxe ngo-Abrahama. Wayemthanda uJehova. Lanxa ngezinye izikhathi wayengazwisisi lokho uJehova ayekhetha ukukwenza, kazange amhlamukele. Kodwa wayezama ukuthi abemazi kuhle. Ngokwesibonelo, uJehova wathi emtshela ukuthi uzabhubhisa iSodoma leGomora, u-Abrahama wayesesaba ukuthi “uMahluleli womhlaba wonke” uzabhubhisa abalungileyo kanye lababi. Wayengazwisisi ukuthi uJehova wayengenza njani into enjalo. Yikho wazehlisa wabuza uJehova imibuzo eminengi mayelana lalokho okwakumkhathaza. UJehova waba lesineke wayiphendula yonke imibuzo yakhe. Ekucineni u-Abrahama wananzelela ukuthi uJehova uhlola inhliziyo yomuntu ngamunye njalo nxa eseletha isijeziso ujezisa abantu ababi kuphela.—Gen. 18:​20-32. w22.08 28 ¶9-10

Ngomnyaka ka-455 B.C.E., uMbusi uNehemiya wadinga amadoda ayethembekile ayezakhangela idolobho esevuselele imiduli yaseJerusalema. Omunye walabo abakhethwa nguNehemiya kwakunguHananiya owayengumphathi wenqaba yethempeli. IBhayibhili lithi uHananiya ‘wayeyindoda ethembekileyo futhi eyayimesaba uNkulunkulu weqiniso ukwedlula abantu abanengi.’ (Neh. 7:2) UHananiya wayemthanda uJehova futhi wayengafuni ukumdanisa yikho wayeyiqakathekisa yonke imisebenzi ayeyiphiwa. Lathi nxa singaba njengoHananiya sizayenza ngenhliziyo yonke imisebenzi esiyiphiweyo. Omunye owayethembekile nguThikhikhu, owayehamba lomphostoli uPhawuli. UPhawuli wayekwazi ukuthi uThikhikhu wayengasoze amlahle yikho wambiza ngokuthi ‘uyinceku ethembekileyo.’ (Efe. 6:​21, 22) UPhawuli wamthuma ukuthi ahambise izincwadi kubazalwane base-Efesu labaseKholose lokuthi abakhuthaze futhi abaduduze. Okwenziwa nguThikhikhu yikho kanye okwenziwa ngabazalwane abathembekileyo lamuhla abasincedisa ukuthi sihlale siqinile ekukhonzeni.—Kol. 4:​7-9. w22.09 9-10 ¶5-6

UJosefa waba sebunzimeni obukhulu okweminyaka engaba ngu-13. Kungenzeka wayezibuza ukuthi uJehova uyamthanda yini sibili. Kanti njalo wayengazibuza lokuthi uJehova usemlahlile yini ngesikhathi edinga uncedo. Kodwa lokhu akuzange kumenze azonde. Wayisebenzisa kuhle ingqondo yakhe ngokuqhubeka ehlalisekile. Walithola sibili ithuba lokuthi aphindisele kubafowabo kodwa kazange enze njalo. Watshengisa ukuthi uyabathanda, wabaxolela. (Gen. 45:​4, 5) Okwenza wabaphatha ngalindlela yikuthi wayecabanga kuhle. Kulokuthi acabange ngenhlupho zakhe, wananzelela ukuthi okwakuqakatheke kakhulu yinhloso kaJehova. (Gen. 50:​19-21) Sifundani kulokhu? Nxa ungaphathwa kubi ungazondeli uJehova njalo ungaboni angani sekulahlile. Cabangisisa ngokuthi ukuncedisa njani ukuthi ulwisane lohlupho lwakho. Nxa abanye bangakuzwisa ubuhlungu, zama ukubatshengisa uthando kulokukhangela kakhulu lokho abakuphambanisele khona. w22.11 21 ¶4

Umphrofethi uDanyeli wabona imibono eyayitshengisa ukuthi uJehova ulamandla phezu kwazo zonke iziphathamandla. Waqala wabona izilo ezine ezinkulu ezazimela imibuso eyabusa kudala egoqela iBhabhiloni, iMede lePhesiya, iGrisi, leRoma lombuso obusa umhlaba wonke khathesi, iBritain leMelika. (Dan. 7:​1-3, 17) UDanyeli waphinda wabona uJehova uNkulunkulu ehlezi esihlalweni sakhe sobukhosi enkundleni esezulwini. (Dan. 7:​9, 10) UNkulunkulu uthathela ohulumende amandla awanike abanye abafaneleyo njalo abalamandla kulabo. Ngobani labo? ‘Ngonjengendodana yomuntu’ uJesu Khristu ‘labangcwele bakaNkulunkulu oPhakemeyo’ abayi-144 000 abazabusa “kuze kube nini lanini.” (Dan. 7:​13, 14, 18) Kuyakhanya ukuthi uJehova ‘unguNkulunkulu oPhakemeyo.’ Umbono owabonwa nguDanyeli uhambelana lalokho ayeke wakutsho. Wathi: ‘UNkulunkulu wasezulwini ukhipha amakhosi abeke amanye.’—Dan. 2:​19-21. w22.10 14-15 ¶9-11