May

UJohane wathi eqeda ukubona iqembu lezulwini wabona “ixuku elikhulu.” Iqembu leli lalingafanani lelabangu-144 000 ngoba lona kwakungelamuntu owayesenelisa ukulibala. Sifundani ngalo? UJohane watshelwa amazwi la: “Laba yibo abaphuma ekuhluphekeni okukhulu njalo sebegezise izembatho zabo egazini leMvana, bazenza zaba mhlophe.” (Isam. 7:14) ‘Ixuku leli elikhulu’ lizasinda ekuhluphekeni okukhulu beselithola izibusiso lapha emhlabeni. (Hubo. 37:​9-11, 27-29; Zaga. 2:​21, 22; Isam. 7:​16, 17) Kungelani lokuthi silethemba lokuya ezulwini kumbe elokuphila lapha emhlabeni, kumele siwabone ngelihlo lengqondo amazwi akuSambulo isahluko 7 egcwaliseka. Amaqembu amabili ezinceku zikaNkulunkulu azakholisa sibili ngalesosikhathi. Asisoze sizisole ngokuthi sakhetha ukusekela ubukhosi bukaJehova. w22.05 16 ¶6-7

Akuthandabuzwa ukuthi ngesikhathi ufuna ukwenza isinqumo esiqakathekileyo waqala wathandaza ucela ukuhlakanipha. (Jak. 1:5) INkosi uSolomoni yathi: “Ukuhlakanipha kuyinqaba.” (Zaga. 4:7) Lapha uSolomoni wayengakhulumi ngenhlakanipho nje. Wayekhuluma ngaleyo evela kuJehova uNkulunkulu. Kodwa ukuhlakanipha okuvela kuNkulunkulu kungasinceda yini silwisane lenhlupho esihlangana lazo lamuhla? Ye kungasinceda. Eyinye indlela esingathola ngayo ukuhlakanipha yikufunda lokusebenzisa lokho okwatshiwo ngamadoda amabili ayesaziwa ngokuhlakanipha kwawo. Owokuqala nguSolomoni. IBhayibhili lithi ‘uNkulunkulu wanika uSolomoni ukuhlakanipha lengqondo ejulileyo.’ (1 AmaKho. 4:29) Owesibili nguJesu, indoda eyayihlakaniphe kulabo bonke abantu abake babakhona. (Mat. 12:42) U-Isaya waphrofetha ngoJesu wathi: ‘Umoya kaJehova uzakuba phezu kwakhe, umoya wokuhlakanipha lowokuqedisisa.’—Isaya. 11:2. w22.05 20 ¶1-2

Lanxa sesikhulile singenelisa ukuhlela esingakwenza. Ake sixoxe ngodade okuthiwa nguBeverley oleminyaka engu-75. Ulomkhuhlane owenza kube nzima ukuthi ahambe, kodwa wayefisa sibili ukwenza okunengi ngesikhathi seSikhumbuzo. Yikho wahlela khona kanye ayefuna ukukwenza. Wathokoza sibili esephumelele ukwenza lokho ayekuhlelile. Akwenzayo kwakhuthaza labanye ukuthi bakhuthale ekutshumayeleni. UJehova uyakuqakathekisa okwenziwa ngabafowethu labodadewethu asebekhulile lanxa izimo zingasabavumeli ukuthi benze okunengi. (Hubo. 71:17) Hlela lokho ongenelisa ukukwenza. Woba lobuntu obuthokozisa uJehova. Funda ukwenza izinto ezizakwenza uJehova akusebenzise enhlanganisweni yakhe. Dinga indlela zokuncedisa abafowenu labodadewenu. Lawe njengoThimothi uJehova uzakubusisa njalo ‘abantu bazayibona ngokucacileyo intuthuko yakho.’—1 Tim. 4:15. w22.04 27 ¶18-19

Ake sithi umntanakho athi kafuni ukukhonza uJehova lanxa wenze konke ongakwenza ukuthi umfundise ngaye. Ungazitsheli ukuthi wehlulekile. Sonke siphiwe inkululeko yokuzikhethela ukuthi sizamkhonza yini uNkulunkulu loba hatshi. Ungalahli ithemba lokuthi ngelinye ilanga uzaphenduka. Khumbula umzekeliso kaJesu wendodana yolahleko. (Luk. 15:​11-19, 22-24) Indodana le yenza izinto ezinengi ezimbi kodwa yacina iphendukile. Bazali lilesibusiso esimangalisayo sokukhulisa abantwabenu ukuthi babe zinceku zikaJehova zesikhathi esizayo. (Hubo. 78:​4-6) Lo awusimsebenzi omncane futhi siyalincoma ngakho konke elikwenzayo ukuthi libancedise bathande uJehova njalo libafundise ukuthi bamlalele. UBaba wethu osithandayo uzathokoza ngalokho elikwenzayo.—Efe. 6:4. w22.05 30-31 ¶16-18

Nxa sonke singenza konke okusemandleni ethu kuzakuba lokuthula lokumanyana ebandleni. Cabanga ngamaKhristu esikhathi sabaphostoli. Ayeleziphiwo lemisebenzi etshiyeneyo ebandleni. (1 Khor. 12:​4, 7-11) Kodwa lokho akuzange kubangele ukuthi ancintisane njalo angazwanani. UPhawuli wakhuthaza abazalwane laba ukuthi ngamunye wabo enze akwenelisayo ukuze ‘akhe umzimba kaKhristu.’ Wabhalela abase-Efesu wathi: “Nxa isitho ngasinye sisebenza kuhle, lokho kuyawunceda umzimba ukuthi ukhule njengoba uzakha ethandweni.” (Efe. 4:​1-3, 11, 12) Labo abawalalelayo amazwi kaPhawuli benza kwaba lokuthula lokumanyana ebandleni, okuyikho esisebenza nzima ukuthi kuhlale kukhona emabandleni ethu lalamuhla. Zimisele ukungaqali ukuziqathanisa labanye. Funda kuJesu futhi uzame ukumlingisela. Qiniseka ukuthi ‘uNkulunkulu kayisuye ongalunganga ukuthi sengaze awukhohlwe umsebenzi wakho.’ (Heb. 6:10) Uyakuqakathekisa konke okwenza ngenhliziyo yonke ukuze umthokozise. w22.04 14 ¶15-16

Kuyaduduza ukwazi ukuthi akusimlandu wethu ukukhetha kumbe ukutsho ukuthi umuntu owonileyo kumele athethelelwe yini. UJehova nguye okhethayo ukuthi uzamthethelela yini loba hatshi. Kodwa kukhona okumele sikhethe ukukwenza. Ngezinye izikhathi umuntu angasonela abesexolisa. Kodwa kungenzeka angaxolisi. Lanxa kunjalo singakhetha ukumxolela ngokungaqhubeki simbambele isikhwili kumbe simzondele. Lokhu kungathatha isikhathi ikakhulu nxa umuntu lo esizwise ubuhlungu obukhulu. INqabayokulinda kaSeptember 15 1994 yathi: “Nxa uthethelela umuntu okoneleyo akutsho ukuthi uyavumelana lalokho akwenzileyo kodwa kutsho ukuthi uyitshiyela uJehova indaba. UnguMahluleli olungileyo wendawo yonke njalo uzayahlulela kuhle ngesikhathi esifaneleyo.” w22.06 9 ¶6-7

UJehova wathembisa ukuthi ngesikhathi sethu wayezamanyanisa abantu abavela kuzo zonke izizwe lezizwana lezindimi ukuze bamkhonze ngendlela ayamukelayo. Lamuhla abantu laba babizwa ngokuthi ‘lixuku elikhulu.’ (Isam. 7:​9, 10) Lanxa ixuku leli lilabobaba labomama labantwana abayimihlobo etshiyeneyo, libumba imuli eyodwa emanyeneyo. (Hubo. 133:1; Joh. 10:16) Abexuku leli bahlala bekulungele ukuxoxela loba ngubani obalalelayo ngethemba elihle abalalo. (Mat. 28:​19, 20; Isam. 14:​6, 7; 22:17) Nxa ungowexuku elikhulu kumele ukuthi uyaliqakathekisa ithemba leli. USathane ufuna ithemba lakho lifiphale. Ufuna ubone angani uJehova kasoze azigcine izithembiso zakhe. Nxa uSathane angaphumelela ukwenza ukuthi ithemba lethu lifiphale sizaphela amandla besesiyekela ukukhonza uJehova. w22.06 20-21 ¶2-3

Ithemba lethu linjengesikhonkwane ngoba liyasivikela ukuze singaqhelelani loJehova nxa sihlangana lezikhathi ezinzima ezinjengesiphepho. Ithemba lethu liyasinceda ukuthi sihlaliseke lanxa siphakathi kobunzima ngoba siyabe sikwazi ukuthi izinto zizakuba ngcono. Khumbula ukuthi uJesu wasitshela ukuthi sizahlukuluzwa. (Joh. 15:20) Ukucabangisisa ngalokho uJehova asithembise khona kuyasinceda ukuthi singanyikinyeki kodwa siqhubeke simkhonza. Ake sihlole ukuthi ithemba lamnceda njani uJesu ukuthi ame eqinile lanxa wayekwazi ukuthi uzabulawa ngendlela ebuhlungu. NgePhentekhosti lika-33 C.E., umphostoli uPhetro wakhuluma amazwi esiphrofetho esikuHubo achaza kuhle indlela uJesu ayehlaliseke ngayo kanye lokuqiniseka ayelakho. Wathi: ‘Ngizahlala ngilethemba ngoba awusoze ungitshiye engcwabeni njalo awusoze uvume ukuthi oqotho wakho akubone ukonakala, futhi uzangigcwalisa ngentokozo enkulu phambi kwakho.’ (Imiseb. 2:​25-28; Hubo. 16:​8-11) UJesu wayelethemba eliqinileyo elokuthi uYise wayezamvusa njalo wayekwazi ukuthi uzathokoza sebephinde baba ndawonye ezulwini.—Heb. 12:​2, 3. w22.10 25 ¶4-5

Ngelinye ilanga abaphostoli bakaJesu ababili uJakhobe loJohane bacela unina ukuthi acele uJesu ukuthi abanike izikhundla eziphezulu eMbusweni. (Mat. 20:​20, 21) UJakhobe loJohane batshengisa ukuthi babeziphakamisa futhi befuna ukuba phezulu kulabanye. (Zaga. 16:18) UJakhobe loJohane ayisibo bodwa ababenze into engaqondanga ngalelolanga. Khangela ukuthi abanye abaphostoli benzani: “Abalitshumi bathi bekuzwa lokhu bazicaphukela izelamani lezi ezimbili.” (Mat. 20:24) Kumele ukuthi kwathunqa uthuli uJakhobe loJohane labanye abaphostoli bephendulana. UJesu wenzani ngendaba le? Kazange abazondele njalo kazange athi ngizazidingela abanye abaphostoli abangcono abathobekileyo futhi abaphathana ngothando. Kodwa wawabekezelela amadoda la wakhuluma lawo kuhle ngoba wayekwazi ukuthi afuna ukwenza okulungileyo. (Mat. 20:​25-28) Waqhubeka ebaphatha ngothando abaphostoli bakhe. w23.03 28-29 ¶10-13

Zinengi izinto osuzenzile. Mhlawumbe usuleminyaka uhlolisisa okutshiwo liBhayibhili. Lokho kukwenze wabona ukuthi iBhayibhili liLizwi likaNkulunkulu. Kodwa okuqakatheke kakhulu yikuthi usumazi njalo usumthanda uMlobi webhuku leli elingcwele. Okwenze wazinikela kuJehova futhi wabhabhathizwa yikuthi uyamthanda. Okwenzileyo kuhle kakhulu. Kumele ukuthi ungakabhabhathizwa bekungalula ukuthi uqhubeke uthembekile kuJehova. Kodwa usazohlangana lezilingo ezinengi njengoba ulokhu ukhula ekukhonzeni. USathane uzaqhubeka ezama ukwenza ukuthi ungamthandi uJehova lokuthi uyekele ukumkhonza. (Efe. 4:14) Ungavumi ukuthi lokho kwenzakale kuwe. Kuyini okuzakunceda ukuthi uhlale uthembekile kuJehova lokuthi ugcine isithembiso sakho sokuthi uzahlala umkhonza? Kumele uqhubeke uthuthuka njalo ‘usebenza nzima’ ukuze ube ngumKhristu oqinileyo.—Heb. 6:1. w22.08 2 ¶1-2

Emulini, umuntu ngamunye akumelanga ahambe efafaza imfihlo yemuli. Mhlawumbe udade angabe elomkhuba ongamenza ayangeke nxa ungaziwa ngabanye abantu. Kambe umkakhe sokumele ahambe etshela abantu ngawo? Ngeke enze into enjalo ngoba uyamthanda umkakhe futhi kafuni ukumzwisa ubuhlungu. (Efe. 5:33) Abasakhulayo labo kumele bahlonitshwe emulini. Abazali akumelanga bayangise abantwana ngokukhuluma amaphutha abo ebantwini. (Kol. 3:21) Abantwana labo kumele bafunde ukugcina imfihlo bengahambi betshela abantu bonke indaba ezingayangisa abanye emulini. Imuli izamanyana nxa wonke umuntu engasebenza nzima ukuze agcine imfihlo. w22.09 10 ¶9

UJehova wakhuluma loJobe emkhumbuza ukuthi inhlakanipho yakhe ijule kakhulu lokuthi uyakunakekela konke akudalayo. UJehova wakhuluma langezinyamazana ezinengi ezimangalisayo. (Jobe. 38:​1, 2; 39:​9, 13, 19, 27; 40:15; 41:​1, 2) UJehova waphinda wasebenzisa u-Elihu ukuthi akhuthaze uJobe njalo amduduze. U-Elihu wamqinisekisa ukuthi uJehova uyazipha umvuzo zonke izinceku zakhe eziqiniselayo phakathi kobunzima. UJehova wameluleka kuhle uJobe esebenzisa u-Elihu. U-Elihu wanceda uJobe ukuthi angacabangi kakhulu ngenhlupho zakhe ngokumkhumbuza ukuthi thina sibancane kakhulu nxa siqathaniswa loMdali womhlaba wonke. UJehova waphinda watshela uJobe ukuthi kwakumele athandazele abangane bakhe abathathu ababewonile. (Jobe. 42:​8-10) Thina uJehova usisekela njani nxa siphakathi kwenhlupho? Khathesi uJehova usebenzisa iBhayibhili ukuze akhulume lathi.—Rom. 15:4. w22.08 11 ¶10-11

Ebandleni laseRoma kwakulamaKhristu angamaJuda langayisiwomaJuda. UMthetho kaMosi wathi usumile ukusebenza kwakungaselasizatho sokuthi amaKhristu la alandele imithetho emayelana lokungadli ukudla okuthile. (Mak. 7:19) Kusukela ngalesosikhathi amanye amaKhristu angamaJuda ayesekhululekile ukudla loba yini. Kodwa amanye ayelokhu ecabanga ukuthi ukwenza lokho akuqondanga. Lokhu kwenza ibandla lehlukana phakathi. Umphostoli uPhawuli wawakhuthaza ukuthi aqakathekise ukuthi kube lokuthula phakathi kwawo. UPhawuli wabancedisa abafowabo labodadewabo ukuthi bananzelele ngoba ingxabano lezi zazilimaza abanye ebandleni futhi zisenza ukuthi ibandla lonke lingabi lokuthula. (Rom. 14:​19, 20) Kanti njalo laye wayezimisele ukutshintsha ukuze angakhubi abanye. (1 Khor. 9:​19-22) Lathi singenelisa ukwakha abanye lokwenza ukuthi kuhlale kulokuthula ebandleni nxa singatshiyana lomkhuba wokuphikisana labanye ngezinto abalelungelo lokuzikhethela zona. w22.08 22 ¶7

Nxa kulomsebenzi wenkonzo esifuna ukuwenza sijayele ukusebenza nzima ukuze siphumelele. Ngakho nxa sifuna ukuhlala sisenza okulungileyo, kumele sisebenze nzima. UJehova uzasibekezelela futhi asincedise ukuthi siqhubeke sithuthuka kancane kancane size siphumelele. (Hubo. 84:​5, 7) UJehova usitshela ukuthi akunzima ukwenza lokho athi kulungile. (1 Joh. 5:3) Kodwa kuyasivikela njalo siyasidinga isivikelo lesi nsuku zonke. Lokhu kusikhumbuza izigqoko zokuzivikela empini umphostoli uPhawuli akhuluma ngazo. (Efe. 6:​14-18) Usakhumbula yini ukuthi uPhawuli wathi kuyini okuvikela inhliziyo? ‘Yisivikelo sesifuba esiyikulunga.’ Isivikelo lesi simela imithetho kaJehova elungileyo. Isivikelo sesifuba esasigqokwa lisotsha sasivikela inhliziyo yaso. Yikho lemithetho kaJehova elungileyo ivikela umuntu esinguye ngaphakathi. Woba leqiniso lokuthi ugqoka zonke izigqoko zokuzivikela empini okugoqela lesivikelo sesifuba esiyikulunga!—Zaga. 4:23. w22.08 29 ¶13-14

Okwezinkulungwane zeminyaka, amadoda labesifazana abathembekileyo bebethola amacebo ancedayo eLizwini likaNkulunkulu. Bekusenzakala njani lokhu? UJehova waba leqiniso lokuthi kwenziwa amakhophi emibhalo ephefumulelweyo. Lanxa abantu abakopa imibhalo le babelesono, bayikopa ngonanzelelo. Esinye isikhwicamfundo sathi sibhala ngeMibhalo yesiHebheru sathi: “Siyabe siqinisile nxa sisithi akulabhuku lakudala elilondolozwe kuhle njengeBhayibhili.” Singaba leqiniso lokuthi amazwi esiwabala eBhayibhilini ayimicabango yoMlobi walo uJehova. UJehova nguye osinika “zonke izipho ezinhle lazo zonke izipho ezipheleleyo.” (Jak. 1:17) IBhayibhili yisipho esihle kakhulu esisinikwe nguJehova. Nxa umuntu engakunika isipho esifaneleyo uyabe etshengisa ukuthi ukwazi kuhle lokuthi uyakwazi okudingayo. LoJehova owasinika iBhayibhili unjalo. Nxa sihlolisisa isipho lesi sifunda okunengi ngaye njalo nxa silibala siyabona ukuthi usazi kuhle lokuthi uyakwazi esikudingayo. w23.02 2-3 ¶3-4

Kuzabe kumnandi sibili nxa sesibona abafileyo bevuswa ngesikhathi sokubusa kukaKhristu kweminyaka eyinkulungwane. Bonke abafelwa yizihlobo labangane bakulindele ngabomvu ukubabona. UJehova laye uyafisa ukubabona. (Jobe. 14:15) Akucabange ukuthi abantu bazathokoza njani sebehlangana lezihlobo labangane babo sebevusiwe! “Abalungileyo” ababhalwe ebhukwini lokuphila ‘bazavukela ukuphila.’ (Imiseb. 24:15; Joh. 5:29) Mhlawumbe inengi lezihlobo zethu labangane bethu lizakuba phakathi kwalabo abazavuswa ngemva nje kwe-Amagedoni. Kanti njalo ‘abangalunganga’ okugoqela labo abangazange bathole ithuba lokumazi uJehova kumbe elokumkhonza bengakafi ‘bazavukela ukwahlulelwa.’ Bonke abantu abazavuswa kuzamele bafundiswe. (Isaya. 26:9; 61:11) Lokhu kutsho ukuthi kuzakuba lomsebenzi omkhulu kakhulu wokubafundisa.—Isaya. 11:10. w22.09 20 ¶1-2

UJehova watshengisa ukuthi ulamandla ukwedlula amakhosi ezizwe ezimanyeneyo. Wancedisa abako-Israyeli ukuthi bathathe ingxenye enkulu yeLizwe Lesithembiso. (Josh. 11:​4-6, 20; 12:​1, 7, 24) UJehova usetshengise kanengi ukuthi unguNkulunkulu oPhakemeyo. Inkosi yeBhabhiloni uNebhukhadinezari yazitshaya isifuba izigqaja ‘ngamandla ayo lobukhulu bayo’ kulokuthi ivume ukuthi uJehova nguye okumele adunyiswe. Ngakho uNkulunkulu wenza ukuthi ihlanye. Kwathi ingqondo sezibuyile uNebhukhadinezari ‘wamdumisa oPhezukonke’ njalo wavuma ukuthi ‘umbuso kaJehova ngumbuso ongapheliyo.’ Waphinda wathi “kakho ongamvimba.” (Dan. 4:​30, 33-35) Umhubi wathi: “Siyathokoza isizwe esenza uJehova abe nguNkulunkulu waso, isizwe asikhethileyo ukuthi sibe ngesakhe.” (Hubo. 33:12) Lokhu kumele kusenze sifise ukuhlala siqotho kuJehova. w22.10 15-16 ¶13-15

Iziphrofetho ezinengi eziseBhayibhilini esezigcwalisekile zenza singathandabuzi lakancane ukuthi lokho uNkulunkulu asithembisa khona kuzakwenzakala. Sizizwa njengomhubi owathandaza esithi: “Ngiyilindele ngabomvu insindiso yakho ngoba ngithembele elizwini lakho.” (Hubo. 119:81) UJehova usinike “ithemba kanye lekusasa elihle” eLizwini lakhe iBhayibhili. (Jer. 29:11) Asithembelanga ebantwini kodwa sithembele kuJehova onguye yedwa ongasinika ikusasa elihle. Asiqhubekeni sikukhuthalele ukubala iziphrofetho eziseBhayibhilini ngoba lokhu kuzakwenza sihlale silithemba iLizwi likaNkulunkulu. Ubufakazi obungasenza silithembe iBhayibhili yikukhangela ukuthi kwenzakalani nxa abantu bangalandela lokho elikutshoyo. (Hubo. 119:​66, 138) Ngokwesibonelo abanye abantu okwasekusele kancane ukuthi badivose sebehlalisane kuhle ngenxa yokwenza okutshiwo liBhayibhili. Abantwababo bazizwa bevikelekile futhi bayabona ukuthi bayathandwa ngenxa yokuthi bayabe bekhuliswa emulini elothando.—Efe. 5:​22-29. w23.01 5 ¶12-13

Cabanga ngokuthi izithembiso eziseBhayibhilini esezigcwalisekile sezikuncede njani. Ngokwesibonelo uJesu wathembisa ukuthi uYise uzasinika esikudingayo empilweni. (Mat. 6:​32, 33) UJesu waphinda wasithembisa ukuthi uJehova uzasinika umoya ongcwele nxa singawucela. (Luk. 11:13) UJehova uzigcwalisile izithembiso lezi. Mhlawumbe ungacabanga ngezinye izithembiso uJehova asezigcwalisile empilweni yakho. Ngokwesibonelo wathembisa ukuthi uzakuthethelela, akududuze njalo akunike konke okudingayo ukuze uhlale useduze laye. (Mat. 6:14; 24:45; 2 Khor. 1:3) Nxa ungacabangisisa ngalokho uNkulunkulu asekwenzele khona uzaqinisa ithemba olalo ngazakwenzela khona esikhathini esizayo. Sileqiniso lokuthi uJehova uzazigcwalisa izithembiso zakhe. Aliqiniso amazwi omhubi athi, ‘Uyathokoza umuntu othembele kuJehova uNkulunkulu wakhe, uNkulunkulu ozahlala ethembekile.’—Hubo. 146:​5, 6. w22.10 27 ¶15; 28 ¶17

Isiphrofetho esimayelana lokubuyiselwa kokukhonza kweqiniso siyasebenza yini lamuhla? Kakhulu! Njani? Kusukela ngo-1919 C.E., kwasekulabantu abanengi kakhulu abasebekhululiwe ekuthunjweni yiBhabhiloni Enkulu okutsho umbuso womhlaba wonke wenkolo yamanga. Abantu labo sebelethwe endaweni engcono kakhulu ukwedlula iLizwe Lesithembiso lako-Israyeli. Sebesepharadayisi esikulo lamuhla. (Isaya. 51:3; 66:8) Kusukela ngo-1919 C.E., abagcotshiweyo bebelokhu bekholisa ukuba sepharadayisi esikulo lamuhla. ‘Abezinye izimvu’ abalethemba lokuphila emhlabeni labo bayangena kulelipharadayisi besebethola izibusiso ezinengi ezivela kuJehova. (Joh. 10:16; Isaya. 25:6; 65:13) Ipharadayisi esikulo litholakala emhlabeni wonke. Lokhu kutsho ukuthi singaba sepharadayisi leli kungelani lokuthi sihlala ngaphi nxa nje sisekela ukukhonza kweqiniso. w22.11 11-12 ¶12-15

Iyakuphica yini indaba yokuthi uJehova ubekhona kusukela “nini lanini”? (Isaya. 40:28) Ayisuwe wedwa. U-Elihu wathi ngoNkulunkulu: “Leminyaka yakhe ngeke senelise ukuyibala.” (Jobe. 36:26) Kodwa ukungazwisisi into ethile akutsho ukuthi ingamanga. Ngokwesibonelo, lanxa singazwisisi ukuthi ukukhanya kusebenza njani akutsho ukuthi akukho. Ngendlela efananayo abantu abasoze bakuzwisise ngokugcweleyo ukuthi uJehova ubevele ekhona lokuthi uzahlala ekhona. Kodwa iqiniso yikuthi uNkulunkulu kalasiqalo futhi uzahlala ekhona. Ukungazwisisi kwethu akutshintshi lutho ngoMdali. (Rom. 11:​33-36) Wayevele ekhona umhlaba lezinto ezisemkhathini ezigoqela ilanga lenkanyezi kungakabi khona. Wayekhona ‘engakaweluli amazulu.’—Jer. 51:15. w22.12 2-3 ¶3-4

Kwezinye izikhathi singacelwa ukuthi sithandaze simele abanye. Ngokwesibonelo udade angacela omunye udade aphume laye ekutshumayeleni ukuthi athandaze esifundweni. Udade oceliweyo angabe engamazi kuhle umfundi, yikho angacela ukuthi athandaze nxa sebephetha isifundo. Lokhu kuzamnceda akwazi ukuthi athandazeleni. Umzalwane angacelwa ukuthi athandaze emhlanganweni wokuya ekutshumayeleni kumbe emhlanganweni webandla. Abazalwane abayabe bephiwe isibusiso leso kumele bacabange ngenhloso yomhlangano. Umthandazo akumelanga usetshenziswe ukunika ibandla iseluleko kumbe ukwenza izaziso. Izikhathi ezinengi emihlanganweni yebandla ingoma lomthandazo kuthatha imizuzu emihlanu. Yikho umzalwane ozathandaza akumelanga asebenzise “amazwi amanengi” ikakhulu emthandazweni wokuvula.—Mat. 6:7. w22.07 24 ¶17-18

UJesu wathi ezinsukwini zokucina kuzakuba lemikhuhlane emibi kumbe ememethekayo “ezindaweni ezehlukeneyo.” (Luk. 21:11) Ukwazi lokho kusinceda njani ukuthi sibe lokuthula? Asimangaliswa yimikhuhlane ememethekayo ngoba siyananzelela ukuthi izinto lezi zenzakala njengoba nje uJesu watsho. Yikho silandela lokho uJesu akucebisa labo ababezaphila ezinsukwini zokucina. Wathi: “Lingethuki.” Umkhuhlane omemethekayo ungenza ungenelisi ukwenza ezinye izinto obujayele ukuzenza, kodwa ungavumi lokhu kuphambanise uhlelo lwakho lokutaditsha kumbe ukungena imihlangano. Izindaba ezimayelana lalokho okwenzakala ezimpilweni zabafowethu labodadewethu ezisemabhukwini ethu lakumavidiyo zingakukhumbuza ukuthi labo baqhubeka beqotho lanxa belobunzima obuhambelana lobakho. w22.12 17 ¶4, 6

UJakhobe wayeyithanda kakhulu indodana yakhe uJosefa waze wayinika isipho esihle. (Gen. 37:​3, 4) Lokhu kwabangela ukuthi abafowabo bakaJosefa babe lomhawu. Bathi bethola ithuba nje bahle bathengisa uJosefa kubathengisi bakoMidiyani. Abathengisi laba bathatha uJosefa bahamba laye umango omude kakhulu besiya eGibhithe lapho afika athengiselwa khona kuPhothifa, induna yabalindi bakaFaro. Impilo kaJosefa yatshintsha ngokucwayiza kwelihlo. Wayengaseyindodana kayise ayeyithanda kakhulu kodwa wayeseyisigqili samaGibhithe esiphansi. (Gen. 39:1) Kwezinye izikhathi siba lezinhlupho “ezijayelekileyo ebantwini,” okutsho inhlupho ezehlela abantu bonke. (1 Khor. 10:13) Kwezinye izikhathi singahlupheka ngenxa nje yokuthi singabafundi bakaJesu. Ngokwesibonelo singahlekwa, siphikiswe loba sihlukuluzwe ngenxa yalokho esikukholwayo. (2 Thim. 3:12) UJehova angakwenza uphumelele kungelani lokuthi ulohlupho olunjani. w23.01 14-15 ¶3-4

Uyake uzwe kusithi ulande umfowenu kumbe udadewenu okuphambanisileyo yini? Singakakwenzi lokho, kuhle ukuthi sizibuze imibuzo enjengale: ‘Ngikwazi konke yini okuphathelane lendaba le?’ (Zaga. 18:13) ‘Kungenzeka yini ukuthi umuntu lo ubengahlosanga ukuthi angizwise ubuhlungu kumbe ukuthi angicaphule?’ (Umtshu. 7:20) ‘Mina angikaze ngikwenze yini lokho?’ (Umtshu. 7:​21, 22) ‘Ngingamlanda umuntu lo ngiyabe ngibhula umlilo yini kumbe ngiyabe ngiwukhwezela?’ Nxa singama kancane sizibuze imibuzo le sizananzelela ukuthi nxa simthanda umfowethu singakhetha ukutshiyana layo indaba le. Nxa ngamunye wethu angaqhubeka ethanda abantu abasebandleni lanxa bephambanisa, uyabe etshengisa ukuthi ungumlandeli kaKhristu weqiniso. Nxa singaqhubeka sithandana siyabe sitshengisa abanye abantu ukuthi sikhonza uJehova ngendlela ayamukelayo futhi lokhu kuzabanceda ukuthi labo bamanyane lathi ekukhonzeni uNkulunkulu. Kwangathi sonke singazimisela ukuqhubeka sithandana ngoba lokho kutshengisa ukuthi singamaKhristu eqiniso. w23.03 31 ¶18-19

IBhayibhili lisifundisa ukuthi konke okwenziwa nguMlobi walo kutshengisa ukuthi ulothando. Ngenxa yokuthi uyasithanda kazange asinike ulwazi olunengi kakhulu esasingehluleka ukuluzwisisa. (Joh. 21:25) Eyinye indlela uJehova atshengisa ngayo ukuthi uyasithanda yikukhuluma lathi ngendlela esenza sibe lesithunzi. EBhayibhilini kazange asinike imithetho engapheliyo esitshela okokwenza kukho konke. Kodwa uyasinceda ukuthi sizicabangele sodwa esebenzisa izindaba eziseBhayibhilini, iziphrofetho kanye lamacebo ancedayo. Lokhu yikho okwenza iLizwi likaNkulunkulu lisifuqe ukuthi simthande njalo simlalele ngenhliziyo yonke. IBhayibhili lisitshela ukuthi uJehova ulendaba lathi. ILizwi lakhe ligcwele izindaba ezilabantu abanjengathi. Sikuzwisisa kuhle okwenzakala ebantwini okukhulunywa ngabo eBhayibhilini ngenxa yokuthi babengabantu ‘abalemizwa enjengeyethu.’ (Jak. 5:17) Okuqakatheke kakhulu yikuthi nxa sibona indlela uJehova ayephatha ngayo abantu abanjengathi, kusuka kukhanye bha ukuthi “ulozwelo olukhulu futhi ulesihawu.”—Jak. 5:11. w23.02 6 ¶13-15

Ibhuku lokucina leBhayibhili liqalisa ngamazwi la athi: “Isambulo esethulwa nguJesu Khristu, asiphiwa nguNkulunkulu ukuze atshengise izinceku zakhe izinto okufanele zenzakale masinyane.” (Isam. 1:1) Yikho sifuna kakhulu ukwazi ukuthi izinto ezenzakala emhlabeni namuhla zisigcwalisa njani isiphrofetho esiseBhayibhilini. Kanti njalo singabe sikutshisekela ukuxoxela abanye izinto lezi. Nxa sixoxa ngeziphrofetho eziseBhayibhilini akumelanga sikhulume izinto esingelaqiniso lazo. Phela asifuni ukukhuluma izinto ezingenza ukuthi kube lokwehlukana ebandleni. Ngokwesibonelo, singezwa abakhokheli bekhuluma ngokuthi bangazilungisa njani izingxabano besebeletha ukuthula lokuvikeleka. Kulokuthi sihle sizitshele ukuthi lokho kugcwalisa isiphrofetho esiku-1 Thesalonika 5:​3, kumele sikhangele lokho okuyabe kusanda kukhitshwa yinhlanganiso kaJehova. Nxa esikukhulumayo kuvela kulokho okukhitshwa yinhlanganiso, siyabe sinceda ukuthi ibandla lihlale limanyene futhi ‘licabanga ngendlela efananayo.’—1 Khor. 1:10; 4:6. w23.02 16 ¶4-5

Umthandelani uJesu Khristu? UJesu uthanda iqiniso lokuthobeka lokulunga. Nxa lawe uthanda iqiniso kanye lokulunga, kumele ukuthi uyamthanda uJesu Khristu. Phela uJesu watshengisa ukuthi ulesibindi ngokulwela iqiniso kanye lokulungileyo. (Joh. 18:37) Kodwa uJesu usincedisa njani ukuthi sithobeke? Okwenziwa nguJesu kusinceda ukuthi sithobeke. Ngokwesibonelo, wayengafuni ukuthi abantu badumise yena kodwa wayefuna ukuthi badumise uYise. (Mak. 10:​17, 18; Joh. 5:19) Uzwa njani nxa ucabanga ngokuthobeka kukaJesu? Kumele ukuthi lokhu kwenza umthande futhi uzimisele ukumlingisela. Kodwa kuyini okwenza uJesu athobeke? Yikuthi uYise nguNkulunkulu othobekileyo njalo uyamthanda futhi uzimisele ukumlingisela. (Hubo. 18:35; Heb. 1:3) Kumele ukuthi lokhu kwenza umthande kakhulu uJesu ngoba yena ulingisela uJehova kukho konke. w23.03 3-4 ¶6-7

IBhayibhili likhuluma ngamaqembu amabili alabo abazavuswa belethemba lokuphila kuze kube nini lanini emhlabeni. Amaqembu la ‘ngabalungileyo labangalunganga.’ “Abalungileyo” yilabo abaqhubeka bethembekile kuJehova ngesikhathi besaphila. ‘Abangalunganga’ bona yilabo abangazange bamkhonze uJehova. Kambe sesingathi amabizo abantu laba abasemaqenjini la womabili abhaliwe ebhukwini lokuphila ngenxa yokuthi bazavuswa? Amabizo abalungileyo abhalwa ebhukwini lokuphila bengakafi. Manje acitshwa yini sebefile? Hatshi. Phela uJehova ulokhu esabakhumbula. UJehova “unguNkulunkulu wabaphilayo hatshi owabafileyo ngoba kuye bonke bayaphila.” (Luk. 20:38) Lokhu kutsho ukuthi abalungileyo bazathi bevuswa amabizo abo azabe elokhu ekhona ebhukwini lokuphila lanxa nje ayabe angathi abhalwe ngepenseli.—Luk. 14:14. w22.09 16 ¶9-10

UJehova wayefuna umuntu wokuqala akholise ukubuka izinto ezidaliweyo. Wathi esedale u-Adamu wamhlalisa epharadayisi elihle okwamagama wasemnika lomsebenzi wokuthi alilime futhi aliqhelise. (Gen. 2:​8, 9) Akucabange ukuthi uAdamu wayesizwa njani ngesikhathi ebona izimila zihluma lamaluba eqhakaza. UAdamu wayelesibusiso esikhulu sokugcina insimu yase-Edeni. UJehova waphinda wamupha umsebenzi wokunika izinyamazana amabizo. (Gen. 2:​19, 20) UJehova wayengazenzela umsebenzi lo kodwa wakhetha ukuwunika u-Adamu. Kumele ukuthi u-Adamu wayekhangelisisa inyamazana ngayinye abeseyinika ibizo eliyifaneleyo. Akuthandabuzwa ukuthi wayewukholisa kakhulu umsebenzi lo. Sileqiniso lokuthi lokhu kwamupha ithuba lokuthi azwisise ukuthi uJehova ulenhlakanipho engakanani lokuthi zinhle njani izinto azidalileyo. w23.03 15 ¶3

IBhayibhili lithi umbuso we-Anglo-America omelwa zinyawo zesithombe esikhulu yiwo umbuso wokucina olamandla ozabakhona. (Dan. 2:​31-33) Akula omunye umbuso wabantu ozabusa ngemva kwawo. Umbuso lo labo bonke ohulumende babantu bazabhujiswa nguMbuso kaNkulunkulu ngesikhathi se-Amagedoni. (Isam. 16:​13, 14, 16; 19:​19, 20) Isiphrofetho lesi sisinceda njani? Isiphrofetho sikaDanyeli sisinika obunye ubufakazi bokuthi siphila ezinsukwini zokucina. Eminyakeni engaphezu kwengu-2 500 eyadlulayo uDanyeli wathi ngemva kweBhabhiloni kwakuzakuba leminye imibuso emine yomhlaba wonke eyayizabusa abantu bakaNkulunkulu. Kanti njalo waveza ukuthi umbuso we-Anglo-America wawuzakuba ngowokucina. Lokhu kuyasiduduza njalo kwenza sibe lethemba lokuthi sokuseduze ukuthi uMbuso kaNkulunkulu ubhubhise bonke ohulumende babantu ubusubusa umhlaba wonke. w22.07 4 ¶9; 5 ¶11-12