June

UJobe wayengumngane kaJehova, elemuli enkulu ethokozayo njalo enothe okumangalisayo. (Jobe. 1:​1-5) Kodwa ngelanga elilodwa nje, impilo yaphonguthi phendu waphelelwa yinotho yakhe. (Jobe. 1:13-17) Ngemva kwalokho abantwabakhe bonke bafa. Akucabange ukuthi uJobe lomkakhe bona baphelelwa njani lokuthi baba sosizini olunganani sebetshelwe ukuthi abantwababo abalitshumi babedilikelwe yindlu bafa bonke. Akumangalisi-ke ukuthi uJobe wadabula isembatho sakhe, wazilahla phansi. (Jobe. 1:​18-20) Ngemva kwalokho uSathane wahlasela uJobe ngomkhuhlane omubi kakhulu njalo oyangisayo. (Jobe. 2:​6-8) Kungakenzakali konke lokhu, uJobe wayeyindoda ehlonitshwayo esigabeni. Abantu babesiya kuye ukuze abacebise. (Jobe. 31:18) Kodwa khathesi babengaselandaba laye. Wahlamukelwa ngabafowabo langabangane bakhe abaseduze, waze wahlamukelwa ngitsho layizisebenzi zakhe.—Jobe. 19:​13, 14, 16. w22.06 21 ¶5-6

Sonke esesibhabhathiziwe kumele silandele iseluleko uPhawuli asinika abazalwane base-Efesu. Wabakhuthaza ukuthi babe ngamaKhristu ‘akhule ngokweneleyo.’ (Efe. 4:13) Lokhu kufanana lokuthi wayesithi kubo, ‘Qhubekani lithuthuka.’ Lanxa umthanda uJehova, kukhona ongakwenza ukuze umthande kakhulu. Umphostoli uPhawuli wasitshela okunye esingakwenza kuFiliphi 1:9. Wakhulekela ukuthi uthando lwabaseFiliphi “luqhubeke lusanda kakhulu.” Lokhu kutsho ukuthi kumele senze izinto ezizakwenza ukuthi simthande kakhulu uJehova. Kumele sifunde ngaye, sibe “lolwazi oluqondileyo lokuqedisisa konke.” Nxa siqhubeka sisibamazi uJehova sizamthanda kakhulu njalo sizazwisisa ubuntu bakhe lalokho akwenzayo. Lokhu kuzakwenza sizame ngamandla wonke ukumthokozisa ngoba siyabe singafuni ukwenza loba yini ezamdanisa. Sizimisele ukuzwisisa ukuthi kuyini afuna sikwenze lokuthi singakwenza njani. w22.08 2-3 ¶3-4

Okubhalwe ebhukwini leSambulo akubhalelwanga abantu bonke nje kodwa kwabhalelwa thina izinceku zikaNkulunkulu ezizinikeleyo. Akumelanga kusimangalise ukuthi siyahlanganyela ekugcwalisekeni kweziphrofetho ezisebhukwini leli ngoba singabantu bakaNkulunkulu. Umphostoli uJohane wasitshela ukuthi iziphrofetho lezi zazizagcwaliseka nini. Wathi: “Ngaphefumulelwa ngaba sosukwini lweNkosi.” (Isam. 1:10) UJohane wabhala amazwi la phose ngo-96 C.E., futhi ‘usuku lweNkosi’ lwalusesekhatshana. (Mat. 25:​14, 19; Luk. 19:12) Iziphrofetho eziseBhayibhilini zitshengisa ukuthi usuku lolo lwaqala ngo-1914 lapho uJesu esiba yiNkosi ezulwini. Kusukela ngalowomnyaka, iziphrofetho ezikuSambulo ezihlanganisa abantu bakaNkulunkulu zaqalisa ukugcwaliseka. Khathesi siphila ‘osukwini lweNkosi.’—Isam. 1:3. w22.05 2 ¶2-3

Isilo lomphrofethi wamanga baphoselwa besaphila echibini lomlilo ovutha isalufa. Yikho izilo lezi zizatshabalaliswa ngesikhathi zisabusa. Sifundani? Kumele sibe qotho kuNkulunkulu njalo sisekele uMbuso wakhe. (Joh. 18:36) Yikho akumelanga sizingene ezombusazwe. Lokhu kungaba nzima ngenxa yokuthi ohulumende bafuna sibasekele kukho konke. Labo abacina bebasekela bafakwa uphawu lwesilo. (Isam. 13:​16, 17) Kodwa uJehova kasoze abamukele abalophawu lolu njalo kasoze abanike ukuphila okungapheliyo. (Isam. 14:​9, 10; 20:4) Yikho kuqakathekile sibili ukuthi singazingeni ngitsho ezombusazwe lanxa ohulumende bengazama ukusibamba ngamandla ukuthi sibasekele. w22.05 10-11 ¶12-13

Okunye ongahlela ukukwenza yikufunda ukwenza umsebenzi othile. Nxa singazama ukuthuthuka ekwenzeni ulutho oluthile, sizakwenza okunengi ekukhonzeni. Kufuneka abafowethu labodadewethu abanengi ukuthi bakhe amaBhetheli, amaWolu Emihlangano Emikhulu kanye lamaWolu oMbuso. Abanengi bafunda ukwenza imisebenzi le ngokusebenza labafowethu labodadewethu abazingcitshi kuyo. Lamuhla abafowethu labodadewethu bafunda ukwenza imisebenzi ezabanceda ukuthi bagcine amaWolu Emihlangano Emikhulu kanye lamaWolu oMbuso esesimeni esihle. UJehova uNkulunkulu ‘oyiNkosi yaPhakade’ loJesu Khristu ‘oyiNkosi Yamakhosi’ benza imisebenzi emikhulu sibili besebenzisa abafowethu labodadewethu laba abazingcitshi. (1 Tim. 1:17; 6:15) Sifuna ukusebenza nzima ukuthi sisebenzise iziphiwo zethu ukuze kudunyiswe uJehova hatshi thina.—Joh. 8:54. w22.04 24 ¶7; 25 ¶11

USolomoni wayekhomba ngophakathi njalo ephila impilo entofontofo. (1 AmaKho. 10:​7, 14, 15) UJesu yena wayengelazinto ezinengi njalo wayengelandlu. (Mat. 8:20) Kodwa bobabili babeyibona ngendlela eqondileyo inotho ngenxa yokuthi ukuhlakanipha kwabo kwakuvela kuJehova uNkulunkulu. USolomoni wavuma ukuthi imali iyasinceda sithole izinto esizidingayo ekuphileni mhlawumbe lezinye esizifunayo. Kodwa lanxa uSolomoni wayenothile sibili wananzelela ukuthi kulezinye izinto eziqakatheke kakhulu kulemali. Ngokwesibonelo wathi: “Ibizo elihle liyathandeka kulenotho enengi.” (Zaga. 22:1) USolomoni wananzelela lokuthi abantu abathanda imali abasuthiseki ngabalakho. (UmTshu. 5:10, 12) Waphinda wasixwayisa ukuthi singathembeli emalini njengoba ingavuka inyamalele.—Zaga. 23:​4, 5. w22.05 21 ¶4-5

Sizaqinisa ubungane bethu loJehova nxa singacabangisisa ngezibusiso esilazo khathesi. Nxa singacabangisisa ngezinto ezinhle uJehova athembisa ukusenzela zona sizahlala silethemba lokumkhonza kuze kube nini lanini. Konke lokhu kuzasinceda siqhubeke sikhonza uJehova sithokoza. UJehova “uzasukuma” asincede lapho esetshabalalisa umhlaba lo omubi. Asithandabuzi ukuthi uzawususa ngesikhathi esifaneleyo umhlaba kaSathane ngenxa yokuthi ‘unguNkulunkulu owahlulela kuhle.’ (Isaya. 25:9) Siqhubeka sikulindele ngabomvu ukufika kwelanga lelo esizakhululwa ngalo. Okwakhathesi sizimisele ukuqhubeka siqakathekisa isibusiso esilaso sokuthandaza, lokubala iLizwi likaNkulunkulu lokusebenzisa esikubalayo kanye lokucabangisisa ngezibusiso esilazo. Nxa singenza njalo uJehova uzasincedisa ukuthi simkhonze siqinisela ngapha sithokoza. w22.11 13 ¶18-19

Lanxa iBhayibhili lingasitsheli ngokubhabhathizwa kukaThimothi, akuthandabuzwa ukuthi unina uYunisi wayethokoza ngalelolanga. (Zaga. 23:25) UYunisi waphumelela ukuthi afundise indodana yakhe ukuthi ithande uJehova kanye loJesu Khristu. Abazali bakaThimothi babekholwa izinto ezitshiyeneyo. Uyise wayengumGrikhi ikanti unina logogo babengamaJuda. (ImiSeb. 16:1) Kukhanya angani uThimothi wayengosakhulayo ngesikhathi uYunisi loLoyisi besiba ngamaKhristu. Kodwa uyise yena kazange abe ngumKhristu. UThimothi wayezalandela bani? Omama abangamaKhristu labo bayazithanda izimuli zabo. Abakufuna kakhulu yikuthi abantwababo babe ngabangane bakaJehova abaseduze. UNkulunkulu wethu uyakuqakathekisa konke abakwenzayo. (Zaga. 1:​8, 9) UJehova usencedise omama abanengi ukuthi bafundise abantwababo iqiniso. w22.04 16 ¶1-3

Sekuseduze ukuthi uJehova aqondise izinhliziyo zabohulumende ukuthi “zenze umcabango wakhe.” Ohulumende laba abamelwa ‘ngamakhosi alitshumi’ bazahlasela inhlanganiso zenkolo yamanga bazitshabalalise. (Isam. 17:​1, 2, 12, 16) Sikwazi njani ukuthi iBhabhiloni Enkulu isizabhujiswa? Khumbula ukuthi okunye okwakuvikela idolobho leBhabhiloni kudala ngamanzi oMfula uYufrathe. Ibhuku leSambulo lithi amamiliyoni abantu asekela iBhabhiloni Enkulu afanana ‘lamanzi’ ayivikelayo. (Isam. 17:15) Kodwa liphinda lithi amanzi la ‘azakutsha’ okutshengisa ukuthi umbuso womhlaba wonke wenkolo yamanga wawuzatshiywa ngabasekeli bawo abanengi. (Isam. 16:12) Lamuhla isiphrofetho lesi siyagcwaliseka ngoba abantu abanengi sebeyitshiyile inkolo yamanga njalo sebedinga amacebo okuqeda inhlupho zabo kwezinye indawo. w22.07 5-6 ¶14-15

Nxa sithethelela abanye siyabe sitshengisa ukuthi siyambonga uJehova ngesihawu asitshengisa sona. Komunye umzekeliso uJesu wafanisa uJehova lenkosi eyacitsha isikwelede esesabekayo seyinye inceku, eyayingasoze yafa yenelisa ukusibhadala. Kodwa inceku le ayizange iyitshengise isihawu inceku eyayilesikwelede sayo esincane kakhulu. (Mat. 18:​23-35) Lapha uJesu wayesifundisa ukuthi sizabathethelela abanye nxa simbonga sibili uJehova ngesihawu asitshengisa sona. (Hubo. 103:9) Eyinye iNqabayokulinda yakudala yathi: “Singaze sibathethelele kangaki abanye asisoze sibathethelele ngendlela uNkulunkulu athethelela ngayo lasitshengisa ngayo isihawu ngoKhristu.” Abathethelela abanye labo bazathethelelwa. UJehova ubatshengisa isihawu labo abatshengisa abanye isihawu. (Mat. 5:7) UJesu wakwenza kwacaca lokho lapho efundisa abafundi bakhe ukukhuleka.—Mat. 6:​14, 15. w22.06 10 ¶8-9

Ngesikhathi uJesu esemhlabeni walingisela ubuntu bukaYise ngendlela epheleleyo. (Joh. 14:9) Yikho ukufunda ngoJesu kwenze samazi uJehova uNkulunkulu futhi samthanda. Izimfundiso zikaJesu kanye lendlela aqondisa ngayo ibandla lamaKhristu namuhla kuyasinceda kakhulu. Usifundise esingakwenza ukuze siphile ngendlela ethokozisa uJehova. Ukubulawa kukaJesu kuyasinceda sonke. Ngemva kokuvuswa kwakhe, uJehova wemukela igazi leNdodana yakhe njengomhlatshelo opheleleyo ‘osihlambulula kuzo zonke izono.’ (1 Joh. 1:7) Khathesi uJesu uyiNkosi elenkazimulo futhi kasoze aphinde afe. Sekuseduze ukuthi achoboze ikhanda lenyoka. (Gen. 3:15) Izinceku zikaJehova zizathokoza kakhulu nxa uSathane esebhujisiwe. Yikho qhubeka ubekezela, ungakhalali. UNkulunkulu wethu uthembekile. Uzabusisa “zonke izizwe zomhlaba.” w22.07 18 ¶13; 19 ¶19

Kumele sizimisele ukutshintsha lokho esiyabe sikuhlelile ngoba izimo lazo zingatshintsha. Ngokwesibonelo, umphostoli uPhawuli wancedisa ngesikhathi kubunjwa ibandla edolobheni leThesalonika. Kodwa abaphikisi benza ukuthi acine esuka edolobheni lelo. (ImiSeb. 17:​1-5, 10) Ngabe uPhawuli kasukanga, abafowabo labodadewabo babezahlukuluzwa. Kodwa uPhawuli kazange ayekele ukubancedisa. Akwenzayo yikutshintsha lokho ayekuhlelile njengoba izimo lazo zasezitshintshile. Ngokuhamba kwesikhathi wathuma uThimothi ukuthi ayeqinisa amaKhristu eThesalonika. (1 Thes. 3:​1, 2) Akuthandabuzwa ukuthi athokoza. Sifundani kulokho okwenziwa nguPhawuli? Singahlela esifuna ukukwenza kodwa izimo zitshintshe besekusiba nzima ukuthi sikwenze. (UmTshu. 9:11) Nxa lokho kungenzakala, hlela okunye ongenelisa ukukwenza. w22.04 25-26 ¶14-15

UJehova uyasiduduza ngokusinika ithemba. Akucabange amanye amavesi asiduduzayo nxa siphakathi kwenhlupho. EBhayibhilini uJehova uyasiqinisekisa ukuthi akulalutho ‘olungasehlukanisa lothando lwakhe,’ ngitsho lenhlupho ezinzima ngeke zisehlukanise laye. (Rom. 8:​38, 39) Uphinda asitshele ukuthi “useduze kulabo” abathandaza kuye. (Hubo. 145:18) UJehova usitshela ukuthi nxa singamthemba singenelisa ukubekezelela loba yibuphi ubunzima esiphakathi kwabo, sithokoze lanxa siphakathi kwenhlupho. (1 Khor. 10:13; Jak. 1:2) ILizwi likaNkulunkulu liphinda lisikhumbuze ukuthi inhlupho zethu ngezesikhathi esifitshane nxa ziqathaniswa lomvuzo wempilo engapheliyo esizawuthola. (2 Khor. 4:​16-18) UJehova uphinda asithembise ukuthi uzasusa uSathane uDeveli obangela inhlupho zethu, aphinde asuse labo bonke abalingisela izenzo zakhe ezimbi. (Hubo. 37:10) Akhona yini amavesi owabambe ngekhanda akunceda ukuthi uqinisele nxa uphakathi kwenhlupho? w22.08 11 ¶11

Uyake uzibuze yini ukuthi uzenelisa ukulandela imithetho kaJehova elungileyo nsuku zonke okwempilo yakho yonke? UJehova usithembisa ukuthi ukulunga kwethu ‘kuzakuba njengamagagasi olwandle.’ (Isaya. 48:18) Ake uzicabange umile ekhunjini lolwandle ubukele amagagasi. Kambe ungazihlupha ngokuthi ngelinye ilanga azavuka engekho? Ngitsho sibili! Uyabe ukwazi ukuthi amagagasi la azaqhubeka elokhu ekhona. Ukulunga kwakho kungaba njengamagagasi la ahlala ekhona! Kungenzakala njani lokhu? Okungakunceda yikuthi ungakenzi isinqumo uqale udinge ukuthi uJehova ufuna wenzeni ubusukwenza. Lanxa isinqumo ofuna ukusenza sinzima, uYihlo okuthandayo uJehova uzakunika amandla futhi akuncedise ukuthi uqhubeke usenza okulungileyo nsuku zonke.—Isaya. 40:​29-31. w22.08 30 ¶15-17

Ekupheleni kweminyaka eyinkulungwane, uSathane uzakhululwa abesezama ukudukisa abantu. Ngalesosikhathi bonke abantu emhlabeni bazathola ithuba lokutshengisa ukuthi bayalihlonipha yini ibizo likaNkulunkulu lokuthi bayabusekela yini ubukhosi bakhe. (Isam. 20:8-10) Abazakwenza ngesikhathi belingwa nguSathane yikho okuzatsho ukuthi amabizo abo ayabhalwa yini ebhukwini lokuphila angasacitshwa. IBhayibhili lisitshela ukuthi kulabanye abangasoze bavume ukubuswa nguJehova njengo-Adamu lo-Eva. Kuzakwenzakalani kibo? USambulo 20:15 uthi: “Loba ngubani ongatholakalanga ebhaliwe ebhukwini lokuphila waphoselwa echibini lomlilo.” Bonke abangafuni ukubuswa nguNkulunkulu bazatshabalaliswa bangaphindi babekhona. Kodwa abanengi abayabe bengaselasono bazaqhubeka bethembekile ekulingweni kokucina. w22.09 23-24 ¶15-16

Ngesikhathi sabaphostoli kulabanye ababesithi amaKhristu angayisiwomaJuda lawo kumele asokwe ukuze angasolwa ngabanye ababengayisiwomaKhristu. (Gal. 6:12) Umphostoli uPhawuli wayengavumelani lawo umbono lo kodwa kulokuthi athi balandele umbono wakhe, wathobeka wathi indaba le iyephathwa ngabaphostoli labadala eJerusalema. (ImiSeb. 15:2) Okwenziwa nguPhawuli kwanceda amaKhristu lawo ukuthi ahlale ethokoza futhi kube lokuthula ebandleni. (ImiSeb. 15:​30, 31) Nxa kungavuka ingxabano enkulu, singenza kube lokuthula ngokucela uncedo kulabo uJehova ababeke ukuthi banakekele ibandla. Izikhathi ezinengi iziqondiso ezisekelwe eBhayibhilini sizithola emabhukwini ethu lakokunye okutshiyeneyo esikuphiwa yinhlanganiso. Nxa singalandela iziqondiso lezi kulokuthi silandele lokho thina esikucabangayo, sizakwenza kube lokuthula ebandleni. w22.08 22 ¶8-9

Ngezinye izikhathi siyabe sifuna ukutshela abangane izinto ezisikhathazayo. Lanxa kunjalo kungabanzima nxa singajayelanga ukutshela abantu inhlupho zethu futhi kungasizwisa ubuhlungu obukhulu ukuzwa ukuthi umngane esimtshelileyo usuke wayafafaza indaba yakhona. Yikho simthanda umuntu olesifuba esingamtshela okusikhathazayo sisazi ukuthi kasoze akutshele muntu. Abadala abagcina imfihlo ‘banjengendawo yokucatshela umoya futhi bayisiphephelo’ kwabanye ebandleni. (Isaya. 32:2) Asithikazi ukukhuluma labo ngoba siyakwazi ukuthi loba yini esibatshela yona abasoze bayitshele muntu. Lathi asibathwalisi nzima sifuna basitshele izindaba ezingelani lathi. Kanti njalo siyawabonga amakhosikazi abadala ngoba awatshoni elandelela omkawo efuna bawatshele izindaba eziyimfihlo. Phela vele kuyabanceda ukuhlala bengazazi indaba zabafowethu labodadewethu. w22.09 11 ¶10-11

Siyaqiniseka ukuthi uJehova uzazikhulula izinceku zakhe eziqotho ngesikhathi ‘sokuhlupheka okukhulu.’ (Mat. 24:21; Dan. 12:1) Uzazivikela nxa sezihlaselwa ngendlela elesihluku yizizwe ezimanyeneyo ezibizwa ngokuthi nguGogi waselizweni laseMagogi. Lanxa izizwe lezi zingagoqela wonke amalunga angu-193 enhlanganiso yezizwe ezimanyeneyo i-United Nations, ngeke zenelise ukulwa loNkulunkulu oPhakemeyo lebutho lakhe elisezulwini. UJehova uthi: “Ngizazikhazimulisa sibili, ngenze zonke izizwe zingazi, zazi lokuthi ngingcwele. Lapho-ke abantu bazakwazi ukuthi mina nginguJehova.” (Hez. 38:​14-16, 23) Ukuhlasela kukaGogi kuzabangela ukuqala kwempi ye-Amagedoni lapho uJehova azabhubhisa khona ‘amakhosi omhlaba wonke.’ (Isam. 16:​14, 16; 19:​19-21) Kodwa “abathembekileyo yibo kuphela abazahlala emhlabeni, njalo abamsulwa yibo abazasala kuwo.”—Zaga. 2:​21, amabala angaphansi. w22.10 16-17 ¶16-17

Asenelisi ukubona okusezinhliziyweni zabo, nguJehova kuphela ‘ohlolisisa zonke izinjongo zomuntu’ (Zaga. 16:2) Uthanda yonke imihlobo yabantu kungelani lamasiko abo lokuthi bavela ngaphi. Kanti njalo usikhuthaza ukuthi ‘sizivule ngokupheleleyo izinhliziyo zethu.’ (2 Khor. 6:13) Ngakho kumele sibathande abafowethu labodadewethu kulokuthi sibahlulele. Akumelanga sahlulele lalabo abangayisibo boFakazi. Kambe kuqondile yini ukuthi umKhristu athi ngesihlobo sakhe: “Lo vele kasoze aba nguFakazi loba sekutheni”? Hatshi. Lokhu kungabe kuyikuphosisa sibili futhi kuyabe kutshengisa ukuthi wena uzibona ulungile. UJehova unika “bonke abantu ezindaweni zonke” ithuba lokuthi baphenduke. (ImiSeb. 17:30) Hlala ukhumbula ukuthi ukuzibona ulungile akulunganga. Ukuthanda imithetho kaJehova elungileyo kuzakwenza uthokoze njalo ube yisibonelo esihle kwabanye. Kuzakwenza lokuthi abanye bakuthande njalo bathande loNkulunkulu wethu uJehova. w22.08 31 ¶20-22

Nxa sitshumayela kumele silindele ukuthi sizaphikiswa futhi ukuphikiswa lokhu kuzaqhubeka kusanda. (Dan. 11:44; 2 Thim. 3:12; Isam. 16:21) Kodwa sileqiniso lokuthi uJehova uzaqhubeka esincedisa ngoba ubehlala encedisa izinceku zakhe ukuthi ziphumelele emsebenzini eziwunikiweyo kungelani lokuthi unzima kangakanani. Ake sixoxe ngomphrofethi uHezekheli owatshumayeza amaJuda ayethunjiwe eBhabhiloni. UHezekheli wayetshumayeza abantu abanjani? UJehova wathi babengabantu “abalenkani” “labayiziqholo” njalo “abahlamukayo.” Babelimaza njengameva njalo beyingozi njengenkume. Yikho uJehova watshela uHezekheli kanengi wathi: “Ungabesabi.” (Hez. 2:​3-6) UHezekheli waphumelela emsebenzini wakhe wokutshumayela ngenxa yokuthi wayethunywe nguJehova. Kanti njalo uNkulunkulu wamnika umoya wakhe njalo iLizwi likaNkulunkulu laqinisa ukholo lwakhe. w22.11 2 ¶1-2

Ngokuhamba kwesikhathi zonke izinto eziphilayo ezadalwa nguJehova emhlabeni zazizakufa, kodwa abantu bona badalwa belethemba lokuphila okungapheliyo. UJehova waphinda wasidala silesifiso esikhulu sokuqhubeka siphila. IBhayibhili lithi uNkulunkulu ‘wenza ukuthi abantu babe lesifiso sokuphila kuze kube nini lanini.’ (Umtshu. 3:11) Lokhu ngokunye okwenza sibone ukufa kuyisitha sethu. (1 Khor. 15:26) Nxa singagula kakhulu asiphonguhlala silindele ukufa. Izikhathi ezinengi siyahamba esibhedlela kumbe sinathe amaphilisi ukuze selaphe umkhuhlane oyabe usihlasele. Senza konke okusemandleni ethu ukuthi siqhubeke siphila. Kanti njalo nxa singafelwa yisihlobo kumbe umngane esimthandayo sizwa ubuhlungu obukhulu okwesikhathi eside kungelani lokuthi ubenganani. (Joh. 11:​32, 33) Kuyacaca ukuthi uMdali wethu osithandayo wayevele ehlose ukuthi siphile phakade ngoba wasinika isifiso sokuthi siphile kuze kube nini lanini kanye lezinto ezisinceda ukuthi siqhubeke siphila. w22.12 3 ¶5; 4 ¶7

Esikhathini lesi esinzima abanengi abafowethu labodadewethu bangabe begula, besesaba kumbe belesizungu. Zama ukuhlala uthintana labafowenu labodadewenu. Nxa kungaba lomkhuhlane omemethekayo kungadinga ukuthi siqhelelane labafowethu labodadewethu. Ngezikhathi ezinjalo singazizwa njengomphostoli uJohane owayefuna ukubona umngane wakhe uGayu bakhulume bekhangelene. (3 Joh. 13, 14) Lanxa kunjalo uJohane wananzelela ukuthi kwakungavumi ukuthi abonane loGayu okwesikhathi esithile. Yikho wenza lokho ayengakwenza, wambhalela incwadi. Nxa kungavumi ukuthi ubonane labafowethu labodadewethu zikhathi zonke zama ukuthintana labo ngezinye indlela. Nxa ungahlala uthintana labafowenu labodadewenu uzazizwa uhlalisekile njalo uvikelekile. Thintana labadala ikakhulu nxa ukhathazekile njalo uvume bakukhuthaze.—Isaya. 32:​1, 2. w22.12 17-18 ¶6-7

IBhayibhili litshengisa ukuthi okwesikhathi esithile uJosefa wayebotshwe enyaweni ngamaketane wabotshwa lasentanyeni ngensimbi. (Hubo. 105:​17, 18) Izinto zazilokhu zisiba nzima ngoba uJosefa waqala waba yisigqili esithenjwayo wasecina eseyisibotshwa esiphansi. Sewake wakhuleka usakhuleka ngenxa yohlupho owawuphakathi kwalo kodwa lwaqhubeka lusiba nzima kakhulu? Kungenzakala sibili lokho. UJehova kasivikeli ukuthi singehlelwa zinhlupho emhlabeni lo obuswa nguSathane. (1 Joh. 5:19) Lanxa kunjalo nanku okungamelanga ukuthandabuze: UJehova uyabubona bonke ubunzima ongabe uphakathi kwabo futhi ulendaba lawe. (Mat. 10:​29-31; 1 Phet. 5:​6, 7) Kanti njalo nanku asithembisa khona: “Angisoze ngikutshiye loba sekutheni, angisoze ngikulahle loba sekutheni.” (Heb. 13:5) UJehova angakuncedisa ukuthi uqhubeke uqinisela lanxa kukhanya kumnyama phambili lasemuva. w23.01 16 ¶7-8

IMibhalo isitshela ukuthi uNkulunkulu kasoze asitshiye lanxa singaphambanisa. Abako-Israyeli babemonela kanengi uJehova kodwa babesithi bangaphenduka abathethelele. AmaKhristu akuqala lawo akubona ukuthi uNkulunkulu uyabathanda kakhulu. Umphostoli uPhawuli waphefumulelwa ukuthi akhuthaze ayekhonza labo ukuthi ‘bamthethelele njalo bamduduze’ umuntu owenze isono esikhulu kodwa waphenduka. (2 Khor. 2:​6, 7; 1 Khor. 5:​1-5) Kuyamangalisa ukuthi lanxa izinceku zikaJehova zaziphambanisa wayengazilahleli iganga. Kodwa wayezincedisa kuhle kuhle, aziqondise, abesezamukela ukuthi zibe ngabangane bakhe. Lalamuhla uthembisa ukwenza njalo ebantwini abawonayo baphinde baphenduke. (Jak. 4:​8-10) IBhayibhili lifundisa ukuthi uNkulunkulu ulokuhlakanipha, wahlulela kuhle njalo ulothando. IBhayibhili litshengisa ukuthi uJehova ufuna simazi njalo ufuna sibe ngabangane bakhe. w23.02 7 ¶16-17

Siyafuna sibili ukwazi ukuthi izinto ezenzakala emhlabeni zisigcwalisa njani isiphrofetho esiseBhayibhilini. Ngokwesibonelo, uJesu wasitshela izinto ezazizakwenzakala ezazizasinceda sikwazi ukuthi ukuphela komumo wezinto kaSathane sekusondele. (Mat. 24:3-14) Umphostoli uPhetro wasikhuthaza ukuthi sinanzelele indlela isiphrofetho esigwaliseka ngayo ukuze sihlale silokholo oluqinileyo. (2 Phet. 1:​20, 21) Ufuna ukusinceda sibone lokho okumele sikwenze nxa sihlola iziphrofetho eziseBhayibhilini. Uthi kumele ‘siqhubeke sikukhumbula ukuba khona kosuku lukaJehova.’ (2 Phet. 3:​11-13) Ngenxa yani? Ngenxa yokuthi sifuna ukusebenzisa leso sikhathi esiseleyo ukuthi senze ‘ukuziphatha kwethu kube ngcwele njalo senze imisebenzi yokuzinikela kuNkulunkulu’ hatshi ukuthi sidinge ukuthi linini “lelolanga lalelohora” uJehova azaletha ngalo i-Amagedoni. (Mat. 24:36; Luk. 12:40) Sifuna ukuhlala siziphatha kuhle futhi sisiba leqiniso lokuthi konke esikwenzela uJehova sikwenza ngenxa yokuthi siyamthanda. Yikho kuqakathekile ukuthi sinanzelele esikwenzayo. w23.02 16 ¶4, 6

Kulezinto okumele zenziwe ‘ngezinye izimvu’ ukuze ziphile ePharadayisi. Kumele sitshengise ukuthi sikubona njani lokho esakwenzelwa nguJesu. Ngokwesibonelo sitshengisa ukuthi siyamthanda ngendlela esiphatha ngayo abafowabo abagcotshiweyo. UJesu wathi uzakwahlulela ehlukanise izimvu lezimbuzi kusiya ngokuthi zazibaphatha njani abafowabo. (Mat. 25:​31-40) Singabasekela ngokutshiseka sisenza labo umsebenzi wokutshumayela lowokwenza abafundi. (Mat. 28:​18-20) Kumele sihle siqale khathesi ukuba ngabantu uJehova afuna baphile ePharadayisi. Kumele sizame ukuba ngabantu abathembekileyo kulokho esikutshoyo lesikwenzayo futhi singedlulisi amalawulo endleleni esiphila ngayo. Kanti njalo kumele sizame ukuba qotho kuJehova, lokuthembeka kubomkethu lakubafowethu labodadewethu. Nxa singalalela uNkulunkulu khathesi emhlabeni lo omubi, kuzakuba lula ukuthi simlalele nxa sesiphila ePharadayisi. Zikhona ezinye izinto esingazifundela lobuntu esingabuthuthukisa ukuze sitshengise ukuthi silungiselela ukuphila ePharadayisi. w22.12 11-12 ¶14-16

Okwenza sithande uJesu iNkosi yethu yikuthi akulaMbusi ongcono kulaye. Phela uJehova ngokwakhe nguye owafundisa uJesu wasembeka lokuthi abe yiNkosi. (Isaya. 50:​4, 5) Okunye okwenza simthande kakhulu uJesu yikuthi yena wasithanda kakhulu waze wasifela. (Joh. 13:1) Kumele simthande sibili uJesu ngoba uyiNkosi yethu. UJesu wathi labo abamthanda ngeqiniso ngabangane bakhe futhi batshengisa ukuthi bayamthanda ngokulalela imilayo yakhe. (Joh. 14:15; 15:14, 15) Kuyisibusiso sibili ukuba ngumngane kaJesu! Ukwazi mhlophe ukuthi uJesu uthobekile lokuthi ulingisela uYise kukho konke akwenzayo. Sewafunda lokuthi uJesu wanika abalambileyo ukudla, waduduza ababedanile njalo welapha labagulayo. (Mat. 14:​14-21) Uyazibonela lokuthi uJesu ubakhokhela njani abantu bakhe namuhla. (Mat. 23:10) Kodwa akupheleli lapho, esikhathini esizayo iNkosi yoMbuso kaNkulunkulu izasilethela izibusiso ezinengi. Manje ungatshengisa njani ukuthi uyamthanda uJesu? Lokhu ungakwenza ngokumlingisela. Kuyabe kumele uzinikele kuJehova ubusubhabhathizwa. w23.03 4 ¶8, 10

UJehova nguye owadala izinto ezisezulwini lezisemhlabeni laselwandle njalo zonke zisifundisa okunengi ngaye. (Hubo. 104:24, 25) Akucabange ngendlela asidala ngayo. Siyenelisa ukubuka izinto ezinhle sikholise. Kanti njalo wasidala sisenelisa ukubona, ukuzwa, ukubamba, ukunambitha kanye lokuhogela. Konke lokhu kusenza sikholise izinto ezitshiyeneyo azidalayo. IBhayibhili lisitshela ngokunye okuqakathekileyo okwenza sihlolisise izinto ezidaliweyo. Zisifundisa ukuthi uJehova unguNkulunkulu onjani. (Rom. 1:20) Ngokwesibonelo, akucabange ngezinto ezadalwa nguJehova ubone indlela emangalisayo ezenziwe ngayo. Zisifundisa ukuthi uJehova unguNkulunkulu olenhlakanipho. Cabanga langokudla okutshiyeneyo esikukholisayo, konke nje kutshengisa ukuthi uJehova uyasithanda. Nxa singabona ubuntu bukaJehova ezintweni azidalayo kuyasinceda sibemazi ngcono kuphinde kusenze sisondele kuye. w23.03 16 ¶4-5

Izinto zizaqhubeka zisiba nzima, yikho kungaba nzima ukuthi siqhubeke silithemba iLizwi likaNkulunkulu. Abantu bangazama ukusenza sithandabuze ukuthi iBhayibhili lileqiniso, lokuthi uJehova uyibekile sibili inceku ethembekileyo lehlakaniphileyo ukuthi ikhokhele abantu bakhe lamuhla. Kodwa nxa singathandabuzi ukuthi iLizwi likaJehova lileqiniso kasisoze sivume ukuthi izinto lezi zixegise ukholo lwethu. ‘Sizazimisela ukulalela imilayo yakhe zikhathi zonke, kuze kube sekucineni.’ (Hubo. 119:112) ‘Asisoze sibe lenhloni’ zokutshela abantu iqiniso eliseBhayibhilini kanye lokubakhuthaza ukuthi balandele lokho elikutshoyo. (Hubo. 119:46) Kanti njalo sizenelisa ukuqinisela ebunzimeni ‘sibekezela futhi sithokoza’ lanxa sihlukuluzwa. (Kol. 1:11; Hubo. 119:​143, 157) Iqiniso lisenza sihlaliseke sikwazi ukuthi siphilelani njalo liphinda lisifundise ukuthi singaphila njani emhlabeni lo. Lisinika ithemba lokuthi sizakuba lekusasa elihle sesibuswa nguMbuso kaNkulunkulu. w23.01 7 ¶16-17

Ngobusuku bokucina engakafi, uJesu wathandazela abafundi bakhe okwesikhathi eside ecela ukuthi uYise ‘abakhangele ngenxa yomubi.’ (Joh. 17:15) Lokhu kwatshengisa ukuthi wayebathanda sibili. Lanxa wayekwazi ukuthi usezahlupheka kakhulu, wayelokhu ekhathazekile ngabaphostoli bakhe. Silingisela uJesu ngokungathandazeli okufunwa yithi kuphela kodwa ngokuhlala sithandazela labafowethu labodadewethu. Nxa singenza njalo siyabe silalela umlayo kaJesu wokuthi sithandane futhi sitshengisa uJehova ukuthi siyabathanda sibili labo esikhonza labo. Ukuthandazela abafowethu labodadewethu kuyabanceda. Phela iLizwi likaNkulunkulu lithi “umthandazo womuntu olungileyo okhuleka encenga ulamandla futhi uyanceda kakhulu.” (Jak. 5:16) Kumele sibathandazele labo esikhonza labo ngoba bahlangana lezinhlupho ezinengi. w22.07 23-24 ¶13-15