August

Ucabanga ukuthi kungani uJehova ebhala phansi ‘encwadini yesikhumbuzo’ amabizo alabo abakhuluma izinto ezitshengisa ukuthi bayamesaba futhi bayalihlonipha ibizo lakhe? Esikukhulumayo kutshengisa lokho okusenhliziyweni yethu. UJesu wathi: “Umlomo ukhuluma okuphuphuma enhliziyweni.” (Mat. 12:34) UJehova ufuna labo abamthandayo bakholise ukuphila okungapheliyo emhlabeni omutsha. Indlela esikhuluma ngayo ingenza uJehova amukele ukukhonza kwethu kumbe angakwamukeli. (Jak. 1:26) Abanye abangamthandiyo uNkulunkulu bakhuluma ngendlela elolaka, ezwisa abanye ubuhlungu futhi etshengisa ukuthi bayazigqaja. (2 Tim. 3:1-5) Asifuni ukwenza njengabo. Sizimisele ukuthokozisa uJehova ngendlela esikhuluma ngayo. UJehova angathokoza yini nxa sikhuluma ngendlela elomusa emihlanganweni yebandla lasekutshumayeleni kodwa sikhuluma amazwi ahlabayo nxa silezimuli zethu?—1 Phet. 3:7. w22.04 5 ¶4-5

UNkulunkulu ufaka ezinhliziyweni zempondo ezilitshumi kanye lesilo ukuthi zitshabalalise iBhabhiloni Enkulu. UJehova uzakwenza ukuthi izizwe zisebenzise isilo esibomvu gebhu okutsho i-United Nations, ukuthi siphendukele umbuso womhlaba wonke wenkolo yamanga futhi siwutshabalalise. (Isam. 18:​21-24) Sifundani? ‘Indlela yethu yokukhonza kumele ibe ngehlanzekileyo lengangcolanga ngokubona kukaNkulunkulu wethu.’ (Jak. 1:27) Akumelanga sithatheke ngezimfundiso zamanga zeBhabhiloni Enkulu kumbe ngemikhosi yayo yobuhedeni. Akumelanga silandele lemikhuba yayo yokungaziphathi leyobudimoni. Kanti njalo kumele sitshele abantu ukuthi ‘baphume kuyo’ ukuze bangahlanganyeli ezonweni zayo.—Isam. 18:4. w22.05 11 ¶17; 14 ¶18

Bazali, dingani amathuba okufundisa abantwabenu ngoJehova langezinto ezinhle alenzele zona. (Dute. 6:​6, 7) Lokhu kuqakathekile ikakhulu nxa umkakho engasoFakazi njalo ungatholi isikhathi sokuhlala ufunda labantwabakho ngekhaya. Udade okuthiwa nguChristine uthi: “Kwakunzima ukuthola isikhathi sokufundisa abantwabami ngoJehova yikho ngangisebenzisa loba yiliphi ithuba engangilithola.” Okunye ongakwenza yikukhuluma kuhle ngenhlanganiso kaJehova kanye labafowethu labodadewethu. Ungakhulumi kubi ngabadala bebandla. Phela izinto ozitshoyo ngabo yizo ezingenza ukuthi abantwabakho baye kubo nxa bedinga uncedo kumbe bangabathembi. Yenza kube lokuthula ngekhaya. Hlala utshengisa ukuthi uyamthanda umkakho kanye labantwabakho. Izinto ozikhulumayo ngomkakho kumele zitshengise ukuthi uyamhlonipha futhi kumele ufundise abantwabakho ukuthi labo benze njalo. Lokhu kuzakwenza kube lokuthula ngekhaya besekusiba lula ukuthi ufundise abantwabakho ngoJehova.—Jak. 3:18. w22.04 18 ¶10-11

Amazwi uJesu awatshela ibandla le-Efesu atshengisa ukuthi laliqinisele njalo laqhubeka likhonza uJehova kungelani lenhlupho elalihlangana lazo. Lanxa kunjalo ababesebandleni lelo babengasamthandi uJehova ngendlela ababemthanda ngayo ekuqaliseni. Kwakumele baluvuselele uthando lolo ukuze ukukhonza kwabo kwamukeleke. Lathi lamuhla kuqakathekile ukuthi siqinisele nxa siphakathi kwenhlupho. Kodwa kumele siqinisele ngenxa yezizatho eziyizo. UNkulunkulu kalandaba lokuthi senzani kuphela kodwa ulendaba lokuthi sikwenzelani. Inhloso zethu ziqakathekile kuye ngoba ukhangelele ukuthi simkhonze ngenxa yokuthi siyamthanda futhi siyambonga ngalokho asenzele khona. (Zaga. 16:2; Mak. 12:29, 30) Kumele sihlale siphapheme. AmaKhristu ayesebandleni leSadisi ayelohlupho olutshiyeneyo. Lanxa ayeke akhuthala ekukhonzeni uJehova, ngalesosikhathi ayengasakhuthalanga njengakuqala. UJesu wawatshela ukuthi ‘aphaphame.’ (Isam. 3:​1-3) UJehova kasoze akukhohlwe esimenzele khona.—Heb. 6:10. w22.05 3 ¶6-7

USolomoni wathi intokozo esiyithola ngokusebenza nzima “yisipho sikaNkulunkulu.” (UmTshu. 5:​18, 19) USolomoni wayekwazi ayekhuluma ngakho. Phela wayekuthanda ukusebenza. Wakha izindlu, wahlanyela amavini, wasungula izivande, wenza iziziba zamanzi njalo wakha lamadolobho. (1 AmaKho. 9:19; UmTshu. 2:​4-6) Le kwakuyimisebenzi enzima sibili futhi kumele ukuthi yamthokozisa. Kodwa imisebenzi le ayisiyo yodwa eyamthokozisayo. Wenza lemisebenzi eminengi ephathelane lokukhonza. Ngokwesibonelo, wakhokhela emsebenzini wokwakhiwa kwethempeli likaJehova elikhazimulayo njalo umsebenzi lo wathatha iminyaka eyisikhombisa. (1 AmaKho. 6:38; 9:1) Ngemva kokwenza imisebenzi yonke le wananzelela ukuthi eqakatheke kakhulu ngephathelane lokukhonza. Wathi: “Manje-ke konke sekuzwakele; Nansi isiphetho sendaba; Mesabe uNkulunkulu ugcine imilayo yakhe.”—UmTshu. 12:13. w22.05 22 ¶8

EBhayibhilini kukhulunywa ngabantu abanengi uJehova abathethelelayo. Ngubani omkhumbulayo? Engxenye uhle wacabanga iNkosi uManase. UManase wamonela kakhulu uJehova. Wayehamba phambili ekukhonzeni onkulunkulu bamanga. Wabulala abantwabakhe enikela ngabo kubonkulunkulu labo. Waze wafaka lesithombe ethempelini likaJehova elingcwele. IBhayibhili lithi: “Wenza okubi kakhulu phambi kukaJehova, wamthukuthelisa.” (2 ImiLan. 33:​2-7) Kodwa kwathi uManase esephenduke ngenhliziyo yonke, uJehova wamxolela. (2 ImiLan. 33:​12, 13) Engxenye omunye omkhumbulayo yiNkosi uDavida owenza izono ezinkulu kakhulu ezigoqela ukufeba lokubulala. Kodwa wathi esephendukile njalo wavuma izono zakhe uJehova wamthethelela. (2 Sam. 12:​9, 10, 13, 14) Lokhu kwenza kucace sibili ukuthi uJehova uzimisele ukusithethelela. w22.06 3 ¶7

Akulula ngazo zonke izikhathi ukugcina ithemba lethu liqinile. Singehluleka ukulindela ukuthi izithembiso zikaNkulunkulu zigcwaliseke. Kithi kungakhanya angani uthatha isikhathi eside kodwa kuye sifitshane ngenxa yokuthi wayevele ekhona njalo uzahlala ekhona. (2 Phet. 3:​8, 9) Uzazigcwalisa izithembiso zakhe kodwa kungenzeka ukuthi lokhu kungenzakali ngesikhathi esikhangelele ngaso. Kuyini okungasinceda ukuthi sigcine ithemba lethu liqinile njengoba sisalindele ukuthi uJehova agcwalise izithembiso zakhe? (Jak. 5:7) Yikuhlala siseduze loJehova onguye ozaligcwalisa ithemba lelo. IBhayibhili lithi ukuze sibe lethemba kumele sikholwe ukuthi uJehova ukhona lokuthi “uyabapha umvuzo labo abamdinga ngeqiniso.” (Heb. 11:​1, 6) Nxa singathandabuzi ukuthi uJehova ukhona ithemba lethu lokuthi uzakwenza konke akuthembisileyo lizaqina. Kumele sikhuleke kuJehova futhi sibale iLizwi lakhe ukuze siqinise ithemba lethu. Siyenelisa ukusondela kuJehova lanxa singamboni. Siyakhuluma laye ngomthandazo sileqiniso lokuthi uyasizwa.—Jer. 29:​11, 12. w22.10 26-27 ¶11-13

Akumbone uJobe ehlezi esilotheni efuthelwa okuzwayo. (Jobe. 2:8) Amadoda azenza abangane bakhe alokhu esithi ungumuntu omubi futhi athi uJehova kazihluphi ngokuhle ake wakwenza. Kanti njalo uzwa ubuhlungu bokufelwa ngabantwabakhe. Uphakathi kwelitshe lembokodo sibili. Uqala athule okwesikhathi. (Jobe. 2:13) Nxa amadoda la azithi angabangane bakaJobe ecabanga ukuthi ukuthula lokhu kutsho ukuthi uJobe usezatshiya uJehova, akhe phansi. Kumele ukuthi uvusa ikhanda awathi nhlo ngesikhathi esithi: “Ngizaze ngiyokufa ngingabulandulanga ubuqotho bami.” (Jobe. 27:5) Kuyini okwenza uJobe waba lesibindi njalo wazimisela kangaka lanxa wayephakathi kwenhlupho? Kazange alahle ithemba lokuthi ngelinye ilanga uNkulunkulu wakhe omthandayo wayezabuqeda bonke ubuhlungu bakhe. Wayekwazi lokuthi lanxa engafa uzamvusa.—Jobe. 14:​13-15. w22.06 22 ¶9

UMdali wamazulu lomhlaba usinike isibusiso esimangalisayo esokuthandaza kuye. Akucabange, siyenelisa ukuthululela uJehova isifuba loba ngasiphi isikhathi futhi sisebenzisa loba yiluphi ulimi. Siyenelisa ukuthandaza lanxa silalisiwe esibhedlela kumbe sivalelwe ejele, sileqiniso lokuthi uBaba wethu osithandayo uyasizwa. Siyasiqakathekisa sibili isibusiso lesi. INkosi uDavida yayisiqakathekisa isibusiso sokuthandaza. Yikho yahlabela yathi: “Sengathi umkhuleko wami ungema phambi kwakho njengempepha.” (Hubo. 141:​1, 2) Ngesikhathi sikaDavida, impepha engcwele eyayisetshenziswa ekukhonzeni ngabaphristi yayilungiswa ngonanzelelo. (Eks. 30:​34, 35) Ukukhuluma kukaDavida ngempepha kutshengisa ukuthi wayefuna ukucabangisisa ngalokho ayezakutsho nxa ethandaza kuYise osezulwini. Lathi njengoDavida sifuna ukuthi imithandazo yethu imthokozise uJehova. w22.07 20 ¶1-2; 21 ¶4

Ukuphindisela ngokukaJehova. UJehova kasivumeli ukuthi siphindisele nxa othile esonele. (Rom. 12:​20, 21) Isono esilaso senza sehluleke ukubona indaba ngendlela uJehova ayibona ngayo. (Heb. 4:13) Ngezinye izikhathi indlela esizizwa ngayo ingenza sicine sisahlulela ngendlela engaqondanga. UJehova waphefumulela uJakhobe ukuthi abhale amazwi la: “Ukuzonda komuntu akukulethi ukulunga kukaNkulunkulu.” (Jak. 1:20) Siyaqiniseka ukuthi uJehova uzakwenza okulungileyo ayilungise indaba. Nxa sithethelela abanye siyabe sitshengisa ukuthi siyayithemba indlela uJehova ahlulela ngayo. Nxa singatshiya indaba ezandleni zikaJehova siyabe sitshengisa ukuthi siyamthemba ukuthi uzalungisa wonke umonakalo obangelwe yisono. Emhlabeni omutsha asithembisa wona bonke ubuhlungu esabuzwiswa ngabantu ‘abuyikukhunjulwa kumbe bufike engqondweni.’—Isaya. 65:17. w22.06 10-11 ¶11-12

Ukuzondwa ngabantu kutshengisa ukuthi esikwenzayo kuyamthokozisa uJehova. (Mat. 5:​11, 12) UDeveli nguye obangela ukuthi siphikiswe. Kodwa uJesu ulamandla kulaye. Uyasincedisa ukuthi sitshumayele izindaba ezinhle ezizweni zonke. Olunye uhlupho esilalo yikuthi sitshumayeza abantu abakhuluma indimi ezitshiyeneyo. Embonweni kaJohane, uJesu wamtshengisa ukuthi izindaba ezinhle zazizatshunyayelwa lanxa abantu bekhuluma izindimi ezitshiyeneyo. (Isam. 14:​6, 7) Lokhu kwenzakala njani? Namuhla sinceda abantu abanengi ukuthi bazwe izindaba ezinhle zoMbuso. Abantu emhlabeni jikelele bayenelisa ukubala izinto ezisekelwe eBhayibhilini kuwebhusayithi yethu i-jw.org ngoba itholakala ngezindimi ezedlula 1 000. IQula Elikhokhelayo lanika imvumo yokuthi kuhunyutshwe ibhuku esilisebenzisa ukwenza abafundi elithi Ungathokoza Kuze Kube Nini Lanini! ngezindimi ezedlula 700. w22.07 9 ¶6-7

UJesu wayebazwela abantu. UMathewu uthi: “Wathi ebona amaxuku abantu, wawazwela usizi ngoba ayehlukuluzekile futhi elahlelwe iganga njengezimvu ezingelamelusi.” (Mat. 9:36) UJehova yena ke? UJesu wathi: ‘UBaba osezulwini kafisi ukuthi kutshabalale ngitsho loyedwa kulaba abancinyane.’ (Mat. 18:14) Lokhu kuyasithokozisa ngoba siyazibonela ukuthi uJehova uyasithanda. Nxa singabamazi ngcono uJesu, sizamthanda kakhulu uJehova. Okunye okuzakunceda ukuthi ube ngumuntu olothando njalo uthuthuke yikuzinika isikhathi sokuxoxa lamaKhristu asebandleni lakho amthandayo uJehova. Nanzelela ukuthi ukumkhonza kwenza bathokoze njani. Abazisoli ngokukhetha ukukhonza uJehova. Bacele bakutshele abahlangane lakho ngesikhathi besebenzela uJehova. Bacele ukuthi bakuncedise nxa ufuna ukwenza isinqumo esiqakathekileyo. Phela siyaphumelela nxa “bebanengi abeluleki” kumbe kulabantu abanengi abasicebisayo. w22.08 3 ¶6-7

Sonke sizakwehlelwa zinhlupho. Kodwa asisoze silwisane lenhlupho zethu sisodwa. UJehova uBaba wethu osithandayo uzahlala esinakekela. Useduze lathi njalo uzimisele ukuzwa imithandazo yethu lokusincedisa. (Isaya. 43:2) Sileqiniso lokuthi sizakwenelisa ukubekezelela inhlupho ngoba usinike konke okusinceda ukuthi siqinisele. Usinike iBhayibhili lezinto ezinengi ezisiqinisa ukholo njalo uyasivumela ukuthi sithandaze kuye. Kanti njalo usinike labafowethu labodadewethu ukuze basincedise ngezikhathi ezinzima. Siyambonga kakhulu uBaba wethu osezulwini ngokusinakekela. “Izinhliziyo zethu zithokoza ngaye.” (Hubo. 33:21) Kodwa kukhona okumele lathi sikwenze ukuze aqhubeke esinakekela. Singatshengisa ukuthi siyambonga uJehova ngokusebenzisa konke asinike khona ukuze asincedise. Nxa singaqhubeka sizama ngamandla ethu wonke ukumlalela lokwenza okulungileyo, uzasincedisa kuze kube nini lanini! w22.08 13 ¶15-16

Abantu abanengi abakwazi ukuthi bangathemba bani. Bayazibuza ukuthi abantu abayabe bekhangelele ukuthi babancede balendaba labo yini, ngokwesibonelo abezombusazwe labezesayensi labezamabhizimusi. Kanti njalo kababathembi abafundisi. Lokhu yikho okwenza bengalithembi iBhayibhili ngoba kababathembi labobafundisi abayabe besithi bayalilandela. Zonke izinceku zikaJehova azithandabuzi ukuthi ‘unguNkulunkulu weqiniso’ lokuthi uhlala ezifisela okuhle. (Hubo. 31:5; Isaya. 48:17) Siyakwazi ukuthi singakuthemba konke esikubala eBhayibhilini. Sivumelana lokwatshiwo ngesinye isazi seBhayibhili esathi: “Akula ngitsho lokukodwa uNkulunkulu akukhulumileyo okungamanga kumbe okungasoze kugcwaliseke. Abantu bakaNkulunkulu bangakuthemba lokho akutshoyo ngenxa yokuthi bayamthemba lowo okukhulumileyo.” w23.01 2 ¶1-2

Abafowethu labodadewethu siyabakha nxa singabancedisa ukuthi baqinise ukholo lwabo kuJehova. Abanye bayahlekwa ngabantu abangasibo oFakazi. Abanye abaphilanga kuhle emzimbeni njalo abanye balokhu besizwa ubuhlungu ngenxa yokuthi bake baphathwa kubi ngabanye abantu. Abanye sebelesikhathi eside bekulindele ukuphela komumo lo wezinto. Konke lokhu kungaba yizinto ezingaxegisa ukholo lomKhristu. AmaKhristu aphila ngesikhathi sabaphostoli lawo ahlangana lenhlupho ezifananayo. Umphostoli uPhawuli wasebenzisa iMibhalo ukuze akhe ukholo lwabafowabo labodadewabo. Ngokwesibonelo, kungenzakala ukuthi amaJuda ayengamaKhristu ayeswela ukuthi aphendule athini nxa esolwa ngamalunga emuli ayekholwa ukuthi ukuba ngumJuda yikho okwakuqakathekile ukwedlula ukuba ngumKhristu. Akuthandabuzwa ukuthi incwadi uPhawuli ayibhalela amaHebheru yawaqinisa kakhulu amaKhristu la. (Heb. 1:​5, 6; 2:​2, 3; 9:​24, 25) Amazwi abawabhalelwa nguPhawuli ayezabanceda ukuthi benelise ukuphendula labo ababebaphikisa. w22.08 23-24 ¶12-14

Abantu emhlabeni kaSathane abasakwazi ukuthi bathembe bani. Bahlala bedaniswa ngabezokuthengiselana, abezombusazwe kanye labakhokheli benkolo. Kunzima lokuthi bathembe abangane, omakhelwane ngitsho lezihlobo. Lokhu akumelanga kusimangalise. IBhayibhili lathi: ‘Ezinsukwini zokucina abantu bazakuba ngabangathembekanga, labanyundiselayo labangabathengisi.’ Lokhu kutsho ukuthi abantu babezakuba njengonkulunkulu womumo lo wezinto ongeke athenjwe ngitsho lakancane. (2 Thim. 3:​1-4; 2 Khor. 4:4) Thina amaKhristu siyamthemba uJehova ngenhliziyo zethu zonke. Siyakwazi ukuthi uyasithanda njalo ‘kabafulatheli’ abangane bakhe. (Hubo. 9:10) Siyamthemba loKhristu uJesu ngoba wanikela ngokuphila kwakhe ukuze kuncedwe thina. (1 Phet. 3:18) Kanti njalo sesizibonele ukuthi ukulandela lokho esikufunda eBhayibhilini kuyasinceda.—2 Thim. 3:​16, 17. w22.09 2 ¶1-2

Intokozo yeqiniso ayisikho kuzizwa uthokoza nje okwesikhatshana. Yona ungaba layo okwempilo yakho yonke. UJesu wakuchasisa lokhu eNtshumayelweni yaseNtabeni lapho esithi: “Bayathokoza abakunanzelelayo ukuthi bayamdinga uNkulunkulu.” (Mat. 5:3) UJesu wayekwazi ukuthi abantu badalwa belesifiso esikhulu sokwazi lokukhonza uMdali wabo uJehova uNkulunkulu. Njengoba uJehova ‘enguNkulunkulu othokozayo’ labo abamkhonzayo labo bangathokoza. (1 Thim. 1:11) Kumele singabi lenhlupho yini ukuze sithokoze? Hatshi. Entshumayelweni yakhe uJesu wathi lalabo “abalilayo” bangathokoza. UJesu watsho okufananayo ngalabo “asebeke bahlukuluzwa ngenxa yokwenza okulungileyo.” (Mat. 5:​4, 10, 11) UJesu wayesifundisa ukuthi okungenza sithokoze yikusondela kuNkulunkulu hatshi ukungabi lenhlupho.—Jak. 4:8. w22.10 6 ¶1-3

Ukuqedisisa kuyamnceda umKhristu enelise ukwehlukanisa phakathi ‘kwesikhathi sokuthula lesikhathi sokukhuluma.’ (Umtshu. 3:7) Kulesitsho esithi ukuthula kungumuthi. Lapha bayabe besithi kwezinye izikhathi kungcono ukuzithulela kulokukhuluma. Ngokwesibonelo kulomunye umfowethu oseleminyaka eminengi engumdala ojayele ukucelwa ukuthi ancedise nxa kulendaba ezihluphayo kwamanye amabandla. Omunye umdala wakhuluma ngaye wathi, “Awusoze umuzwe ekhuluma ngokwenzakala kwamanye amabandla.” Abadala abasebandleni akulo bayamhlonipha ngenxa yendlela enza ngayo. Bayakwazi ukuthi kasoze aveze imfihlo zabo kwabanye. Ukukhuluma iqiniso kwenza abantu basithembe. Kulula ukuthi abantu bathembe umuntu ohlala ekhuluma iqiniso.—Efe. 4:25; Heb. 13:18. w22.09 12 ¶14-15

Abantu abanengi bephulela izigodo endlebeni nxa ukuhlakanipha kweqiniso ‘kumemeza emgwaqweni.’ (Zaga. 1:20) IBhayibhili lithi kulamaqembu amathathu abantu abangakwamukeliyo ukuhlakanipha kweqiniso. ‘Ngabangelalwazi’ ‘labathanda ukweyisa’ kanye ‘leziphukuphuku.’ (Zaga. 1:​22-25) Abantu ‘abangelalwazi’ ngothathekile, ovuma zonke futhi bakhohliseka lula. (Zaga. 14:15) Kulezigidi zabantu ezikhohliswa ngabafundisi bazo kumbe abezombusazwe. Abanye basala bengelankani nxa sebenanzelele ukuthi bebekhohliswa ngabakhokheli babo. Kodwa okukhulunywa ngabo kuZaga 1:22 bakhetha ukuhlala bengelalwazi ngenxa yokuthi bakuthanda kunjalo. (Jer. 5:31) Kabafuni ukufunda lokho okufundiswa liBhayibhili kumbe ukulandela lokho elikutshoyo. Asifisi lakancane ukulingisela labo abakhetha ukuhlala besemnyameni!—Zaga. 1:32; 27:12. w22.10 19 ¶5-7

Inhlanganiso kaJehova isitshela okumele sikwenze ukuze sihlale sivikelekile. Sihlala sikhunjuzwa ukuthi sinike abadala inamba zethu zefoni esizisebenzisayo, sibatshele lalapho esihlala khona ukwenzela ukuthi benelise ukusithinta nxa kube lomonakalo. Singatshelwa lokuthi sihlale lapho esikhona singasuki, ukuthi sisuke siye kwenye indawo, sitshelwe lokumele sikwenze ukuze sithole izinto esizidingayo. Singatshelwa lokuthi singabancedisa njani abanye lokuthi sibancedise nini. Nxa singayekela ukulalela singafaka ukuphila kwethu lokwabadala abasilindayo engozini. (Heb. 13:17) Abafowethu labodadewethu abatshiye imizi yabo ngenxa yomonakalo loba iziphithiphithi zombangazwe benze okusemandleni abo ukuthi baqalise impilo entsha lapho asebekhona lokuthi bahle benze izinto eziphathelane lokukhonza. Baqhubeka “betshumayela izindaba ezinhle ezimayelana lelizwi” njengamaKhristu akuqala ayesabalale aya kwezinye izindawo ngenxa yokuhlukuluzwa. (Imiseb. 8:4) Ukutshumayela kubanceda ukuthi bahlale becabanga ngoMbuso hatshi inhlupho abayabe belazo. Yikho beqhubeka bethokoza futhi belokuthula. w22.12 19 ¶12-13

UJehova uyakuqakathekisa. UJesu wathi esethuma abaphostoli bakhe ukuthi bayetshumayela wabanceda ukuthi bangabesabi abantu ababezabathwalisa nzima. (Mat. 10:​29-31) Lokhu wakwenza ngokubatshela ngentaka, inyoni eyayijayeleke kakhulu ko-Israyeli. Ngesikhathi sikaJesu inyoni lezo zazitshiphe kakhulu kodwa watshela abafundi bakhe wathi: “Ayikho leyodwa ewela phansi uYihlo engakwazi.” Waphinda wathi: “Liqakatheke kakhulu kulentaka ezinengi.” UJesu waqinisekisa abafundi bakhe ukuthi uJehova wayeqakathekisa munye ngamunye wabo yikho kwakungelasizatho sokuthi besabe ukuhlukuluzwa. Asithandabuzi ukuthi abafundi bakaJesu babewakhumbula amazwi akhe nxa babebona intaka ngesikhathi betshumayela emadolobheni lasemizini. Nxa lawe ubona inyoni encane khumbula ukuthi uJehova uyakuqakathekisa ngenxa yokuthi ‘uqakatheke kakhulu kulentaka ezinengi.’ Ngakho asikho isizatho sokuthi wesabe nxa abantu bekuhlukuluza ngoba uJehova uzakusekela. w23.03 18 ¶12

Kungenzakala ukuthi sithwaliswe nzima yizihlobo kumbe siphelelwe ngumsebenzi. Nxa singaba phakathi kohlupho okwesikhathi eside singaphelelwa lithemba njalo sidane. Lapho-ke uSathane ungena ngenxeba njengempethu ezama ukusenza sithandabuze ukuthi uJehova uyasithanda. USathane ufuna sicabange ukuthi inhlupho zethu zibangelwa nguJehova kumbe yinhlanganiso yakhe. Lokho kwake kwenzakala kwamanye ama-Israyeli eGibhithe. Ekuqaliseni ayekholwa ukuthi uJehova nguye owayethume uMosi lo-Aroni ukuthi bawakhiphe ebugqilini. (Eks. 4:​29-31) Kodwa ngokuhamba kwesikhathi uFaro wathi esewathwalise amagabha avuzayo aqalisa ukusola uMosi lo-Aroni. (Eks. 5:​19, 20) Kuyadanisa ukuthi asola izinceku zikaJehova ezazithembekile. Nxa usulesikhathi eside uphakathi kobunzima, thandaza kuJehova umtshele konke okusenhliziyweni yakho futhi uthembele kuye. w22.11 15 ¶5-6

UJehova nguye osinika ukuphila njalo ulamandla okuvusa abafileyo. Wanika umphrofethi u-Elija amandla okuvusa indodana yomfelokazi waseZarefathi. (1 Amakho. 17:​21-23) Kanti njalo uNkulunkulu waphinda wanika umphrofethi u-Elisha amandla okuvusa indodana yowesifazana weShunemi. (2 Amakho. 4:​18-20, 34-37) Izibonelo lezi lezinye eziseBhayibhilini zitshengisa ukuthi uJehova ulamandla okuvusa abantu abafileyo. Ngesikhathi uJesu esemhlabeni watshengisa ukuthi uYise wayemuphe amandla okuvusa abafileyo. (Joh. 11:​23-25, 43, 44) Khathesi uJesu usezulwini njalo ‘uphiwe amandla wonke ezulwini lasemhlabeni.’ Yikho uyenelisa ukugcwalisa isithembiso sokuthi “bonke abasemathuneni” bazavuswa belethemba lokuphila kuze kube nini lanini.—Mat. 28:18; Joh. 5:​26-29. w22.12 5 ¶10

Nxa abantu babengalaleli uHezekheli kutsho ukuthi babengafuni ukulalela uJehova. Amazwi asembhalweni walamuhla aqinisekisa uHezekheli ukuthi lanxa abantu babengamlaleli yena wayeyabe ewenzile umsebenzi wakhe wokuphrofetha. UJehova waphinda watshela uHezekheli ukuthi nxa izahlulelo ayekhulume ngazo sezigcwaliseka abantu ‘babezakwazi ukuthi umphrofethi ubekhona phakathi kwabo.’ (Hez. 2:5; 33:33) Akuthandabuzwa ukuthi amazwi la anika uHezekheli amandla okuthi aqhubeke esenza inkonzo yakhe. Lathi silesibindi ngoba siyakwazi ukuthi sithunywe nguJehova ukuthi sitshumayele. Usinike isibusiso esikhulu sokuba ‘ngofakazi’ bakhe. (Isaya. 43:10) UJehova usiqinisa esithi, “Lingatshaywa luvalo,” njengoba nje waqinisa uHezekheli esithi, “Ungesabi.” (Hez. 2:6) Kungani kungamelanga sesabe abantu abasiphikisayo? Akumelanga sibesabe ngoba lathi njengoHezekheli sithunywe nguJehova futhi uyasisekela.—Isaya. 44:8. w22.11 3-4 ¶4-5

Siyababonga kakhulu abadala labafowethu abazinceku ezikhonzayo esilabo emabandleni ngoba bathembekile. Abazalwane laba bayasinceda ukuthi sihlale siqinile ekukhonzeni futhi siyambonga uJehova ngokusipha bona. Kodwa thina singenzani ukuze sitshengise ukuthi sithembekile? Siyabathanda abafowethu labodadewethu futhi siyabe sifuna ukuzwa ukuthi banjani. Kodwa kumele sibahloniphe singangeni endabeni ezingaqondananga lathi. Ebandleni lamaKhristu okuqala kwakulabanye ‘ababelomkhuba wokunyeya futhi bengenela indaba zabantu bekhuluma ngezinto okungafanelanga bakhulume ngazo.’ (1 Thim. 5:13) Asifuni ngitsho lakancane ukuba njengabo. Manje kumele senzeni nxa umuntu engasitshela imfihlo abesesicela ukuthi singatsheli muntu? Ake sithi ngudade ositshele ukuthi uyagula kumbe ukuthi ulolunye uhlupho, sizakwenzani? Kumele simhloniphe singahambi sifafaza indaba yakhona. w22.09 10 ¶7-8

Umutsho wesiGrikhi ohunyutshwe ngokuthi “litshintshe indlela elicabanga ngayo” ungabekwa langokuthi “lilungisise izingqondo zenu.” Yikho akumelanga sisuthiseke ngokuthi sesilungisile impilo zethu nxa sesenze imisebenzi emihle emilutshwana nje. Kodwa kumele sihlole lokhu esiyikho ngaphakathi, sitshintshe lapho okumele sitshintshe khona ukwenzela ukuthi lokho esikwenzayo kuhambelane lalokho okufunwa nguJehova. Lokhu asikwenzi kanye kuphela kodwa kumele sihlale sikwenza. Nxa sesingaselasono konke esiyabe sikwenza kuzabe kumthokozisa uJehova. Kodwa singakafiki lesosikhathi kumele siqhubeke sisebenza nzima ukuze simthokozise. KuRoma 12:2 uPhawuli uthi ukuze siyazi intando kaNkulunkulu kumele sitshintshe indlela esicabanga ngayo. Kumele siqale sizihlole ukuze sibone ukuthi izinto esizikhethayo lesihlela ukuzenza ziyahambelana yini lokucabanga kukaNkulunkulu hatshi okomhlaba. w23.01 8-9 ¶3-4

UJehova uyangenela yini kubo bonke ubunzima obusehlelayo? Nxa singaba lobunzima empilweni yethu, wenza okuthile yini ukuze yonke into embi esehlelayo ibe lesizatho esihle? Hatshi, ayisikho okufundiswa liBhayibhili lokho. (Umtshu. 8:9; 9:11) Esikwaziyo nanku: Nxa sisebunzimeni uJehova uyabona futhi uyezwa ukukhala kwethu nxa sicela uncedo. (Hubo. 34:15; Isaya. 59:1) Kanti njalo uJehova angasincedisa ukuthi siqinisele nxa siphakathi kobunzima. Ukwenza njani lokho? Eyinye indlela uJehova asincedisa ngayo yikusiduduza lokusikhuthaza futhi kanengi lokhu ukwenza ngesikhathi esifaneleyo. (2 Khor. 1:​3, 4) Uyasikhumbula yini isikhathi lapho uJehova akuncedisa khona ngokukududuza langokukukhuthaza ngesikhathi izinto zinzima kakhulu empilweni yakho? Izikhathi ezinengi sibona indlela uJehova abesincedisa ngayo nxa sesiphumile phakathi kobunzima. w23.01 17-18 ¶13-15

Isilo lesi siphose sifanane lesilamakhanda ayisikhombisa. Umehluko nje yikuthi sona sibomvu gebhu. Kuthiwa ‘siyisithombe sesilo’ njalo ‘siyinkosi yesitshiyagalombili.’ (Isam. 13:​14, 15; 17:​3, 8) UJohane uthi ‘inkosi’ le yaba khona yasinyamalala yaphinda yavela. Lokhu kuyichaza kuhle inhlanganiso yomanyano wamazwe omhlaba (i-United Nations) eyenza lokho okufunwa ngohulumende bomhlaba. Inhlanganiso le yaqalisa ibizwa kuthiwa yi-League of Nations. Yanyamalala ngeMpi Yomhlaba Yesibili yasizovela isiyi-United Nations. Izilo kumbe ohulumende zizakhuluma amanga ukuze zenze abantu baphikisane loJehova labantu bakhe. UJohane uthi kuyabe kungani ziqoqela ‘amakhosi omhlaba wonke’ empini ye-Amagedoni ‘elusuku olukhulu lukaNkulunkulu uSomandla.’—Isam. 16:​13, 14, 16. w22.05 10 ¶10-11

UJesu wathi esefunde ukuzibalela iMibhalo eNgcwele wayazi wangayiphumputhi iMibhalo, wayithanda njalo wayisebenzisa empilweni yakhe. Ngokwesibonelo, cabanga ngokwenzakala ethempelini uJesu eleminyaka engu-12 kuphela. Abafundisi ababewazi kuhle uMthetho kaMosi ‘bamangaliswa yikuzwisisa kwakhe lezimpendulo zakhe.’ (Luk. 2:​46, 47, 52) Lathi singabalazi futhi silithande iLizwi likaNkulunkulu nxa silibala zikhathi zonke. Singafunda kulokho uJesu akutshela labo ababewazi uMthetho, okugoqela ababhali labaFarisi labaSadusi. Abakhokheli benkolo laba babebala iMibhalo kanengi kodwa ababekubala kwakungabancedi. UJesu wakhuluma ngezinto ezintathu okwakumele amadoda la azenze ukuze ancedwe yiMibhalo. Amazwi akhe azasinceda ukuthi sikuzwisise lokho esikubalayo, sithole amagugu aseLizwini likaNkulunkulu lokuthi sivumele ukuthi lisibumbe. w23.02 8-9 ¶2-3

Ezinye izingozi okumele sizibalekele yikudlala ngothando, ukunatha sedlulise, ukudla kakhulu, ukukhuluma izinto ezizwisa abanye ubuhlungu kanye lokubukela izinto ezilodlakela lephonografi lokunye okuhambelana lalokho. (Hubo. 101:3) UDeveli uhlala esithiyile edinga amathuba okuphambanisa ubungane bethu loJehova. (1 Phet. 5:8) Nxa singayekela ukunanzelela, uSathane angafaka engqondweni zethu lasezinhliziyweni zethu inhlanyelo yomona, ukungathembeki, ubuhwaba ukuzonda abanye, ukuzikhukhumeza kanye lokubamba izikhwili. (Gal. 5:​19-21) Nxa singayekela ukuyisiphuna masinyane izaqhubeka ikhula njengesihlahlakazana esibulalayo besekubangela ukuthi thina siphambuke. (Jak. 1:​14, 15) Eyinye ingozi ecatshileyo okumele siyibalekele yikuba labangane abangayisibo. Kumele sikhumbule ukuthi sicina silingisela abantu esitshona labo. (1 Khor. 15:33) Nxa sinanzelela indlela esenza ngayo asisoze sijayelane labantu abangalandeli izimiso zikaJehova. (Luk. 21:34; 2 Khor. 6:15) Sizabona ingozi besesiyibalekela. w23.02 16 ¶7; 17 ¶10-11

Usumthanda uJehova ngoba usufunde okunengi ngaye. Akulambuzo ukuthi uyafuna ukuba ngumngane wakhe lokuthi ufuna ukuthi ubungane lobu buqhubeke kuze kube nini lanini. Kungenzakala sibili ukuthi ube ngumngane wakhe. UJehova uze akucele ukuthi wenze inhliziyo yakhe ithokoze. (Zaga. 23:​15, 16) Okukhulumayo lokwenzayo kungenza uJehova athokoze. Nxa umthanda ngenhliziyo yonke uJehova kuzakhanya ngendlela ophila ngayo. Le yinto enhle kakhulu okumele uzimisele ukuyenza. Ungatshengisa njani ukuthi uyamthanda uJehova? Okokuqala, kulomthandazo oqakathekileyo okumele uwenze. Emthandazweni lo uyabe utshela uNkulunkulu weqiniso ukuthi usuzinikele kuye. (Hubo. 40:8) Okwesibili okumele ukwenze yikubhabhathizwa, lapha uyabe usutshengisa abanye ukuthi usuzinikele kuNkulunkulu. Ukubhabhathizwa yinto enhle kakhulu ongayenza ngoba kuzayitshintsha sibili impilo yakho. Phela uyabe ungasaziphileli wena kodwa usuphilela ukwenza intando kaJehova. (Rom. 14:8; 1 Phet. 4:​1, 2) Ukukhetha ukubhabhathizwa yisinqumo esiqakatheke kakhulu ongasenza kodwa ungesabeli khatshana ngoba uyabe ukhethe impilo engcono kulazo zonke. w23.03 5-6 ¶14-15