October

Sonke singahlanganyela emihlanganweni yebandla ngokuhlabela langokunika izimpendulo ezilungiselelwe kuhle. Abanye kubathwalisa nzima ukuhlabela lokuphendula emihlanganweni. Wena-ke? Nxa lawe kukuthwalisa nzima, ukufunda ukuthi abanye benzeni kuzakunceda. Endabeni yokuhlabela, abanye babone ukuthi ukuhlabela ngenhliziyo yonke kubancedile. Isizatho esiqakathekileyo esenza sihlabele izingoma zoMbuso emihlanganweni yethu yikuthi sifuna ukudumisa uJehova. Yikho nxa ulungiselela imihlangano lungiselela lezingoma ezizahlatshelwa njalo uzame ukubona ukuthi amazwi azo ahambelana njani lalokho okuzafundwa emhlanganweni. Kanti njalo cabangisisa ngamazwi engoma, ungakhathazeki kangako ngendlela ohlabela ngayo. Ukuphendula emihlanganweni yebandla kwabanye kunzima. Kuyini ongakwenza? Zama ukuhlala uphendula. Khumbula ukuthi uyabe ungaphambanisanga nxa impendulo yakho ingaba mfitshane, ibe lula futhi iphendula khona kanye okubuziweyo. UJehova uyathokoza nxa esibona sizama ukuphendula emihlanganweni yebandla. w22.04 7-8 ¶12-15

Ibala elithi ‘umsizi’ elisevesini le litsho umuntu ogijimela ukuyanceda omunye okhalela uncedo. Akumbone uJehova egijimela ukuncedisa umuntu osebunzimeni. Lokhu kutshengisa ukuthi uzimisele njalo uyafuna sibili ukusincedisa. Nxa uJehova elathi singenelisa ukuqinisela sithokoza. Yiziphi ezinye indlela uJehova asincedisa ngazo? Ukuze sithole impendulo yombuzo lo asihloleni ibhuku lika-Isaya ngoba iziphrofetho ezinengi umphrofethi lo aphefumulelwa ukuthi azibhale ziyasebenza ezincekwini zikaJehova lamuhla. Kanti njalo nxa u-Isaya ekhuluma ngoJehova, ujayele ukusebenzisa amabala azwisiseka lula. Ngokwesibonelo, asihloleni ulimi olumnandi alusebenzisa kusahluko 30. Esahlukweni leso uyasitshela indlela uJehova asincedisa ngayo ngokulalela langokuphendula imithandazo yethu, ngokusikhokhela langokusinika izibusiso khathesi lasesikhathini esizayo. w22.11 8 ¶2-3

UJesu watshela amaKhristu ayesebandleni leSimina leleFiladelifiya ukuthi angakwesabi ukuhlukuluzwa njengoba ayezathola umvuzo nxa engahlala ethembekile. (Isam. 3:10) Lathi kumele silindele ukuthi sizahlukuluzwa njalo sizimisele ukuqinisela. (Mat. 24:​9, 13; 2 Khor. 12:10) Ibhuku leSambulo lisitshela ukuthi abantu bakaNkulunkulu bazahlukuluzwa ‘ngosuku lweNkosi’ okutsho isikhathi esiphila kuso. (Isam. 1:10) Isahluko 12 sebhuku leli sisitshela ukuthi kwaba lempi ezulwini uMbuso kaNkulunkulu usanda kubekwa. UMikhayeli okutsho uJesu Khristu okhazinyulisiweyo, kanye lengilosi zakhe balwa loSathane kanye lamadimoni akhe. (Isam. 12:​7, 8) Izitha zikaNkulunkulu zanqotshwa futhi zaphoselwa phansi emhlabeni njalo zabangela ukuhlupheka kuwo.—Isam. 12:​9, 12. w22.05 5 ¶12-13

UJehova uhlala esahlulela kuhle. Kabandlululi ngitsho. Kathetheleli kusiya ngokuthi umuntu ukhangeleka njani, unothe kangakanani, udumile yini kumbe ukuthi uleziphiwo bani. (1 Sam. 16:7; Jak. 2:​1-4) Akulamuntu ongambamba ngamandla kumbe amfumbathise ukuthi amthethelele. Kenzi isinqumo ngokucaphuka kumbe ngokuthi uzizwa njani ngalowo muntu. (Eks. 34:7) Kuyazikhanyela ukuthi uJehova nguMahluleli ongcono kulabo bonke ngenxa yokuthi ukwazi konke ngathi langesimo esikuso. (Dute. 32:4) Ababhala iMibhalo YesiHebheru bananzelela ukuthi indlela uJehova athethelela ngayo ayifanani leyabantu. Ngezinye izikhathi babesebenzisa ibala lesiHebheru elinye ibhuku elithi lisetshenziswa kuphela nxa kukhulunywa ngendlela emangalisayo uNkulunkulu athethelela ngayo abantu, hatshi nxa kukhulunywa ngokuxolelana kwabantu okungatsho lutho nxa kuqathaniswa lokwakhe. UJehova nguye yedwa olamandla okumthethelela ngokupheleleyo umuntu ophendukayo. w22.06 4 ¶10-11

Nxa ukhulisa abantwana uwedwa kumbe ulomkakho ongasoFakazi, ungathandabuzi ukuthi okwenzayo kuyabakhuthaza futhi kuyabanceda kakhulu abanye. Ungenzani nxa umntanakho ekhanya angani kazimiselanga ukukhonza uJehova? Hlala ukhumbula ukuthi ukufundisa umntwana kuthatha isikhathi. Nxa ungahlanyela intanga uyabe uzibuza ukuthi kambe izamila yini icine isiyisihlahla esithela izithelo. Lanxa ungelamandla okusikhulisa, uyaqhubeka usithelela ulethemba lokuthi sizaze sikhule. (Mak. 4:​26-29) Ngendlela efananayo lawe njengomama mhlawumbe uyazibuza ukuthi lokho okwenzayo kuyabanceda yini abantwabakho ukuthi bafunde ngoJehova. Awulamandla okukhetha ukuthi abantwabakho bazakwenzani nxa sebekhulile. Kodwa nxa ungaqhubeka usenza konke okusemandleni akho ukuthi ubafundise ngoJehova, uzabanceda ukuthi babe lokholo oluqinileyo. w22.04 19-20 ¶16-17

Ngesikhathi uSolomoni esathembekile kuJehova, wayezibona ngendlela eqondileyo. Eqalisa ukubusa wavuma ukuthi kulezinto ayengenelisi ukuzenza njalo wacela uJehova ukuthi amncedise. (1 AmaKho. 3:​7-9) Wananzelela lokuthi ukuzigqaja kuyingozi. Kodwa ngokuhamba kwesikhathi wehluleka ukulandela iseluleko sakhe. Wazigqaja wekela ukulalela imithetho kaNkulunkulu. Ngokwesibonelo, omunye umthetho wawusithi inkosi engum-Israyeli kwakungamelanga ‘ithathe abafazi abanengi funa inhliziyo yayo idukiswe.’ (Dute. 17:17) USolomoni kawulalelanga umthetho lo njalo wazithathela abafazi abangu-700 labafazi beceleni abangu-300. (1 AmaKho. 11:​1-3) Kungenzeka ukuthi uSolomoni wayecabanga ukuthi lokhu akusoze kumphambanise. Kodwa ngokuhamba kwesikhathi wazibonela ukuthi ukuhlamukela uJehova kubi.—1 AmaKho. 11:​9-13. w22.05 23 ¶12

Lamuhla bonke abantu kumele bakhethe ukuthi bazamukela uJehova uNkulunkulu njengoMbusi wendawo wonke yini kumbe bazasekela uSathane uDeveli oyisitha sakhe esilolunya. Lokho abazakukhetha yikho okuzatsho ukuthi bazathola ukuphila okungapheliyo yini kumbe bazabhujiswa. (Mat. 25:​31-33, 46) Ngesikhathi ‘sokuhlupheka okukhulu’ izinceku zikaJehova ezithembekileyo zizafakwa uphawu lokusinda. (Isam. 7:14; 14:​9-11; Hez. 9:​4, 6) Kodwa labo abayabe belophawu lwesilo bazabhujiswa. Nxa ukhethe ukusekela ubukhosi bukaJehova ukhethe kuhle. Usuzimisele ukuncedisa abanye ukuthi labo bakhethe kuhle. Izibusiso zizatholwa yilabo abasekela ubukhosi bukaJehova. Kumele sifunde ngazo izinto lezi eziqakathekileyo. Nxa singakwenza lokhu sizazimisela ukuqhubeka sikhonza uJehova. Kanti njalo sizenelisa ukuncedisa abanye ukuthi bakhethe ukumkhonza njalo baqhubeke bemkhonza. w22.05 15 ¶1-2

Kumele silalele uJehova hatshi izitha zethu. UJobe walalelisisa ngesikhathi uJehova ekhuluma laye. UNkulunkulu wabonisana loJobe futhi kwakungani uthi: ‘Ngikwazi konke okwenzakale kuwe. Ubona angani ngingehluleka yini ukukunakekela?’ UJobe wathobeka waphendula uJehova etshengisa ukuthi uyambonga sibili ngobuhle bakhe. Wathi: “Izindlebe zami zasezizwile ngawe kodwa manje amehlo ami asekubonile.” (Jobe. 42:5) Kungenzeka uJobe wayelokhu esesilotheni, umzimba uphihlika izilonda ngesikhathi esitsho amazwi la. Lanxa kunjalo uJehova watshengisa ukuthi uyamthanda uJobe lokuthi wayembona engumuntu olungileyo. (Jobe. 42:7, 8) Lalamuhla abantu bangasithethisa njalo basiphathe angathi asibantu balutho. Bangakhuluma kubi ngathi kumbe ngenhlanganiso yethu. Endabeni kaJobe sifunde ukuthi uJehova uyasithemba ukuthi sizahlala siqotho kuye lanxa singehlelwa yibunzima. w22.06 24 ¶15-16

Lanxa kuzakuba lokuthokoza okukhulu ezulwini nxa iBhabhiloni Enkulu isitshabalalisiwe kukhona okunye okuthokozisayo okuzakwenzakala. (Isam. 19:​1-3) ‘Ngumtshado weMvana’ oyisenzakalo esiqakatheke kulazo zonke okukhulunywa ngazo ebhukwini leSambulo. Bonke abangu-144 000 bazabe sebesezulwini impi ye-Amagedoni ingakaqalisi. Kodwa umtshado weMvana awusoze ubekhona ngalesosikhathi. (Isam. 21:​1, 2) Uzabakhona ngemva kwempi ye-Amagedoni izitha zikaNkulunkulu sezitshabalalisiwe. (Hubo. 45:​3, 4, 13-17) Utshoni umtshado weMvana? Emtshadweni kuhlanganiswa indoda lomfazi yikho emtshadweni weMvana kuyabe kungani iNkosi uJesu Khristu itshada labangu-144 000 ‘abangumlobokazi’ wayo. Isenzakalo lesi esiqakathekileyo sitsho ukubekwa kukahulumende omutsha ozabusa umhlaba okweminyaka engu-1 000.—Isam. 20:6. w22.05 17 ¶11-13

UJesu wathi ezinsukwini zokucina wayezabeka ‘inceku ethembekileyo lehlakaniphileyo’ ukuthi isinike ukudla okusiqinisa ukholo. (Mat. 24:45) Umkhokheli wethu usebenzisa iqenjana lamadoda agcotshiweyo ukuze anike abantu bakaNkulunkulu kanye lalabo abalesifiso sokufunda iqiniso ‘ukudla ngesikhathi esifaneleyo.’ Amadoda la awaziboni engababusi bokholo lwabanye. (2 Khor. 1:24) Ayakwazi ukuthi uJesu Khristu nguye “umkhokheli lomlawuli” wabantu bakhe. (Isaya. 55:4) Kusukela ngo-1919, inceku ethembekileyo ibidinda amabhuku ancede abalesifiso sokufunda ngoJehova ukuthi bathole iqiniso eliseLizwini likaNkulunkulu. Ngo-1921 inceku yadinda ibhuku elithi The Harp of God ukuze kuncedwe labo abalesifiso sokufunda ukuthi balazi iqiniso leBhayibhili eliyisisekelo. Njengoba izikhathi zazitshintsha kwadindwa amanye. Wena yiliphi elakunceda ukuthi umazi njalo umthande uBaba wethu osezulwini? w22.07 10 ¶9-10

Akulamuntu ophanayo njengoNkulunkulu wethu uJehova. Kungelani lokuthi wena umnikeni, yena uzahlala ekunika okunengi kakhulu ukwedlula lokho omnike khona. (Mak. 10:​29, 30) UJehova uzakwenza ukuthi uyikholise impilo, usuthiseke njalo uthokoze lanxa siphila emhlabeni lo omubi. Kodwa akupheleli lapho. Ungenelisa ukukhonza uNkulunkulu wethu esimthandayo kuze kube nini lanini. Uzaqhubeka usondela kakhulu kuBaba wethu osezulwini. Kanti njalo uzaphila kuze kube nini lanini njengaye. Kulesinye isibusiso ositholayo nxa ungazinikela kuNkulunkulu ubusubhabhathizwa. Nxa ungakhonza uMdali wezulu lomhlaba futhi uhlale uqotho kuye, uyabe umnika into eligugu kakhulu angelayo. (Jobe. 1:8; 41:11; Zaga. 27:11) Akula eyinye into ongayenza engcono empilweni ngaphandle kokukhonza uJehova. Phela zonke izipho ezinhle lezikwenza uthokoze zivela kuye. w23.03 6 ¶16-17

Ngesikhathi usakhula isifiso sokuya emacansini siyabe silamandla futhi abanye bengazama ukukwenza ukuthi ufebe. Lokhu yikho kanye uSathane afuna ukwenze. Pho kuyini okungakunceda ukuthi ubalekele ukuziphatha okubi? (1 Thes. 4:​3, 4) Thandaza utshele uJehova indlela ozizwa ngayo futhi umcele akunike amandla. (Mat. 6:13) Hlala ukhumbula ukuthi uJehova ufisa ukukuncedisa hatshi ukukwahlulela. (Hubo. 103:​13, 14) Ungazami ukulungisa inhlupho zakho uwedwa. Tshela abazali bakho okukuhluphayo. Akulula ukukhuluma ngendaba ezinje kodwa kuqakathekile ukukhuluma ngazo. Ukubala iBhayibhili lokucabangisisa kuzakunceda ukuthi wenze izinqumo ezithokozisa uJehova. Awusoze ukhangelele ukuphiwa imithetho kuzo zonke izinto ozenzayo ngoba uyabe usuzwisisa indlela uJehova abona ngayo izinto. w22.08 5 ¶10-12

Inhloko engumKhristu iyawuqakathekisa umsebenzi wokunakekela imuli yayo. Nxa uyinhloko yemuli ungabe ukhathazekile ngokuthi lizakudlani lokuthi lizayibhadalela ngani indlu elihlala kuyo. Kungenzakala uyesaba ukuthi nxa ungaphelelwa ngumsebenzi awusoze uwuthole omunye. Engxenye uyathikaza ukwenza utshintsho emsebenzini wakho usesaba ukuthi awusoze wenelise ukuphila ngemali encane. USathane usebenzise ukwesaba lokhu ukuze enze abanengi bayekele ukukhonza uJehova. USathane ufuna ucabange ukuthi uJehova kalandaba lawe lokuthi uzazibonela ukuthi uzayinakekela njani imuli yakho. Lokhu kungenza ucabange ukuthi kumele wenze loba yini ongayenza ukuze ungaphelelwa ngumsebenzi lanxa lokho kungatsho ukungalaleli okutshiwo liBhayibhili. w22.06 15 ¶5-6

Siyakwazi ukuthi uNkulunkulu wethu ‘ulesihawu lomusa, uyaphuza ukuthukuthela, ugcwele uthando lobuqotho.’ (Eks. 34:6) UJehova uthanda ukwahlulela kuhle. (Isaya. 61:8) Uzwa ubuhlungu nxa esibona sihlupheka futhi ukulindele ukuqeda bonke ubuhlungu ngesikhathi sakhe esifaneleyo. (Jer. 29:11) Lathi sisilindele ngabomvu isikhathi lesi futhi lokho ngokunye okwenza simthande uJehova. Yisiphi esinye isizatho esenza silithande iqiniso? Iqiniso eliseBhayibhilini ligoqela ithemba lethu lesikhathi esizayo. Ithemba lethu linjengesikhonkwane esibamba umkhumbi ngoba lenza sime siqine singanyikinyeki nxa sihlangana lenhlupho. Embhalweni walamuhla, umphostoli uPhawuli wayekhuluma ngethemba amaKhristu agcotshiweyo alalo elokuyabusa ezulwini kodwa amazwi akhe ayasebenza lakumaKhristu alethemba lokuphila emhlabeni olipharadayisi. (Joh. 3:16) Ukufunda ngethemba lokuthola ukuphila okungapheliyo kwenza siphile impilo ethokozisayo sibili. w22.08 14-15 ¶3-5

Awungeke uthembe umuntu nxa ungamthandi. U-1 Khorinte isahluko 13 ukhuluma ngezinto ezitshiyeneyo ngothando ezingasinceda ukuthi sibathembe abanye lokuthi siphinde sibathembe nxa besidanisile. (1 Khor. 13:​4-8) Uvesi 4 uthi “uthando luyabekezela njalo lulomusa.” UJehova uyasibekezelela lanxa simonela. Yikho lathi kumele sibabekezelele abafowethu nxa bekhuluma loba besenza izinto ezisizwisa ubuhlungu. Uvesi 5 uthi: ‘[Uthando] alucaphuki njalo alugcini izikhwili.’ Yikho asifuni ukuthi kusasa siphinde sibathonisise abazalwane. UmTshumayeli 7:9 uthi akumelanga ‘siphangise ukuzonda.’ Zama ukubona abafowenu labodadewenu ngendlela uJehova ababona ngayo. UNkulunkulu uyabathanda futhi kahlali ekhumbula izono zabo. Lathi kumele simlingisele. (Hubo. 130:3) Kulokuthi sihlale silandelela amaphutha abo kumele sibone okuhle abakwenzayo.—Mat. 7:​1-5. w22.09 3-4 ¶6-7

Ibhuku likaDanyeli likhuluma ngezinto ezizakwenzakala ngesikhathi sokuphela. Ngokwesibonelo uDanyeli 12:1 ukhuluma ngokuthi uMikhayeli okutsho uJesu Khristu ‘uyabamela abantu [bakaNkulunkulu].’ Isiphrofetho lesi saqalisa ukugcwaliseka ngo-1914 ngesikhathi uJesu ebekwa ukuthi abe yiNkosi yoMbuso kaNkulunkulu. UDanyeli watshelwa lokuthi uJesu ‘wayezasukuma ngesikhathi sokuhlupheka esingakaze sibe khona selokhu kwadabuka izizwe kuze kube yilesosikhathi.’ Lesi yiso isikhathi ‘sokuhlupheka okukhulu’ okukhulunywa ngaso kuMathewu 24:21. Nxa isikhathi lesi sokuhlupheka sesiphela, ngesikhathi se-Amagedoni, uJesu uzasukuma alwele abantu bakaNkulunkulu. Ibhuku leSambulo lithi abantu labo ‘balixuku elikhulu eliphuma ekuhluphekeni okukhulu.’—Isam. 7:​9, 14. w22.09 21 ¶4-5

Amabizo asebhukwini lokuphila kungenzeka ukuthi acitshwe. Kufanana lokuthi uJehova ubebhale amabizo la ngepenseli. (Isam. 3:​5, amabala angaphansi) Kumele sisebenze nzima ukuze amabizo ethu angacitshwa ebhukwini leli kuze kube angathi abhalwe ngepheni. Elinye iqembu elilamabizo abhalwe ebhukwini lokuphila libunjwa yilabo abakhethwe ukuthi bayebusa loJesu ezulwini. Umphostoli UPhawuli wathi ebhalela labo ayesebenza labo eFiliphi wathi amabizo abagcotshiweyo abakhethwe ukuthi bayebusa loJesu ezulwini asebhaliwe ebhukwini lokuphila. (Flp. 4:3) Kodwa kumele baqhubeke bethembekile ukuze amabizo abo angacitshwa ebhukwini leli. Bazathi sebefakwe uphawu okokucina amabizo abo azabe esebhalwe ngendlela yokuthi awasoze acitshwe ebhukwini leli. Lokhu kuzakwenzakala bengakafi loba sekuzaqalisa ukuhlupheka okukhulu.—Isam. 7:3. w22.09 14 ¶3; 15 ¶5-6

Ake sithi omunye umuntu ukuphekele ukudla okuthanda kakhulu. Kodwa ngenxa yokuthi udla uphangisa kumbe ulokunengi okucabangayo awukunambithi ukuze uzwe ukuthi kumnandi kangakanani. Usuqedile ukudla uyananzelela ukuthi udle uphangisa ubusufisa ukuthi ngabe udle kancane kancane wakukholisa konke ukudla okade ukufaka emlonyeni. Kunjalo langokufunda iBhayibhili. Nxa singalibala sigijima singehluleka ukukholisa esikubalayo. Zinike isikhathi eseneleyo sokulibala, ukubone ngelihlo lengqondo okubalayo, uwezwe amazwi akhulunywa ngabantu njalo ucabangisise ngokubalayo. Konke lokhu kuzakwenza uthokoze. UJesu wabeka “inceku ethembekileyo lehlakaniphileyo” ukuze isinike ukudla okuqinisa ukholo ngesikhathi esifaneleyo futhi asilambi. (Mat. 24:45) Konke inceku ethembekileyo esinika khona kuthethwe eMibhalweni ephefumulelweyo.—1 Thes. 2:13. w22.10 7-8 ¶6-8

IBhayibhili laxwayisa ukuthi ensukwini zokucina bazakuba banengi abantu abeyisayo. (2 Phet. 3:​3, 4) Abantu laba balandela “izinkanuko zabo zokungamesabi uNkulunkulu.” (Jud. 7, 17, 18) Singenzani ukuze singabi ngabantu abeyisayo? Okunye esingakwenza yikungabi lobudlelwano labantu abathanda ukweyisa. (Hubo. 1:1) Lokhu kutsho ukuthi asibali njalo asilaleli izinto ezivela kubahlamuki. Kumele sinanzelele ukuthi asibi lomkhuba wokusola kumbe owokuthandabuza lokho esikutshelwa nguJehova lenhlanganiso yakhe. Okungasinceda ukuthi singabi lohlupho lolo yikuzibuza, ‘Ngijayele ukusola yini nxa siphiwa iziqondiso ezintsha kumbe nxa indlela esesizwisisa ngayo indaba ethile ingatshintsha? Ngithanda ukusola labo abakhokhelayo yini?’ Nxa singaphangisa ukulungisa uhlupho olunjalo uJehova uzathokoza ngathi.—Zaga. 3:​34, 35. w22.10 20 ¶9-10

Umoya kaNkulunkulu waqinisa uHezekheli ukuthi enze umsebenzi wokutshumayeza abantu ‘abalenkani labayiziqholo.’ UJehova watshela uHezekheli wathi: “Lawe sengikwenze waba yisiqholo njengabo, ngenza lesiphaqa sakho saqina njengeziphaqa zabo. Isiphaqa sakho sengisenze saqina njengedayimana, saqina ukwedlula ilitshe elilukhuni. Ungabesabi futhi ungethuswa bubuso babo.” (Hez. 3:​8, 9) Ngamanye amazwi kwakungani uJehova utshela uHezekheli ukuthi, ‘Ungavumeli ubuqholo babantu laba bukuqede amandla, ngizakuqinisa.’ UJehova wathi esekhulume loHezekheli umoya wakhe waqhubeka umncedisa enkonzweni yakhe. UHezekheli wathi: “Umoya kaJehova wawusebenza ngamandla kimi.” Kwamthatha iviki yonke uHezekheli ukuthi afunde amazwi uJehova ayefuna awatshele abantu ngesibindi. (Hez. 3:​14, 15) UJehova wamtshela ukuthi aye emagcekeni ‘lapho umoya owafika khona kuye.’ (Hez. 3:23, 24) UHezekheli wayesekulungele ukuqalisa inkonzo yakhe. w22.11 4-5 ¶8-9

Umphrofethi uHabakhukhi wehlelwa zinhlupho ezinengi. Kukhanya angathi wake wathandabuza ukuthi uJehova ulendaba laye. Yikho wathandaza kuJehova emtshela indlela ayezizwa ngayo. UJehova wawuphendula umthandazo wenceku yakhe. (Hab. 2:​2, 3) UHabakhukhi waphinda wathokoza ngemva kokucabangisisa ngendlela uJehova ayesindise ngayo abantu bakhe. Wayengasathandabuzi ukuthi uJehova ulendaba laye lokuthi wayezamnceda ukuthi aqinisele kuloba yibuphi ubunzima. (Hab. 3:​17-19) Thina sifundani kulokhu? Nxa usebunzimeni thandaza kuJehova umtshele okukukhathazayo ubusuthembela kuye. Ungenza njalo uJehova uzakunika amandla owadingayo ukuze uqhubeke uqinisela. Nxa ungabona ukuthi uyakuncedisa ukholo lwakho luzaqina. Nxa ungaqhubeka usenza izinto ezikusondeza kuJehova awusoze uvumele ubunzima kumbe ukuthandabuza kukwehlukanise laye.—1 Thim. 6:​6-8. w22.11 15 ¶6-7

UJesu lezigebenga ezazibethelwe laye babefuthelwa sebezakufa. (Luk. 23:​32, 33) Izigebenga lezo zazikhuluma kubi ngaye. (Mat. 27:44; Mak. 15:32) Kodwa esinye satshintsha sathi: “Jesu, ungikhumbule nxa ufika eMbusweni wakho.” UJesu waphendula ngamazwi asembhalweni walamuhla. (Luk. 23:​39-42) Amazwi uJesu awatshela isigebenga esasesiphendukile kumele asenze sicabange ngokuthi impilo izabe injani ePharadayisi. Okungasinceda sicabangisise ngalokho yikuhlola ukuthi kwakunjani ko-Israyeli ngesikhathi kubusa iNkosi uSolomoni. Kwakulokuthula njalo singakhangelela ukuthi uJesu, yena omkhulu kuloSolomoni, uzaletha izibusiso ezinengi emhlabeni encediswa yilabo azabusa labo. (Mat. 12:42) Yikho kumele ‘abezinye izimvu’ benze okuthile ukuze baphile kuze kube nini lanini ePharadayisi.—Joh. 10:16. w22.12 8 ¶1; 9 ¶4

U-Isaya wenza sibe leqiniso lokuthi uJehova uzalalelisisa nxa sikhala kuye njalo uzaphangisa ukuphendula imithandazo yethu yokuncenga. Uphinda athi: “Uzakuphendula esanda kukuzwa nje.” Amazwi la aduduzayo asikhumbuza ukuthi uBaba wethu uzimisele njalo uyafuna sibili ukuncedisa labo abacela uncedo kuye. Lokhu kuyasinceda ukuthi siqinisele futhi sithokoze. UJehova uyayilalelisisa imithandazo yomuntu ngamunye. Kungani sisitsho njalo? Amazwi okuqala aku-Isaya isahluko 30 asebunengini ngoba uJehova ukhuluma labantu bakhe beliqembu. Kodwa akuvesi 19 asebunyeni ngenxa yokuthi lapha usekhuluma lomuntu munye ngamunye. U-Isaya uthi: ‘Awusoze ukhale loba sokutheni; uzakwenzela umusa, uzakuphendula.’ UJehova uBaba wethu osithandayo ulendaba lomuntu ngamunye futhi uyayilalela imithandazo yomuntu ngamunye.—Hubo. 116:1; Isaya. 57:15. w22.11 9 ¶5-6

Ukutshumayela lokufundisa lanxa sihlukuluzwa kusenza sithokoze futhi sibe lokuthula. Iziphathamandla ezingamaJuda zatshela abaphostoli ukuthi bayekele ukutshumayela kodwa amadoda la athembekileyo akhetha ukulalela uNkulunkulu. Aqhubeka etshumayela futhi umsebenzi lo wenza athokoza. (Imiseb. 5:​27-29, 41, 42) Nxa umsebenzi wethu ungasavunyelwa kumele siqaphele sibili nxa sitshumayela. Kodwa nxa singenza okusemandleni ethu sizaba lokuthula ngenxa yokuthi siyabe sithokozisa uJehova futhi sitshela abantu amazwi azakwenza bathole ukuphila. Lanxa izinto zingaze zibe nzima njani ungathandabuzi ukuthi ungaba lokuthula. Ngezikhathi ezinjalo kumele ukhumbule ukuthi ukuthula okudingayo yikuthula ongakuphiwa nguJehova kuphela. Thembela kuye nxa kungaba lomkhuhlane omemethekayo, kungaba lomonakalo loba nxa uhlukuluzwa. Hlala useduze lenhlanganiso yakhe. Hlala ucabanga ngezibusiso ezinhle ozazithola ngesikhathi esizayo. Ungenza njalo ‘uNkulunkulu wokuthula uzakuba lawe.’—Flp. 4:9. w22.12 21 ¶17-18

Lokhu kutsho ukuthi kumele senze okuthile, ngokwesibonelo sisebenze ngamandla ukuze singafukameli inzondo, singathukutheli futhi singabi lolaka. (Efe. 4:​31, 32) Kungani kungaba nzima? Ngenxa yokuthi siyabe sivela layo khatshana imikhuba le. Ngokwesibonelo iBhayibhili lithi abanye abantu ‘bazonda masinyane’ njalo ‘bayaphangisa ukuthukuthela.’ (Zaga. 29:22) Umuntu onjalo kumele aqhubeke ezama ngamandla ukutshintsha lanxa esebhabhathiziwe. (Rom. 7:​21-23) Thandaza kuJehova umcela ukuthi akuncedise ngomkhuba okuthwalise nzima ukuthi uwutshiye njalo ungathandabuzi ukuthi uzawuzwa umthandazo wakho akuncedise. (1 Joh. 5:​14, 15) Lanxa uJehova engasoze akususele umkhuba lo ngendlela eyisimangaliso angakuqinisa ukuze uqhubeke ulwisana lawo. (1 Phet. 5:10) Izenzo zakho kumele zihambelane lalokho okuthandazelayo njalo ungenzi izinto ezizakwenza ukuthi ubuyele emkhubeni olwisana lawo. Kanti njalo nxa izifiso ezingayisizo zingabuya engqondweni zisuse masinyane.—Flp. 4:8; Kol. 3:2. w23.01 10 ¶7, 9-10

Enye indlela esitshengisa ngayo ukuthi siyabathanda abanye yikukhuthala emsebenzini wokutshumayela. Kumele sitshumayeze loba ngubani esihlangana laye kungelani lokuthi ngumhlobo bani, ngowasiphi isizwe futhi kungelani lokuthi ngumyanga kumbe unothile, ukuthi ufundile kumbe kafundanga. Nxa sisenza njalo siyabe sisenza intando kaNkulunkulu, ofuna “abantu bemihlobo yonke basindiswe njalo bathole ulwazi oluqondileyo lweqiniso.” (1 Thim. 2:4) Enye indlela esitshengisa ngayo ukuthi siyamthanda uNkulunkulu loKhristu yikuthanda abafowethu labodadewethu. Asibalahli njalo siyabancedisa nxa besebunzimeni. Siyabaduduza nxa bengafelwa, sibavakatshele nxa begula futhi senza konke okusemandleni ethu ukuthi sibakhuthaze nxa bedanile. (2 Khor. 1:​3-7; 1 Thes. 5:​11, 14) Siqhubeka sibathandazela sikhumbula ukuthi “umthandazo womuntu olungileyo okhuleka encenga ulamandla futhi uyanceda kakhulu.”—Jak. 5:16. w23.01 28-29 ¶7-8

Singathuthukisa indlela esakha ngayo abafowethu labodadewethu njengoba nje umuntu oyakhayo uyabe elokhu ethuthukisa indlela akha ngayo nxa eqhubeka esenza umsebenzi wakhe. Singancedisa abanye ukuthi baqinisele ebunzimeni ngokubatshela ngabanye abantu abaqiniselayo ebunzimeni. (Heb. 11:​32-35; 12:1) Singenza kube lokuthula ngokukhuluma ngokuhle okwenziwa ngabanye, langokungavumeli loba yini iphambanise ukuthula okusebandleni futhi silungise ukungazwanani okungabakhona. (Efe. 4:3) Singaqhubeka sisakha ukholo lwabafowethu labodadewethu ngokuxoxa labo ngezinto eziseBhayibhilini, ngokubancedisa ngendlela ezitshiyeneyo langokukhuthaza labo asebedonsa nzima ekukhonzeni. Lathi sizathokoza futhi sisuthiseke nxa singancedisa emsebenzini wokwakha ukholo lwabafowethu labodadewethu. Izakhiwo ezakhiwayo zingadilika ngokuhamba kwesikhathi kodwa umsebenzi wokwakha labo esikhonza labo uzahlala kuze kube nini lanini. w22.08 22 ¶6; 25 ¶17-18

UJesu wakhuluma ngokuthi kuqakathekile ukuthi sibe ngabantu abaqedisisayo ukuze sizwisise lokho esikubala eLizwini likaNkulunkulu. (Mat. 24:15) Kuyini ukuqedisisa? Yikwenelisa ukuzwisisa ukuthi umcijo othile uhambelana njani lomunye, ukuthi utshiyana njani lomunye kanye lokubona okungangale kwalokho okubalayo. UJesu wathi kumele sibe ngabantu abaqedisisayo ukuze sizwisise izenzakalo ezigcwalisa isiphrofetho esiseBhayibhilini. Kumele sibe lokuqedisisa ukuze sithole okunengi nxa sibala iBhayibhili. UJehova unika izinceku zakhe ukuqedisisa. Yikho thandaza kuye umcele ukuthi akuncedise ukuthi ube lakho. Ungatshengisa njani ukuthi uyafuna sibili ukuthi uNkulunkulu akuncedise? Hlolisisa okubalayo njalo ukhangele ukuthi kuhambelana njani lalokho okwaziyo. Bona ukuthi okubala eBhayibhilini kutshoni lokuthi ungakusebenzisa njani empilweni yakho. (Heb. 5:14) Ungabala uqedisisa uzayizwisisa ngcono iMibhalo. w23.02 10 ¶7-8

Ake sithi umngane wakho ukunike indlu kodwa isixexebuke ipenda futhi ilemkenke njalo ilamaphayiphi avuzayo. Lanxa kunjalo, nxa ubungayithenga indlu leyo iyabe idula okwamagama. Akuthandabuzwa ukuthi ubungambonga umngane wakho futhi uyigcine kuhle. UJehova laye usinike isipho sokuphila esiligugu. Wanikela ngeNdodana yakhe ukuthi isihlawulele, okutshengisa ukuthi uyakuqakathekisa kakhulu ukuphila kwethu. (Joh. 3:16) UJehova nguye osinika ukuphila. (Hubo. 36:9) Umphostoli uPhawuli wakuveza lokhu lapho esithi: “Siyaphila, siyahamba futhi sikhona ngenxa yakhe.” (Imiseb. 17:​25, 28) Yikho kuqondile ukuthi sithi ukuphila yisipho esivela kuNkulunkulu. Utshengisa ukuthi uyasithanda ngokusinika lokho esikudingayo ukuze siqhubeke siphila. (Imiseb. 14:​15-17) Kodwa uJehova kenzi izimangaliso ukuze avikele impilo zethu. Ukhangelele ukuthi senze konke esingakwenza ukuze sihlale siphilile emzimbeni njalo siqinile ekukhonzeni.—2 Khor. 7:1. w23.02 20 ¶1-2

Siyambonga kakhulu uJehova ngoba wasinika iBhayibhili. Usebenzisa iBhayibhili ukuze asinike amacebo angasinceda silwisane lenhlupho esihlangana lazo lamuhla. Kanti njalo usithembisa ikusasa elihle. Okuqakatheke kakhulu uJehova akwenzileyo yikusifundisa ngobuntu bakhe esebenzisa iBhayibhili. Ukucabangisisa ngobuntu bakhe obuhle kuyasithinta kwamancane besekusenza ukuthi sisondele kuye sibe ngabangane bakhe. (Hubo. 25:14) UJehova ufuna abantu bamazi. Kudala wayeziveza ebantwini esebenzisa amaphupho lemibono lezingilosi. (Nani. 12:6; Imiseb. 10:​3, 4) Kodwa sasingawazi njani amaphupho la lemibono kanye lemibiko evela ezingilosini aluba ayengabhalwanga phansi? Yikho uJehova wathi abantu ‘babhale phansi encwadini’ lokho ayefuna sikwazi. Singaba leqiniso lokuthi indlela le uNkulunkulu akhuluma ngayo lathi iqondile futhi iyasinceda ngoba “indlela kaNkulunkulu weqiniso iphelele.”—Hubo. 18:30. w23.02 2 ¶1-2

Hlela lokho ofuna ukukwenza. Khetha ukwenza izinto ezizaqinisa ukholo lwakho zikuncede uthuthuke. (Efe. 3:16) Zama ngamandla ukuhlala utaditsha lokubala iBhayibhili nsuku zonke. (Hubo. 1:​2, 3) Okunye ongakwenza yikukhuleka zikhathi zonke utshela uJehova konke okusenhliziyweni yakho. Kanti njalo khetha kuhle izinto ozibukelayo futhi usisebenzise kuhle isikhathi sakho. (Efe. 5:​15, 16) Ukuncedisa abanye kuzakunceda ukuthi uthuthuke. Ungahlela ukuncedisa abagugileyo labangaphilanga kuhle emzimbeni abasebandleni okulo. Ungahamba uyebathengela abakufunayo kumbe ubancedise bakwazi ukusebenzisa amafoni loba ama-tablet abo. Ungatshengisa lokuthi uyabathanda labo abangakhonziyo ngokubatshela izindaba ezinhle zoMbuso. (Mat. 9:​36, 37) Nxa kusenza hlela ukuba liphayona, ukusebenza eBhetheli kumbe emsebenzini wokwakha izakhiwo zenhlanganiso. w22.08 6 ¶16-17