Vuselela Ubungane Bakho LoJehova

MINYAKA yonke kulabafowethu labodadewethu abanengi abaligugu ababuyiselwa ebandleni. Akuthandabuzwa ukuthi kuba ‘lentokozo enkulu ezulwini’ nxa ngamunye wabo ephenduka! (Luk. 15:7, 10) Nxa ungomunye wababuyiselweyo woba leqiniso lokuthi uJesu, izingilosi loJehova bayathokoza kakhulu ukukubona ubuyela ebandleni. Kodwa njengoba usuvuselela ubungane bakho loJehova ungahlangana lobunzima. Yibuphi obunye ubunzima ongahlangana labo njalo kuyini okungakunceda ukuthi ulwisane labo?

UBUNZIMA ONGAHLANGANA LABO

Abafowethu labodadewethu abanengi asebephendukile ebandleni bathwaliswe nzima yikudana okubangelwa yikuzisola. Mhlawumbe lawe uyayizwisisa indlela iNkosi uDavida eyayizizwa ngayo. Lanxa yayisixolelwe izono zayo yathi: ‘Izono zami ezinengi zenza ngikhathazeke kakhulu.’ (Hubo. 40:12, NWT; 65:3) Nxa umfowethu loba udadewethu esephendukile kuJehova, engahlala iminyaka eminengi elokhu ezithonisisa kumbe eyangeka ngalokho akwenzayo. U-Isabelle wahlala iminyaka edlula 20 esusiwe.a Wathi, “Kwangithwalisa nzima ukukwamukela ukuthi uJehova wayengangixolela.” Nxa ungadana, ubungane bakho loJehova bungaphinda buxege. (Zaga. 24:10, NWT) Zama ukuthi ungakuvumeli lokhu kwenzakale kuwe.

Abanye bangakhathazeka ngokuthi ngeke benelise ukwenza konke okumele bakwenze ukuze baphinde babe ngabangane bakaJehova abaseduze. Ngemva kokubuyiselwa ebandleni u-Antoine wathi: “Kwakungani sengiqala phansi ukuba nguFakazi ngoba okunengi ngasengikukhohliwe.” Abanye abazizwa ngalindlela bacina bengasazimiselanga ukwenza konke abangakwenelisa ekukhonzeni uJehova.

Ngokwesibonelo, umuntu olendlu edilizwe yisiphepho angazizwa ephela amandla nxa ecabanga ngomsebenzi osokumele awenze lokuthi kuzamthatha isikhathi esingakanani ukuthi ayilungise. Ngendlela efananayo nxa kuyikuthi ubungane bakho loJehova baphambaniseka ngenxa yokuthi wenza isono esikhulu, ungabona angani mkhulu kakhulu umsebenzi osekumele uwenze ukuze ubulungise. Kodwa ungakhathazeki, bakhona abazakuncedisa.

UJehova uthi: “Wozani khathesi silungisise izindaba phakathi kwethu.” (Isaya. 1:18, NWT) Ususebenze nzima ukuthi ‘ulungisise izindaba’ phakathi kwakho loJehova. UJehova uyakuqakathekisa lokho okwenzileyo. Umenze wenelisa ukuphendula lowo omeyisayo, uSathane.—Zaga. 27:11.

Ukubuyela kuJehova kwenze wasondela eduze kwakhe futhi laye uthembisa ukuthi uzasondela kuwe. (Jak. 4:8) Kuyathokozisa ukukubona uphenduka ebandleni kodwa kukhona okunye okusamele ukwenze. Kumele uqhubeke uqinisa uthando lwakho ngoJehova onguBaba loMngane wakho. Ungakwenza njani lokhu?

HLELA ONGENELISA UKUKWENZA

Zama ukuthi uhlele lokho ongenelisa ukukwenza. Kungenzeka usakukhumbula okunye owakufundayo mayelana loJehova kanye lezithembiso zakhe zePharadayisi. Kodwa kumele uvuselele ukwenza izinto eziphathelane lokukhonza ezigoqela ukutshumayela izindaba ezinhle, ukungena imihlangano yebandla lokuba lesikhathi sokuba ndawonye labafowenu labodadewenu. Ake sixoxe ngokunye ongahlela ukukwenza.

Hlala uthandaza kuJehova. UBaba wakho uyazwisisa ukuthi ukuhlala uzithonisisa ngephutha owalenzayo kungenza kube nzima ukuthi uthandaze kuye. (Rom. 8:26) Lanxa kunjalo ‘phikelela ekuthandazeni’ umtshela ukuthi uyafuna sibili ukulungisisa ubudlelwano bakho laye. (Rom. 12:12) U-Andrej ukhumbula lokho okwenzakala kuye esebuyiselwe, uthi: “Ngangizithonisisa kakhulu futhi ngizizwa ngiyangekile. Kodwa ngangisithi ngingathandaza ngisale sengisizwa ngcono futhi sengihlalisekile.” Nxa uswele ukuthi uthini emithandazweni yakho, bala imithandazo eyenziwa yiNkosi uDavida isiphendukile, etholakala kuHubo 51 lo-65.

Taditsha iBhayibhili nsuku zonke. Lokhu kuzakunceda ukuthi ube lokholo oluqinileyo futhi umthande kakhulu uJehova. (Hubo. 19:7-11) UFelipe uthi: “Ukungabi lohlelo lokubala iBhayibhili nsuku zonke lolokutaditsha kwenza ukholo lwami lwaxega ngacina sengiphambanisela uJehova. Ngangingafuni ukuphinda ngimzwise ubuhlungu yikho ngazimisela ukutaditsha sonke isikhathi.” Lawe ungenza okufananayo. Nxa ufuna ukuncediswa ukuthi ukhethe izihloko ongazibala, ungacela umngane oqinileyo ekukhonzeni ukuthi akuncedise.

Vuselela ubungane owawulabo labafowenu labodadewenu. Abanye ababuyela ebandleni bayakhathazeka ngokuthi abafowabo labodadewabo bangabe belokhe bebazondele. ULarissa uthi: “Ngangizizwa ngiyangekile futhi ngangibona ukuthi ngibazwise ubuhlungu abafowethu labodadewethu ebandleni. Ngahlala isikhathi eside ngizizwa ngalindlela.” Qiniseka ukuthi abadala bebandla kanye labanye bazimisele ukukuncedisa ukuthi uvuselele ubungane bakho loJehova. (Khangela ibhokisi elithi “Okungenziwa Ngabadala.”) Bayathokoza kakhulu ngokuthi usubuyiselwe ebandleni futhi bafuna uphumelele ekukhonzeni.—Zaga. 17:17.

Kuyini okungakunceda ukuthi ube lobudlelwano labanye ebandleni? Yikungena yonke imihlangano yebandla lokuphuma ekutshumayeleni labafowenu labodadewenu sonke isikhathi. Ukwenza njalo kuzakunceda njani? UFelix wathi: “Abafowethu labodadewethu babekulindele ngabomvu ukuthi ngibuyele ebandleni. Ngazizwa ngamukelekile. Bonke bangenza ngabona ukuthi ngililunga lebandla, ukuthi uJehova usengithethelele lokuthi ngingaqhubeka ngimkhonza.”—Khangela ibhokisi elithi “Ongakwenza.”

UNGAPHELI AMANDLA!

USathane uzaqhubeka ebangela ukuthi wehlelwe zinhlupho ukuze azame ukukuqeda amandla okuvuselela ubungane bakho loJehova. (Luk. 4:13) Hlala uzilungiselele ngokuqinisa ubungane bakho loJehova khathesi.

UJehova wathi ekhuluma ngezimvu zakhe wathembisa wathi: “Ngizadinga ezilahlekileyo nginqande eziphambukileyo. Ngizabopha ezilimeleyo ngiqinise ezibuthakathaka.” (Hez. 34:16) UJehova usencedise abafowethu labodadewethu abanengi ukuthi bavuselele ubungane babo laye. Ngakho qiniseka ukuthi ufuna ukukuncedisa lawe ukuthi uqhubeke uqinisa ubudlelwano bakho laye.

Okungenziwa Ngabadala

Kunengi abadala abangakwenza ukuze bancedise abamemezeli asebebuyele ebandleni ukuthi bavuselele ubungane babo loJehova. Nanku okunye abangakwenza.

Baqinisekise. Umphostoli uPhawuli wayekwazi ukuthi umuntu osebuyele ebandleni ‘angakhulelwa yikudana kakhulu.’ (2 Khor. 2:7) Angahlala ezithonisisa njalo edanile. Yikho uPhawuli wakhuthaza ibandla wathi: “Limthethelele ngesihle, limduduze.” Asebebuyiselwe ebandleni badinga ukuqinisekiswa ukuthi uJehova uyabathanda kakhulu lokuthi abafowabo labodadewabo bayabathanda. Nxa abadala bangahlala bebancoma futhi bebancedisa, bazabasiza ukuthi bangakhulelwa yikudana.

Thandaza labo. “Umthandazo womuntu olungileyo okhuleka encenga ulamandla futhi uyanceda kakhulu.” (Jak. 5:16) ULarissa esike sakhuluma ngaye uthi: “Ngatshela abadala engangikuthandabuza lalokho engangikwesaba. Bathandaza lami. Lokho kwangenza ngazwisisa ukuthi abadala babengangizondelanga. Babefuna ukungincedisa ukuthi ngivuselele ubungane bami loJehova.” UTheo uthi: “Imithandazo abadala abayenza belami yangenza ngaqiniseka ukuthi uJehova uyangithanda kakhulu lokuthi ubona okuhle engikwenzayo hatshi amaphutha kuphela.”

Woba ngumngane wabo. Asebebuyiselwe bayabadinga abangane ebandleni. Omunye umdala webandla okuthiwa nguJustin uthi: “Hlala uphuma labo ekutshumayeleni futhi ungayekeli ukubavakatshela emizini yabo. Kuqakatheke kakhulu ukuthi ube ngumngane wabo!” Omunye umdala okuthiwa nguHenry uthi, “Nxa abanye ebandleni bebona abadala besiba ngabangane lalabo asebebuyiselwe, labo bayazama ukwenza njalo.”

Bancedise ukuthi bataditshe. Umngane oqinileyo ekukhonzeni angancedisa lowo osebuyiselwe ebandleni ukuthi abe lohlelo oluhle lokutaditsha. Umdala webandla okuthiwa nguDarko uthi: “Ngithanda ukubaxoxela amagugu engiwathole ngesikhathi ngitaditsha ngingedwa njalo ngiyabatshela ukuthi ngiyakukholisa kakhulu ukutaditsha iBhayibhili. Ngezinye izikhathi ngiyahlela lokuthi sitaditshe ndawonye esinye isihloko esikhuthazayo.” Umdala okuthiwa nguClayton uthi: “Ngijayele ukubakhuthaza ukuthi badinge izindaba eziseBhayibhilini ezimayelana labantu abake baba sesimeni esifanana lesabo besebebona ukuthi bangafundani kubo.”

Woba ngumelusi omuhle. Ngesikhathi besuswa, ababuyiselweyo bababona abadala besenza umsebenzi njengabahluleli. Kodwa khathesi sekumele bababone bengabelusi. (Jer. 23:4) Yikho balalele nxa bekhuluma futhi uhlale ubancoma. Xoxa labo sonke isikhathi. Nanku okunye okujayele ukwenziwa ngumdala webandla okuthiwa nguMarcus nxa esenza umsebenzi wokwalusa: “Siyababalela umbhalo othile besesixoxa ngawo, sibancome njalo sibaqinisekise ukuthi siyazigqaja ngokusebenza kwabo nzima ukuze babuyele kuJehova lokuthi uJehova laye uyazigqaja ngabo. Nxa sesiqedile ukuxoxa labo siyahlela ukuthi sizaphinda sibavakatshele nini.”

a Amabizo asesihlokweni lesi atshintshiwe.