Ukuthuthukisa Indlela Esitshumayela Ngayo—Ukutshengisa Umuntu Indlela Yokufunda Ibhuku Elithi Okufundiswa LiBhayibhili

Kungani kuqakathekile? Kungenzakala ukuthi abantu abanengi kabazwisisi ukuthi siyabe sisitshoni nxa sisithi sicela ukufunda labo iBhayibhili mahala. Bangacabanga ukuthi kumele bajoyine iqembu elithile elabantu abafundayo kumbe bafunde i-course ethile. Kungaba ngcono ukutshengisa umuntu ukuthi sifunda njani iBhayibhili labantu kulokuthi siphongucela nje ukufunda laye. Ngemizuzu emilutshwana nje sime emnyango wakhe, singamtshengisa ukuthi ukufunda iBhayibhili kulula kangakanani futhi kwenza umuntu athole okunengi.

Indlela Yokukwenza:

Ngemva kokutsho ukuthi ungubani, buza umninimuzi ukuthi ukhathazekile yini ngekusasa.
Mtshele ukuthi abantu abanengi bakhathazekile njengaye, futhi ubusumtshengisa ikhasi elilesihloko esithi Okumunyethweyo elisebhukwini elithi Okufundiswa LiBhayibhili. Mchasisele ukuthi ibhuku leli lilezifundo ezizwisiseka lula ezitshengisa lokho okufundiswa liBhayibhili ngekusasa kanye lezinye izindaba. Ngemva kwalokho mbuze ukuthi yisiphi isihloko angafisa ukwazi okunengi ngaso.
Mnike ibhuku ubusumtshengisa isahluko asikhethileyo. Chasisa ukuthi imibuzo esekuqaliseni kwesahluko iphendulwa ezindimeni ezisesahlukweni leso.
Cela umninimuzi ukuthi abale indima yokuqala nxa ekhululekile ukuthi enze njalo. Buza umbuzo wendima leyo beselixoxa ngempendulo yombuzo lowo. Balani imibhalo egcizelela impendulo beselixoxa ngayo. Mtshengise ukuthi wena uyidwebele njani impendulo ebhukwini lakho.
Xoxani ngendima elandelayo, kodwa khathesi mcele ukuthi azame ukuphendula esebenzisa amazwi akhe.
Mncome, ubususenza amalungiselelo okuphenduka ukuze lizoqhubekela phambili ngesifundo leso.
Nxa kusenza, mtshengise ividiyo eku-jw.org ethi Kwenzakalani Esifundweni SeBhayibhili?

Zama Ukwenza Okulandelayo Kulinyanga:

Cela ukuthi uJehova akubusise njengoba uzama ukuqalisa isifundo seBhayibhili.—Flp. 2:13.
Zama ukutshengisa umuntu othile indlela yokufunda ibhuku elithi Okufundiswa LiBhayibhili, kumbe uzame ukuthi kwezinye izikhathi nxa usekutshumayeleni utshengise othile ividiyo ethi Kwenzakalani Esifundweni SeBhayibhili?