SINGAKUNQOBA NJANI UKUZONDANA

4 | Vuma Ukuncediswa Ngunkulunkulu Ukuze Unqobe Inzondo

Okufundiswa LiBhayibhili:

“Izithelo zomoya luthando, lokuthokoza, lokuthula, lokubekezela, lomusa, lobuhle, lokholo, lobumnene, lokuzibamba.” —KWABASEGALATHIYA 5:22, 23.

Ivesi Le Itshoni?

UNkulunkulu angasincedisa ukuthi sinqobe inzondo. Angasebenzisa umoya wakhe ongcwele ukuze asincede sibe lobuntu ebesingeke senelise ukuba labo. Kuqakathekile ukuthi sicele uJehova asincedise sinqobe inzondo kulokuthi sizame ukuyinqoba sisodwa. Nxa singenza njalo sizakuba njengoPhawuli owathi: “Ngilamandla okwenza zonke izinto ngenxa yalowo ongipha amandla.” (KwabaseFiliphi 4:13) Sizakwenelisa ukutsho amazwi abhalwa ngumhubi athi: “Usizo lwami luvela kuJehova.”—IHubo 121:2.

Ivesi Le Ingakunceda Njani?

“UJehova usengiguqulile ngoba angiseladlakela kodwa sengingumuntu olokuthula.”—UWALDO

Khuleka kuJehova ucele ukuthi akuphe umoya wakhe ongcwele. (ULukha 11:13) Mcele akuncedise ukuthi ube lobuntu obuhle. Funda ukuthi iBhayibhili lithini ngobuntu obungakunceda ukhiphe inzondo, obufanana lothando, ukuthula, ukubekezela lokuzibamba. Zama ukuthi ube lobuntu obunjalo futhi ube ngumngane walabo abazama ukwenza okufananayo. Abantu abanjalo ‘bangakukhuthaza ethandweni lasemisebenzini emihle.’—KumaHebheru 10:24; amabala angaphansi.

Okwake Kwenzakala Komunye:—UWALDO

Wanqoba Inzondo Lodlakela

UWaldo wakhula nzima kakhulu futhi lokho kwamenza waba lenzondo. Uthi: “Ngangijayele ukulwa labantu abathengisa izidakamizwa. . . . Ngelinye ilanga elinye iqembu lathenga enye indoda eyayivele isaziwa ukuthi iyingozi ukuthi ingibulale. Kodwa ngenelisa ukuphunyuka ngilenxeba elincane nje lokugwazwa.”

UWaldo kazange athabe lapho umkakhe eqalisa ukufunda iBhayibhili laboFakazi bakaJehova. Uthi: “Ngangibazonda oFakazi bakaJehova futhi ngangijayele ukubathethisa. Kodwa babengakaze bangiphendule kubi.”

Ngokuhamba kwesikhathi uWaldo laye waqalisa ukufunda iBhayibhili. Uthi: “Kwakungalula ukuthi ngisebenzise engangikufunda. Ngangicabanga ukuthi ngangingasoze ngenelise ukutshiya imikhuba yami emibi.” Kodwa lokho akufunda eBhayibhilini kwamnceda ukuthi atshintshe.

UWaldo uthi: “Ngelinye ilanga u-Alejandro owayengifundisa iBhayibhili wangicela ukuthi ngibale uGalathiya 5:22, 23. . . . U-Alejandro wangichasisela ukuthi uNkulunkulu nguye kuphela owayengangincedisa ukuthi ngitshintshe. Khonokho kwanginceda ngabona ukuthi ngangingenelisa ukutshintsha ubuntu bami!”

UWaldo wenelisa ukutshiya inzondo lodlakela ngoba wavumela uNkulunkulu ukuthi amncedise. Uthi: “Izihlobo zami kanye lalabo ababengabangane bami bayamangala nxa bebona ukuthi sengitshintshe kanganani.” Uqhubeka esithi: “UJehova usengiguqulile ngoba angiseladlakela kodwa sengingumuntu olokuthula.”