Isiphathamandla Sezempilakahle Sithi Ezokuxhumana Zingabalimaza Abasakhulayo—IBhayibhili Lithini?

Mhlaka 23 May ngo-2023, esinye isiphathamandla sikahulumende we-United States esibona ngezempilakahle sathi ezokuxhumana sezibaphambanise kakhulu abasakhulayo abanengi.

• “Ezokuxhumana ziyabanceda sibili abantwana labasakhulayo kodwa kulobufakazi obunengi obutshengisa ukuthi zingabaphambanisa.”—Social Media and Youth Mental Health: The U.S. Surgeon General’s Advisory, 2023.

Isiphathamandla lesi sakhuluma ngokunye okutholwe ngabanye bechwayisisa okutshengisa ukuthi kuyini okungenza ezokuxhumana zibe yingozi kwabasakhulayo.

• Sathi abasakhulayo abaleminyaka engu-12 kusiya ku-15 “abasebenzisa ezokuxhumana okwamahora adlula angu-3 ngelanga basengozini yokuhlulukelwa lokukhathazeka kakhulu.”

• Abasakhulayo abaleminyaka engu-14 “abasebenzisa kakhulu ezokuxhumana bacina bengasalali kuhle, bayahlukuluzwa ngabanye kwezokuxhumana, bacina sebezikhangelela phansi futhi behlulukelwa kakhulu. Lokhu kwenzakala kakhulu emankazaneni kulasebafaneni.”

Abazali bangabavikela njani abantwababo? IBhayibhili lilamacebo angabasiza.

Okungenziwa ngabazali

Hlolisisa. Umzali kumele akhangele abone ukuthi umntanakhe angazisebenzisa yini ezokuxhumana.

• Okutshiwo liBhayibhili: “Fundisa umntwana indlela okumele ahambe ngayo.”—IZaga 22:6

• Ukuze uthole okunengi bala isihloko esithi “Should My Child Use Social Media?”

Nxa ungamvumela umntanakho ukuthi asebenzise ezokuxhumana woba leqiniso lokuthi uyamncedisa ukuthi azisebenzise kuhle. Ungakwenza njani?

Vikela umntanakho ezintweni ezingamlimaza. Ncedisa umntanakho abekwazi ukuthi yiziphi izinto ezitholakala kwezokuxhumana ezingamlimaza.

• Okutshiwo liBhayibhili: “Lingaqali ukuxoxa ngobufebe langayo yonke imihlobo yokungcola loba ubuhwaba ngoba lokhu akubafanelanga abantu abangcwele. Akumelanga kube lokuziphatha okulihlazo, lenkulumo yobuthutha kanye lobuphoxo obulenhlamba.”—Kwabase-Efesu 5:3, 4

• Khangela isihloko esithi “Teaching Your Teenager Social Media Safety.”

Fakela umntanakho imingcele. Ngokwesibonelo ungatshela umntanakho ukuthi kumele angene nini kwezokuxhumana futhi angene okwesikhathi esinganani.

• Okutshiwo liBhayibhili: “Nanzelelani lingenzi njengabantu abangahlakaniphanga kodwa yenzani njengabahlakaniphileyo, lisisebenzise kuhle isikhathi senu.”—Kwabase-Efesu 5:15, 16.

• ebenzisa ividiyo yemidwebo yabopopayi ethi Sebenzisa Kuhle Ezempucuko ukuze uncedise umntanakho azwisise ukuthi kungani kumele kube lemingcele.