Thai Liang Lim/E+ via Getty Images
HLALA ULINDILE!
Umntanakho Usephanjaniswa Ngezokuxhumana Yini?—IBhayibhili Lingabanceda Njani Abazali?
“Abasakhulayo abanengi bakhathazekile kakhulu futhi sesinanzelele ukuthi izikhathi ezinengi lokhu kubangelwa yindlela abasebenzisa ngayo ezokuxhumana.”—UDr. Vivek Murthy, U.S. surgeon general, New York Times, June 17, 2024.
Manje abazali bangabavikela njani abantwababo ezingozini ezibangelwa yikusebenzisa ezokuxhumana (i-social media)? IBhayibhili lilamacebo angabanceda.
Okungenziwa ngabazali
Zwana ukuthi iBhayibhili lithini.
“Okhaliphileyo uyacabangisisa ngawo wonke amanyathelo akhe.”—IZaga 14:15.
Njengoba ukusebenzisa ezokuxhumana kungaba lezingozi, umzali uyabe engaphambanisanga nxa engayala ukuthi umntanakhe azisebenzise. Nxa uzanika umntanakho imvumo yokusebenzisa ezokuxhumana, woba leqiniso lokuthi uzalalela lokho omtshela khona endabeni le. Ngokwesibonelo ukuthi uzazisebenzisa okwesikhathi esinganani, ngobani azabe exoxa labo lokuthi kasoze acine ebukela kumbe alalele izinto ezizamphambanisa.
Ukuze uthole okunengi bala isihloko esithi “Ngimvumele Yini Umntanami Ukuthi Asebenzise Ezokuxhumana?” lesithi “Teaching Your Teenager Social Media Safety.”
“Lisisebenzise kuhle isikhathi senu.”—Kwabase-Efesu 5:16.
Nxa uzavumela umntanakho ukuthi asebenzise ezokuxhumana, kumele umnike imithetho yokuthi ayisebenzise njani uphinde umchasisele lokuthi imithetho leyo izamnceda njani. Ukuba lelihlo elibukhali kuzakunceda unanzelele ukuthi indlela umntanakho asebenzisa ngayo ezokuxhumana kayimphambanisi yini. Nxa ungabona kudingeka, ungesabi ukunciphisa isikhathi omvumele ukuthi asisebenzise kwezokuxhumana.
Sebenzisa ividiyo yemidwebo yabopopayi ethi Sebenzisa Kuhle Ezempucuko ukuze uncedise umntanakho azwisise ukuthi kungani limfakela imingcele ekusebenziseni ezokuxhumana.
Thola okunengi
IBhayibhili lithi siphila ‘ezikhathini ezinzima, okunzima ukuphila kuzo.’ (2 KuThimothi 3:1-5) Kodwa liphinda lisinike amacebo ahlala esinceda. Nxa ufuna ukuthola okunengi okukhulunywa liBhayibhili okunceda abazali labantwana, bala isihloko lesi.