बाइबलको दृष्टिकोण
के आकाशीय पिण्डहरूको कारण हाम्रो पृथ्वीको विनाश हुनेछ?
मार्च १२, १९९८ का दिन संसारभरिका अखबारहरूको मुख्य समाचार, टिभी तथा इन्टरनेटमा यो अशुभ समाचार थियो: “एक माइल [१.५ किलोमिटर] चौडा उल्का पृथ्वीमा ठोक्किने सम्भावना छ।” वैज्ञानिक तथा जनसाधारणले वास्तवमा त्यो कत्तिको खतरनाक हुनसक्छ भनेर अत्तालिंदै अड्कल काट्न थाले। त्यसरी ठोक्किने सम्भावना नगण्य छ भन्ने निष्कर्षमा खगोलविद्हरू पुगे।
तथापि, यस्तो गोलमालको बेला नयाँ सजगता देखा पऱ्यो। यु. एस. न्युज एण्ड वर्ल्ड रिपोर्ट-ले यसो भन्यो, “यस्तो गलत सूचना भयानक देखिए तापनि अचम्मको कुरा के हो भने, धेरै मानिसहरूलाई यो कुनै अचम्मको कुरै लागेन। हामी पृथ्वीका मानिसहरूले त्यस्तो प्रकारका वस्तुहरू हेर्ने र त्यसबारे केही गर्ने योजना बनाउनुपर्छ भन्ने धारणा एक दशकअघि अनौठो मानिन्थ्यो होला तर अहिले वैज्ञानिक तथा राजनीतिज्ञहरू त्यस्तो खतरा वास्तविक भए तापनि त्यत्तिको भयावह हुनेछैन भन्ठान्छन्।”
पृथ्वी परिक्रमा गर्ने बाटो वा त्यसको नजिकै हुर्रिरहेका करिब २,००० वटा आकाशीय पिण्डहरूले पृथ्वीमा विपत्ति ल्याउनसक्छन् भन्ने कतिपय खगोलविद्हरूको सोचाइ छ। अनुसन्धानकर्ताहरू भन्छन्, तिनीहरूमध्ये एकदमै सानो पिण्ड पृथ्वीमा ठोक्कियो भने पनि थुप्रै आणविक पदार्थहरू एकै चोटि विस्फोट भए जत्तिकै हुनेछ। त्यस्तो प्रहारले हाम्रो ग्रह, यहाँ बस्ने मानिस तथा जनावरहरूमा भयानक असर पार्नेछ।
त्यस्तो दुःखद् अनुमान र अध्ययनले वास्ता नगर्ने एउटा पक्ष छ र त्यो हो, ब्रह्माण्डको सृष्टिकर्ता यहोवा परमेश्वरको धारणा। (भजन ८:३; हितोपदेश ८:२७) उहाँले आफ्नो इच्छा र पृथ्वी तथा मानिसजातिको लागि उद्देश्य बाइबलमा स्पष्ट पार्नुभएको छ। के उहाँले आकाशीय पिण्डहरूद्वारा हाम्रो पृथ्वीको विनाश हुन दिनुहुनेछ?
ईश्वरीय नियन्त्रणमा रहेको ब्रह्माण्ड
यहोवा, ब्रह्माण्डको सर्वशक्तिमान् सृष्टिकर्ता हुनुभएकोले आकाशीय पिण्डहरू सञ्चालन गर्ने शक्तिमाथि पूरा नियन्त्रण गर्ने क्षमता उहाँसित छ भन्ने निष्कर्षमा पुग्नु व्यवहारिक हो। यहोवाले आफ्नो “समझ-शक्तिले . . . आकाशलाई त्यसको ठाउँमा राख्नुभयो” भनी बुद्धिमान राजा सुलेमानले लेखे। (हितोपदेश ३:१९) ‘आफ्नो बुद्धिले आकाशलाई फैलाउनुहुने’ परमेश्वर नै हुनुहुन्छ भनी अगमवक्ता यर्मियाले घोषणा गरे।—यर्मिया ५१:१५.
यहोवाले तारा, ग्रह, धूमकेतु, उल्कालगायत सबै आकाशीय पिण्डहरूको गतिलाई सञ्चालन गर्ने नियम तथा शक्तिहरूलाई क्रियाशील बनाउनुभएको छ। (यशैया ४०:२६) तथापि, उहाँले तारा तथा ग्रहहरूको उत्पत्ति र अन्त्यको चक्र पूरा गर्न सधैं हस्तक्षेप गर्नुहुन्न जस्तो देखिन्छ। यसैकारण कहिलेकाहीं आकाशीय पिण्डहरू एकअर्कासित ठोकिन पुग्छन्। हालैको एउटा उदाहरण हेर्ने हो भने, जुलाई १९९४ मा धूमकेतु शुमेकर-लेभी नाइनका टुक्राहरू बृहस्पति ग्रहमा ठोकिन पुगे।
मानिसहरू पृथ्वीमा बस्न थाल्नुभन्दा अघि अन्तरिक्षका ठूलठूला चट्टानहरू पृथ्वीमा ठोक्किएको भूतात्त्विक प्रमाणहरू छन्। तर अहिले आबाद भइसकेको पृथ्वीमा त्यस्तो घटना होला र? जस्तै १.५ किलोमिटर चौडा उल्का पृथ्वीमा ठोकियो भने के होला? खगोलविद् ज्याक हिल्सले अनुमान लगाएअनुसार हिरोशिमामा प्रहार गरिएको बमले भन्दा यसले लाखौं गुणा बढी धक्का पुऱ्याउनेछ। समुद्रमा प्रहार गरेको खण्डमा समुद्रका छालहरू उर्लिएर समुद्री किनारा जम्मै डुब्नेछ। हिल्स भन्छन्, “छेउछाउमा शहरहरू छन् भने पानीमा चुर्लुम्मै डुब्नेछ।“ त्योभन्दा पनि भयावह भयो भने सारा मानवजाति सखाप हुनेछ। यस्तो प्रकारको विपत्ति पृथ्वीको लागि सृष्टिकर्ताको इच्छासित कसरी मेल खान्छ? यहोवाको उद्देश्यमा यस ग्रहको विशेष स्थान छ भनी बाइबलले देखाउँछ।
हाम्रो पृथ्वी—यो बनाइनुको एउटा उद्देश्य छ
हाम्रो ग्रहबारे भजनरचयिता यसो भन्छन्: “स्वर्ग ता परमप्रभुकै हो। तर पृथ्वीचाहिं उहाँले मानिस जातिलाई दिनुभएको छ।” (भजन ११५:१६) यहोवाले “पृथ्वी रच्नुभयो र बनाउनुभयो। (उहाँले त्यो स्थिर गर्नुभयो, उहाँले त्यो व्यर्थको वस्तु सृष्टि गर्नुभएन, उहाँले त्यो आबाद गर्नलाई बनाउनुभयो।)” भनी यशैया वर्णन गर्छन्। (यशैया ४५:१८) पृथ्वी, यहोवाले मानिसजातिलाई दिनुभएको सम्पत्ति हो। हाम्रो सृष्टिकर्ताले ईश्वरभीरु मानिसहरूको लागि अनन्त भविष्य प्रदान गर्ने उद्देश्य राख्नुभएको हुँदा पृथ्वी सधैंभरि रहिरहनेछ। भजन १०४:५ हामीलाई यस्तो आश्वासन दिन्छ: “त्यो कहिल्यै नडग्मगाओस् भनेर, [यहोवाले] पृथ्वीको जग बसाल्नुभयो।”
हो, परमेश्वरले हाम्रो ग्रहमा केही भयानक विपत्तिहरू हुन दिनुभएको छ र त्यसले गर्दा थुप्रै मानिसहरूको ज्यान गएको छ। युद्ध, अनिकाल र महामारीजस्ता केही विपत्तिहरू पूर्णतया वा धेरथोर मानिसहरूको लोभ, मूर्खता र क्रूरताले गर्दा भएको हो। (उपदेशक ८:९) अर्कोतिर भुइँचालो, ज्वालामुखी विस्फोट, बाढी र आँधीबेह्रीजस्ता विपत्तिहरू प्राकृतिक प्रकोपका परिणाम हुन्। यस्ता विपत्तिहरू हुनुको कारण मानिसले राम्ररी बुझ्न सकेको छैन। परमेश्वरको सुरुको उद्देश्यअनुरूप नभएर अहिले मानिसहरू असिद्ध छन्, पापी छन्। फलस्वरूप, अहिले यस्ता प्राकृतिक प्रकोपहरूबाट हामीले व्यक्तिगत तवरमा ईश्वरीय सुरक्षाको आशा गर्न सक्दैनौं।
तथापि, पृथ्वीमा मानिसको अस्तित्वलाई गम्भीर खतरा आइपर्ने अवस्था भने यहोवाले हुन दिनुभएको छैन। मानिसको सृष्टि भएदेखि मानवजातिको अस्तित्वलाई खतरा पार्ने त्यस्तो कुनै प्राकृतिक प्रकोप भएको इतिहासमा पाइँदैन।a
मानिसजातिको बचाउ हुने ग्यारेन्टी दिइएको छ
सृष्टिकर्ताले मानव इतिहासको सुरुदेखि नै मानिसले “पृथ्वीमा भरिंदै र त्यसलाई आफ्नो वशमा पार्दै जाओस्” भन्ने उद्देश्य राख्नुभएको छ। (उत्पत्ति १:२८; ९:१) “धर्मात्माहरूले देश अधिकार गर्नेछन्, र त्यसैमा सधैंभरि रहन्छन्” भनी उहाँले प्रतिज्ञा गर्नुभएको छ। (भजन ३७:९, ११, २२, २९) आफ्नो प्रतिज्ञा यहोवा यसरी पुष्टि गर्नुहुन्छ: “मेरो उद्देश्य ठहर्नेछ, र म आफ्नो सबै इच्छा पूरा गर्नेछु।”—यशैया ४६:१०; ५५:११; भजन १३५:६.
आकाशीय पिण्डहरूको कारण पृथ्वीमा सानोतिनो विपत्ति पनि हुनेछैन भनी बाइबलले बताएको छैन। तथापि, आकाशीय पिण्डहरूको कारण पृथ्वी र मानिसजातिको लागि यहोवाको उद्देश्य भताभुंग हुनेछैन भनेर हामी ढुक्क हुनसक्छौं। बाइबलका प्रतिज्ञाहरूको आधारमा यस ग्रह सधैं आबाद भइरहनेछ र हो, मानवजाति सदा सर्वदाको लागि रहिरहनेछ भनेर पक्का हुनसक्छौं!—उपदेशक १:४; २ पत्रुस ३:१३.
[फुटनोट]
a नूहको समयमा भएको जलप्रलय ईश्वरीय न्याय गर्ने माध्यम थियो तर यहोवाले केही मानिस तथा जनावरहरूलाई जोगाउनुभयो।—उत्पत्ति ६:१७-२१.