परमेश्वरले हामीबाट चाहनुहुने कुरा सिक्न अरूलाई मदत गर्ने
“मलाई करै लागेको छ, किनकि सुसमाचार सुनाइनँ भनेता मलाई धिक्कार छ।”—१ कोरिन्थी ९:१६.
१, २. (क) हामी कुन द्विपक्षीय कार्यमा भाग लिएको यहोवा चाहनुहुन्छ? (ख) परमेश्वरको राज्यका प्रजाहरू हुन इमानदार हृदय भएका मानिसहरूले के सिक्नुपर्छ?
यहोवाले मानिसजातिलाई सुसमाचार दिन सक्नुहुन्छ। उहाँको एउटा राज्य छ र सबै मानिसहरूले त्यसबारे थाह पाओस् भन्ने चाहनुहुन्छ! हामीले यो सुसमाचार सुनेपछि अरूलाई पनि बताएको परमेश्वर चाहनुहुन्छ। यो द्विपक्षीय काम हो। प्रथमतः, हामीले परमेश्वरको राज्यको सुसमाचार घोषणा गर्नैपर्छ। “जगत्को अन्त[बारे]” भविष्यवाणी गर्नुहुँदा येशूले यसो भन्नुभयो: “राज्यको यो सुसमाचार सारा संसारमा सब जातिहरूलाई साक्षीको निम्ति प्रचार गरिनेछ, त्यसपछि अन्त हुनेछ।”—मत्ती २४:३, १४.
२ यस कार्यको दोस्रो पक्ष हो, परमेश्वरको राज्यको सन्देश स्वीकार्ने व्यक्तिहरूलाई सिकाउनु। आफ्नो पुनरुत्थानपछि येशूले चेलाहरूको ठूलो समूहलाई यसो भन्नुभयो: “यसकारण गएर सबै देशका जातिहरूलाई चेला बनाओ, र पिता, पुत्र र पवित्र आत्माको नाउँमा बप्तिस्मा देओ। जे जे मैले तिमीहरूलाई आज्ञा गरें, तिनीहरूलाई ती सबै गर्नालाई सिकाओ। र हेर, म सब दिन, अँ, जगत्को अन्तसम्म तिमीहरूका साथमा छँदैछु।’ ” (मत्ती २८:१९, २०) ‘ख्रीष्टले आज्ञा गर्नुभएका कुराहरू’ उहाँका आफ्ना कुराहरू थिएनन्; उहाँले अरूलाई परमेश्वरको आज्ञा पालन गर्न तथा उहाँका मागहरू पूरा गर्न सिकाउनुभयो। (यूहन्ना १४:२३, २४; १५:१०) अतः ‘ख्रीष्टले आज्ञा गर्नुभएका कुराहरू पालन गर्न’ अरूलाई सिकाउनु भनेको परमेश्वरले हामीबाट के चाहनुहुन्छ, त्यो सिक्न मदत दिनु पनि हो। परमेश्वरको राज्यको प्रजा हुन इमानदार हृदय भएका मानिसहरूले परमेश्वरका मागहरू पूरा गर्नैपर्छ।
३. परमेश्वरको राज्य भनेको के हो र यसले कुन कुरा पूरा गर्नेछ जसले गर्दा त्यो राज्यको सन्देश सुसमाचार हुन जान्छ?
३ परमेश्वरको राज्य के हो? अनि यसले त्यस्तो कुन कुरा पूरा गर्नेछ जसले गर्दा परमेश्वरको राज्य सन्देश सुसमाचार हुनेछ? परमेश्वरको राज्य एउटा सरकार हो जसले स्वर्गबाट शासन गर्नेछ। यो यहोवाको लागि असाध्यै मूल्यवान् कुरा हो किनभने यसद्वारा उहाँले आफ्नो नाउँ पवित्र पार्नुहुनेछ र त्यसमा लागेको सबै कलंक हटाउनुहुनेछ। स्वर्गमा जस्तै यस पृथ्वीमा पनि उहाँको इच्छा पूरा गर्न यहोवाले चलाउनुहुने माध्यम यही राज्य हो। त्यसैकारण येशूले परमेश्वरको राज्य आओस् भनी प्रार्थना गर्न सिकाउनुभयो र त्यसलाई जीवनमा प्राथमिकता दिन हामीलाई आग्रह गर्नुभयो। (मत्ती ६:९, १०, ३३) हामीले यहोवाको राज्यबारे अरूलाई सिकाउने कामलाई उहाँले कत्तिको महत्त्वपूर्ण ठान्नुहुँदो रहेछ, के तपाईंले बुझ्नुभयो?
चुनौती हो तर बोझ होइन
४. सुसमाचार प्रचार गर्ने हाम्रो दायित्व बोझ होइन भनी कसरी उदाहरणसहित बुझाउन सकिन्छ?
४ के यो सुसमाचार प्रचार गर्नु बोझ हो? पटक्कै होइन! उदाहरणका लागि: आफ्नो परिवारको लागि भौतिक कुराहरूको प्रबन्ध गर्नु बुबाको दायित्व हो। त्यसो नगर्नु भनेको मसीही विश्वासलाई इन्कार गर्नु बराबर हो। प्रेरित पावलले यसप्रकार लेखे: “कसैले आफू र विशेष गरी आफ्ना परिवारलाई पालन-पोषण गर्दैन भनेता त्यसले विश्वासलाई इन्कार गर्दछ, र विश्वास नगर्ने हरूभन्दा पनि खराब हुन्छ।” (१ तिमोथी ५:८) तर के त्यो दायित्व मसीही पुरुषको लागि बोझ हो? तिनी आफ्नो परिवारलाई प्रेम गर्छन् भने त्यो बोझ होइन किनभने तिनी त्यस्तो प्रबन्ध गर्न इच्छुक हुन्छन्।
५. प्रचार गर्नु तथा चेला बनाउनु दायित्व भए तापनि यसमा भाग लिन हामी किन हर्षित हुनुपर्छ?
५ त्यसरी नै, प्रचार गर्नु तथा चेला बनाउनु पनि त्यस्तो दायित्व हो जसमा हाम्रो जीवन निर्भर छ। पावलले यसो भने: “मलाई करै लागेको छ, किनकि सुसमाचार सुनाइनँ भनेता मलाई धिक्कार छ।” (१ कोरिन्थी ९:१६; तुलना गर्नुहोस् इजकिएल ३३:७-९) तथापि, हामी कर्तव्य पूरा गर्न मात्र नभई प्रेमको खातिर प्रचार गर्छौं। मुख्यतया हामी परमेश्वरलाई प्रेम गर्छौं तर हामी आफ्ना छिमेकीहरूलाई पनि प्रेम गर्छौं। र तिनीहरूले पनि सुसमाचार सुन्नु कत्तिको महत्त्वपूर्ण छ भनी हामीलाई थाह छ। (मत्ती २२:३७-३९) यसले तिनीहरूलाई भविष्यको आशा दिन्छ। उहाँको धार्मिक शासनको अधीनमा बस्न चाहनेहरूको अनन्त लाभको लागि चाँडै, परमेश्वरको राज्यले कुनै पनि प्रकारका अन्यायहरू हुन दिनेछैन, सबै प्रकारको शोषण हटाउनेछ, शान्ति र एकता पुनर्स्थापित गर्नेछ। के हामी त्यस्तो सुसमाचार अरूलाई सुनाउन हर्षित छैनौं र? रोमाञ्चित छैनौं र?—भजन ११०:३.
६. प्रचार गर्नु तथा चेला बनाउनु किन साँच्चै चुनौतीपूर्ण कार्य हो?
६ यसको साथसाथै प्रचार गर्नु तथा चेला बनाउनु साँच्चै एउटा चुनौती हो। सबै मानिस एकै प्रकारका हुँदैनन्। सबैलाई एउटै कुरामा चासो लाग्दैन र तिनीहरूका योग्यताहरू बेग्लाबेग्लै हुन्छन्। केहीले राम्रो शिक्षादीक्षा पाएका छन् भने कतिपयले थोरै मात्र शिक्षा हासिल गरेका छन्। पढ्नु भनेको कुनै समय मानिसहरूलाई असाध्यै मनपर्ने कुरा थियो तर अहिले मानिसहरू पढ्न झर्को मान्छन्। अधिकांश जनता साक्षर भएको घमण्ड गर्ने मुलुकमा समेत “पढ्न सक्ने तर पढ्न मन नलाग्ने” समस्या छ। त्यसोभए यस्तो बेग्लाबेग्लै पृष्ठभूमि तथा चासो भएका व्यक्तिहरूलाई परमेश्वरले हामीबाट चाहनुहुने कुरा सिक्न कसरी मदत दिनसक्छौं?—१ कोरिन्थी ९:२०-२३ तुलना गर्नुहोस्।
अरूलाई मदत गर्न पूर्णतया सुसज्जित
७. परमेश्वर हामीबाट के चाहनुहुन्छ भनी सिक्न अरूलाई मदत गर्न “विश्वासी र बुद्धिमान दासले” हामीलाई कसरी सुसज्जित बनाएको छ?
७ हामीसित सही साधन वा उपकरण छ भने चुनौतीपूर्ण कार्य गर्न सजिलो हुन्छ। आज कुनै कामविशेषको लागि उपयोगी साधन भोलिको आवश्यकताअनुरूप छाँटकाँट गर्नुपर्ने वा अर्कै औजारसमेत बनाउनुपर्ने हुनसक्छ। परमेश्वरको राज्य सन्देश घोषणा गर्न हामीले पाएको आज्ञाबारे पनि त्यसै भन्न सकिन्छ। वर्षौंको दौडान “विश्वासी र बुद्धिमान दास[ले]” हामीलाई जुन साधन चाहिएको थियो, त्यही प्रदान गरेको छ। ती हुन्, गृह बाइबल अध्ययन गर्नको लागि नै तयार पारिएका प्रकाशनहरू। (मत्ती २४:४५) यसप्रकार “हरेक जातिबाटको र सबै कुलको . . . र भाषा भाषाहरूको” मानिसहरूलाई मदत गर्न हामी सुसज्जित भएका छौं। (प्रकाश ७:९) मानिसहरूको बदलिंदो आवश्यकता पूरा गर्न समय समयमा थप साधनहरू पनि प्रदान गरिएका छन्। केही उदाहरणहरू विचार गरौं।
८. (क) “परमेश्वर सत्य ठहरिओस्” पुस्तकले बाइबल शिक्षा व्यापक बनाउन कस्तो भूमिका निर्वाह गऱ्यो? (ख) बाइबल अध्ययनको लागि १९६८ मा कुन पुस्तकको प्रबन्ध गरियो र यो विशेष उद्देश्यको लागि कसरी तयार पारिएको थियो? (ग) सत्य पुस्तकले चेला बनाउने कार्यमा कसरी मदत गऱ्यो?
८ बाइबल शिक्षाको प्रभावकारी माध्यमको रूपमा १९४६ देखि १९६८ सम्म “परमेश्वर सत्य ठहरिओस्” (अंग्रेजी) पुस्तक प्रयोग गरियो र ५४ भाषामा लगभग १,९२,५०,००० प्रतिहरू छापिए। अनन्त जीवनतर्फ डोऱ्याउने सत्य (अंग्रेजी) नामक पुस्तक १९६८ मा विमोचन भयो र जिज्ञासुहरूसित बाइबल अध्ययन गर्न वर्षौंसम्म प्रयोग गरियो अनि निकै प्रभावकारी पनि साबित भयो। पहिले पहिले यहोवाका साक्षीहरूसित वर्षौंसम्म अध्ययन गरेर पनि विद्यार्थीले बप्तिस्मा नलिनु कुनै अनौठो कुरा थिएन। तर आफूले सिकेका कुराहरू लागू गर्न विद्यार्थीलाई जुर्मुराउनु उक्त पुस्तकको उद्देश्य थियो। त्यसको परिणाम कस्तो भयो? यहोवाका साक्षीहरू—परमेश्वरको राज्यका उद्घोषकहरू (अंग्रेजी) पुस्तक यसो भन्छ: “सेप्टेम्बर १, १९६८ देखि सुरु भएर अगस्त ३१, १९७१ सम्म तीन सेवा वर्षको दौडान जम्मा ४,३४,९०६ जनाले बप्तिस्मा लिए। र त्यो संख्या त्यसअघि तीन सेवा वर्षको दौडान बप्तिस्मा लिनेहरूको संख्याभन्दा दुइ गुना बढी थियो!” सत्य पुस्तक विमोचन भएदेखि यसको वितरण एकदमै व्यापक भएको छ अर्थात् ११७ भाषामा १०,७०,००,००० भन्दा बढी।
९. सधैंभरि बाँच्न सक्नुहुन्छ पुस्तकको विशेष पक्ष के हो र यसले राज्य उद्घोषकहरूको संख्यामा कस्तो असर पाऱ्यो?
९ सन् १९८२ मा पार्थिव प्रमोदवनमा तपाईं सधैंभरि बाँच्न सक्नु हुन्छ पुस्तक, बाइबल अध्ययन गर्ने प्रमुख पुस्तक भयो। यस पुस्तकमा १५० भन्दा बढी चित्रहरू छन् र हरेक चित्रको छेउमा घतलाग्दा क्याप्सनहरू छन्। त्यसबाट चित्रले सिकाउन खोजेको बुँदा छोटकरीमै बुझ्न सकिन्छ। अक्टोबर १९८२ हाम्रो राज्य सेवकाई-ले (अंग्रेजी) यसो भन्यो: “हामीले ‘परमेश्वर सत्य ठहरिओस्’ भन्ने पुस्तक २० वर्षसम्म (१९४६ देखि १९६६ तिरसम्म) प्रमुख साधनको रूपमा चलायौं र ती वर्षहरूका दौडान हाम्रो संगठनमा १०,००,००० नयाँ राज्य उद्घोषकहरू थपिए। त्यसपछि १९६८ मा अनन्त जीवनतर्फ डोऱ्याउने सत्य विमोचन भएदेखि १०,००,००० प्रकाशकहरू थपिए। पार्थिव प्रमोदवनमा तपाईं सधैंभरि बाँच्न सक्नु हुन्छ नामक नयाँ पुस्तक चलाएर पनि राज्य प्रकाशकहरूको संख्यामा के हामी त्यस्तै वृद्धि हुने आशा गर्न सक्नेछौं? यहोवाको इच्छा छ भने अवश्य सक्नेछौं!” यहोवाको इच्छा पनि त्यही थियो किनभने १९८२ देखि १९९५ भित्र परमेश्वरको राज्य उद्घोषकहरूको संख्यामा २७,००,००० वृद्धि भयो!
१०. सन् १९९५ मा कुन नयाँ पुस्तक प्रदान गरियो र बाइबल विद्यार्थीहरूलाई चाँडचाँडो आध्यात्मिक प्रगति गर्न यसले किन मदत गर्नुपर्ने हो?
१० येशूले भन्नुभयो, “फसल ता साँच्चिनै प्रशस्त छ, तर खेतालाहरू भने थोरै छन्।” (मत्ती ९:३७) साँच्चै, फसल प्रशस्त छ। अझ धेरै गर्नु बाँकी छ। केही मुलुकहरूमा बाइबल अध्ययन गर्नको लागि मानिसहरूले आफ्नो पालो पर्खनुपर्छ। अतः परमेश्वरको ज्ञानलाई चाँडचाँडो फैलाउन १९९५ मा “विश्वासी र बुद्धिमान दास[ले]” नयाँ साधन प्रदान गऱ्यो। त्यो थियो, १९२ पृष्ठ भएको पुस्तक, ज्ञान जसले अनन्त जीवनतर्फ डोऱ्याउँछ। यस मूल्यवान् साधनले झूटा धर्मसिद्धान्तहरूमा ध्यानकेन्द्रित गर्दैन। यसले बाइबल सत्यहरू स्पष्टसित प्रस्तुत गर्छ। आशा छ, यसले बाइबल विद्यार्थीहरूलाई थोरै समयमै चाँडचाँडो आध्यात्मिक प्रगति गर्न मदत गर्नेछ। ज्ञान पुस्तक १२५ भाषामा ४,५५,००,००० प्रति छापिएका छन् र थप २१ भाषामा यसको अनुवाद हुँदैछ।
११. पढ्नै नजान्ने वा दुइ चार अक्षर मात्र पढ्न जान्नेहरूलाई सिकाउन मदत गर्न कुन प्रभावशाली प्रकाशन प्रदान गरियो र यसले हाम्रो विश्वव्यापी शिक्षण कार्यक्रममा कस्तो असर पारेको छ?
११ कहिलेकाहीं ‘विश्वासी दासले’ खास खास व्यक्तिहरूका लागि पनि साधनहरू प्रदान गरेको छ। उदाहरणका लागि, सांस्कृतिक वा धार्मिक पृष्ठभूमिले गर्दा विशेष मदत चाहिने व्यक्तिहरूलाई नै विचार गर्नुहोस्। परमेश्वर हामीबाट के चाहनुहुन्छ भनी सिक्न तिनीहरूलाई कसरी मदत दिन सकिन्छ? हामीलाई जे चाहिएको थियो, त्यही कुरा १९८२ मा पायौं। त्यो थियो ३२ पृष्ठ भएको ठूलो पुस्तिका, पृथ्वीमा सधैंभरि जीवनको आनन्द उठाउनुहोस्! चित्रै चित्रले भरिएको यो प्रकाशन पढ्नै नजान्ने वा दुइ चार अक्षर मात्र पढ्न जान्ने व्यक्तिहरूलाई सिकाउन प्रभावशाली साबित भएको छ। यसमा धर्मशास्त्रका मुख्य मुख्य शिक्षाहरूलाई असाध्यै सरल तथा बुझ्न सकिने ढंगमा प्रस्तुत गरिएको छ। जीवनको आनन्द उठाउनुहोस् पुस्तिका विमोचन भएदेखि यसले हाम्रो विश्वव्यापी शैक्षिक कार्यक्रममा ठूलो योगदान पुऱ्याएको छ। यो २२७ भाषामा ९,९८,६०,००० प्रतिहरू छापिसकेका छन् र वाच टावर सोसाइटीका प्रकाशनहरूमध्ये अहिलेसम्म सबैभन्दा बढी भाषामा अनुवाद भएको पुस्तिका यही हो!
१२, १३. (क) यथासम्भव बढी पाठकहरूले पढोस् भन्ने हेतुले १९९० देखि ‘विश्वासी दासले’ कुन नयाँ तरिका तयार पारेको छ? (ख) हामीले सोसाइटीका भिडिओक्यासेटहरू क्षेत्र सेवकाईमा कसरी चलाउनसक्छौं? (ग) चेला बनाउने कार्यमा मदत पुऱ्याउन हालै कुन साधन प्रदान गरिएको छ?
१२ यथासम्भव बढी मानिसहरूलाई निर्देशन दिन छापिएका प्रकाशनहरूको अलावा १९९० देखि ‘विश्वासी दासले’ एउटा नयाँ माध्यम प्रदान गरेको छ। ती हुन्, भिडिओक्यासेटहरू। त्यसै सालको अक्टोबर महिनामा यहोवाका साक्षीहरूको संगठन (अंग्रेजी) नामक ५५ मिनेट लामो भिडिओक्यासेट विमोचन भयो। यो वाच टावर सोसाइटीले निकालेको पहिलो भिडिओक्यासेट थियो। यस सुन्दर, जानकारीमूलक भिडियो ३५ भाषामा उपलब्ध छ। यसमा यहोवाप्रति समर्पित जनहरूको विश्वव्यापी संगठन राम्ररी देखाइएको छ। ती जनहरूले नै सारा पृथ्वीमा सुसमाचार घोषणा गर्न येशूले दिनुभएको आज्ञा पूरा गरिरहेका छन्। यो भिडिओक्यासेटको मुख्य उद्देश्य, चेला बनाउने कार्यमा सहयोग पुऱ्याउनु हो। राज्य प्रकाशकहरूले क्षेत्र सेवकाईमा यस नयाँ साधन चलाउन ढिलासुस्ती गरेनन्। केहीले त झोलामै बोकेर हिंड्थे र जिज्ञासु व्यक्ति भेट्ने बित्तिकै देखाइहाल्थे वा हेर्नको लागि दिन्थे। त्यो विमोचन हुने बित्तिकै एक परिभ्रमण निरीक्षकले यसो भने: “अहिले २१ औं शताब्दीमा लाखौं मानिसहरूको मन अनि हृदय छुने माध्यम नै भिडिओक्यासेट भएको छ। अतः आशा छ, विश्वव्यापी राज्यप्रचारकार्यलाई बढाउन सोसाइटीले यस्तै खालका भिडिओक्यासेटहरू अरू थुप्रै निकाल्नेछ।” निस्सन्देह, अरू थुप्रै भिडिओक्यासेटहरू पनि छन् जसमध्ये तीन खण्ड भएको भिडिओक्यासेट, बाइबल—तथ्य तथा भविष्यवाणीको पुस्तक (अंग्रेजी) र नाजी आक्रमण विरुद्ध यहोवाका साक्षीहरू दृढ रहन्छन् (अंग्रेजी)। सोसाइटीका भिडिओक्यासेटहरू तपाईंको भाषामा उपलब्ध छन् भने के तपाईंले क्षेत्र सेवकाईमा ती चलाउनुभएको छ?a
१३ चेला बनाउने कार्यमा हामीलाई सहयोग पुऱ्याउन हालै एउटा नयाँ साधन प्रदान गरिएको थियो। त्यो थियो, परमेश्वर हामीबाट के चाहनुहुन्छ? नामक पुस्तिका। यो किन छापिएको हो? यसलाई कसरी चलाउन सकिन्छ?
नयाँ साधनलाई केलाएर हेर्दा
१४, १५. विशेषगरि कस्ता व्यक्तिहरूको लागि चाहनुहुन्छ पुस्तिका तयार पारिएको हो र यसमा के कस्ता विषयवस्तुहरू छन्?
१४ यस नयाँ प्रकाशन, परमेश्वर हामीबाट के चाहनुहुन्छ? त्यस्ता व्यक्तिहरूका लागि तयार पारिएको हो जो परमेश्वरमा विश्वास गर्छन् र बाइबललाई आदर गर्छन्। अल्पविकसित मुलुकहरूमा सेवारत परिभ्रमण निरीक्षक तथा गिलियडमा प्रशिक्षित मिसनरीहरूले यो पुस्तिका तयार पार्न मदत गरे। यसमा सजिलै बुझ्न सकिने ढंगमा विषयवस्तु तयार पारिएको छ र बाइबलका मुख्य मुख्य शिक्षाहरू छलफल गरिएको छ। यसमा प्रयोग गरिएको भाषाशैली ठाडो छैन, सरल छ र सजिलै बुझ्न सकिन्छ। साथै, यसको विषयवस्तु असाध्यै हलका पनि छैन। यसमा परमेश्वरको वचनको “दूध” मात्र होइन तर “खँदिलो खानेकुरा” पनि छ र धेरैजसो मानिसहरूले सजिलै बुझ्नसक्ने ढंगमा प्रस्तुत गरिएको छ।—हिब्रू ५:१२-१४.
१५ हालै विभिन्न मुलुकका प्रकाशकहरूले त्यस्तै प्रकाशन मागेका छन्। उदाहरणका लागि, पापुआ न्यु गिनीस्थित वाच टावर सोसाइटीको शाखा कार्यालयले यस्तो पत्र पठायो: “एकअर्कासित मेल नखाने धार्मिक शिक्षाहरूले गर्दा मानिसहरू अलमल्लमा परेका छन्। तिनीहरूलाई सत्य बताउने सुस्पष्ट वाक्यांश चाहिन्छ र त्यसलाई समर्थन गर्ने थुप्रै बाइबल पदहरू आफ्नै बाइबलमा जाँच्नसक्ने हुनुपर्छ। परमेश्वरले साँचो मसीहीहरूबाट के चाहनुहुन्छ र कुन कुन चलन तथा रीतिरिवाज उहाँ मन पराउनुहुन्न भनी स्पष्ट तथा किटेरै बताएको चाहन्छन्।” परमेश्वर के चाहनुहुन्छ भनी सिक्न त्यस्ता व्यक्तिहरूलाई मदत गर्न हामीलाई चाहिएकै कुरा चाहनुहुन्छ पुस्तिकाले प्रदान गर्छ।
१६. (क) नयाँ पुस्तिकामा प्रस्तुत गरिएका सरल विवरणहरूबाट विशेषगरि कसले लाभ उठाउलान्? (ख) तपाईंको इलाकाका मानिसहरूले चाहनुहुन्छ पुस्तिकाबाट कसरी लाभ उठाउनेछन्?
१६ यस नयाँ साधन तपाईं कसरी चलाउन सक्नुहुन्छ? प्रथमतः, राम्ररी पढ्न नसक्ने वा पढ्न त्यति नरुचाउने व्यक्तिहरूसित अध्ययन गर्न यो पुस्तिका प्रयोग गर्न सकिन्छ।b त्यस्ता व्यक्तिहरूले यस पुस्तिकाका सरल विवरणहरूबाट लाभ उठाउलान्। यस पुस्तिकाको खेस्रा पुनरावलोकन गरेपछि वाच टावर शाखा कार्यालयहरूले यसरी लेखे: “एकोहोरो पढिरहन नरुचाउने मानिसहरू भएका देशहरूमा यो प्रकाशन असाध्यै काम लाग्नेछ।” (ब्राजिल) “यहाँ अन्य देशबाट बसाइँ सरेका त्यस्ता थुप्रै मानिसहरू छन् जो मातृभाषा पढ्न जान्दैनन् तर फेरि फ्रान्सिसी भाषा पनि त्यति राम्ररी पढ्न जानेका छैनन्। त्यस्ता व्यक्तिहरूसित अध्ययन गर्न यो पुस्तिका चलाउन सकिन्छ।” (फ्रान्स) यस चाहनुहुन्छ पुस्तिकाबाट लाभ उठाउनसक्ने व्यक्तिहरू के तपाईंको इलाकामा छन्?
१७. धेरै मुलुकहरूमा यस नयाँ पुस्तिका कुन ढंगमा लाभकारी होला र किन?
१७ दोस्रो, मानिसहरूले धेरथोर जतिसुकै शिक्षा हासिल गरेका हुन्, थुप्रै मुलुकका ईश्वरभीरु मानिसहरूसित बाइबल अध्ययन थाल्न यो पुस्तिका मदतकारी हुनसक्छ। तर अन्ततः ज्ञान जसले अनन्त जीवनतर्फ डोऱ्याउँछ पुस्तकबाट अध्ययन थाल्न प्रयास गर्नु बेस हुन्छ। तर कहिलेकाहीं पुस्तिकाबाट नै अध्ययन थाल्न सजिलो हुनसक्छ। त्यसपछि विद्यार्थी तयार भएजस्तो लागेमा ज्ञान पुस्तकबाट अध्ययन थाल्नुपर्छ किनभने अध्ययन गर्ने प्रमुख साधन यही पुस्तक हो र सकेसम्म यसैबाट अध्ययन गर्ने सुझाउ दिइएको छ। चाहनुहुन्छ पुस्तिका प्रयोग गर्ने सन्दर्भमा वाच टावर शाखा कार्यालयहरूले यसप्रकार लेखे: “बाइबल अध्ययनहरू सुरु गर्न गाह्रो भएको हुँदा पुस्तिकाबाट अध्ययन थाल्न प्रकाशकहरूलाई सजिलो हुन्छ।” (जर्मनी) “नयाँ बाइबल अध्ययनहरू थाल्न यस्तो पुस्तिका असाध्यै प्रभावकारी हुनेछ र पछि ज्ञान पुस्तकबाट अध्ययनलाई अघि बढाउन सकिन्छ।” (इटाली) “जापानीहरू असाध्यै शिक्षित भए तापनि बाइबल तथा यसका आधारभूत शिक्षाहरूबारे तिनीहरूलाई त्यति राम्ररी थाह छैन। अन्ततः ज्ञान पुस्तकबाट अध्ययन थाल्न यो पुस्तिका एउटा उत्तम माध्यम हुनेछ।”—जापान।
१८. परमेश्वरले हामीबाट के चाहनुहुन्छ, त्यो पूरा गर्ने सन्दर्भमा हामीले कुन कुरा बिर्सनु हुँदैन?
१८ संसारभरि सोसाइटीका शाखा कार्यालयहरूले यस पुस्तिकाको लागि आग्रह गरेका छन् र २२१ भाषामा अनुवाद गर्न अनुमति दिइसकेको छ। परमेश्वर मानिसहरूबाट के चाहनुहुन्छ भनी सिक्ने मदत दिन यस नयाँ प्रकाशन महत्त्वपूर्ण साबित होस्। हामी भने प्रचार गर्नुको साथै चेला बनाउने आज्ञा पालन गरेर यहोवाले चाहनुभएअनुसार गरिरहन नबिर्सौं। यसो गऱ्यौं भने हामी उहाँलाई कत्तिको प्रेम गर्छौं भनी देखाउने अनमोल अवसर पाउँछौं। हो, परमेश्वर हामीबाट जे चाहनुहुन्छ, त्यो पूरा गर्नु हाम्रोलागि बोझ होइन। यो जीवनको सर्वोत्तम मार्ग हो।—भजन १९:७-११.
के तपाईं बताउन सक्नुहुन्छ?
◻ आफ्ना जनहरू कुन दुइ कार्यमा भाग लिएको यहोवा चाहनुहुन्छ?
◻ प्रचार गर्ने तथा चेला बनाउने हाम्रो दायित्व किन बोझ होइन?
◻ प्रचार गर्ने तथा चेला बनाउने कार्यको लागि “विश्वासी र बुद्धिमान दास[ले]” कुन साधनहरू प्रदान गरेको छ?
◻ चाहनुहुन्छ पुस्तिका कसको लागि तयार पारिएको हो र हामी सेवकाईमा यो कसरी चलाउनसक्छौं?
[फुटनोटहरू]
a यहोवाका साक्षीहरू—परमेश्वरको राज्यका उद्घोषकहरू पुस्तक यसो भन्छ: “भिडिओक्यासेटहरू पक्कै पनि पुस्तकपुस्तिकाद्वारा वा व्यक्तिगत तवरमा साक्षी दिनु बराबर हुनेछैन। सोसाइटीका प्रकाशनहरूले सुसमाचार फैलाउन भविष्यमा पनि महत्त्वपूर्ण भूमिका निर्वाह गरिरहनेछन्। यहोवाका साक्षीहरूको घर-घरको प्रचारकार्य धर्मशास्त्रमा आधारित सेवकाईको अभिन्न भाग हो। तथापि, यहोवाका बहुमूल्य प्रतिज्ञाहरूमा विश्वास बढाउन तथा उहाँले अहिले यस पृथ्वीमा गरिरहनुभएका कुराहरूप्रति मूल्यांकन जगाउन यी भिडिओक्यासेटहरूले घर-घरको प्रचारकार्यमा निकै सहयोग पुऱ्याउँछन्।”
b चाहनुहुन्छ पुस्तिकाबाट बाइबल अध्ययन गर्ने तरिका थाह पाउन पृष्ठ १६-१७ मा “परमेश्वरका आवश्यकताहरू सिक्न मदत दिने नयाँ साधन” लेख हेर्नुहोस्।
[पृष्ठ २४-मा भएको चित्र]
प्रचार गर्नु तथा चेला बनाउनु कुनै बोझ होइन
[पृष्ठ २६-मा भएको चित्र]
“परमेश्वर सत्य ठहरिओस्” (१९४६, पुनः संशोधित १९५२): ५४ भाषामा १,९२,५०,००० प्रति (अंग्रेजी देखाइएको छ)
“अनन्त जीवनतर्फ डोऱ्याउने सत्य” (१९६८): ११७ भाषामा १,०७,००,००० प्रति (फ्रान्सिसी देखाइएको छ)
“पार्थिव प्रमोदवनमा तपाईं सधैंभरि बाँच्न सक्नुहुन्छ” (१९८२): १३० भाषामा ८,०९,००,००० प्रति (रूसी देखाइएको छ)
“ज्ञान जसले अनन्त जीवनतर्फ डोऱ्याउँछ” (१९९५): १२५ भाषामा ४,५५,००,००० प्रति (जर्मन देखाइएको छ)