राज्य उद्घोषकहरूका रिपोर्ट
राज्यको सुसमाचार घोषणा गर्न पछि नहट्नुहोस्
युरोपेली अन्वेषकहरूले भेनेज्वेला खाडी र मराक्याबो तालमा पहिलोचोटि पाइला टेक्दा समुद्री तटको छिपछिपे पानीमाथि खम्बाहरू उठाएर बनाएका अनेकन् स-साना झुप्राहरू थिए। त्यहाँको दृश्यले इटालीस्थित भेनिसको सम्झना दिलाउँथ्यो जहाँ मानिसहरू पानीको छेउछाउमा घर बनाउँथे। अतः स्पेनीभाषी अन्वेषकहरूले यस ठाउँलाई भेनेज्वेला नामाकरण गरे। यसको अर्थ “सानो भेनिस” हो।
आज यो मनोहर देशमा अर्को किसिमको निर्माण कार्य भइरहेको छ। त्यो हो, आध्यात्मिक निमार्ण कार्य। यहाँ यहोवाका साक्षीहरू हरेक उपयुक्त अवसरमा परमेश्वरको राज्यको बीउ रोप्नमा व्यस्त छन्। फलतः आध्यात्मिक कटनीद्वारा “फसलका प्रभु” अर्थात् यहोवा परमेश्वरको निकै प्रशंसा भइरहेको छ।—मत्ती ९:३७, ३८.
एकचोटि उत्तरपश्चिम भेनेज्वेलास्थित सुल्या प्रान्तको एउटा मण्डलीमा परिभ्रमण निरीक्षकको भ्रमण थियो। त्यतिखेर स्थानीय साक्षीहरूले तिनी र तिनकी श्रीमती नजिकैको टोआस टापुमा जाने प्रबन्ध मिलाएका थिए। त्यस टापुमा जान बिहानको डुंगा कुर्न लाम लाग्नुपऱ्यो। त्यसो हुँदा परिभ्रमण निरीक्षककी श्रीमती मेरीले पूर्ण-समय अग्रगामी गर्ने आफ्नो सहकर्मीलाई डुंगाका कामदारहरूसँग कुराकानी गरे कसो होला भनेर सोधिन्। अग्रगामी बहिनी राजी भइन्।
मेरीले मिस्त्रीलाई भेटेर ज्ञान जसले अनन्त जीवनतर्फ डोऱ्याउँछ पुस्तक दिइन्। तिनले मिस्त्रीलाई “परमेश्वरलाई आदर गर्ने परिवार निर्माण” भन्ने अध्याय देखाइन् र उनको ध्यानाकर्षण गरेजस्तो देखियो। तत्पश्चात्, मेरीले उनलाई त्यसै प्रकाशनबाट आफ्नै घरमा बाइबल अध्ययन गर्न सक्नुहुन्छ भनेर बताइन्। उनले पुस्तक स्वीकारे अनि उनको घरमा कसैलाई पठाउने प्रबन्ध मिलाइयो।
केही समयपछि त्यही इलाकामा एकदिने विशेष सम्मेलन सम्पन्न भयो। सम्मेलनमा उक्त मिस्त्री सेन्योर नाभालाई उनकी श्रीमती तथा दुई जवान छोरीहरूसँग देख्दा मेरी तीन छक परिन्! मेरीले मिस्त्रीकी श्रीमतीलाई पारिवारिक बाइबल अध्ययन कस्तो लाग्यो त भनेर सोधिन्। उनले असाध्यै छक्कलाग्दो प्रत्युत्तर दिइन्।
“हामीले सच्चाइ सिक्न पाएकोमा म यहोवालाई धन्यवाद दिन्छु,” उनले भनिन्। त्यसपछि नालीबेली बताइन्। “तपाईंहरूले मेरो श्रीमान्सँग कुराकानी गर्नुभएको केही दिनअघि मात्र अर्को केटीसित लागेर मलाई उहाँले लत्याउनुभएको थियो। उहाँ अति पियक्कड पनि हुनुहुन्थ्यो। मातेर लट्ठ भएपछि त कहिलेकाहीं मनपरी पनि बोल्नुहुनथ्यो। यस्तो बोली टापुको सानो समाजमा रहने मानिसहरूलाई पटक्कै मन पर्दैनथ्यो। उहाँ प्रेतवादमा पनि भाग लिनुहुनथ्यो। तर उहाँले अध्ययनबाट प्राप्त गर्नुभएका बाइबल ज्ञानद्वारा आफ्नो जीवनमा आमूल परिवर्तन गर्ने मदत पाउनुभयो। उहाँले सबै अशुद्ध बानीहरू चटक्कै त्याग्नुभयो। यस्तो परिवर्तन देखेर उहाँका क्याथोलिक मुमाबाबु अति प्रभावित हुनुभयो। उहाँ अहिले भरपर्दो पति र पिता हुनुभएकोमा उहाँका मुमाबुबा खुसी हुनुहुन्छ।”
सेन्योर नाभाले १९९६ मा बप्तिस्मा लिए अनि हाल पूर्ण-समय सेवकको हैसियतमा सेवा गरिरहेका छन्। उनकी पत्नी जेनीले चाहिं १९९७ मा बप्तिस्मा लिइन्। उक्त डुंगा मिस्त्रीको जीवनमा आएका परिवर्तनहरू देखेर शहरका नगरप्रमुख यत्ति प्रभावित भए कि तिनले पनि बाइबल अध्ययन गर्छु भनेर अनुरोध गरे। डुंगा कुर्न बिहान लाम लाग्दा सुसमाचार सुनाउन पछि नहट्नाले ती बहिनीहरू कत्ति हर्षित हुन पाए!
[पृष्ठ ७-मा भएको चित्र]
डुंगा मिस्त्रीलाई सुसमाचार सुनाउनाले आनन्ददायी परिणामहरू भए