Timoteus gwotango
5 Ino gandagula omusamane omukokele.* Mepingathano naashono, popya naye onga to popi naho, naalumentu aagundjuka ongaamwanyoko, 2 aakulukadhi aakokele* ongoonyoko, naakiintu aagundjuka ongaamwanyoko; ya ihumbatela momukalo gwa yogoka.
3 Kala wu na ko nasha lela* naaselekadhi, mboka aaselekadheelela .* 4 Ihe ngele omuselekadhi oku na oyana, nenge aatekulu, nayi ilonge tango esimanekokalunga momagumbo gawo, nokukwathela aavali yawo nosho wo ooyinakulu noohekulu, ngaashi ye shi ilongela, oshoka shono osho sha opala momeho gaKalunga. 5 Ihe omukulukadhi omuselekadheelela, noina thigwa nasha, oha tula einekelo lye muKalunga, noha tsikile okwiindila nokugalikana omutenya nuusiku. 6 Ihe omuselekadhi, ngoka ti igandja komahalo* ge, okwa sa, nonando oku na omwenyo. 7 Onkee ano tsikila oku ya pa omalombwelo ngaka,* opo kaapu kale nando ogumwe te ya sheke. 8 Odhoshili kutya ngele opu na ngoka ihaa sile oshimpwiyu aakwanezimo ye, unene tuu aanegumbo lye, nena okwi idhimbika eitaalo, noku vulike nokuli kwaangoka kee na eitaalo.
9 Omuselekadhi ota tulwa owala momusholondondo gwaaselekadhi, mboka ya pumbwa ekwatho, ngele omimvo dhe odha konda po 60, a li omukulukadhi e na omusamane gumwe, 10 a tseyikila iilonga iiwanawa, a putudha oyana nawa, ha yakula aayenda, a li ha yogo oompadhi dhaayapuki, a kwathela mboka ya li muudhigu, nokwa longa nuudhiginini oshilonga kehe oshiwanawa.
11 Kakele kaashono, momusholondondo inamu tula mo aaselekadhi aagundjuka, oshoka ngele omahalo gawo gopamilalo otage ya imbi ya landule Kristus, otaya kala ya hala okuhokanwa. 12 Shoka otashi ke ya ningitha ya kale ye na ondjo, molwaashoka inaya gwanitha po euvaneko lyawo lyotango. 13 Pethimbo opo tuu mpoka, otashi vulika yi igilile onyalo, nokukala taya endaenda nomagumbo. Eeno, itaya kala owala aananyalo, ihe otashi vulika wo ya kale haya hokola, haya idhopo miinima yayalwe, nokupopya kombinga yiinima, mbyoka kaaye na okupopya. 14 Onkee ano onda hala aaselekadhi aagundjuka ya hokanwe, ya vale aanona, noya kale haya sile oshimpwiyu aanegumbo lyawo, opo kaaya pe aapataneki ompito ye tu sheke. 15 Aaselekadhi yamwe nokuli oya etha po nale oshili e taya landula Satana. 16 Ngele opu na omukiintu omwiitaali e na aakwanezimo aaselekadhi, ne ya kwathele, opo kaashi kale omutenge kegongalo. Opo nduno egongalo otali ka vula okusila oshimpwiyu mboka aaselekadheelela.*
17 Aakuluntugongalo, mboka haya kwatele komeho nawa oyi ilongela lela okusimanekwa, unene tuu mboka haya longo nuudhiginini mokupopya oohapu dhaKalunga nomokulonga aantu. 18 Oshoka enyolo otali ti: “Ino manga okana kontsezi, tayi yungula iilya polupale,” nolya ti wo “omuniilonga okwi ilongela ondjambi ye.” 19 Ino zimina oohapu dhaangoka ta tamaneke omusamane omukokele,* okuninga pu na oombangi mbali, nenge ndatu, tadhi koleke oshinima shoka. 20 Geyela* montaneho yaayehe, mboka ya yona, opo shi kale elondodho kuyalwe.* 21 Otandi ku ganitha koshipala shaKalunga, shaKristus Jesus noshaayengeli aayapuki,* wu dhiginine omalombwelo ngaka, nopwaa na ondjoolola, nenge okatongo.
22 Ino endelela okutenteka omulumentu iikaha yoye;* noino kutha ombinga momayono gayalwe; ikaleka wa yela.
23 Ino nwa we omeya ogo ageke,* ihe kala wo ho nu omaviinu omashona omolwuuwanawa wepunda lyoye, nomolwuuwehame, mboka hawu ku adha ethimbo nethimbo.
24 Omayono gaantu yamwe ogi igalala,* naantu ya tya ngaaka ohaya pangulwa nziya, ihe gayalwe ohaga ka hololwa owala konima yethimbo. 25 Sha faathana, iilonga iiwanawa ohayi kala ya tseyika kukehe gumwe, naambyoka inaayi tseyika itayi vulu okukala ya holekwa.