Aantu otaya kongo omayamukulo ge li mondjila

Ongiini tandi vulu okugamena uukolele wandje?

Oshike tandi vulu okuninga opo onkalamwenyo yuukwanegumbo wandje yi kale yi uvite elago?

Ongiini tandi vulu okuhwepopaleka ompito yokudhiginina iilonga yandje?

MBELA owa pula nale omapulo ga tya ngaaka? Mbela owa mona omayamukulo ge na lela oshilonga? Omvula kehe, ohapu nyanyangidhwa omambo ga yoolokathana ge thike 2 000 lwaampono ngoka haga gandja omayele ge na ko nasha niipalanyolo mbyoka nayilwe ya simana. MuBritania omo amuke, aaleshi ohaya longitha iimaliwa oyindji yi vulithe pooponda omamiliyona 80 (oodola dhaNamibia dhi vulithe pomamiliyona eyuvi 1,1 lwaampono) momvula momambo ngoka haga gandja omayele kombinga yankene omaupyakadhi gonkalamwenyo taga vulu okuungaungwa nago. MIilongohangano, melandithopo lyomambo gokwiihumitha komeho ohamu zi iimaliwa ya adha konyala poodola dhaNamibia dhi vulithe pomamiliyona omayuvi 4,4 momvula. Osha yela kutya hangoye awike to kongo omayele omawanawa gankene onkalamwenyo yakehe esiku yi na okuungaungwa nayo.

Shi na ko nasha nomayele ngoka taga adhika miileshomwa mbika oyindjiyindji, omunyoli gumwe gwayo okwa ti: “Omambo ogendji omape otage endulula owala shoka sha nyolwa nale.” Odhoshili kutya omayele ogendji ngoka taga adhika momambo ngoka otage endulula owala uunongo mboka wa nyolwa mulimwe lyomomambo omakulukulu muuyuni. Embo ndika ohali taandelithwa unene shaampono li vulithe iileshomwa yilwe muuyuni. Olya tolokwa alihe nenge iitopolwa yalyo momalaka ge thike 2 400 lwaampono. Omambo ge vulithe pomamiliyona omathele 4,6 oga nyanyangidhwa muuyuni auhe. Embo ndika olyo Ombiimbeli.

Ombiimbeli otayi popi sha yela tayi ti: “Enyolo kehe olya nyolithwa kOmbepo yaKalunga noli na oshilonga shokulonga oshili, okukumagidha, okupukulula nokuulukila omuntu ondjila yu uka.” (2 Timoteus 3:16) Odhoshili kutya Ombiimbeli inayi nyolwa yi li embo lyokwiihumitha komeho paumwene. Oya nyolwa unene nelalakano lyokuhololela aantu ehalo lyaKalunga. Nonando ongaaka, Ombiimbeli oyi na uuyelele oundji wankene omaupyakadhi ngoka haga adha aantu ayehe taga vulu okuungaungwa nago, notayi uvaneke kutya mboka taya landula ewiliko lyayo otaye ki imonena uuwanawa yo yene. (Jesaja 48:17, 18) Omayele gayo ge na oshilonga ohage shi pondola aluhe uuna taga tulwa miilonga, kutya nduno omuntu ona kale gwomuhoko guni, gweputuko lini nenge okwa longwa shi thike peni.