Mbela Ombiimbeli oyi li Oohapu dhaKalunga?
“Enyolo kehe olya nyolithwa kOmbepo yaKalunga noli na oshilonga shokulonga oshili, okukumagidha, okupukulula nokuulukila omuntu ondjila yu uka, opo kehe ngoka ta longele Kalunga, a kale a gwana a pwa nokwoopalela oshilonga kehe oshiwanawa.”—2 TIMOTEUS 3:16, 17.
OOHAPU ndhoka dhomuyapostoli Paulus kadha li tuu tadhi ulike ongushu ya dhenga mbanda yOmbiimbeli! Eeno, okwa li tu ulike kondandalunde koshitopolwa shOmbiimbeli shoka a li e na pethimbo ndyoka, omanyolo ngoka aantu hayi ithana Etestamendi Ekulu. Ihe ekotampango moohapu ndhoka otali longo wo sha faathana shi na ko nasha nomambo agehe 66 gOmbiimbeli, mwa kwatelwa ngoka ga nyolwa kaalongwa yaJesus aadhiginini methelemumvo lyotango E.N.
Mbela owa simaneka Ombiimbeli ngaashi Paulus a li e shi ningi? Mbela owi itaala kutya aanyoli yOmbiimbeli oya li lela ya nwethwa mo kuKalunga? Aakriste yomethelemumvo lyotango oya li ye shi itaala. Momathelemimvo ga landula ko, Aakriste yashili oya kala aluhe ye na eitaalo ndyoka. Pashiholelwa, methelemimvo eti-14 omuwiliki gwopambepo Omwiingilisa John Wycliffe okwa li a tala ko Ombiimbeli yi li “oshiyelekitho sha gwanenena shoshili.” O-New Bible Dictionary oya tya ko sha koohapu dhaPaulus ndhoka dha nyolwa pombanda noya ti kutya ‘enwethwomo lyombepo yaKalunga otali shilipaleke kutya ayihe mbyoka ya popiwa mOmbiimbeli oyoshili.’
Iikala yaantu shi na ko nasha nOmbiimbeli otayi ende tayi lunduluka
Omasiku ngano aantu oyendji inayi inekela we kutya oye na okupulakena kOmbiimbeli. Elongithwambo The World’s Religions otali ti: “Pakupopya, Aakriste ayehe oya taamba ko natango Ombiimbeli kutya oyi shi okwiinekelwa mokuwilika oonkatu dhawo nosho wo mokuutha shoka yi itaala.” Ihe hasho shi li we ngawo lela. Aantu oyendji ngashingeyi oya tala ko oohapu dhOmbiimbeli dhi li “omithigululwakalo dhaantu ndhoka kaadhi shi okwiinekelwa.” Nonando otaya zimine kutya aanyoli yOmbiimbeli oya li aalumentu ye na eitaalo lya kola, oya tala ko aanyoli mboka kutya oya li owala aalumentu inaaya gwanenena mboka ya kambadhala okufatulula ooshili dhopambepo dhomuule, ihe kaya li ye na ontseyo nuuyelele mboka tu na kunena.
Dhoshili, kunena aantu aashonashona haye etha lela Ombiimbeli yi wilike omadhiladhilo gawo noonkatu dhawo. Pashiholelwa, olungapi ho uvu aantu taya ti kutya omithikampango dhOmbiimbeli dhopamikalo odhonkuluyonale noitadhi longo we? Aantu oyendji ohaya kala yu uvite ya manguluka okuhekula oompango dhOmbiimbeli nomakotampango gayo nenge nokuli ye gi ipwililikile thiluthilu uuna tashi ya opalele oku shi ninga. Aantu yamwe mboka hayi iti aniwa Aakriste ohaya ipwililikile owina shoka Ombiimbeli tayi ti kombinga yoluhondelo, yokuyona ondjokana, yokwaahenuuyuuki nosho wo yuunkolwe.—1 Aakorinto 6:9, 10.
Omolwashike shi li ngawo? Petameko lyethelemumvo eti-20, etompelo limwe olya li lya gandjwa komunongononi gwokulafulula iikulunima Sir Charles Marston membo lye The Bible is True. Okwa ti kutya pethimbo lye aantu ‘nopwaahe na oku shi pataneka oya li ya taamba ko mbala omafekafeko ogendji gaanyoli’ mboka haya kondjitha uudhiginini wOmbiimbeli. Mbela shika natango oshoshili kunena? Ongiini wu na okutala ko omadhiladhilo nomalongo gaalongwantu mboka haya nkundipaleke einekelo lyaantu mOmbiimbeli? Tala shoka oshitopolwa tashi landula tashi ti kombinga yaashika.