Ombiimbeli oyi li shili Oohapu dhaKalunga dha nwethwa mo

OMUYAPOSTOLI Paulus okwa li a hala naanaa okutya shike sho a ti kutya Ombiimbeli oya “nyolithwa kOmbepo yaKalunga”? (2 Timoteus 3:16) Paulus okwa li a longitha oshitya shOshigreka shoka tashi ti lelalela kutya ‘Kalunga okwa fudhila mo,’ sha hala okutya, Kalunga okwa li a longitha ombepo ye ondjapuki okuwilika aanyoli yOmbiimbeli ya nyole owala shoka a hala ya nyole.

Omuyapostoli Petrus okwa ti kutya aanyoli mbaka yOmbiimbeli ‘oya popi elaka lya za kuKalunga mokuwilikwa kombepo ondjapuki.’ (2 Petrus 1:21) Onkee ano, omuyapostoli Paulus okwa li ta vulu wo okupopya kutya omambo gOmbiimbeli oge li ‘Omanyolo omayapuki ngoka taga vulu oku ku pa oondunge ndhoka tadhi ku thikitha mehupitho, sho wi itaala Jesus Kristus.’—2 Timoteus 3:15.

Aantu oyendji inaya zimina nando kutya Kalunga oye omunyoli gwOmbiimbeli. Olundji ohaya pataneke ‘nokudhina shoka sha hokololwa mOmbiimbeli,’ ngaashi omunongononi gwokulafulula iikulunima Sir Charles Marston a ti. Yamwe ohaye yi tala ko yi li “egongelo lyomahokololo giifundja omakulu nosho wo oongano.”

Konakona uunzapo

Mbela Ombiimbeli otayi vulu okwiinekelwa? Osha simana wu tokole shi li mondjila moshinima shika. Omolwashike? Omolwaashoka ngele mOmbiimbeli omu na oohapu dhaKalunga, otashi ka kala sha nika uusama nosha nika nokuli oshiponga oku yi ipwililikila. Ngele owe yi tala ko yi li owala oohapu dhomuntu, ihe hangaashi Oohapu dhaKalunga, itayi vulu okunwetha mo lela oonkatu dhoye noku ku kwathela wu itaale muyo.—1 Aatessalonika 2:13.

Ongiini to vulu okutokola moshinima shika? Natu tale kwaashika: Oho tokola ngiini kutya oto vulu okwiinekela aantu mboka ho tsakanene nayo? Oshoshili kutya oshidhigu unene okukala wi inekela lela omuntu ngoka kuu shi nawa. Oho ilongo owala momukokomoko gwethimbo ngele aantu oye li aanashili noye shi okwiinekelwa. Oto vulu okutseya Ombiimbeli momukalo gwa faathana. Ino taamba ko omalongo gomafekelo nenge nokuli gokayoya ngoka taga nkundipaleke einekelo lyoye mOmbiimbeli. Kutha ethimbo wu konakone uunzapo mboka tawu ambidhidha epopyo lyOmbiimbeli kutya oya “nyolithwa kuKalunga.”

Omaponokelo okuza kwaamboka hayi iti anuwa ookuume

Ino tewa omukumo kuushili mboka kutya nonando yamwe mboka hayi iti anuwa ookuume kOmbiimbeli ohaya kondjitha uushili nuuinekelwa wayo. O-New Dictionary of Theology otayi ti kutya kunena aagandjimulombo oyendji yOmbiimbeli, nonando taya ti oyo Aakriste, “ohaya popi owala kutya Omanyolo oga nyolwa kaantu.”

Aailongi oyendji yuuteolohi ohaya patana kombinga yaamboka ya nyola omambo gOmbiimbeli kutya hayo ye ga nyola. Pashiholelwa, yamwe ohaya ti kutya omupolofeti Jesaja haye a nyola embo lyaJesaja. Ohaya ti kutya embo ndika lyOmbiimbeli olya li lya nyolwa konima yethimbo lyaJesaja. Omunyoli gwo-Concise Bible Commentary Lowther Clarke okwa ti kutya embo lyaJesaja “olya nyolwa kaantu oyendji momukokomoko gwomapipi ogendji.” Ihe omapopyo ga tya ngaaka ohagi ipwililikile kutya Jesus Kristus naalongwa ye oya ti olundji kutya Jesaja oye a nyola embo ndika.—Mateus 3:3; 15:7; Lukas 4:17; Johannes 12:38-41; Aaroma 9:27, 29.

Shoka oshiwinayi unene osho kutya aapataneki yOmbiimbeli, ngaashi omugandjimulombo J. R. Dummelow, otaya ti kutya omahunganeko ngoka taga adhika membo lyaDaniel “oge li owala iiningwanima yondjokonona mbyoka ya ningwa nale, ihe omunyoli okwe yi nyola ya fa yi li omahunganeko.” Natango, mokupopya ngawo oyi ipwililikile uunzapo waJesus Kristus. Jesus okwa li a londodha kombinga yaashoka a li i ithana ‘iihuna yeshunduko, mbyoka ya popiwa komuhunganeki Daniel, yi li meha eyapuki.’ (Mateus 24:15) Mbela oshi li pandunge kOmukriste okwiitaala kutya Jesus Kristus okwa li a kutha ombinga mokupukitha aantu, ando ta ambidhidha ondjokonona yi kale ya fa omahunganeko ihe hasho? Hasho nando.

Mbela osha simana okutseya kutya oolye ye ga nyola?

Otashi vulika wu pule to ti: “Ihe mbela osha simana ngaa shili okutseya kutya oolye ya nyola omambo gOmbiimbeli?” Eeno, osha simana noonkondo. Mbela oto ki itaala ondokumende ndjoka tayi popiwa yi li etestamendi lyahugunina lyakuume koye ngele owu uvu kutya haye e yi nyola? Natu tye aatseyinawa yoshinima shika otaye ku lombwele kutya ondokumende ndjoka oyiikengelela nonokutya mboka ya li haya kala pamwe naye oya li ya nyola shoka ya li yi itaala kutya osha li ehalo lyakuume koye. Mbela shoka itashi ka ngushulula ondokumende? Mbela oto ka kala wu na einekelo kutya otayi popi lela shoka kuume koye a hala shi ningwe?

Osha faathana nOmbiimbeli. Itashi kumitha sho aantu oyendji nokuli naamboka hayi iti Aakriste hayi ipwililikile shoka Ombiimbeli tayi ti miinima ngaashi uunashili, uuyogoki wopamilalo nosho tuu. Olungapi wa li wu uvu aantu taya popi nondhino taya ti iinima ngaashi: “O! Shoka oshi li owala mEtestamendi Ekulu,” sha fa ya hala okutya oshi na ongushu onshona lela. Shika otaye shi popi nonando omuyapostoli Paulus okwa hokolola Etestamendi Ekulu li li “Omanyolo omayapuki” ngoka ga “nyolithwa kOmbepo yaKalunga.”

Otashi vulika to ti: “Dhoshili itatu vulu okwiipwililikila uunzapo waatseyinawa naalongwantu ayehe.” Hasho nando! Pashiholelwa, otwa pandula aalongwantu aanashili mboka ye tu kwathele okutseya shoka sha li sha nyolwa tango mOmbiimbeli. Osha yela kutya, omapuko gontumba omashona oga li ge ya momanyolo gOmbiimbeli sho ga li ga nyolululwa lwiikando momukokomoko gwomathelemimvo ga piti. Ihe dhimbulukwa kutya opu na eyooloko enene pokati kokuzimina kutya opwa ningwa omapuko omashona mookopi dhomanyolo gOmbiimbeli nokweekelahi Ombiimbeli ayihe nedhiladhilo kutya oya nyolwa kaantu.

Kala wi itaala “Omanyolo omayapuki”

Manga owala Paulus inaa popya kutya Ombiimbeli oya nwethwa mo kuKalunga, okwa li a lombwele Timoteus kutya omolwashike omanyolo ngoka ga nwethwa mo ga li ga pumbiwa. Okwa ti: “[Momasiku omahugunina, OB-1954,] aakolokoshi naafudhime otaa tsikile okuza muuwanawa yu uka muuwinayi, okupukitha yalwe nokwiipukitha wo yo yene.” (2 Timoteus 3:1, 13) Nale pethimbo lyaPaulus, mboka aniwa ya li ‘aanongo naanandunge’ oya li haya longitha ‘oohapu dhomuheka’ opo ya pukithe aantu nokunkundipaleka eitaalo lyawo muJesus Kristus. (1 Aakorinto 1:18, 19; Aakolossa 2:4, 8) Opo a gamenwe kenwethwomo lyaantu mboka, omuyapostoli Paulus okwa li a ladhipike Timoteus a ‘kale mwaambyoka yoshili, ngaashi e yi longwa okuza kuunona we okupitila mOmanyolo omayapuki’ ga tulwa po kuKalunga.—2 Timoteus 3:14, 15.

Osha simana wo nokungoye wu ninge ngawo ‘momasiku ngaka gahugunina.’ Ino kala to dhiladhila kutya ito vulu okupukithwa ‘koohapu dhomaheka’ dhe etwa po kaantu mboka aniwa aanandunge noonkondo. Pehala lyaashono, ngaashi Aakriste yomethelemimvo lyotango, kala wi igamena mokwiinekela thiluthilu mwaashoka wi ilonga okuza mOmbiimbeli, Oohapu dha nwethwa mo shili kuKalunga.

Oonzapo dhaJehova otadhi ka kala dha nyanyukwa oku ku kwathela wu kale wu na eitaalo mOmbiimbeli. Pashiholelwa, otadhi vulu oku ku ulukila nkene omakotampango gOmbiimbeli ga kala ge shi okwiinekelwa lela mondjokonona ayihe; nkene Ombiimbeli tayi tsu kumwe nuunongononi mpoka tayi popi kombinga yiinima yopaunongononi; nkene tayi tsu kumwe okuza ketameko sigo okehulilo; nkene omahunganeko gayo ga gwanithwa shili nosho wo iinima yilwe oyindjiyindji. Ngele owa hala, owa manguluka okunyolela omunyanyangidhi gwoshifo shika opo wu mone uuyelele mboka wa kwathela aantu omamiliyona mboka ye na omitima dhu uka ya mone kutya Ombiimbeli oyi li lela Oohapu dhaKalunga.

[Oohapu dha simana pepandja 5]

Oho tokola ngiini kutya oto vulu okwiinekela aantu mboka ho tsakanene nayo?

[Oohapu dha simana pepandja 6]

Otwa pandula aalongwantu aanashili mboka ye tu kwathele okutseya shoka sha li sha nyolwa tango mOmbiimbeli