Ilonga sha mOohapu dhaKalunga
Omolwashike Aakriste haya ninginithwa?
Moshitopolwa shika omu na omapulo ngoka tashi vulika wi ipula kombinga yago notashi ku ulukile mpoka to vulu okwaadha omayamukulo gago mOmbiimbeli yoye. Oonzapo dhaJehova otadhi ka kala dha nyanyukwa okukundathana nangoye omayamukulo.
1. Eninginitho lyopaKriste olya hala okutya shike naanaa?
Ngele omuntu ta ninginithwa ota pula Kalunga kutya okwa hala okukala e na ekwatathano ewanawa naye. Onkee ano, Omukriste oku na okuninginithwa uuna a thika mepipi lyokwiilonga kombinga yaKalunga e ta ningi omulongwa gwaJesus, ihe kashi na okuningwa manga e li okanona. (Iilonga 8:12; 1 Petrus 3:21) Ohatu ningi aalongwa yaJesus ngele twa konakona Ombiimbeli nokuninga ashihe shoka a ti natu ninge.—Lesha Mateus 28:19, 20.
Pethimbo lyaayapostoli yaJesus, aantu oyendji oya li ya katuka oonkatu nopwaahe na okwoongaonga opo yi ilonge kombinga yaKalunga nokombinga yaJesus. Pashiholelwa, sho omulumentu gumwe i ilongo kutya eso lyaJesus olye shi ninga tashi wapa opo aantu ya ka hupithwe, okwa ningi omulongwa nopwaahe na okwoongaonga. Kunena, aantu oyendji mboka ye na omitima omiwanawa oya hogolola okuninga aalanduli yaJesus.—Lesha Iilonga 8:26-31, 35-38.
2. Omolwashike Jesus a li a ninginithwa?
Jesus okwa li e na oomvula tadhi ihilile po-30 sho Johannes Omuninginithi e mu ninginitha mOmulonga gwaJordan. Eninginitho lyaJesus olya li lyu ulike etokolo lye lyokulonga ehalo lyaKalunga. (Aahebeli 10:7) Shika osha li tashi ka kwatela mo okuyamba po omwenyo gwe opo a kulile aantu muulunde. Nokuli nomanga inee ya kombanda yevi, Jesus okwa li e hole He Jehova, nokwa kala ha vulika kuye.—Lesha Markus 1:9-11; Johannes 8:29; 17:5.
3. Omolwashike Aakriste ye na okuninginithwa?
Onkalo yetu itayi yelekwa naandjoka yaJesus molwaashoka otwa valwa aalunde. Ihe eso lyaJesus lyeiyambo olye shi ninga tashi wapa opo tu kale tu na ekwatathano ewanawa naKalunga. (Aaroma 5:10, 12; 12:1, 2) Ano tu tye, molweso lyaJesus otatu vulu okukala iilyo yegumbo lyaKalunga. (2 Aakorinto 6:18) Mbela uuthembahenda wa tya ngaaka ohatu wu mono ngiini? Otu na okwiiyapulila Jehova okupitila megalikano, moka tatu mu lombwele kutya otwa tokola okulonga ehalo lye onkalamwenyo yetu ayihe. Ngele twe shi ningi ohatu ke shi ulika montaneho yaayehe okupitila mokuninginithwa.—Lesha Mateus 16:24; 1 Petrus 4:2.
4. Owu na okuninga shike opo wu kale wa gwana okuninginithwa?
Oonzapo dhaJehova ohadhi konakona Ombiimbeli nakehe ngoka a hala okuhedha popepi naKalunga. Okukonakona Ombiimbeli nokukala pokugongalo kwopaKriste otaku ka kokeka ohole yoye yokuhola Kalunga nosho wo eitaalo lyoye muye. Otaku ke ku kwathela wo wu kokeke omaukwatya omawanawa niikala iiwanawa. Okukokeka uukwatya ngaashi ohole, eitaalo nosho wo uukwatya wulwe wopakalunga otaku ke ku kwathela wu vule okutsikila netokolo lyoye lyokulongela Jehova sigo aluhe.—Lesha Johannes 17:3; Aahebeli 10:24, 25.
Opo wu mone uuyelele wa gwedhwa po, tala ontopolwa 18 yembo ndika Omalongo gashili gOmbiimbeli ogeni naanaa?, lya nyanyangidhwa kOonzapo dhaJehova.