Ombiimbeli ohayi lundulula onkalamwenyo yaantu

OSHIKE sha li shi inyengitha omulumentu gumwe a galukile melongelokalunga moka a putudhilwa? Ongiini omulumentu omugundjuka ngoka a putuka kee na ekwatathano ewanawa nahe a vulu okukala nekwatathano ewanawa naJehova ngoka ta vulu okutya oye he? Lesha shoka aantu mbaka ya ti.

“Onda li nda pumbwa okugalukila kuJehova.”—ELIE KHALIL

OMUMVO A VALWA: 1976

OSHILONGO MOKA A VALELWA: KIPROS (CYPRUS)

ONDJOKONONA: OMUMATI OMUTANGALALI

ONAKUZIWA YANDJE: Onda valelwa muKipros, ihe onda putukile muAustralia. Aavali yandje mboka ye li Oonzapo dhaJehova oya li ya ningi ashihe shoka taya vulu ya longe ndje ndi kale ndi hole Jehova nosho wo Oohapu dhe, Ombiimbeli. Ihe sho nda li ndi na oomvula omulongo nasha onda tsu mo dhandje. Onda li handi iyaka mo megumbo uusiku ndi ka tokelwe naagundjuka ooyakwetu. Otwa li hatu yaka iihauto nokuninga iinima yilwe iiwinayi.

Petameko, onda li handi ningi iinima ayihe mbika meholamo molwaashoka nda tila ndi geyithe aavali yandje. Ihe mokweendela ko kwethimbo onda kala ndaa na ko we nasha. Onda li nda panga uukuume naantu aakuluntu lela kungame mboka ihaaya longele Jehova, noya li ya nwetha ndje mo nayi. Hugunina, onda ka lombwela aavali yandje kutya inandi hala we okukala oshilyo shelongelokalunga lyawo. Oya li ya kambadhala okukwathela ndje neidhidhimiko, ihe onda li nda tindi ekwatho lyawo. Shika osha li she ya yemateke noonkondo.

Sho nda tembuka mo megumbo, onda tameke okulongitha iingangamithi nonda li nokuli nda tameke okukuna nokulanditha epangwe. Onkalamwenyo yandje oya li yu udha uulunde nonda li handi kala aluhe tandi inyanyudha kookalaba. Onda tameke wo okukala handi geye mbala. Ngele omuntu okwa ti sha nenge a ningi sha inaandi shi hokwa, onda li handi geye noonkondo, shoka sha li hashi ningitha ndje ndi gandagule aantu mokulekule noku ya dhenga. Nenge pamwe nandi tye owala kutya onda li handi ningi ashihe shoka nda longwa kutya Omukriste ke na okuninga.

NKENE OMBIIMBELI YA LUNDULULA ONKALAMWENYO YANDJE: Onda ka panga uukuume wopothingo nomuntu gumwe naye ha longitha iingangamithi, ngoka a li a silwa he manga a li omushona. Olundji otwa li hatu tokelwa tatu popi sigo omokati kuusiku. Mudhimwe dhomoongulohi ndhoka, okwa li ha mbumbulile ndje shoka shi li momutima gwe nosho wo kombinga yankene a yuulukwa he noonkondo. Shaashi sho tandi putuka onda li nda longwa kombinga yetegameno lyeyumuko, onda li handi iyadha tandi mu lombwele kombinga yaJesus kutya okwa li a yumudha aasi nokwa uvaneka kutya ote ke shi ninga ishewe monakuyiwa. (Johannes 5:28, 29) Onda li handi mu lombwele te ti: “Dhiladhila owala to ka mona ishewe tate gwoye. Atuheni otatu vulu tu ka kaleni mOparadisa kombanda yevi sigo aluhe.” Oohapu ndhoka odha li dha gumu kuume kandje komutima noonkondo.

Poompito dhilwe, kuume kandje ngoka okwa li e hole okupopya kombinga yiinima ngaashi omasiku gahugunina nenge elongo lyUukwatatu. Onda li handi mu ulukile omanyolo gi ili nogi ili mOmbiimbeli ye mwene ngoka taga popi oshili kombinga yaJehova Kalunga, yaJesus nosho wo yomasiku gahugunina. (Johannes 14:28; 2 Timoteus 3:1-5) Sho nda kala he popi olundji kombinga yaJehova, onda kala wo handi iyadha olundji te dhiladhila kombinga Ye.

Kashona nakashona oombuto ndhoka aavali yandje ya li ya kambadhala nuudhiginini okukuna momutima gwandje odha tameke okumena. Pashiholelwa, omathimbo gamwe uuna tandi nyanyukilwa pamwe nookuume kandje tse tatu longitha iingangamithi, onda li handi haluka owala te dhiladhila kombinga yaJehova. Ookuume kandje oyendji oya li haya ti kutya oye hole Kalunga, ihe kaya li haye shi ulike meihumbato lyawo. Molwaashoka kanda li nda hala ndi kale nde ya fa, onda dhimbulula shoka ndi na okuninga po. Onda li nda pumbwa okushuna kuJehova.

Oshipu okutseya shoka omuntu wu na okuninga, ihe oku shi ninga okudhigu. Ihe kungame osha li oshipu okweetha po iinima yimwe ngaashi okulongitha iingangamithi. Onda li wo nde etha po okukala nookuume yonale, nomukuluntugongalo megongalo lyopaKriste okwa tameke okukonakona nangame Ombiimbeli.

Ihe okweetha po iinima yilwe okwa li okudhigu. Osha li oshidhigu unene tuu okupangela ongeyo yandje. Opwa li hapu piti ethimbo tandi shi enditha lela nawa, ihe ohaluka owala, nda nyengwa. Onda li handi kala ndu uvite nayi, tandi dhiladhila kutya kandi na we esiku ndi ka pondole. Molwaashoka onda li nda teka omukumo, onda ka popya nomukuluntugongalo ngoka a li ha konakona nangame Ombiimbeli. Molweidhidhimiko nolukeno lwe, okwa li a tsu ndje shili omukumo. Oshikando shimwe okwa li a pe ndje ndi leshe oshitopolwa shi li mOshungolangelo, kombinga yuuwanawa mboka hawu zi mokwaateka omukumo.a Otwa kundathana shoka tandi vulu okuninga ngele ondi iyadha nda geya. Kashona nakashona, Oshungolangelo ndjoka nosho wo okugalikana kuJehova oya kwathele ndje ndi pondole okupangela ongeyo yandje. MuApilili 2000, osho nduno nda ningi Onzapo yaJehova sho nda ninginithwa. Aavali yandje oya li owala taya nuka kenyanyu.

NKENE SHA KWATHELA NDJE: Ngashingeyi ondi na ombili yopamadhiladhilo neiyuvo lya yela molwaashoka ondi shi shi kutya ihandi nyateke we olutu lwandje niingangamithi nenge noluhondelo. Ngashingeyi ohandi nyanyukilwa kehe shoka tandi ningi shi vulithe nale, kutya nduno okuya kiilonga, kokugongala kwopaKriste nenge uuna te thuwa po. Ondi na ngashingeyi etaloko li li nawa kombinga yonkalamwenyo.

Otandi pandula Jehova omolwaavali yandje mboka ya kala taya kwathele ndje. Ohandi dhiladhila wo koohapu dhaJesus ndhoka dhi li muJohannes 6:44 tadhi ti: “Kaku na nando omuntu ta vulu okuya kungame, okuninga Tate, nguka a tuma ndje, te mu eta kungame.” Ohashi gumu ndje komutima uuna tandi dhiladhila kutya onda galukila kuJehova molwaashoka okwa nanene ndje ishewe kuye.

“Onda li ndi na ondjuulukwe yokukala ndi na ngoka te vulu okutya oye tate.”—MARCO ANTONIO ALVAREZ SOTO

OMVULA A VALWA: 1977

OSHILONGO MOKA A VALELWA: CHILE

ONDJOKONONA: OSHILYO SHONGUNDU YAAHIKI YOONGALO HADHI TANGA UUWINAYI NUUKOLOKOSHI

ONAKUZIWA YANDJE: Onda putukile pumeme moPunta Arenas, oshilando oshiwanawa shi li kuumbugantweelela lwokohulo yenenevi lyaAmerika lyokUumbugantu. Manga nda li ndi na oomvula ntano, aavali yandje oya hengana, naashika osha li sha ningitha ndje ndi kale ndu uvite nda ekelwahi. Onda li ndi na ondjuulukwe yokukala ndi na ngoka te vulu okutya oye tate.

Pethimbo sho meme ta konakona Ombiimbeli nOonzapo dhaJehova okwa li ha fala ndje kokugongala kwopaKriste kOshinyanga shUukwaniilwa. Ihe onda li he kala te yayagana ngame te vunyauka molwaashoka kanda li ndi hole ko. Sho nda gwanitha oomvula 13, onda kala ihaandi yi ko we nokuli.

Pethimbo opo tuu mpoka onda tameke okukala ndi hole oongalo, nonda mono kutya ondi na uunkulungu woku dhi hika. Sho nda ka gwanitha oomvula 15, onda li nale handi hiki oongalo ndhoka hadhi hikwa mokulekule naandhoka tadhi tanga uuwinayi nuukolokoshi, piituthi nopomahala gomanwino. Molwaashoka onda li handi kala naahiki ya pyokoka, onda tameke wo okukala ndi hole oongalo dhoshikuluntu. Onda tameke okuhita osikola yokudheula aahikingalo. Sho ndi na oomvula 20, onda tembukile koSantiago, oshilandopangelo shaChile, opo ndi ka tsikile neilongo lyandje. Ngame te tsikile ngaa okuhika noongundu dhaahikingalo mboka haya hiki oongalo ndhoka hadhi tanga uuwinayi nuukolokoshi naandhoka hadhi hikwa mokulekule.

Ethimbo alihe ndyoka onda kala ndu uvite onkalamwenyo yandje ya fa kaayi na elalakano. Opo kaandi kale ndi na eiyuvo ndyoka onda li handi kolwa nokulongitha iingangamithi pamwe naahikingalo ooyakwetu mboka nda li nda tala ko kutya oyaandjetu. Onda li ndi na ombepo yuukakombwiilitha naashika osha li hashi imonikila meholokopo lyandje. Onda li handi zala iikutu iiluudhe, ndi na oombezi oonde nomafufu omale tagi ihilile moombwetelo.

Olundji, omolwiikala yandje onda li handi tukula omalugodhi nokukala ndi na iikoya nopolisi. Esiku limwe manga nda kolwa, onda ponokele aalandithi yiingangamithi mboka ya li taye tu hindi nookuume kandje. Aalandithi yiingangamithi mbaka oya dhenge ndje nayi, ondjamama yandje e tayi teka.

Ihe mboka ya li ya yemateke ndje noonkondo ookuume kandje kopothingo. Esiku limwe, onda dhimbulula kutya nani omukadhona gwandje okwa kala ha yi nakuume kandje kopothingo uule woomvula, ihe ookuume kandje ayehe oya kala ye shi holeka ndje. Shika osha li sha yemateke ndje unene shili.

Onda shuna koPunta Arenas hoka nda li nda tameke okulonga aantu omusika nonda li handi hiki o-cello (ano oludhi lwiiketala). Onda li wo nda tsikile okuhika nokukwata oongalo noongundu dhaahikingalo mboka haya hiki oongalo ndhoka hadhi tanga uuwinayi nuukolokoshi naandhoka hadhi hikwa mokulekule. Onda mono po omukadhona gwedhina Sussan, e tatu kala hatu kala pamwe. Sho pwa piti okathimbo, Sussan okwa dhimbulula kutya ngame inandi itaala melongo lyUukwatatu ndyoka lyi itwaala kumeme gwe. Okwa pula ndje a ti: “Ano nani oshili oyini?” Onde mu yamukula kutya ondi shi shi nawa kutya elongo lyUukwatatu kali li mondjila, ihe kanda li tandi vulu oku mu ulukila mOmbiimbeli. Ihe onda li ndi shi shi kutya oolye taya vulu oku mu ulukila. Onde mu lombwele kutya Oonzapo dhaJehova otadhi vulu oku mu longa oshili okuza mOmbiimbeli. Okuza mpoka onda galikana kuKalunga ndi mu pule ekwatho, oshinima shoka nda li nda hula nale.

Omasiku hamale, onda mono omulumentu ta monika a fa omuntu ndi mu shi, nonda yi kuye ndi ke mu pule ngele ye gumwe gwomOonzapo dhaJehova. Nonando okwa li a tila omolweholokopo lyandje, okwa li a yamukula omapulo gandje nombili kombinga yokugongala pOshinyanya shUukwaniilwa. Onda li ndi itaala kutya ndika olyo eyamukulo kegalikano lyandje. Onda yi kOshinyanga shUukwaniilwa e tandi kuutumba momukweyo gwokonima opo kaandi monike. Ihe oyendji oya li ya dhimbulula ndje natango shaashi onda li handi kala pokugongala sho nda li okanona. Oya taamba ndje ko nokupapatela ndje, shoka sha li sha ningitha ndje ndi kale ndu uvite ombili kaaku na we. Onda li ndu uvite owala nda fa nda galukila kegumbo. Sho nda mono omulumentu ngoka a li ha longo ndje Ombiimbeli sho nda li okanona, onde mu pula a konakone ishewe nangame.

NKENE OMBIIMBELI YA LUNDULULA ONKALAMWENYO YANDJE: Esiku limwe, onda lesha Omayeletumbulo 27:11 ngoka taga ti: “Mumwandje, ninga oondunge, u nyanyudhe omwenyo gwandje.” Onda li nda gumwa shili komutima sho nda lesha kutya omuntu gwanathangwa ota vulu okunyanyudha omutima gwOmushiti gweshito alihe. Onde shi dhimbulula kutya nani Jehova ota vulu okuninga Tate ngoka nda kala te kongo onkalamwenyo yandje ayihe.

Onda li nda hala okwoopalela Tate gwomegulu nokulonga ehalo lye, ihe uule woomvula onda kala nda pikwa kiingangamithi nokiikolitha. Opo nduno nde ku uva ko oohapu dhaJesus dhi li muMateus 6:24 ndhoka tadhi ti kutya “kaku na ngoka ta vulu okulongela aawa yaali.” Sho te kambadhala okweetha po iinima yimwe, ekotampango ndyoka li li 1 Aakorinto 15:33 ta li ti kutya “we ende nombudhi, nangoye oto ningi ombudhi” olya gumu ndje komutima. Onde shi dhimbulula kutya itandi vulu okweetha po omikalo omiwinayi ngele ohandi yi natango komahala hoka nda kala handi yi shito nokukala nookume yonale. Omayele gOmbiimbeli oga li ga yelela ndje kutya ondi na okukutha ko oongaku opo ndi ethe po iinima mbyoka ya li tayi pundukitha ndje.—Mateus 5:30.

Molwaashoka onda li ndi hole oongalo ndhoka hadhi hikwa mokulekule, osha li oshidhigu oku dhi etha po. Ihe ookuume kandje megongalo oya li ya kwathele ndje ndi dhi ethe po. Onde etha po okunwa sha pitilila nokulongitha iingangamithi. Omafufu noombenzi dhandje onde dhi kulula ko, e tandi etha po okuzala iikutu iiluudhe oyo ayike. Sho nda lombwele Sussan kutya onda hala okukulula ko omafufu gandje, okwa li a hala okutseya kutya oshike naanaa hashi ningwa ko kOshinyanga shUukwaniilwa. Okwa lombwele ndje a ti: “Otandi yi naanaa nangoye kOshinyanga shUukwaniilwa ndi ka tale kutya oshike hashi ningwa ko!” Okwa li a hokwa shoka a mono ko, nziya naye okwa tameke okukonakona Ombiimbeli. Konima, otwa hokana. Mo-2008, otwa ningi Oonzapo dhaJehova sho twa ninginithwa. Otwa nyanyukwa sho twa hangana nameme mokulongela Jehova.

NKENE SHA KWATHELE NDJE: Onda manguluka ko kenyanyu lyiifundja nokookuume ye na omakoto. Ondi hole natango oongalo, ihe ngashingeyi ohe tala kutya ote pulakene kudhini. Onkalamwenyo yandje yonale oya longa ndje sha shoka handi longitha okukwathela yaandjetu nosho wo yalwe, unene tuu aagundjuka. Onda hala oku ya kwathela ya mone kutya iinima yomuuyuni ohayi kala ya fa tayi monika nawa, ihe pehulilo iinima mbika “oyo iiyagaya yowala.”—Aafilippi 3:8.

Onda panga uukuume naantu mboka ye li ookuume kashili megongalo lyopaKriste, moka mu na ohole nombili yashili. Sha simanenena, ondi na ngashingeyi ekwatathano ewanawa naJehova, nonda mona Tate ngoka nda kala nale te kongo.

[Enyolo lyopevi]

[Oohapu dha simana pepandja 13]

“Onda galukila kuJehova molwaashoka okwa nanene ndje ishewe kuye.”