Onda li ndi hole okukala naanamimvo aanawino

Nakuhokolola kuku Elva Gjerde

Omimvo 70 dha ka pita, onkalamwenyo yandje oya li ya lunduluka thiluthilu sho memegona ngoka a li e ya oku tu talela po a lombwele tate oshinima shontumba. Okuza mpono, opwa kala wo aantu yalwe mboka ya kala nokunwetha mo onkalamwenyo yandje. Momukokomoko gwethimbo onda panga uukuume wopothingo wu vulithe mboka ndi na nale naantu yalwe. Andiya ndi mu kuthile ko kashona.

ONDA valelwa moshilando Sydney, shi li muAustralia, mo 1932. Aavali yandje oya li yi itaala muKalunga, ihe kaya li haya yi kongeleka. Meme okwa li ha lombwele ndje kutya Kalunga oku wete aluhe shoka tandi ningi, nota ka geela ndje ngele ondimutsini. Onda kala ndi na uumbanda wokutila Kalunga. Kakele kaashono, onda kala ndi na ohokwe mOmbiimbeli. Sho memegona a kala he tu talele po omahuliloshiwike, okwa kala ha lombwele ndje omahokololo ogendji taga hokitha okuza mOmbiimbeli. Onda kala aluhe handi kala nda hala esiku li thike e tu talele po.

Sho ndi na omimvo omulongo nasha, tate okwa li ha lesha omambo gamwe ge na olwaala lwuutamvula ngoka ga li ga pewa meme komukulukadhi gumwe omukokele, Onzapo yaJehova. Tate okwa li a fuuka kuuyelele mboka wu li momambo ngoka gopaKriste nokwa li a zimine a konakone Ombiimbeli nOonzapo. Ongulohi yimwe sho taya konakona, tate okwa adhelele ndje tandi ya ambele. Okwa li a hala okutya nandi ka lale, ihe ngoka ta konakona naye okwa ti: “Omolwashike itoo etha Elva naye a kale po?” Shoka osha li etameko lyonkalamwenyo yandje ompe nosho wo okupanga uukuume naJehova, Kalunga kashili.

Konima yaashoka, tse natate otwa tameke okuya kokugongala kwopaKriste. Tate okwa li i inyengithwa kwaashoka ti ilongo a lundulule onkalamwenyo ye. Okwa tameke nokuli okupangela ongeyo ye. Shika osha ladhipike meme nomumwamememati omukuluntu, Frank ya tameke okuya kokugongala.a Atuhe yane otwa ningi ehumokomeho notwa li twa ninginithwa tu li Oonzapo dhaJehova. Okuza mpono onkalamwenyo yandje oya li ya nwethwa mo momikalo dha yoolokathana kaakokele.

NKENE NDA HOGOLOLA EITHANO LYANDJE

Sho nda li ndi na omimvo omulongo nasha onda li ndi hole okukala naanamimvo yomegongalo lyetu. Gumwe gwomuyo okwa li omumwameme Alice Place, ngoka a li e tu talele po oshikando shotango pegumbo. Uuna ndi li naye onda fa owala ndi li nakuku. Kuku Alice okwa li a dheulile ndje uukalele womontaneho nokwa ladhipike ndje wo ndi ninginithwe. Onda ninginithwa sho ndi na omimvo 15.

Onda li wo nda panga uukuume naaihokani aanamimvo, tate Percy nameeMadge [Margaret] Dunham mboka ya li aakokolindjila muLatvia mo 1930 nasha. Okweendathana nayo okwa li kwa nwetha mo onakuyiwa yandje. Onda li ndi hole omwaalu nonda li nda hala oku ke gu longa. Pethimbo lyIita Iitiyali yUuyuni muEuropa, oya li ya pulwa ya ka longe koBetel yaAustralia yi li mokalando Sydney. Oya li ye hole ndje noonkondo. Oya li haya hokololele ndje iimoniwa oyindji yituntula mbyoka ya li haya nyanyukilwa miilonga yuutumwa. Osha li sha yelele ndje nawa kutya okulonga Ombiimbeli otaku mbilipaleke noonkondo ku vule okulonga omwaalu. Onkee ano, onda tokola okuninga omutumwa.

Tate Percy nameeMadge oya ladhipike ndje ndi kuthe tango uukokolindjila, opo ndi vule okuninga omutumwa. Mo 1948 sho nda li ndi na omimvo 16, onda li ndi imbwanga mumwe naagundjuka yalwe omulongo mboka ya li taya nyanyukilwa iilonga yuukokolindjila megongalo lyetu muHurstville, shomuSydney.

Oomvula dhi vulithe pune dha landula ko, onda ka kokola ondjila moondoolopa ne dhilwe, adhihe odhi li muNew South Wales nomoQueensland. Omukonakoni gwandje gwotango okwa li Betty Law (lya tseyika nawa Remnant). Oka li okakadhona ke hole aantu noke vule ndje noomvula mbali. Konima otwa ka kala hatu longo pamwe miilonga yuukokolindjila mondoolopa yaCowra, yi li ookilometa 230 lwaampono kuuninginino waSydney. Nonando otwa longa owala pamwe ethimbo efupi, sigo okunena otu li ookuume.

Sho nda ningi omukokolindjila i ikalekelwa, onda tembukile kondoolopa Narrandera yi li ookilometa 220 kuuningininolukadhi waCowra. Hoka otwa kala hatu longo pamwe naJoy Lennox (lya tseyika nawa Hunter) omukokolindjila omulaadhi ngoka naye e vule ndje noomvula mbali. Otse atuke twa li Oonzapo moNarrandera. Ngame naJoy otwa li hatu kala megumbo lyatate Ray Irons nomukadhi Esther, aaihokani mboka ye hole okuyakula aayenda. Oye na omumati gumwe naakadhona yatatu, ayehe oya li ye na ohokwe moshili. Mokati koshiwike, tate Ray nomwanamati oya li haya ka longa kofaalama yoonzi niilya, omanga meme Esther noyanakadhona haya tonatele egumbo lyawo hali futilwa moka hamu kala aayendanandjila pakathimbo. Ngame naJoy otwa li hatu telekele egumbo alihe lyatate Ray uulalelo mOsoondaha kehe nosho wo aayendanandjila yawo, aalumentu ya sa ondjala haya longo kolutenda. Kiimaliwa mbyoka hatu futu egumbo otwa li hatu kuthilwa ko omolwiilonga mbyoka. Konima ngele twa mana okwoopaleka iinima ayihe otwa li hatu palutha egumbo lyatate Ray niikulya yopambepo iitoye mokukonakona nayo Oshungolangelo oshiwike kehe. Egumbo alihe olya li lye ya moshili nolyo lya li lya toto po egongalo lyaNarrandera.

Mo 1951, onda li poshigongi shoshitopolwa muSydney. Onda li nda kala pokugongala kwi ikalekelwa kwaakokolindjila mboka ya hala okuya miilonga yuutumwa. Oshigongi shoka osha li sha ningilwa motenda onene, nopwa li aantu ye vulithe 300. Omumwatate Nathan Knorr, a za koBetel yaBrooklyn oye a li a popitha aakalipo. Okwa ti kutya opu na ompumbwe ye endelela yokuuvithila aantu onkundana ombwanawa kombanda yevi alihe ekaliwa. Otwa li twa pakaleka omakutsi sho ta popi. Aakokolindjila oyendji mboka ya li po oya ka tameka okuuvitha onkundana yUukwaniilwa kiilongo mbyoka yi li komunkulofuta gwaAmerika, gwaAsia nogwaAustralia nokiitopolwa yilwe. Onda li nda nyanyukwa sho nda li gumwe gwomAaustralia 17 mboka ya li ya hiywa kOsikola yaGilead yolweetho oluti-19, mo 1952. Onda li nda ningi omutumwa sho ndi na omimvo 20.

OMALUNDULUKO NGOKA NDA NINGI

Elongo mosikola yaGilead nosho wo okukala mo inaku hwepopaleka owala ontseyo yandje yOmbiimbeli nokukoleka eitaalo lyandje, ihe okwa hwepopaleke wo omaukwatya gandje. Onda li omugundjuka nondi hole kehe shimwe shoka tandi ningi shi kale sha ningikika, nonda li nda tegelela kehe gumwe osho a kale ngaaka. Onda li ndi na oompango oondhigu unene. Pashiholelwa, onda li nda kumwa sho nda mono omumwatate Knorr ta dhana etanga pamwe naagundjuka Aabetel.

Aalongi ayehe kosikola yaGilead oye na owino yoomvula odhindji. Oya li ye shi wete kutya otandi nyengwa. Oya li ye hole ndje noya kwathele ndje ndi lundulule okudhiladhila kwandje. Mokweendela ko kwethimbo, onda mono kutya Jehova omunahole noha pandula, iha tulile po aapiya ye oompango nenge e ya thiminike. Aalongwa yamwe mongundu yetu nayo oya li wo ya kwathele ndje. Otandi dhimbulukwa nawa sho omukadhona gumwe a li a lombwele ndje a ti: “Elva, Jehova megulu ke li mo ha longitha ongola. Ino itulila po oompango!” Oohapu dhe ndhoka odha li dha gumu omutima gwandje.

Sho twa mana, ngame nooyakwetu yane otwa li twa tumwa koNamibia. Mbalambala otwa tameke okukala hatu konakona Ombiimbeli naantu ye li 80. Onda li ndi hole Namibia niilonga yuutumwa. Ihe otwa li tatu endelathana nomumwatate gumwe ngoka twa li naye koGilead nokwa li a tumwa koSwitzerland. MoNamibia onda kala mo owala omvula yimwe e tandi yi komumati gwandje koSwitzerland. Sho twa hokana, onda kala tandi longo pamwe nomusamane gwandje miilonga yuutonatelishikandjo.

UUDHIGU MBOKA NDA PITA MUWO

Konima sho twa longo omimvo ntano miilonga yuutonateli, otwa li twa hiywa tu ka longe koBetel yaSwitzerland. Onda li nda nyanyukwa noonkondo sho nda li mokati kaamwatate naamwameme aakokele oyendji ya pyokoka.

Ihe konima yokathimbo onda li nda ningilwa oshinima tashi halutha. Onda li nda mono kutya omusamane gwandje ke shi omudhiginini kungame nokuJehova. Okwa thigi ndje po nonda li nda gwililwa po noonkondo. Andola kapwa li ekwatho lyopahole neyambidhidho lyookuume kandje aakokele moBetel, ando kandi shi kutya ondu ungaunga ngiini nonkalo ndjoka. Oya li haya pulakene kungame uuna nda pumbwa okupopya noya li haye etha ndi vululukwe po mpoka sha pumbiwa. Oohapu dhawo tadhi hekeleke niilonga yawo yohenda oya li ya kwathele ndje pethimbo ndyoka nda li ndi li muuwehame uululululu noya li ya kwathele ndje ndi hedhe lela popepi naJehova.

Otandi dhimbulukwa wo oohapu dha popilwe nale omimvo dha pita kaanamimvo yamwe mboka ya li momamakelo. Gumwe gwomuyo okwa li meme Madge yaDunham. Okwa li a lombwele ndje oshikando shimwe a ti: “Elva, sho to longele Jehova oto ki iyadha momamakelo ogendji, ihe ngoka tage ku ehameke unene otage ke ku zilila kwaamboka yopopepi nangoye. Uuna wi iyadha mugo, hedha popepi naJehova. Kala wu shi kutya oye ho longele, ihe haantu inaaya gwanenena.” Omayele ngoka meme Madge a pe ndje oga li ga kwathele ndje sho ndi li monkalo ndjoka ondhigu. Onda li nda tokola kutya itandi thigi po nando Jehova omolwepuko ndyoka omusamane gwandje a ningi.

Onda li nda tokola okushuna kuAustralia ndi ka kokolondjila popepi noyaandjetu. Pethimbo lyaantu haya yi ya ka talelele po kefuta, onda li ndi hole aluhe okukundathana kombinga yOmbiimbeli naamboka tandi ende pamwe nayo. Mongundu yaamboka hatu kundathana nayo omwa li omulumentu gumwe a mwena, omuNorwegian, gwedhina Arne Gjerde. Okwa li e na ohokwe shili. Konima yethimbo Arne okwa li a talele ndje po nosho wo yaandjetu muSydney. Okwa humu komeho nziya pambepo nokwe ya moshili. Mo 1963, otwa hokana naArne, nokonima yomimvo mbali onda li nda pulumutha okanona okamati, Gary.

UUDHIGU WULWE ISHEWE

Ngame natate Arne nosho wo omumati gwetu Gary otwa li tu na ombili megumbo lyetu. Tate Arne okwa li a gwedhele egumbo lyetu, opo tu kale pamwe naavali yandje mboka ya li ya kulupa. Konima owala yomimvo hamano mondjokana otwa li twa adhika ishewe kuupyakadhi wulwe. Tate Arne okwa monika okankela yokuuluyi. Onda kala handi mu talele po kehe esiku moshipangelo sho ta mono epango lye. Okwa li a ti po hwepo uule wokathimbo, ihe onkalo ye oya nayipala sho a kwatwa ishewe kombanda. Onda li nda lombwelwa kutya ota kala owala nomwenyo iiwike yontumba. Ihe okwa li a kala nawa e ta lalekwa. Onda kala tandi mu panga kashona nakashona sigo a aluka. Mokweendela ko kwethimbo okwa tameke okweenda ishewe nokwa li a tsikile niilonga ye yuukuluntugongalo. Molwaashoka okwa li e na omwenyo omwaanawa ye omunyanyukwi, osha li she mu kwathele a aluke. Osha li wo oshipu kungame oku mu sila oshimpwiyu omolwuukwatya we mboka.

Mo 1986, onkalo yatate Arne oya li ishewe ya nayipala. Pethimbo mpoka aavali yandje oya adhika ya sa nale. Otwa li twa tembukile koshitopolwa oshiwanawa shi na oondundu oombulau shi li kondje yaSydney. Hoka otwa li popepi nookuume ketu. Omumati gwetu Gary okwa hokana Karin, omumwameme a kola pambepo noya li ya tokola tu kale pamwe nayo megumbo limwe. Konima yoomwedhi dhontumba atuhe otwa li twa tembukile kegumbo limwe li li popepi negumbo lyetu naArne lyonale.

Oomwedhi 18 dhahugunina dhonkalamwenyo ye, tate Arne okwa li owala mombete nokwa li a pumbwa esiloshimpwiyu ethimbo alihe. Molwaashoka onda li handi kala ethimbo olindji megumbo, onda li handi konakona Ombiimbeli nosho wo iileshomwa yopaMbiimbeli oowili mbali esiku kehe. Uuna tandi konakona, onda li handi mono omayele ogendji gopandunge ngoka ga li ga kwathele ndje ndi ungaunge nonkalo ndjoka. Onda li wo handi talelwa po kaanamimvo yomegongalo lyetu, yamwe yomuyo oomboka ya pita monkalo ya fa ndjoka nda li. Shoka osha li sha talaleke ndje. Tate Arne okwa si muApilili 2003 e na einekelo kutya ota ka yumuka.

MBOKA YA LI YA AMBIDHIDHA NDJE UNENE

Okuza kuunona, onda li handi kala nda hala okupondola mukehe shimwe tandi ningi. Ihe onda ka mona kutya iinima monkalamwenyo olundji ihayi ende ngaashi omuntu wa hala. Onda mona omayambeko kaage shi okuyalulwa nonda li ndi idhidhimikile omaudhigu gaali omanene. Onda kanitha ookuume kandje kopandjokana, gumwe omolwokwaanuudhiginini nomukwawo omolwomukithi. Ethimbo alihe ndyoka onda li nda mono ewiliko nosho wo ehekeleko okuza koonzo odhindji. Ihe natango omukwathi gwandje a shiga ko oye “Omusamane gwomimvo,” Jehova Kalunga. (Dan. 7:9, OB-1954) Omayele ge oga kwathela ndje ndi lundulule omaukwatya gandje noge etela ndje omayambeko miilonga yandje yuutumwa. Uuna ndi li muudhigu, ‘oha hekeleke ndje e ta nyanyudha ndje omolwohole ye.’ (Eps. 94:18, 19) Ohole nosho wo eyambidhidho lyoyaandjetu ‘nolyookuume mboka ya valwa opo ya kwathe moluhepo,’ oya kwathele ndje shili. (Omayel. 17:17) Oyendji yomuyo oya li aanamimvo aanawino.

Tatekululukwa Job okwa tile “oondunge otadhi monika mokati kaakokele; okukala nomwenyo omule otaku ku etele owino.” (Job 12:12) Shika oshoshili, molwaashoka onde shi mona monkalamwenyo yandje. Omayele gaakokele aanawino oga li ga kwathela ndje, ehekeleko lyawo olya koleke ndje nuukuume wawo wopothingo owa pupaleke onkalamwenyo yandje. Onda nyanyukwa sho nda li ndi hole aakokele.

Ngashingeyi nangame omukokele gwomimvo 80. Oonkalo moka nda piti odha kwathela ndje noonkondo ndi kale ndi na ko nasha unene noompumbwe dhaakokele yalwe. Ondi hole natango oku ya talela po noku ya kwathela. Ondi hole wo okukala naagundjuka, omolwoonkondo dhawo nuulaadhi wawo. Ohandi kala ndi wete shi li elalekonuuyamba uuna aagundjuka taye ya okupula omayele kungame.

[Enyolo lyopevi]

[Ethano pepandja 14]

Tatu kokola ondjila naJoy Lennox koNarrandera

[Ethano pepandja 15]

Ndi li niilyo yuukwanegumbo waBetel moSwitzerland mo 1960

[Ethano pepandja 16]

Tandi sile oshimpwiyu tate Arne sho a li te ehama