Longela Jehova manga omasiku guudhigu inaage ya

1, 2. (a) Salomo okwa li a nwethwa mo a nyolele aagundjuka omayele geni? (b) Omolwashike omayele gaSalomo ga kwatela mo wo Aakriste mboka ye na oomvula 50 nasha naamboka ye vule po?

OMUKWANIILWA SALOMO okwa li a nwethwa mo a nyolele aagundjuka oohapu ndhika: “Dhimbulukwa Omushiti gwoye momasiku guugundjuka woye, manga omasiku guudhigu inaage ya.” “Omasiku guudhigu” ogeni? Salomo okwa longitha iitya yopakatewo iihokithi a popye kombinga yomasiku omadhigu guukulupe, mpoka aakulupe haya kanitha omayego, omeho, nomakutsi, oonyala nomagulu gawo haga kakama, haya ningi oomvi nohaya andalala. Kapu na ngoka e na okutegelela a thike pethimbo ndyoka lyuukulupe opo a tameke okulongela Jehova. — Lesha Omuuvithi 12:1-5.

² Aakriste oyendji mboka ye li mepipi lyoomvula 50 nasha nosho wo mboka ye vule po oye na natango oonkondo odhindji. Otashi vulika ya kale ye na oomvi, ihe otashi vulika uukolele wawo itaawu nyangwanyangwa ngaashi sha popiwa kuSalomo. Mbela Aakriste aakokele itaya vulu okwiilonga mo sha momayele ga nwethwa ngoka ga nyolelwa aagundjuka taga ti: “Dhimbulukwa Omushiti gwoye”? Omayele ngoka oga hala lela okutya shike?

3. Okudhimbulukwa Omushiti gwetu okwa kwatela mo shike?

³ Nonando otashi vulika twa kala nokulongela Jehova uule woomvula odhindji, oshi li nawa tu kale hatu dhiladhila omathimbo nomathimbo kombinga yuuwanaweelela wOmushiti gwetu. Omwenyo ngoka e tu pa kagu shi tuu omagano dhingi? Eshito olya kitakana naantu itaya vulu oku li uva ko. Jehova okwe tu pa omasiloshimpwiyu gi ili nogi ili ogendji opo tu vule okunyanyukilwa onkalamwenyo momikalo odhindjidhindji. Uuna tatu dhiladhila keshito lyaJehova, ohashi tu ningitha tu kale ishewe tu na olupandu lwohole ye, lwuunongo we nosho wo lwoonkondo dhe. (Eps. 143:5) Ihe okudhimbulukwa Omushiti gwetu okwa kwatela mo wo okudhiladhila kwaashoka a tegelela tu ninge. Pethimbo ndyoka sho tatu tedhatedha, ohatu kala tu uvite kutya otu na okuulika kutya otwa pandula Omushiti gwetu moku mu longela pakuudha ngaashi tatu vulu manga tu na omwenyo. — Omuuv. 12:13.

OOMPITO DHI IKALEKELWA DHOMUUKOKELE

4. Epulo lini Aakriste mboka ya pyokoka taya vulu okwiipula, nomolwashike?

⁴ Ngele owu na ontseyo yoomvula odhindji, oto vulu okwiipula epulo ndika lya simana to ti: ‘Onkalamwenyo yandje otandi yi longitha ngiini ngashingeyi manga ndi na natango oonkondo nuukolele?’ Wu li Omukriste a pyokoka, owu na oompito ndhoka yalwe kaaye na. Oto vulu okuhokololela aagundjuka kombinga yaashoka wi ilonga kuJehova. Oto vulu okutsa yalwe omukumo moku ya lombwela iimoniwa mbyoka wa kala to nyanyukilwa sho to longele Kalunga. Omukwaniilwa David okwa li a galikana opo a mone oompito e shi ninge. Okwa nyola a ti: “Kalunga, owa longo ndje okuza muugundjuka. . . . Ngashingeyi sho nda kulupa nondi na oomvi, ino etha ndje, Kalunga! Kala pungame, sho te tseyitha oonkondo niikumitha yoye komaluvalo taga landula.” — Eps. 71:17, 18.

5. Ongiini Aakriste aakokele taya vulu okulonga yalwe shoka yi ilonga?

⁵ Oshike to vulu okuninga opo wu topolele yalwe ontseyo ndjoka wa mona muule woomvula? Mbela ito vulu okuhiya aapiya yaKalunga aagundjuka kegumbo lyoye opo mu tungathane? Mbela ito vulu oku ya pula wu ka longe pamwe nayo muukalele noku yu ulukila nkene ho nyanyukilwa okulongela Jehova? Elihu ngoka a li ko pethimbo lyonale okwa ti: “Aakuluntu naa popye; aanamimvodhindji naa holole oondunge dhawo.” (Job 32:7) Omuyapostoli Paulus okwa li a ladhipike aakiintu Aakriste mboka ya pyokoka ya tse yalwe omukumo moohapu nomoshiholelwa shawo. Okwa nyola a ti: ‘Oonekulu aakokele oye na okulonga elongo lyu uka.’ — Tit. 2:3.

DHILADHILA KOOMPITO NDHOKA WU NA DHOKUKWATHELA YALWE

6. Omolwashike Aakriste mboka ye na owino kaaye na okukala yu uvite kutya itaya vulu okukwathela yamwe?

⁶ Ngele owu li Omukriste a pyokoka, oto vulu okuninga oshindji wu kwathele yalwe. Dhiladhila kutya ontseyo ndjoka wu na ngashingeyi ina yi fa ndjoka wa li wu na oomvula 30 nenge 40 dha ka pita. Owu shi okutula miilonga omakotampango gOmbiimbeli moonkalo dhi ili nodhi ili monkalamwenyo. Nokaapu na omalimbililo owu na uunkulungu wokulongitha Ombiimbeli wu adhe omitima dhayalwe. Ngele owu li omukuluntugongalo owu shi okukwathela aamwatate mboka ya gwila meyono. (Gal. 6:1) Otashi vulika wi ilonga nkene wu na okutonatela omaipyakidhilo gegongalo, iikondo yiigongi, nenge iilonga yokutunga Iinyanga yUukwaniilwa. Otashi vulika wu shi okupopya noondohotola shi na ko nasha nomikalo dhokupanga omuvu nopwaahe na okulongitha ombinzi. Nonando opo owala we ya moshili, owu na ontseyo yi na oshilonga lela monkalamwenyo. Pashiholelwa, ngele owu na aanona, owu na okukala wa mona uunongo owundji moku ya tekula. Aakriste aakokele oye li onzo onene yokuladhipika aapiya yaJehova moku ya longa, moku ya wilika, nomoku ya nkondopaleka. — Lesha Job 12:12.

7. Edheulo lini li na oshilonga ndyoka Aakriste aakokele taya vulu okugandja kaagundjuka?

⁷ Ongiini to vulu okukwathela yalwe pakuudha? Otashi vulika wu ulukile aagundjuka nkene ye na okutameka omakonakonombiimbeli noku ga ninga. Ngele ngoye omumwamweme, mbela ito vulu okukwathela aamwameme aagundjuka mboka ye na aanona nkene taya vulu okukutha ombinga miinima yopambepo sho taya sile oshimpwiyu oyana? Ngele ngoye omumwatate, mbela ito vulu okulonga aamwatate aagundjuka ya kale haya gandja iipopiwa nehwamo nokukala ya pyokoka mokuuvitha onkundana ombwanawa? Mbela ito vulu oku ya ulukila nkene ho talele po aamwatate naamwameme aakokele opo wu ya tse omukumo? Nonando ku na we oonkondo ndhoka wa li ho kala wu na, owu na oompito oombwanawa lela dhokudheula aagundjuka. Oohapu dhaKalunga otadhi ti: “Uulenga waagundjukamati owo oshitima shawo, nuulenga waakulupe owo oomvi dhawo.” — Omayel. 20:29.

OKU KA LONGA KIITOPOLWA HOKA KU NA OMPUMBWE ONENE

8. Omuyapostoli Paulus okwa li a ningi shike sho a thiki mepipi lyuukokele?

⁸ Omuyapostoli Paulus okwa li a longitha uunkulungu we awuhe a longele Kalunga sho a ka kala omukokele. Sho a ka za mo mondholongo muRoma momumvo 61 E.N. lwaampono, okwa adhikile a longa oomvula odhindji nuudhiginini miilonga yuutumwa mbyoka kaaya li iipu nokwa li ta vulu okukala muRoma u uvithe. (2 Kor. 11:23-27) Nopwaahe na omalimbililo, aamwatate yomoshilando shoka oshinene oya li taya ka nyanyukilwa ekwatho ndyoka a li ta vulu oku ke ya pa. Ihe Paulus okwa li a mono kutya kiitopolwa yokondje yiilongo oku na natango ompumbwe onene. Paulus okwa li a tameke ishewe iilonga ye yuutumwa pamwe naTimoteus nosho wo Titus sho ya ka talela po muEfeso nomuKreta. Otashi vulika wo ya li ya talele po muMakedonia. (1 Tim. 1:3; Tit. 1:5) Katu shi wo ngele okwa li a talele po Espania, ihe okwa li e na elalakano oku shi ninga. — Rom. 15:24, 28.

9. Uunake tashi vulika Petrus a li a tembukile koshitopolwa shoka sha li shi na ompumbwe onene? (Tala kethano ndyoka li li petameko.)

⁹ Omuyapostoli Petrus otashi vulika a li e na oomvula 50 nasha sho a tembukile kiitopolwa hoka kwa li ku na ompumbwe onene. Omolwashike shoka tashi vulika shoshili? Ngele okwa li e thike puJesus nenge tashi vulika e mu vule, otashi vulika a li e na oomvula 50 lwaampono sho a ka tsakanena naayapostoli ooyakwawo muJerusalem momumvo 49 E.N. (Iil. 15:7) Sho pwa piti ethimbo lyontumba konima yomutumba ngoka, Petrus okwa yi a ka kale muBabilona, tashi vulika e ku uvithile oshigwana oshinene shAajuda shoka sha li moshitopolwa shoka. (Gal. 2:9) Moka omo a li a nyolele ontumwafo ye yotango ya nwethwa mo, lwopomumvo 62 E.N. (1 Pet. 5:13) Kashi shi oshipu okukala moshilongo kaashi shi shaandjeni, ihe Petrus ka li e etha uukokele wu mu imbe a kale inaa nyanyukwa sho ta longele Jehova ethimbo lyu udha.

10, 11. Gandja oshimoniwa shagumwe ngoka a li a tembuka a ka longe koshitopolwa shilwe hoka ku na ompumbwe onene sho a li omukokele.

¹⁰ Kunena, Aakriste oyendji mboka ye na oomvula 50 nasha noye vule po ohaya mono kutya oonkalo dhawo odha lunduluka nosho wo kutya otaya vulu okulongela Jehova momikalo omipe. Yamwe oya tembukila kiitopolwa hoka ku na ompumbwe onene. Pashiholelwa, Robert okwa nyola a ti: “Ngame nanekulu lyandje otwa li mepipi lyoomvula 50 nasha sho twa li twa mono kutya otu na oompito oompe. Omwanamati gwetu okwa adhikile a za mo megumbo, tse katwa li tu na we aavali aakokele mboka ya pumbwa ekwatho, notwa adhikile twa thigulula okamaliwa kontumba. Onda li nda yalula kutya ngele otwa landitha po egumbo lyetu otatu ka vula okufuta omukuli gwalyo nokwiikwathela sigo nda mono oshimalilwa shopenzela. Otwa li tu uvu kutya moBolivia aantu oyendji oye na ehalo lyokukonakona Ombiimbeli, nokukala mo oku na ombiliha. Onkee ano otwa li twa tokola okutembukila hoka. Kasha li oshipu okwiigilila onkalo yetu ompe. Iinima ayihe oya li ya yooloka ko noonkondo kwaambyoka twa li twi igilila muAmerika lyokuumbangalantu. Ihe oonkambadhala dhetu odha li dhe eta iizemo iiwanawa.”

¹¹ Robert ota gwedha ko ta ti: “Monkalamwenyo yetu ayihe ohatu kala twi ipyakidhila niinima yegongalo. Aantu yamwe mboka twa konakona nayo Ombiimbeli oya ninginithwa. Otwa li twa konakona nuukwanegumbo wumwe mboka kaawu na oshindji hawu kala momukunda gu li ookilometa dhontumba kokule natse. Ihe oshiwike kehe, uukwanegumbo mboka ohawu ende ondjila ondhigu wu uka kondoolopa wu ye kokugongala. Dhiladhila owala kenyanyu ndyoka hatu kala tu na sho tu wete uukwanegumbo mbuka tawu humu komeho nomumati ngu omukuluntu okwa ninga nokuli omukokolindjila!”

OMPUMBWE YOKUUVITHA MOMALAKA OMAKWIILONGO

12, 13. Gandja oshimoniwa shOmukriste ngoka a li a tameke okulongela Jehova momukalo omupe konima sho a penzelwa.

¹² Omagongalo noongundu moka hamu popiwa omalaka omakwiilongo otaga ka mona uuwanawa owundji miiholelwa yaamwatate naamwameme aakokele. Ishewe, iitopolwa mbyoka ohayi vulu okukala iiwanawa noonkondo okulonga muyo. Pashiholelwa, Brian okwa nyola a ti: “Ngame nomukulukadhi gwandje otwa li tu na onkalamwenyo ya ngungumana konima sho nda penzelwa poomvula 65. Aanona yetu oya adhika ya za mo nale megumbo, nosha li sha pumba okumona aantu tayu ulike ohokwe opo tu konakone nayo Ombiimbeli. Opo nduno onda li nda mono omumati gumwe omugundjuka Omuchiina ngoka a li ta ningi omapekapeko mouniveesiti yomoshitopolwa. Omumati nguka okwa li a taamba ko ehiyo lyokuya kokugongala nonda li nda tameke okukonakona Ombiimbeli naye. Konima yiiwike iishona, okwa li a tameke okuya pamwe nOmuchiina gumwe ngoka ha longo naye. Konima yiiwike iyali, oya li ye ya yatatu, taye ke ya ishewe yane.

¹³ “Pompito yimwe sho Omuchiina omutitano ngoka a li naye ta ningi omapekapeko a pula a konakone Ombiimbeli, onda li nda dhiladhila kutya, ‘Sho ndi na oomvula 65 itashi ti kutya ondi na okuya mopenzela yiilonga yaJehova.’ Onkee ano onda li nda pula omukulukadhi gwandje, ngoka ndi mu vule noomvula mbali, ngele okwa hala okwiilonga Oshichiina. Otwa li twi ilongo Oshichiina tatu pulakene komawi ga kwatwa. Shoka osha ningilwe oomvula omulongo dha ka pita. Ohatu kala tu uvite twa nyashuka sho tatu uvitha moshitopolwa moka hamu popiwa elaka ekwiilongo. Sigo oompano, otwa konakona Ombiimbeli nAachiina 112. Nokuli oyendji yomuyo oye enda ko kokugongala. Ngashingeyi gumwe gwomuyo oku li miilonga yimwe natse e li omukokolindjila.”

KALA HO NYANYUKILWA SHOKA TO VULU OKUNINGA

14. Aakriste aakokele otaya vulu okukala ya nyanyukilwa shike, nongiini oshiholelwa shaPaulus tashi ya tsu omukumo?

¹⁴ Nonando Aakriste oyendji mboka ye na oomvula 50 nasha oye na oompito oombwanawa dhokuninga iinima iipe miilonga yaJehova, haayehe taya vulu. Yamwe kaye na uukolele, nayamwe ohaya tonatele aavali yawo mboka aanamimvo nenge aanona mboka ya pumbwa okuyambidhidhwa. Oto vulu okukala wa nyanyukwa mokukala wu shi kutya Jehova oha pandula kehe shimwe shoka to vulu okuninga miilonga ye. Onkee ano pehala lyokukala wu uvitithwe nayi kwaashoka itoo vulu okuninga, kala ho nyanyukilwa shoka to vulu okuninga. Dhiladhila koshiholelwa shomuyapostoli Paulus. Uule woomvula dhontumba, okwa li a kala megumbo ta tonatelwa komukwiita noka li ta vulu okutsikila niilonga ye yuutumwa. Ihe okwa li hu uvithile aantu mboka ya li haye mu talele po nokwa li a koleke eitaalo lyawo. — Iil. 28:16, 30, 31.

15. Omolwashike twa lenga noonkondo Aakriste aakokele?

¹⁵ Jehova oha pandula wo shoka aanamimvo haya ningi miilonga ye. Okwa lenga iilonga mbyoka aakokele Aakriste haya ningi opo ye mu tange, nonando Salomo okwa popya kutya omasiku guudhigu uuna omuntu kee na uukolele hago naanaa omathimbo omawanawa gonkalamwenyo. (Luk. 21:2-4) Aamwatate naamwameme ohaya pandula oshiholelwa shuudhiginini shaapiya yaJehova mboka ye li mokati kawo mboka ya kala noku mu longela ethimbo ele.

16. Omauthembahenda geni omukokele Hanna tashi vulika a li inaa vula okumona, ihe okwa li a vulu okuninga shike opo a longele Kalunga?

¹⁶ Ombiimbeli otayi popi kutya omukiintu gumwe omukokele gwedhina Hanna okwa li a tsikile okulongela Jehova nuudhiginini sigo omuukulupe. Okwa li omuselekadhi gwoomvula 84 sho Jesus a valwa. Otashi vulika inaa kala ko we ethimbo ele opo a ninge omulanduli gwaJesus, a gwayekwe nombepo ondjapuki, nenge a nyanyukilwe okuuvitha onkundana ombwanawa yUukwaniilwa. Ihe Hanna okwa li ha nyanyukilwa shoka a li ha vulu okuninga. “Ethimbo alihe okwa kala motempeli koshipala shaKalunga uusiku nomutenya.” (Luk. 2:36, 37) Kehe ongula nongulohi omusaaseri ta ningi omatsinino motempeli, Hanna otashi vulika a li ha kala mongundu yaamboka ya li haya kala mehale lyopondje lyotempeli ta galikana momutima tashi vulika uule wetatawili. Sho Hanna a mono okanona Jesus, okwa tameke “ta hokolola okanona kwaayehe mboka ya li ya tegelela ethimbo lyekulilo lyaJerusalem.” — Luk. 2:38.

17. Ongiini tatu vulu okukwathela aakokele naamboka taye ehama ya kuthe ombinga melongelokalunga lyashili?

¹⁷ Kunena otu na okukala twi ilongekidhila okukwathela aakokele nenge Aakriste mboka taye ehama. Otashi vulika yamwe mboka ya halelela okukala pokugongala kehe kwegongalo nopiigongi ihaya vulu oku shi ninga. Kiitopolwa yimwe, omagongalo ohaga ningi elongekidho lyopahole aakokele ya pulakene kwaashoka tashi ningwa pokugongala okupitila mongodhi. Kiitopolwa yilwe, shoka ohashi vulu okukala itaashi wapa. Ihe nonando ongawo, Aakriste mboka ihaaya vulu okukala pokugongala kehe otaya vulu natango okwaambidhidha elongelokalunga lyashili. Pashiholelwa, otaya vulu okugalikana opo egongalo lyopaKriste li kale tali shi enditha nawa. — Lesha Episalomi 92:13, 14.

18, 19. (a) Omolwashike Aakriste aakokele tashi vulika kaaya dhimbulule kutya ohaya tsu yalwe omukumo lela? (b) Oolye taya vulu okutula miilonga omayele ngaka: “Dhimbulukwa Omushiti gwoye”?

¹⁸ Aakriste aakokele otashi vulika kaaya dhimbulule kutya ohaya tsu yalwe omukumo shi thike peni. Pashiholelwa, nonando Hanna okwa li omudhiginini mokuya kotempeli oomvula adhihe ndhoka, otashi vulika a li ineeshi dhiladhila kutya konima yoomvula omathele oshiholelwa she osha li tashi ka tsa yalwe omukumo. Ohole yaHanna yokuhola Jehova oya nyolwa mOmanyolo. Nokaapu na omalimbililo ohole yoye yokuhola Kalunga oyi shiwike kooitaali ooyakweni. Osho molwaashoka Oohapu dhaKalunga tadhi ti: “Oomvi dhokomutse odho oshishani shuulenga; otashi adhika mondjila yuuyuuki.” — Omayel. 16:31.

¹⁹ Atuheni otu na omangambeko mwaashoka tatu vulu okulonga miilonga yaJehova. Ihe mboka tu na natango oonkondo nuukolele natu kaleke momadhiladhilo oohapu ndhika dha nwethwa mo: “Dhimbulukwa Omushiti gwoye momasiku guugundjuka woye, manga omasiku guudhigu inaage ya.” — Omuuv. 12:1.