Natu kale hatu tekele mpoka twa kuna opo oombuto dhi mene
1. Oshike shi na okutekelwa opo shi mene?
1 Ngele owu na oshikunino owu na okushitekela opo oombuto ndhoka wa kuna dhi mene. Shoka osha faathana noombuto ndhoka hatu kunu momitima dhaantu mboka hatu uvithile moshitopolwa shetu. (1 Kor. 3:6) Opo oombuto ndhoka dhopathaneko dhi pite nodhi koke, otu na okuninga omaishunoko opo tu ke dhi tekele nOohapu dhaKalunga.
2. Ongiini tatu vulu okukwathela omunegumbo a kale e na ohokwe mwaashoka tatu ka kundathana naye uuna tatu ningi eishunoko?
2 Kala ho pula: Uuna to ilongekidhile shoka to ka popya muukalele, longekidha epulo ta li pendutha ohokwe yomunegumbo opo wu galuke wu ye wu li yamukule. Pula epulo ndyoka pehulilo lyoonkundathana dheni e to ningi omalongekidho kutya oto galuka uunake. Oyendji oya mona kutya ohashi kwathele ngele oya hogolola membo Omalongo gOmbiimbeli shoka taya ka popya opo yu ulukile omunegumbo kutya ekonakonombiimbeli ohali ningwa ngiini.
3. Ngele omunegumbo oku ulike ohokwe, owu na okunyola uuyelele wuni kombinga ye?
3 Nyola uuyelele: Konima ngele wa ningi etalolopo lyotango, nyola uuyelele kombinga yomunegumbo. Nyola edhina nondjukithi ye. Nyola wo esiku nethimbo ndyoka wa popi naye, kombinga yaashoka mwa popi, noshileshomwa ngele owe mu pa. Otashi vulika a popi kombinga yelongelokalunga moka e li, kombinga yuukwanegumbo, nenge kombinga yaashoka hi ipula nasho nenge e na ohokwe musho. Uuyelele mboka otawu ke ku kwathela wu tameke oonkundathana sho to ka galuka. Nyola wo esiku ndyoka mu uvathana wu galuke nosho wo epulo ndyoka to ka yamukula.
4. Omolwashike kaatu na okuteka omukumo ngele ngoka u ulika ohokwe ihatu mu adha mo megumbo?
4 Ino teka omukumo: Satana ota ka ninga ngaashi ta vulu opo ‘a kuthe mo oohapu’ ndhoka dha kunwa momutima gwomuntu. (Mark. 4:14, 15) Onkee ano, ino teka omukumo ngele ngoka u ulika ohokwe iho mu adha mo megumbo. Mbela ito vulu oku mu nyolela ontumwafo nenge wu mu nyolele okambapila e to ka thigi posheelo? Omukokolindjila gumwe okwa li a tameke ekonakonombiimbeli nomukulukadhi gumwe petalelopo lye lyotango, ihe ka li e mu adha mo megumbo sho a shuna ko, onkee ano, okwa li e mu nyolele ontumwafo. Sho omumwameme e ke mu adha mo megumbo, omukulukadhi okwa li a nyanyukwa molwaashoka omumwameme okwa li u ulike kutya oku na ko nasha naye. Sho tatu tekele mpoka twa kuna oombuto dhoshili yOohapu dhaKalunga, ohashi tu etele enyanyu uuna tu wete oombuto ndhoka tadhi piti, tadhi koko ‘notadhi imike iiyimati lwomilongo ndatu, lwomilongo hamano, nolwethele.’ — Mark. 4:20.