Mbela owi ilongekidha ngaa shili okuungaunga nonkalo yopaunamiti yopaulumompumbwe?
Atuheni ohashi vulika tu iyadhe ombadhilila monkalo ya pumbwa ekwatho lyopaunamiti lyopaulumompumbwe. (Jak. 4:14) Ngele otwa kotoka, otu na okukala twi ilongekidha komeho yethimbo. (Omayel. 22:3) Mbela owa nyola nale kutya epango lini nosho wo omilandu dhepango ndhoka to ka taamba uuna itoo vulu okupopya? Opo wu mone ekwatho, tala okavidio Transfusion-Alternative Health Care — Meeting Patient Needs and Rights, oshitopolwa oshitiyali shoka-DVD ke na oshipalanyolo Transfusion-Alternatives — Documentary Series. Sho to ka tala konga omayamukulo gomapulo taga landula. Molwaashoka okavidio otaku ulike omathano gaantu taya tandwa, aavali oye na okutokola ngele aanona aashona otaya vulu okuka tala.
(1) Omolwashike oondohotola dhimwe naatseyinawa yuunamiti ya lundulula omadhiladhilo gawo kombinga yokutulwa ombinzi? (2) Gandja iiholelwa itatu yomatando ga kitakana ngoka ga ningwa nopwaahe na okutulwa ombinzi. (3) Omolwashike oondohotola omayovi ogendji naatandi yamwe muuyuni auhe ye na ohokwe yokukwathela aavu nopwaahe na oku ya tula ombinzi? (4) Omakonakono ngoka opo ga ningwa miipangelo oga holola shike shi na ko nasha nokulongitha ombinzi? (5) Okutulwa ombinzi oku na iilanduliko yini ya nika oshiponga? (6) Aatseyinawa yuunamiti oya thiki pehulithodhiladhilo lini li na ko nasha nuuwanawa mboka hawu zi mokupangwa nopwaahe na okutulwa ombinzi? (7) Oshike hashi etitha o-anemia (okukala kuu na ombinzi ya gwana molutu), nongiini omuntu ngoka e yi na ta vulu okukwathelwa? (8) Oosele dhombinzi ontiligane otadhi vulu okwiindjipalekwa ngiini molutu lwomuvu? (9) Omikalo dhini hadhi longithwa opo omuntu kaa kanithe ombinzi oyindji pethimbo lyetando? (10) Mbela aanona aashona nenge aantu mboka ya li moshiponga oshinene otaya vulu okupangwa nopwaahe na okutulwa ombinzi? (11) Ekotampango lini lya simanenena tali dhana onkandangala ngele tashi ya pesiloshimpwiyu ewanawa lyopaunamiti?
Otaku hokololwa kutya aauvithi oyendji inaya udhitha okakalata ko-Durable Power of Attorney for Health Care, yo yamwe ihaye ende nako ethimbo kehe. Omutonateli gwongundu kehe oku na okushilipaleka kutya kehe gumwe mongundu ye oku na okakalata hoka ku udhithwa. Kehe gumwe oku na okuninga etokolo lyopaumwene komeho yethimbo lya kankamena keiyuvo lye lya dheulwa kOmbiimbeli kutya epango lini ndyoka lyu ulikwa mokavidio ta ka taamba ko naandyoka itaa ka taamba ko. Opo wu mone uuyelele owundji wu na sha niinima mbika, tala ontopolwa onti-7 membo ‘Ohole yaKalunga’ nokulesha uuyelele mboka. Tala wo okagwedhwa kOshiingilisa mUukalele Wetu wUukwaniilwa waNovomba 2006. Lwahugunina, ngele owa ninginithwa, nyola omahogololo goye mokakalata koye ko-DPA nokukala ho ende nako aluhe.
[Oohapu dha simana pepandja 3]
Mbela owa nyola nale kutya epango lini nosho wo omilandu dhepango ndhoka to ka taamba uuna itoo vulu okupopya?